1大衛教示ê詩；交hō͘樂官；調是用Bâ-hap-la̍h。1) 戇人心內講，無有上帝。　　In thàn邪惡，行可惡ê罪；　　無一人行好。Tāi-pi̍t kà-sī ê si; kau hō͘ Ga̍k-koaⁿ; tiāu, sī ēng Bâ-hap-la̍h.1) Gōng-lâng sim-lāi kóng, Bô ū Siōng-tè. In thàn siâ-ok, kiâⁿ khó-ò͘ⁿ ê chōe; Bô chi̍t-lâng kiâⁿ hó.

2上帝tùi天àⁿ落看世間人，　　Beh看有明理ê人，　　有chhē求上帝ê人á無。Siōng-tè tùi thiⁿ àⁿ-lo̍h khòaⁿ sè-kan-lâng, Beh khòaⁿ ū bêng-lí ê lâng, Ū chhē-kiû Siōng-tè ê lâng á-bô.

3In ta̍k人lóng退後，一概變做污穢；　　無人行好，連一個亦無。In ta̍k-lâng lóng thè-āu, it-khài piàn-chòe ù-òe; Bô lâng kiâⁿ hó, liân chi̍t-ê ia̍h bô.

4做pháiⁿ ê人kiám bōe曉得mah？　　In吞食我ê百姓親像食餅。　　亦無求叫上帝。Chòe pháiⁿ ê lâng kiám bōe hiáu-tit mah? In thun-chia̍h Góa ê peh-sìⁿ chhin-chhiūⁿ chia̍h-piáⁿ. Ia̍h bô kiû-kiò Siōng-tè.

5In tī無thang驚惶ê所在，就大大驚惶；　　因為siōng-tè將hit-ê安營攻擊你ê人ê骨頭phah散；　　你hō͘ in見笑，因為上帝棄sak in。In tī bô thang kiaⁿ-hiâⁿ ê só͘-chāi, chiū tōa-tōa kiaⁿ-hiâⁿ; In-ūi siōng-tè chiong hit-ê an-iâⁿ kong-kek lí ê lâng ê kut-thâu phah-sòaⁿ; Lí hō͘ in kiàn-siàu, in-ūi Siōng-tè khì-sak in.

6願以色列ê拯救tùi錫安出；　　上帝救伊受掠ê百姓倒tńg來，　　Hit時雅各beh快樂，以色列beh歡喜。Goān Í-sek-lia̍t ê chín-kiù tùi Sek-an chhut; Siōng-tè kiù I siū-lia̍h ê peh-sìⁿ tò-tńg--lâi, Hit-sî Ngá-kok beh khoài-lo̍k, Í-sek-lia̍t beh hoaⁿ-hí.

1Se-hut人來對掃羅講，大衛kiám m̄是bih tī阮hia mah？Hit時大衛做chit-ê教示ê詩；交hō͘樂官；用絲絃ê樂器。1) 上帝ah，求你用你ê名救我；　　用你ê大權能替我伸冤。Se-hut lâng lâi tùi Sò-lô kóng, Tāi-pi̍t kiám-m̄-sī bih tī goán hia mah? Hit-sî Tāi-pi̍t chòe chit ê kà-sī ê si; kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí ēng Lí ê miâ kiù góa; Ēng Lí ê tōa koân-lêng thòe góa sin-oan.

2上帝ah，求你聽我ê祈禱；　　Àⁿ耳孔聽我ê嘴所講ê話。Siōng-tè ah, kiû Lí thiaⁿ góa ê kî-tó; Àⁿ hī-khang thiaⁿ góa ê chhùi só͘ kóng ê ōe.

3因為外人起來攻擊我，強惡 ê人siàu想我ê性命；　　In無敬奉上帝tī in ê面前。[Sè-la̍h]In-ūi gōa-lâng khí-lâi kong-kek góa, Kiông-ok ê lâng siàu-siūⁿ góa ê sìⁿ-miā; In bô kèng-hōng Siōng-tè tī in ê bīn-chêng. [Sè-la̍h

4上帝是幫贊我ê，　　主是扶持我ê活命ê。Siōng-tè sī pang-chān góa ê, Chú sī hû-chhî góa ê oa̍h-miā ê.

5伊beh將我ê對敵所行ê pháiⁿ報應in；　　求你照你ê誠實滅無in。I beh chiong góa ê tùi-te̍k só͘ kiâⁿ ê pháiⁿ pò-èng in; Kiû Lí chiàu Lí ê sêng-si̍t bia̍t-bô in.

6我beh將甘心ê祭祀獻hō͘你；　　耶和華ah，我beh感謝o-ló你ê名；因為你ê名是好。Góa beh chiong kam-sim ê chè-sū hiàn hō͘ Lí; Iâ-hô-hoa ah, góa beh kám-siā o-ló Lí ê miâ; in-ūi Lí ê miâ sī hó.

7伊救我出一切ê患難；　　我親目看見我ê對敵tú-tio̍h報應。I kiù góa chhut it-chhè ê hoān-lān; Góa chhin-ba̍k khòaⁿ-kìⁿ góa ê tùi-te̍k tú-tio̍h pò-èng.

1大衛教示ê詩；交hō͘樂官；用絲絃ê樂器。1) 上帝ah，求你àⁿ耳孔聽我ê祈禱；　　M̄-thang tiàm-密，m̄聽我ê懇求。Tāi-pi̍t kà-sī ê si; kau hō͘ Ga̍k-koaⁿ; ēng si-hiân ê ga̍k-khì. 1) Siōng-tè ah, kiû Lí àⁿ hī-khang thiaⁿ góa ê kî-tó; M̄-thang tiàm-ba̍t, m̄ thiaⁿ góa ê khún-kiû.

2求你àⁿ落聽我，應我；　　我悲傷無平安，haiⁿ-haiⁿ-chhan；Kiû Lí àⁿ-lo̍h thiaⁿ góa, ìn góa; Góa pi-siong bô pêng-an, haiⁿ-haiⁿ-chhan;

3Lóng是因為對敵ê聲，pháiⁿ人ê制壓；　　因為in將罪過chhia hō͘我，用受氣pek我。Lóng sī in-ūi tùi-te̍k ê siaⁿ, pháiⁿ-lâng ê chè-ap; In-ūi in chiong chōe-kòa chhia hō͘ góa, ēng siū-khì pek góa.

4我ê心tī我內面真苦痛；　　死無ê驚惶到tī我。Góa ê sim tī góa lāi-bīn chin khó͘-thàng; Sí-bô ê kiaⁿ-hiâⁿ kàu tī góa.

5驚惶ngia̍uh-ngia̍uh-chhoah到tī我，　　驚惶淹密我。Kiaⁿ-hiâⁿ ngia̍uh-ngia̍uh-chhoah kàu tī góa, Kiaⁿ-hiâⁿ im-ba̍t góa.

6我就講，願我得tio̍h si̍t，親像鴿(kap)，　　我就飛去，得tio̍h安然khiā起。Góa chiū kóng, Goān góa tit-tio̍h si̍t, chhin-chhiūⁿ kap, Góa chiū pe--khì, tit-tio̍h an-jiân khiā-khí.

7我beh飛去遠遠，　　歇tī曠野。 [Sè-la̍h]Góa beh pe--khì hn̄g-hn̄g, Hioh tī khòng-iá. [Sè-la̍h

8我beh緊緊走到閃避ê所在，　　脫離狂風報頭。Góa beh kín-kín cháu kàu siám-pī ê só͘-chāi, Thoat-lī kông-hong pò-thâu.

9主ah，求你吞滅in，分開in ê舌；　　因為我tī城內bat看見強暴kap相爭ê事。Chú ah, kiû Lí thun-bia̍t in, pun-khui in ê chi̍h; In-ūi góa tī siâⁿ-lāi bat khòaⁿ-kìⁿ kiông-pō kap saⁿ-chiⁿ ê sū.

10In暝日行se̍h tī城牆頂；　　Tī城內有虛假惡毒。In mî-ji̍t kiâⁿ-se̍h tī siâⁿ-chhiûⁿ-téng; Tī siâⁿ-lāi ū hu-ké ok-to̍k.

11邪惡tī hit內面；　　壓制奸詐無離開伊ê街路。Siâ-ok tī hit lāi-bīn; Ap-chè kan-chà bô lī-khui i ê ke-lō͘.

12因為譭謗我ê，m̄是對敵；　　設使是，就iáu能忍得；　　自高攻擊我ê，m̄是怨恨我ê人；　　設使是，就會bih來閃伊。In-ūi húi-pòng góa--ê, m̄-sī tùi-te̍k; Siat-sú sī, chiū iáu ōe lún--tit; Chū-ko kong-kek góa--ê, m̄-sī oàn-hūn góa ê lâng; Siat-sú sī, chiū ōe bih lâi siám i.

13無phah算是你，都是我平輩 ê人，　　我ê同伴，我知己 ê朋友。Bô phah-sǹg sī lí, to͘ sī góa pêng-pòe ê lâng, Góa ê tâng-phōaⁿ, góa ti-kí ê pêng-iú.

14咱平素相kap談論真親密，　　咱kap眾人相kap行tī上帝ê厝。Lán pêng-sò͘ saⁿ-kap tâm-lūn chin chhin-bi̍t, Lán kap chèng-lâng saⁿ-kap kiâⁿ tī Siōng-tè ê chhù.

15願死無忽然到tī in，hō͘ in活活落陰間；　　因為邪惡tī in khiā起ê所在，tī in ê中間。Goān sí-bô hut-jiân kàu tī in, Hō͘ in oa̍h-oa̍h lo̍h im-kan; In-ūi siâ-ok tī in khiā-khí ê só͘-chāi, tī in ê tiong-kan.

16論到我，我beh求叫上帝；　　耶和華beh救我。Lūn-kàu góa, góa beh kiû-kiò Siōng-tè; Iâ-hô-hoa beh kiù góa.

17Ê-hng、早起、日晝，我beh哀傷吐氣；　　伊亦beh聽我ê聲。Ê-hng, chá-khí, ji̍t-tàu, góa beh ai-siong thó͘-khùi; I ia̍h beh thiaⁿ góa ê siaⁿ.

18伊救贖我ê性命，脫離攻擊我ê人；hō͘我得tio̍h平安；　　因為反對我ê人chōe。I kiù-sio̍k góa ê sìⁿ-miā, thoat-lī kong-kek góa ê lâng; hō͘ góa tit-tio̍h pêng-an; In-ūi hoán-tùi góa ê lâng chōe.

19Tùi古早常常tī-teh ê上帝，　　Beh聽見，亦beh報應in；[Sè-la̍h] 就是hiah-ê無改變，無敬畏上帝ê人。Tùi kó͘-chá siông-siông tī-teh ê Siōng-tè, Beh thiaⁿ-kìⁿ, ia̍h beh pò-èng in; [Sè-la̍h Chiū-sī hiah ê bô kóe-pìⁿ, bô kèng-ùi Siōng-tè ê lâng.

20伊伸手攻擊kap伊相和ê人；　　伊已經背伊ê約。I chhun-chhiú kong-kek kap i saⁿ-hô ê lâng; I í-keng pōe i ê iok.

21伊ê嘴滑澤(tia̍h)，親像奶油；　　伊ê心khǹg交戰；　　伊ê話柔軟，khah贏膏油，　　其實是出鞘ê刀。I ê chhùi ku̍t-tia̍h, chhin-chhiūⁿ lin-iû; I ê sim khǹg kau-chiàn; I ê ōe jiû-loán, khah-iâⁿ ko-iû, Kî-si̍t sī chhut-siù ê to.

22Tio̍h將你ê擔，卸hō͘耶和華；　　伊beh扶持你，伊永永無hō͘義人搖choah。Tio̍h chiong lí ê tàⁿ, sià hō͘ Iâ-hô-hoa; I beh hû-chhî lí, I éng-éng bô hō͘ gī-lâng iô-choah.

23上帝ah，你beh hō͘ in陷落tī滅無ê坑；　　Thâi-死人行奸詐ê，bōe活到中年；　　獨獨我beh óa靠你。Siōng-tè ah, Lí beh hō͘ in hām-lo̍h tī bia̍t-bô ê khiⁿ; Thâi-sí lâng kiâⁿ kan-chà ê, bōe oa̍h kàu tiong-liân; To̍k-to̍k góa beh óa-khò Lí.