1大衛閃避掃羅，bih tī洞內；hit時伊做chit-ê金ê詩；交hō͘樂官；調是用「莫得毀壞ê」。1) 上帝ah，求你可憐我，可憐我；　　我ê身beh投歇tī你；　　我beh 投歇tī你翼股ê致蔭下，　　Thèng候chiah-ê災厄經過。Tāi-pi̍t siám-pī Sò-lô, bih tī tōng-lāi; hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hoāi--ê".1) Siōng-tè ah, kiû Lí khó-lîn góa, khó-lîn góa; Góa ê sin beh tâu-hioh tī Lí; Góa beh tâu-hioh tī Lí si̍t-kó͘ ê tì-ìm-ē, Thèng-hāu chiah ê chai-ē keng-kè.

2我beh求叫至koânê上帝；　　就是kā我chhiâⁿ-tî ta̍k項事ê上帝。Góa beh kiû-kiò Chì-koâiⁿ ê Siōng-tè; Chiū-sī kā góa chhiâⁿ-tî ta̍k-hāng sū ê Siōng-tè.

3當hit-ê beh吞食我ê人譭謗我ê時，　　上帝beh施恩，tùi天救我；[Sè-la̍h]　　亦beh發出伊ê慈愛，kap伊ê誠實。Tng hit ê beh thun-chia̍h góa ê lâng húi-pòng góa ê sî, Siōng-tè beh si-un, tùi thiⁿ kiù góa; [Sè-la̍h Ia̍h beh hoat-chhut I ê chû-ài, kap I ê sêng-si̍t.

4我ê性命tī獅ê中間；我倒tī親像火to̍h ê世間人ê中間；　　In ê嘴齒是鎗是箭，　　In ê舌是利刀。Góa ê sìⁿ-miā tī sai ê tiong-kan; Góa tó tī chhin-chhiūⁿ hé to̍h ê sè-kan lâng ê tiong-kan; In ê chhùi-khí sī chhiuⁿ sī chìⁿ, In ê chi̍h sī lāi-to.

5上帝ah，願你高大pôaⁿ過chiah-ê天，　　願你ê榮光pôaⁿ過全地。Siōng-tè ah, goān Lí koâiⁿ-tōa pôaⁿ-kè chiah ê thiⁿ, Goān Lí ê êng-kng pôaⁿ-kè choân-tōe.

6In kā我ê腳步設羅網，　　壓制我ê心神；　　In tī我ê面前開陷坑，　　家己反tńg跋落hit內面。 [Sè-la̍h]In kā góa ê kha-pō͘ siat lô-bāng, Ap-chè góa ê sim-sîn; In tī góa ê bīn-chêng khui hām-khiⁿ, Ka-kī hoán-tńg poa̍h-lo̍h hit lāi-bīn. [Sè-la̍h

7上帝ah，我ê心自在，我ê心自在；　　我beh吟詩，我beh唱歌o-ló。Siōng-tè ah, góa ê sim chū-chāi, góa ê sim chū-chāi; Góa beh gîm-si, góa beh chhiùⁿ-koa o-ló.

8我ê神ah，你tio̍h精神起來；　　琴ah，瑟ah，lín tio̍h精神起來；　　我本身beh真早精神起來。Góa ê sîn ah, lí tio̍h cheng-sîn khí-lâi; Khîm ah, sek ah, lín tio̍h cheng-sîn khí-lâi; Góa pún-sin beh chin chá cheng-sîn khí-lâi.

9主ah，我beh tī 萬百姓ê中間感謝你；　　Tī列邦ê中間唱歌o-ló你。Chú ah, Góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí.

10因為你ê慈愛大到抵天，　　你ê誠實到穹蒼。In-ūi Lí ê chû-ài tōa kàu tú-thiⁿ, Lí ê sêng-si̍t kàu kiong-chhong.

11上帝ah，願你高大pôaⁿ過chiah-ê天；　　願你ê榮光pôaⁿ過全地。Siōng-tè ah, goān Lí koâiⁿ-tōa pôaⁿ-kè chiah ê thiⁿ; Goān Lí ê êng-kng pôaⁿ-kè choân-tōe.

1大衛金ê詩；交hō͘樂官；調是用「莫得毀壞」。1) 世間人ah，lín靜靜kiám真正講公義mah？　　Lín kiám照誠實行審判mah？Tāi-pi̍t kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hoāi".1) Sè-kan lâng ah, lín chēng-chēng kiám chin-chiàⁿ kóng kong-gī mah? Lín kiám chiàu sêng-si̍t kiâⁿ sím-phòaⁿ mah?

2M̄是，lín是心內做pháiⁿ；　　Lín tī地上，用lín ê手所做ê強暴，秤(chhìn)hō͘人。M̄-sī, lín sī sim-lāi chòe pháiⁿ; Lín tī tōe-chiūⁿ, ēng lín ê chhiú só͘ chòe ê kiông-pō, chhìn hō͘ lâng.

3Pháiⁿ人一下出母胎，就kap上帝生疏；　　一下離開老母ê腹肚，就行叉路，講白賊話。Pháiⁿ-lâng chi̍t-ē chhut bú-thai, chiū kap Siōng-tè chhiⁿ-so͘; Chi̍t-ē lī-khui lāu-bú ê pak-tó͘, chiū kiâⁿ chha-lō͘, kóng pe̍h-chha̍t ōe.

4In ê毒親像蛇ê毒，　　In親像臭耳人ê毒蛇塞密耳孔；In ê to̍k chhin-chhiūⁿ chôa ê to̍k, In chhin-chhiūⁿ chhàu-hī-lâng ê to̍k-chôa that-ba̍t hī-khang;

5M̄聽驅蛇ê人ê聲，　　雖bóng gâu畫符念咒ê，in亦m̄聽。M̄-thiaⁿ khu-chôa ê lâng ê siaⁿ, Sui-bóng gâu ūi-hû liām-chiù--ê, in ia̍h m̄-thiaⁿ.

6上帝ah，求你phah折in嘴內ê齒；　　耶和華ah，求你phah折獅á-thûn ê大支嘴齒。Siōng-tè ah, kiû Lí phah-chi̍h in chhùi-lāi ê khí; Iâ-hô-hoa ah, kiû Lí phah-chi̍h sai-á-thûn ê tōa ki chhùi-khí.

7願in消滅親像緊緊流ê水；　　In ê箭比beh射ê時，願in ê箭親像phah折。Goān in siau-bia̍t chhin-chhiūⁿ kín-kín lâu ê chúi; In ê chìⁿ pí beh siā ê sî, goān in ê chìⁿ chhin-chhiūⁿ phah-chi̍h.

8願in親像lô͘螺，消溶去；　　Koh親像婦人人ka-la̍uh無見tio̍h天日ê胎。Goān in chhin-chhiūⁿ lō͘-lê, siau-iûⁿ--khì; Koh chhin-chhiūⁿ hū-jîn-lâng ka-la̍uh bô kìⁿ-tio̍h thiⁿ-ji̍t ê thai.

9Lín用刺á hiâⁿ火，鼎iáu未熱，　　伊beh用捲螺風，將生ê kap to̍h-ê，做一下掃去。Lín ēng chhì-á hiâⁿ hé, tiáⁿ iáu-bē jia̍t, I beh ēng kńg-lê-hong, chiong chhiⁿ--ê kap to̍h--ê, chòe chi̍t-ē sàu--khì.

10義人看見報應ê事，就歡喜；　　伊beh tī pháiⁿ人ê血洗伊ê腳。Gī-lâng khòaⁿ-kìⁿ pò-èng ê sū, chiū hoaⁿ-hí; I beh tī pháiⁿ-lâng ê huih sóe i ê kha.

11人就beh講，義人真正有好報；　　Tī地面上果然有上帝teh判斷。Lâng chiū beh kóng, Gī-lâng chin-chiàⁿ ū hó-pò; Tī tōe-bīn-chiūⁿ kó-jiân ū Siōng-tè teh phòaⁿ-toàn.

1掃羅差人去埋伏大衛ê厝，beh thâi伊；hit時大衛做chit-ê金ê詩；交hō͘樂官；調用「莫得毀壞」。1) 我ê上帝ah，求你救我脫離我ê對敵；　　安置我tī高ê所在，得tio̍h脫離hiah-ê起來攻擊我ê人。Sò-lô chhe lâng khì bâi-ho̍k Tāi-pi̍t ê chhù, beh thâi--i; hit-sî Tāi-pi̍t chòe chit ê kim ê si; kau hō͘ Ga̍k-koaⁿ; tiāu, ēng "Bo̍h-tit húi-hoāi".1) Góa ê Siōng-tè ah, kiû Lí kiù góa thoat-lī góa ê tùi-te̍k; An-tì góa tī koâiⁿ ê só͘-chāi, tit-tio̍h thoat-lī hiah-ê khí-lâi kong-kek góa ê lâng.

2求你救我脫離做pháiⁿ ê人，　　Koh救我脫離ài thâi-死人ê人。Kiû Lí kiù góa thoat-lī chòe-pháiⁿ ê lâng, Koh kiù góa thoat-lī ài thâi-sí lâng ê lâng.

3因為in埋伏beh害我ê性命；　　有猛人聚集來攻擊我；　　耶和華ah，這m̄是因為我ê過失，亦m̄是因為我ê罪過。In-ūi in bâi-ho̍k beh hāi góa ê sìⁿ-miā; Ū béng-lâng chū-chi̍p lâi kong-kek góa; Iâ-hô-hoa ah, che m̄-sī in-ūi góa ê kè-sit, ia̍h m̄-sī in-ūi góa ê chōe-kòa.

4我雖然無過失，in走來，備辦beh害我；　　求你精神起來幫贊我，來鑑察。Góa sui-jiân bô kè-sit, in cháu lâi, pī-pān beh hāi góa; Kiû Lí cheng-sîn khí-lâi pang-chān góa, lâi kàm-chhat.

5萬軍ê上帝耶和華，就是以色列ê上帝ah，　　求你起來，辨理萬國；m̄-thang憐憫見若行奸詐ê pháiⁿ人。[Sè-la̍h]Bān-kun ê Siōng-tè Iâ-hô-hoa, chiū-sī Í-sek-lia̍t ê Siōng-tè ah, Kiû Lí khí--lâi, pān-lí bān-kok; m̄-thang lîn-bín kìⁿ-nā kiâⁿ kan-chà ê pháiⁿ-lâng. [Sè-la̍h

6In ê-hng時tò來，喉叫親像狗；　　Tī城裡四界行。In ê-hng-sî tò--lâi, âu-kiò chhin-chhiūⁿ káu; Tī siâⁿ--nih sì-kòe kiâⁿ.

7In ê嘴吐出pháiⁿ話，嘴唇有刀。　　因為in講，Chī-chūi聽見？In ê chhùi thò͘-chhut pháiⁿ-ōe, Chhùi-tûn ū to. In-ūi in kóng, Chī-chūi thiaⁿ-kìⁿ?

8但是你耶和華beh笑in，　　你beh chhìn笑列邦。Nā-sī Lí Iâ-hô-hoa beh chhiò in, Lí beh chhìn-chhiò lia̍t-pang.

9我ê氣力ah，我beh ǹg望你；　　因為上帝是我ê高台。Góa ê khùi-la̍t ah, góa beh ǹg-bāng Lí; In-ūi Siōng-tè sī góa ê koâiⁿ-tâi.

10我ê上帝beh用慈愛迎接我；　　上帝beh hō͘我看見我ê對敵受報應。Góa ê Siōng-tè beh ēng chû-ài ngiâ-chih góa; Siōng-tè beh hō͘ góa khòaⁿ-kìⁿ góa ê tùi-te̍k siū pò-èng.

11莫得剿滅in，驚見我ê百姓bōe記得；　　主ah，阮ê藤牌ah，　　求你用你ê氣力，hō͘ in四散，koh降低。Bo̍h-tit châu-bia̍t in, kiaⁿ-kìⁿ góa ê peh-sìⁿ bōe-kì-tit; Chú ah, goán ê tîn-pâi ah, Kiû Lí ēng Lí ê khùi-la̍t, hō͘ in sì-sòaⁿ, koh kàng-kē.

12因為in嘴ê罪過kap嘴唇ê話，　　以及in所講ê咒罵kap白賊，　　願in tī驕傲ê中間受掠tio̍h。In-ūi in chhùi ê chōe-kòa kap chhùi-tûn ê ōe, Í-ki̍p in só͘ kóng ê chiù-mē kap pe̍h-chha̍t, Goān in tī kiau-ngō͘ ê tiong-kan siū lia̍h-tio̍h.

13求你受氣剿滅in，剿滅in，到lóng無去；　　Hō͘ in知上帝tī雅各ê中間掌權，　　到tī地極。[Sè-la̍h]Kiû Lí siū-khì châu-bia̍t in, châu-bia̍t in, kàu lóng bô--khì; Hō͘ in chai Siōng-tè tī Ngá-kok ê tiong-kan chiáng-koân, Kàu tī tōe-ke̍k. [Sè-la̍h

14In ê-hng時tò來，喉叫親像狗；　　Tī城裡四界行。In ê-hng-sî tò--lâi, âu-kiò chhin-chhiūⁿ káu; Tī siâⁿ--nih sì-kòe kiâⁿ.

15In beh走來走去chhē食物；　　若無得tio̍h飽，就thong暝thèng候。In beh cháu-lâi cháu-khì chhē chia̍h-mi̍h; Nā bô tit-tio̍h pá, chiū thong-mî thèng-hāu.

16但是我beh唱歌o-ló你ê氣力，　　早起時beh大聲o-ló你ê慈愛；　　因為你bat做我ê高台，　　Tī患難ê日，做我逃閃ê所在。Nā-sī góa beh chhiùⁿ-koa o-ló Lí ê khùi-la̍t, Chá-khí-sî beh tōa-siaⁿ o-ló Lí ê chû-ài; In-ūi Lí bat chòe góa ê koâiⁿ-tâi, Tī hoān-lān ê ji̍t, chòe góa tô-siám ê só͘-chāi.

17我ê氣力ah，我beh唱歌o-ló你；　　因為上帝是我ê高台，是我慈愛ê上帝。Góa ê khùi-la̍t ah, góa beh chhiùⁿ-koa o-ló Lí; In-ūi Siōng-tè sī góa ê koâiⁿ-tâi, sī góa chû-ài ê Siōng-tè.