1大衛ê詩；交hō͘樂官；調用「早起時ê鹿母」。1) 我ê上帝，我ê上帝，啥事放離我？　　啥事離開遠遠，無救我；m̄聽我喉叫ê話？Tāi-pi̍t ê si; kau hō͘ Ga̍k-koaⁿ; tiāu, ēng "Chá-khí sî ê lo̍k-bú".1) Góa ê Siōng-tè, góa ê Siōng-tè, siáⁿ-sū pàng-lī góa? Siáⁿ-sū lī-khui hn̄g-hn̄g, bô kiù góa; m̄-thiaⁿ góa âu-kiò ê ōe?

2我ê上帝ah，我日時求叫，你無聽我；　　暝時求叫，我亦無靜靜。Góa ê Siōng-tè ah, góa ji̍t--sî kiû-kiò, Lí bô thiaⁿ góa; Mî--sî kiû-kiò, góa ia̍h bô chēng-chēng.

3總是你是聖，　　你是用以色列ê o-ló做座位ê。Chóng-sī Lí sī sèng, Lí sī ēng Í-sek-lia̍t ê o-ló chòe chō-ūi--ê.

4阮ê列祖óa靠你，　　In óa靠你，你就拯救in。Goán ê lia̍t-chó͘ óa-khò Lí, In óa-khò Lí, Lí chiū chín-kiù in.

5In哀求你，就得tio̍h拯救；　　In óa靠你就不致見笑。In ai-kiû Lí, chiū tit-tio̍h chín-kiù; In óa-khò Lí chiū put-tì kiàn-siàu.

6總是我是蟲thōa，m̄是人；　　Hō͘人譏刺，hō͘百姓看輕。Chóng-sī góa sī thâng-thōa, m̄-sī lâng; Hō͘ lâng ki-chhì, hō͘ peh-sìⁿ khòaⁿ-khin.

7凡若看見我ê，lóng恥笑我；　　In ngiauh-嘴搖頭，講，Hoān-nā khòaⁿ-kìⁿ góa ê, lóng thí-chhiò góa; In ngiauh-chhùi iô-thâu, kóng,

8Tio̍h將本身交代耶和華，伊thang救伊；　　耶和華既然歡喜伊，伊thang救伊。Tio̍h chiong pún-sin kau-tài Iâ-hô-hoa, I thang kiù--i; Iâ-hô-hoa kì-jiân hoaⁿ-hí i, I thang kiù--i.

9總是你是hō͘我出老母ê胎ê，　　我tī老母ê胸前，你hō͘我óa靠你。Chóng-sī Lí sī hō͘ góa chhut lāu-bú ê thai--ê, Góa tī lāu-bú ê heng-chêng, Lí hō͘ góa óa-khò Lí.

10我tùi胎裡出，就交代你；　　Tùi我出老母ê腹肚，你是我ê上帝。Góa tùi thai--nih chhut, chiū kau-tài Lí; Tùi góa chhut lāu-bú ê pak-tó͘, Lí sī góa ê Siōng-tè.

11M̄-thang離開我遠遠；因為患難逼近，　　無有幫贊我ê。M̄-thang lī-khui góa hn̄g-hn̄g; in-ūi hoān-lān pek-kūn, Bô ū pang-chān góa ê.

12有chōe-chōe牛káng圍纍我；　　Pa-san勇ê牛四面圍困我。Ū chōe-chōe gû-káng ûi-lûi góa; Pa-san ióng ê gû sì-bīn ûi-khùn góa.

13In ǹg我開嘴，　　親像teh peh拆，teh大聲哮ê獅。In ǹg góa khui-chhùi, Chhin-chhiūⁿ teh peh-thiah, teh tōa-siaⁿ háu ê sai.

14我親像水piàⁿ出，我ê骨lóng thu̍t-lûn；　　我ê心親像蠟，消熔tī腹內。Góa chhin-chhiūⁿ chúi piàⁿ-chhut, Góa ê kut lóng thu̍t-lûn; Góa ê sim chhin-chhiūⁿ la̍h, Siau-iûⁿ tī pak-lāi.

15我ê精力枯焦，親像hāu-phiaⁿ-phè；　　我ê舌連tī我ê chiūⁿ-kiuⁿ；　　你hē我tī死地ê土粉。Góa ê cheng-le̍k ko͘-tâ, chhin-chhiūⁿ hāu-phiaⁿ-phè; Góa ê chi̍h liâm tī góa ê chiūⁿ-kiuⁿ; Lí hē góa tī sí-tōe ê thô͘-hún.

16狗ê類圍我；　　Pháiⁿ黨包圍我；　　In鑿我ê手，我ê腳。Káu ê lūi ûi góa; Pháiⁿ-tóng pau-ûi góa; In chha̍k góa ê chhiú, góa ê kha.

17我ê骨頭，我lóng會算得；　　In teh看我，teh燒ǹg我。Góa ê kut-thâu, góa lóng ōe sǹg-tit; In teh khòaⁿ góa, teh siòng góa.

18In分我ê衫，　　Liam-khau我ê衣服。In pun góa ê saⁿ, Liam-khau góa ê i-ho̍k.

19耶和華ah，求你m̄-thang離開我遠遠；　　我ê氣力ah，求你緊緊來幫贊我。Iâ-hô-hoa ah, kiû Lí m̄-thang lī-khui góa hn̄g-hn̄g; Góa ê khùi-la̍t ah, kiû Lí kín-kín lâi pang-chān góa.

20求你救我ê神魂脫離刀劍；　　救我ê性命脫離狗ê類ê勢力。Kiû Lí kiù góa ê sîn-hûn thoat-lī to-kiàm; Kiù góa ê sìⁿ-miā thoat-lī káu ê lūi ê sè-le̍k.

21救我脫離獅ê嘴；　　你已經聽我，hō͘我脫離野牛ê角。Kiù góa thoat-lī sai ê chhùi; Lí í-keng thiaⁿ góa, hō͘ góa thoat-lī iá-gû ê kak.

22我beh報揚你ê名tī我ê兄弟；　　我beh o-ló你tī會中。Góa beh pò-iông Lí ê miâ tī góa ê hiaⁿ-tī; Góa beh o-ló Lí tī hōe-tiong.

23Lín驚畏耶和華ê，tio̍h o-ló伊；　　雅各ê後裔，lóng tio̍h榮光伊。　　以色列ê後裔，lóng tio̍h敬畏伊。Lín kiaⁿ-ùi Iâ-hô-hoa--ê, tio̍h o-ló I; Ngá-kok ê hō͘-è, lóng tio̍h êng-kng I. Í-sek-lia̍t ê hō͘-è, lóng tio̍h kèng-ùi I.

24因為伊無看輕，亦無厭賤，困苦人ê困苦；　　亦無對伊掩面；　　伊求叫伊ê時，伊就聽伊。In-ūi I bô khòaⁿ-khin, ia̍h bô iàm-chiān, khùn-khó͘ lâng ê khùn-khó͘; Ia̍h bô tùi i ng-bīn; I kiû-kiò I ê sî, I chiū thiaⁿ i.

25我tī大聚會ê中間所o-ló-ê，是tùi你來；　　我beh tī驚畏伊ê人ê面前，謝我ê願。Góa tī tōa chū-hōe ê tiong-kan só͘ o-ló--ê, sī tùi lí lâi; Góa beh tī kiaⁿ-ùi I ê lâng ê bīn-chêng, siā góa ê goān.

26謙卑ê人beh得tio̍h食飽；　　Chhē耶和華ê人beh o-ló伊；　　願lín ê心活到永遠。Khiam-pi ê lâng beh tit-tio̍h chia̍h-pá; Chhē Iâ-hô-hoa ê lâng beh o-ló I; Goān lín ê sim oa̍h kàu éng-oán.

27地ê極頭lóng beh siàu念，來歸順耶和華；　　列邦ê萬族lóng beh敬拜tī你ê面前。Tōe ê ke̍k-thâu lóng beh siàu-liām, lâi kui-sūn Iâ-hô-hoa; Lia̍t-pang ê bān-cho̍k lóng beh kèng-pài tī Lí ê bīn-chêng.

28因為國是耶和華ê；　　伊是萬國ê主宰。In-ūi kok sī Iâ-hô-hoa ê; I sī bān-kok ê chú-cháiⁿ.

29地上一切好漢ê人beh lim食來敬拜；　　見若歸土ê人，bōe能保全性命ê，lóng beh仆拜tī祂ê面前。Tōe-chiūⁿ it-chhè hó-hàn ê lâng beh lim chia̍h lâi kèng-pài; Kìⁿ-nā kui-thó͘ ê lâng, bōe-ōe pó-choân sìⁿ-miā--ê, lóng beh phak-pài tī I ê bīn-chêng.

30有後裔beh服事伊；　　主ê tāi-chì beh傳tī後代。Ū hō͘-è beh ho̍k-sāi I; Chú ê tāi-chì beh thoân tī āu-tāi.

31In beh來，亦beh傳伊ê公義，　　Hhou7得beh出世ê百姓知chit-ê事是伊做ê。In beh lâi, ia̍h beh thoân I ê kong-gī, Hō͘ tit-beh chhut-sì ê peh-sìⁿ chai chit ê sū sī I chòe--ê.

1大衛ê詩。1) 耶和華是我ê牧者，我無欠缺。Tāi-pi̍t ê si.1) Iâ-hô-hoa sī góa ê bo̍k-chiá, góa bô khiàm-kheh.

2伊hō͘我倒tī青翠ê草埔；　　Chhōa我tī安靜ê水邊。I hō͘ góa tó tī chhiⁿ-chhùi ê chháu-po͘; Chhōa góa tī an-chēng ê chúi-piⁿ.

3伊hō͘我ê靈魂精英；　　為tio̍h伊ê名，chhōa我行義ê路。I hō͘ góa ê lêng-hûn cheng-eng; Ūi-tio̍h I ê miâ, chhōa góa kiâⁿ gī ê lō͘.

4我雖然行過死蔭ê山谷，亦m̄驚災害；　　因為你kap我tī-teh；　　你ê槌，你ê柺，安慰我。Góa sui-jiân kiâⁿ-kè sí-ìm ê soaⁿ-kok, Ia̍h m̄-kiaⁿ chai-hāi; In-ūi Lí kap góa tī-teh; Lí ê thûi, Lí ê koáiⁿ, an-ùi góa.

5Tī我對敵ê面前，你kā我排設筵席；　　你用油抹我ê頭殼；我ê杯滿出來。Tī góa tùi-te̍k ê bīn-chêng, Lí kā góa pâi-siat iân-sia̍h; Lí ēng iû boah góa ê thâu-khak; góa ê poe móa--chhut-lâi.

6恩典kap慈悲的確tè我到一世人；　　我beh永遠khiā起tī耶和華ê厝。Un-tián kap chû-pi tek-khak tè góa kàu chi̍t-sì-lâng; Góa beh éng-oán khiā-khí tī Iâ-hô-hoa ê chhù.

1大衛ê詩。1) 地kap其中所充滿ê，　　世界kap tiàm tī伊中間ê，lóng屬耶和華。Tāi-pi̍t ê si.1) Tōe kap kî-tiong só͘ chhiong-móa ê, Sè-kài kap tiàm tī i tiong-kan ê, lóng sio̍k Iâ-hô-hoa.

2伊將地建立tī海ê頂面，　　安置tī大水ê頂面。I chiong tōe kiàn-li̍p tī hái ê téng-bīn, An-tì tī tōa-chúi ê téng-bīn.

3Chī-chūi能上耶和華ê山？　　Chī-chūi能khiā tī伊聖ê所在？Chī-chūi ōe chiūⁿ Iâ-hô-hoa ê soaⁿ? Chī-chūi ōe khiā tī I sèng ê só͘-chāi?

4就是手清氣，心清潔；　　存心無ǹg虛假，chiù-chōa無khǹg奸詭ê人。Chiū-sī chhiú chheng-khì, sim chheng-kiat; Chûn-sim bô ǹg hu-ké, chiù-chōa bô khǹg kan-kúi ê lâng.

5Chit號人beh得tio̍h耶和華賜福；　　Koh tùi救伊ê上帝得tio̍h義。Chit-hō lâng beh tit-tio̍h Iâ-hô-hoa sù-hok; Koh tùi kiù i ê Siōng-tè tit-tio̍h gī.

6Chiah-ê是chhē耶和華ê族類，　　雅各ê上帝ah，這是ài見你ê面ê人。[Sè-la̍h]Chiah-ê sī chhē Iâ-hô-hoa ê cho̍k-lūi, Ngá-kok ê Siōng-tè ah, che sī ài kìⁿ Lí ê bīn ê lâng. [Sè-la̍h

7城門ah，kia̍h起lín ê頭；　　永遠ê門ah，lín tio̍h受舉起；　　榮光ê王beh入。Siâⁿ-mn̂g ah, kia̍h-khí lín ê thâu; Éng-oán ê mn̂g ah, lín tio̍h siū kú-khí; Êng-kng ê Ông beh ji̍p.

8Hit-ê榮光ê王是是誰？　　就是大氣力大權能ê耶和華，　　Tī交戰有大權能ê耶和華。Hit ê êng-kng ê Ông sī chī-chūi? Chiū-sī tōa khùi-la̍t tōa koân-lêng ê Iâ-hô-hoa, Tī kau-chiàn ū tōa koân-lêng ê Iâ-hô-hoa.

9城門ah，kia̍h起lín ê頭，　　永遠ê門ah，lín亦tio̍h kia̍h起；　　榮光ê王beh入。Siâⁿ-mn̂g ah, kia̍h-khí lín ê thâu, Éng-oán ê mn̂g ah, lín ia̍h tio̍h kia̍h-khí; Êng-kng ê Ông beh ji̍p.

10Hit-ê榮光ê王是是誰？　　萬軍ê耶和華，伊是榮光ê王。[Sè-la̍h]Hit ê êng-kng ê Ông sī chī-chūi? Bān-kun ê Iâ-hô-hoa, I sī êng-kng ê Ông. [Sè-la̍h