1大衛ê詩；交hō͘樂官；調是用「百合花」。1) 上帝ah，求你救我，　　因為chiah-ê水beh淹我ê性命。Tāi-pi̍t ê si; kau hō͘ Ga̍k-koaⁿ; tiāu sī ēng "Pek-ha̍p-hoe".1) Siōng-tè ah, kiû Lí kiù góa, In-ūi chiah ê chúi beh im góa ê sìⁿ-miā.

2我陷落tī深ê土糜內，無thang khiā腳ê所在；　　我到深ê水內，大水淹密我。Góa hām-lo̍h tī chhim ê thô͘-bê-lāi, bô thang khiā-kha ê só͘-chāi; Góa kàu chhim ê chúi-lāi, tōa-chúi im-ba̍t góa.

3我因為我ê喉叫到厭倦，我ê嚨喉乾去；　　我因為thèng候我ê上帝，目睭花。Góa in-ūi góa ê âu-kiò kàu ià-siān, góa ê nâ-âu ta--khì; Góa in-ūi thèng-hāu góa ê Siōng-tè, ba̍k-chiu hoe.

4無因端怨恨我ê khah chōe我ê頭毛；　　Lām-sám做我ê對敵，beh滅無我ê，不止強猛；　　我所無搶ê，我也tio̍h hêng。Bô in-toaⁿ oàn-hūn góa-ê khah chōe góa ê thâu-mn̂g; Lām-sám chòe góa ê tùi-te̍k, beh bia̍t-bô góa-ê, put-chí kiông-béng; Góa só͘ bô chhiúⁿ ê, góa iā tio̍h hêng.

5上帝ah，我ê愚戇你本知；　　我ê罪過無隱瞞tī你。Siōng-tè ah, góa ê gû-gōng Lí pún chai; Góa ê chōe-kòa bô ún-môa tī Lí.

6萬軍ê主耶和華ah，求你m̄-thang hō͘ hiah-ê thèng候你ê人為tio̍h我來見笑；　　以色列ê上帝ah，求你m̄-thang hō͘ hiah-ê chhē你ê人為tio̍h我來受凌辱。Bān-kun ê Chú Iâ-hô-hoa ah, kiû Lí m̄-thang hō͘ hiah ê thèng-hāu Lí ê lâng ūi-tio̍h góa lâi kiàn-siàu; Í-sek-lia̍t ê Siōng-tè ah, kiû Lí m̄-thang hō͘ hiah ê chhē Lí ê lâng ūi-tio̍h góa lâi siū lêng-jio̍k.

7因為我為tio̍h你ê緣故受詈罵，　　我滿面見笑。In-ūi góa ūi-tio̍h Lí ê iân-kò͘ siū lóe-mē, Góa móa-bīn kiàn-siàu.

8我ê兄弟看我做過路ê人，　　我ê同胞看我做外邦人。Góa ê hiaⁿ-tī khòaⁿ góa chòe kè-lō͘ ê lâng, Góa ê tâng-pau khòaⁿ góa chòe gōa-pang-lâng.

9因為我為tio̍h你ê厝心內親像火to̍h；　　Koh詈罵你ê人ê詈罵lóng到tī我。In-ūi góa ūi-tio̍h Lí ê chhù sim-lāi chhin-chhiūⁿ hé to̍h; Koh lóe-mē Lí ê lâng ê lóe-mē lóng kàu tī góa.

10我流目屎，用禁食刻苦我ê心；　　這反tńg做我ê凌辱。Góa lâu ba̍k-sái, ēng kìm-chia̍h khek-khó͘ góa ê sim; Che hoán-tńg chòe góa ê lêng-jio̍k.

11我用麻布做衣裳，　　人就用我做笑談。Góa ēng môa-pò͘ chòe i-chiûⁿ, Lâng chiū ēng góa chòe chhiàu-tâm.

12坐tī城門-ê談論我；　　酒漢用我做歌曲。Chē tī siâⁿ-mn̂g--ê tâm-lūn góa; Chiú-hàn ēng góa chòe koa-khek.

13總是我tī得tio̍h接納ê時，對耶和華祢祈禱；　　上帝ah，求祢照祢慈愛ê豐盛，　　照祢拯救ê真實來應我。Chóng-sī góa tī tit-tio̍h chiap-la̍p ê sî, tùi Iâ-hô-hoa Lí kî-tó; Siōng-tè ah, kiû Lí chiàu Lí chû-ài ê hong-sēng, Chiàu Lí chín-kiù ê chin-si̍t lâi ìn góa.

14求你救我出土糜，hō͘我無沉落去；　　求你救我脫離怨恨我ê人，hō͘我出深ê水。Kiû Lí kiù góa chhut thô͘-bê, hō͘ góa bô tîm--lo̍h-khì; Kiû Lí kiù góa thoat-lī oàn-hūn góa ê lâng, hō͘ góa chhut chhim ê chúi.

15求你莫得容允大水淹密我；　　莫得容允深淵吞我；　　莫得ióng-ún陷坑hām我。Kiû Lí bo̍h-tit iông-ún tōa-chúi im-ba̍t góa; Bo̍h-tit iông-ún chhim-ian thun góa; Bo̍h-tit iông-ún hām-khiⁿ hām góa.

16耶和華ah，求你應我，因為你ê慈愛是好；　　求你照你慈悲ê豐盛oa̍t過來看我。Iâ-hô-hoa ah, kiû Lí ìn góa, in-ūi Lí ê chû-ài sī hó; Kiû Lí chiàu Lí chû-pi ê hong-sēng oa̍t--kè-lâi khòaⁿ góa.

17M̄-thang掩面m̄看你ê奴僕；　　因為我tī患難ê中間，求你緊緊來應我。M̄-thang ng-bīn m̄-khòaⁿ Lí ê lô͘-po̍k; In-ūi góa tī hoān-lān ê tiong-kan, kiû Lí kín-kín lâi ìn góa.

18求你親近我ê靈魂來救贖伊；　　求你因為我ê對敵來贖回我。Kiû Lí chhin-kūn góa ê lêng-hûn lâi kiù-sio̍k i; Kiû Lí in-ūi góa ê tùi-te̍k lâi sio̍k-hôe góa.

19你知我所受ê詈罵，見笑，凌辱；　　我ê對敵lóng tī你ê面前。Lí chai góa só͘ siū ê lóe-mē, kiàn-siàu, lêng-jio̍k; Góa ê tùi-te̍k lóng tī Lí ê bīn-chêng.

20詈罵已經拆裂我ê心，　　我ê憂悶滿滿；我ǹg望人可憐，也無一個，　　Ǹg望人安慰，也chhē無一個。Lóe-mē í-keng thiah-li̍h góa ê sim, góa ê iu-būn móa-móa; Góa ǹg-bāng lâng khó-lîn, iā bô chi̍t-ê, Ǹg-bāng lâng an-ùi, iā chhē bô chi̍t-ê.

21In the̍h苦膽hō͘我做食物，　　我嘴乾，in用醋hō͘我lim。In the̍h khó͘-táⁿ hō͘ góa chòe chia̍h-mi̍h, Góa chhùi-ta, in ēng chhò͘ hō͘ góa lim.

22願in ê筵桌tī in ê面前變做羅網，　　Tī in平安ê時，變做活tauh。Goān in ê iân-toh tī in ê bīn-chêng pìⁿ-chòe lô-bāng, Tī in pêng-an ê sî, pìⁿ-chòe oa̍h-tauh.

23願in ê目睭烏暗bōe看見，　　願你hō͘ in ê腰常常gī-gī-chhoah。Goān in ê ba̍k-chiu o͘-àm bōe khòaⁿ-kìⁿ, Goān Lí hō͘ in ê io siông-siông gī-gī-chhoah.

24願你ê痛恨piàⁿ tī in ê身上；　　Hō͘你烈烈ê受氣jip-tio̍h in。Goān Lí ê thòng-hūn piàⁿ tī in ê sin-chiūⁿ; Hō͘ Lí lia̍t-lia̍t ê siū-khì jip--tio̍h in.

25願in khiā起ê所在變做拋荒；　　願in ê布棚無人khiā起。Goān in khiā-khí ê só͘-chāi pìⁿ-chòe pha-hng; Goān in ê pò͘-pîⁿ bô lâng khiā-khí.

26因為你所phah hit-ê人，in就窘迫伊；　　你所phah傷hiah-ê人，in搬tia̍h in ê憂苦。In-ūi Lí só͘ phah hit ê lâng, in chiū khún-pek i; Lí só͘ phah-siong hiah ê lâng, in poaⁿ-tia̍h in ê iu-khó͘.

27願你tī in ê罪上加罪；　　莫得容允in有份你ê義。Goān Lí tī in ê chōe-siōng ka chōe; Bo̍h-tit iông-ún in ū hūn Lí ê gī.

28願in tùi活命ê冊受擦滅，　　無記tī義人ê中間。Goān in tùi oa̍h-miā ê chheh siū chhat-bia̍t, Bô kì tī gī-lâng ê tiong-kan.

29總是我是困苦憂傷ê人；　　上帝ah，願你ê救恩安置我tī高ê所在。Chóng-sī góa sī khùn-khó͘ iu-siong ê lâng; Siōng-tè ah, goān Lí ê kiù-un an-tì góa tī koâiⁿ ê só͘-chāi.

30我beh用詩歌o-ló上帝ê名；　　也beh用感謝稱祂做大。Góa beh ēng si-koa o-ló Siōng-tè ê miâ; Iā beh ēng kám-siā chheng I chòe tōa.

31這是hō͘耶和華歡喜，贏過獻牛，　　Á是獻有角有蹄ê牛káng。Che sī hō͘ Iâ-hô-hoa hoaⁿ-hí, iâⁿ-kè hiàn gû, Á-sī hiàn ū-kak ū-tôe ê gû-káng.

32謙卑ê人看見就歡喜；　　Lín chhē上帝ê人，願lín ê心活起來。Khiam-pi ê lâng khòaⁿ-kìⁿ chiū hoaⁿ-hí; Lín chhē Siōng-tè ê lâng, goān lín ê sim oa̍h--khí-lâi.

33因為耶和華聽sòng-hiong ê人，　　無看輕為tio̍h伊受關監ê人。In-ūi Iâ-hô-hoa thiaⁿ sòng-hiong ê lâng, Bô khòaⁿ-khin ūi-tio̍h I siū koaiⁿ-kaⁿ ê lâng.

34願天kap地o-ló伊；　　海kap其中一切ê動物也tio̍h o-ló伊。Goān thiⁿ kap tōe o-ló I; Hái kap kî-tiong it-chhè ê tōng-bu̍t iā tio̍h o-ló I.

35因為上帝beh救錫安，起造猶大ê城；　　In beh khiā起tī-hia，得tio̍h伊做業。In-ūi Siōng-tè beh kiù Sek-an, khí-chō Iû-tāi ê siâⁿ; In beh khiā-khí tī-hia, tit-tio̍h i chòe-gia̍p.

36伊ê奴僕ê後裔beh續接伊，　　疼伊ê名ê人beh tiàm tī hit中間。I ê lô͘-po̍k ê hō͘-è beh sòa-chiap i, Thiàⁿ I ê miâ ê lâng beh tiàm tī hit tiong-kan.

1大衛ê記念詩；交hō͘樂官。1) 上帝ah，求你緊緊拯救我；　　耶和華ah，求你緊緊幫贊我。Tāi-pi̍t ê kì-liām si; kau hō͘ Ga̍k-koaⁿ.1) Siōng-tè ah, kiû Lí kín-kín chín-kiù góa; Iâ-hô-hoa ah, kiû Lí kín-kín pang-chān góa.

2願hiah-ê siàu想我ê性命ê人，見笑漏氣；　　願hiah-ê歡喜我受陷害ê，oa̍t倒tńg受凌辱。Goān hiah ê siàu-siūⁿ góa ê sìⁿ-miā ê lâng, kiàn-siàu làu-khùi; Goān hiah ê hoaⁿ-hí góa siū hām-hāi--ê, oa̍t-tò-tńg siū lêng-jio̍k.

3願hiah-ê講，Ho͘h-chāi，Ho͘h-chāi ê，　　因為見笑來oa̍t倒tńg。Goān hiah-ê kóng, Ho͘h-chāi, Ho͘h--chāi ê, In-ūi kiàn-siàu lâi oa̍t-tò-tńg.

4願一切chhē你ê因為你歡喜快樂；　　願hiah-ê欣慕你救恩ê常常講，　　Tio̍h尊上帝做大。Goān it-chhè chhē Lí ê in-ūi Lí hoaⁿ-hí khoài-lo̍k; Goān hiah ê him-bō͘ Lí kiù-un-ê siông-siông kóng, Tio̍h chun Siōng-tè chòe tōa.

5總是我是困苦sòng-hiong-ê，　　上帝ah，求你緊緊到我chia；　　你是幫贊我ê，拯救我ê，　　耶和華ah，求你m̄-thang 延chhiân。Chóng-sī góa sī khùn-khó͘ sòng-hiong-ê, Siōng-tè ah, kiû Lí kín-kín kàu góa chia; Lí sī pang-chān góa ê, chín-kiù góa ê, Iâ-hô-hoa ah, kiû Lí m̄-thang iân-chhiân.

1耶和華ah，我óa靠你，　　求你hō͘我永永無見笑。Iâ-hô-hoa ah, góa óa-khò Lí, Kiû Lí hō͘ góa éng-éng bô kiàn-siàu.

2照你ê公義拯救我，hō͘我脫離；　　Àⁿ耳孔聽我，來救我。Chiàu Lí ê kong-gī chín-kiù góa, hō͘ góa thoat-lī; Àⁿ hī-khang thiaⁿ góa, lâi kiù góa.

3求你做我thang khiā起ê石磐，hō͘我常常去tiàm hia；　　你已經命令beh救我。　　因為你是我ê山巖，我ê山寨。Kiû Lí chòe góa thang khiā-khí ê chio̍h-pôaⁿ, hō͘ góa siông-siông khì tiàm hia; Lí í-keng bēng-lēng beh kiù góa. In-ūi Lí sī góa ê soaⁿ-giâm, góa ê soaⁿ-chē.

4我ê上帝ah，求你救我脫離pháiⁿ人ê手，　　脫離不義kap殘忍ê人ê手頭。Góa ê Siōng-tè ah, kiû Lí kiù góa thoat-lī pháiⁿ-lâng ê chhiú, Thoat-lī put-gī kap chân-jím ê lâng ê chhiú-thâu.

5因為主耶和華，你是我所ǹg望-ê；　　Tùi我少年ê時你是我所óa靠ê。In-ūi Chú Iâ-hô-hoa, Lí sī góa só͘ ǹg-bāng-ê; Tùi góa siàu-liân ê sî Lí sī góa só͘ óa-khò-ê.

6我tùi胎裡hō͘你扶持，　　hō͘我出老母ê腹肚ê，是你；　　我beh常常o-ló你。Góa tùi thai--nih hō͘ Lí hû-chhî, Hō͘ góa chhut lāu-bú ê pak-tó͘ ê, sī Lí; Góa beh siông-siông o-ló Lí.

7Chōe-chōe人掠我做奇怪；　　總是你是我堅固逃閃ê所在。Chōe-chōe lâng lia̍h góa chòe kî-koài; Chóng-sī Lí sī góa kian-kò͘ tô-siám ê só͘-chāi.

8我滿嘴beh o-ló你，　　Thong日beh榮光你。Góa móa-chhùi beh o-ló Lí, Thong-ji̍t beh êng-kng Lí.

9我年老ê時，求你m̄-thang放sak我；　　我氣力衰lám ê時，求你m̄-thang離開我。Góa nî-lāu ê sî, kiû Lí m̄-thang pàng-sak góa; Góa khùi-la̍t soe-lám ê sî, kiû Lí m̄-thang lī-khui góa.

10因為我ê對敵議論我；　　Hiah-ê當等beh害我ê性命ê相kap參詳，In-ūi góa ê tùi-te̍k gī-lūn góa; Hiah-ê tng-tán beh hāi góa ê sìⁿ-miā--ê saⁿ-kap chham-siông,

11講，上帝已經放sak伊；　　TtaN tio̍h追趕伊，掠伊；因為無救伊ê。Kóng, Siōng-tè í-keng pàng-sak i; Taⁿ tio̍h tui-kóaⁿ i, lia̍h i; in-ūi bô kiù i ê.

12上帝ah，求你m̄-thang離開我遠遠；　　我ê上帝ah，求你緊緊來幫贊我。Siōng-tè ah, kiû Lí m̄-thang lī-khui góa hn̄g-hn̄g; Góa ê Siōng-tè ah, kiû Lí kín-kín lâi pang-chān góa.

13願hiah-ê做我性命ê對敵ê，受見笑滅無；　　願hiah-ê計謀害我ê，受凌辱漏氣。Goān hiah-ê chòe góa sìⁿ-miā ê tùi-te̍k ê, siū kiàn-siàu bia̍t-bô; Goān hiah ê kè-bô͘ hāi góa ê, siū lêng-jio̍k làu-khùi.

14總是我beh常常ǹg望，　　我beh ná久ná o-ló你，Chóng-sī góa beh siông-siông ǹg-bāng, Góa beh ná-kú ná o-ló Lí,

15你ê公義，以及你ê拯救算bōe了，　　我ê嘴thong日beh講起。Lí ê kong-gī, í-ki̍p Lí ê chín-kiù sǹg-bōe-liáu, Góa ê chhùi thong-ji̍t beh kóng-khí.

16我beh來講主耶和華大權能ê事；　　我單單beh講起你ê義。Góa beh lâi kóng Chú Iâ-hô-hoa tōa koân-lêng ê sū; Góa toaⁿ-toaⁿ beh kóng-khí Lí ê gī.

17上帝ah，tùi我少年ê時你有教示我；　　到現今我bat報揚你奇妙ê所做。Siōng-tè ah, tùi góa siàu-liân ê sî Lí ū kà-sī góa; Kàu hiān-kim góa bat pò-iông Lí kî-biāu ê só͘-chòe.

18上帝ah，我到年老；頭毛-白ê時，求你m̄-thang放sak我；　　Thèng候我將你ê氣力指示下代，　　將你ê大權能指示一切將來ê人。Siōng-tè ah, góa kàu nî-lāu; thâu-mn̂g-pe̍h ê sî, kiû Lí m̄-thang pàng-sak góa; Thèng-hāu góa chiong Lí ê khùi-la̍t chí-sī ē-tāi, Chiong Lí ê tōa koân-lêng chí-sī it-chhè chiong-lâi ê lâng.

19上帝ah，你ê義真高；　　上帝ah，你bat行大ê事；　　Chī-chūi能親像你？Siōng-tè ah, Lí ê gī chin koâiⁿ; Siōng-tè ah, Lí bat kiâⁿ tōa ê sū; Chī-chūi ōe chhin-chhiūⁿ Lí?

20你是hō͘阮歷過chōe-chōe大患難ê；　　你beh hō͘阮koh再活；　　也beh救阮tùi地ê深淵起來。Lí sī hō͘ goán le̍k-kè chōe-chōe tōa hoān-lān ê; Lí beh hō͘ goán koh-chài oa̍h; Iā beh kiù goán tùi tōe ê chhim-ian khí-lâi.

21求你hō͘我ná高大，　　Koh 倒tńg安慰我。Kiû Lí hō͘ góa ná koâiⁿ-tōa, Koh tò-tńg an-ùi góa.

22我ê上帝ah，我beh彈瑟o-ló你，　　O-ló你ê真實；　　以色列ê聖ê ah，　　我beh彈琴o-ló你。Góa ê Siōng-tè ah, góa beh tôaⁿ-sek o-ló Lí, O-ló Lí ê chin-si̍t; Í-sek-lia̍t ê Sèng-ê ah, Góa beh tôaⁿ-khîm o-ló Lí.

23我唱歌o-ló你ê時，　　`我ê嘴唇，以及你所救贖我ê靈魂，beh歡喜出聲。Góa chhiùⁿ-koa o-ló Lí ê sî, Góa ê chhùi-tûn, í-ki̍p Lí só͘ kiù-sio̍k góa ê lêng-hûn, beh hoaⁿ-hí chhut-siaⁿ.

24Koh我ê舌kui日beh講論你ê義，　　因為hiah-ê計謀害我ê人已經見笑受凌辱。Koh góa ê chi̍h kui-ji̍t beh káng-lūn Lí ê gī, In-ūi hiah ê kè-bô͘ hāi góa ê lâng í-keng kiàn-siàu siū lêng-jio̍k.