1大衛ê詩。1) M̄-thang因為做pháiⁿ ê人，心內不平；　　亦m̄-thang怨妒行不義ê人。Tāi-pi̍t ê si.1) M̄-thang in-ūi chòe pháiⁿ ê lâng, sim-lāi put-pêng; Ia̍h m̄-thang oàn-tò͘ kiâⁿ put-gī ê lâng.

2因為in親像草快快割；　　Koh親像青翠ê菜老(láu)去。In-ūi in chhin-chhiūⁿ chháu khoài-khoài koah; Koh chhin-chhiūⁿ chhiⁿ-chhùi ê chhài lāu--khì.

3Tio̍h óa靠耶和華來行好，　　Tiàm tī chit-ê土地，用誠實做米糧。Tio̍h óa-khò Iâ-hô-hoa lâi kiâⁿ hó, Tiàm tī chit ê thó͘-tōe, ēng sêng-si̍t chòe bí-niû.

4Tio̍h掠耶和華做歡喜，　　伊beh將你ê心所求ê hō͘你。Tio̍h lia̍h Iâ-hô-hoa chòe hoaⁿ-hí, I beh chiong lí ê sim só͘ kiû--ê hō͘ lí.

5Tio̍h將你ê tāi-chì交代耶和華；　　Koh óa靠伊，伊beh hō͘伊成。Tio̍h chiong lí ê tāi-chì kau-tài Iâ-hô-hoa; Koh óa-khò I, I beh hō͘ i chiâⁿ.

6伊beh hō͘你ê義發出親像光；　　你ê判斷，親像中晝ê光。I beh hō͘ lí ê gī hoat-chhut chhin-chhiūⁿ kng; Lí ê phòaⁿ-toàn, chhin-chhiūⁿ tiong-tàu ê kng.

7Tio̍h靜靜tī耶和華ê面前，寬心thèng候伊；　　M̄-thang因為hit號事事興通ê，　　Kap hit號pháiⁿ計謀得tio̍h成ê，來不平。Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, Kap hit-hō pháiⁿ kè-bô͘ tit-tio̍h chiâⁿ--ê, lâi put-pêng.

8Tio̍h soah受氣，離開大受氣；　　M̄-thang不平，驚了會做pháiⁿ。Tio̍h soah siū-khì, lī-khui tōa siū-khì; M̄-thang put-pêng, kiaⁿ-liáu ōe chòe pháiⁿ.

9因為行pháiⁿ ê人beh受剿滅；　　獨獨thèng候耶和華ê人，in beh承接土地。In-ūi kiâⁿ-pháiⁿ ê lâng beh siū châu-bia̍t; To̍k-to̍k thèng-hāu Iâ-hô-hoa ê lâng, in beh sêng-chiap thó͘-tōe.

10因為koh tiap-á久，pháiⁿ人beh無去；　　你若詳細查伊ê所在，伊亦無去；In-ūi koh tiap-á-kú, pháiⁿ-lâng beh bô--khì; Lí nā siông-sè chhâ i ê só͘-chāi, i ia̍h bô--khì;

11獨獨謙卑ê人beh承接土地；　　因為平安豐盛大沉歡喜。To̍k-to̍k khiam-pi ê lâng beh sêng-chiap thó͘-tōe; In-ūi pêng-an hong-sēng tōa-tîm hoaⁿ-hí.

12Pháiⁿ人設計謀beh害義人，　　Koh ǹg伊咬嘴齒根。Pháiⁿ-lâng siat kè-bô͘ beh hāi gī-lâng, Koh ǹg i kā chhùi-khí-kun.

13主beh笑伊，　　因為看見伊ê日子beh到。Chú beh chhiò i, In-ūi khòaⁿ-kìⁿ i ê ji̍t-chí beh kàu.

14Pháiⁿ人拔刀開弓，beh打倒困苦sòng-hiong ê人；　　Beh thâi死行做正直ê人。Pháiⁿ-lâng pu̍ih-to khui-keng, beh táⁿ-tó khùn-khó͘ sòng-hiong ê lâng; Beh thâi-sí kiâⁿ-chòe chèng-ti̍t ê lâng.

15In ê刀beh 刺入家己ê心，　　In ê keng beh受at折。In ê to beh chhì-ji̍p ka-kī ê sim, In ê keng beh siū at-chi̍h.

16義人所有ê少少，　　贏過chōe-chōe pháiⁿ人ê富有。Gī-lâng só͘-ū-ê chió-chió, Iâⁿ-kè chōe-chōe pháiⁿ-lâng ê pù-ū.

17因為pháiⁿ人ê手beh受at折；　　獨獨耶和華扶持義ê人。In-ūi pháiⁿ-lâng ê chhiú beh siū at-chi̍h; To̍k-to̍k Iâ-hô-hoa hû-chhî gī ê lâng.

18耶和華知完全ê人ê時日；　　In ê產業beh永遠tī-teh。Iâ-hô-hoa chai oân-choân ê lâng ê sî-ji̍t; In ê sán-gia̍p beh éng-oán tī-teh.

19In tī患難ê時不致見笑；　　Tī飢荒ê日beh得tio̍h飽足。In tī hoān-lān ê sî put-tì kiàn-siàu; Tī ki-hng ê ji̍t beh tit-tio̍h pá-chiok.

20總是pháiⁿ人beh滅無，　　耶和華ê對敵beh親像草埔ê茂盛；　　In beh消無親像火薰ê消無。Chóng-sī pháiⁿ-lâng beh bia̍t-bô, Iâ-hô-hoa ê tùi-te̍k beh chhin-chhiūⁿ chháu-po͘ ê bō͘-sēng; In beh siau-bô chhin-chhiūⁿ hé-hun ê siau-bô.

21Pháiⁿ人kā人借，也無還；　　但是義人行憐憫，捨施人。Pháiⁿ-lâng kā lâng chioh, iā bô hêng; Nā-sī gī-lâng kiâⁿ lîn-bín, siá-si lâng.

22耶和華賜福ê人，in beh承接土地；　　Hō͘伊咒詛ê人beh受滅無。Iâ-hô-hoa sù-hok ê lâng, in beh sêng-chiap thó͘-tōe; Hō͘ I chiù-chó͘ ê lâng beh siū bia̍t-bô.

23義人ê腳步是耶和華所安置；　　Koh I歡喜伊ê路。Gī-lâng ê kha-pō͘ sī Iâ-hô-hoa só͘ an-tì; Koh I hoaⁿ-hí i ê lō͘.

24伊雖bóng跋倒，亦無夠kui身siak落去；　　因為耶和華用伊ê手扶伊。I sui-bóng poa̍h-tó, ia̍h bô kàu kui-sin siak--lo̍h-khì; In-ūi Iâ-hô-hoa ēng I ê chhiú hû i.

25我前少年，taⁿ年老；　　總是bē-bat看見義人受放sak，　　亦伊ê後裔做乞食。Góa chêng siàu-liân, taⁿ nî lāu; Chóng-sī bē-bat khòaⁿ-kìⁿ gī-lâng siū pàng-sak, Ia̍h i ê hō͘-è chòe khit-chia̍h.

26伊thong日憐憫人，借人，　　伊ê後裔得tio̍h福氣。I thong-ji̍t lîn-bín lâng, chioh lâng, I ê hō͘-è tit-tio̍h hok-khì.

27你tio̍h離開pháiⁿ，行好，　　Chiah thang永遠khiā起。Lí tio̍h lī-khui pháiⁿ, kiâⁿ hó, Chiah thang éng-oán khiā-khí.

28因為耶和華歡喜公平，　　無放sak伊聖ê百姓；　　In永遠受保護，　　獨獨pháiⁿ人ê後裔beh受剿滅。In-ūi Iâ-hô-hoa hoaⁿ-hí kong-pêng, Bô pàng-sak I sèng ê peh-sìⁿ; In éng-oán siū pó-hō͘, To̍k-to̍k pháiⁿ-lâng ê hō͘-è beh siū châu-bia̍t.

29義人beh承接土地，　　永遠tiàm tī-hia。Gī-lâng beh sêng-chiap thó͘-tōe, Éng-oán tiàm tī-hia.

30義人ê嘴講智慧，　　伊ê舌談論公平。Gī-lâng ê chhùi kóng tì-hūi, I ê chi̍h tâm-lūn kong-pêng.

31伊ê上帝ê律法tī伊ê心內；　　伊ê腳lóng bōe踏thu̍t。I ê Siōng-tè ê lu̍t-hoat tī i ê sim-lāi; I ê kha lóng bōe ta̍h-thu̍t.

32Pháiⁿ人偷看義人，　　Siàu想thâi伊。Pháiⁿ-lâng thau-khòaⁿ gī-lâng, Siàu-siūⁿ thâi--i.

33耶和華無放sak伊tī pháiⁿ人ê手；　　當審判ê時，亦無定伊ê罪。Iâ-hô-hoa bô pàng-sak i tī pháiⁿ lâng ê chhiú; Tng sím-phòaⁿ ê sî, ia̍h bô tēng i ê chōe.

34你tio̍h thèng候耶和華遵守伊ê道路；　　伊就高升你，hō͘你承接土地；　　Pháiⁿ人受剿滅ê時，你beh看見。Lí tio̍h thèng-hāu Iâ-hô-hoa chun-siú I ê tō-lō͘; I chiū ko-seng lí, hō͘ lí sêng-chiap thó͘-tōe; Pháiⁿ-lâng siū châu-bia̍t ê sî, lí beh khòaⁿ-kìⁿ.

35我bat看見pháiⁿ人有大勢力，　　Koh發達親像ām ê樹tī伊ê本土地。Góa bat khòaⁿ-kìⁿ pháiⁿ-lâng ū tōa sè-le̍k, Koh hoat-ta̍t chhin-chhiūⁿ ām ê chhiū tī i ê pún thó͘-tōe.

36有人tùi hia經過，看ah，伊無去lah；　　我亦chhē伊，chhē bōe tio̍h。Ū lâng tùi hia keng-kè, khòaⁿ ah, i bô--khì lah; Góa ia̍h chhē i, chhē bōe tio̍h.

37你tio̍h詳細看hit-ê完全ê人，看hit-ê正直ê人，　　因為和平ê人有好ê結局。Lí tio̍h siông-sè khòaⁿ hit ê oân-choân ê lâng, khòaⁿ hit ê chèng-ti̍t ê lâng, In-ūi hô-pêng ê lâng ū hó ê kiat-kio̍k.

38論到犯法ê人，beh做一下滅無；　　Pháiⁿ人ê結局beh受剿滅。Lūn-kàu hoān-hoat ê lâng, beh chòe-chi̍t-ē bia̍t-bô; Pháiⁿ-lâng ê kiat-kio̍k beh siū châu-bia̍t.

39總是義人得tio̍h救，是tùi耶和華；　　當患難ê時，伊做in ê營寨。Chóng-sī gī-lâng tit-tio̍h kiù, sī tùi Iâ-hô-hoa; Tng hoān-lān ê sî, I chòe in ê iâⁿ-chē.

40耶和華幫贊in，拯救in；　　伊拯救in脫離pháiⁿ人，來牽救in；　　因為in óa靠伊。Iâ-hô-hoa pang-chān in, chín-kiù in; I chín-kiù in thoat-lī pháiⁿ-lâng, lâi khan-kiù in; In-ūi in óa-khò I.

1大衛ê記念詩。1) 耶和華ah，求你m̄-thang tī受氣中責備我；　　M̄-thang tī大受氣中警戒我。Tāi-pi̍t ê kì-liām si.1) Iâ-hô-hoa ah, kiû Lí m̄-thang tī siū-khì-tiong chek-pī góa; M̄-thang tī tōa siū-khì-tiong kéng-kài góa.

2因為你ê箭射我ê身軀，　　你ê手重重chhi̍h我。In-ūi Lí ê chìⁿ siā góa ê seng-khu, Lí ê chhiú tāng-tāng chhi̍h góa.

3因為你ê受氣，我ê肉無一位完全；　　因為我ê罪過，我ê骨亦無平安。In-ūi Lí ê siū-khì, góa ê bah bô chi̍t-ūi oân-choân; In-ūi góa ê chōe-kòa, góa ê kut ia̍h bô pêng-an.

4我ê罪惡pôaⁿ過我ê頭殼，　　親像重擔hō͘我taⁿ-bōe-khí。Góa ê chōe-ok pôaⁿ-kè góa ê thâu-khak, Chhin-chhiūⁿ tāng-tàⁿ hō͘ góa taⁿ-bōe-khí.

5因為我ê愚戇，　　我ê傷爛，koh臭。In-ūi góa ê gû-gōng, Góa ê siong nōa, koh chhàu.

6我痛疼koh khiau-ku，　　Thong日哀傷。Góa thàng-thiàⁿ koh khiau-ku, Thong-ji̍t ai-siong.

7因為我滿腰是火；　　我ê肉無一位完全。In-ūi góa móa-io sī hé; Góa ê bah bô chi̍t-ūi oân-choân.

8我受phah傷，真無力；　　因為我ê心不安，就大哀chhan。Góa siū phah-siong, chin bô la̍t; In-ūi góa ê sim put-an, chiū tōa ai-chhan.

9主ah，我ê心願lóng tī你ê面前，　　我ê吐氣無對你隱瞞。Chú ah, góa ê sim-goān lóng tī Lí ê bīn-chêng, Góa ê thó͘-khùi bô tùi Lí ún-môa.

10我ê心pho̍k-pho̍k-chhéng，我ê力衰微；　　連我目睭中ê光亦離開我。Góa ê sim pho̍k-pho̍k-chhéng, góa ê la̍t soe-bî; Liân góa ba̍k-chiu-tiong ê kng ia̍h lī-khui góa.

11疼我ê人kap我ê朋友，因為我ê pháiⁿ症頭，lóng閃tī邊á；　　我ê親戚亦遠遠teh khiā。Thiàⁿ góa ê lâng kap góa ê pêng-iú, in-ūi góa ê pháiⁿ chèng-thâu, lóng siám tī piⁿ-á; Góa ê chhin-chhek ia̍h hn̄g-hn̄g teh khiā.

12Hiah-ê siàu想我ê性命ê 設羅網；　　想beh害我ê，講出惡毒ê話；　　Thong日想詭譎ê計謀。Hiah ê siàu-siūⁿ góa ê sìⁿ-miā--ê siat lô-bāng; Siūⁿ beh hāi góa ê, kóng-chhut ok-to̍k ê ōe; Thong-ji̍t siūⁿ khúi-khiat ê kè-bô͘.

13總是我親像臭耳人ê無聽見，　　親像啞口ê，無開嘴。Chóng-sī góa chhin-chhiūⁿ chhàu-hī-lâng--ê bô thiaⁿ-kìⁿ, Chhin-chhiūⁿ é-káu--ê, bô khui chhùi.

14我亦親像無聽見ê人，　　嘴無應答ê。Góa ia̍h chhin-chhiūⁿ bô thiaⁿ-kìⁿ ê lâng, Chhùi bô ìn-tap--ê.

15耶和華ah，我thèng候你；　　主，我ê上帝ah，你beh聽我。Iâ-hô-hoa ah, góa thèng-hāu Lí; Chú, Góa ê Siōng-tè ah, Lí beh thiaⁿ góa.

16因為我bat講，驚了in對我誇口；　　我ê腳踏thu̍t ê時，in對我家己尊大。In-ūi góa bat kóng, Kiaⁿ-liáu in tùi góa khoa-kháu; Góa ê kha ta̍h-thu̍t ê sî, in tùi góa ka-kī chun-tōa.

17因為我險險跋倒，　　我ê憂悶常常tī我ê面前。In-ūi góa hiám-hiám poa̍h-tó, Góa ê iu-būn siông-siông tī góa ê bīn-chêng.

18因為我beh認我ê罪惡；　　Koh為tio̍h我ê罪來憂悶。In-ūi góa beh jīn góa ê chōe-ok; Koh ūi-tio̍h góa ê chōe lâi iu-būn.

19總是我ê對敵也活動，亦勇猛；　　無理由怨恨我ê，加添ná-chōe。Chóng-sī góa ê tùi-te̍k iā oa̍h-tāng, ia̍h ióng-béng; Bô lí-iû oàn-hūn góa ê, ke-thiⁿ ná-chōe.

20用pháiⁿ報好ê，kap我做對頭；　　因為我是追jip好。Ēng pháiⁿ pò hó--ê, kap góa chòe tùi-thâu; In-ūi góa sī tui-jip hó.

21耶和華ah，m̄-thang放sak我；　　我ê上帝ah，m̄-thang離開我遠遠。Iâ-hô-hoa ah, m̄-thang pàng-sak góa; Góa ê Siōng-tè ah, m̄-thang lī-khui góa hn̄g-hn̄g.

22主ah，拯救我ê，　　求你緊緊幫贊我。Chú ah, Chín-kiù góa ê, Kiû Lí kín-kín pang-chān góa.

1大衛ê詩，交hō͘樂官，Iâ-tō͘-tùn。1) 我bat講，我beh謹慎我ê路，　　免得用我ê舌犯罪；　　Pháiⁿ人tī我面前ê時，　　我beh約束我ê嘴親像馬咬韁。Tāi-pi̍t ê si, kau hō͘ Ga̍k-koaⁿ, Iâ-tō͘-tùn.1) Góa bat kóng, Góa beh kín-sīn góa ê lō͘, Bián-tit ēng góa ê chi̍h hoān-chōe; Pháiⁿ-lâng tī góa bīn-chêng ê sî, Góa beh iok-sok góa ê chhùi chhin-chhiūⁿ bé-kā-kiuⁿ.

2我靜靜無聲，連好話亦無講出嘴；　　我ê憂悶就giâ起來。Góa chēng-chēng bô siaⁿ, liân hó-ōe ia̍h bô kóng-chhut chhùi; Góa ê iu-būn chiū giâ--khí-lâi.

3我ê心tī我ê內面熱熱；　　我靜靜想ê時，火就to̍h起來；　　我就用舌來講：Góa ê sim tī góa ê lāi-bīn jia̍t-jia̍t; Góa chēng-chēng siūⁿ ê sî, hé chiū to̍h--khí-lâi; Góa chiū ēng chi̍h lâi kóng:

4耶和華ah，求你hō͘我知本身ê結局，　　Kap我年歲ê數額jōa-chōe；　　Hō͘我知軟弱到怎樣。Iâ-hô-hoa ah, kiû Lí hō͘ góa chai pún-sin ê kiat-kio̍k, Kap góa nî-hè ê siàu-gia̍h jōa-chōe; Hō͘ góa chai loán-jio̍k kàu cháiⁿ-iūⁿ.

5你hō͘我ê日子親像一巴掌，　　我一生ê年-hé，tī你ê面前親像無；　　Ta̍k人khiā在ê時，真正lóng是空空。[Sè-la̍h]Lí hō͘ góa ê ji̍t-chí chhin-chhiūⁿ chi̍t-pa-chiúⁿ, Góa it-seng ê nî-hé, tī Lí ê bīn-chêng chhin-chhiūⁿ bô; Ta̍k-lâng khiā-chāi ê sî, chin-chiàⁿ lóng sī khang-khang. [Sè-la̍h

6世間人行做實在親像iáⁿ；　　In無閒chhih-chhih，真正無chhái-kang；　　伊所積聚-ê，m̄知將來是誰得去。Sè-kan-lâng kiâⁿ-chòe si̍t-chāi chhin-chhiūⁿ iáⁿ; In bô-êng chhih-chhih, chin-chiàⁿ bô chhái-kang; I só͘ chek-chū--ê, m̄-chai chiong-lâi chī-chūi tit--khì.

7主ah，我taⁿ thèng候甚麼？　　我ê ǹg望在tī你。Chú ah, góa taⁿ thèng-hāu sím-mi̍h? Góa ê ǹg-bāng chāi-tī Lí.

8求你救我脫離我一切ê過失；　　M̄-thang hō͘我受戇人ê凌辱。Kiû Lí kiù góa thoat-lī góa it-chhè ê kè-sit; M̄-thang hō͘ góa siū gōng-lâng ê lêng-jio̍k.

9我靜靜無開嘴；　　因為是你做ê。Góa chēng-chēng bô khui-chhùi; In-ūi sī Lí chòe ê.

10你所降ê責罰求你kā我除去；　　因為你ê手ê督責，我就消滅。Lí só͘ kàng ê chek-hoa̍t kiû Lí kā góa tû--khì; In-ūi Lí ê chhiú ê tok-chek, góa chiū siau-bia̍t.

11你因為人ê罪惡，警戒伊ê時，　　Hō͘伊所歡喜ê消滅，親像tio̍h蛀蟲；　　世間人真正是空空。 [Sè-la̍h]Lí in-ūi lâng ê chōe-ok, kéng-kài i ê sî, Hō͘ i só͘ hoaⁿ-hí--ê siau-bia̍t, chhin-chhiūⁿ tio̍h chiù-thâng; Sè-kan lâng chin-chiàⁿ sī khang-khang. [Sè-la̍h

12耶和華ah，求你聽我ê祈禱，àⁿ耳孔聽我ê求叫，　　我流目屎，求你m̄-thang無出聲；　　因為我tī你ê面前是出外人，　　是寄腳ê，親像我ê列祖一般樣。Iâ-hô-hoa ah, kiû Lí thiaⁿ góa ê kî-tó, àⁿ hī-khang thiaⁿ góa ê kiû-kiò, Góa lâu ba̍k-sái, kiû Lí m̄-thang bô chhut siaⁿ; In-ūi góa tī Lí ê bīn-chêng sī chhut-gōa-lâng, Sī kià-kha--ê, chhin-chhiūⁿ góa ê lia̍t-chó͘ chi̍t-poaⁿ-iūⁿ.

13求你寬容我，hō͘我iáu未去來歸tī無ê事先，　　Thang得tio̍h爽快。Kiû Lí khoan-iông góa, hō͘ góa iáu-bē khì lâi kui tī bô ê tāi-seng, Thang tit-tio̍h sóng-khoài.