1上帝ah，求祢kā我判斷；對無虔誠ê國，辯明我ê案。　　求祢救我脫離奸詐不義ê人。Siōng-tè ah, kiû Lí kā góa phòaⁿ-toàn; tùi bô khiân-sêng ê kok, piān-bêng góa ê àn. Kiû Lí kiù góa thoat-lī kan-chà put-gī ê lâng.

2因為你是hō͘我有氣力ê上帝；啥事放sak我？　　我啥事因為對敵ê壓迫，常常憂悶來行ah？In-ūi Lí sī hō͘ góa ū khùi-la̍t ê Siōng-tè; siáⁿ-sū pàng-sak góa? Góa siáⁿ-sū in-ūi tùi-te̍k ê ap-pek, siông-siông iu-būn lâi kiâⁿ ah?

3求你發出你ê光kap你ê真實，hō͘伊chhōa我；　　帶我到你ê聖山，到你ê會幕。Kiû Lí hoat-chhut Lí ê kng kap Lí ê chin-si̍t, hō͘ i chhōa góa; Tòa góa kàu Lí ê sèng-soaⁿ, kàu Lí ê hōe-bō͘.

4我就beh到上帝ê祭壇，到我極歡喜ê上帝hia；　　上帝ah，我ê上帝ah，我beh彈琴來o-ló你。Góa chiū beh kàu Siōng-tè ê chè-tôaⁿ, kàu góa ke̍k hoaⁿ-hí ê Siōng-tè hia; Siōng-tè ah, góa ê Siōng-tè ah, góa beh tôaⁿ khîm lâi o-ló Lí.

5我ê心ah，你啥事鬱卒？　　啥事tī我ê內面著急？　　你tio̍h ǹg望上帝；　　因為我iáu-kú beh o-ló伊；　　伊是我ê面ê榮光，亦是我ê上帝。Góa ê sim ah, lí siáⁿ-sū ut-chut? Siáⁿ-sū tī góa ê lāi-bīn tio̍h-kip? Lí tio̍h ǹg-bāng Siōng-tè; In-ūi góa iáu-kú beh o-ló I; I sī góa ê bīn ê êng-kng, ia̍h sī góa ê Siōng-tè.

1Khó-la̍h後裔教示ê詩，交hō͘樂官。1) 上帝ah，你tī古早，阮ê列祖ê時，所行ê事，阮親耳聽見，　　阮ê列祖亦有對阮講起。Khó-la̍h hō͘-è kà-sī ê si, kau hō͘ Ga̍k-koaⁿ.1) Siōng-tè ah, Lí tī kó͘-chá, goán ê lia̍t-chó͘ ê sî, só͘ kiâⁿ ê sū, goán chhin-hī thiaⁿ-kìⁿ, Goán ê lia̍t-chó͘ ia̍h ū tùi goán kóng-khí.

2你bat用你ê手趕列邦，來栽培阮ê列祖，　　你苦楚hiah-ê族，來hō͘ in發達。Lí bat ēng Lí ê chhiú kóaⁿ lia̍t-pang, lâi chai-pôe goán ê lia̍t-chó͘, Lí khó͘-chhó͘ hiah ê cho̍k, lâi hō͘ in hoat-ta̍t.

3因為in m̄是tùi in ê刀劍來得tio̍h土地；　　亦m̄是in ê手救in；　　就是你ê chiàⁿ手，你ê手骨，你ê面ê光救in；　　因為你歡喜in。In-ūi in m̄-sī tùi in ê to-kiàm lâi tit-tio̍h thó͘-tōe; Ia̍h m̄-sī in ê chhiú kiù in; Chiū-sī Lí ê chiàⁿ-chhiú, Lí ê chhiú-kut, Lí ê bīn ê kng kiù in; In-ūi Lí hoaⁿ-hí in.

4上帝ah，你是我ê王；　　求你出令，拯救雅各。Siōng-tè ah, Lí sī góa ê Ông; Kiû Lí chhut lēng, chín-kiù Ngá-kok.

5阮óa靠你，beh chhia倒阮ê對敵；　　阮óa靠你ê名，beh thún踏hiah-ê起來攻擊阮ê人。Goán óa-khò Lí, beh chhia-tó goán ê tùi-te̍k; Goán óa-khò Lí ê miâ, beh thún-ta̍h hiah ê khí-lâi kong-kek goán ê lâng.

6因為我無beh óa靠我ê弓，　　我ê刀亦bōe救我。In-ūi góa bô beh óa-khò góa ê keng, Góa ê to ia̍h bōe kiù góa.

7獨獨你bat救阮脫離對敵，　　Hō͘怨恨阮ê人見笑。To̍k-to̍k Lí bat kiù goán thoat-lī tùi-te̍k, Hō͘ oàn-hūn goán ê lâng kiàn-siàu.

8阮thong日因為上帝來誇口，　　阮beh o-ló你ê名到永遠。 [Sè-la̍h]Goán thong-ji̍t in-ūi Siōng-tè lâi khoa-kháu, Goán beh o-ló Lí ê miâ kàu éng-oán. [Sè-la̍h

9總是現今你放sak阮，hō͘阮受凌辱；　　無kap阮ê軍兵相kap出去。Chóng-sī hiān-kim Lí pàng-sak goán, hō͘ goán siū lêng-jio̍k; Bô kap goán ê kun-peng saⁿ-kap chhut-khì.

10你hō͘阮tī對敵ê面前oa̍t-tńg身走；　　Hiah-ê怨恨阮ê人，chhut-chai7in來搶the̍h。Lí hō͘ goán tī tùi-te̍k ê bīn-chêng oa̍t-tńg-sin cháu; Hiah ê oàn-hūn goán ê lâng, chhut-chāi in lâi chhiúⁿ-the̍h.

11你hō͘阮親像羊做人ê食物；　　Hō͘阮四散tī列邦中。Lí hō͘ goán chhin-chhiūⁿ iûⁿ chòe lâng ê chia̍h-mi̍h; Hō͘ goán sì-sòaⁿ tī lia̍t-pang tiong.

12你bōe你ê百姓，亦無thàn-錢，　　所得tio̍h ê價錢，也無加添你ê好額。Lí bōe Lí ê peh-sìⁿ, ia̍h bô thàn-chîⁿ, só͘ tit-tio̍h ê kè-chîⁿ, iā bô ke-thiⁿ Lí ê hó-gia̍h.

13你hō͘阮受隔壁國ê凌辱；　　受四圍ê人恥笑譏刺。Lí hō͘ goán siū keh-piah kok ê lêng-jio̍k; Siū sì-ûi ê lâng thí-chhiò ki-chhì.

14你hō͘阮tī列邦中做話柄；　　Hō͘眾百姓對阮搖頭。Lí hō͘ goán tī lia̍t-pang-tiong chòe ōe-pìⁿ; Hō͘ chèng peh-sìⁿ tùi goán iô-thâu.

15我ê凌辱thong日tī我ê頭前；　　我ê面ê見笑遮蓋我；Góa ê lêng-jio̍k thong-ji̍t tī góa ê thâu-chêng; Góa ê bīn ê kiàn-siàu jia-khàm góa;

16是因為hit-ê詈罵、譭謗ê人ê聲，　　Koh因為對敵kap報冤ê人ê緣故。Sī in-ūi hit ê lóe-mē, húi-pòng ê lâng ê siaⁿ, Koh in-ūi tùi-te̍k kap pò-oan ê lâng ê iân-kò͘.

17Chiah-ê lóng臨到阮，阮無bōe記得你。　　亦無假影守你ê約。Chiah-ê lóng lîm-kàu goán, goán bô bōe-kì-tit Lí. Ia̍h bô ké-iáⁿ siú Lí ê iok.

18阮ê心無pōe你；　　阮ê腳步無偏離你ê路。Goán ê sim bô pōe Lí; Goán ê kha-pō͘ bô phian-lī Lí ê lō͘.

19你竟然tī山狗ê所在teh傷阮，　　用死ê蔭影遮蓋阮。Lí kéng-jiân tī soaⁿ-káu ê só͘-chāi teh-siong goán, Ēng sí ê ìm-ńg jia-khàm goán.

20設使阮bōe記得阮ê上帝ê名，　　Á是ǹg別ê神kia̍h起手；Siat-sú goán bōe-kì-tit goán ê Siōng-tè ê miâ, Á-sī ǹg pa̍t ê sîn kia̍h-khí chhiú;

21上帝kiám無鑑察chit-ê事mah？　　因為伊知人心內ê隱密。Siōng-tè kiám bô kàm-chhat chit ê sū mah? In-ūi I chai lâng sim-lāi ê ún-ba̍t.

22阮因為你ê緣故，thong日受thâi；　　看做親像beh thâi ê羊。Goán in-ūi Lí ê iân-kò͘, thong-ji̍t siū thâi; Khòaⁿ chòe chhin-chhiūⁿ beh thâi ê iûⁿ.

23主ah，求你精神，啥事teh睏？　　求你起來，m̄-thang永遠棄sak阮。Chú ah, kiû Lí cheng-sîn, siáⁿ-sū teh khùn? Kiû Lí khí--lâi, m̄-thang éng-oán khì-sak goán.

24你啥事掩你ê面？　　啥事bōe記得阮所受ê苦難kap壓制？Lí siáⁿ-sū ng Lí ê bīn? Siáⁿ-sū bōe-kì-tit goán só͘ siū ê khó͘-lān kap ap-chè?

25因為阮ê性命仆tī土粉；　　阮ê腹肚連tī地面。In-ūi goán ê sìⁿ-miā phak tī thô͘-hún; goán ê pak-tó͘ liâm tī tōe-bīn.

26求你起來幫贊阮，帶念你ê慈愛救贖阮。Kiû Lí khí-lâi pang-chān goán, Tài-liām Lí ê chû-ài kiù-sio̍k goán.

1Khó-la̍h後裔教示ê詩，koh是愛慕ê歌；交hō͘樂官；調是用「百合花」。1) 我ê心chhèng出好ê話；　　我講起我為tio̍h王所做ê；　　我ê舌是敏捷ê人ê筆。Khó-la̍h hō͘-è kà-sī ê si, koh sī ài-bō͘ ê koa; kau hō͘ Ga̍k-koaⁿ; tiāu, sī ēng "Pek-ha̍p-hoe".1) Góa ê sim chhèng-chhut hó ê ōe; Góa kóng-khí góa ūi-tio̍h ông só͘ chòe--ê; Góa ê chi̍h sī bín-chia̍t ê lâng ê pit.

2你比世間人khah好看，　　Tī你ê嘴滿滿有恩惠，　　所以上帝賜福你，直到永遠。Lí pí sè-kan lâng khah hó-khòaⁿ, Tī lí ê chhùi móa-móa ū un-hūi, Só͘-í Siōng-tè sù-hok lí, ti̍t-kàu éng-oán.

3大權能ê ah，你tio̍h背劍tī腰裡，　　顯出你ê榮光kap威嚴。Tōa koân-lêng--ê ah, lí tio̍h pē kiàm tī io--nih, Hián-chhut lí ê êng-kng kap ui-giâm.

4Koh tī威嚴ê中間，為tio̍h真理、謙卑、公義，　　你坐車進前去，無m̄得勝；　　你ê chiàⁿ手beh做thang驚ê事，hō͘你看。Koh tī ui-giâm ê tiong-kan, ūi-tio̍h chin-lí, khiam-pi, kong-gī, Lí chē-chhia chìn-chêng khì, bô m̄ tek-sèng; Lí ê chiàⁿ-chhiú beh chòe thang kiaⁿ ê sū, hō͘ lí khòaⁿ.

5你ê箭肉真利，　　射tio̍h王ê對敵ê心，　　列邦倒tī你ê下面。Lí ê chìⁿ-bah chin lāi, Siā-tio̍h ông ê tùi-te̍k ê sim, Lia̍t-pang tó tī lí ê ē-bīn.

6上帝ah，你ê寶座是永永遠遠ê，　　你ê國ê權柄是正直ê權柄。Siōng-tè ah, Lí ê pó-chō sī éng-éng oán-oán ê, Lí ê kok ê koân-pèng sī chèng-ti̍t ê koân-pèng.

7你歡喜公義，怨恨不法，　　所以上帝，你ê上帝，用歡喜ê油抹你，　　贏過你chiah-ê同伴。Lí hoaⁿ-hí kong-gī, oàn-hūn put-hoat, Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

8你ê衣裳lóng有沒藥、沉香、肉桂ê芳；　　Tùi象牙ê王宮，有絲絃ê樂器hō͘你歡喜。Lí ê i-chiûⁿ lóng ū bu̍t-io̍h, tîm-hiuⁿ, jio̍k-kùi ê phang; Tùi chhiūⁿ-gê ê ông-kiong, ū si-hiân ê ga̍k-khì hō͘ lí hoaⁿ-hí.

9有王ê cha-bó͘-kiáⁿ tī你尊貴婦女ê中間；　　王后用Gô-hui ê金裝飾，khiā tī你ê chiàⁿ-pêng。Ū ông ê cha-bó͘-kiáⁿ tī lí chun-kùi hū-lú ê tiong-kan; Ông-hō͘ ēng Gô-hui ê kim chng-thāⁿ, khiā tī lí ê chiàⁿ-pêng.

10Cha-bó͘-gín-á ah，你tio̍h聽，tio̍h看，tio̍h àⁿ耳孔；　　M̄-thang記得你ê百姓，kap你ê老父ê家；Cha-bó͘-gín-á ah, lí tio̍h thiaⁿ, tio̍h khòaⁿ, tio̍h àⁿ hī-khang; M̄-thang kì-tit lí ê peh-sìⁿ, kap lí ê lāu-pē ê ke;

11王就beh欣慕你ê súi；　　因為伊是你ê主，你tio̍h拜伊。Ông chiū beh him-bō͘ lí ê súi; In-ūi i sī lí ê chú, lí tio̍h pài i.

12Chhui-lô ê百姓beh來送禮物，　　百姓中ê好額人beh對你求恩。Chhui-lô ê peh-sìⁿ beh lâi sàng lé-mi̍h, Peh-sìⁿ tiong ê hó-gia̍h lâng beh tùi lí kiû un.

13王ê cha-bó͘-kiáⁿ tī王宮內，極其榮華；　　伊ê衣服是用金線繡ê。Ông ê cha-bó͘-kiáⁿ tī ông-kiong-lāi, ke̍k-kî êng-hôa; I ê i-ho̍k sī ēng kim-sòaⁿ siù--ê.

14伊beh穿繡花ê衣服，受chhōa到王ê面前；　　做伴跟隨伊ê在室女亦beh受chhōa到你ê面前；I beh chhēng siù-hoe ê i-ho̍k, siū chhōa kàu ông ê bīn-chêng; Chòe-phōaⁿ kun-sûi i ê chāi-sek-lú ia̍h beh siū chhōa kàu lí ê bīn-chêng;

15In beh歡喜快樂受引chhōa；　　In beh進入王宮。In beh hoaⁿ-hí khoài-lo̍k siū ín-chhōa; In beh chìn-ji̍p ông-kiong.

16你ê kiáⁿ孫beh續接你ê列祖；　　你beh設立in tī全地做王。Lí ê kiáⁿ-sun beh sòa-chiap lí ê lia̍t-chó͘; Lí beh siat-li̍p in tī choân-tōe chòe-ông.

17我beh hō͘你ê名萬代hō͘人記念；　　所以萬百姓beh永永遠遠感謝你。Góa beh hō͘ lí ê miâ bān-tāi hō͘ lâng kì-liām; Só͘-í bān peh-sìⁿ beh éng-éng oán-oán kám-siā lí.