1大衛ê詩；交hō͘樂官。1) 耶和華ah，我óa靠你，求你hō͘我永永無見笑；　　照你ê公義拯救我。Tāi-pi̍t ê si; kau hō͘ Ga̍k-koaⁿ.1) Iâ-hô-hoa ah, góa óa-khò Lí, kiû Lí hō͘ góa éng-éng bô kiàn-siàu; Chiàu Lí ê kong-gī chín-kiù góa.

2求你àⁿ耳孔聽我，緊緊來救我；　　做我堅固ê石磐，做拯救我ê衛所。Kiû Lí àⁿ hī-khang thiaⁿ góa, kín-kín lâi kiù góa; Chòe góa kian-kò͘ ê chio̍h-pôaⁿ, chòe chín-kiù góa ê ōe-só͘.

3因為你是我ê山巖，我ê山寨。　　所以求你因為你ê名來引chhōa我，指點我。In-ūi Lí sī góa ê soaⁿ-giâm, góa ê soaⁿ-chē. Só͘-í kiû Lí in-ūi Lí ê miâ lâi ín-chhōa góa, chí-tiám góa.

4人暗靜張羅網beh網我，求你救我脫離；　　因為你是我ê衛所。Lâng àm-chīⁿ tiuⁿ lô-bāng beh bāng góa, kiû Lí kiù góa thoat-lī; In-ūi Lí sī góa ê ōe-só͘.

5我將我ê靈魂交tī你ê手；　　耶和華真實ê上帝ah，你有救贖我。Góa chiong góa ê lêng-hûn kau tī Lí ê chhiú; Iâ-hô-hoa chin-si̍t ê Siōng-tè ah, Lí ū kiù-sio̍k góa.

6我怨恨hiah-ê信奉虛假ê人；　　獨獨我óa靠耶和華。Góa oàn-hūn hiah ê sìn-hōng hu-ké ê lâng; To̍k-to̍k góa óa-khò Iâ-hô-hoa.

7我因為你ê慈愛beh歡喜快樂；　　因為你有看見我ê艱苦，　　知我心神ê艱難。Góa in-ūi Lí ê chû-ài beh hoaⁿ-hí khoài-lo̍k; In-ūi Lí ū khòaⁿ-kìⁿ góa ê kan-khó͘, Chai góa sim-sîn ê kan-lân.

8你bē-bat將我交tī對敵ê手；　　你hō͘我ê腳khiā tī開闊ê所在。Lí bē-bat chiong góa kau tī tùi-te̍k ê chhiú; Lí hō͘ góa ê kha khiā tī khui-khoah ê só͘-chāi.

9耶和華ah，我tī患難中，求你憐憫我；　　我ê目睭因為憂悶phah-pháiⁿ，我ê心神，我ê身體，亦是án-ni。Iâ-hô-hoa ah, góa tī hoān-lān tiong, kiû Lí lîn-bín góa; Góa ê ba̍k-chiu in-ūi iu-būn phah-pháiⁿ, Góa ê sim-sîn, góa ê sin-thé, ia̍h sī án-ni.

10我ê性命因為憂苦來消無，　　我ê年歲為tio̍h吐氣亦án-ni；　　我ê氣力因為我ê罪惡來衰lám；　　我ê骨頭亦枯焦。Góa ê sìⁿ-miā in-ūi iu-khó͘ lâi siau-bô, Góa ê nî-hè ūi-tio̍h thó͘-khùi ia̍h án-ni; Góa ê khùi-la̍t in-ūi góa ê chōe-ok lâi soe-lám; Góa ê kut-thâu ia̍h ko͘-tâ.

11我因為我一切ê對敵成做凌辱；　　Tī我ê厝邊tau koh-khah傷重；hiah-ê bat我ê人lóng驚我；　　Tī外面看見我ê人走閃離開我。Góa in-ūi góa it-chhè ê tùi-te̍k chiâⁿ-chòe lêng-jio̍k; Tī góa ê chhù-piⁿ-tau koh-khah siong-tiōng; hiah ê bat góa ê lâng lóng kiaⁿ góa; Tī gōa-bīn khòaⁿ-kìⁿ góa ê lâng cháu-siám lī-khui góa.

12我親像死人hō͘人bōe記得，無人siàu念；　　我親像破碎ê器具。Góa chhin-chhiūⁿ sí-lâng hō͘ lâng bōe kì-tit, bô lâng siàu-liām; Góa chhin-chhiūⁿ phòa-chhùi ê khì-kū.

13因為我聽見chōe-chōe人ê譭謗，四圍lóng是驚惶；　　In相kap參詳攻擊我ê時，　　就計謀beh害我ê性命。In-ūi góa thiaⁿ-kìⁿ chōe-chōe lâng ê húi-pòng, Sì-ûi lóng sī kiaⁿ-hiâⁿ; In saⁿ-kap chham-siông kong-kek góa ê sî, Chiū kè-bô͘ beh hāi góa ê sìⁿ-miā.

14耶和華ah，我猶原óa靠你；　　我講，你是我ê上帝。Iâ-hô-hoa ah, góa iû-goân óa-khò Lí; Góa kóng, Lí sī góa ê Siōng-tè.

15我ê遭遇tī你ê手；　　求你救我脫離我ê對敵ê手，以及窘迫我ê人。Góa ê cho-gū tī Lí ê chhiú; Kiû Lí kiù góa thoat-lī góa ê tùi-te̍k ê chhiú, í-ki̍p khún-pek góa ê lâng.

16求你hō͘你ê面照光你ê奴僕；　　照你ê慈愛拯救我。Kiû Lí hō͘ Lí ê bīn chiò-kng Lí ê lô͘-po̍k; Chiàu Lí ê chû-ài chín-kiù góa.

17耶和華ah，求你hō͘我無見笑；因為我有求叫你。　　求你hō͘ pháiⁿ人見笑，hō͘ in tī陰間穿chauh-chauh。Iâ-hô-hoa ah, kiû Lí hō͘ góa bô kiàn-siàu; in-ūi góa ū kiû-kiò Lí. Kiû Lí hō͘ pháiⁿ-lâng kiàn-siàu, hō͘ in tī im-kan chēng chauh-chauh.

18願你hō͘ hiah-ê白賊ê嘴piàn啞口；　　就是驕傲看輕，lām-sám侮慢義人ê。Goān Lí hō͘ hiah ê pe̍h-chha̍t ê chhùi piàn é-káu; Chiū-sī kiau-ngō͘ khòaⁿ-khin, lām-sám bú-bān gī-lâng--ê.

19敬畏你ê人，你為tio̍h in所積聚ê恩惠，　　為tio̍h óa靠你ê人，tī世間人ê面前，所施行ê恩惠，怎樣hiah大！Kèng-ùi Lí ê lâng, Lí ūi-tio̍h in só͘ chek-chū ê un-hūi, Ūi-tio̍h óa-khò Lí ê lâng, tī sè-kan-lâng ê bīn-chêng, só͘ si-hêng ê un-hūi, cháiⁿ-iūⁿ hiah tōa!

20你beh將in khǹg tī你ê面前隱密ê所在；免致tú-tio̍h人ê計謀；　　你beh暗靜保守in tī帳帷內，免受嘴舌ê爭辯。Lí beh chiong in khǹg tī Lí ê bīn-chêng ún-ba̍t ê só͘-chāi; bián-tì tú-tio̍h lâng ê kè-bô͘; Lí beh àm-chīⁿ pó-siú in tī tiùⁿ-ûi-lāi, bián siū chhùi-chi̍h ê cheng-piān.

21耶和華是應該o-ló-ê，　　因為伊tī堅固ê城對我施出伊奇妙ê慈愛。Iâ-hô-hoa sī eng-kai o-ló--ê, In-ūi I tī kian-kò͘ ê siâⁿ tùi góa si-chhut I kî-biāu ê chû-ài.

22論到我，我bat著急講，tùi你ê目睭前，我受隔斷；　　總是我求叫你ê時，你猶原聽我懇求ê聲。Lūn-kàu góa, góa bat tio̍h-kip kóng, Tùi Lí ê ba̍k-chiu-chêng, góa siū keh-tn̄g; Chóng-sī góa kiû-kiò Lí ê sî, Lí iû-goân thiaⁿ góa khún-kiû ê siaⁿ.

23耶和華聖ê百姓ah，lín lóng tio̍h疼伊；　　耶和華保守誠實ê人，重重報應行驕傲ê人。Iâ-hô-hoa sèng ê peh-sìⁿ ah, lín lóng tio̍h thiàⁿ I; Iâ-hô-hoa pó-siú sêng-si̍t ê lâng, Tāng-tāng pò-èng kiâⁿ kiau-ngō͘ ê lâng.

24見若ǹg望耶和華ê人，　　Lín tio̍h壯膽，lín ê心tio̍h堅固。Kìⁿ-nā ǹg-bāng Iâ-hô-hoa ê lâng, Lín tio̍h chòng-táⁿ, lín ê sim tio̍h kian-kò͘.

1大衛ê教示ê詩。1) 過失得tio̍h赦免，罪過得tio̍h遮蓋ê，這人有福氣。Tāi-pi̍t ê kà-sī ê si.1) Kè-sit tit-tio̍h sià-bián, chōe-kòa tit-tio̍h jia-khàm--ê, che lâng ū hok-khì.

2耶和華無算伊做有罪，伊ê心無奸詐ê，這人有福氣。Iâ-hô-hoa bô sǹg i chòe ū chōe, I ê sim bô kan-chà--ê, che lâng ū hok-khì.

3我靜靜ê時，我ê骨頭枯焦； 因為我thong日大聲哮。Góa chēng-chēng ê sî, góa ê kut-thâu ko͘-tâ; In-ūi góa thong-ji̍t tōa-siaⁿ háu.

4因為暝日你ê手重重chhi̍h我； 我ê精液變親像夏天ê乾燥。[Sè-la̍h]In-ūi mî-ji̍t Lí ê chhiú tāng-tāng chhi̍h góa; Góa ê cheng-e̍k pìⁿ chhin-chhiūⁿ hē-thiⁿ ê ta-sò. [Sè-la̍h

5我對你排列我ê罪過，無隱瞞我ê罪惡； 我講，我beh對耶和華承認我ê過失； 你就赦免我犯法ê罪。[Sè-la̍h]Góa tùi Lí pâi-lia̍t góa ê chōe-kòa, bô ún-môa góa ê chōe-ok; Góa kóng, Góa beh tùi Iâ-hô-hoa sêng-jīn góa ê kè-sit; Lí chiū sià-bián góa hoān-hoat ê chōe. [Sè-la̍h

6因為án-ni，見若虔誠ê人，tī thang chhē-tio̍h你ê時，tio̍h祈禱你。 大水氾濫ê時，的確bōe到伊hia。In-ūi án-ni, kìⁿ-nā khiân-sêng ê lâng, tī thang chhē--tio̍h Lí ê sî, tio̍h kî-tó Lí. Tōa-chúi hoàn-lām ê sî, tek-khak bōe kàu i hia.

7你是我閃bih ê所在；你beh庇佑我脫離艱苦； 你beh用得救ê歌四面圍我。[Sè-la̍h]Lí sī góa siám-bih ê só͘-chāi; Lí beh pì-iū góa thoat-lī kan-khó͘; Lí beh ēng tit-kiù ê koa sì-bīn ûi góa. [Sè-la̍h

8我beh教示你，指示你應該行ê路； 我beh注目看你，來勸解你。Góa beh kà-sī lí, chí-sī lí eng-kai kiâⁿ ê lō͘; Góa beh chù-ba̍k khòaⁿ lí, lâi khoàn-kài lí.

9M̄-thang親像bé，lô，in無知識； Tio̍h用bé-ka-kiuⁿ bé-le̍k-soh約束in， 若無，in就m̄ óa近你。M̄-thang chhin-chhiūⁿ bé, lô, in bô tì-sek; Tio̍h ēng bé-ka-kiuⁿ bé-le̍k-soh iok-sok--in, Nā bô, in chiū m̄ óa-kūn lí.

10Pháiⁿ人受chōe-chōe苦難； 獨獨óa靠耶和華ê人beh有慈愛四面圍伊。Pháiⁿ-lâng siū chōe-chōe khó͘-lān; to̍k-to̍k óa-khò Iâ-hô-hoa ê lâng beh ū chû-ài sì-bīn ûi i.

11Lín義人ah，tio̍h因為耶和華來歡喜快樂； 心正直ê人ah，lín tio̍h出歡喜ê聲。Lín gī-lâng ah, tio̍h in-ūi Iâ-hô-hoa lâi hoaⁿ-hí khoài-lo̍k; Sim chèng-ti̍t ê lâng ah, lín tio̍h chhut hoaⁿ-hí ê siaⁿ.

1Lín義人ah，tio̍h因為耶和華來歡喜；　　正直ê人ê o-ló是合宜。Lín gī-lâng ah, tio̍h in-ūi Iâ-hô-hoa lâi hoaⁿ-hí; Chèng-ti̍t ê lâng ê o-ló sī ha̍p-gî.

2Lín tio̍h彈琴感謝耶和華；　　用十條絃ê瑟o-ló伊。Lín tio̍h tôaⁿ-khîm kám-siā Iâ-hô-hoa; Ēng cha̍p-tiâu hiân ê sek o-ló I.

3Tio̍h對伊唱新ê歌，　　Tôaⁿ到真好，聲音響亮。Tio̍h tùi I chhiùⁿ sin ê koa, Tôaⁿ kàu chin hó, siaⁿ-im hiáng-liāng.

4因為耶和華ê言語正直；　　凡伊所做ê，一盡是誠實。In-ūi Iâ-hô-hoa ê giân-gú chèng-ti̍t; Hoān I só͘ chòe--ê, it-chīn sī sêng-si̍t.

5伊歡喜義理kap公平；　　耶和華ê慈愛滿滿tī地上。I hoaⁿ-hí gī-lí kap kong-pêng; Iâ-hô-hoa ê chû-ài móa-móa tī tōe-chiūⁿ.

6Chiah-ê天 tùi耶和華ê話來造，　　天裡ê萬類tùi伊ê嘴ê氣來成。Chiah ê thiⁿ tùi Iâ-hô-hoa ê ōe lâi chō, Thiⁿ--nih ê bān-lūi tùi I ê chhùi ê khì lâi chiâⁿ.

7伊聚集海水親像kui堆，　　收khǹg深淵tī庫房。I chū-chi̍p hái-chúi chhin-chhiūⁿ kui-tui, Siu-khǹg chhim-ian tī khò͘-pâng.

8全地tio̍h敬畏耶和華；　　凡若khiā起tī世上-ê，lóng tio̍h驚伊。Choân-tōe tio̍h kèng-ùi Iâ-hô-hoa; Hoān-nā khiā-khí tī sè-chiūⁿ--ê, lóng tio̍h kiaⁿ I.

9因為伊講出就有；　　伊命令就khiā在。In-ūi I kóng-chhut chiū ū; I bēng-lēng chiū khiā-chāi.

10耶和華hō͘列邦ê計畫歸tī空空；　　Hō͘眾百姓所想ê，無功效。Iâ-hô-hoa hō͘ lia̍t-pang ê kè-e̍k kui tī khang-khang; Hō͘ chèng peh-sìⁿ só͘ siūⁿ--ê, bô kong-hāu.

11耶和華ê計畫永遠khiā在，　　伊ê心所想ê到萬世代。Iâ-hô-hoa ê kè-e̍k éng-oán khiā-chāi, I ê sim só͘ siūⁿ--ê kàu bān sè-tāi.

12認耶和華做伊ê上帝ê，hit國有福氣；　　伊揀選做伊ê產業ê，hit-ê百姓有福氣。Jīn Iâ-hô-hoa chòe i ê Siōng-tè--ê, hit kok ū hok-khì; I kéng-soán chòe I ê sán-gia̍p--ê, hit ê peh-sìⁿ ū hok-khì.

13耶和華tùi天teh看；　　伊鑑察lóng總ê世間人。Iâ-hô-hoa tùi thiⁿ teh khòaⁿ; I kàm-chhat lóng-chóng ê sè-kan lâng.

14伊tùi伊khiā起ê所在ǹg外面，　　看地上一切khiā起ê百姓。I tùi I khiā-khí ê só͘-chāi ǹg gōa-bīn, Khòaⁿ tōe-chiūⁿ it-chhè khiā-khí ê peh-sìⁿ.

15伊是造成in眾人ê心ê，　　留心tī in一切ê所做ê。I sī chō-chiâⁿ in chèng-lâng ê sim--ê, Liû-sim tī in it-chhè ê só͘-chòe--ê.

16君王bōe能因為兵chōe得tio̍h救；　　猛人bōe能因為氣力大得tio̍h救出。Kun-ông bōe-ōe in-ūi peng chōe tit-tio̍h kiù; Béng-lâng bōe-ōe in-ūi khùi-la̍t tōa tit-tio̍h kiù-chhut.

17Óa靠馬得tio̍h救，是無chhái-kang；　　Bōe能用伊ê大力來救人。Óa-khò bé tit-tio̍h kiù, sī bô chhái-kang; Bōe-ōe ēng i ê tōa la̍t lâi kiù lâng.

18耶和華ê目睭看敬畏伊ê人，　　看ǹg望伊ê慈愛ê人；Iâ-hô-hoa ê ba̍k-chiu khòaⁿ kèng-ùi I ê lâng, Khòaⁿ ǹg-bāng I ê chû-ài ê lâng;

19Beh救in ê性命脫離死無，　　保存in ê活命tī飢荒ê時。Beh kiù in ê sìⁿ-miā thoat-lī sí-bô, Pó-chûn in ê oa̍h-miā tī ki-hng ê sî.

20阮ê心神平素thèng候耶和華　　伊是做阮ê幫贊，做阮ê藤牌。Goán ê sim-sîn pêng-sò͘ thèng-hāu Iâ-hô-hoa; I sī chòe goán ê pang-chān, chòe goán ê tîn-pâi.

21阮ê心beh óa靠伊來歡喜，　　因為阮平素óa靠伊ê聖名。Goán ê sim beh óa-khò I lâi hoaⁿ-hí, In-ūi goán pêng-sò͘ óa-khò I ê sèng-miâ.

22耶和華ah，願你ê慈愛臨到阮，　　照阮所ǹg望你ê。Iâ-hô-hoa ah, goān Lí ê chû-ài lîm-kàu goán, Chiàu goán só͘ ǹg-bāng Lí ê.