1Khó-la̍h後裔教示ê詩，koh是愛慕ê歌；交hō͘樂官；調是用「百合花」。1) 我ê心chhèng出好ê話；　　我講起我為tio̍h王所做ê；　　我ê舌是敏捷ê人ê筆。Khó-la̍h hō͘-è kà-sī ê si, koh sī ài-bō͘ ê koa; kau hō͘ Ga̍k-koaⁿ; tiāu, sī ēng "Pek-ha̍p-hoe".1) Góa ê sim chhèng-chhut hó ê ōe; Góa kóng-khí góa ūi-tio̍h ông só͘ chòe--ê; Góa ê chi̍h sī bín-chia̍t ê lâng ê pit.

2你比世間人khah好看，　　Tī你ê嘴滿滿有恩惠，　　所以上帝賜福你，直到永遠。Lí pí sè-kan lâng khah hó-khòaⁿ, Tī lí ê chhùi móa-móa ū un-hūi, Só͘-í Siōng-tè sù-hok lí, ti̍t-kàu éng-oán.

3大權能ê ah，你tio̍h背劍tī腰裡，　　顯出你ê榮光kap威嚴。Tōa koân-lêng--ê ah, lí tio̍h pē kiàm tī io--nih, Hián-chhut lí ê êng-kng kap ui-giâm.

4Koh tī威嚴ê中間，為tio̍h真理、謙卑、公義，　　你坐車進前去，無m̄得勝；　　你ê chiàⁿ手beh做thang驚ê事，hō͘你看。Koh tī ui-giâm ê tiong-kan, ūi-tio̍h chin-lí, khiam-pi, kong-gī, Lí chē-chhia chìn-chêng khì, bô m̄ tek-sèng; Lí ê chiàⁿ-chhiú beh chòe thang kiaⁿ ê sū, hō͘ lí khòaⁿ.

5你ê箭肉真利，　　射tio̍h王ê對敵ê心，　　列邦倒tī你ê下面。Lí ê chìⁿ-bah chin lāi, Siā-tio̍h ông ê tùi-te̍k ê sim, Lia̍t-pang tó tī lí ê ē-bīn.

6上帝ah，你ê寶座是永永遠遠ê，　　你ê國ê權柄是正直ê權柄。Siōng-tè ah, Lí ê pó-chō sī éng-éng oán-oán ê, Lí ê kok ê koân-pèng sī chèng-ti̍t ê koân-pèng.

7你歡喜公義，怨恨不法，　　所以上帝，你ê上帝，用歡喜ê油抹你，　　贏過你chiah-ê同伴。Lí hoaⁿ-hí kong-gī, oàn-hūn put-hoat, Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

8你ê衣裳lóng有沒藥、沉香、肉桂ê芳；　　Tùi象牙ê王宮，有絲絃ê樂器hō͘你歡喜。Lí ê i-chiûⁿ lóng ū bu̍t-io̍h, tîm-hiuⁿ, jio̍k-kùi ê phang; Tùi chhiūⁿ-gê ê ông-kiong, ū si-hiân ê ga̍k-khì hō͘ lí hoaⁿ-hí.

9有王ê cha-bó͘-kiáⁿ tī你尊貴婦女ê中間；　　王后用Gô-hui ê金裝飾，khiā tī你ê chiàⁿ-pêng。Ū ông ê cha-bó͘-kiáⁿ tī lí chun-kùi hū-lú ê tiong-kan; Ông-hō͘ ēng Gô-hui ê kim chng-thāⁿ, khiā tī lí ê chiàⁿ-pêng.

10Cha-bó͘-gín-á ah，你tio̍h聽，tio̍h看，tio̍h àⁿ耳孔；　　M̄-thang記得你ê百姓，kap你ê老父ê家；Cha-bó͘-gín-á ah, lí tio̍h thiaⁿ, tio̍h khòaⁿ, tio̍h àⁿ hī-khang; M̄-thang kì-tit lí ê peh-sìⁿ, kap lí ê lāu-pē ê ke;

11王就beh欣慕你ê súi；　　因為伊是你ê主，你tio̍h拜伊。Ông chiū beh him-bō͘ lí ê súi; In-ūi i sī lí ê chú, lí tio̍h pài i.

12Chhui-lô ê百姓beh來送禮物，　　百姓中ê好額人beh對你求恩。Chhui-lô ê peh-sìⁿ beh lâi sàng lé-mi̍h, Peh-sìⁿ tiong ê hó-gia̍h lâng beh tùi lí kiû un.

13王ê cha-bó͘-kiáⁿ tī王宮內，極其榮華；　　伊ê衣服是用金線繡ê。Ông ê cha-bó͘-kiáⁿ tī ông-kiong-lāi, ke̍k-kî êng-hôa; I ê i-ho̍k sī ēng kim-sòaⁿ siù--ê.

14伊beh穿繡花ê衣服，受chhōa到王ê面前；　　做伴跟隨伊ê在室女亦beh受chhōa到你ê面前；I beh chhēng siù-hoe ê i-ho̍k, siū chhōa kàu ông ê bīn-chêng; Chòe-phōaⁿ kun-sûi i ê chāi-sek-lú ia̍h beh siū chhōa kàu lí ê bīn-chêng;

15In beh歡喜快樂受引chhōa；　　In beh進入王宮。In beh hoaⁿ-hí khoài-lo̍k siū ín-chhōa; In beh chìn-ji̍p ông-kiong.

16你ê kiáⁿ孫beh續接你ê列祖；　　你beh設立in tī全地做王。Lí ê kiáⁿ-sun beh sòa-chiap lí ê lia̍t-chó͘; Lí beh siat-li̍p in tī choân-tōe chòe-ông.

17我beh hō͘你ê名萬代hō͘人記念；　　所以萬百姓beh永永遠遠感謝你。Góa beh hō͘ lí ê miâ bān-tāi hō͘ lâng kì-liām; Só͘-í bān peh-sìⁿ beh éng-éng oán-oán kám-siā lí.

1Khó-la̍h後裔ê詩；交hō͘樂官；調是用女音。1) 上帝是阮逃閃ê所在kap氣力。　　亦是患難中及時ê幫贊。Khó-la̍h hō͘-è ê si; kau hō͘ Ga̍k-koaⁿ; tiāu, sī ēng lú-im.1) Siōng-tè sī goán tô-siám ê só͘-chāi kap khùi-la̍t. Ia̍h sī hoān-lān-tiong ki̍p-sî ê pang-chān.

2所以地雖然變遷，　　山雖然搖動到海中，Só͘-í tōe sui-jiân piàn-chhian, Soaⁿ sui-jiân iô-tāng kàu hái-tiong,

3其中ê水雖然hōa-hōa哮giâ湧，　　山雖然因為海漲搖choah，阮亦無驚。 [Sè-la̍h]Kî-tiong ê chúi sui-jiân hōa-hōa-háu giâ-éng, Soaⁿ sui-jiân in-ūi hái-tiòng iô-choah, goán ia̍h bô kiaⁿ. [Sè-la̍h

4有一條河，伊ê開叉hō͘上帝ê城歡喜；　　就是至koânê所khiā起聖ê所在。Ū chi̍t tiâu hô, i ê khui-chhe hō͘ Siōng-tè ê siâⁿ hoaⁿ-hí; chiū-sī Chì-koâiⁿ--ê só͘ khiā-khí sèng ê só͘-chāi.

5上帝tī hit中間，城的確bōe搖動；　　天phú光，上帝beh幫贊伊。Siōng-tè tī hit tiong-kan, siâⁿ tek-khak bōe iô-tāng; Thiⁿ-phú-kng, Siōng-tè beh pang-chān i.

6異邦hōa-hōa哮，列國搖動；　　上帝出伊ê聲，地就消溶。Īⁿ-pang hōa-hōa-háu, lia̍t-kok iô-tāng; Siōng-tè chhut I ê siaⁿ, tōe chiū siau-iûⁿ.

7萬軍ê耶和華kap阮tī-teh，　　雅各ê上帝做阮ê高台。 [Sè-la̍h]Bān-kun ê Iâ-hô-hoa kap goán tī--teh, Ngá-kok ê Siōng-tè chòe goán ê koâiⁿ-tâi. [Sè-la̍h

8來ah，來看耶和華ê所做，　　看伊hō͘地荒廢到怎樣。Lâi ah, lâi khòaⁿ Iâ-hô-hoa ê só͘-chòe, Khòaⁿ I hō͘ tōe hong-hòe kàu cháiⁿ-iūⁿ.

9伊hō͘交戰soah，到tī地極；　　伊at折弓，斬斷鎗；　　將戰車燒tī火中。I hō͘ kau-chiàn soah, kàu tī tōe-ke̍k; I at-chi̍h keng, chām-tn̄g chhiuⁿ; chiong chiàn-chhia sio tī hé-tiong.

10Lín tio̍h定定，tio̍h知我是上帝；　　我beh tī列邦中做高大，受尊做大，　　Tī遍地上亦做高大。Lín tio̍h tiāⁿ-tiāⁿ, tio̍h chai Góa sī Siōng-tè; Góa beh tī lia̍t-pang-tiong chòe koâiⁿ-tōa, siū chun chòe tōa, Tī piàn tōe-chiūⁿ ia̍h chòe koâiⁿ-tōa.

11萬軍ê耶和華kap阮tī-teh；　　雅各ê上帝做阮ê高台。Bān-kun ê Iâ-hô-hoa kap goán tī-teh; Ngá-kok ê Siōng-tè chòe goán ê koâiⁿ-tâi.

1Khó-la̍h後裔ê詩；交hō͘樂官。1) Lín眾百姓ah，lín lóng tio̍h搭手；　　Tio̍h用得勝ê聲，大聲o-ló上帝。Khó-la̍h hō͘-è ê si; kau hō͘ Ga̍k-koaⁿ.1) Lín chèng peh-sìⁿ ah, lín lóng tio̍h tah-chhiú; Tio̍h ēng tek-sèng ê siaⁿ, tōa-siaⁿ o-ló Siōng-tè.

2因為耶和華至koânê，thang驚ê，　　伊是大君王，管理全地。In-ūi Iâ-hô-hoa chì-koâiⁿ--ê, thang kiaⁿ--ê, I sī tōa kun-ông, koán-lí choân-tōe.

3伊beh hō͘萬百姓降服tī阮ê下面；　　亦beh hō͘列邦tī阮ê腳下。I beh hō͘ bān peh-sìⁿ hâng-ho̍k tī goán ê ē-bīn; Ia̍h beh hō͘ lia̍t-pang tī goán ê kha-ē.

4伊kā阮揀阮ê產業，　　就是伊所疼ê雅各ê榮光。[Sè-la̍h]I kā goán kéng goán ê sán-gia̍p, Chiū-sī I só͘ thiàⁿ ê Ngá-kok ê êng-kng. [Sè-la̍h

5上帝上去，有hoah ê聲tè伊，　　耶和華上去，有號頭ê聲tè伊。Siōng-tè chiūⁿ-khì, ū hoah ê siaⁿ tè--I, Iâ-hô-hoa chiūⁿ-khì, ū hō-thâu ê siaⁿ tè--I.

6Lín tio̍h唱歌，o-ló上帝，tio̍h唱歌o-ló；　　唱歌o-ló咱ê王，tio̍h唱歌o-ló；Lín tio̍h chhiùⁿ-koa, o-ló Siōng-tè, tio̍h chhiùⁿ-koa o-ló; Chhiùⁿ-koa o-ló lán ê Ông, tio̍h chhiùⁿ-koa o-ló;

7因為上帝是全地ê王，　　Tio̍h用智慧唱歌o-ló伊。In-ūi Siōng-tè sī choân-tōe ê Ông, Tio̍h ēng tì-hūi chhiùⁿ-koa o-ló I.

8上帝做王治理萬國；　　上帝坐tī伊聖ê寶座。Siōng-tè chòe ông tī-lí bān-kok; Siōng-tè chē tī I sèng ê pó-chō.

9列邦ê貴族聚集，beh做亞伯拉罕ê上帝ê百姓；　　因為世界ê藤牌是屬tī上帝；　　伊是極高。Lia̍t-pang ê kùi-cho̍k chū-chi̍p, Beh chòe A-pek-la̍h-hán ê Siōng-tè ê peh-sìⁿ; In-ūi sè-kài ê tîn-pâi sī sio̍k tī Siōng-tè; I sī ke̍k-koâiⁿ.