1大衛ê詩，交hō͘樂官；用pûn ê樂器。1) 耶和華ah，求你àⁿ耳孔聽我ê話。　　鑑察我ê心思。Tāi-pi̍t ê si, kau hō͘ Ga̍k-koaⁿ; ēng pûn ê ga̍k-khì.1) Iâ-hô-hoa ah, kiû Lí àⁿ hī-khang thiaⁿ góa ê ōe. Kàm-chhat góa ê sim-su.

2我ê王，我ê上帝ah，求你àⁿ落聽我求叫ê聲：　　因為我ǹg你祈禱。Góa ê Ông, góa ê Siōng-tè ah, Kiû Lí àⁿ-lo̍h thiaⁿ góa kiû-kiò ê siaⁿ: In-ūi góa ǹg Lí kî-tó.

3耶和華ah，早起時你會聽我ê聲；　　早起時我beh對你排列我ê心意，續beh瞭望。Iâ-hô-hoa ah, chá-khí-sî Lí ōe thiaⁿ góa ê siaⁿ; Chá-khí-sî góa beh tùi Lí pâi-lia̍t góa ê sim-ì, sòa beh liâu-bāng.

4因為你m̄是歡喜罪惡ê上帝；　　Pháiⁿ-ê bōe得thang kap你同khiā起。In-ūi Lí m̄-sī hoaⁿ-hí chōe-ok ê Siōng-tè; Pháiⁿ--ê bōe-tit-thang kap Lí tâng khiā-khí.

5驕傲ê人bōe能khiā tī你ê面前；　　做pháiⁿ ê人lóng是你所怨恨。Kiau-ngō͘ ê lâng bōe-ōe khiā tī Lí ê bīn-chêng; Chòe-pháiⁿ ê lâng lóng sī Lí só͘ oàn-hūn.

6講白賊ê，你beh滅in；　　Ài thâi人kap奸詭ê，lóng是耶和華所厭惡。Kóng pe̍h-chha̍t--ê, Lí beh bia̍t in; Ài thâi lâng kap kan-kúi--ê, lóng sī Iâ-hô-hoa só͘ iàm-ò͘ⁿ.

7論到我，我beh憑你豐盛ê慈愛入你ê厝；　　我beh chûn敬畏你ê心，ǹg你ê聖殿來敬拜。Lūn-kàu góa, góa beh pîn Lí hong-sēng ê chû-ài ji̍p Lí ê chhù; Góa beh chûn kèng-ùi Lí ê sim, ǹg Lí ê sèng-tiān lâi kèng-pài.

8耶和華ah，求你因為我ê對敵，憑你ê公義chhōa我；　　Hō͘你ê路tī我ê面前正直。Iâ-hô-hoa ah, kiû Lí in-ūi góa ê tùi-te̍k, pîn Lí ê kong-gī chhōa góa; Hō͘ Lí ê lō͘ tī góa ê bīn-chêng chèng-ti̍t.

9因為in ê嘴無老實；　　In ê心惡毒滿滿；　　In ê嚨喉是開開ê墓；　　In用舌諂媚人。In-ūi in ê chhùi bô láu-si̍t; In ê sim ok-to̍k móa-móa; In ê nâ-âu sī khui-khui ê bōng; In ēng chi̍h thiám-mī lâng.

10上帝ah，求你定in ê罪；　　Hō͘ in tùi家己ê計謀跋倒。　　In ê罪過真chōe，願你將in趕出；　　因為in背叛你。Siōng-tè ah, kiû Lí tēng in ê chōe; Hō͘ in tùi ka-kī ê kè-bô͘ poa̍h-tó. In ê chōe-kòa chin-chōe, goān Lí chiong in kóaⁿ-chhut; In-ūi in pōe-poān Lí.

11見若óa靠你ê，願in歡喜；願in永永歡喜出聲；　　因為你庇佑in。　　Koh願hiah-ê疼惜你ê名ê人，lóng tiàm-tī你來歡喜。Kìⁿ-nā óa-khò Lí--ê, goān in hoaⁿ-hí; Goān in éng-éng hoaⁿ-hí chhut-siaⁿ; in-ūi Lí pì-iū in. Koh goān hiah ê thiàⁿ-sioh Lí ê miâ ê lâng, lóng tiàm-tī Lí lâi hoaⁿ-hí.

12因為你beh賜福hō͘義人；　　耶和華ah，你beh用恩惠，親像藤牌，四面圍伊。In-ūi Lí beh sù-hok hō͘ gī-lâng; Iâ-hô-hoa ah, Lí beh ēng un-hūi, chhin-chhiūⁿ tîn-pâi, sì-bīn ûi--i.

1大衛ê詩，交hō͘樂官；用絲絃ê樂器；調用第八。1) 耶和華ah，m̄-thang tī你ê受氣中責備我，　　亦m̄-thang tī你大受氣中譴責我。Tāi-pi̍t ê si, kau hō͘ Ga̍k-koaⁿ; ēng si-hiân ê ga̍k-khì; tiāu, ēng tē poeh.1) Iâ-hô-hoa ah, m̄-thang tī Lí ê siū-khì-tiong chek-pī góa, Ia̍h m̄-thang tī Lí tōa siū-khì-tiong khiàn-chek góa.

2耶和華ah，求你可憐我，因為我衰lám；　　耶和華ah，求你醫治我，因為我ê骨頭ngia̍uh-ngia̍uh-chhoah。Iâ-hô-hoa ah, kiû Lí khó-lîn góa, in-ūi góa soe-lám; Iâ-hô-hoa ah, kiû Lí i-tī góa, in-ūi góa ê kut-thâu ngia̍uh-ngia̍uh-chhoah.

3我ê心大大驚惶；　　耶和華ah，你beh到tī時chiah救我？Góa ê sim tōa-tōa kiaⁿ-hiâⁿ; Iâ-hô-hoa ah, Lí beh kàu tī-sî chiah kiù góa?

4耶和華ah，求你oa̍t倒tńg救我ê性命；　　為tio̍h你ê慈愛來救我。Iâ-hô-hoa ah, kiû Lí oa̍t-tò-tńg kiù góa ê sìⁿ-miā; Ūi-tio̍h Lí ê chû-ài lâi kiù góa.

5因為死無ê中間，無記念你；　　陰府ê中間，是誰感謝你？In-ūi sí-bô ê tiong-kan, bô kì-liām Lí; Im-hú ê tiong-kan, chī-chūi kám-siā Lí?

6我因為haiⁿ-haiⁿ-chhan來厭倦；　　我ta̍k-mî流目屎，淹我ê眠床，　　濕透我ê褥á。Góa in-ūi haiⁿ-haiⁿ-chhan lâi ià-siān; Góa ta̍k-mî lâu ba̍k-sái, im góa ê bîn-chhn̂g, Sip-thàu góa ê jio̍k-á.

7我因為憂悶，目睭phah-pháiⁿ；　　Koh因為我一切ê對敵，來目睭花。Góa in-ūi iu-būn, ba̍k-chiu phah-pháiⁿ; Koh in-ūi góa it-chhè ê tùi-te̍k, lâi ba̍k-chiu hoe.

8Lín一切做pháiⁿ ê人，tio̍h離開我；　　因為耶和華聽見我啼哭ê聲。Lín it-chhè chòe pháiⁿ ê lâng, tio̍h lī-khui góa; In-ūi Iâ-hô-hoa thiaⁿ-kìⁿ góa thî-khàu ê siaⁿ.

9耶和華有聽我ê懇求；　　耶和華beh接納我ê祈禱。Iâ-hô-hoa ū thiaⁿ góa ê khún-kiû; Iâ-hô-hoa beh chiap-la̍p góa ê kî-tó.

10我ê對敵lóng beh見笑，大大驚惶；　　In beh退倒tńg，忽然見笑。Góa ê tùi-te̍k lóng beh kiàn-siàu, tōa-tōa kiaⁿ-hiâⁿ; In beh thè tò-tńg, hut-jiân kiàn-siàu.

1大衛指便雅憫人Kó͘-si̍t ê話，ǹg耶和華唱歌；調用Si-kai-un。1) 耶和華我ê上帝ah，我óa靠你；　　求你救我脫離一切追趕我ê人，救我出來。Tāi-pi̍t chí Piān-ngá-bín lâng Kó͘-si̍t ê ōe, ǹg Iâ-hô-hoa chhiùⁿ-koa; tiāu, ēng Si-kai-un.1) Iâ-hô-hoa góa ê Siōng-tè ah, góa óa-khò Lí; Kiû Lí kiù góa thoat-lī it-chhè tui-kóaⁿ góa ê lâng, kiù góa chhut-lâi.

2驚了伊親像獅，拆裂我；　　拆到碎碎，無拯救我ê。Kiaⁿ-liáu i chhin-chhiūⁿ sai, thiah-li̍h góa; Thiah kàu chhùi-chhùi, bô chín-kiù góa--ê.

3耶和華我ê上帝ah，我若行chit-ê；　　若有罪惡tī我ê手；Iâ-hô-hoa góa ê Siōng-tè ah, góa nā kiâⁿ chit-ê; Nā ū chōe-ok tī góa ê chhiú;

4我若用pháiⁿ報hit-ê kap我和好ê人；　　(其實連hit-ê無緣故kap我做對敵ê人，我亦有救伊；)Góa nā ēng pháiⁿ pò hit ê kap góa hô-hó ê lâng; (Kî-si̍t liân hit ê bô iân-kò͘ kap góa chòe tùi-te̍k ê lâng, góa ia̍h ū kiù i;)

5就chhut-chāi對敵追jip我，到jip-tio̍h；　　將我ê性命踏tī土腳，將我ê榮光hē tī土粉。[Sè-la̍h]Chiū chhut-chāi tùi-te̍k tui-jip góa, kàu jip-tio̍h; Chiong góa ê sìⁿ-miā ta̍h tī thô͘-kha, Chiong góa ê êng-kng hē tī thô͘-hún. [Sè-la̍h

6耶和華ah，求你tī你ê受氣中起來，　　Peh起來khiā，抵擋我ê對敵ê大受氣，　　求你為tio̍h我來醒，照你所定tio̍h來審判。Iâ-hô-hoa ah, kiû Lí tī Lí ê siū-khì-tiong khí--lâi, Peh--khí-lâi khiā, tí-tng góa ê tùi-te̍k ê tōa siū-khì, Kiû Lí ūi-tio̍h góa lâi chhíⁿ, chiàu Lí só͘ tiāⁿ-tio̍h lâi sím-phòaⁿ.

7願列邦ê會圍你；　　願你倒tńg tī高位tī in ê頂面。Goān lia̍t-pang ê hōe ûi Lí; Goān Lí tò-tńg tī koâiⁿ-ūi tī in ê téng-bīn.

8耶和華審判眾百姓；　　耶和華ah，求你判斷我，照我ê義kap我心內ê正直。Iâ-hô-hoa sím-phòaⁿ chèng peh-sìⁿ; Iâ-hô-hoa ah, kiû Lí phòaⁿ-toàn góa, chiàu góa ê gī kap góa sim-lāi ê chèng-ti̍t.

9願pháiⁿ人ê pháiⁿ到chia soah，義人你hō͘伊khiā在；　　因為公義ê上帝鑑察人ê心腸。Goān pháiⁿ-lâng ê pháiⁿ kàu chia soah, gī-lâng Lí hō͘ i khiā-chāi; In-ūi kong-gī ê Siōng-tè kàm-chhat lâng ê sim-tn̂g.

10我ê藤牌在tī上帝，　　伊拯救心內正直ê人。Góa ê tîn-pâi chāi-tī Siōng-tè, I chín-kiù sim-lāi chèng-ti̍t ê lâng.

11上帝是公義ê審判司；　　亦是日日發出受氣ê上帝。Siōng-tè sī kong-gī ê sím-phòaⁿ-si; Ia̍h sī ji̍t-ji̍t hoat-chhut siū-khì ê Siōng-tè.

12人若m̄反悔，伊beh磨伊ê刀；　　伊有張伊ê弓，備辦便便。Lâng nā m̄ hoán-hóe, I beh bôa I ê to; I ū tiuⁿ I ê keng, pī-pān piān-piān.

13伊備辦會hō͘人死ê ke-si，　　伊所射ê箭是火箭。I pī-pān ōe hō͘ lâng sí ê ke-si, I só͘ siā ê chìⁿ sī hé chìⁿ.

14你看，pháiⁿ人圖謀奸惡，　　懷孕毒害，生出虛假。Lí khòaⁿ, pháiⁿ lâng tô͘-bô͘ kan-ok, Hoâi-īn to̍k-hāi, siⁿ-chhut hu-ké.

15伊開窟，掘hō͘伊深；　　竟然跋落tī伊所開ê陷坑。I khui khut, ku̍t hō͘ i chhim; Kéng-jiân poa̍h-lo̍h tī i só͘ khui ê hām-khiⁿ.

16伊ê毒害beh 倒tńg到伊ê頭殼；　　伊ê強暴beh落tī伊ê頭殼頂。I ê to̍k-hāi beh tò-tńg kàu i ê thâu-khak; I ê kiông-pō beh lo̍h tī i ê thâu-khak-téng.

17我beh照耶和華ê公義感謝伊；　　Koh o-ló至koân耶和華ê名。Góa beh chiàu Iâ-hô-hoa ê kong-gī kám-siā I; Koh o-ló chì-koâiⁿ Iâ-hô-hoa ê miâ.