1大衛ê詩。1) 耶和華ah，我ê心神仰望你。Tāi-pi̍t ê si.1) Iâ-hô-hoa ah, góa ê sim-sîn gióng-bōng Lí.

2我ê上帝ah，我平素óa靠你，m̄-thang hō͘我見笑。　　M̄-thang hō͘我ê對敵因為贏我來誇口。Góa ê Siōng-tè ah, góa pêng-sò͘ óa-khò Lí, m̄-thang hō͘ góa kiàn-siàu. M̄-thang hō͘ góa ê tùi-te̍k in-ūi iâⁿ góa lâi khoa-kháu.

3見若thèng候你ê，的確無見笑；　　Hiah-ê無緣故行奸詐ê，beh見笑。Kìⁿ-nā thèng-hāu Lí--ê, tek-khak bô kiàn-siàu; Hiah ê bô iân-kò͘ kiâⁿ kan-chà--ê, beh kiàn-siàu.

4耶和華ah，求你將你ê道路指示我，　　將你ê路途教示我。Iâ-hô-hoa ah, kiû Lí chiong Lí ê tō-lō͘ chí-sī góa, Chiong Lí ê lō͘-tô͘ kà-sī góa.

5求你chhōa我tī你ê真理，koh 教示我；　　因為你是救我ê上帝。我thong日thèng候你。Kiû Lí chhōa góa tī Lí ê chin-lí, koh kà-sī góa; In-ūi Lí sī kiù góa ê Siōng-tè. Góa thong-ji̍t thèng-hāu Lí.

6耶和華ah，求你記念你ê憐憫kap你ê慈愛；　　因為這是古早以來常常有ê。Iâ-hô-hoa ah, kiû Lí kì-liām Lí ê lîn-bín kap Lí ê chû-ài; In-ūi che sī kó͘-chá í-lâi siông-siông ū--ê.

7求你m̄-thang記念我少年ê罪過，kap我ê過失；　　耶和華ah，求你照你ê慈愛，因為你ê恩惠記念我。Kiû Lí m̄-thang kì-liām góa siàu-liân ê chē-kòa, kap góa ê kè-sit; Iâ-hô-hoa ah, kiû Lí chiàu Lí ê chû-ài, in-ūi Lí ê un-hūi kì-liām góa.

8耶和華是好koh正直；　　所以伊beh指示罪人行正路。Iâ-hô-hoa sī hó koh chèng-ti̍t; Só͘-í I beh chí-sī chōe-jîn kiâⁿ chiàⁿ-lō͘.

9伊beh用公平引chhōa謙遜ê人，　　伊beh用伊ê道路教示謙遜ê人。I beh ēng kong-pêng ín-chhōa khiam-sùn ê lâng, I beh ēng I ê tō-lō͘ kà-sī khiam-sùn ê lâng.

10見若守伊ê約，kap伊ê干證ê人，　　耶和華款待in lóng是用慈愛誠實。Kìⁿ-nā siú I ê iok, kap I ê kan-chèng ê lâng, Iâ-hô-hoa khoán-thāi in lóng sī ēng chû-ài sêng-si̍t.

11耶和華ah，我ê罪真重；　　求你因為你ê名赦免我。Iâ-hô-hoa ah, góa ê chōe chin tāng; Kiû Lí in-ūi Lí ê miâ sià-bián góa.

12甚麼人敬畏耶和華？　　耶和華beh指示伊所tio̍h揀ê路。Sím-mi̍h lâng kèng-ùi Iâ-hô-hoa? Iâ-hô-hoa beh chí-sī i só͘ tio̍h kéng ê lō͘.

13伊ê心神beh得tio̍h安歇；　　伊ê後裔beh承接土地。I ê sim-sîn beh tit-tio̍h an-hioh; I ê hō͘-è beh sêng-chiap thó͘-tōe.

14耶和華kap敬畏祂ê人親密；　　Koh beh將祂ê約指示in。Iâ-hô-hoa kap kèng-ùi I ê lâng chhin-bi̍t; Koh beh chiong I ê iok chí-sī in.

15我ê目睭常常ǹg耶和華；　　因為伊beh hō͘我ê腳脫離羅網。Góa ê ba̍k-chiu siông-siông ǹg Iâ-hô-hoa; In-ūi I beh hō͘ góa ê kha thoat-lī lô-bāng.

16求你oa̍t-tńg ǹg我，可憐我；　　因為我是孤單koh困苦。Kiû Lí oa̍t-tńg ǹg góa, khó-lîn góa; In-ūi góa sī ko͘-toaⁿ koh khùn-khó͘.

17我ê心內ê憂苦真chōe，　　求你救我脫離tī我lóng總ê患難。Góa ê sim-lāi ê iu-khó͘ chin chōe, Kiû Lí kiù góa thoat-lī tī góa lóng-chóng ê hoān-lān.

18求你看我ê艱難kap我ê勞苦；　　赦免我一切ê罪。Kiû Lí khòaⁿ góa ê kan-lân kap góa ê lô-khó͘; Sià-bián góa it-chhè ê chōe.

19求你看我ê對敵，因為in真chōe；　　In怨恨我真惡毒。Kiû Lí khòaⁿ góa ê tùi-te̍k, in-ūi in chin chōe; In oàn-hūn góa chin ok-to̍k.

20求你保護我ê性命，拯救我；　　Hō͘我無見笑，因為我óa靠你。Kiû Lí pó-hō͘ góa ê sìⁿ-miā, chín-kiù góa; Hō͘ góa bô kiàn-siàu, in-ūi góa óa-khò Lí.

21願純全正直保護我，　　因為我thèng候你。Goān sûn-choân chèng-ti̍t pó-hō͘ góa, In-ūi góa thèng-hāu Lí.

22上帝ah，求你救贖以色列，　　脫離伊一切ê艱苦。Siōng-tè ah, kiû Lí kiù-sio̍k Í-sek-lia̍t, Thoat-lī i it-chhè ê kan-khó͘.

1大衛ê詩。1) 耶和華ah，求你kā我判斷；因為我有照我ê純全來行；　　我óa靠耶和華無搖choah。Tāi-pi̍t ê si.1) Iâ-hô-hoa ah, kiû Lí kā góa phòaⁿ-toàn; in-ūi góa ū chiàu góa ê sûn-choân lâi kiâⁿ; Góa óa-khò Iâ-hô-hoa bô iô-choah.

2耶和華ah，求你鑑察我，試驗我；　　鍛鍊我ê心腸。Iâ-hô-hoa ah, kiû Lí kàm-chhat góa, chhì-giām góa; Thoàn-liān góa ê sim-tn̂g.

3因為你ê慈愛常常tī我ê目睭前；　　我亦有照你ê真理行。In-ūi Lí ê chû-ài siông-siông tī góa ê ba̍k-chiu-chêng; Góa ia̍h ū chiàu Lí ê chin-lí kiâⁿ.

4我bē-bat kap hong-hàm ê人相kap坐；　　亦無kap假做ê人做陣。Góa bē-bat kap hong-hàm ê lâng saⁿ-kap chē; Ia̍h bô kap ké-chòe ê lâng chòe-tīn.

5我怨恨pháiⁿ人ê會；　　無beh kap惡毒ê人同坐。Góa oàn-hūn pháiⁿ-lâng ê hōe; Bô beh kap ok-to̍k ê lâng tâng chē.

6耶和華ah，我beh洗手表明我ê無罪，　　Chiah來se̍h你ê祭壇；Iâ-hô-hoa ah, góa beh sóe chhiú piáu-bêng góa ê bô chōe, Chiah lâi se̍h Lí ê chè-tôaⁿ;

7Thang hō͘人聽見感謝ê聲，　　Koh thang講起你一切奇妙ê所做。Thang hō͘ lâng thiaⁿ-kìⁿ kám-siā ê siaⁿ, Koh thang kóng-khí Lí it-chhè kî-biāu ê só͘-chòe.

8耶和華ah，我疼惜你所tòa ê厝；　　以及你榮光所tī-teh ê所在。Iâ-hô-hoa ah, góa thiàⁿ-sioh Lí só͘ tòa ê chhù; Í-ki̍p Lí êng-kng só͘ tī-teh ê só͘-chāi.

9M̄-thang將我ê靈魂 kap罪人做一下收拾去；　　M̄-thang將我ê活命kap thâi人ê做一下收拾去。M̄-thang chiong góa ê lêng-hûn kap chōe-jîn chòe chi̍t-ē siu-si̍p--khì; M̄-thang chiong góa ê oa̍h-miā kap thâi-lâng--ê chòe chi̍t-ē siu-si̍p--khì.

10In ê手中有奸惡；　　In ê chiàⁿ手滿滿pò͘賂。In ê chhiú-tiong ū kan-ok; In ê chiàⁿ-chhiú móa-móa pò͘-lō͘.

11論到我，我beh照我ê純全來行；　　求你救贖我，憐憫我。Lūn-kàu góa, góa beh chiàu góa ê sûn-choân lâi kiâⁿ; Kiû Lí kiù-sio̍k góa, lîn-bín góa.

12我ê腳khiā tī平坦ê所在，　　Tī眾會中，我beh o-ló耶和華。Góa ê kha khiā tī pîⁿ-tháⁿ ê só͘-chāi, Tī chèng-hōe-tiong, góa beh o-ló Iâ-hô-hoa.

1大衛ê詩。1) 耶和華是我ê光，是我ê拯救；我beh kiaⁿ 是誰？　　耶和華是我活命ê氣力；我beh kiaⁿ 是誰？Tāi-pi̍t ê si.1) Iâ-hô-hoa sī góa ê kng, sī góa ê chín-kiù; góa beh kiaⁿ chī-chūi? Iâ-hô-hoa sī góa oa̍h-miā ê khùi-la̍t; góa beh kiaⁿ chī-chūi?

2Hiah-ê做pháiⁿ ê人，就是我ê仇讎，我ê對敵，來攻擊我，beh食我ê肉，　　Hit時in就tio̍h-tak跋倒。Hiah ê chòe pháiⁿ ê lâng, chiū-sī góa ê kiû-siû, góa ê tùi-te̍k, lâi kong-kek góa, beh chia̍h góa ê bah, Hit-sî in chiū tio̍h-tak poa̍h-tó.

3雖然有軍兵紮營，beh攻擊我，　　我ê心亦無驚惶；　　雖然興起刀兵攻擊我，　　我猶原自在。Sui-jiân ū kun-peng chat-iâⁿ, beh kong-kek góa, Góa ê sim ia̍h bô kiaⁿ-hiâⁿ; Sui-jiân heng-khí to-peng kong-kek góa, Góa iû-goân chū-chāi.

4有一項事我bat對耶和華求，我猶原致意ài得tio̍h；　　就是一世人khiā起耶和華ê厝，　　看伊ê榮光，siàu念伊ê殿。Ū chi̍t hāng sū góa bat tùi Iâ-hô-hoa kiû, góa iû-goân tì-ì ài tit-tio̍h; Chiū-sī chi̍t-sì-lâng khiā-khí Iâ-hô-hoa ê chhù, Khòaⁿ I ê êng-kng, siàu-liām I ê tiān.

5因為患難ê日，伊beh暗靜保護我tī伊ê帳帷內；　　將我khǹg tī伊布棚蓋密ê所在；舉起我tī石磐頂。In-ūi hoān-lān ê ji̍t, I beh àm-chīⁿ pó-hō͘ góa tī I ê tiùⁿ-ûi lāi; Chiong góa khǹg tī I pò͘-pîⁿ khàm-ba̍t ê só͘-chāi; Kú-khí góa tī chio̍h-pôaⁿ-téng.

6Taⁿ我ê頭殼得tio̍h kia̍h起，khah高tī我四面ê對敵；　　我beh tī伊ê布棚獻歡喜ê祭；　　我beh吟詩，亦beh唱歌o-ló耶和華。Taⁿ góa ê thâu-khak tit-tio̍h kia̍h-khí, khah-koâiⁿ tī góa sì-bīn ê tùi-te̍k; Góa beh tī I ê pò͘-pîⁿ hiàn hoaⁿ-hí ê chè; Góa beh gîm-si, ia̍h beh chhiùⁿ-koa o-ló Iâ-hô-hoa.

7耶和華ah，我出聲求叫ê時，求你聽；　　Koh求你憐憫我，應我。Iâ-hô-hoa ah, góa chhut-siaⁿ kiû-kiò ê sî, kiû Lí thiaⁿ; Koh kiû Lí lîn-bín góa, ìn góa.

8你bat講，Lín tio̍h欣慕見我ê面；hit時我ê心tùi你講，　　耶和華ah，我beh欣慕見你ê面。Lí bat kóng, Lín tio̍h him-bō͘ kìⁿ Góa ê bīn; hit-sî góa ê sim tùi Lí kóng, Iâ-hô-hoa ah, góa beh him-bō͘ kìⁿ Lí ê bīn.

9M̄-thang對我掩你ê面；　　M̄-thang受氣來趕你ê奴僕；　　你平素是做我ê幫贊；　　救我ê上帝ah，m̄-thang放sak我，亦m̄-thang離開我。M̄-thang tùi góa ng Lí ê bīn; M̄-thang siū-khì lâi kóaⁿ Lí ê lô͘-po̍k; Lí pêng-sò͘ sī chòe góa ê pang-chān; Kiù góa ê Siōng-tè ah, m̄-thang pàng-sak góa, ia̍h m̄-thang lī-khui góa.

10因為父母離開我，　　耶和華beh收留我。In-ūi pē-bú lī-khui góa, Iâ-hô-hoa beh siu-liû góa.

11耶和華ah，求你用你ê道路指示我；　　因為我ê對敵ê緣故，chhōa我tī平坦ê路。Iâ-hô-hoa ah, kiû Lí ēng Lí ê tō-lō͘ chí-sī góa; In-ūi góa ê tùi-te̍k ê iân-kò͘, chhōa góa tī pîⁿ-tháⁿ ê lō͘.

12M̄-thang將我交hō͘對敵，成in ê心願；　　因為lām-sám干證ê人起來攻擊我，in亦吐出兇惡ê話。M̄-thang chiong góa kau hō͘ tùi-te̍k, chiâⁿ in ê sim-goān; In-ūi lām-sám kan-chèng ê lâng khí-lâi kong-kek góa, in ia̍h thò͘-chhut hiong-ok ê ōe.

13我若m̄信tī活人ê地得tio̍h看見耶和華ê恩惠，　　就的確絕望。Góa nā m̄-sìn tī oa̍h-lâng ê tōe tit-tio̍h khòaⁿ-kìⁿ Iâ-hô-hoa ê un-hūi, Chiū tek-khak choa̍t-bāng.

14Tio̍h thèng候耶和華，　　Tio̍h勇壯，你ê心tio̍h堅固；　　實在tio̍h thèng候耶和華。Tio̍h thèng-hāu Iâ-hô-hoa, Tio̍h ióng-chòng, lí ê sim tio̍h kian-kò͘; Si̍t-chāi tio̍h thèng-hāu Iâ-hô-hoa.