1大衛ê詩，交hō͘樂官。1) 上帝ah，我哀傷ê時，求你聽我ê聲；　　求你保護我ê活命免驚對敵。Tāi-pi̍t ê si, kau hō͘ Ga̍k-koaⁿ.1) Siōng-tè ah, góa ai-siong ê sî, kiû Lí thiaⁿ góa ê siaⁿ; Kiû Lí pó-hō͘ góa ê oa̍h-miā bián kiaⁿ tùi-te̍k.

2求你將我khǹg密，hō͘我脫離做pháiⁿ ê人暗靜ê計謀，　　Kap行不義ê人ê擾亂。Kiû Lí chiong góa khǹg-ba̍t, hō͘ góa thoat-lī chòe-pháiⁿ ê lâng àm-chīⁿ ê kè-bô͘, Kap kiâⁿ put-gī ê lâng ê jiáu-loān.

3In磨in ê舌親像刀；　　In比準in ê箭，就是惡毒ê話。In bôa in ê chi̍h chhin-chhiūⁿ to; In pí-chún in ê chìⁿ, chiū-sī ok-to̍k ê ōe.

4Beh tī暗靜ê所在射完全ê人；　　In忽然射tio̍h伊，亦m̄驚。Beh tī àm-chīⁿ ê só͘-chāi siā oân-choân ê lâng; In hut-jiân siā-tio̍h i, ia̍h m̄-kiaⁿ.

5In相勉勵設pháiⁿ計謀；　　In參詳暗靜張羅網；　　講，Chī-chūi能看見in？In saⁿ bián-lē siat pháiⁿ kè-bô͘; In chham-siông àm-chīⁿ tiuⁿ lô-bāng; Kóng, Chī-chūi ōe khòaⁿ-kìⁿ in?

6In圖謀pháiⁿ-tāi，講，阮盡力圖謀已經有tú好ê計謀；　　In ta̍k人ê念頭kap心思不止深。In tô͘-bô͘ pháiⁿ-tāi, kóng, Goán chīn-la̍t tô͘-bô͘ í-keng ū tú-hó ê kè-bô͘; In ta̍k-lâng ê liām-thâu kap sim-su put-chí chhim.

7總是上帝beh用箭射in；　　In忽然tio̍h傷。Chóng-sī Siōng-tè beh ēng chìⁿ siā in; In hut-jiân tio̍h-siong.

8In beh tio̍h-tak，in ê舌會害in本身；　　凡若看見in ê，lóng beh搖頭。In beh tio̍h-tak, in ê chi̍h ōe hāi in pún-sin; Hoān-nā khòaⁿ-kìⁿ in ê , lóng beh iô-thâu.

9眾人lóng beh驚惶，　　Beh報揚上帝所做ê，　　Koh詳細想伊ê所行。Chèng-lâng lóng beh kiaⁿ-hiâⁿ, Beh pò-iông Siōng-tè só͘ chòe--ê, Koh siông-sè siūⁿ I ê só͘-kiâⁿ.

10義人beh因為耶和華來歡喜，亦beh óa靠伊；　　凡若心正直ê人，lóng beh誇口。Gī-lâng beh in-ūi Iâ-hô-hoa lâi hoaⁿ-hí, ia̍h beh óa-khò I; Hoān-nā sim chèng-ti̍t ê lâng, lóng beh khoa-kháu.

1大衛ê詩歌，交hō͘樂官。1) 上帝ah，tī錫安有人o-ló teh thèng候你；　　亦beh對你謝所hē ê願。Tāi-pi̍t ê si-koa, kau hō͘ Ga̍k-koaⁿ.1) Siōng-tè ah, tī Sek-an ū lâng o-ló teh thèng-hāu Lí; Ia̍h beh tùi Lí siā só͘ hē ê goān.

2聽人祈禱ê主ah，　　見有血氣ê lóng beh就近你。Thiaⁿ lâng kî-tó ê Chú ah, Kìⁿ ū hiat-khì-ê lóng beh chiū-kūn Lí.

3罪惡khah贏我；　　論到阮ê過失，你lóng beh赦免。Chōe-ok khah-iâⁿ góa; Lūn-kàu goán ê kè-sit, Lí lóng beh sià-bián.

4你所揀選，hō͘伊親近你，　　Tiàm tī你ê院內ê，chit號人有福氣；　　阮beh因為你ê厝，你ê聖殿ê福氣，　　來心滿意足。Lí só͘ kéng-soán, hō͘ i chhin-kūn Lí, Tiàm tī Lí ê īⁿ-lāi--ê, chit-hō lâng ū hok-khì; Goán beh in-ūi Lí ê chhù, Lí ê sèng-tiān ê hok-khì, Lâi sim-móa ì-chiok.

5救阮ê上帝ah，　　你beh用威嚴，秉公義來應阮；　　你是地極kap海面遠遠ê人，　　Lóng總所óa靠ê。Kiù goán ê Siōng-tè ah, Lí beh ēng ui-giâm, péng kong-gī lâi ìn goán; Lí sī tōe-ke̍k kap hái-bīn hn̄g-hn̄g ê lâng, Lóng-chóng só͘ óa-khò--ê.

6伊已經用大權能hâ腰；　　就用伊ê氣力安定chiah-ê山。I í-keng ēng tōa koân-lêng hâ-io; Chiū ēng I ê khùi-la̍t an-tiāⁿ chiah ê soaⁿ.

7Chiah-ê海hōa-hōa哮，kap其中海湧hōa-hōa哮，　　以及萬百姓ê 喧嘩，伊hō͘ in平靜。Chiah ê hái hōa-hōa-háu, kap kî-tiong hái-éng hōa-hōa-háu, Í-ki̍p bān peh-sìⁿ ê soan-hoa, I hō͘ in pêng-chēng.

8Khiā起地極ê人因為你ê神跡來驚惶；　　日出日落ê所在，你hō͘ in lóng歡喜。Khiā-khí tōe-ke̍k ê lâng in-ūi Lí ê sîn-jiah lâi kiaⁿ-hiâⁿ; Ji̍t-chhut ji̍t-lo̍h ê só͘-chāi, Lí hō͘ in lóng hoaⁿ-hí.

9你眷顧土地，落雨灌ak伊，hō͘伊真肥；　　上帝ê河，伊ê水滿滿；　　你án-ni備辦土地，就是替人備辦五穀。Lí koàn-kò͘ thó͘-tōe, lo̍h hō͘ koàn-ak i, hō͘ i chin-pûi; Siōng-tè ê hô, i ê chúi móa-móa; Lí án-ni pī-pān thó͘-tōe, chiū-sī thòe lâng pī-pān gō͘-kak.

10你灌ak田園，滿伊ê溝，修平伊ê稜；　　落好ê雨水，hō͘土地軟軟；　　其中所發生ê得tio̍h你賜福。Lí koàn-ak chhân-hn̂g, móa i ê kau, siu pîⁿ i ê lêng; Lo̍h hó ê hō͘-chúi, hō͘ thó͘-tōe nńg-nńg; Kî-tiong só͘ hoat-siⁿ--ê tit-tio̍h Lí sù-hok.

11你用你ê恩典做年冬ê冕旒，　　你ê路徑lóng有油teh滴。Lí ēng Lí ê un-tián chòe nî-tang ê bián-liû, Lí ê lō͘-kèng lóng ū iû teh tih.

12滴tī曠野ê草埔；　　山頭用歡喜做帶來hâ。Tih tī khòng-iá ê chháu-po͘; Soaⁿ-thâu ēng hoaⁿ-hí chòe-tòa lâi hâ.

13草埔用羊群做衫來穿；　　山谷用五穀做moa來蓋；　　In lóng歡喜出聲，來吟詩。Chháu-po͘ ēng iûⁿ-kûn chòe saⁿ lâi chhēng; Soaⁿ-kok ēng gō͘-kak chòe moa lâi khàm; In lóng hoaⁿ-hí chhut-siaⁿ, lâi gîm-si.

1（一篇詩歌，交hō͘樂官。1) 全地lóng tio̍h tùi上帝來出歡喜ê聲；Chi̍t phiⁿ si-koa, kau hō͘ Ga̍k-koaⁿ.1) Choân-tōe lóng tio̍h tùi Siōng-tè lâi chhut hoaⁿ-hí ê siaⁿ;

2唱歌o-ló伊ê名ê榮光；　　用o-ló ê話來顯明伊ê榮光。Chhiùⁿ-koa o-ló I ê miâ ê êng-kng; Ēng o-ló ê ōe lâi hián-bêng I ê êng-kng.

3Tio̍h對上帝講，你ê所做到hiah thang驚！　　因為你ê大權能，你ê對敵beh降服你。Tio̍h tùi Siōng-tè kóng, Lí ê só͘-chòe kàu hiah thang kiaⁿ! In-ūi Lí ê tōa koân-lêng, Lí ê tùi-te̍k beh hâng-ho̍k Lí.

4全地beh敬拜你，　　吟詩o-ló你；　　Beh吟詩o-ló你ê名。[Sè-la̍h]Choân-tōe beh kèng-pài Lí, Gîm-si o-ló Lí; Beh gîm-si o-ló Lí ê miâ. [Sè-la̍h

5Lín tio̍h來，來看上帝所行ê事，　　伊對世間人所做ê，不止thang驚。Lín tio̍h lâi, lâi khòaⁿ Siōng-tè só͘-kiâⁿ ê sū, I tùi sè-kan-lâng só͘-chòe--ê, put-chí thang kiaⁿ.

6伊將海變做乾地；　　In步行過河；　　Tī-hia阮因為伊來歡喜。I chiong hái piàn-chòe ta-tōe; In pō͘-kiâⁿ kè-hô; Tī-hia goán in-ūi I lâi hoaⁿ-hí.

7伊用伊ê權治理，直到永遠；　　伊ê目睭鑑察列邦；　　悖逆ê人m̄-thang自高。[Sè-la̍h]I ēng I ê koân tī-lí, ti̍t kàu éng-oán; I ê ba̍k-chiu kàm-chhat lia̍t-pang; Pōe-ge̍k ê lâng m̄-thang chū-ko. [Sè-la̍h

8萬百姓ah，lín tio̍h o-ló阮ê上帝；　　Hō͘人聽見o-ló伊ê聲。Bān peh-sìⁿ ah, lín tio̍h o-ló goán ê Siōng-tè; Hō͘ lâng thiaⁿ-kìⁿ o-ló I ê siaⁿ.

9伊hō͘阮ê性命活teh；　　亦無hō͘阮ê腳搖動。I hō͘ goán ê sìⁿ-miā oa̍h-teh; Ia̍h bô hō͘ goán ê kha iô-tāng.

10上帝ah，你bat試驗阮；　　鍛鍊阮親像鍛鍊銀一樣。Siōng-tè ah, Lí bat chhì-giām goán; Thoàn-liān goán chhin-chhiūⁿ thoàn-liān gûn chi̍t-iūⁿ.

11你hō͘阮入羅網；　　用重擔hē tī阮ê身上。Lí hō͘ goán ji̍p lô-bāng; Ēng tāng-tàⁿ hē tī goán ê sin-chiūⁿ.

12你hō͘人坐車，pôaⁿ過阮ê頭殼；　　阮經過水火。　　總是你hō͘阮到富有ê所在。Lí hō͘ lâng chē-chhia, pôaⁿ-kè goán ê thâu-khak; Goán keng-kè chúi-hé. Chóng-sī Lí hō͘ goán kàu pù-ū ê só͘-chāi.

13我beh用燒祭進入祢ê厝；　　我beh對祢謝我ê願，Góa beh ēng sio-chè chìn-ji̍p Lí ê chhù; Góa beh tùi Lí siā góa ê goān,

14就是tī我患難ê時，我ê嘴唇所講ê，　　我ê嘴所hē ê願。Chiū-sī tī góa hoān-lān ê sî, góa ê chhùi-tûn só͘ kóng--ê, Góa ê chhùi só͘ hē ê goān.

15我beh用肥ê cheng-siⁿ ê燒祭，　　Kap kang-羊 ê芳味，獻hō͘你；　　Koh用公ê牛，公ê山羊，來獻。[Sè-la̍h]Góa beh ēng pûi ê cheng-siⁿ ê sio-chè, Kap kang-iûⁿ ê phang-bī, hiàn hō͘ Lí; Koh ēng kang ê gû, kang ê soaⁿ-iûⁿ, lâi hiàn. [Sè-la̍h

16凡若敬畏上帝ê人，lín lóng tio̍h來聽；　　我beh講起伊為我所行ê事。Hoān-nā kèng-ùi Siōng-tè ê lâng, lín lóng tio̍h lâi thiaⁿ; Góa beh kóng-khí I ūi góa só͘ kiâⁿ ê sū.

17我bat用我ê嘴求叫伊；　　用我ê舌o-ló伊做高。Góa bat ēng góa ê chhùi kiû-kiò I; Ēng góa ê chi̍h o-ló I chòe koâiⁿ.

18我若心內注重罪惡，　　主的確無beh聽；Góa nā sim-lāi chù-tiōng chōe-ok, Chú tek-khak bô beh thiaⁿ;

19總是上帝實在有聽見；　　已經àⁿ落聽我祈禱ê聲。Chóng-sī Siōng-tè si̍t-chāi ū thiaⁿ-kìⁿ; Í-keng àⁿ-lo̍h thiaⁿ góa kî-tó ê siaⁿ.

20上帝是應該o-ló-ê，　　伊bē-bat推辭我ê祈禱，亦bē-bat hō͘伊ê慈愛離開我。Siōng-tè sī eng-kai o-ló--ê, I bē-bat the-sî góa ê kî-tó, ia̍h bē-bat hō͘ I ê chû-ài lī-khui góa.