1大衛tī猶大曠野ê時做chit首詩。1) 上帝ah，你是我ê上帝；　　我趁早beh chhē你。　　Tī炕旱，困苦，無水ê地，　　我ê心嘴乾siàu念你，我ê肉體切切欣慕你。Tāi-pi̍t tī Iû-tāi khòng-iá ê sî chòe chit siú si.1) Siōng-tè ah, Lí sī góa ê Siōng-tè; góa thàn-chá beh chhē Lí. Tī khòng-hān, khùn-khó͘, bô chúi ê tōe, Góa ê sim chhùi-ta siàu-liām Lí, góa ê jio̍k-thé chhiat-chhiat him-bō͘ Lí.

2我bat án-ni tī聖所朝見你，　　為tio̍h ài看你ê權能kap你ê榮光。Góa bat án-ni tī sèng-só͘ tiâu-kìⁿ Lí, Ūi-tio̍h ài khòaⁿ Lí ê koân-lêng kap Lí ê êng-kng.

3因為你ê慈愛比性命khah好，　　我ê嘴唇beh o-ló你。In-ūi Lí ê chû-ài pí sìⁿ-miā khah-hó, Góa ê chhùi-tûn beh o-ló Lí.

4我iáu活ê時，beh án-ni o-ló你；　　我beh奉你ê名，kia̍h起我ê手。Góa iáu-oa̍h ê sî, beh án-ni o-ló Lí; Góa beh hōng Lí ê miâ, kia̍h-khí góa ê chhiú.

5我ê心神beh飽足，親像食骨髓油膩；　　我亦beh用歡喜ê嘴唇o-ló你；Góa ê sim-sîn beh pá-chiok chhin-chhiūⁿ chia̍h kut-chhé iû-jī; Góa ia̍h beh ēng hoaⁿ-hí ê chhùi-tûn o-ló Lí;

6就是我倒tī眠床記念你，　　Tī暝間ta̍k更siàu念你ê時。Chiū-sī góa tó tī bîn-chhn̂g kì-liām Lí, Tī mî-kan ta̍k-kiⁿ siàu-liām Lí ê sî.

7因為你bat幫贊我，　　我tiàm tī你翼股ê致蔭下beh歡喜出聲。In-ūi Lí bat pang-chān góa, Góa tiàm tī Lí si̍t-kó͘ ê tì-ìm-ē beh hoaⁿ-hí chhut-siaⁿ.

8我ê心tè你tiâu-tiâu；　　你ê chiàⁿ手扶持我。Góa ê sim tè Lí tiâu-tiâu; Lí ê chiàⁿ-chhiú hû-chhî góa.

9獨獨hiah-ê siàu想beh滅我ê性命ê人，　　伊beh陷落tī地下深ê所在。To̍k-to̍k hiah ê siàu-siūⁿ beh bia̍t góa ê sìⁿ-miā ê lâng, I beh hām-lo̍h tī tōe-ē chhim ê só͘-chāi.

10In beh hō͘刀劍thâi；　　In beh hō͘山狗食。In beh hō͘ to-kiàm thâi; In beh hō͘ soaⁿ-káu chia̍h.

11總是王beh因為上帝來歡喜；　　凡若kí伊來chiù-chōa-ê teh-beh誇口；　　因為白賊人ê嘴beh受塞密。Chóng-sī ông beh in-ūi Siōng-tè lâi hoaⁿ-hí; Hoān-nā kí I lâi chiù-chōa--ê teh-beh khoa-kháu; In-ūi pe̍h-chha̍t lâng ê chhùi beh siū that-ba̍t.

1大衛ê詩，交hō͘樂官。1) 上帝ah，我哀傷ê時，求你聽我ê聲；　　求你保護我ê活命免驚對敵。Tāi-pi̍t ê si, kau hō͘ Ga̍k-koaⁿ.1) Siōng-tè ah, góa ai-siong ê sî, kiû Lí thiaⁿ góa ê siaⁿ; Kiû Lí pó-hō͘ góa ê oa̍h-miā bián kiaⁿ tùi-te̍k.

2求你將我khǹg密，hō͘我脫離做pháiⁿ ê人暗靜ê計謀，　　Kap行不義ê人ê擾亂。Kiû Lí chiong góa khǹg-ba̍t, hō͘ góa thoat-lī chòe-pháiⁿ ê lâng àm-chīⁿ ê kè-bô͘, Kap kiâⁿ put-gī ê lâng ê jiáu-loān.

3In磨in ê舌親像刀；　　In比準in ê箭，就是惡毒ê話。In bôa in ê chi̍h chhin-chhiūⁿ to; In pí-chún in ê chìⁿ, chiū-sī ok-to̍k ê ōe.

4Beh tī暗靜ê所在射完全ê人；　　In忽然射tio̍h伊，亦m̄驚。Beh tī àm-chīⁿ ê só͘-chāi siā oân-choân ê lâng; In hut-jiân siā-tio̍h i, ia̍h m̄-kiaⁿ.

5In相勉勵設pháiⁿ計謀；　　In參詳暗靜張羅網；　　講，Chī-chūi能看見in？In saⁿ bián-lē siat pháiⁿ kè-bô͘; In chham-siông àm-chīⁿ tiuⁿ lô-bāng; Kóng, Chī-chūi ōe khòaⁿ-kìⁿ in?

6In圖謀pháiⁿ-tāi，講，阮盡力圖謀已經有tú好ê計謀；　　In ta̍k人ê念頭kap心思不止深。In tô͘-bô͘ pháiⁿ-tāi, kóng, Goán chīn-la̍t tô͘-bô͘ í-keng ū tú-hó ê kè-bô͘; In ta̍k-lâng ê liām-thâu kap sim-su put-chí chhim.

7總是上帝beh用箭射in；　　In忽然tio̍h傷。Chóng-sī Siōng-tè beh ēng chìⁿ siā in; In hut-jiân tio̍h-siong.

8In beh tio̍h-tak，in ê舌會害in本身；　　凡若看見in ê，lóng beh搖頭。In beh tio̍h-tak, in ê chi̍h ōe hāi in pún-sin; Hoān-nā khòaⁿ-kìⁿ in ê , lóng beh iô-thâu.

9眾人lóng beh驚惶，　　Beh報揚上帝所做ê，　　Koh詳細想伊ê所行。Chèng-lâng lóng beh kiaⁿ-hiâⁿ, Beh pò-iông Siōng-tè só͘ chòe--ê, Koh siông-sè siūⁿ I ê só͘-kiâⁿ.

10義人beh因為耶和華來歡喜，亦beh óa靠伊；　　凡若心正直ê人，lóng beh誇口。Gī-lâng beh in-ūi Iâ-hô-hoa lâi hoaⁿ-hí, ia̍h beh óa-khò I; Hoān-nā sim chèng-ti̍t ê lâng, lóng beh khoa-kháu.

1大衛ê詩歌，交hō͘樂官。1) 上帝ah，tī錫安有人o-ló teh thèng候你；　　亦beh對你謝所hē ê願。Tāi-pi̍t ê si-koa, kau hō͘ Ga̍k-koaⁿ.1) Siōng-tè ah, tī Sek-an ū lâng o-ló teh thèng-hāu Lí; Ia̍h beh tùi Lí siā só͘ hē ê goān.

2聽人祈禱ê主ah，　　見有血氣ê lóng beh就近你。Thiaⁿ lâng kî-tó ê Chú ah, Kìⁿ ū hiat-khì-ê lóng beh chiū-kūn Lí.

3罪惡khah贏我；　　論到阮ê過失，你lóng beh赦免。Chōe-ok khah-iâⁿ góa; Lūn-kàu goán ê kè-sit, Lí lóng beh sià-bián.

4你所揀選，hō͘伊親近你，　　Tiàm tī你ê院內ê，chit號人有福氣；　　阮beh因為你ê厝，你ê聖殿ê福氣，　　來心滿意足。Lí só͘ kéng-soán, hō͘ i chhin-kūn Lí, Tiàm tī Lí ê īⁿ-lāi--ê, chit-hō lâng ū hok-khì; Goán beh in-ūi Lí ê chhù, Lí ê sèng-tiān ê hok-khì, Lâi sim-móa ì-chiok.

5救阮ê上帝ah，　　你beh用威嚴，秉公義來應阮；　　你是地極kap海面遠遠ê人，　　Lóng總所óa靠ê。Kiù goán ê Siōng-tè ah, Lí beh ēng ui-giâm, péng kong-gī lâi ìn goán; Lí sī tōe-ke̍k kap hái-bīn hn̄g-hn̄g ê lâng, Lóng-chóng só͘ óa-khò--ê.

6伊已經用大權能hâ腰；　　就用伊ê氣力安定chiah-ê山。I í-keng ēng tōa koân-lêng hâ-io; Chiū ēng I ê khùi-la̍t an-tiāⁿ chiah ê soaⁿ.

7Chiah-ê海hōa-hōa哮，kap其中海湧hōa-hōa哮，　　以及萬百姓ê 喧嘩，伊hō͘ in平靜。Chiah ê hái hōa-hōa-háu, kap kî-tiong hái-éng hōa-hōa-háu, Í-ki̍p bān peh-sìⁿ ê soan-hoa, I hō͘ in pêng-chēng.

8Khiā起地極ê人因為你ê神跡來驚惶；　　日出日落ê所在，你hō͘ in lóng歡喜。Khiā-khí tōe-ke̍k ê lâng in-ūi Lí ê sîn-jiah lâi kiaⁿ-hiâⁿ; Ji̍t-chhut ji̍t-lo̍h ê só͘-chāi, Lí hō͘ in lóng hoaⁿ-hí.

9你眷顧土地，落雨灌ak伊，hō͘伊真肥；　　上帝ê河，伊ê水滿滿；　　你án-ni備辦土地，就是替人備辦五穀。Lí koàn-kò͘ thó͘-tōe, lo̍h hō͘ koàn-ak i, hō͘ i chin-pûi; Siōng-tè ê hô, i ê chúi móa-móa; Lí án-ni pī-pān thó͘-tōe, chiū-sī thòe lâng pī-pān gō͘-kak.

10你灌ak田園，滿伊ê溝，修平伊ê稜；　　落好ê雨水，hō͘土地軟軟；　　其中所發生ê得tio̍h你賜福。Lí koàn-ak chhân-hn̂g, móa i ê kau, siu pîⁿ i ê lêng; Lo̍h hó ê hō͘-chúi, hō͘ thó͘-tōe nńg-nńg; Kî-tiong só͘ hoat-siⁿ--ê tit-tio̍h Lí sù-hok.

11你用你ê恩典做年冬ê冕旒，　　你ê路徑lóng有油teh滴。Lí ēng Lí ê un-tián chòe nî-tang ê bián-liû, Lí ê lō͘-kèng lóng ū iû teh tih.

12滴tī曠野ê草埔；　　山頭用歡喜做帶來hâ。Tih tī khòng-iá ê chháu-po͘; Soaⁿ-thâu ēng hoaⁿ-hí chòe-tòa lâi hâ.

13草埔用羊群做衫來穿；　　山谷用五穀做moa來蓋；　　In lóng歡喜出聲，來吟詩。Chháu-po͘ ēng iûⁿ-kûn chòe saⁿ lâi chhēng; Soaⁿ-kok ēng gō͘-kak chòe moa lâi khàm; In lóng hoaⁿ-hí chhut-siaⁿ, lâi gîm-si.