1大衛ê詩，交hō͘樂官；用絲絃ê樂器。1) 顯明我ê義ê上帝ah，　　我求叫ê時，求你應我。　　我tī困苦ê中間，你bat hō͘我寬闊。　　Taⁿ求你憐憫我，來聽我ê祈禱。Tāi-pi̍t ê si, kau hō͘ Ga̍k-koaⁿ; ēng si hiân ê ga̍k-khì.1) Hián-bêng góa ê gī ê Siōng-tè ah, góa kiû-kiò ê sî, kiû Lí ìn góa. Góa tī khùn-khó͘ ê tiong-kan, Lí bat hō͘ góa khoan-khoah. Taⁿ kiû Lí lîn-bín góa, lâi thiaⁿ góa ê kî-tó.

2Lín chiah-ê上等人ah，將我ê榮光變做凌辱，beh到tī時？　　Lín意愛空虛，chhiau-chhē無影跡，beh到tī時？[Sè-la̍h]Lín chiah ê siōng-téng-lâng ah, chiong góa ê êng-kng piàn-chòe lêng-jio̍k, beh kàu tī-sî? Lín ì-ài khang-hu, chhiau-chhē bô iáⁿ-chiah, beh kàu tī-sî? [Sè-la̍h

3Lín tio̍h知耶和華已經分別敬虔ê人做伊家己ê。　　我求叫耶和華，伊beh聽我。Lín tio̍h chai Iâ-hô-hoa í-keng hun-piat kèng-khiân ê lâng chòe I ka-kī ê. Góa kiû-kiò Iâ-hô-hoa, I beh thiaⁿ góa.

4Lín tio̍h驚惶，m̄-thang犯罪；　　Tī眠床裡，心tio̍h三思，亦tio̍h肅靜。[Sè-la̍h]Lín tio̍h kiaⁿ-hiâⁿ, m̄-thang hoān-chōe; Tī bîn-chhn̂g--nih, sim tio̍h sàm-su, ia̍h tio̍h siok-chēng. [Sè-la̍h

5Tio̍h獻義ê祭，　　亦tio̍h óa靠耶和華。Tio̍h hiàn gī ê chè, Ia̍h tio̍h óa-khò Iâ-hô-hoa.

6Chōe-chōe人講，Chī-chūi會指示阮甚麼好處？　　耶和華ah，求你用你ê面ê光來照阮。Chōe-chōe lâng kóng, Chī-chūi ōe chí-sī goán sím-mi̍h hó--chhù? Iâ-hô-hoa ah, kiû Lí ēng Lí ê bīn ê kng lâi chiò goán.

7你hō͘我心內有歡喜，　　贏過人得tio̍h chōe-chōe五穀kap新酒ê時。Lí hō͘ góa sim-lāi ū hoaⁿ-hí, Iâⁿ-kè lâng tit-tio̍h chōe-chōe gō͘-kak kap sin-chiú ê sî.

8我beh安然倒teh睏，　　因為只有耶和華你hō͘我安穩khiā起。Góa beh an-jiân tó--teh khùn, In-ūi chí-ū Iâ-hô-hoa Lí hō͘ góa an-ún khiā-khí.

1大衛ê詩，交hō͘樂官；用pûn ê樂器。1) 耶和華ah，求你àⁿ耳孔聽我ê話。　　鑑察我ê心思。Tāi-pi̍t ê si, kau hō͘ Ga̍k-koaⁿ; ēng pûn ê ga̍k-khì.1) Iâ-hô-hoa ah, kiû Lí àⁿ hī-khang thiaⁿ góa ê ōe. Kàm-chhat góa ê sim-su.

2我ê王，我ê上帝ah，求你àⁿ落聽我求叫ê聲：　　因為我ǹg你祈禱。Góa ê Ông, góa ê Siōng-tè ah, Kiû Lí àⁿ-lo̍h thiaⁿ góa kiû-kiò ê siaⁿ: In-ūi góa ǹg Lí kî-tó.

3耶和華ah，早起時你會聽我ê聲；　　早起時我beh對你排列我ê心意，續beh瞭望。Iâ-hô-hoa ah, chá-khí-sî Lí ōe thiaⁿ góa ê siaⁿ; Chá-khí-sî góa beh tùi Lí pâi-lia̍t góa ê sim-ì, sòa beh liâu-bāng.

4因為你m̄是歡喜罪惡ê上帝；　　Pháiⁿ-ê bōe得thang kap你同khiā起。In-ūi Lí m̄-sī hoaⁿ-hí chōe-ok ê Siōng-tè; Pháiⁿ--ê bōe-tit-thang kap Lí tâng khiā-khí.

5驕傲ê人bōe能khiā tī你ê面前；　　做pháiⁿ ê人lóng是你所怨恨。Kiau-ngō͘ ê lâng bōe-ōe khiā tī Lí ê bīn-chêng; Chòe-pháiⁿ ê lâng lóng sī Lí só͘ oàn-hūn.

6講白賊ê，你beh滅in；　　Ài thâi人kap奸詭ê，lóng是耶和華所厭惡。Kóng pe̍h-chha̍t--ê, Lí beh bia̍t in; Ài thâi lâng kap kan-kúi--ê, lóng sī Iâ-hô-hoa só͘ iàm-ò͘ⁿ.

7論到我，我beh憑你豐盛ê慈愛入你ê厝；　　我beh chûn敬畏你ê心，ǹg你ê聖殿來敬拜。Lūn-kàu góa, góa beh pîn Lí hong-sēng ê chû-ài ji̍p Lí ê chhù; Góa beh chûn kèng-ùi Lí ê sim, ǹg Lí ê sèng-tiān lâi kèng-pài.

8耶和華ah，求你因為我ê對敵，憑你ê公義chhōa我；　　Hō͘你ê路tī我ê面前正直。Iâ-hô-hoa ah, kiû Lí in-ūi góa ê tùi-te̍k, pîn Lí ê kong-gī chhōa góa; Hō͘ Lí ê lō͘ tī góa ê bīn-chêng chèng-ti̍t.

9因為in ê嘴無老實；　　In ê心惡毒滿滿；　　In ê嚨喉是開開ê墓；　　In用舌諂媚人。In-ūi in ê chhùi bô láu-si̍t; In ê sim ok-to̍k móa-móa; In ê nâ-âu sī khui-khui ê bōng; In ēng chi̍h thiám-mī lâng.

10上帝ah，求你定in ê罪；　　Hō͘ in tùi家己ê計謀跋倒。　　In ê罪過真chōe，願你將in趕出；　　因為in背叛你。Siōng-tè ah, kiû Lí tēng in ê chōe; Hō͘ in tùi ka-kī ê kè-bô͘ poa̍h-tó. In ê chōe-kòa chin-chōe, goān Lí chiong in kóaⁿ-chhut; In-ūi in pōe-poān Lí.

11見若óa靠你ê，願in歡喜；願in永永歡喜出聲；　　因為你庇佑in。　　Koh願hiah-ê疼惜你ê名ê人，lóng tiàm-tī你來歡喜。Kìⁿ-nā óa-khò Lí--ê, goān in hoaⁿ-hí; Goān in éng-éng hoaⁿ-hí chhut-siaⁿ; in-ūi Lí pì-iū in. Koh goān hiah ê thiàⁿ-sioh Lí ê miâ ê lâng, lóng tiàm-tī Lí lâi hoaⁿ-hí.

12因為你beh賜福hō͘義人；　　耶和華ah，你beh用恩惠，親像藤牌，四面圍伊。In-ūi Lí beh sù-hok hō͘ gī-lâng; Iâ-hô-hoa ah, Lí beh ēng un-hūi, chhin-chhiūⁿ tîn-pâi, sì-bīn ûi--i.

1大衛ê詩，交hō͘樂官；用絲絃ê樂器；調用第八。1) 耶和華ah，m̄-thang tī你ê受氣中責備我，　　亦m̄-thang tī你大受氣中譴責我。Tāi-pi̍t ê si, kau hō͘ Ga̍k-koaⁿ; ēng si-hiân ê ga̍k-khì; tiāu, ēng tē poeh.1) Iâ-hô-hoa ah, m̄-thang tī Lí ê siū-khì-tiong chek-pī góa, Ia̍h m̄-thang tī Lí tōa siū-khì-tiong khiàn-chek góa.

2耶和華ah，求你可憐我，因為我衰lám；　　耶和華ah，求你醫治我，因為我ê骨頭ngia̍uh-ngia̍uh-chhoah。Iâ-hô-hoa ah, kiû Lí khó-lîn góa, in-ūi góa soe-lám; Iâ-hô-hoa ah, kiû Lí i-tī góa, in-ūi góa ê kut-thâu ngia̍uh-ngia̍uh-chhoah.

3我ê心大大驚惶；　　耶和華ah，你beh到tī時chiah救我？Góa ê sim tōa-tōa kiaⁿ-hiâⁿ; Iâ-hô-hoa ah, Lí beh kàu tī-sî chiah kiù góa?

4耶和華ah，求你oa̍t倒tńg救我ê性命；　　為tio̍h你ê慈愛來救我。Iâ-hô-hoa ah, kiû Lí oa̍t-tò-tńg kiù góa ê sìⁿ-miā; Ūi-tio̍h Lí ê chû-ài lâi kiù góa.

5因為死無ê中間，無記念你；　　陰府ê中間，是誰感謝你？In-ūi sí-bô ê tiong-kan, bô kì-liām Lí; Im-hú ê tiong-kan, chī-chūi kám-siā Lí?

6我因為haiⁿ-haiⁿ-chhan來厭倦；　　我ta̍k-mî流目屎，淹我ê眠床，　　濕透我ê褥á。Góa in-ūi haiⁿ-haiⁿ-chhan lâi ià-siān; Góa ta̍k-mî lâu ba̍k-sái, im góa ê bîn-chhn̂g, Sip-thàu góa ê jio̍k-á.

7我因為憂悶，目睭phah-pháiⁿ；　　Koh因為我一切ê對敵，來目睭花。Góa in-ūi iu-būn, ba̍k-chiu phah-pháiⁿ; Koh in-ūi góa it-chhè ê tùi-te̍k, lâi ba̍k-chiu hoe.

8Lín一切做pháiⁿ ê人，tio̍h離開我；　　因為耶和華聽見我啼哭ê聲。Lín it-chhè chòe pháiⁿ ê lâng, tio̍h lī-khui góa; In-ūi Iâ-hô-hoa thiaⁿ-kìⁿ góa thî-khàu ê siaⁿ.

9耶和華有聽我ê懇求；　　耶和華beh接納我ê祈禱。Iâ-hô-hoa ū thiaⁿ góa ê khún-kiû; Iâ-hô-hoa beh chiap-la̍p góa ê kî-tó.

10我ê對敵lóng beh見笑，大大驚惶；　　In beh退倒tńg，忽然見笑。Góa ê tùi-te̍k lóng beh kiàn-siàu, tōa-tōa kiaⁿ-hiâⁿ; In beh thè tò-tńg, hut-jiân kiàn-siàu.