1大衛教示ê詩；交hō͘樂官；用絲絃ê樂器。1) 上帝ah，求你àⁿ耳孔聽我ê祈禱；　　M̄-thang tiàm-密，m̄聽我ê懇求。Tāi-pi̍t kà-sī ê si; kau hō͘ Ga̍k-koaⁿ; ēng si-hiân ê ga̍k-khì. 1) Siōng-tè ah, kiû Lí àⁿ hī-khang thiaⁿ góa ê kî-tó; M̄-thang tiàm-ba̍t, m̄ thiaⁿ góa ê khún-kiû.

2求你àⁿ落聽我，應我；　　我悲傷無平安，haiⁿ-haiⁿ-chhan；Kiû Lí àⁿ-lo̍h thiaⁿ góa, ìn góa; Góa pi-siong bô pêng-an, haiⁿ-haiⁿ-chhan;

3Lóng是因為對敵ê聲，pháiⁿ人ê制壓；　　因為in將罪過chhia hō͘我，用受氣pek我。Lóng sī in-ūi tùi-te̍k ê siaⁿ, pháiⁿ-lâng ê chè-ap; In-ūi in chiong chōe-kòa chhia hō͘ góa, ēng siū-khì pek góa.

4我ê心tī我內面真苦痛；　　死無ê驚惶到tī我。Góa ê sim tī góa lāi-bīn chin khó͘-thàng; Sí-bô ê kiaⁿ-hiâⁿ kàu tī góa.

5驚惶ngia̍uh-ngia̍uh-chhoah到tī我，　　驚惶淹密我。Kiaⁿ-hiâⁿ ngia̍uh-ngia̍uh-chhoah kàu tī góa, Kiaⁿ-hiâⁿ im-ba̍t góa.

6我就講，願我得tio̍h si̍t，親像鴿(kap)，　　我就飛去，得tio̍h安然khiā起。Góa chiū kóng, Goān góa tit-tio̍h si̍t, chhin-chhiūⁿ kap, Góa chiū pe--khì, tit-tio̍h an-jiân khiā-khí.

7我beh飛去遠遠，　　歇tī曠野。 [Sè-la̍h]Góa beh pe--khì hn̄g-hn̄g, Hioh tī khòng-iá. [Sè-la̍h

8我beh緊緊走到閃避ê所在，　　脫離狂風報頭。Góa beh kín-kín cháu kàu siám-pī ê só͘-chāi, Thoat-lī kông-hong pò-thâu.

9主ah，求你吞滅in，分開in ê舌；　　因為我tī城內bat看見強暴kap相爭ê事。Chú ah, kiû Lí thun-bia̍t in, pun-khui in ê chi̍h; In-ūi góa tī siâⁿ-lāi bat khòaⁿ-kìⁿ kiông-pō kap saⁿ-chiⁿ ê sū.

10In暝日行se̍h tī城牆頂；　　Tī城內有虛假惡毒。In mî-ji̍t kiâⁿ-se̍h tī siâⁿ-chhiûⁿ-téng; Tī siâⁿ-lāi ū hu-ké ok-to̍k.

11邪惡tī hit內面；　　壓制奸詐無離開伊ê街路。Siâ-ok tī hit lāi-bīn; Ap-chè kan-chà bô lī-khui i ê ke-lō͘.

12因為譭謗我ê，m̄是對敵；　　設使是，就iáu能忍得；　　自高攻擊我ê，m̄是怨恨我ê人；　　設使是，就會bih來閃伊。In-ūi húi-pòng góa--ê, m̄-sī tùi-te̍k; Siat-sú sī, chiū iáu ōe lún--tit; Chū-ko kong-kek góa--ê, m̄-sī oàn-hūn góa ê lâng; Siat-sú sī, chiū ōe bih lâi siám i.

13無phah算是你，都是我平輩 ê人，　　我ê同伴，我知己 ê朋友。Bô phah-sǹg sī lí, to͘ sī góa pêng-pòe ê lâng, Góa ê tâng-phōaⁿ, góa ti-kí ê pêng-iú.

14咱平素相kap談論真親密，　　咱kap眾人相kap行tī上帝ê厝。Lán pêng-sò͘ saⁿ-kap tâm-lūn chin chhin-bi̍t, Lán kap chèng-lâng saⁿ-kap kiâⁿ tī Siōng-tè ê chhù.

15願死無忽然到tī in，hō͘ in活活落陰間；　　因為邪惡tī in khiā起ê所在，tī in ê中間。Goān sí-bô hut-jiân kàu tī in, Hō͘ in oa̍h-oa̍h lo̍h im-kan; In-ūi siâ-ok tī in khiā-khí ê só͘-chāi, tī in ê tiong-kan.

16論到我，我beh求叫上帝；　　耶和華beh救我。Lūn-kàu góa, góa beh kiû-kiò Siōng-tè; Iâ-hô-hoa beh kiù góa.

17Ê-hng、早起、日晝，我beh哀傷吐氣；　　伊亦beh聽我ê聲。Ê-hng, chá-khí, ji̍t-tàu, góa beh ai-siong thó͘-khùi; I ia̍h beh thiaⁿ góa ê siaⁿ.

18伊救贖我ê性命，脫離攻擊我ê人；hō͘我得tio̍h平安；　　因為反對我ê人chōe。I kiù-sio̍k góa ê sìⁿ-miā, thoat-lī kong-kek góa ê lâng; hō͘ góa tit-tio̍h pêng-an; In-ūi hoán-tùi góa ê lâng chōe.

19Tùi古早常常tī-teh ê上帝，　　Beh聽見，亦beh報應in；[Sè-la̍h] 就是hiah-ê無改變，無敬畏上帝ê人。Tùi kó͘-chá siông-siông tī-teh ê Siōng-tè, Beh thiaⁿ-kìⁿ, ia̍h beh pò-èng in; [Sè-la̍h Chiū-sī hiah ê bô kóe-pìⁿ, bô kèng-ùi Siōng-tè ê lâng.

20伊伸手攻擊kap伊相和ê人；　　伊已經背伊ê約。I chhun-chhiú kong-kek kap i saⁿ-hô ê lâng; I í-keng pōe i ê iok.

21伊ê嘴滑澤(tia̍h)，親像奶油；　　伊ê心khǹg交戰；　　伊ê話柔軟，khah贏膏油，　　其實是出鞘ê刀。I ê chhùi ku̍t-tia̍h, chhin-chhiūⁿ lin-iû; I ê sim khǹg kau-chiàn; I ê ōe jiû-loán, khah-iâⁿ ko-iû, Kî-si̍t sī chhut-siù ê to.

22Tio̍h將你ê擔，卸hō͘耶和華；　　伊beh扶持你，伊永永無hō͘義人搖choah。Tio̍h chiong lí ê tàⁿ, sià hō͘ Iâ-hô-hoa; I beh hû-chhî lí, I éng-éng bô hō͘ gī-lâng iô-choah.

23上帝ah，你beh hō͘ in陷落tī滅無ê坑；　　Thâi-死人行奸詐ê，bōe活到中年；　　獨獨我beh óa靠你。Siōng-tè ah, Lí beh hō͘ in hām-lo̍h tī bia̍t-bô ê khiⁿ; Thâi-sí lâng kiâⁿ kan-chà ê, bōe oa̍h kàu tiong-liân; To̍k-to̍k góa beh óa-khò Lí.

1腓利士人tī Ka-te̍k掠tio̍h大衛，hit時伊做chit-ê金ê詩；交hō͘樂官；調是用「遠遠無聲ê鴿」1) 上帝ah，求你可憐我，因為人beh吞食我；　　Thong日攻擊，壓制我。Hui-lī-sū lâng tī Ka-te̍k lia̍h-tio̍h Tāi-pi̍t, hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "hn̄g-hn̄g bô siaⁿ ê kap"1) Siōng-tè ah, kiû Lí khó-lîn góa, in-ūi lâng beh thun-chia̍h góa; Thong-ji̍t kong-kek, ap-chè góa.

2我ê對敵thong日beh吞食我，　　因為起驕傲攻擊我ê人真chōe。Góa ê tùi-te̍k thong-ji̍t beh thun-chia̍h góa, In-ūi khí kiau-ngō͘ kong-kek góa ê lâng chin chōe.

3我tī驚惶ê時，　　我beh óa靠你。Góa tī kiaⁿ-hiâⁿ ê sî, Góa beh óa-khò Lí.

4我靠上帝，我beh o-ló伊ê話；　　我已經óa靠上帝，我就無驚。　　屬tī血氣ê beh啥法得我ta-ôa？Góa khò Siōng-tè, góa beh o-ló I ê ōe; Góa í-keng óa-khò Siōng-tè, góa chiū bô kiaⁿ. Sio̍k tī hiat-khì--ê beh siáⁿ hoat-tit góa ta-ôa?

5In thong日改chhoa̍h解斜我ê話；　　In對我所想ê，lóng是beh害我。In thong-ji̍t kóe-chhoa̍h góa ê ōe; In tùi góa só͘-siūⁿ--ê, lóng sī beh hāi góa.

6In聚集、埋伏，teh燒ǹg我ê腳步，　　親像當等beh害我ê性命。In chū-chi̍p, bâi-ho̍k, teh siòng góa ê kha-pō͘, Chhin-chhiūⁿ tng-tán beh hāi góa ê sìⁿ-miā.

7In做pháiⁿ kiám會逃脫mah？　　上帝ah，求你tī受氣中，hō͘眾百姓墮落。In chòe-pháiⁿ kiám ōe tô-thoat mah? Siōng-tè ah, kiû Lí tī siū-khì-tiong, hō͘ chèng peh-sìⁿ tūi-lo̍h.

8我ê流落，你lóng 記數；　　求你將我ê目屎siu tī你ê皮囊；　　這kiám無lóng記tī你ê冊mah？Góa ê liû-lo̍k, Lí lóng kì-siàu; Kiû Lí chiong góa ê ba̍k-sái siu tī Lí ê phê-lông; Che kiám bô lóng kì tī Lí ê chheh mah?

9我求叫ê日，我ê對敵lóng beh oa̍t-tńg身退去；　　上帝為我，這是我所知。Góa kiû-kiò ê ji̍t, góa ê tùi-te̍k lóng beh oa̍t-tńg-sin thè--khì; Siōng-tè ūi góa, che sī góa só͘ chai.

10我靠上帝，我beh o-ló伊ê話；　　我靠耶和華，我beh o-ló伊ê話。Góa khò Siōng-tè, góa beh o-ló I ê ōe; Góa khò Iâ-hô-hoa, góa beh o-ló I ê ōe.

11我已經óa靠上帝，我就無驚；　　人beh啥法得我ta-ôa？Góa í-keng óa-khò Siōng-tè, góa chiū bô kiaⁿ; Lâng beh siáⁿ hoat-tit góa ta-ôa?

12上帝ah，我對你所hē ê願tī我ê身上；　　我beh用謝恩ê祭獻hō͘你。Siōng-tè ah, góa tùi Lí só͘ hē ê goān tī góa ê sin-chiūⁿ; Góa beh ēng siā-un ê chè hiàn hō͘ Lí.

13因為你救我ê活命脫離死無；　　你kiám m̄是保護我ê腳無跋倒mah？　　Hō͘我tī上帝ê面前，行tī活命ê光中mah？In-ūi Lí kiù góa ê oa̍h-miā thoat-lī sí-bô; Lí kiám-m̄-sī pó-hō͘ góa ê kha bô poa̍h-tó mah? Hō͘ góa tī Siōng-tè ê bīn-chêng, kiâⁿ tī oa̍h-miā ê kng tiong mah?

1大衛閃避掃羅，bih tī洞內；hit時伊做chit-ê金ê詩；交hō͘樂官；調是用「莫得毀壞ê」。1) 上帝ah，求你可憐我，可憐我；　　我ê身beh投歇tī你；　　我beh 投歇tī你翼股ê致蔭下，　　Thèng候chiah-ê災厄經過。Tāi-pi̍t siám-pī Sò-lô, bih tī tōng-lāi; hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hoāi--ê".1) Siōng-tè ah, kiû Lí khó-lîn góa, khó-lîn góa; Góa ê sin beh tâu-hioh tī Lí; Góa beh tâu-hioh tī Lí si̍t-kó͘ ê tì-ìm-ē, Thèng-hāu chiah ê chai-ē keng-kè.

2我beh求叫至koânê上帝；　　就是kā我chhiâⁿ-tî ta̍k項事ê上帝。Góa beh kiû-kiò Chì-koâiⁿ ê Siōng-tè; Chiū-sī kā góa chhiâⁿ-tî ta̍k-hāng sū ê Siōng-tè.

3當hit-ê beh吞食我ê人譭謗我ê時，　　上帝beh施恩，tùi天救我；[Sè-la̍h]　　亦beh發出伊ê慈愛，kap伊ê誠實。Tng hit ê beh thun-chia̍h góa ê lâng húi-pòng góa ê sî, Siōng-tè beh si-un, tùi thiⁿ kiù góa; [Sè-la̍h Ia̍h beh hoat-chhut I ê chû-ài, kap I ê sêng-si̍t.

4我ê性命tī獅ê中間；我倒tī親像火to̍h ê世間人ê中間；　　In ê嘴齒是鎗是箭，　　In ê舌是利刀。Góa ê sìⁿ-miā tī sai ê tiong-kan; Góa tó tī chhin-chhiūⁿ hé to̍h ê sè-kan lâng ê tiong-kan; In ê chhùi-khí sī chhiuⁿ sī chìⁿ, In ê chi̍h sī lāi-to.

5上帝ah，願你高大pôaⁿ過chiah-ê天，　　願你ê榮光pôaⁿ過全地。Siōng-tè ah, goān Lí koâiⁿ-tōa pôaⁿ-kè chiah ê thiⁿ, Goān Lí ê êng-kng pôaⁿ-kè choân-tōe.

6In kā我ê腳步設羅網，　　壓制我ê心神；　　In tī我ê面前開陷坑，　　家己反tńg跋落hit內面。 [Sè-la̍h]In kā góa ê kha-pō͘ siat lô-bāng, Ap-chè góa ê sim-sîn; In tī góa ê bīn-chêng khui hām-khiⁿ, Ka-kī hoán-tńg poa̍h-lo̍h hit lāi-bīn. [Sè-la̍h

7上帝ah，我ê心自在，我ê心自在；　　我beh吟詩，我beh唱歌o-ló。Siōng-tè ah, góa ê sim chū-chāi, góa ê sim chū-chāi; Góa beh gîm-si, góa beh chhiùⁿ-koa o-ló.

8我ê神ah，你tio̍h精神起來；　　琴ah，瑟ah，lín tio̍h精神起來；　　我本身beh真早精神起來。Góa ê sîn ah, lí tio̍h cheng-sîn khí-lâi; Khîm ah, sek ah, lín tio̍h cheng-sîn khí-lâi; Góa pún-sin beh chin chá cheng-sîn khí-lâi.

9主ah，我beh tī 萬百姓ê中間感謝你；　　Tī列邦ê中間唱歌o-ló你。Chú ah, Góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí.

10因為你ê慈愛大到抵天，　　你ê誠實到穹蒼。In-ūi Lí ê chû-ài tōa kàu tú-thiⁿ, Lí ê sêng-si̍t kàu kiong-chhong.

11上帝ah，願你高大pôaⁿ過chiah-ê天；　　願你ê榮光pôaⁿ過全地。Siōng-tè ah, goān Lí koâiⁿ-tōa pôaⁿ-kè chiah ê thiⁿ; Goān Lí ê êng-kng pôaⁿ-kè choân-tōe.