1（一篇詩歌，交hō͘樂官。1) 全地lóng tio̍h tùi上帝來出歡喜ê聲；Chi̍t phiⁿ si-koa, kau hō͘ Ga̍k-koaⁿ.1) Choân-tōe lóng tio̍h tùi Siōng-tè lâi chhut hoaⁿ-hí ê siaⁿ;

2唱歌o-ló伊ê名ê榮光；　　用o-ló ê話來顯明伊ê榮光。Chhiùⁿ-koa o-ló I ê miâ ê êng-kng; Ēng o-ló ê ōe lâi hián-bêng I ê êng-kng.

3Tio̍h對上帝講，你ê所做到hiah thang驚！　　因為你ê大權能，你ê對敵beh降服你。Tio̍h tùi Siōng-tè kóng, Lí ê só͘-chòe kàu hiah thang kiaⁿ! In-ūi Lí ê tōa koân-lêng, Lí ê tùi-te̍k beh hâng-ho̍k Lí.

4全地beh敬拜你，　　吟詩o-ló你；　　Beh吟詩o-ló你ê名。[Sè-la̍h]Choân-tōe beh kèng-pài Lí, Gîm-si o-ló Lí; Beh gîm-si o-ló Lí ê miâ. [Sè-la̍h

5Lín tio̍h來，來看上帝所行ê事，　　伊對世間人所做ê，不止thang驚。Lín tio̍h lâi, lâi khòaⁿ Siōng-tè só͘-kiâⁿ ê sū, I tùi sè-kan-lâng só͘-chòe--ê, put-chí thang kiaⁿ.

6伊將海變做乾地；　　In步行過河；　　Tī-hia阮因為伊來歡喜。I chiong hái piàn-chòe ta-tōe; In pō͘-kiâⁿ kè-hô; Tī-hia goán in-ūi I lâi hoaⁿ-hí.

7伊用伊ê權治理，直到永遠；　　伊ê目睭鑑察列邦；　　悖逆ê人m̄-thang自高。[Sè-la̍h]I ēng I ê koân tī-lí, ti̍t kàu éng-oán; I ê ba̍k-chiu kàm-chhat lia̍t-pang; Pōe-ge̍k ê lâng m̄-thang chū-ko. [Sè-la̍h

8萬百姓ah，lín tio̍h o-ló阮ê上帝；　　Hō͘人聽見o-ló伊ê聲。Bān peh-sìⁿ ah, lín tio̍h o-ló goán ê Siōng-tè; Hō͘ lâng thiaⁿ-kìⁿ o-ló I ê siaⁿ.

9伊hō͘阮ê性命活teh；　　亦無hō͘阮ê腳搖動。I hō͘ goán ê sìⁿ-miā oa̍h-teh; Ia̍h bô hō͘ goán ê kha iô-tāng.

10上帝ah，你bat試驗阮；　　鍛鍊阮親像鍛鍊銀一樣。Siōng-tè ah, Lí bat chhì-giām goán; Thoàn-liān goán chhin-chhiūⁿ thoàn-liān gûn chi̍t-iūⁿ.

11你hō͘阮入羅網；　　用重擔hē tī阮ê身上。Lí hō͘ goán ji̍p lô-bāng; Ēng tāng-tàⁿ hē tī goán ê sin-chiūⁿ.

12你hō͘人坐車，pôaⁿ過阮ê頭殼；　　阮經過水火。　　總是你hō͘阮到富有ê所在。Lí hō͘ lâng chē-chhia, pôaⁿ-kè goán ê thâu-khak; Goán keng-kè chúi-hé. Chóng-sī Lí hō͘ goán kàu pù-ū ê só͘-chāi.

13我beh用燒祭進入祢ê厝；　　我beh對祢謝我ê願，Góa beh ēng sio-chè chìn-ji̍p Lí ê chhù; Góa beh tùi Lí siā góa ê goān,

14就是tī我患難ê時，我ê嘴唇所講ê，　　我ê嘴所hē ê願。Chiū-sī tī góa hoān-lān ê sî, góa ê chhùi-tûn só͘ kóng--ê, Góa ê chhùi só͘ hē ê goān.

15我beh用肥ê cheng-siⁿ ê燒祭，　　Kap kang-羊 ê芳味，獻hō͘你；　　Koh用公ê牛，公ê山羊，來獻。[Sè-la̍h]Góa beh ēng pûi ê cheng-siⁿ ê sio-chè, Kap kang-iûⁿ ê phang-bī, hiàn hō͘ Lí; Koh ēng kang ê gû, kang ê soaⁿ-iûⁿ, lâi hiàn. [Sè-la̍h

16凡若敬畏上帝ê人，lín lóng tio̍h來聽；　　我beh講起伊為我所行ê事。Hoān-nā kèng-ùi Siōng-tè ê lâng, lín lóng tio̍h lâi thiaⁿ; Góa beh kóng-khí I ūi góa só͘ kiâⁿ ê sū.

17我bat用我ê嘴求叫伊；　　用我ê舌o-ló伊做高。Góa bat ēng góa ê chhùi kiû-kiò I; Ēng góa ê chi̍h o-ló I chòe koâiⁿ.

18我若心內注重罪惡，　　主的確無beh聽；Góa nā sim-lāi chù-tiōng chōe-ok, Chú tek-khak bô beh thiaⁿ;

19總是上帝實在有聽見；　　已經àⁿ落聽我祈禱ê聲。Chóng-sī Siōng-tè si̍t-chāi ū thiaⁿ-kìⁿ; Í-keng àⁿ-lo̍h thiaⁿ góa kî-tó ê siaⁿ.

20上帝是應該o-ló-ê，　　伊bē-bat推辭我ê祈禱，亦bē-bat hō͘伊ê慈愛離開我。Siōng-tè sī eng-kai o-ló--ê, I bē-bat the-sî góa ê kî-tó, ia̍h bē-bat hō͘ I ê chû-ài lī-khui góa.

1一篇詩歌，交hō͘樂官；用絲絃ê樂器。1) 願上帝憐憫阮，賜福阮；　　Hō͘伊ê面照光阮；[Sè-la̍h]Chi̍t phiⁿ si-koa, kau hō͘ Ga̍k-koaⁿ; ēng si-hiân ê ga̍k-khì.1) Goān Siōng-tè lîn-bín goán, sù-hok goán; Hō͘ I ê bīn chiò-kng goán; [Sè-la̍h

2Thang hō͘世界知你ê道路，　　萬國中知你ê救恩。Thang hō͘ sè-kài chai Lí ê tō-lō͘, Bān-kok-tiong chai Lí ê kiù-un.

3上帝ah，願列邦o-ló你；　　願列邦lóng o-ló你。Siōng-tè ah, goān lia̍t-pang o-ló Lí; Goān lia̍t-pang lóng o-ló Lí.

4願萬國快樂，出歡喜ê聲；　　因為你beh照公道審判列邦；　　治理地上ê萬國。[Sè-la̍h]Goān bān-kok khoài-lo̍k, chhut hoaⁿ-hí ê siaⁿ; In-ūi Lí beh chiàu kong-tō sím-phòaⁿ lia̍t-pang; Tī-lí tōe-chiūⁿ ê bān-kok. [Sè-la̍h

5上帝ah，願列邦o-ló你；　　願列邦lóng o-ló你。Siōng-tè ah, goān lia̍t-pang o-ló Lí; Goān lia̍t-pang lóng o-ló Lí.

6地已經出土產，　　上帝，就是阮ê上帝，beh賜福阮。Tōe í-keng chhut thó͘-sán, Siōng-tè, chiū-sī goán ê Siōng-tè, beh sù-hok goán.

7上帝beh賜福阮；　　地ê四極lóng beh敬畏伊。Siōng-tè beh sù-hok goán; Tōe ê sì-ke̍k lóng beh kèng-ùi I.

1大衛ê詩歌；交hō͘樂官。1) 願上帝起來，hō͘伊ê對敵四散；　　Hō͘怨恨伊ê人，tùi伊ê面前逃走。Tāi-pi̍t ê si-koa; kau hō͘ Ga̍k-koaⁿ.1) Goān Siōng-tè khí--lâi, hō͘ I ê tùi-te̍k sì-sòaⁿ; Hō͘ oàn-hūn I ê lâng, tùi I ê bīn-chêng tô-cháu.

2你kā in趕散，親像煙受吹散；　　Pháiⁿ人見tio̍h上帝ê面就消滅；　　親像蠟見tio̍h火就熔去。Lí kā in kóaⁿ-sòaⁿ, chhin-chhiūⁿ ian siū chhe-sòaⁿ; Pháiⁿ-lâng kìⁿ-tio̍h Siōng-tè ê bīn chiū siau-bia̍t; Chhin-chhiūⁿ la̍h kìⁿ-tio̍h hé chiū iûⁿ--khì.

3總是義人beh歡喜，in tī上帝ê面前beh快樂；　　In亦beh歡歡喜喜。Chóng-sī gī-lâng beh hoaⁿ-hí, in tī Siōng-tè ê bīn-chêng beh khoài-lo̍k; In ia̍h beh hoaⁿ-hoaⁿ hí-hí.

4Lín tio̍h對上帝吟詩，唱歌o-ló伊ê名；　　為tio̍h hit-ê坐車經過曠野ê，修造大路；　　伊ê名是耶和華。　　Tio̍h tī伊ê面前快樂。Lín tio̍h tùi Siōng-tè gîm-si, chhiùⁿ-koa o-ló I ê miâ; Ūi-tio̍h hit ê chē-chhia keng-kè khòng-iá--ê, siu-chō tōa-lō͘; I ê miâ sī Iâ-hô-hoa. Tio̍h tī I ê bīn-chêng khoài-lo̍k.

5上帝tī伊聖ê所在，做孤兒ê父；　　做寡婦ê伸冤ê。Siōng-tè tī I sèng ê só͘-chāi, chòe ko͘-jî ê pē; chòe kóaⁿ-hū ê sin-oan--ê.

6上帝hō͘孤單ê人有家；　　Hō͘受關監ê人出來享福；　　獨獨悖逆ê人tiàm tī乾燥ê地。Siōng-tè hō͘ ko͘-toaⁿ ê lâng ū ke; Hō͘ siū koaiⁿ-kaⁿ ê lâng chhut-lâi hióng-hok; To̍k-to̍k pōe-ge̍k ê lâng tiàm tī ta-sò ê tōe.

7上帝ah，早你行tī百姓ê頭前，　　經過曠野；[Sè-la̍h]Siōng-tè ah, chá Lí kiâⁿ tī peh-sìⁿ ê thâu-chêng, Keng-kè khòng-iá; [Sè-la̍h

8Hit時地見tio̍h上帝ê面就振動，　　天亦落雨；　　Hit-ê西奈也振動，是見tio̍h上帝，以色列ê上帝ê面。Hit-sî tōe kìⁿ-tio̍h Siōng-tè ê bīn chiū tín-tāng, Thiⁿ ia̍h lo̍h hō͘; Hit ê Se-nái iā tín-tāng, sī kìⁿ-tio̍h Siōng-tè, Í-sek-lia̍t ê Siōng-tè ê bīn.

9上帝ah，你落大雨，　　你ê產業以色列厭倦ê時，你hō͘伊堅固。Siōng-tè--ah, Lí lo̍h tōa hō͘, Lí ê sán-gia̍p Í-sek-lia̍t ià-siān ê sî, Lí hō͘ i kian-kò͘.

10你ê會眾tiàm tī hit中間；　　上帝ah，你為tio̍h sòng-hiong人備辦恩惠。Lí ê hōe-chiòng tiàm tī hit tiong-kan; Siōng-tè ah, Lí ūi-tio̍h sòng-hiong lâng pī-pān un-hūi.

11主出命令；　　傳好消息ê婦女chiâⁿ大陣。Chú chhut bēng-lēng; Thoân hó siau-sit ê hū-lú chiâⁿ tōa-tīn.

12管兵ê王逃走lah，逃走lah，　　Tiàm tī家內ê婦女分tio̍h所搶ê物。Koán-peng ê ông tô-cháu lah, tô-cháu lah, Tiàm tī ke-lāi ê hū-lú pun-tio̍h só͘ chhiúⁿ ê mi̍h.

13Lín倒tī羊寮內ê時，　　親像鴿ê翼鑲白銀；　　伊ê毛鑲黃金。Lín tó tī iûⁿ-tiâu-lāi ê sî, Chhin-chhiūⁿ kap ê si̍t siuⁿ pe̍h-gûn; I ê mn̂g siuⁿ n̂g-kim.

14全能ê tī hit內面趕散列王ê時，　　勢面親像tī Sat-bûn山落雪。Choân-lêng--ê tī hit lāi-bīn kóaⁿ-sòaⁿ lia̍t-ông ê sî, Sè-bīn chhin-chhiūⁿ tī Sat-bûn-soaⁿ lo̍h-seh.

15Pa-san山是上帝ê山；　　Pa-san山是chōe-chōe山尖ê山。Pa-san soaⁿ sī Siōng-tè ê soaⁿ; Pa-san soaⁿ sī chōe-chōe soaⁿ-chiam ê soaⁿ.

16Lín chōe-chōe山尖ê山ah，　　Lín啥事gîn上帝所ài khiā起ê山？　　耶和華beh tiàm tī-hia到永遠。Lín chōe-chōe soaⁿ-chiam ê soaⁿ ah, Lín siáⁿ-sū gîn Siōng-tè só͘ ài khiā-khí ê soaⁿ? Iâ-hô-hoa beh tiàm tī-hia kàu éng-oán.

17上帝ê車千千萬萬；　　主tī hit中間，親像tī西奈，tī聖ê所在。Siōng-tè ê chhia chheng-chheng bān-bān; Chú tī hit tiong-kan, chhin-chhiūⁿ tī Se-nái, tī sèng ê só͘-chāi.

18你已經上到高ê所在，掠hiah-ê受掠-ê；　　你tī人ê中間受in所獻ê，連悖逆ê人亦獻；　　Hō͘耶和華上帝thang khiā起in中間。Lí í-keng chiūⁿ kàu koâiⁿ ê só͘-chāi, lia̍h hiah ê siū-lia̍h--ê; Lí tī lâng ê tiong-kan siū in só͘ hiàn--ê, liân pōe-ge̍k ê lâng ia̍h hiàn; Hō͘ Iâ-hô-hoa Siōng-tè thang khiā-khí in tiong-kan.

19主是應該o-ló-ê，伊日日pē阮ê擔；　　就是救阮ê上帝。[Sè-la̍h]Chú sī eng-kai o-ló--ê, I ji̍t-ji̍t pē goán ê tàⁿ; Chiū-sī kiù goán ê Siōng-tè. [Sè-la̍h

20上帝是kā阮行ta̍k樣拯救ê上帝；　　能脫離死無，是在tī主耶和華。Siōng-tè sī kā goán kiâⁿ ta̍k-iūⁿ chín-kiù ê Siōng-tè; Ōe thoat-lī sí-bô, sī chāi-tī Chú Iâ-hô-hoa.

21總是上帝beh phah破伊ê對敵ê頭殼；　　就是hit-ê常常犯罪ê人ê頭殼。Chóng-sī Siōng-tè beh phah-phòa I ê tùi-te̍k ê thâu-khak; Chiū-sī hit ê siông-siông hoān-chōe ê lâng ê thâu-khak.

22主講，我beh hō͘ in tùi Pa-san 倒tńg來，　　Tùi深淵hō͘ in 倒tńg來；Chú kóng, Góa beh hō͘ in tùi Pa-san tò-tńg--lâi, Tùi chhim-ian hō͘ in tò-tńg-lâi;

23Hō͘你phah碎in，你ê腳踏tī對敵ê血；　　你ê狗ê舌舐(chī)in。Hō͘ lí phah-chhùi in, lí ê kha ta̍h tī tùi-te̍k ê huih; Lí ê káu ê chi̍h chī--in.

24上帝ah，你是我ê上帝，我ê王；　　人已經看見你teh行，行入聖ê所在。Siōng-tè ah, Lí sī góa ê Siōng-tè, góa ê ông; Lâng í-keng khòaⁿ-kìⁿ Lí teh kiâⁿ, kiâⁿ ji̍p sèng ê só͘-chāi.

25唱歌ê行tī頭前，作樂ê tè tī後面，　　搖lin-long鼓ê cha-bó͘-gín-á tī中間。Chhiùⁿ-koa--ê kiâⁿ tī thâu-chêng, chok-ga̍k--ê tè tī āu-bīn, Iô lin-long-kó͘ ê cha-bó͘-gín-á tī tiong-kan.

26Tùi以色列ê源頭來ê，　　Tī ta̍k ê會中，tio̍h o-ló上帝，就是主。Tùi Í-sek-lia̍t ê goân-thâu lâi--ê, Tī ta̍k ê hōe-tiong, tio̍h o-ló Siōng-tè, chiū-sī Chú.

27Tī-hia有管轄in ê小便雅憫，　　有猶大ê族長kap in kui群ê眾人；　　有Se-pò͘-lûn ê族長，有Ná-hut-tha-lī ê族長。Tī-hia ū koán-hat in ê sió Piān-ngá-bín, Ū Iû-tāi ê cho̍k-tiúⁿ kap in kui-kûn ê chèng-lâng; Ū Se-pò͘-lûn ê cho̍k-tiúⁿ, ū Ná-hut-tha-lī ê cho̍k-tiúⁿ.

28你ê上帝定tio̍h你ê氣力；　　上帝ah，求你堅固你kā阮所成ê事。Lí ê Siōng-tè tiāⁿ-tio̍h lí ê khùi-la̍t; Siōng-tè ah, kiû Lí kian-kò͘ Lí kā goán só͘ chiâⁿ ê sū.

29為tio̍h你耶路撒冷ê殿，　　列王beh tòa禮物獻hō͘你。Ūi-tio̍h Lí Iâ-lō͘-sat-léng ê tiān, Lia̍t-ông beh tòa lé-mi̍h hiàn hō͘ Lí.

30求你責備蘆葦中ê野獸，　　Kap kui群ê牛káng，以及列邦中ê牛á，　　將銀踏tī腳下；　　上帝趕散ài交戰ê百姓。Kiû Lí chek-pī lô͘-úi-tiong ê iá-siù, Kap kui-kûn ê gû-káng, í-ki̍p lia̍t-pang-tiong ê gû-á, Chiong gûn ta̍h tī kha-ē; Siōng-tè kóaⁿ-sòaⁿ ài kau-chiàn ê peh-sìⁿ.

31大官beh tùi埃及來；　　Kó͘-si̍t beh趕緊ǹg上帝來kia̍h起手。Tōa-koaⁿ beh tùi Ai-ki̍p lâi; Kó͘-si̍t beh kóaⁿ-kín ǹg Siōng-tè lâi kia̍h-khí chhiú.

32世上ê列國ah，lín tio̍h對上帝唱歌，　　願lín吟詩o-ló主。[Sè-la̍h]Sè-chiūⁿ ê lia̍t-kok ah, lín tio̍h tùi Siōng-tè chhiùⁿ-koa, Goān lín gîm-si o-ló Chú. [Sè-la̍h

33就是o-ló hit-ê坐tī tùi kó͘-早就有，極高ê天 ê主。　　伊發出伊ê聲，就是極大ê聲。Chiū-sī o-ló hit ê chē tī tùi kó͘-chá chiū ū, ke̍k-koâiⁿ ê thiⁿ ê Chú. I hoat-chhut I ê siaⁿ, chiū-sī ke̍k-tōa ê siaⁿ.

34Lín tio̍h將權能歸hō͘上帝；　　伊ê威嚴tī以色列ê頂面，　　伊ê權能是tī穹蒼。Lín tio̍h chiong koân-lêng kui hō͘ Siōng-tè; I ê ui-giâm tī Í-sek-lia̍t ê téng-bīn, I ê koân-lêng sī tī kiong-chhong.

35上帝ah，你tùi你聖ê所在真正thang驚；　　以色列ê上帝是hit-ê將氣力權能賞賜伊ê百姓ê，　　上帝是應該o-ló ê。Siōng-tè ah, Lí tùi Lí sèng ê só͘-chāi chin-chiàⁿ thang kiaⁿ; Í-sek-lia̍t ê Siōng-tè sī hit ê chiong khùi-la̍t koân-lêng siúⁿ-sù I ê peh-sìⁿ ê, Siōng-tè sī eng-kai o-ló ê.