1大衛ê詩；交hō͘樂官。1) Chiah-ê天講起上帝ê榮光，　　穹蒼報揚伊ê手所做ê。Tāi-pi̍t ê si; kau hō͘ Ga̍k-koaⁿ.1) Chiah ê thiⁿ kóng-khí Siōng-tè ê êng-kng, Kiong-chhong pò-iông I ê chhiú só͘ chòe--ê.

2Chit日tùi hit日發出言語，　　Chit暝tùi hit暝傳出知識。Chit-ji̍t tùi hit-ji̍t hoat-chhut giân-gú, Chit-mî tùi hit-mî thoân-chhut chai-bat.

3無言無語；　　In ê聲無thang聽見。Bô giân bô gú; In ê siaⁿ bô thang thiaⁿ-kìⁿ.

4In ê準繩遍tī天下，　　In ê言語到tī地極。　　上帝tī in中間為tio̍h日頭安置帳房。In ê chún-chîn piàn tī thiⁿ-ē, In ê giân-gú kàu tī tōe-ke̍k. Siōng-tè tī in tiong-kan ūi-tio̍h ji̍t-thâu an-tì tiùⁿ-pâng.

5日頭親像新kiáⁿ婿出伊ê房，　　亦親像猛勇ê人歡喜走伊ê路。Ji̍t-thâu chhin-chhiūⁿ sin-kiáⁿ-sài chhut i ê pâng, Ia̍h chhin-chhiūⁿ béng-ióng ê lâng hoaⁿ-hí cháu i ê lō͘.

6伊tùi天ê chit-pêng出，　　Se̍h到天ê hit-pêng；　　無一項物khǹg密，無得tio̍h伊ê熱氣。I tùi thiⁿ ê chit-pêng chhut, Se̍h kàu thiⁿ ê hit-pêng; Bô chi̍t-hāng-mi̍h khǹg-ba̍t, bô tit-tio̍h i ê jia̍t-khì.

7耶和華ê律法齊全，能hō͘人ê心神活起來；　　耶和華ê干證確實，能hō͘戇人有智慧。Iâ-hô-hoa ê lu̍t-hoat chiâu-chn̂g, ōe hō͘ lâng ê sim-sîn oa̍h--khí-lâi; Iâ-hô-hoa ê kan-chèng khak-si̍t, ōe hō͘ gōng-lâng ū tì-hūi.

8耶和華ê教示正直，能hō͘人ê心歡喜；　　耶和華ê命令清潔，能hō͘人ê目睭光明。Iâ-hô-hoa ê kà-sī chèng-ti̍t, ōe hō͘ lâng ê sim hoaⁿ-hí; Iâ-hô-hoa ê bēng-lēng chheng-kiat, ōe hō͘ lâng ê ba̍k-chiu kng-bêng.

9敬畏耶和華ê道理是清氣，永遠存在；　　耶和華ê判斷真實，一概是公義。Keng-ùi Iâ-hô-hoa ê tō-lí sī chheng-khì, éng-oán chûn-chāi; Iâ-hô-hoa ê phòaⁿ-toàn chin-si̍t, it-khài sī kong-gī.

10比金，比chōe-chōe好金，khah thang欣慕；　　比蜜，比蜂房滴落來ê蜜khah甜。Pí kim, pí chōe-chōe hó kim, khah thang him-bō͘; Pí bi̍t, pí phang-pâng tih--lo̍h-lâi ê bi̍t khah-tiⁿ.

11Koh你ê奴僕tùi chiah-ê受警戒；　　守chiah-ê有大賞賜。Koh Lí ê lô͘-po̍k tùi chiah-ê siū kéng-kài; Siú chiah-ê ū tōa siúⁿ-sù.

12Chī-chūi會知伊ê失錯ah？　　求你除去我暗靜ê過失。Chī-chūi ōe chai i ê sit-chhò ah? Kiû Lí tû--khì góa àm-chīⁿ ê kè-sit.

13求你阻止你ê奴僕，無故意犯罪；　　M̄准hit-ê罪惡管轄我；　　我就完全，免犯大罪。Kiû Lí chó͘-chí Lí ê lô͘-po̍k, bô kò͘-ì hoān-chōe; M̄-chún hit ê chōe-ok koán-hat góa; Góa chiū oân-choân, bián hoān tōa-chōe.

14耶和華我ê石磐，救贖我ê主ah；　　願我ê嘴所講ê，心所想ê，tī你ê面前得tio̍h接納。Iâ-hô-hoa góa ê chio̍h-pôaⁿ, kiù-sio̍k góa ê Chú ah; Goān góa ê chhùi só͘ kóng--ê, sim só͘ siūⁿ--ê, tī Lí ê bīn-chêng tit-tio̍h chiap-la̍p.

1大衛ê詩；交hō͘樂官。1) 願耶和華tī患難ê日聽你；　　願雅各ê上帝ê名安置你tī高ê所在；Tāi-pi̍t ê si; kau hō͘ Ga̍k-koaⁿ.1) Goān Iâ-hô-hoa tī hoān-lān ê ji̍t thiaⁿ lí; Goān Ngá-kok ê Siōng-tè ê miâ an-tì lí tī koâiⁿ ê só͘-chāi;

2Tùi聖所幫贊你，　　Tùi錫安扶持你。Tùi sèng-só͘ pang-chān lí, Tùi Sek-an hû-chhî lí.

3記念你一切所獻ê，　　接納你ê燒祭。[Sè-la̍h]Kì-liām lí it-chhè só͘ hiàn--ê, Chiap-la̍p lí ê sio-chè. [Sè-la̍h

4照你ê心所ài-ê hō͘你，　　成你一切ê計畫。Chiàu lí ê sim só͘-ài-ê hō͘ lí, Chiâⁿ lí it-chhè ê kè-e̍k.

5阮beh因為你ê救恩來唱歌；　　阮beh奉阮ê上帝ê名來khiā旗。　　願耶和華成你一切所求ê。Goán beh in-ūi Lí ê kiù-un lâi chhiùⁿ-koa; Goán beh hōng goán ê Siōng-tè ê miâ lâi khiā-kî. Goān Iâ-hô-hoa chiâⁿ lí it-chhè só͘ kiû--ê.

6Taⁿ我知耶和華救伊受抹油ê，　　Beh對伊聖ê天聽伊；　　用伊chiàⁿ手ê氣力救伊。Taⁿ góa chai Iâ-hô-hoa kiù I siū-boah-iû--ê, Beh tùi I sèng ê thiⁿ thiaⁿ--i; Ēng i chiàⁿ-chhiú ê khùi-la̍t kiù i.

7有人óa靠車，有人óa靠馬；　　獨獨阮beh講起耶和華阮上帝ê名。Ū lâng óa-khò chhia, ū lâng óa-khò bé; To̍k-to̍k goán beh kóng-khí Iâ-hô-hoa goán Siōng-tè ê miâ.

8In仆落跋倒；　　阮就起來khiā在在。In phak-lo̍h poa̍h-tó; Goán chiū khí--lâi khiā chāi-chāi.

9求耶和華拯救；　　阮求叫ê時，願王聽阮。Kiû Iâ-hô-hoa chín-kiù; Goán kiû-kiò ê sî, goān Ông thiaⁿ goán.

1大衛ê詩；交hō͘樂官。1) 耶和華ah，王beh因為你ê氣力來歡喜。　　因為你ê拯救，伊ê快樂怎樣ê大！Tāi-pi̍t ê si; kau hō͘ Ga̍k-koaⁿ.1) Iâ-hô-hoa ah, ông beh in-ūi Lí ê khùi-la̍t lâi hoaⁿ-hí. In-ūi Lí ê chín-kiù, i ê khoài-lo̍k cháiⁿ-iūⁿ ê tōa!

2伊ê心所ài-ê，你已經hō͘伊；　　伊ê嘴所求ê，你無m̄允伊。[Sè-la̍h]I ê sim só͘-ài--ê, Lí í-keng hō͘ i; I ê chhùi só͘ kiû--ê, Lí bô m̄ ún i. [Sè-la̍h

3因為你用大福氣迎接伊，　　用好金ê冕旒戴tī伊ê頭殼。In-ūi Lí ēng tōa hok-khì ngiâ-chih i, Ēng hó-kim ê bián-liû tì tī i ê thâu-khak.

4伊對你求活命，你就hō͘伊；　　就是長歲壽到tī永遠。I tùi Lí kiû oa̍h-miā, Lí chiū hō͘ i; Chiū-sī tn̂g hè-siū kàu tī éng-oán.

5伊因為你ê拯救，有大榮光；　　你koh將尊貴威嚴hē tī伊ê身上。I in-ūi Lí ê chín-kiù, ū tōa êng-kng; Lí koh chiong chun-kùi ui-giâm hē tī i ê sin-chiūⁿ.

6你hō͘伊有大福氣，到tī永遠；　　Koh hō͘伊tī你ê面前歡喜快樂。Lí hō͘ i ū tōa hok-khì, kàu tī éng-oán; Koh hō͘ i tī Lí ê bīn-chêng hoaⁿ-hí khoài-lo̍k.

7因為王óa靠耶和華；　　Tī至koânê ê慈愛無致到搖choah。In-ūi ông óa-khò Iâ-hô-hoa; tī Chì-koâiⁿ--ê ê chû-ài bô tì-kàu iô-choah.

8你ê手beh chhē-tio̍h你一切ê對敵；　　你ê chiàⁿ手beh chhē-tio̍h hiah-ê怨恨你ê人。Lí ê chhiú beh chhē-tio̍h Lí it-chhè ê tùi-te̍k; Lí ê chiàⁿ-chhiú beh chhē-tio̍h hiah ê oàn-hūn Lí ê lâng.

9你受氣ê時，beh hō͘ in親像炎熱ê火爐；　　耶和華beh tī伊ê大受氣中吞in，　　火beh kā in燒lio去。Lí siū-khì ê sî, beh hō͘ in chhin-chhiūⁿ iām-jia̍t ê hé-lô͘; Iâ-hô-hoa beh tī I ê tōa siū-khì-tiong thun--in, Hé beh kā in sio-lio--khì.

10你beh tùi世上剿滅in ê kiáⁿ孫；　　Tùi人ê中間剿滅in ê後裔。Lí beh tùi sè-chiūⁿ châu-bia̍t in ê kiáⁿ-sun; Tùi lâng ê tiong-kan châu-bia̍t in ê hō͘-è.

11因為in有意思beh害你；　　In 設計謀，總是bōe成。In-ūi in ū ì-sù beh hāi Lí; In siat kè-bô͘, chóng-sī bōe chiâⁿ.

12你beh hō͘ in oa̍t-tńg身走，　　你beh開弓，射in ê面。Lí beh hō͘ in oa̍t-tńg-sin cháu, Lí beh khui keng, siā in ê bīn.

13耶和華ah，願你tùi你ê氣力升高；　　Án-ni阮beh吟詩o-ló你ê大權能。Iâ-hô-hoa ah, goān Lí tùi Lí ê khùi-la̍t seng-koâiⁿ; Án-ni goán beh gîm-si o-ló Lí ê tōa koân-lêng.