1大衛ê詩。1) 耶和華ah，kap我相爭ê，求你kap in相爭；　　Kap我交戰-ê，求你kap in交戰。Tāi-pi̍t ê si.1) Iâ-hô-hoa ah, kap góa saⁿ-chiⁿ-ê, kiû Lí kap in saⁿ-chiⁿ; Kap góa kau-chiàn--ê, kiû Lí kap in kau-chiàn.

2The̍h大細ê藤牌，　　起來幫贊我。The̍h tōa-sòe ê tîn-pâi, Khí-lâi pang-chān góa.

3抽出鎗，阻止hiah-ê追趕我ê；　　Tùi我ê神魂講，我是拯救你ê。Thiu-chhut chhiuⁿ, chó͘-chí hiah ê tui-kóaⁿ góa--ê; Tùi góa ê sîn-hûn kóng, Góa sī chín-kiù lí--ê.

4願hiah-ê siàu想我ê性命ê人受見笑凌辱；　　願hiah-ê計謀害我ê人oa̍t倒tńg漏氣。Goān hiah ê siàu-siūⁿ góa ê sìⁿ-miā ê lâng siū kiàn-siàu lêng-jio̍k; Goān hiah ê kè-bô͘ hāi góa ê lâng oa̍t-tò-tńg làu-khùi.

5願in親像風吹ê粗糠；　　有耶和華ê使者teh趕in。Goān in chhin-chhiūⁿ hong chhe ê chho͘-khng; Ū Iâ-hô-hoa ê sù-chiá teh kóaⁿ in.

6願in ê路暗koh滑，有耶和華ê使者teh趕in。Goān in ê lō͘ àm koh ku̍t, Ū Iâ-hô-hoa ê sù-chiá teh kóaⁿ in.

7因為in無因端為我暗設羅網tī坑內，　　無因端ku̍t陷坑beh害我ê性命。In-ūi in bô in-toaⁿ ūi góa àm-siat lô-bāng tī khiⁿ-lāi, Bô in-toaⁿ ku̍t hām-khiⁿ beh hāi góa ê sìⁿ-miā.

8願tī伊無phah算ê時，災厄到伊ê身上；　　願伊暗設 ê羅網纏tio̍h伊家己；　　願伊跋落hí內面，受害。Goān tī i bô phah-sǹg ê sî, chai-ē kàu i ê sin-chiūⁿ; Goān i àm-siat ê lô-bāng tîⁿ-tio̍h i ka-kī; Goān i poa̍h-lo̍h hí lāi-bīn, siū hāi.

9就我ê心beh tī耶和華來快樂；　　Tī伊ê救恩來歡喜。Chiū góa ê sim beh tī Iâ-hô-hoa lâi khoài-lo̍k; Tī I ê kiù-un lâi hoaⁿ-hí.

10我ê骨頭lóng beh講，　　耶和華ah，是誰 ōe親像你？　　你拯救困苦ê人，脫離hiah-ê比伊khah強ê；　　拯救困苦kap sòng-hiong ê人脫離hiah-ê搶奪伊ê。Góa ê kut-thâu lóng beh kóng, Iâ-hô-hoa ah, chī-chūi ōe chhin-chhiūⁿ Lí? Lí chín-kiù khùn-khó͘ ê lâng, thoat-lī hiah ê pí i khah-kiông--ê; Chín-kiù khùn-khó͘ kap sòng-hiong ê lâng thoat-lī hiah ê chhiúⁿ-toa̍t i--ê.

11兇惡ê干證ê起來；　　我所m̄知ê事，in查問我。Hiong-ok ê kan-chèng--ê khí-lâi; Góa só͘ m̄-chai ê sū, in chhâ-mn̄g góa.

12In對tī我用pháiⁿ報好：　　Hō͘我ê神魂孤單。In tùi-tī góa ēng pháiⁿ pò hó: Hō͘ góa ê sîn-hûn ko͘-toaⁿ.

13論到我，當in破病ê時，我就穿麻衫，　　用禁食刻苦我ê心神；　　我所求ê，lóng歸tī家己ê心懷。Lūn-kàu góa, tng in phòa-pīⁿ ê sî, góa chiū chhēng môa-saⁿ, Ēng kìm-chia̍h khek-khó͘ góa ê sim-sîn; Góa só͘ kiû--ê, lóng kui tī ka-kī ê sim-hoâi.

14我án-ni行，親像伊是我ê朋友，我ê兄弟；　　我屈落身軀悲哀，親像人為tio̍h老母哀傷。Góa án-ni kiâⁿ, chhin-chhiūⁿ i sī góa ê pêng-iú, góa ê hiaⁿ-tī; Góa khut-lo̍h seng-khu pi-ai, chhin-chhiūⁿ lâng ūi-tio̍h lāu-bú ai-siong.

15我tú-tio̍h患難，in就歡喜，相kap聚集；　　我所m̄相識ê 下等人聚集攻擊我；　　In khiú-la̍k我無soah。Góa tú-tio̍h hoān-lān, in chiū hoaⁿ-hí, saⁿ-kap chū-chi̍p; Góa só͘ m̄ saⁿ-bat ê hā-téng-lâng chū-chi̍p kong-kek góa; In khiú-la̍k góa bô soah.

16In親像戲hiauh，pián食ê無hē落人，　　對我咬嘴齒根。In chhin-chhiūⁿ hì-hiauh, pián-chia̍h ê bô hē-lo̍h lâng, Tùi góa kā chhùi-khí-kun.

17主ah，你定定teh看，beh到jōa久？　　求你救我ê神魂脫離in ê殘害，　　救我ê性命脫離猛ê獅á-thûn。Chú ah, Lí tiāⁿ-tiāⁿ teh khòaⁿ, beh kàu jōa-kú? Kiû Lí kiù góa ê sîn-hûn thoat-lī in ê chân-hāi, Kiù góa ê sìⁿ-miā thoat-lī béng ê sai-á-thûn.

18我tī大聚會ê中間beh感謝你；　　Tī眾百姓ê中間beh o-ló你。Góa tī tōa chū-hōe ê tiong-kan beh kám-siā Lí; Tī chèng peh-sìⁿ ê tiong-kan beh o-ló Lí.

19求你莫得容允hiah-ê無理由對敵我ê，對我誇口；　　莫得容允hiah-ê無因端怨恨我ê gîn我。Kiû Lí bo̍h-tit iông-ún hiah ê bô lí-iû tùi-te̍k góa-ê, tùi góa khoa-kháu; Bo̍h-tit iông-ún hiah ê bô in-toaⁿ oàn-hūn góa-ê gîn--góa.

20因為in無講和平ê話；　　就是計謀詭譎ê話；害地上安份ê人。In-ūi in bô kóng hô-pêng ê ōe; Chiū-sī kè-bô͘ khúi-khiat ê ōe; hāi tōe-chiūⁿ an-hūn ê lâng.

21In大大開嘴攻擊我；　　講，Ho͘h-chāi！Ho͘h-chāi！　　阮ê目睭已經看見lah。In tōa-tōa khui-chhùi kong-kek góa; Kóng, Ho͘h--chāi! Ho͘h--chāi! Goán ê ba̍k-chiu í-keng khòaⁿ-kìⁿ lah.

22耶和華ah，你已經看見；求你m̄-thang靜靜；　　主ah，m̄-thang離開我。Iâ-hô-hoa ah, Lí í-keng khòaⁿ-kìⁿ; kiû Lí m̄-thang chēng-chēng; Chú ah, m̄-thang lī-khui góa.

23我ê上帝，我ê主ah，求你精神，起來；　　判決我ê事，辨理我ê案。Góa ê Siōng-tè, góa ê Chú ah, kiû Lí cheng-sîn, khí--lâi; Phòaⁿ-koat góa ê sū, pān-lí góa ê àn.

24耶和華我ê上帝ah，求你照你ê公義判斷我；　　莫得容允in對我誇口。Iâ-hô-hoa góa ê Siōng-tè ah, kiû Lí chiàu Lí ê kong-gī phòaⁿ-toàn góa; Bo̍h-tit iông-ún in tùi góa khoa-kháu.

25莫得容允in心內講，　　Ho͘h-chāi，照阮ê心願lah；　　莫得容允in講，阮已經kā伊吞落去lah。Bo̍h-tit iông-ún in sim-lāi kóng, Ho͘h--chāi, chiàu goán ê sim-goān lah; Bo̍h-tit iông-ún in kóng, Goán í-keng kā i thun--lo̍h-khì lah.

26願hiah-ê歡喜我tú-tio̍h患難ê，lóng見笑漏氣；　　願hiah-ê對我家己尊大ê，受見笑lak臉。Goān hiah ê hoaⁿ-hí góa tú-tio̍h hoān-lān--ê, lóng kiàn-siàu làu-khùi; Goān hiah ê tùi góa ka-kī chun-tōa--ê, siū kiàn-siàu lak-lián.

27願hiah-ê ài我得tio̍h伸冤ê人，出歡喜ê聲快樂；　　願in常常講，tio̍h尊耶和華做大。　　因為伊歡喜伊ê奴僕平安。Goān hiah ê ài góa tit-tio̍h sin-oan ê lâng, chhut hoaⁿ-hí ê siaⁿ khoài-lo̍k; Goān in siông-siông kóng, Tio̍h chun Iâ-hô-hoa chòe tōa. In-ūi I hoaⁿ-hí I ê lô͘-po̍k pêng-an.

28我ê舌beh講起你ê義，　　Thong日o-ló你。Góa ê chi̍h beh kóng-khí Lí ê gī, Thong-ji̍t o-ló Lí.

1（耶和華ê奴僕大衛ê詩，交hō͘樂官） 1 Pháiⁿ人ê罪過，有話tī我ê心講，　　伊ê目睭中無驚上帝。Iâ-hô-hoa ê lô͘-po̍k Tāi-pi̍t ê si, kau-hō͘ Ga̍k-koaⁿ.1) Pháiⁿ-lâng ê chōe-kòa, ū ōe tī góa ê sim kóng, I ê ba̍k-chiu-tiong bô kiaⁿ Siōng-tè.

2因為tī伊ê目睭內伊家己諂媚，　　Phah算伊ê罪惡永bōe露現，bōe受怨恨。In-ūi tī i ê ba̍k-chiu-lāi i ka-kī thiám-mī, Phah-sǹg i ê chōe-ok éng bōe lō͘-hiān, bōe siū oàn-hūn.

3伊嘴內ê話，lóng是罪惡kap奸詐；　　伊kap智慧好ê所行已經斷絕。I chhùi-lāi ê ōe, lóng sī chōe-ok kap kan-chà; I kap tì-hūi hó ê só͘-kiâⁿ í-keng toān-choa̍t.

4伊tī眠床圖謀罪惡，　　伊定tio̍h意思khiā tī m̄好ê路；　　伊無怨恨pháiⁿ-tāi。I tī bîn-chhn̂g tô͘-bô͘ chōe-ok, I tiāⁿ-tio̍h ì-sù khiā tī m̄-hó ê lō͘; I bô oàn-hūn pháiⁿ-tāi.

5耶和華ah，你ê慈愛是tī天裡；　　你ê信實到tī穹蒼。Iâ-hô-hoa ah, Lí ê chû-ài sī tī thiⁿ--nih; Lí ê sìn-si̍t kàu tī kiong-chhong.

6你ê義親像極高ê山；　　你ê判斷是親像深淵。　　耶和華ah，人kap cheng-siⁿ，你lóng保護in。Lí ê gī chhin-chhiūⁿ ke̍k-koâiⁿ ê soaⁿ; Lí ê phòaⁿ-toàn sī chhin-chhiūⁿ chhim-ian. Iâ-hô-hoa ah, lâng kap cheng-siⁿ, Lí lóng pó-hō͘ in.

7上帝ah，你ê慈愛怎樣hiah寶貝ah！　　世間人bih tī你翼股ê致蔭下。Siōng-tè ah, Lí ê chû-ài cháiⁿ-iūⁿ hiah pó-pòe ah! Sè-kan-lâng bih tī Lí si̍t-kó͘ ê tì-ìm-ē.

8In beh因為你ê厝ê好物，得tio̍h飽足；　　你亦beh hō͘ in lim你快樂ê河水。In beh in-ūi Lí ê chhù ê hó-mi̍h, tit-tio̍h pá-chiok; Lí ia̍h beh hō͘ in lim Lí khoài-lo̍k ê hô-chúi.

9因為活命ê源頭，在tī你hia；　　Tī你ê光，阮beh看見光。In-ūi oa̍h-miā ê goân-thâu, chāi tī Lí hia; Tī Lí ê kng, goán beh khòaⁿ-kìⁿ kng.

10願你常常施慈愛hō͘ bat你ê人；　　常常用你ê公義施hō͘心內正直ê人。Goān Lí siông-siông si chû-ài hō͘ bat Lí ê lâng; Siông-siông ēng Lí ê kong-gī si hō͘ sim-lāi chèng-ti̍t ê lâng.

11M̄-thang容允驕傲ê人ê腳thún踏我，　　M̄-thang容允兇惡ê人ê手趕逐我。M̄-thang iông-ún kiau-ngō͘ ê lâng ê kha thún-ta̍h góa, M̄-thang iông-ún hiong-ok ê lâng ê chhiú kóaⁿ-tio̍k góa.

12Tī-hia做pháiⁿ ê人已經倒落去；　　伊受chhia倒，bōe能koh起來。Tī-hia chòe pháiⁿ ê lâng í-keng tó--lo̍h-khì; I siū chhia-tó, bōe-ōe koh khí-lâi.

1大衛ê詩。1) M̄-thang因為做pháiⁿ ê人，心內不平；　　亦m̄-thang怨妒行不義ê人。Tāi-pi̍t ê si.1) M̄-thang in-ūi chòe pháiⁿ ê lâng, sim-lāi put-pêng; Ia̍h m̄-thang oàn-tò͘ kiâⁿ put-gī ê lâng.

2因為in親像草快快割；　　Koh親像青翠ê菜老(láu)去。In-ūi in chhin-chhiūⁿ chháu khoài-khoài koah; Koh chhin-chhiūⁿ chhiⁿ-chhùi ê chhài lāu--khì.

3Tio̍h óa靠耶和華來行好，　　Tiàm tī chit-ê土地，用誠實做米糧。Tio̍h óa-khò Iâ-hô-hoa lâi kiâⁿ hó, Tiàm tī chit ê thó͘-tōe, ēng sêng-si̍t chòe bí-niû.

4Tio̍h掠耶和華做歡喜，　　伊beh將你ê心所求ê hō͘你。Tio̍h lia̍h Iâ-hô-hoa chòe hoaⁿ-hí, I beh chiong lí ê sim só͘ kiû--ê hō͘ lí.

5Tio̍h將你ê tāi-chì交代耶和華；　　Koh óa靠伊，伊beh hō͘伊成。Tio̍h chiong lí ê tāi-chì kau-tài Iâ-hô-hoa; Koh óa-khò I, I beh hō͘ i chiâⁿ.

6伊beh hō͘你ê義發出親像光；　　你ê判斷，親像中晝ê光。I beh hō͘ lí ê gī hoat-chhut chhin-chhiūⁿ kng; Lí ê phòaⁿ-toàn, chhin-chhiūⁿ tiong-tàu ê kng.

7Tio̍h靜靜tī耶和華ê面前，寬心thèng候伊；　　M̄-thang因為hit號事事興通ê，　　Kap hit號pháiⁿ計謀得tio̍h成ê，來不平。Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, Kap hit-hō pháiⁿ kè-bô͘ tit-tio̍h chiâⁿ--ê, lâi put-pêng.

8Tio̍h soah受氣，離開大受氣；　　M̄-thang不平，驚了會做pháiⁿ。Tio̍h soah siū-khì, lī-khui tōa siū-khì; M̄-thang put-pêng, kiaⁿ-liáu ōe chòe pháiⁿ.

9因為行pháiⁿ ê人beh受剿滅；　　獨獨thèng候耶和華ê人，in beh承接土地。In-ūi kiâⁿ-pháiⁿ ê lâng beh siū châu-bia̍t; To̍k-to̍k thèng-hāu Iâ-hô-hoa ê lâng, in beh sêng-chiap thó͘-tōe.

10因為koh tiap-á久，pháiⁿ人beh無去；　　你若詳細查伊ê所在，伊亦無去；In-ūi koh tiap-á-kú, pháiⁿ-lâng beh bô--khì; Lí nā siông-sè chhâ i ê só͘-chāi, i ia̍h bô--khì;

11獨獨謙卑ê人beh承接土地；　　因為平安豐盛大沉歡喜。To̍k-to̍k khiam-pi ê lâng beh sêng-chiap thó͘-tōe; In-ūi pêng-an hong-sēng tōa-tîm hoaⁿ-hí.

12Pháiⁿ人設計謀beh害義人，　　Koh ǹg伊咬嘴齒根。Pháiⁿ-lâng siat kè-bô͘ beh hāi gī-lâng, Koh ǹg i kā chhùi-khí-kun.

13主beh笑伊，　　因為看見伊ê日子beh到。Chú beh chhiò i, In-ūi khòaⁿ-kìⁿ i ê ji̍t-chí beh kàu.

14Pháiⁿ人拔刀開弓，beh打倒困苦sòng-hiong ê人；　　Beh thâi死行做正直ê人。Pháiⁿ-lâng pu̍ih-to khui-keng, beh táⁿ-tó khùn-khó͘ sòng-hiong ê lâng; Beh thâi-sí kiâⁿ-chòe chèng-ti̍t ê lâng.

15In ê刀beh 刺入家己ê心，　　In ê keng beh受at折。In ê to beh chhì-ji̍p ka-kī ê sim, In ê keng beh siū at-chi̍h.

16義人所有ê少少，　　贏過chōe-chōe pháiⁿ人ê富有。Gī-lâng só͘-ū-ê chió-chió, Iâⁿ-kè chōe-chōe pháiⁿ-lâng ê pù-ū.

17因為pháiⁿ人ê手beh受at折；　　獨獨耶和華扶持義ê人。In-ūi pháiⁿ-lâng ê chhiú beh siū at-chi̍h; To̍k-to̍k Iâ-hô-hoa hû-chhî gī ê lâng.

18耶和華知完全ê人ê時日；　　In ê產業beh永遠tī-teh。Iâ-hô-hoa chai oân-choân ê lâng ê sî-ji̍t; In ê sán-gia̍p beh éng-oán tī-teh.

19In tī患難ê時不致見笑；　　Tī飢荒ê日beh得tio̍h飽足。In tī hoān-lān ê sî put-tì kiàn-siàu; Tī ki-hng ê ji̍t beh tit-tio̍h pá-chiok.

20總是pháiⁿ人beh滅無，　　耶和華ê對敵beh親像草埔ê茂盛；　　In beh消無親像火薰ê消無。Chóng-sī pháiⁿ-lâng beh bia̍t-bô, Iâ-hô-hoa ê tùi-te̍k beh chhin-chhiūⁿ chháu-po͘ ê bō͘-sēng; In beh siau-bô chhin-chhiūⁿ hé-hun ê siau-bô.

21Pháiⁿ人kā人借，也無還；　　但是義人行憐憫，捨施人。Pháiⁿ-lâng kā lâng chioh, iā bô hêng; Nā-sī gī-lâng kiâⁿ lîn-bín, siá-si lâng.

22耶和華賜福ê人，in beh承接土地；　　Hō͘伊咒詛ê人beh受滅無。Iâ-hô-hoa sù-hok ê lâng, in beh sêng-chiap thó͘-tōe; Hō͘ I chiù-chó͘ ê lâng beh siū bia̍t-bô.

23義人ê腳步是耶和華所安置；　　Koh I歡喜伊ê路。Gī-lâng ê kha-pō͘ sī Iâ-hô-hoa só͘ an-tì; Koh I hoaⁿ-hí i ê lō͘.

24伊雖bóng跋倒，亦無夠kui身siak落去；　　因為耶和華用伊ê手扶伊。I sui-bóng poa̍h-tó, ia̍h bô kàu kui-sin siak--lo̍h-khì; In-ūi Iâ-hô-hoa ēng I ê chhiú hû i.

25我前少年，taⁿ年老；　　總是bē-bat看見義人受放sak，　　亦伊ê後裔做乞食。Góa chêng siàu-liân, taⁿ nî lāu; Chóng-sī bē-bat khòaⁿ-kìⁿ gī-lâng siū pàng-sak, Ia̍h i ê hō͘-è chòe khit-chia̍h.

26伊thong日憐憫人，借人，　　伊ê後裔得tio̍h福氣。I thong-ji̍t lîn-bín lâng, chioh lâng, I ê hō͘-è tit-tio̍h hok-khì.

27你tio̍h離開pháiⁿ，行好，　　Chiah thang永遠khiā起。Lí tio̍h lī-khui pháiⁿ, kiâⁿ hó, Chiah thang éng-oán khiā-khí.

28因為耶和華歡喜公平，　　無放sak伊聖ê百姓；　　In永遠受保護，　　獨獨pháiⁿ人ê後裔beh受剿滅。In-ūi Iâ-hô-hoa hoaⁿ-hí kong-pêng, Bô pàng-sak I sèng ê peh-sìⁿ; In éng-oán siū pó-hō͘, To̍k-to̍k pháiⁿ-lâng ê hō͘-è beh siū châu-bia̍t.

29義人beh承接土地，　　永遠tiàm tī-hia。Gī-lâng beh sêng-chiap thó͘-tōe, Éng-oán tiàm tī-hia.

30義人ê嘴講智慧，　　伊ê舌談論公平。Gī-lâng ê chhùi kóng tì-hūi, I ê chi̍h tâm-lūn kong-pêng.

31伊ê上帝ê律法tī伊ê心內；　　伊ê腳lóng bōe踏thu̍t。I ê Siōng-tè ê lu̍t-hoat tī i ê sim-lāi; I ê kha lóng bōe ta̍h-thu̍t.

32Pháiⁿ人偷看義人，　　Siàu想thâi伊。Pháiⁿ-lâng thau-khòaⁿ gī-lâng, Siàu-siūⁿ thâi--i.

33耶和華無放sak伊tī pháiⁿ人ê手；　　當審判ê時，亦無定伊ê罪。Iâ-hô-hoa bô pàng-sak i tī pháiⁿ lâng ê chhiú; Tng sím-phòaⁿ ê sî, ia̍h bô tēng i ê chōe.

34你tio̍h thèng候耶和華遵守伊ê道路；　　伊就高升你，hō͘你承接土地；　　Pháiⁿ人受剿滅ê時，你beh看見。Lí tio̍h thèng-hāu Iâ-hô-hoa chun-siú I ê tō-lō͘; I chiū ko-seng lí, hō͘ lí sêng-chiap thó͘-tōe; Pháiⁿ-lâng siū châu-bia̍t ê sî, lí beh khòaⁿ-kìⁿ.

35我bat看見pháiⁿ人有大勢力，　　Koh發達親像ām ê樹tī伊ê本土地。Góa bat khòaⁿ-kìⁿ pháiⁿ-lâng ū tōa sè-le̍k, Koh hoat-ta̍t chhin-chhiūⁿ ām ê chhiū tī i ê pún thó͘-tōe.

36有人tùi hia經過，看ah，伊無去lah；　　我亦chhē伊，chhē bōe tio̍h。Ū lâng tùi hia keng-kè, khòaⁿ ah, i bô--khì lah; Góa ia̍h chhē i, chhē bōe tio̍h.

37你tio̍h詳細看hit-ê完全ê人，看hit-ê正直ê人，　　因為和平ê人有好ê結局。Lí tio̍h siông-sè khòaⁿ hit ê oân-choân ê lâng, khòaⁿ hit ê chèng-ti̍t ê lâng, In-ūi hô-pêng ê lâng ū hó ê kiat-kio̍k.

38論到犯法ê人，beh做一下滅無；　　Pháiⁿ人ê結局beh受剿滅。Lūn-kàu hoān-hoat ê lâng, beh chòe-chi̍t-ē bia̍t-bô; Pháiⁿ-lâng ê kiat-kio̍k beh siū châu-bia̍t.

39總是義人得tio̍h救，是tùi耶和華；　　當患難ê時，伊做in ê營寨。Chóng-sī gī-lâng tit-tio̍h kiù, sī tùi Iâ-hô-hoa; Tng hoān-lān ê sî, I chòe in ê iâⁿ-chē.

40耶和華幫贊in，拯救in；　　伊拯救in脫離pháiⁿ人，來牽救in；　　因為in óa靠伊。Iâ-hô-hoa pang-chān in, chín-kiù in; I chín-kiù in thoat-lī pháiⁿ-lâng, lâi khan-kiù in; In-ūi in óa-khò I.