1掃羅差人去埋伏大衛ê厝，beh thâi伊；hit時大衛做chit-ê金ê詩；交hō͘樂官；調用「莫得毀壞」。1) 我ê上帝ah，求你救我脫離我ê對敵；　　安置我tī高ê所在，得tio̍h脫離hiah-ê起來攻擊我ê人。Sò-lô chhe lâng khì bâi-ho̍k Tāi-pi̍t ê chhù, beh thâi--i; hit-sî Tāi-pi̍t chòe chit ê kim ê si; kau hō͘ Ga̍k-koaⁿ; tiāu, ēng "Bo̍h-tit húi-hoāi".1) Góa ê Siōng-tè ah, kiû Lí kiù góa thoat-lī góa ê tùi-te̍k; An-tì góa tī koâiⁿ ê só͘-chāi, tit-tio̍h thoat-lī hiah-ê khí-lâi kong-kek góa ê lâng.

2求你救我脫離做pháiⁿ ê人，　　Koh救我脫離ài thâi-死人ê人。Kiû Lí kiù góa thoat-lī chòe-pháiⁿ ê lâng, Koh kiù góa thoat-lī ài thâi-sí lâng ê lâng.

3因為in埋伏beh害我ê性命；　　有猛人聚集來攻擊我；　　耶和華ah，這m̄是因為我ê過失，亦m̄是因為我ê罪過。In-ūi in bâi-ho̍k beh hāi góa ê sìⁿ-miā; Ū béng-lâng chū-chi̍p lâi kong-kek góa; Iâ-hô-hoa ah, che m̄-sī in-ūi góa ê kè-sit, ia̍h m̄-sī in-ūi góa ê chōe-kòa.

4我雖然無過失，in走來，備辦beh害我；　　求你精神起來幫贊我，來鑑察。Góa sui-jiân bô kè-sit, in cháu lâi, pī-pān beh hāi góa; Kiû Lí cheng-sîn khí-lâi pang-chān góa, lâi kàm-chhat.

5萬軍ê上帝耶和華，就是以色列ê上帝ah，　　求你起來，辨理萬國；m̄-thang憐憫見若行奸詐ê pháiⁿ人。[Sè-la̍h]Bān-kun ê Siōng-tè Iâ-hô-hoa, chiū-sī Í-sek-lia̍t ê Siōng-tè ah, Kiû Lí khí--lâi, pān-lí bān-kok; m̄-thang lîn-bín kìⁿ-nā kiâⁿ kan-chà ê pháiⁿ-lâng. [Sè-la̍h

6In ê-hng時tò來，喉叫親像狗；　　Tī城裡四界行。In ê-hng-sî tò--lâi, âu-kiò chhin-chhiūⁿ káu; Tī siâⁿ--nih sì-kòe kiâⁿ.

7In ê嘴吐出pháiⁿ話，嘴唇有刀。　　因為in講，Chī-chūi聽見？In ê chhùi thò͘-chhut pháiⁿ-ōe, Chhùi-tûn ū to. In-ūi in kóng, Chī-chūi thiaⁿ-kìⁿ?

8但是你耶和華beh笑in，　　你beh chhìn笑列邦。Nā-sī Lí Iâ-hô-hoa beh chhiò in, Lí beh chhìn-chhiò lia̍t-pang.

9我ê氣力ah，我beh ǹg望你；　　因為上帝是我ê高台。Góa ê khùi-la̍t ah, góa beh ǹg-bāng Lí; In-ūi Siōng-tè sī góa ê koâiⁿ-tâi.

10我ê上帝beh用慈愛迎接我；　　上帝beh hō͘我看見我ê對敵受報應。Góa ê Siōng-tè beh ēng chû-ài ngiâ-chih góa; Siōng-tè beh hō͘ góa khòaⁿ-kìⁿ góa ê tùi-te̍k siū pò-èng.

11莫得剿滅in，驚見我ê百姓bōe記得；　　主ah，阮ê藤牌ah，　　求你用你ê氣力，hō͘ in四散，koh降低。Bo̍h-tit châu-bia̍t in, kiaⁿ-kìⁿ góa ê peh-sìⁿ bōe-kì-tit; Chú ah, goán ê tîn-pâi ah, Kiû Lí ēng Lí ê khùi-la̍t, hō͘ in sì-sòaⁿ, koh kàng-kē.

12因為in嘴ê罪過kap嘴唇ê話，　　以及in所講ê咒罵kap白賊，　　願in tī驕傲ê中間受掠tio̍h。In-ūi in chhùi ê chōe-kòa kap chhùi-tûn ê ōe, Í-ki̍p in só͘ kóng ê chiù-mē kap pe̍h-chha̍t, Goān in tī kiau-ngō͘ ê tiong-kan siū lia̍h-tio̍h.

13求你受氣剿滅in，剿滅in，到lóng無去；　　Hō͘ in知上帝tī雅各ê中間掌權，　　到tī地極。[Sè-la̍h]Kiû Lí siū-khì châu-bia̍t in, châu-bia̍t in, kàu lóng bô--khì; Hō͘ in chai Siōng-tè tī Ngá-kok ê tiong-kan chiáng-koân, Kàu tī tōe-ke̍k. [Sè-la̍h

14In ê-hng時tò來，喉叫親像狗；　　Tī城裡四界行。In ê-hng-sî tò--lâi, âu-kiò chhin-chhiūⁿ káu; Tī siâⁿ--nih sì-kòe kiâⁿ.

15In beh走來走去chhē食物；　　若無得tio̍h飽，就thong暝thèng候。In beh cháu-lâi cháu-khì chhē chia̍h-mi̍h; Nā bô tit-tio̍h pá, chiū thong-mî thèng-hāu.

16但是我beh唱歌o-ló你ê氣力，　　早起時beh大聲o-ló你ê慈愛；　　因為你bat做我ê高台，　　Tī患難ê日，做我逃閃ê所在。Nā-sī góa beh chhiùⁿ-koa o-ló Lí ê khùi-la̍t, Chá-khí-sî beh tōa-siaⁿ o-ló Lí ê chû-ài; In-ūi Lí bat chòe góa ê koâiⁿ-tâi, Tī hoān-lān ê ji̍t, chòe góa tô-siám ê só͘-chāi.

17我ê氣力ah，我beh唱歌o-ló你；　　因為上帝是我ê高台，是我慈愛ê上帝。Góa ê khùi-la̍t ah, góa beh chhiùⁿ-koa o-ló Lí; In-ūi Siōng-tè sī góa ê koâiⁿ-tâi, sī góa chû-ài ê Siōng-tè.

1大衛tī兩條溪ê A-lân，以及Só-pa ê A-lân，交戰ê時，Iok-ap tò來tī鹽谷，thâi死Í-tong人一萬兩千，hit時大衛做chit-ê金ê詩，hō͘人學習；交hō͘樂官；調用「做干證ê百合花」。1) 上帝ah，你bat棄sak阮，破壞阮；　　你bat受氣阮，求你hō͘阮koh興起。Tāi-pi̍t tī nn̄g-tiâu khoe ê A-lân, í-ki̍p Só-pa ê A-lân, kau-chiàn ê sî, Iok-ap tò-lâi tī Iâm-kok, thâi-sí Í-tong lâng chi̍t-bān nn̄g-chheng, hit-sî Tāi-pi̍t chòe chit ê kim ê si, hō͘ lâng ha̍k-si̍p; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Siōng-tè ah, Lí bat khì-sak goán, phò-hoāi goán; Lí bat siū-khì goán, kiû Lí hō͘ goán koh heng-khí.

2你hō͘地振動，亦hō͘伊崩裂；　　願你醫好伊ê裂痕；因為地搖動。Lí hō͘ tōe tín-tāng, ia̍h hō͘ i pang-li̍h; Goān Lí i-hó i ê li̍h-hûn; in-ūi tōe iô-tāng.

3你hō͘你ê百姓tú-tio̍h艱難；　　你hō͘阮lim hit-ê hō͘人顛來倒去ê酒。Lí hō͘ Lí ê peh-sìⁿ tú-tio̍h kan-lân; Lí hō͘ goán lim hit ê hō͘ lâng tian-lâi tó-khì ê chiú.

4你用旗賞賜敬畏你ê人，　　Thang為真理kia̍h起來ia̍t。[Sè-la̍h]Lí ēng kî siúⁿ-sù kèng-ùi Lí ê lâng, Thang ūi chin-lí kia̍h--khí-lâi ia̍t. [Sè-la̍h

5求你聽阮，用chiàⁿ手牽救阮，　　Thang hō͘你所疼ê人得tio̍h救。Kiû Lí thiaⁿ goán, ēng chiàⁿ-chhiú khan-kiù goán, Thang hō͘ Lí só͘ thiàⁿ ê lâng tit-tio̍h kiù.

6上帝已經kí伊ê聖潔來講，我beh大悅，　　我beh分開示劍，量So͘-kat ê山谷。Siōng-tè í-keng kí I ê sèng-kiat lâi kóng, Góa beh tāi-ia̍t, Góa beh pun-khui Sī-kiàm, niû So͘-kat ê soaⁿ-kok.

7Ki-lia̍t是我ê，Má-ná-se亦是我ê；　　Í-hoat-liân是我ê頭盔；　　猶大是我ê權柄。Ki-lia̍t sī Góa-ê, Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê koân-pèng.

8Mô͘-ap beh做我ê浴盆；我beh hiat我ê鞋tī Í-tong；　　腓利士地ah，你因為我來大聲hoah。Mô͘-ap beh chòe Góa ê e̍k-phûn; Góa beh hiat Góa ê ôe tī Í-tong; Hui-lī-sū tōe ah, lí in-ūi Góa lâi tōa-siaⁿ hoah.

9Chī-chūi能chhōa我入堅固ê城？　　Chī-chūi chhōa我入Í-tong ê地？Chī-chūi ōe chhōa góa ji̍p kian-kò͘ ê siâⁿ? Chī-chūi chhōa góa ji̍p Í-tong ê tōe?

10上帝ah，你kiám m̄是棄sak阮mah？　　上帝ah，你無kap阮ê軍兵相kap出去。Siōng-tè ah, Lí kiám m̄-sī khì-sak goán mah? Siōng-tè ah, Lí bô kap goán ê kun-peng saⁿ-kap chhut-khì.

11求你幫贊阮攻擊對敵；　　因為人ê拯救是空空。Kiû Lí pang-chān goán kong-kek tùi-te̍k; In-ūi lâng ê chín-kiù sī khang-khang.

12阮óa靠上帝，做成大tāi-chì；　　因為thún踏阮ê對敵ê，就是伊。Goán óa-khò Siōng-tè, chòe-chiâⁿ tōa tāi-chì; In-ūi thún-ta̍h goán ê tùi-te̍k--ê, chiū-sī I.

1大衛ê詩，交hō͘樂官；用絲絃ê樂器。1) 上帝ah，求你聽我ê求叫；　　Àⁿ落聽我ê祈禱。Tāi-pi̍t ê si, kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí thiaⁿ góa ê kiû-kiò; Àⁿ-lo̍h thiaⁿ góa ê kî-tó.

2我ê心失志ê時，就beh tùi地極求叫你；　　求你chhōa我到hit-ê比我khah高ê石磐。Góa ê sim sit-chì ê sî, chiū beh tùi tōe-ke̍k kiû-kiò Lí; Kiû Lí chhōa góa kàu hit-ê pí góa khah-koâiⁿ ê chio̍h-pôaⁿ.

3因為你bat做我逃閃ê所在。　　做我堅固ê台，來脫離對敵。In-ūi Lí bat chòe góa tô-siám ê só͘-chāi. Chòe góa kian-kò͘ ê tâi, lâi thoat-lī tùi-te̍k.

4我beh永遠tòa tī你ê布棚；　　我beh bih tī你翼下隱密ê所在。 [Sè-la̍h]Góa beh éng-oán tòa tī Lí ê pò͘-pîⁿ; Góa beh bih tī Lí si̍t-ē ún-ba̍t ê só͘-chāi. [Sè-la̍h

5上帝ah，我所hē ê願，你有聽見；　　你有將產業賞賜敬畏你ê名ê人。Siōng-tè ah, góa só͘ hē ê goān, Lí ū thiaⁿ-kìⁿ; Lí ū chiong sán-gia̍p siúⁿ-sù kèng-ùi Lí ê miâ ê lâng.

6你beh加添王ê歲壽；　　伊ê年歲beh到代代。Lí beh ke-thiⁿ ông ê hè-siū; I ê nî-hè beh kàu tāi-tāi.

7伊beh永遠坐位tī上帝ê面前；　　願你備辦慈愛kap誠實來保護i。I beh éng-oán chē-ūi tī Siōng-tè ê bīn-chêng; Goān Lí pī-pān chû-ài kap sêng-si̍t lâi pó-hō͘ i.

8Án-ni我beh唱歌o-ló你ê名，到永遠；　　Thang日日謝我ê願。Án-ni góa beh chhiùⁿ-koa o-ló Lí ê miâ, kàu éng-oán; Thang ji̍t-ji̍t siā góa ê goān.