1大衛ê詩歌；交hō͘樂官。1) 願上帝起來，hō͘伊ê對敵四散；　　Hō͘怨恨伊ê人，tùi伊ê面前逃走。Tāi-pi̍t ê si-koa; kau hō͘ Ga̍k-koaⁿ.1) Goān Siōng-tè khí--lâi, hō͘ I ê tùi-te̍k sì-sòaⁿ; Hō͘ oàn-hūn I ê lâng, tùi I ê bīn-chêng tô-cháu.

2你kā in趕散，親像煙受吹散；　　Pháiⁿ人見tio̍h上帝ê面就消滅；　　親像蠟見tio̍h火就熔去。Lí kā in kóaⁿ-sòaⁿ, chhin-chhiūⁿ ian siū chhe-sòaⁿ; Pháiⁿ-lâng kìⁿ-tio̍h Siōng-tè ê bīn chiū siau-bia̍t; Chhin-chhiūⁿ la̍h kìⁿ-tio̍h hé chiū iûⁿ--khì.

3總是義人beh歡喜，in tī上帝ê面前beh快樂；　　In亦beh歡歡喜喜。Chóng-sī gī-lâng beh hoaⁿ-hí, in tī Siōng-tè ê bīn-chêng beh khoài-lo̍k; In ia̍h beh hoaⁿ-hoaⁿ hí-hí.

4Lín tio̍h對上帝吟詩，唱歌o-ló伊ê名；　　為tio̍h hit-ê坐車經過曠野ê，修造大路；　　伊ê名是耶和華。　　Tio̍h tī伊ê面前快樂。Lín tio̍h tùi Siōng-tè gîm-si, chhiùⁿ-koa o-ló I ê miâ; Ūi-tio̍h hit ê chē-chhia keng-kè khòng-iá--ê, siu-chō tōa-lō͘; I ê miâ sī Iâ-hô-hoa. Tio̍h tī I ê bīn-chêng khoài-lo̍k.

5上帝tī伊聖ê所在，做孤兒ê父；　　做寡婦ê伸冤ê。Siōng-tè tī I sèng ê só͘-chāi, chòe ko͘-jî ê pē; chòe kóaⁿ-hū ê sin-oan--ê.

6上帝hō͘孤單ê人有家；　　Hō͘受關監ê人出來享福；　　獨獨悖逆ê人tiàm tī乾燥ê地。Siōng-tè hō͘ ko͘-toaⁿ ê lâng ū ke; Hō͘ siū koaiⁿ-kaⁿ ê lâng chhut-lâi hióng-hok; To̍k-to̍k pōe-ge̍k ê lâng tiàm tī ta-sò ê tōe.

7上帝ah，早你行tī百姓ê頭前，　　經過曠野；[Sè-la̍h]Siōng-tè ah, chá Lí kiâⁿ tī peh-sìⁿ ê thâu-chêng, Keng-kè khòng-iá; [Sè-la̍h

8Hit時地見tio̍h上帝ê面就振動，　　天亦落雨；　　Hit-ê西奈也振動，是見tio̍h上帝，以色列ê上帝ê面。Hit-sî tōe kìⁿ-tio̍h Siōng-tè ê bīn chiū tín-tāng, Thiⁿ ia̍h lo̍h hō͘; Hit ê Se-nái iā tín-tāng, sī kìⁿ-tio̍h Siōng-tè, Í-sek-lia̍t ê Siōng-tè ê bīn.

9上帝ah，你落大雨，　　你ê產業以色列厭倦ê時，你hō͘伊堅固。Siōng-tè--ah, Lí lo̍h tōa hō͘, Lí ê sán-gia̍p Í-sek-lia̍t ià-siān ê sî, Lí hō͘ i kian-kò͘.

10你ê會眾tiàm tī hit中間；　　上帝ah，你為tio̍h sòng-hiong人備辦恩惠。Lí ê hōe-chiòng tiàm tī hit tiong-kan; Siōng-tè ah, Lí ūi-tio̍h sòng-hiong lâng pī-pān un-hūi.

11主出命令；　　傳好消息ê婦女chiâⁿ大陣。Chú chhut bēng-lēng; Thoân hó siau-sit ê hū-lú chiâⁿ tōa-tīn.

12管兵ê王逃走lah，逃走lah，　　Tiàm tī家內ê婦女分tio̍h所搶ê物。Koán-peng ê ông tô-cháu lah, tô-cháu lah, Tiàm tī ke-lāi ê hū-lú pun-tio̍h só͘ chhiúⁿ ê mi̍h.

13Lín倒tī羊寮內ê時，　　親像鴿ê翼鑲白銀；　　伊ê毛鑲黃金。Lín tó tī iûⁿ-tiâu-lāi ê sî, Chhin-chhiūⁿ kap ê si̍t siuⁿ pe̍h-gûn; I ê mn̂g siuⁿ n̂g-kim.

14全能ê tī hit內面趕散列王ê時，　　勢面親像tī Sat-bûn山落雪。Choân-lêng--ê tī hit lāi-bīn kóaⁿ-sòaⁿ lia̍t-ông ê sî, Sè-bīn chhin-chhiūⁿ tī Sat-bûn-soaⁿ lo̍h-seh.

15Pa-san山是上帝ê山；　　Pa-san山是chōe-chōe山尖ê山。Pa-san soaⁿ sī Siōng-tè ê soaⁿ; Pa-san soaⁿ sī chōe-chōe soaⁿ-chiam ê soaⁿ.

16Lín chōe-chōe山尖ê山ah，　　Lín啥事gîn上帝所ài khiā起ê山？　　耶和華beh tiàm tī-hia到永遠。Lín chōe-chōe soaⁿ-chiam ê soaⁿ ah, Lín siáⁿ-sū gîn Siōng-tè só͘ ài khiā-khí ê soaⁿ? Iâ-hô-hoa beh tiàm tī-hia kàu éng-oán.

17上帝ê車千千萬萬；　　主tī hit中間，親像tī西奈，tī聖ê所在。Siōng-tè ê chhia chheng-chheng bān-bān; Chú tī hit tiong-kan, chhin-chhiūⁿ tī Se-nái, tī sèng ê só͘-chāi.

18你已經上到高ê所在，掠hiah-ê受掠-ê；　　你tī人ê中間受in所獻ê，連悖逆ê人亦獻；　　Hō͘耶和華上帝thang khiā起in中間。Lí í-keng chiūⁿ kàu koâiⁿ ê só͘-chāi, lia̍h hiah ê siū-lia̍h--ê; Lí tī lâng ê tiong-kan siū in só͘ hiàn--ê, liân pōe-ge̍k ê lâng ia̍h hiàn; Hō͘ Iâ-hô-hoa Siōng-tè thang khiā-khí in tiong-kan.

19主是應該o-ló-ê，伊日日pē阮ê擔；　　就是救阮ê上帝。[Sè-la̍h]Chú sī eng-kai o-ló--ê, I ji̍t-ji̍t pē goán ê tàⁿ; Chiū-sī kiù goán ê Siōng-tè. [Sè-la̍h

20上帝是kā阮行ta̍k樣拯救ê上帝；　　能脫離死無，是在tī主耶和華。Siōng-tè sī kā goán kiâⁿ ta̍k-iūⁿ chín-kiù ê Siōng-tè; Ōe thoat-lī sí-bô, sī chāi-tī Chú Iâ-hô-hoa.

21總是上帝beh phah破伊ê對敵ê頭殼；　　就是hit-ê常常犯罪ê人ê頭殼。Chóng-sī Siōng-tè beh phah-phòa I ê tùi-te̍k ê thâu-khak; Chiū-sī hit ê siông-siông hoān-chōe ê lâng ê thâu-khak.

22主講，我beh hō͘ in tùi Pa-san 倒tńg來，　　Tùi深淵hō͘ in 倒tńg來；Chú kóng, Góa beh hō͘ in tùi Pa-san tò-tńg--lâi, Tùi chhim-ian hō͘ in tò-tńg-lâi;

23Hō͘你phah碎in，你ê腳踏tī對敵ê血；　　你ê狗ê舌舐(chī)in。Hō͘ lí phah-chhùi in, lí ê kha ta̍h tī tùi-te̍k ê huih; Lí ê káu ê chi̍h chī--in.

24上帝ah，你是我ê上帝，我ê王；　　人已經看見你teh行，行入聖ê所在。Siōng-tè ah, Lí sī góa ê Siōng-tè, góa ê ông; Lâng í-keng khòaⁿ-kìⁿ Lí teh kiâⁿ, kiâⁿ ji̍p sèng ê só͘-chāi.

25唱歌ê行tī頭前，作樂ê tè tī後面，　　搖lin-long鼓ê cha-bó͘-gín-á tī中間。Chhiùⁿ-koa--ê kiâⁿ tī thâu-chêng, chok-ga̍k--ê tè tī āu-bīn, Iô lin-long-kó͘ ê cha-bó͘-gín-á tī tiong-kan.

26Tùi以色列ê源頭來ê，　　Tī ta̍k ê會中，tio̍h o-ló上帝，就是主。Tùi Í-sek-lia̍t ê goân-thâu lâi--ê, Tī ta̍k ê hōe-tiong, tio̍h o-ló Siōng-tè, chiū-sī Chú.

27Tī-hia有管轄in ê小便雅憫，　　有猶大ê族長kap in kui群ê眾人；　　有Se-pò͘-lûn ê族長，有Ná-hut-tha-lī ê族長。Tī-hia ū koán-hat in ê sió Piān-ngá-bín, Ū Iû-tāi ê cho̍k-tiúⁿ kap in kui-kûn ê chèng-lâng; Ū Se-pò͘-lûn ê cho̍k-tiúⁿ, ū Ná-hut-tha-lī ê cho̍k-tiúⁿ.

28你ê上帝定tio̍h你ê氣力；　　上帝ah，求你堅固你kā阮所成ê事。Lí ê Siōng-tè tiāⁿ-tio̍h lí ê khùi-la̍t; Siōng-tè ah, kiû Lí kian-kò͘ Lí kā goán só͘ chiâⁿ ê sū.

29為tio̍h你耶路撒冷ê殿，　　列王beh tòa禮物獻hō͘你。Ūi-tio̍h Lí Iâ-lō͘-sat-léng ê tiān, Lia̍t-ông beh tòa lé-mi̍h hiàn hō͘ Lí.

30求你責備蘆葦中ê野獸，　　Kap kui群ê牛káng，以及列邦中ê牛á，　　將銀踏tī腳下；　　上帝趕散ài交戰ê百姓。Kiû Lí chek-pī lô͘-úi-tiong ê iá-siù, Kap kui-kûn ê gû-káng, í-ki̍p lia̍t-pang-tiong ê gû-á, Chiong gûn ta̍h tī kha-ē; Siōng-tè kóaⁿ-sòaⁿ ài kau-chiàn ê peh-sìⁿ.

31大官beh tùi埃及來；　　Kó͘-si̍t beh趕緊ǹg上帝來kia̍h起手。Tōa-koaⁿ beh tùi Ai-ki̍p lâi; Kó͘-si̍t beh kóaⁿ-kín ǹg Siōng-tè lâi kia̍h-khí chhiú.

32世上ê列國ah，lín tio̍h對上帝唱歌，　　願lín吟詩o-ló主。[Sè-la̍h]Sè-chiūⁿ ê lia̍t-kok ah, lín tio̍h tùi Siōng-tè chhiùⁿ-koa, Goān lín gîm-si o-ló Chú. [Sè-la̍h

33就是o-ló hit-ê坐tī tùi kó͘-早就有，極高ê天 ê主。　　伊發出伊ê聲，就是極大ê聲。Chiū-sī o-ló hit ê chē tī tùi kó͘-chá chiū ū, ke̍k-koâiⁿ ê thiⁿ ê Chú. I hoat-chhut I ê siaⁿ, chiū-sī ke̍k-tōa ê siaⁿ.

34Lín tio̍h將權能歸hō͘上帝；　　伊ê威嚴tī以色列ê頂面，　　伊ê權能是tī穹蒼。Lín tio̍h chiong koân-lêng kui hō͘ Siōng-tè; I ê ui-giâm tī Í-sek-lia̍t ê téng-bīn, I ê koân-lêng sī tī kiong-chhong.

35上帝ah，你tùi你聖ê所在真正thang驚；　　以色列ê上帝是hit-ê將氣力權能賞賜伊ê百姓ê，　　上帝是應該o-ló ê。Siōng-tè ah, Lí tùi Lí sèng ê só͘-chāi chin-chiàⁿ thang kiaⁿ; Í-sek-lia̍t ê Siōng-tè sī hit ê chiong khùi-la̍t koân-lêng siúⁿ-sù I ê peh-sìⁿ ê, Siōng-tè sī eng-kai o-ló ê.

1大衛ê詩；交hō͘樂官；調是用「百合花」。1) 上帝ah，求你救我，　　因為chiah-ê水beh淹我ê性命。Tāi-pi̍t ê si; kau hō͘ Ga̍k-koaⁿ; tiāu sī ēng "Pek-ha̍p-hoe".1) Siōng-tè ah, kiû Lí kiù góa, In-ūi chiah ê chúi beh im góa ê sìⁿ-miā.

2我陷落tī深ê土糜內，無thang khiā腳ê所在；　　我到深ê水內，大水淹密我。Góa hām-lo̍h tī chhim ê thô͘-bê-lāi, bô thang khiā-kha ê só͘-chāi; Góa kàu chhim ê chúi-lāi, tōa-chúi im-ba̍t góa.

3我因為我ê喉叫到厭倦，我ê嚨喉乾去；　　我因為thèng候我ê上帝，目睭花。Góa in-ūi góa ê âu-kiò kàu ià-siān, góa ê nâ-âu ta--khì; Góa in-ūi thèng-hāu góa ê Siōng-tè, ba̍k-chiu hoe.

4無因端怨恨我ê khah chōe我ê頭毛；　　Lām-sám做我ê對敵，beh滅無我ê，不止強猛；　　我所無搶ê，我也tio̍h hêng。Bô in-toaⁿ oàn-hūn góa-ê khah chōe góa ê thâu-mn̂g; Lām-sám chòe góa ê tùi-te̍k, beh bia̍t-bô góa-ê, put-chí kiông-béng; Góa só͘ bô chhiúⁿ ê, góa iā tio̍h hêng.

5上帝ah，我ê愚戇你本知；　　我ê罪過無隱瞞tī你。Siōng-tè ah, góa ê gû-gōng Lí pún chai; Góa ê chōe-kòa bô ún-môa tī Lí.

6萬軍ê主耶和華ah，求你m̄-thang hō͘ hiah-ê thèng候你ê人為tio̍h我來見笑；　　以色列ê上帝ah，求你m̄-thang hō͘ hiah-ê chhē你ê人為tio̍h我來受凌辱。Bān-kun ê Chú Iâ-hô-hoa ah, kiû Lí m̄-thang hō͘ hiah ê thèng-hāu Lí ê lâng ūi-tio̍h góa lâi kiàn-siàu; Í-sek-lia̍t ê Siōng-tè ah, kiû Lí m̄-thang hō͘ hiah ê chhē Lí ê lâng ūi-tio̍h góa lâi siū lêng-jio̍k.

7因為我為tio̍h你ê緣故受詈罵，　　我滿面見笑。In-ūi góa ūi-tio̍h Lí ê iân-kò͘ siū lóe-mē, Góa móa-bīn kiàn-siàu.

8我ê兄弟看我做過路ê人，　　我ê同胞看我做外邦人。Góa ê hiaⁿ-tī khòaⁿ góa chòe kè-lō͘ ê lâng, Góa ê tâng-pau khòaⁿ góa chòe gōa-pang-lâng.

9因為我為tio̍h你ê厝心內親像火to̍h；　　Koh詈罵你ê人ê詈罵lóng到tī我。In-ūi góa ūi-tio̍h Lí ê chhù sim-lāi chhin-chhiūⁿ hé to̍h; Koh lóe-mē Lí ê lâng ê lóe-mē lóng kàu tī góa.

10我流目屎，用禁食刻苦我ê心；　　這反tńg做我ê凌辱。Góa lâu ba̍k-sái, ēng kìm-chia̍h khek-khó͘ góa ê sim; Che hoán-tńg chòe góa ê lêng-jio̍k.

11我用麻布做衣裳，　　人就用我做笑談。Góa ēng môa-pò͘ chòe i-chiûⁿ, Lâng chiū ēng góa chòe chhiàu-tâm.

12坐tī城門-ê談論我；　　酒漢用我做歌曲。Chē tī siâⁿ-mn̂g--ê tâm-lūn góa; Chiú-hàn ēng góa chòe koa-khek.

13總是我tī得tio̍h接納ê時，對耶和華祢祈禱；　　上帝ah，求祢照祢慈愛ê豐盛，　　照祢拯救ê真實來應我。Chóng-sī góa tī tit-tio̍h chiap-la̍p ê sî, tùi Iâ-hô-hoa Lí kî-tó; Siōng-tè ah, kiû Lí chiàu Lí chû-ài ê hong-sēng, Chiàu Lí chín-kiù ê chin-si̍t lâi ìn góa.

14求你救我出土糜，hō͘我無沉落去；　　求你救我脫離怨恨我ê人，hō͘我出深ê水。Kiû Lí kiù góa chhut thô͘-bê, hō͘ góa bô tîm--lo̍h-khì; Kiû Lí kiù góa thoat-lī oàn-hūn góa ê lâng, hō͘ góa chhut chhim ê chúi.

15求你莫得容允大水淹密我；　　莫得容允深淵吞我；　　莫得ióng-ún陷坑hām我。Kiû Lí bo̍h-tit iông-ún tōa-chúi im-ba̍t góa; Bo̍h-tit iông-ún chhim-ian thun góa; Bo̍h-tit iông-ún hām-khiⁿ hām góa.

16耶和華ah，求你應我，因為你ê慈愛是好；　　求你照你慈悲ê豐盛oa̍t過來看我。Iâ-hô-hoa ah, kiû Lí ìn góa, in-ūi Lí ê chû-ài sī hó; Kiû Lí chiàu Lí chû-pi ê hong-sēng oa̍t--kè-lâi khòaⁿ góa.

17M̄-thang掩面m̄看你ê奴僕；　　因為我tī患難ê中間，求你緊緊來應我。M̄-thang ng-bīn m̄-khòaⁿ Lí ê lô͘-po̍k; In-ūi góa tī hoān-lān ê tiong-kan, kiû Lí kín-kín lâi ìn góa.

18求你親近我ê靈魂來救贖伊；　　求你因為我ê對敵來贖回我。Kiû Lí chhin-kūn góa ê lêng-hûn lâi kiù-sio̍k i; Kiû Lí in-ūi góa ê tùi-te̍k lâi sio̍k-hôe góa.

19你知我所受ê詈罵，見笑，凌辱；　　我ê對敵lóng tī你ê面前。Lí chai góa só͘ siū ê lóe-mē, kiàn-siàu, lêng-jio̍k; Góa ê tùi-te̍k lóng tī Lí ê bīn-chêng.

20詈罵已經拆裂我ê心，　　我ê憂悶滿滿；我ǹg望人可憐，也無一個，　　Ǹg望人安慰，也chhē無一個。Lóe-mē í-keng thiah-li̍h góa ê sim, góa ê iu-būn móa-móa; Góa ǹg-bāng lâng khó-lîn, iā bô chi̍t-ê, Ǹg-bāng lâng an-ùi, iā chhē bô chi̍t-ê.

21In the̍h苦膽hō͘我做食物，　　我嘴乾，in用醋hō͘我lim。In the̍h khó͘-táⁿ hō͘ góa chòe chia̍h-mi̍h, Góa chhùi-ta, in ēng chhò͘ hō͘ góa lim.

22願in ê筵桌tī in ê面前變做羅網，　　Tī in平安ê時，變做活tauh。Goān in ê iân-toh tī in ê bīn-chêng pìⁿ-chòe lô-bāng, Tī in pêng-an ê sî, pìⁿ-chòe oa̍h-tauh.

23願in ê目睭烏暗bōe看見，　　願你hō͘ in ê腰常常gī-gī-chhoah。Goān in ê ba̍k-chiu o͘-àm bōe khòaⁿ-kìⁿ, Goān Lí hō͘ in ê io siông-siông gī-gī-chhoah.

24願你ê痛恨piàⁿ tī in ê身上；　　Hō͘你烈烈ê受氣jip-tio̍h in。Goān Lí ê thòng-hūn piàⁿ tī in ê sin-chiūⁿ; Hō͘ Lí lia̍t-lia̍t ê siū-khì jip--tio̍h in.

25願in khiā起ê所在變做拋荒；　　願in ê布棚無人khiā起。Goān in khiā-khí ê só͘-chāi pìⁿ-chòe pha-hng; Goān in ê pò͘-pîⁿ bô lâng khiā-khí.

26因為你所phah hit-ê人，in就窘迫伊；　　你所phah傷hiah-ê人，in搬tia̍h in ê憂苦。In-ūi Lí só͘ phah hit ê lâng, in chiū khún-pek i; Lí só͘ phah-siong hiah ê lâng, in poaⁿ-tia̍h in ê iu-khó͘.

27願你tī in ê罪上加罪；　　莫得容允in有份你ê義。Goān Lí tī in ê chōe-siōng ka chōe; Bo̍h-tit iông-ún in ū hūn Lí ê gī.

28願in tùi活命ê冊受擦滅，　　無記tī義人ê中間。Goān in tùi oa̍h-miā ê chheh siū chhat-bia̍t, Bô kì tī gī-lâng ê tiong-kan.

29總是我是困苦憂傷ê人；　　上帝ah，願你ê救恩安置我tī高ê所在。Chóng-sī góa sī khùn-khó͘ iu-siong ê lâng; Siōng-tè ah, goān Lí ê kiù-un an-tì góa tī koâiⁿ ê só͘-chāi.

30我beh用詩歌o-ló上帝ê名；　　也beh用感謝稱祂做大。Góa beh ēng si-koa o-ló Siōng-tè ê miâ; Iā beh ēng kám-siā chheng I chòe tōa.

31這是hō͘耶和華歡喜，贏過獻牛，　　Á是獻有角有蹄ê牛káng。Che sī hō͘ Iâ-hô-hoa hoaⁿ-hí, iâⁿ-kè hiàn gû, Á-sī hiàn ū-kak ū-tôe ê gû-káng.

32謙卑ê人看見就歡喜；　　Lín chhē上帝ê人，願lín ê心活起來。Khiam-pi ê lâng khòaⁿ-kìⁿ chiū hoaⁿ-hí; Lín chhē Siōng-tè ê lâng, goān lín ê sim oa̍h--khí-lâi.

33因為耶和華聽sòng-hiong ê人，　　無看輕為tio̍h伊受關監ê人。In-ūi Iâ-hô-hoa thiaⁿ sòng-hiong ê lâng, Bô khòaⁿ-khin ūi-tio̍h I siū koaiⁿ-kaⁿ ê lâng.

34願天kap地o-ló伊；　　海kap其中一切ê動物也tio̍h o-ló伊。Goān thiⁿ kap tōe o-ló I; Hái kap kî-tiong it-chhè ê tōng-bu̍t iā tio̍h o-ló I.

35因為上帝beh救錫安，起造猶大ê城；　　In beh khiā起tī-hia，得tio̍h伊做業。In-ūi Siōng-tè beh kiù Sek-an, khí-chō Iû-tāi ê siâⁿ; In beh khiā-khí tī-hia, tit-tio̍h i chòe-gia̍p.

36伊ê奴僕ê後裔beh續接伊，　　疼伊ê名ê人beh tiàm tī hit中間。I ê lô͘-po̍k ê hō͘-è beh sòa-chiap i, Thiàⁿ I ê miâ ê lâng beh tiàm tī hit tiong-kan.

1大衛ê記念詩；交hō͘樂官。1) 上帝ah，求你緊緊拯救我；　　耶和華ah，求你緊緊幫贊我。Tāi-pi̍t ê kì-liām si; kau hō͘ Ga̍k-koaⁿ.1) Siōng-tè ah, kiû Lí kín-kín chín-kiù góa; Iâ-hô-hoa ah, kiû Lí kín-kín pang-chān góa.

2願hiah-ê siàu想我ê性命ê人，見笑漏氣；　　願hiah-ê歡喜我受陷害ê，oa̍t倒tńg受凌辱。Goān hiah ê siàu-siūⁿ góa ê sìⁿ-miā ê lâng, kiàn-siàu làu-khùi; Goān hiah ê hoaⁿ-hí góa siū hām-hāi--ê, oa̍t-tò-tńg siū lêng-jio̍k.

3願hiah-ê講，Ho͘h-chāi，Ho͘h-chāi ê，　　因為見笑來oa̍t倒tńg。Goān hiah-ê kóng, Ho͘h-chāi, Ho͘h--chāi ê, In-ūi kiàn-siàu lâi oa̍t-tò-tńg.

4願一切chhē你ê因為你歡喜快樂；　　願hiah-ê欣慕你救恩ê常常講，　　Tio̍h尊上帝做大。Goān it-chhè chhē Lí ê in-ūi Lí hoaⁿ-hí khoài-lo̍k; Goān hiah ê him-bō͘ Lí kiù-un-ê siông-siông kóng, Tio̍h chun Siōng-tè chòe tōa.

5總是我是困苦sòng-hiong-ê，　　上帝ah，求你緊緊到我chia；　　你是幫贊我ê，拯救我ê，　　耶和華ah，求你m̄-thang 延chhiân。Chóng-sī góa sī khùn-khó͘ sòng-hiong-ê, Siōng-tè ah, kiû Lí kín-kín kàu góa chia; Lí sī pang-chān góa ê, chín-kiù góa ê, Iâ-hô-hoa ah, kiû Lí m̄-thang iân-chhiân.