1Khó-la̍h後裔ê詩；交hō͘樂官；1) 眾百姓ah，lín lóng tio̍h聽chit-ê，　　世上lóng總khiā起ê百姓，lín tio̍h àⁿ耳孔；Khó-la̍h hō͘-è ê si; kau hō͘ Ga̍k-koaⁿ;1) Chèng peh-sìⁿ ah, lín lóng tio̍h thiaⁿ chit-ê, Sè-chiūⁿ lóng-chóng khiā-khí ê peh-sìⁿ, lín tio̍h àⁿ hī-khang;

2無論下等上等，　　好額sòng-hiong，lóng tio̍h án-ni。Bô-lūn hā-téng siōng-téng, Hó-gia̍h sòng-hiong, lóng tio̍h án-ni.

3我ê嘴beh講智慧，　　我ê心所想是通達。Góa ê chhùi beh kóng tì-hūi, Góa ê sim só͘ siūⁿ sī thong-ta̍t.

4我beh àⁿ耳孔聽譬喻，　　我beh用琴解明我ê奧妙。Góa beh àⁿ hī-khang thiaⁿ phì-jū, Góa beh ēng khîm kóe-bêng góa ê ò-biāu.

5奸惡tè我ê腳後tiⁿ四面圍我，　　Tī chit號患難ê日我mih-sái驚？Kan-ok tè góa ê kha-āu-tiⁿ sì-bīn ûi góa, Tī chit-hō hoān-lān ê ji̍t góa mih-sái kiaⁿ?

6Hiah-ê óa靠in ê勢力，　　誇口in ê富有ê人，Hiah ê óa-khò in ê sè-le̍k, khoa-kháu in ê pù-ū ê lâng,

7無一個有法度thang贖回家己ê兄弟，　　亦bōe能替伊將贖回ê價錢hō͘上帝；Bô chi̍t-ê ū hoat-tō͘ thang sio̍k-hôe ka-kī ê hiaⁿ-tī, Ia̍h bōe-ōe thòe i chiong sio̍k-hôe ê kè-chîⁿ hō͘ Siōng-tè;

8(因為贖回in ê性命ê價錢真貴，　　只有永遠放soah；)(In-ūi sio̍k-hôe in ê sìⁿ-miā ê kè-chîⁿ chin kùi, Chí-ū éng-oán pàng-soah;)

9Hō͘伊長長活teh，　　無看見朽壞；Hō͘ i tn̂g-tn̂g oa̍h--teh, Bô khòaⁿ-kìⁿ hiú-hoāi;

10因為伊看見智慧ê人死，　　愚戇ê人，kap親像cheng-siⁿ hit款ê人，亦做一下滅無；　　留in ê錢財hō͘別人。In-ūi i khòaⁿ-kìⁿ tì-hūi ê lâng sí, Gû-gōng ê lâng, kap chhin-chhiūⁿ cheng-siⁿ hit-khoán ê lâng, ia̍h chòe-chi̍t-ē bia̍t-bô; Lâu in ê chîⁿ-châi hō͘ pa̍t-lâng.

11In心內想in ê厝beh永永tī-teh，　　In khiā起ê所在beh到萬代；　　In用家己ê名來名家己ê地。In sim-lāi siūⁿ in ê chhù beh éng-éng tī-teh, In khiā-khí ê só͘-chāi beh kàu bān-tāi; In ēng ka-kī ê miâ lâi miâ ka-kī ê tōe.

12總是人tiàm tī尊貴ê中間，bōe久長；　　親像會死ê cheng-siⁿ。Chóng-sī lâng tiàm tī chun-kùi ê tiong-kan, bōe kú-tn̂g; Chhin-chhiūⁿ ōe sí ê cheng-siⁿ.

13In行chit-ê路，是in ê戇；　　總是in以後ê人iáu-kú掠in ê話做tio̍h。 [Sè-la̍h]In kiâⁿ chit ê lō͘, sī in ê gōng; Chóng-sī in í-āu ê lâng iáu-kú lia̍h in ê ōe chòe tio̍h. [Sè-la̍h

14In親像羊群，定tio̍h tio̍h落陰間；　　死無beh做in ê牧者；　　到早起時，正直ê人beh管轄in；　　In ê súi beh hō͘陰間滅去，　　致到無khiā起ê所在。In chhin-chhiūⁿ iûⁿ-kûn, tiāⁿ-tio̍h tio̍h lo̍h im-kan; Sí-bô beh chòe in ê bo̍k-chiá; Kàu chá-khí sî, chèng-ti̍t ê lâng beh koán-hat in; In ê súi beh hō͘ im-kan bia̍t--khì, Tì-kàu bô khiā-khí ê só͘-chāi.

15獨獨上帝beh贖回我ê靈魂，脫離陰間ê權柄；　　因為伊beh接納我。 [Sè-la̍h]To̍k-to̍k Siōng-tè beh sio̍k-hôe góa ê lêng-hûn, thoat-lī im-kan ê koân-pèng; In-ūi I beh chiap-la̍p góa. [Sè-la̍h

16人發財，家庭加添榮光，　　你m̄免因為án-ni來驚；Lâng hoat-châi, ka-têng ke-thiⁿ êng-kng, Lí m̄-bián in-ūi án-ni lâi kiaⁿ;

17因為伊死，無一項能帶去，　　伊ê榮光bōe會tè伊去。In-ūi i sí, bô chi̍t-hāng ōe tòa khì, I ê êng-kng bōe-ōe tè i khì.

18伊在生雖然家己誇口有福氣，　　(你若gâu照顧家己，人beh o-ló你)，I chāi-siⁿ sui-jiân ka-kī khoa-kháu ū hok-khì, (Lí nā gâu chiàu-kò͘ ka-kī, lâng beh o-ló lí),

19但是伊beh歸到伊歷代ê祖公hia，　　In永遠無看見光。Nā-sī i beh kui kàu i le̍k-tāi ê chó͘-kong hia, In éng-oán bô khòaⁿ-kìⁿ kng.

20人tiàm tī尊貴ê中間，亦無醒悟，　　是親像會死ê cheng-siⁿ。Lâng tiàm tī chun-kùi ê tiong-kan, ia̍h bô chhíⁿ-gō͘, Sī chhin-chhiūⁿ ōe sí ê cheng-siⁿ.

1A-sat ê詩。1) 全能ê上帝耶和華有講出話，來召天下；　　Tùi日出到日落ê所在。A-sat ê si.1) Choân-lêng ê Siōng-tè Iâ-hô-hoa ū kóng-chhut ōe, lâi tiàu thiⁿ-ē; Tùi ji̍t-chhut kàu ji̍t-lo̍h ê só͘-chāi.

2Tùi齊全súi ê錫安，　　上帝有發出光。Tùi chiâu-chn̂g súi ê Sek-an, Siōng-tè ū hoat-chhut kng.

3阮ê上帝beh來，決斷無靜靜；　　有火tī伊ê面前teh燒，　　有風tī伊ê四圍真透。Goán ê Siōng-tè beh lâi, koat-toàn bô chēng-chēng; Ū hé tī I ê bīn-chêng teh sio, Ū hong tī I ê sì-ûi chin thàu.

4伊beh叫頂面ê天kap地；　　為tio̍h beh審判伊ê百姓；I beh kiò téng-bīn ê thiⁿ kap tōe; Ūi-tio̍h beh sím-phòaⁿ I ê peh-sìⁿ;

5講，tio̍h招集我聖ê百姓來我chia，　　就是hiah-ê用祭祀kap我立約ê人。Kóng, Tio̍h chio-chi̍p Góa sèng ê peh-sìⁿ lâi Góa chia, Chiū-sī hiah-ê ēng chè-sū kap Góa li̍p-iok ê lâng.

6Chiah-ê天 beh顯明伊ê公義；　　因為上帝本身是做審判ê。 [Sè-la̍h]Chiah ê thiⁿ beh hián-bêng I ê kong-gī; In-ūi Siōng-tè pún-sin sī chòe sím-phòaⁿ--ê. [Sè-la̍h

7我ê百姓ah，lín tio̍h聽，我beh講；　　以色列ah，我beh警戒你；　　我是上帝，你ê上帝。Góa ê peh-sìⁿ ah, lín tio̍h thiaⁿ, Góa beh kóng; Í-sek-lia̍t ah, Góa beh kéng-kài lí; Góa sī Siōng-tè, lí ê Siōng-tè.

8我無因為你ê祭祀責備你；　　你ê燒祭常常tī我ê面前。Góa bô in-ūi lí ê chè-sū chek-pī lí; Lí ê sio-chè siông-siông tī Góa ê bīn-chêng.

9我無tùi你ê厝取公ê牛，　　亦無tùi你ê寮取公ê山羊。Góa bô tùi lí ê chhù chhú kang ê gû, Ia̍h bô tùi lí ê tiâu chhú kang ê soaⁿ-iûⁿ.

10因為樹林內ê百獸，　　千山ê cheng-siⁿ，lóng是我ê。In-ūi chhiū-nâ-lāi ê pah-siù, Chheng-soaⁿ ê cheng-siⁿ, lóng sī Góa ê.

11山中ê飛鳥，我lóng知；　　曠野ê走獸亦lóng屬tī我。Soaⁿ-tiong ê pe-chiáu, Góa lóng chai; Khòng-iá ê cháu-siù ia̍h lóng sio̍k tī Góa.

12我若iau，無beh kā你講；　　因為世界kap其中所充滿ê，lóng是我ê。Góa nā iau, bô beh kā lí kóng; In-ūi sè-kài kap kî-tiong só͘ chhiong-móa ê, lóng sī Góa ê.

13我kiám beh食牛káng ê肉，　　Á是lim山羊káng ê血mah？Góa kiám beh chia̍h gû-káng ê bah, Á-sī lim soaⁿ-iûⁿ-káng ê huih mah?

14你tio̍h用感謝做祭，獻hō͘上帝；　　Koh tio̍h tùi至koânê，謝你ê願；Lí tio̍h ēng kám-siā chòe chè, hiàn hō͘ Siōng-tè; Koh tio̍h tùi Chì-koâiⁿ--ê, siā lí ê goān;

15Tī患難ê日tio̍h求叫我；　　我beh救你，你亦beh榮光我。Tī hoān-lān ê ji̍t tio̍h kiû-kiò Góa; Góa beh kiù lí, lí ia̍h beh êng-kng Góa.

16但是上帝對pháiⁿ人講，　　你thái-thó敢傳我ê律例，　　嘴講起我ê約ah？Nā-sī Siōng-tè tùi pháiⁿ-lâng kóng, Lí thái-thó káⁿ thoân Góa ê lu̍t-lē, Chhùi kóng-khí Góa ê iok ah?

17其實你厭賤教示，　　將我ê話hiat tī你ê ka-chiah後。Kî-si̍t lí iàm-chiān kà-sī, Chiong Góa ê ōe hiat tī lí ê ka-chiah-āu.

18你看見賊，就kap伊同心；　　Koh kap行姦淫ê人相kap有份。Lí khòaⁿ-kìⁿ chha̍t, chiū kap i tâng-sim; Koh kap kiâⁿ kan-îm ê lâng saⁿ-kap ū hūn.

19你hō͘你ê嘴常常講pháiⁿ話，　　你ê舌造作奸詐。Lí hō͘ lí ê chhùi siông-siông kóng pháiⁿ-ōe, Lí ê chi̍h chō-chok kan-chà.

20你坐teh譭謗你ê兄弟；　　誣賴你ê同胞。Lí chē-teh húi-pòng lí ê hiaⁿ-tī; Bû-lōa lí ê tâng-pau.

21你行chiah-ê事，我靜靜無講；　　你phah算我tú-tú kap你一樣。　　其實我beh責備你；將chiah-ê事排tī你ê目睭前。Lí kiâⁿ chiah ê sū, Góa chēng-chēng bô kóng; Lí phah-sǹg Góa tú-tú kap lí chi̍t-iūⁿ. Kî-si̍t Góa beh chek-pī lí; chiong chiah ê sū pâi tī lí ê ba̍k-chiu-chêng.

22Lín bōe記得上帝ê人，tio̍h想chit-ê事，　　免致我將lín拆碎，無人拯救。Lín bōe-kì-tit Siōng-tè ê lâng, tio̍h siūⁿ chit ê sū, Bián-tì Góa chiong lín thiah-chhùi, bô lâng chín-kiù.

23見若用感謝獻做祭ê，就是榮光我；　　謹慎行ê人，　　我beh hō͘伊看見上帝ê救恩。Kìⁿ-nā ēng kám-siā hiàn chòe chè-ê, chiū-sī êng-kng Góa; Kín-sīn kiâⁿ ê lâng, Góa beh hō͘ i khòaⁿ-kìⁿ Siōng-tè ê kiù-un.

1大衛kap Poa̍t-sī-pa同房以後，先知Ná-tan來見伊，伊做chit-ê詩；交hō͘樂官。1) 上帝ah，照你ê慈愛憐憫我；　　照你豐盛ê慈悲擦消我ê過失；Tāi-pi̍t kap Poa̍t-sī-pa tâng-pâng í-āu, sian-ti Ná-tan lâi kìⁿ i, i chòe chit ê si; kau hō͘ Ga̍k-koaⁿ.1) Siōng-tè ah, chiàu Lí ê chû-ài lîn-bín góa; Chiàu Lí hong-sēng ê chû-pi chhat-siau góa ê kè-sit;

2將我ê罪惡一盡洗除，　　亦洗清我，到無罪。Chiong góa ê chōe-ok it-chīn sóe-tû, Ia̍h sóe-chheng góa, kàu bô chōe.

3因為我家己知我ê過失；　　我ê罪常常tī我ê面前。In-ūi góa ka-kī chai góa ê kè-sit; Góa ê chōe siông-siông tī góa ê bīn-chêng.

4我所犯tio̍h-ê，就是得罪你nā-tiāⁿ，　　Tī你ê目睭前行chit號pháiⁿ；　　致到你講話ê時，顯明做義；　　判斷ê時，顯明公道。Góa só͘ hoān-tio̍h--ê, chiū-sī tek-chōe Lí nā-tiāⁿ, Tī Lí ê ba̍k-chiu-chêng kiâⁿ chit-hō pháiⁿ; Tì-kàu Lí kóng-ōe ê sî, hián-bêng chòe-gī; Phòaⁿ-toàn ê sî, hián-bêng kong-tō.

5我是tī罪惡中生ê，　　Tī罪ê中間，我ê老母懷孕我。Góa sī tī chōe-ok-tiong siⁿ--ê, Tī chōe ê tiong-kan, góa ê lāu-bú hoâi-īn góa.

6你所ài-ê是心內誠實；　　Tī我ê腹內，你beh hō͘我得tio̍h智慧。Lí só͘ ài--ê sī sim-lāi sêng-si̍t; Tī góa ê pak-lāi, Lí beh hō͘ góa tit-tio̍h tì-hūi.

7求你用牛膝草洗我，我就清氣；　　求你洗我，我就比雪khah白。Kiû Lí ēng giû-chhek-chháu sóe góa, góa chiū chheng-khì; Kiû Lí sóe góa, góa chiū pí seh khah-pe̍h.

8求你hō͘我得tio̍h聽見歡喜快樂ê聲；　　Hō͘你所at折ê骨thang歡喜。Kiû Lí hō͘ góa tit-tio̍h thiaⁿ-kìⁿ hoaⁿ-hí khoài-lo̍k ê siaⁿ; Hō͘ Lí só͘ at-chi̍h ê kut thang hoaⁿ-hí.

9求你掩你ê面，無看我ê罪，　　擦消我一切ê罪惡。Kiû Lí ng Lí ê bīn, bô khòaⁿ góa ê chōe, Chhat-siau góa it-chhè ê chōe-ok.

10上帝ah，求你kā我創造清氣ê心，　　Hō͘我ê內面有換新正直ê神。Siōng-tè ah, kiû Lí kā góa chhòng-chō chheng-khì ê sim, Hō͘ góa ê lāi-bīn ū ōaⁿ-sin chèng-ti̍t ê sîn.

11M̄-thang 趕我，hō͘我離開你ê面；　　M̄-thang tùi我收回你聖ê神。M̄-thang kóaⁿ góa, hō͘ góa lī-khui Lí ê bīn; M̄-thang tùi góa siu-hôe Lí sèng ê sîn.

12求你hō͘我猶原得tio̍h你救恩ê快樂；　　賞賜我有自由ê神，來扶持我。Kiû Lí hō͘ góa iû-goân tit-tio̍h Lí kiù-un ê khoài-lo̍k; Siúⁿ-sù góa ū chū-iû ê sîn, lâi hû-chhî góa.

13我就將你ê道路指示有過失ê人；　　有罪ê人就beh歸順你。Góa chiū chiong Lí ê tō-lō͘ chí-sī ū kè-sit ê lâng; Ū chōe ê lâng chiū beh kui-sūn Lí.

14上帝ah，你是救我ê上帝，　　求你救我脫離thâi人ê罪；　　我ê舌beh大聲吟詩o-ló你ê義。Siōng-tè ah, Lí sī kiù góa ê Siōng-tè, Kiû Lí kiù góa thoat-lī thâi-lâng ê chōe; Góa ê chi̍h beh tōa-siaⁿ gîm-si o-ló Lí ê gī.

15主ah，求你開我ê嘴唇；　　我ê嘴就beh報揚你ê好名聲。Chú ah, kiû Lí khui góa ê chhùi-tûn; Góa ê chhùi chiū beh pò-iông Lí ê hó miâ-siaⁿ.

16因為你無ài祭物；若ài，我就beh獻；　　燒祭你亦無歡喜。In-ūi Lí bô ài chè-mi̍h; nā ài, góa chiū beh hiàn; Sio-chè Lí ia̍h bô hoaⁿ-hí.

17上帝所ài ê祭，就是憂傷ê神；　　上帝ah，憂傷痛悔ê心，你無beh看輕伊。Siōng-tè só͘ ài ê chè, chiū-sī iu-siong ê sîn; Siōng-tè ah, iu-siong thòng-hóe ê sim, Lí bô beh khòaⁿ-khin i.

18求你照你ê好意思，好款待錫安；　　起造耶路撒冷ê城牆。Kiû Lí chiàu Lí ê hó ì-sù, hó khoán-thāi Sek-an; Khí-chō Iâ-lō͘-sat-léng ê siâⁿ-chhiûⁿ.

19Hit時你beh歡喜義ê祭，kap燒祭，以及ka-nn̂g-chiah cheng-siⁿ ê燒祭；　　Hit時人beh將公ê牛獻tī你ê壇。Hit-sî Lí beh hoaⁿ-hí gī ê chè, kap sio-chè, í-ki̍p ka-nn̂g-chiah cheng-siⁿ ê sio-chè; Hit-sî lâng beh chiong kang ê gû hiàn tī Lí ê tôaⁿ.