1大衛ê詩。1) 大權能ê ê kiáⁿ ah，lín tio̍h將榮光氣力歸hō͘耶和華，　　歸hō͘耶和華。Tāi-pi̍t ê si.1) Tōa koân-lêng--ê ê kiáⁿ ah, lín tio̍h chiong êng-kng khùi-la̍t kui hō͘ Iâ-hô-hoa, Kui hō͘ Iâ-hô-hoa.

2Tio̍h將耶和華ê名所應該得tio̍h ê榮光歸hō͘伊。　　用聖潔ê裝飾敬拜耶和華。Tio̍h chiong Iâ-hô-hoa ê miâ só͘ eng-kai tit-tio̍h ê êng-kng kui hō͘ I. Ēng sèng-kiat ê chng-thāⁿ kèng-pài Iâ-hô-hoa.

3耶和華ê聲tī水面；　　榮光ê上帝起雷；　　耶和華tī chōe-chōe水ê頂面。Iâ-hô-hoa ê siaⁿ tī chúi-bīn; Êng-kng ê Siōng-tè khí lûi; Iâ-hô-hoa tī chōe-chōe chúi ê téng-bīn.

4耶和華ê聲有大氣力；　　耶和華ê聲滿滿威嚴。Iâ-hô-hoa ê siaⁿ ū tōa khùi-la̍t; Iâ-hô-hoa ê siaⁿ móa-móa ui-giâm.

5耶和華ê聲phah折柏香樹；　　耶和華phah碎黎巴嫩ê柏香樹。Iâ-hô-hoa ê siaⁿ phah-chi̍h pek-hiuⁿ-chhiū; Iâ-hô-hoa phah-chhùi Lī-pa-lùn ê pek-hiuⁿ-chhiū.

6伊亦hō͘伊tiô跳親像牛á；　　Hō͘ 黎巴嫩kap Se-liân tiô跳親像野牛ê kiáⁿ。I ia̍h hō͘ i tiô-thiàu chhin-chhiūⁿ gû-á; Hō͘ Lī-pa-lùn kap Se-liân tiô-thiàu chhin-chhiūⁿ iá-gû ê kiáⁿ.

7耶和華ê聲hō͘火燄分叉。Iâ-hô-hoa ê siaⁿ hō͘ hé-iām pun-chhe.

8耶和華ê聲振動曠野；　　耶和華振動Ka-te-su ê曠野。Iâ-hô-hoa ê siaⁿ tín-tāng khòng-iá; Iâ-hô-hoa tín-tāng Ka-te-su ê khòng-iá.

9耶和華ê聲hō͘鹿母kiaⁿ-tio̍h，來生kiáⁿ；　　亦hō͘樹林ê樹葉lak光光；　　見若tī殿內ê lóng講，榮光。Iâ-hô-hoa ê siaⁿ hō͘ lo̍k-bú kiaⁿ-tio̍h, lâi siⁿ-kiáⁿ; Ia̍h hō͘ chhiū-nâ ê chhiū-hio̍h lak kng-kng; Kìⁿ-nā tī tiān-lāi--ê lóng kóng, Êng-kng.

10大水氾濫ê時，耶和華坐teh做王，　　耶和華坐teh做王，直到永遠。Tōa-chúi hoàn-lām ê sî, Iâ-hô-hoa chē-teh chòe ông, Iâ-hô-hoa chē-teh chòe ông, ti̍t kàu éng-oán.

11耶和華beh賞賜氣力hō͘伊ê百姓；　　耶和華beh用平安賜福伊ê百姓。Iâ-hô-hoa beh siúⁿ-sù khùi-la̍t hō͘ I ê peh-sìⁿ; Iâ-hô-hoa beh ēng pêng-an sù-hok I ê peh-sìⁿ.

1Chit-ê詩是獻宮殿ê歌；大衛做ê。1) 耶和華ah，我beh尊重你做至koân，因為你bat 提拔我，　　無hō͘我ê仇讎對我誇口。Chit ê si sī hiàn kiong-tiān ê koa; Tāi-pi̍t chòe--ê.1) Iâ-hô-hoa ah, góa beh chun-tiōng Lí chòe chì-koâiⁿ, in-ūi Lí bat thê-poa̍t góa, Bô hō͘ góa ê kiû-siû tùi góa khoa-kháu.

2耶和華我ê上帝ah，　　我bat求叫你，你就醫好我。Iâ-hô-hoa góa ê Siōng-tè ah, Góa bat kiû-kiò Lí, Lí chiū i-hó góa.

3耶和華ah，你bat救我ê靈魂tùi陰間起來。　　你hō͘我活teh，免致入墓。Iâ-hô-hoa ah, Lí bat kiù góa ê lêng-hûn tùi im-kan khí--lâi. Lí hō͘ góa oa̍h-teh, bián-tì ji̍p bōng.

4耶和華聖ê百姓ah，lín tio̍h唱歌o-ló伊，　　記念伊ê聖名來感謝I。Iâ-hô-hoa sèng ê peh-sìⁿ ah, lín tio̍h chhiùⁿ-koa o-ló I, Kì-liām I ê sèng miâ lâi kám-siā I.

5因為伊ê受氣不過目nih久；　　伊ê恩典是一生ê久；　　Kui暝雖然有啼哭，　　早起時就有歡喜。In-ūi I ê siū-khì put-kò ba̍k-nih-kú; I ê un-tián sī it-seng ê kú; Kui-mî sui-jiân ū thî-khàu, Chá-khí sî chiū ū hoaⁿ-hí.

6論到我，我tī興通ê時就講，　　我永bōe搖choah。Lūn-kàu góa, góa tī heng-thong ê sî chiū kóng, Góa éng bōe iô-choah.

7耶和華ah，你bat施恩，hō͘我ê山khiā在堅固，　　你掩你ê面，我就擘腹。Iâ-hô-hoa ah, Lí bat si-un, hō͘ góa ê soaⁿ khiā-chāi kian-kò͘, Lí ng Lí ê bīn, góa chiū peh-pak.

8耶和華ah，我求叫你；　　我對耶和華求恩，講，Iâ-hô-hoa ah, góa kiû-kiò Lí; Góa tùi Iâ-hô-hoa kiû un, kóng,

9我流血，我入墓，有啥利益？　　塵埃kiám會o-ló你？kiám會報揚你ê真實mah？Góa lâu-huih, góa ji̍p bōng, ū siáⁿ lī-ek? Tîn-ai kiám ōe o-ló Lí? kiám ōe pò-iông Lí ê chin-si̍t mah?

10耶和華ah，求你聽我，憐憫我；　　耶和華ah，求你幫贊我。Iâ-hô-hoa ah, kiû Lí thiaⁿ góa, lîn-bín góa; Iâ-hô-hoa ah, kiû Lí pang-chān góa.

11你已經將我ê啼哭變做跳舞；　　你將我ê麻衫thǹg去，用歡喜kā我hâ；Lí í-keng chiong góa ê thî-khàu piàn-chòe thiàu-bú; Lí chiong góa ê môa-saⁿ thǹg--khì, ēng hoaⁿ-hí kā góa hâ;

12Thang hō͘我ê心神唱歌，o-ló你，亦無靜靜。　　耶和華我ê上帝ah，我beh感謝你，到永遠。Thang hō͘ góa ê sim-sîn chhiùⁿ-koa, o-ló Lí, ia̍h bô chēng-chēng. Iâ-hô-hoa góa ê Siōng-tè ah, góa beh kám-siā Lí, kàu éng-oán.

1大衛ê詩；交hō͘樂官。1) 耶和華ah，我óa靠你，求你hō͘我永永無見笑；　　照你ê公義拯救我。Tāi-pi̍t ê si; kau hō͘ Ga̍k-koaⁿ.1) Iâ-hô-hoa ah, góa óa-khò Lí, kiû Lí hō͘ góa éng-éng bô kiàn-siàu; Chiàu Lí ê kong-gī chín-kiù góa.

2求你àⁿ耳孔聽我，緊緊來救我；　　做我堅固ê石磐，做拯救我ê衛所。Kiû Lí àⁿ hī-khang thiaⁿ góa, kín-kín lâi kiù góa; Chòe góa kian-kò͘ ê chio̍h-pôaⁿ, chòe chín-kiù góa ê ōe-só͘.

3因為你是我ê山巖，我ê山寨。　　所以求你因為你ê名來引chhōa我，指點我。In-ūi Lí sī góa ê soaⁿ-giâm, góa ê soaⁿ-chē. Só͘-í kiû Lí in-ūi Lí ê miâ lâi ín-chhōa góa, chí-tiám góa.

4人暗靜張羅網beh網我，求你救我脫離；　　因為你是我ê衛所。Lâng àm-chīⁿ tiuⁿ lô-bāng beh bāng góa, kiû Lí kiù góa thoat-lī; In-ūi Lí sī góa ê ōe-só͘.

5我將我ê靈魂交tī你ê手；　　耶和華真實ê上帝ah，你有救贖我。Góa chiong góa ê lêng-hûn kau tī Lí ê chhiú; Iâ-hô-hoa chin-si̍t ê Siōng-tè ah, Lí ū kiù-sio̍k góa.

6我怨恨hiah-ê信奉虛假ê人；　　獨獨我óa靠耶和華。Góa oàn-hūn hiah ê sìn-hōng hu-ké ê lâng; To̍k-to̍k góa óa-khò Iâ-hô-hoa.

7我因為你ê慈愛beh歡喜快樂；　　因為你有看見我ê艱苦，　　知我心神ê艱難。Góa in-ūi Lí ê chû-ài beh hoaⁿ-hí khoài-lo̍k; In-ūi Lí ū khòaⁿ-kìⁿ góa ê kan-khó͘, Chai góa sim-sîn ê kan-lân.

8你bē-bat將我交tī對敵ê手；　　你hō͘我ê腳khiā tī開闊ê所在。Lí bē-bat chiong góa kau tī tùi-te̍k ê chhiú; Lí hō͘ góa ê kha khiā tī khui-khoah ê só͘-chāi.

9耶和華ah，我tī患難中，求你憐憫我；　　我ê目睭因為憂悶phah-pháiⁿ，我ê心神，我ê身體，亦是án-ni。Iâ-hô-hoa ah, góa tī hoān-lān tiong, kiû Lí lîn-bín góa; Góa ê ba̍k-chiu in-ūi iu-būn phah-pháiⁿ, Góa ê sim-sîn, góa ê sin-thé, ia̍h sī án-ni.

10我ê性命因為憂苦來消無，　　我ê年歲為tio̍h吐氣亦án-ni；　　我ê氣力因為我ê罪惡來衰lám；　　我ê骨頭亦枯焦。Góa ê sìⁿ-miā in-ūi iu-khó͘ lâi siau-bô, Góa ê nî-hè ūi-tio̍h thó͘-khùi ia̍h án-ni; Góa ê khùi-la̍t in-ūi góa ê chōe-ok lâi soe-lám; Góa ê kut-thâu ia̍h ko͘-tâ.

11我因為我一切ê對敵成做凌辱；　　Tī我ê厝邊tau koh-khah傷重；hiah-ê bat我ê人lóng驚我；　　Tī外面看見我ê人走閃離開我。Góa in-ūi góa it-chhè ê tùi-te̍k chiâⁿ-chòe lêng-jio̍k; Tī góa ê chhù-piⁿ-tau koh-khah siong-tiōng; hiah ê bat góa ê lâng lóng kiaⁿ góa; Tī gōa-bīn khòaⁿ-kìⁿ góa ê lâng cháu-siám lī-khui góa.

12我親像死人hō͘人bōe記得，無人siàu念；　　我親像破碎ê器具。Góa chhin-chhiūⁿ sí-lâng hō͘ lâng bōe kì-tit, bô lâng siàu-liām; Góa chhin-chhiūⁿ phòa-chhùi ê khì-kū.

13因為我聽見chōe-chōe人ê譭謗，四圍lóng是驚惶；　　In相kap參詳攻擊我ê時，　　就計謀beh害我ê性命。In-ūi góa thiaⁿ-kìⁿ chōe-chōe lâng ê húi-pòng, Sì-ûi lóng sī kiaⁿ-hiâⁿ; In saⁿ-kap chham-siông kong-kek góa ê sî, Chiū kè-bô͘ beh hāi góa ê sìⁿ-miā.

14耶和華ah，我猶原óa靠你；　　我講，你是我ê上帝。Iâ-hô-hoa ah, góa iû-goân óa-khò Lí; Góa kóng, Lí sī góa ê Siōng-tè.

15我ê遭遇tī你ê手；　　求你救我脫離我ê對敵ê手，以及窘迫我ê人。Góa ê cho-gū tī Lí ê chhiú; Kiû Lí kiù góa thoat-lī góa ê tùi-te̍k ê chhiú, í-ki̍p khún-pek góa ê lâng.

16求你hō͘你ê面照光你ê奴僕；　　照你ê慈愛拯救我。Kiû Lí hō͘ Lí ê bīn chiò-kng Lí ê lô͘-po̍k; Chiàu Lí ê chû-ài chín-kiù góa.

17耶和華ah，求你hō͘我無見笑；因為我有求叫你。　　求你hō͘ pháiⁿ人見笑，hō͘ in tī陰間穿chauh-chauh。Iâ-hô-hoa ah, kiû Lí hō͘ góa bô kiàn-siàu; in-ūi góa ū kiû-kiò Lí. Kiû Lí hō͘ pháiⁿ-lâng kiàn-siàu, hō͘ in tī im-kan chēng chauh-chauh.

18願你hō͘ hiah-ê白賊ê嘴piàn啞口；　　就是驕傲看輕，lām-sám侮慢義人ê。Goān Lí hō͘ hiah ê pe̍h-chha̍t ê chhùi piàn é-káu; Chiū-sī kiau-ngō͘ khòaⁿ-khin, lām-sám bú-bān gī-lâng--ê.

19敬畏你ê人，你為tio̍h in所積聚ê恩惠，　　為tio̍h óa靠你ê人，tī世間人ê面前，所施行ê恩惠，怎樣hiah大！Kèng-ùi Lí ê lâng, Lí ūi-tio̍h in só͘ chek-chū ê un-hūi, Ūi-tio̍h óa-khò Lí ê lâng, tī sè-kan-lâng ê bīn-chêng, só͘ si-hêng ê un-hūi, cháiⁿ-iūⁿ hiah tōa!

20你beh將in khǹg tī你ê面前隱密ê所在；免致tú-tio̍h人ê計謀；　　你beh暗靜保守in tī帳帷內，免受嘴舌ê爭辯。Lí beh chiong in khǹg tī Lí ê bīn-chêng ún-ba̍t ê só͘-chāi; bián-tì tú-tio̍h lâng ê kè-bô͘; Lí beh àm-chīⁿ pó-siú in tī tiùⁿ-ûi-lāi, bián siū chhùi-chi̍h ê cheng-piān.

21耶和華是應該o-ló-ê，　　因為伊tī堅固ê城對我施出伊奇妙ê慈愛。Iâ-hô-hoa sī eng-kai o-ló--ê, In-ūi I tī kian-kò͘ ê siâⁿ tùi góa si-chhut I kî-biāu ê chû-ài.

22論到我，我bat著急講，tùi你ê目睭前，我受隔斷；　　總是我求叫你ê時，你猶原聽我懇求ê聲。Lūn-kàu góa, góa bat tio̍h-kip kóng, Tùi Lí ê ba̍k-chiu-chêng, góa siū keh-tn̄g; Chóng-sī góa kiû-kiò Lí ê sî, Lí iû-goân thiaⁿ góa khún-kiû ê siaⁿ.

23耶和華聖ê百姓ah，lín lóng tio̍h疼伊；　　耶和華保守誠實ê人，重重報應行驕傲ê人。Iâ-hô-hoa sèng ê peh-sìⁿ ah, lín lóng tio̍h thiàⁿ I; Iâ-hô-hoa pó-siú sêng-si̍t ê lâng, Tāng-tāng pò-èng kiâⁿ kiau-ngō͘ ê lâng.

24見若ǹg望耶和華ê人，　　Lín tio̍h壯膽，lín ê心tio̍h堅固。Kìⁿ-nā ǹg-bāng Iâ-hô-hoa ê lâng, Lín tio̍h chòng-táⁿ, lín ê sim tio̍h kian-kò͘.