1大衛tī兩條溪ê A-lân，以及Só-pa ê A-lân，交戰ê時，Iok-ap tò來tī鹽谷，thâi死Í-tong人一萬兩千，hit時大衛做chit-ê金ê詩，hō͘人學習；交hō͘樂官；調用「做干證ê百合花」。1) 上帝ah，你bat棄sak阮，破壞阮；　　你bat受氣阮，求你hō͘阮koh興起。Tāi-pi̍t tī nn̄g-tiâu khoe ê A-lân, í-ki̍p Só-pa ê A-lân, kau-chiàn ê sî, Iok-ap tò-lâi tī Iâm-kok, thâi-sí Í-tong lâng chi̍t-bān nn̄g-chheng, hit-sî Tāi-pi̍t chòe chit ê kim ê si, hō͘ lâng ha̍k-si̍p; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Siōng-tè ah, Lí bat khì-sak goán, phò-hoāi goán; Lí bat siū-khì goán, kiû Lí hō͘ goán koh heng-khí.

2你hō͘地振動，亦hō͘伊崩裂；　　願你醫好伊ê裂痕；因為地搖動。Lí hō͘ tōe tín-tāng, ia̍h hō͘ i pang-li̍h; Goān Lí i-hó i ê li̍h-hûn; in-ūi tōe iô-tāng.

3你hō͘你ê百姓tú-tio̍h艱難；　　你hō͘阮lim hit-ê hō͘人顛來倒去ê酒。Lí hō͘ Lí ê peh-sìⁿ tú-tio̍h kan-lân; Lí hō͘ goán lim hit ê hō͘ lâng tian-lâi tó-khì ê chiú.

4你用旗賞賜敬畏你ê人，　　Thang為真理kia̍h起來ia̍t。[Sè-la̍h]Lí ēng kî siúⁿ-sù kèng-ùi Lí ê lâng, Thang ūi chin-lí kia̍h--khí-lâi ia̍t. [Sè-la̍h

5求你聽阮，用chiàⁿ手牽救阮，　　Thang hō͘你所疼ê人得tio̍h救。Kiû Lí thiaⁿ goán, ēng chiàⁿ-chhiú khan-kiù goán, Thang hō͘ Lí só͘ thiàⁿ ê lâng tit-tio̍h kiù.

6上帝已經kí伊ê聖潔來講，我beh大悅，　　我beh分開示劍，量So͘-kat ê山谷。Siōng-tè í-keng kí I ê sèng-kiat lâi kóng, Góa beh tāi-ia̍t, Góa beh pun-khui Sī-kiàm, niû So͘-kat ê soaⁿ-kok.

7Ki-lia̍t是我ê，Má-ná-se亦是我ê；　　Í-hoat-liân是我ê頭盔；　　猶大是我ê權柄。Ki-lia̍t sī Góa-ê, Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê koân-pèng.

8Mô͘-ap beh做我ê浴盆；我beh hiat我ê鞋tī Í-tong；　　腓利士地ah，你因為我來大聲hoah。Mô͘-ap beh chòe Góa ê e̍k-phûn; Góa beh hiat Góa ê ôe tī Í-tong; Hui-lī-sū tōe ah, lí in-ūi Góa lâi tōa-siaⁿ hoah.

9Chī-chūi能chhōa我入堅固ê城？　　Chī-chūi chhōa我入Í-tong ê地？Chī-chūi ōe chhōa góa ji̍p kian-kò͘ ê siâⁿ? Chī-chūi chhōa góa ji̍p Í-tong ê tōe?

10上帝ah，你kiám m̄是棄sak阮mah？　　上帝ah，你無kap阮ê軍兵相kap出去。Siōng-tè ah, Lí kiám m̄-sī khì-sak goán mah? Siōng-tè ah, Lí bô kap goán ê kun-peng saⁿ-kap chhut-khì.

11求你幫贊阮攻擊對敵；　　因為人ê拯救是空空。Kiû Lí pang-chān goán kong-kek tùi-te̍k; In-ūi lâng ê chín-kiù sī khang-khang.

12阮óa靠上帝，做成大tāi-chì；　　因為thún踏阮ê對敵ê，就是伊。Goán óa-khò Siōng-tè, chòe-chiâⁿ tōa tāi-chì; In-ūi thún-ta̍h goán ê tùi-te̍k--ê, chiū-sī I.

1大衛ê詩，交hō͘樂官；用絲絃ê樂器。1) 上帝ah，求你聽我ê求叫；　　Àⁿ落聽我ê祈禱。Tāi-pi̍t ê si, kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí thiaⁿ góa ê kiû-kiò; Àⁿ-lo̍h thiaⁿ góa ê kî-tó.

2我ê心失志ê時，就beh tùi地極求叫你；　　求你chhōa我到hit-ê比我khah高ê石磐。Góa ê sim sit-chì ê sî, chiū beh tùi tōe-ke̍k kiû-kiò Lí; Kiû Lí chhōa góa kàu hit-ê pí góa khah-koâiⁿ ê chio̍h-pôaⁿ.

3因為你bat做我逃閃ê所在。　　做我堅固ê台，來脫離對敵。In-ūi Lí bat chòe góa tô-siám ê só͘-chāi. Chòe góa kian-kò͘ ê tâi, lâi thoat-lī tùi-te̍k.

4我beh永遠tòa tī你ê布棚；　　我beh bih tī你翼下隱密ê所在。 [Sè-la̍h]Góa beh éng-oán tòa tī Lí ê pò͘-pîⁿ; Góa beh bih tī Lí si̍t-ē ún-ba̍t ê só͘-chāi. [Sè-la̍h

5上帝ah，我所hē ê願，你有聽見；　　你有將產業賞賜敬畏你ê名ê人。Siōng-tè ah, góa só͘ hē ê goān, Lí ū thiaⁿ-kìⁿ; Lí ū chiong sán-gia̍p siúⁿ-sù kèng-ùi Lí ê miâ ê lâng.

6你beh加添王ê歲壽；　　伊ê年歲beh到代代。Lí beh ke-thiⁿ ông ê hè-siū; I ê nî-hè beh kàu tāi-tāi.

7伊beh永遠坐位tī上帝ê面前；　　願你備辦慈愛kap誠實來保護i。I beh éng-oán chē-ūi tī Siōng-tè ê bīn-chêng; Goān Lí pī-pān chû-ài kap sêng-si̍t lâi pó-hō͘ i.

8Án-ni我beh唱歌o-ló你ê名，到永遠；　　Thang日日謝我ê願。Án-ni góa beh chhiùⁿ-koa o-ló Lí ê miâ, kàu éng-oán; Thang ji̍t-ji̍t siā góa ê goān.

1大衛ê詩，照Iâ-tō͘-tùn ê做法；交hō͘樂官。1) 我ê心靜靜，專務thèng候上帝，　　我ê拯救是tùi祂來。Tāi-pi̍t ê si, chiàu Iâ-tō͘-tùn ê chòe-hoat; kau hō͘ Ga̍k-koaⁿ.1) Góa ê sim chēng-chēng, choan-bū thèng-hāu Siōng-tè, Góa ê chín-kiù sī tùi I lâi.

2獨獨伊是我ê石磐，拯救我ê；　　伊是我ê高台，我bōe大搖動。To̍k-to̍k I sī góa ê chio̍h-pôaⁿ, chín-kiù góa-ê; I sī góa ê koâiⁿ-tâi, góa bōe tōa iô-tāng.

3Lín大家攻擊人，　　將伊毀壞，　　親像毀壞khi斜ê牆，beh倒ê壁，beh到tī時ah？Lín tāi-ke kong-kek lâng, Chiong i húi-hoāi, Chhin-chhiūⁿ húi-hoāi khi-chhiâ ê chhiûⁿ, beh tó ê piah, beh kàu tī-sî ah?

4In相kap計謀專務beh tùi伊尊貴ê位kā伊chhia落去，　　In歡喜白賊；　　In嘴祝福，心咒詛。[Sè-la̍h]In saⁿ-kap kè-bô͘ choan-bū beh tùi i chun-kùi ê ūi kā i chhia--lo̍h-khì, In hoaⁿ-hí pe̍h-chha̍t; In chhùi chiok-hok, sim chiù-chó͘. [Sè-la̍h

5我ê神ah，你tio̍h靜靜，專務thèng候上帝；　　因為我ê ǹg望是tùi伊來。Góa ê sîn ah, lí tio̍h chēng-chēng, choan-bū thèng-hāu Siōng-tè; In-ūi góa ê ǹg-bāng sī tùi I lâi.

6獨獨伊是我ê石磐，是拯救我ê；　　伊是我ê高台，我bōe搖動。To̍k-to̍k I sī góa ê chio̍h-pôaⁿ, sī chín-kiù góa ê; I sī góa ê koâiⁿ-tâi, góa bōe iô-tāng.

7我ê拯救，我ê榮光，在tī上帝；　　我ê氣力ê石磐，我ê閃避ê所在，亦在tī上帝。Góa ê chín-kiù, góa ê êng-kng, chāi-tī Siōng-tè; Góa ê khùi-la̍t ê chio̍h-pôaⁿ, góa ê siám-pī ê só͘-chāi, ia̍h chāi-tī Siōng-tè.

8Lín眾百姓，tio̍h時時óa靠伊；　　Tī伊ê面前piàⁿ出lín ê心；　　上帝是咱逃閃ê所在。[Sè-la̍h]Lín chèng peh-sìⁿ, tio̍h sî-sî óa-khò I; Tī I ê bīn-chêng piàⁿ-chhut lín ê sim; Siōng-tè sī lán tô-siám ê só͘-chāi. [Sè-la̍h

9卑微ê人真正是空虛，尊貴ê人也是虛假；　　Hē tī天秤碗，的確浮起來，　　In一概比呼吸ê氣khah輕。Pi-bî ê lâng chin-chiàⁿ sī khang-hu, chun-kùi ê lâng iā sī hu-ké; Hē tī thian-phêng-óaⁿ, tek-khak phû--khí-lâi, In it-khài pí ho͘-khip ê khì khah-khin.

10M̄-thang óa靠暴虐；　　M̄-thang因為搶the̍h來驕傲；　　若財寶加添，m̄-thang注意tī-hia。M̄-thang óa-khò pō-gio̍k; M̄-thang in-ūi chhiúⁿ-the̍h lâi kiau-ngō͘; Nā châi-pó ke-thiⁿ, m̄-thang chù-ì tī-hia.

11上帝講一pái，　　我有聽見兩項；　　就是權能屬tī上帝。Siōng-tè kóng chi̍t-pái, Góa ū thiaⁿ-kìⁿ nn̄g-hāng; Chiū-sī koân-lêng sio̍k tī Siōng-tè.

12主ah，慈愛亦是屬tī你；　　因為你照ta̍k人ê所行來報應伊。Chú ah, chû-ài ia̍h sī sio̍k tī Lí; In-ūi Lí chiàu ta̍k-lâng ê só͘-kiâⁿ lâi pò-èng i.