1Lín義人ah，tio̍h因為耶和華來歡喜；　　正直ê人ê o-ló是合宜。Lín gī-lâng ah, tio̍h in-ūi Iâ-hô-hoa lâi hoaⁿ-hí; Chèng-ti̍t ê lâng ê o-ló sī ha̍p-gî.

2Lín tio̍h彈琴感謝耶和華；　　用十條絃ê瑟o-ló伊。Lín tio̍h tôaⁿ-khîm kám-siā Iâ-hô-hoa; Ēng cha̍p-tiâu hiân ê sek o-ló I.

3Tio̍h對伊唱新ê歌，　　Tôaⁿ到真好，聲音響亮。Tio̍h tùi I chhiùⁿ sin ê koa, Tôaⁿ kàu chin hó, siaⁿ-im hiáng-liāng.

4因為耶和華ê言語正直；　　凡伊所做ê，一盡是誠實。In-ūi Iâ-hô-hoa ê giân-gú chèng-ti̍t; Hoān I só͘ chòe--ê, it-chīn sī sêng-si̍t.

5伊歡喜義理kap公平；　　耶和華ê慈愛滿滿tī地上。I hoaⁿ-hí gī-lí kap kong-pêng; Iâ-hô-hoa ê chû-ài móa-móa tī tōe-chiūⁿ.

6Chiah-ê天 tùi耶和華ê話來造，　　天裡ê萬類tùi伊ê嘴ê氣來成。Chiah ê thiⁿ tùi Iâ-hô-hoa ê ōe lâi chō, Thiⁿ--nih ê bān-lūi tùi I ê chhùi ê khì lâi chiâⁿ.

7伊聚集海水親像kui堆，　　收khǹg深淵tī庫房。I chū-chi̍p hái-chúi chhin-chhiūⁿ kui-tui, Siu-khǹg chhim-ian tī khò͘-pâng.

8全地tio̍h敬畏耶和華；　　凡若khiā起tī世上-ê，lóng tio̍h驚伊。Choân-tōe tio̍h kèng-ùi Iâ-hô-hoa; Hoān-nā khiā-khí tī sè-chiūⁿ--ê, lóng tio̍h kiaⁿ I.

9因為伊講出就有；　　伊命令就khiā在。In-ūi I kóng-chhut chiū ū; I bēng-lēng chiū khiā-chāi.

10耶和華hō͘列邦ê計畫歸tī空空；　　Hō͘眾百姓所想ê，無功效。Iâ-hô-hoa hō͘ lia̍t-pang ê kè-e̍k kui tī khang-khang; Hō͘ chèng peh-sìⁿ só͘ siūⁿ--ê, bô kong-hāu.

11耶和華ê計畫永遠khiā在，　　伊ê心所想ê到萬世代。Iâ-hô-hoa ê kè-e̍k éng-oán khiā-chāi, I ê sim só͘ siūⁿ--ê kàu bān sè-tāi.

12認耶和華做伊ê上帝ê，hit國有福氣；　　伊揀選做伊ê產業ê，hit-ê百姓有福氣。Jīn Iâ-hô-hoa chòe i ê Siōng-tè--ê, hit kok ū hok-khì; I kéng-soán chòe I ê sán-gia̍p--ê, hit ê peh-sìⁿ ū hok-khì.

13耶和華tùi天teh看；　　伊鑑察lóng總ê世間人。Iâ-hô-hoa tùi thiⁿ teh khòaⁿ; I kàm-chhat lóng-chóng ê sè-kan lâng.

14伊tùi伊khiā起ê所在ǹg外面，　　看地上一切khiā起ê百姓。I tùi I khiā-khí ê só͘-chāi ǹg gōa-bīn, Khòaⁿ tōe-chiūⁿ it-chhè khiā-khí ê peh-sìⁿ.

15伊是造成in眾人ê心ê，　　留心tī in一切ê所做ê。I sī chō-chiâⁿ in chèng-lâng ê sim--ê, Liû-sim tī in it-chhè ê só͘-chòe--ê.

16君王bōe能因為兵chōe得tio̍h救；　　猛人bōe能因為氣力大得tio̍h救出。Kun-ông bōe-ōe in-ūi peng chōe tit-tio̍h kiù; Béng-lâng bōe-ōe in-ūi khùi-la̍t tōa tit-tio̍h kiù-chhut.

17Óa靠馬得tio̍h救，是無chhái-kang；　　Bōe能用伊ê大力來救人。Óa-khò bé tit-tio̍h kiù, sī bô chhái-kang; Bōe-ōe ēng i ê tōa la̍t lâi kiù lâng.

18耶和華ê目睭看敬畏伊ê人，　　看ǹg望伊ê慈愛ê人；Iâ-hô-hoa ê ba̍k-chiu khòaⁿ kèng-ùi I ê lâng, Khòaⁿ ǹg-bāng I ê chû-ài ê lâng;

19Beh救in ê性命脫離死無，　　保存in ê活命tī飢荒ê時。Beh kiù in ê sìⁿ-miā thoat-lī sí-bô, Pó-chûn in ê oa̍h-miā tī ki-hng ê sî.

20阮ê心神平素thèng候耶和華　　伊是做阮ê幫贊，做阮ê藤牌。Goán ê sim-sîn pêng-sò͘ thèng-hāu Iâ-hô-hoa; I sī chòe goán ê pang-chān, chòe goán ê tîn-pâi.

21阮ê心beh óa靠伊來歡喜，　　因為阮平素óa靠伊ê聖名。Goán ê sim beh óa-khò I lâi hoaⁿ-hí, In-ūi goán pêng-sò͘ óa-khò I ê sèng-miâ.

22耶和華ah，願你ê慈愛臨到阮，　　照阮所ǹg望你ê。Iâ-hô-hoa ah, goān Lí ê chû-ài lîm-kàu goán, Chiàu goán só͘ ǹg-bāng Lí ê.

1大衛ê詩；就是伊tī A-pì-bí-le̍k ê面前假瘋癲，受趕出去ê時所做ê。1) 我beh時時o-ló耶和華；　　O-ló伊ê話beh常常tī我ê嘴。Tāi-pi̍t ê si; chiū-sī i tī A-pì-bí-le̍k ê bīn-chêng ké hong-tian, siū kóaⁿ--chhut-khì ê sî só͘ chòe--ê.1) Góa beh sî-sî o-ló Iâ-hô-hoa; O-ló I ê ōe beh siông-siông tī góa ê chhùi.

2我ê心神beh因為耶和華來誇口；　　謙卑ê人聽見，亦beh歡喜。Góa ê sim-sîn beh in-ūi Iâ-hô-hoa lâi khoa-kháu; Khiam-pi ê lâng thiaⁿ-kìⁿ, ia̍h beh hoaⁿ-hí.

3Lín kap我tio̍h o-ló耶和華做大，　　相kap chun伊ê名做高。Lín kap góa tio̍h o-ló Iâ-hô-hoa chòe tōa, Saⁿ-kap chun I ê miâ chòe koâiⁿ.

4我bat求耶和華，伊就應我；　　救我脫離我一切thang驚ê事。Góa bat kiû Iâ-hô-hoa, I chiū ìn góa; Kiù góa thoat-lī góa it-chhè thang kiaⁿ ê sū.

5In kia̍h頭看伊，就得tio̍h光明；　　In ê面永bōe見笑。In kia̍h-thâu khòaⁿ I, chiū tit-tio̍h kng-bêng; In ê bīn éng bōe kiàn-siàu.

6Chit-ê困苦ê人求叫，耶和華聽見；　　救伊脫離伊一切ê患難。Chit ê khùn-khó͘ ê lâng kiû-kiò, Iâ-hô-hoa thiaⁿ-kìⁿ; Kiù i thoat-lī i it-chhè ê hoān-lān.

7耶和華ê使者tī敬畏伊ê人ê四圍紮營，　　來拯救in。Iâ-hô-hoa ê sù-chiá tī kèng-ùi I ê lâng ê sì-ûi chat-iâⁿ, Lâi chín-kiù in.

8Lín tio̍h試看，就知耶和華是好；　　Óa靠伊ê人有福氣。Lín tio̍h chhì-khòaⁿ, chiū chai Iâ-hô-hoa sī hó; Óa-khò I ê lâng ū hok-khì.

9耶和華聖ê百姓ah，lín tio̍h敬畏伊；　　因為敬畏伊ê人無欠缺一項。Iâ-hô-hoa sèng ê peh-sìⁿ ah, lín tio̍h kèng-ùi I; In-ūi kèng-ùi I ê lâng bô khiàm-kheh chi̍t-hāng.

10獅á-thûn有欠缺，有iau；　　獨獨chhē耶和華ê人無欠甚麼項ê好。Sai-á-thûn ū khiàm-kheh, ū iau; To̍k-to̍k chhē Iâ-hô-hoa ê lâng bô khiàm sím-mi̍h hāng ê hó.

11細kiáⁿ ah，lín tio̍h來聽我，　　我beh將敬畏耶和華ê道理教示lín。Sòe-kiáⁿ ah, lín tio̍h lâi thiaⁿ góa, Góa beh chiong kèng-ùi Iâ-hô-hoa ê tō-lí kà-sī lín.

12甚麼人ài活命，　　欣慕歲壽，beh得tio̍h福氣？Sím-mi̍h lâng ài oa̍h-miā, Him-bō͘ hè-siū, beh tit-tio̍h hok-khì?

13就tio̍h禁你ê舌無講pháiⁿ話；　　你ê嘴唇無講奸詐ê話。Chiū tio̍h kìm lí ê chi̍h bô kóng pháiⁿ-ōe; Lí ê chhùi-tûn bô kóng kan-chà ê ōe.

14Tio̍h離開pháiⁿ，行好；　　Chhē和平，來追jip伊。Tio̍h lī-khui pháiⁿ, kiâⁿ hó; Chhē hô-pêng, lâi tui-jip--i.

15耶和華ê目睭看義人；　　伊ê耳孔聽in ê祈禱。Iâ-hô-hoa ê ba̍k-chiu khòaⁿ gī-lâng; I ê hī-khang thiaⁿ in ê kî-tó.

16耶和華ê面ǹg行pháiⁿ ê人，　　Beh tùi世間除滅in ê名字。Iâ-hô-hoa ê bīn ǹg kiâⁿ-pháiⁿ ê lâng, Beh tùi sè-kan tû-bia̍t in ê miâ-jī.

17義人求叫，耶和華聽見，　　就救in脫離一切ê患難。Gī-lâng kiû-kiò, Iâ-hô-hoa thiaⁿ-kìⁿ, Chiū kiù in thoat-lī it-chhè ê hoān-lān.

18耶和華óa近傷心ê人，　　拯救靈性痛悔ê人。Iâ-hô-hoa óa-kūn siong-sim ê lâng, Chín-kiù lêng-sèng thòng-hóe ê lâng.

19義人有chōe-chōe苦難，　　總是耶和華救伊lóng脫離。Gī-lâng ū chōe-chōe khó͘-lān, Chóng-sī Iâ-hô-hoa kiù i lóng thoat-lī.

20保全伊lóng總ê骨；　　一支亦無phah折。Pó-choân i lóng-chóng ê kut; Chi̍t-ki ia̍h bô phah-chi̍h.

21罪惡beh害死pháiⁿ人；　　怨恨義人ê beh受定罪。Chōe-ok beh hāi-sí pháiⁿ-lâng; Oàn-hūn gī-lâng--ê beh siū tēng-chōe.

22耶和華救贖伊ê奴僕ê神魂；　　凡若óa靠伊ê，無一個受定罪。Iâ-hô-hoa kiù-sio̍k I ê lô͘-po̍k ê sîn-hûn; Hoān-nā óa-khò I--ê, bô chi̍t-ê siū tēng-chōe.

1大衛ê詩。1) 耶和華ah，kap我相爭ê，求你kap in相爭；　　Kap我交戰-ê，求你kap in交戰。Tāi-pi̍t ê si.1) Iâ-hô-hoa ah, kap góa saⁿ-chiⁿ-ê, kiû Lí kap in saⁿ-chiⁿ; Kap góa kau-chiàn--ê, kiû Lí kap in kau-chiàn.

2The̍h大細ê藤牌，　　起來幫贊我。The̍h tōa-sòe ê tîn-pâi, Khí-lâi pang-chān góa.

3抽出鎗，阻止hiah-ê追趕我ê；　　Tùi我ê神魂講，我是拯救你ê。Thiu-chhut chhiuⁿ, chó͘-chí hiah ê tui-kóaⁿ góa--ê; Tùi góa ê sîn-hûn kóng, Góa sī chín-kiù lí--ê.

4願hiah-ê siàu想我ê性命ê人受見笑凌辱；　　願hiah-ê計謀害我ê人oa̍t倒tńg漏氣。Goān hiah ê siàu-siūⁿ góa ê sìⁿ-miā ê lâng siū kiàn-siàu lêng-jio̍k; Goān hiah ê kè-bô͘ hāi góa ê lâng oa̍t-tò-tńg làu-khùi.

5願in親像風吹ê粗糠；　　有耶和華ê使者teh趕in。Goān in chhin-chhiūⁿ hong chhe ê chho͘-khng; Ū Iâ-hô-hoa ê sù-chiá teh kóaⁿ in.

6願in ê路暗koh滑，有耶和華ê使者teh趕in。Goān in ê lō͘ àm koh ku̍t, Ū Iâ-hô-hoa ê sù-chiá teh kóaⁿ in.

7因為in無因端為我暗設羅網tī坑內，　　無因端ku̍t陷坑beh害我ê性命。In-ūi in bô in-toaⁿ ūi góa àm-siat lô-bāng tī khiⁿ-lāi, Bô in-toaⁿ ku̍t hām-khiⁿ beh hāi góa ê sìⁿ-miā.

8願tī伊無phah算ê時，災厄到伊ê身上；　　願伊暗設 ê羅網纏tio̍h伊家己；　　願伊跋落hí內面，受害。Goān tī i bô phah-sǹg ê sî, chai-ē kàu i ê sin-chiūⁿ; Goān i àm-siat ê lô-bāng tîⁿ-tio̍h i ka-kī; Goān i poa̍h-lo̍h hí lāi-bīn, siū hāi.

9就我ê心beh tī耶和華來快樂；　　Tī伊ê救恩來歡喜。Chiū góa ê sim beh tī Iâ-hô-hoa lâi khoài-lo̍k; Tī I ê kiù-un lâi hoaⁿ-hí.

10我ê骨頭lóng beh講，　　耶和華ah，是誰 ōe親像你？　　你拯救困苦ê人，脫離hiah-ê比伊khah強ê；　　拯救困苦kap sòng-hiong ê人脫離hiah-ê搶奪伊ê。Góa ê kut-thâu lóng beh kóng, Iâ-hô-hoa ah, chī-chūi ōe chhin-chhiūⁿ Lí? Lí chín-kiù khùn-khó͘ ê lâng, thoat-lī hiah ê pí i khah-kiông--ê; Chín-kiù khùn-khó͘ kap sòng-hiong ê lâng thoat-lī hiah ê chhiúⁿ-toa̍t i--ê.

11兇惡ê干證ê起來；　　我所m̄知ê事，in查問我。Hiong-ok ê kan-chèng--ê khí-lâi; Góa só͘ m̄-chai ê sū, in chhâ-mn̄g góa.

12In對tī我用pháiⁿ報好：　　Hō͘我ê神魂孤單。In tùi-tī góa ēng pháiⁿ pò hó: Hō͘ góa ê sîn-hûn ko͘-toaⁿ.

13論到我，當in破病ê時，我就穿麻衫，　　用禁食刻苦我ê心神；　　我所求ê，lóng歸tī家己ê心懷。Lūn-kàu góa, tng in phòa-pīⁿ ê sî, góa chiū chhēng môa-saⁿ, Ēng kìm-chia̍h khek-khó͘ góa ê sim-sîn; Góa só͘ kiû--ê, lóng kui tī ka-kī ê sim-hoâi.

14我án-ni行，親像伊是我ê朋友，我ê兄弟；　　我屈落身軀悲哀，親像人為tio̍h老母哀傷。Góa án-ni kiâⁿ, chhin-chhiūⁿ i sī góa ê pêng-iú, góa ê hiaⁿ-tī; Góa khut-lo̍h seng-khu pi-ai, chhin-chhiūⁿ lâng ūi-tio̍h lāu-bú ai-siong.

15我tú-tio̍h患難，in就歡喜，相kap聚集；　　我所m̄相識ê 下等人聚集攻擊我；　　In khiú-la̍k我無soah。Góa tú-tio̍h hoān-lān, in chiū hoaⁿ-hí, saⁿ-kap chū-chi̍p; Góa só͘ m̄ saⁿ-bat ê hā-téng-lâng chū-chi̍p kong-kek góa; In khiú-la̍k góa bô soah.

16In親像戲hiauh，pián食ê無hē落人，　　對我咬嘴齒根。In chhin-chhiūⁿ hì-hiauh, pián-chia̍h ê bô hē-lo̍h lâng, Tùi góa kā chhùi-khí-kun.

17主ah，你定定teh看，beh到jōa久？　　求你救我ê神魂脫離in ê殘害，　　救我ê性命脫離猛ê獅á-thûn。Chú ah, Lí tiāⁿ-tiāⁿ teh khòaⁿ, beh kàu jōa-kú? Kiû Lí kiù góa ê sîn-hûn thoat-lī in ê chân-hāi, Kiù góa ê sìⁿ-miā thoat-lī béng ê sai-á-thûn.

18我tī大聚會ê中間beh感謝你；　　Tī眾百姓ê中間beh o-ló你。Góa tī tōa chū-hōe ê tiong-kan beh kám-siā Lí; Tī chèng peh-sìⁿ ê tiong-kan beh o-ló Lí.

19求你莫得容允hiah-ê無理由對敵我ê，對我誇口；　　莫得容允hiah-ê無因端怨恨我ê gîn我。Kiû Lí bo̍h-tit iông-ún hiah ê bô lí-iû tùi-te̍k góa-ê, tùi góa khoa-kháu; Bo̍h-tit iông-ún hiah ê bô in-toaⁿ oàn-hūn góa-ê gîn--góa.

20因為in無講和平ê話；　　就是計謀詭譎ê話；害地上安份ê人。In-ūi in bô kóng hô-pêng ê ōe; Chiū-sī kè-bô͘ khúi-khiat ê ōe; hāi tōe-chiūⁿ an-hūn ê lâng.

21In大大開嘴攻擊我；　　講，Ho͘h-chāi！Ho͘h-chāi！　　阮ê目睭已經看見lah。In tōa-tōa khui-chhùi kong-kek góa; Kóng, Ho͘h--chāi! Ho͘h--chāi! Goán ê ba̍k-chiu í-keng khòaⁿ-kìⁿ lah.

22耶和華ah，你已經看見；求你m̄-thang靜靜；　　主ah，m̄-thang離開我。Iâ-hô-hoa ah, Lí í-keng khòaⁿ-kìⁿ; kiû Lí m̄-thang chēng-chēng; Chú ah, m̄-thang lī-khui góa.

23我ê上帝，我ê主ah，求你精神，起來；　　判決我ê事，辨理我ê案。Góa ê Siōng-tè, góa ê Chú ah, kiû Lí cheng-sîn, khí--lâi; Phòaⁿ-koat góa ê sū, pān-lí góa ê àn.

24耶和華我ê上帝ah，求你照你ê公義判斷我；　　莫得容允in對我誇口。Iâ-hô-hoa góa ê Siōng-tè ah, kiû Lí chiàu Lí ê kong-gī phòaⁿ-toàn góa; Bo̍h-tit iông-ún in tùi góa khoa-kháu.

25莫得容允in心內講，　　Ho͘h-chāi，照阮ê心願lah；　　莫得容允in講，阮已經kā伊吞落去lah。Bo̍h-tit iông-ún in sim-lāi kóng, Ho͘h--chāi, chiàu goán ê sim-goān lah; Bo̍h-tit iông-ún in kóng, Goán í-keng kā i thun--lo̍h-khì lah.

26願hiah-ê歡喜我tú-tio̍h患難ê，lóng見笑漏氣；　　願hiah-ê對我家己尊大ê，受見笑lak臉。Goān hiah ê hoaⁿ-hí góa tú-tio̍h hoān-lān--ê, lóng kiàn-siàu làu-khùi; Goān hiah ê tùi góa ka-kī chun-tōa--ê, siū kiàn-siàu lak-lián.

27願hiah-ê ài我得tio̍h伸冤ê人，出歡喜ê聲快樂；　　願in常常講，tio̍h尊耶和華做大。　　因為伊歡喜伊ê奴僕平安。Goān hiah ê ài góa tit-tio̍h sin-oan ê lâng, chhut hoaⁿ-hí ê siaⁿ khoài-lo̍k; Goān in siông-siông kóng, Tio̍h chun Iâ-hô-hoa chòe tōa. In-ūi I hoaⁿ-hí I ê lô͘-po̍k pêng-an.

28我ê舌beh講起你ê義，　　Thong日o-ló你。Góa ê chi̍h beh kóng-khí Lí ê gī, Thong-ji̍t o-ló Lí.