1耶和華ah，我óa靠你，　　求你hō͘我永永無見笑。Iâ-hô-hoa ah, góa óa-khò Lí, Kiû Lí hō͘ góa éng-éng bô kiàn-siàu.

2照你ê公義拯救我，hō͘我脫離；　　Àⁿ耳孔聽我，來救我。Chiàu Lí ê kong-gī chín-kiù góa, hō͘ góa thoat-lī; Àⁿ hī-khang thiaⁿ góa, lâi kiù góa.

3求你做我thang khiā起ê石磐，hō͘我常常去tiàm hia；　　你已經命令beh救我。　　因為你是我ê山巖，我ê山寨。Kiû Lí chòe góa thang khiā-khí ê chio̍h-pôaⁿ, hō͘ góa siông-siông khì tiàm hia; Lí í-keng bēng-lēng beh kiù góa. In-ūi Lí sī góa ê soaⁿ-giâm, góa ê soaⁿ-chē.

4我ê上帝ah，求你救我脫離pháiⁿ人ê手，　　脫離不義kap殘忍ê人ê手頭。Góa ê Siōng-tè ah, kiû Lí kiù góa thoat-lī pháiⁿ-lâng ê chhiú, Thoat-lī put-gī kap chân-jím ê lâng ê chhiú-thâu.

5因為主耶和華，你是我所ǹg望-ê；　　Tùi我少年ê時你是我所óa靠ê。In-ūi Chú Iâ-hô-hoa, Lí sī góa só͘ ǹg-bāng-ê; Tùi góa siàu-liân ê sî Lí sī góa só͘ óa-khò-ê.

6我tùi胎裡hō͘你扶持，　　hō͘我出老母ê腹肚ê，是你；　　我beh常常o-ló你。Góa tùi thai--nih hō͘ Lí hû-chhî, Hō͘ góa chhut lāu-bú ê pak-tó͘ ê, sī Lí; Góa beh siông-siông o-ló Lí.

7Chōe-chōe人掠我做奇怪；　　總是你是我堅固逃閃ê所在。Chōe-chōe lâng lia̍h góa chòe kî-koài; Chóng-sī Lí sī góa kian-kò͘ tô-siám ê só͘-chāi.

8我滿嘴beh o-ló你，　　Thong日beh榮光你。Góa móa-chhùi beh o-ló Lí, Thong-ji̍t beh êng-kng Lí.

9我年老ê時，求你m̄-thang放sak我；　　我氣力衰lám ê時，求你m̄-thang離開我。Góa nî-lāu ê sî, kiû Lí m̄-thang pàng-sak góa; Góa khùi-la̍t soe-lám ê sî, kiû Lí m̄-thang lī-khui góa.

10因為我ê對敵議論我；　　Hiah-ê當等beh害我ê性命ê相kap參詳，In-ūi góa ê tùi-te̍k gī-lūn góa; Hiah-ê tng-tán beh hāi góa ê sìⁿ-miā--ê saⁿ-kap chham-siông,

11講，上帝已經放sak伊；　　TtaN tio̍h追趕伊，掠伊；因為無救伊ê。Kóng, Siōng-tè í-keng pàng-sak i; Taⁿ tio̍h tui-kóaⁿ i, lia̍h i; in-ūi bô kiù i ê.

12上帝ah，求你m̄-thang離開我遠遠；　　我ê上帝ah，求你緊緊來幫贊我。Siōng-tè ah, kiû Lí m̄-thang lī-khui góa hn̄g-hn̄g; Góa ê Siōng-tè ah, kiû Lí kín-kín lâi pang-chān góa.

13願hiah-ê做我性命ê對敵ê，受見笑滅無；　　願hiah-ê計謀害我ê，受凌辱漏氣。Goān hiah-ê chòe góa sìⁿ-miā ê tùi-te̍k ê, siū kiàn-siàu bia̍t-bô; Goān hiah ê kè-bô͘ hāi góa ê, siū lêng-jio̍k làu-khùi.

14總是我beh常常ǹg望，　　我beh ná久ná o-ló你，Chóng-sī góa beh siông-siông ǹg-bāng, Góa beh ná-kú ná o-ló Lí,

15你ê公義，以及你ê拯救算bōe了，　　我ê嘴thong日beh講起。Lí ê kong-gī, í-ki̍p Lí ê chín-kiù sǹg-bōe-liáu, Góa ê chhùi thong-ji̍t beh kóng-khí.

16我beh來講主耶和華大權能ê事；　　我單單beh講起你ê義。Góa beh lâi kóng Chú Iâ-hô-hoa tōa koân-lêng ê sū; Góa toaⁿ-toaⁿ beh kóng-khí Lí ê gī.

17上帝ah，tùi我少年ê時你有教示我；　　到現今我bat報揚你奇妙ê所做。Siōng-tè ah, tùi góa siàu-liân ê sî Lí ū kà-sī góa; Kàu hiān-kim góa bat pò-iông Lí kî-biāu ê só͘-chòe.

18上帝ah，我到年老；頭毛-白ê時，求你m̄-thang放sak我；　　Thèng候我將你ê氣力指示下代，　　將你ê大權能指示一切將來ê人。Siōng-tè ah, góa kàu nî-lāu; thâu-mn̂g-pe̍h ê sî, kiû Lí m̄-thang pàng-sak góa; Thèng-hāu góa chiong Lí ê khùi-la̍t chí-sī ē-tāi, Chiong Lí ê tōa koân-lêng chí-sī it-chhè chiong-lâi ê lâng.

19上帝ah，你ê義真高；　　上帝ah，你bat行大ê事；　　Chī-chūi能親像你？Siōng-tè ah, Lí ê gī chin koâiⁿ; Siōng-tè ah, Lí bat kiâⁿ tōa ê sū; Chī-chūi ōe chhin-chhiūⁿ Lí?

20你是hō͘阮歷過chōe-chōe大患難ê；　　你beh hō͘阮koh再活；　　也beh救阮tùi地ê深淵起來。Lí sī hō͘ goán le̍k-kè chōe-chōe tōa hoān-lān ê; Lí beh hō͘ goán koh-chài oa̍h; Iā beh kiù goán tùi tōe ê chhim-ian khí-lâi.

21求你hō͘我ná高大，　　Koh 倒tńg安慰我。Kiû Lí hō͘ góa ná koâiⁿ-tōa, Koh tò-tńg an-ùi góa.

22我ê上帝ah，我beh彈瑟o-ló你，　　O-ló你ê真實；　　以色列ê聖ê ah，　　我beh彈琴o-ló你。Góa ê Siōng-tè ah, góa beh tôaⁿ-sek o-ló Lí, O-ló Lí ê chin-si̍t; Í-sek-lia̍t ê Sèng-ê ah, Góa beh tôaⁿ-khîm o-ló Lí.

23我唱歌o-ló你ê時，　　`我ê嘴唇，以及你所救贖我ê靈魂，beh歡喜出聲。Góa chhiùⁿ-koa o-ló Lí ê sî, Góa ê chhùi-tûn, í-ki̍p Lí só͘ kiù-sio̍k góa ê lêng-hûn, beh hoaⁿ-hí chhut-siaⁿ.

24Koh我ê舌kui日beh講論你ê義，　　因為hiah-ê計謀害我ê人已經見笑受凌辱。Koh góa ê chi̍h kui-ji̍t beh káng-lūn Lí ê gī, In-ūi hiah ê kè-bô͘ hāi góa ê lâng í-keng kiàn-siàu siū lêng-jio̍k.

1所羅門ê詩。1) 上帝ah，求你將你ê判斷賞賜王，　　將你ê公義賞賜王ê kiáⁿ。Só͘-lô-bûn ê si.1) Siōng-tè ah, kiû Lí chiong Lí ê phòaⁿ-toàn siúⁿ-sù ông, Chiong Lí ê kong-gī siúⁿ-sù ông ê kiáⁿ.

2伊beh照公義審判你ê百姓，　　照公平判斷你hiah-ê困苦ê人。I beh chiàu kong-gī sím-phòaⁿ Lí ê peh-sìⁿ, Chiàu kong-pêng phòaⁿ-toàn Lí hiah ê khùn-khó͘ ê lâng.

3大山 beh因為公義，hō͘百姓平安，　　山á也beh án-ni。Tōa-soaⁿ beh in-ūi kong-gī, hō͘ peh-sìⁿ pêng-an, Soaⁿ-á iā beh án-ni.

4伊beh kā百姓中困苦ê人判斷，　　伊beh救sòng-hiong ê人，　　伊beh teh碎暴虐ê人。I beh kā peh-sìⁿ-tiong khùn-khó͘ ê lâng phòaⁿ-toàn, I beh kiù sòng-hiong ê lâng, I beh teh-chhùi pō-gio̍k ê lâng.

5人beh敬畏你日久月長，　　直到萬世代。Lâng beh kèng-ùi Lí ji̍t-kú ge̍h-tn̂g, Ti̍t-kàu bān sè-tāi.

6伊beh降臨親像雨落tī已經割ê草，　　親像及時ê雨潤澤土地。I beh kàng-lîm chhin-chhiūⁿ hō͘ lo̍h tī í-keng koah ê chháu, Chhin-chhiūⁿ ki̍p-sî ê hō͘ lūn-te̍k thó͘-tōe.

7Tī伊ê日子義人beh興旺；　　大大平安kap月平久。Tī I ê ji̍t-chí gī-lâng beh heng-ōng; Tōa-tōa pêng-an kap ge̍h pîⁿ kú.

8伊beh掌權tùi chit-ê海到hit-ê海，　　Tùi大河到地極。I beh chiáng-koân tùi chit ê hái kàu hit ê hái, Tùi Tōa-hô kàu tōe-ke̍k.

9Khiā起tī曠野ê beh跪拜tī伊ê面前；　　伊ê對敵beh舐(chī)土粉。Khiā-khí tī khòng-iá-ê beh kūi-pài tī i ê bīn-chêng; I ê tùi-te̍k beh chī thô͘-hún.

10Tha-si kap海嶼ê列王beh進貢；　　Sī-pa kap Se-pa ê王beh獻禮物。Tha-si kap hái-sū ê lia̍t-ông beh chìn-kòng; Sī-pa kap Se-pa ê ông beh hiàn lé-mi̍h.

11列王lóng beh仆落拜伊，　　萬國lóng beh服事伊。Lia̍t-ông lóng beh phak-lo̍h pài i, Bān-kok lóng beh ho̍k-sāi i.

12因為sòng-hiong人求叫ê時，伊beh救伊；　　困苦無依óa ê人伊也beh救。In-ūi sòng-hiong lâng kiû-kiò ê sî, i beh kiù i; Khùn-khó͘ bô i-óa ê lâng i iā beh kiù.

13伊beh憐憫清淡sòng-hiong ê人，　　伊beh拯救sòng-hiong人ê性命。I beh lîn-bín chheng-tām sòng-hiong ê lâng, I beh chín-kiù sòng-hiong lâng ê sìⁿ-miā.

14伊beh救贖in ê性命脫離壓迫kap暴虐；　　伊beh看in ê血做寶貝。I beh kiù-sio̍k in ê sìⁿ-miā thoat-lī ap-pek kap pō-gio̍k; I beh khòaⁿ in ê huih chòe pó-pòe.

15伊beh活teh；beh將Sī-pa ê金hō͘伊，　　Beh常常為伊祈禱，thong日o-ló伊。I beh oa̍h--teh; beh chiong Sī-pa ê kim hō͘ i, Beh siông-siông ūi i kî-tó, Thong-ji̍t o-ló i.

16Tī地裡，tī山頂，五穀的確茂盛，　　所結ê五穀beh搖動，親像黎巴嫩ê樹；　　城內ê人beh興旺，親像地上ê草。Tī tōe--nih, tī soaⁿ-téng, gō͘-kak tek-khak bō͘-sēng, Só͘ kiat ê gō͘-kak beh iô-tāng, chhin-chhiūⁿ Lī-pa-lùn ê chhiū; Siâⁿ-lāi ê lâng beh heng-ōng, chhin-chhiūⁿ tōe-chiūⁿ ê chháu.

17伊ê名beh流到永遠；　　伊ê名beh流傳親像日ê久；　　人beh因為伊來得tio̍h福氣；　　萬國beh稱呼伊有福氣。I ê miâ beh lâu kàu éng-oán; I ê miâ beh liû-thoân chhin-chhiūⁿ ji̍t ê kú; Lâng beh in-ūi i lâi tit-tio̍h hok-khì; Bān-kok beh chheng-ho͘ i ū hok-khì.

18耶和華上帝，就是以色列ê上帝，　　只有伊行奇異ê事，應該o-ló伊。Iâ-hô-hoa Siōng-tè, chiū-sī Í-sek-lia̍t ê Siōng-tè, Chí-ū I kiâⁿ kî-īⁿ ê sū, eng-kai o-ló I.

19願伊榮光ê名永遠受o-ló；　　願伊ê榮光充滿全地。　　A-bēng，koh A-bēng。Goān I êng-kng ê miâ éng-oán siū o-ló; Goān I ê êng-kng chhiong-móa choân-tōe. A-bēng, koh A-bēng.

20耶西ê kiáⁿ大衛ê祈禱明白。Iâ-se ê kiáⁿ Tāi-pi̍t ê kî-tó bêng-pe̍k.

1A-sat ê詩。1) 上帝實在好款待以色列，　　好款待hiah-ê心清氣ê人。A-sat ê si.1) Siōng-tè si̍t-chāi hó khoán-thāi Í-sek-lia̍t, Hó khoán-thāi hiah ê sim chheng-khì ê lâng.

2總是論到我，我ê腳險險踏thu̍t，　　我ê腳險險chhū落去。Chóng-sī lūn-kàu góa, góa ê kha hiám-hiám ta̍h-thu̍t, Góa ê kha hiám-hiám chhū--lo̍h-khì.

3因為我看見pháiⁿ人kap驕傲ê人興旺，　　Hit時我就不平。In-ūi góa khòaⁿ-kìⁿ pháiⁿ-lâng kap kiau-ngō͘ ê lâng heng-ōng, Hit-sî góa chiū put-pêng.

4因為in死ê時無痛疼，　　In ê氣力也勇健。In-ūi in sí ê sî bô thàng-thiàⁿ, In ê khùi-la̍t iā ióng-kiāⁿ.

5In無親像別人勞苦，　　也無親像別人受災厄。In bô chhin-chhiūⁿ pa̍t-lâng lô-khó͘, Iā bô chhin-chhiūⁿ pa̍t-lâng siū chai-ē.

6所以用驕傲做鍊á掛tī in ê頷頸，　　用暴虐做衣裳遮(jia)in ê身軀。Só͘-í ēng kiau-ngō͘ chòe liān-á kòa tī in ê ām-kún, Ēng pō-gio̍k chòe i-chiûⁿ jia in ê seng-khu.

7In因為身體肥，目睭就phòng出；　　In所得tio̍h-ê，贏過心所ài-ê。In in-ūi sin-thé pûi, ba̍k-chiu chiū phòng-chhut; In só͘ tit-tio̍h-ê, iâⁿ-kè sim só͘ ài--ê.

8In譏刺人，照pháiⁿ意思講制壓人ê話；　　In講大話。In ki-chhì lâng, chiàu pháiⁿ ì-sù kóng chè-ap lâng ê ōe; In kóng tōa-ōe.

9In ê嘴褻瀆天，　　In ê舌ho͘-hat全地。In ê chhùi siat-to̍k thiⁿ, In ê chi̍h ho͘-hat choân-tōe.

10所以伊ê百姓歸óa tī-chia，滿杯ê水in lim到了。Só͘-í i ê peh-sìⁿ kui-óa tī-chia, Móa-poe ê chúi in lim kàu liáu.

11In講，上帝thái-thó會知？　　至koânê kiám會曉得mah？In kóng, Siōng-tè thái-thó ōe chai? Chì-koâiⁿ--ê kiám ōe hiáu-tit mah?

12看，chiah-ê就是pháiⁿ人；　　In常常安逸，財寶ná加添。Khòaⁿ, chiah-ê chiū-sī pháiⁿ-lâng; In siông-siông an-ia̍t, châi-pó ná ke-thiⁿ.

13我清氣我ê心實在空空；　　我無罪來洗手也是空空。Góa chheng-khì góa ê sim si̍t-chāi khang-khang; Góa bô chōe lâi sóe chhiú iā sī khang-khang.

14因為我thong日tú-tio̍h災厄，　　Ta̍k早起受責備。In-ūi góa thong-ji̍t tú-tio̍h chai-ē, Ta̍k chá-khí siū chek-pī.

15我若講，我beh án-ni講，　　這是用奸詐款待你ê kiáⁿ類。Góa nā kóng, Góa beh án-ni kóng, Che sī ēng kan-chà khoán-thāi Lí ê kiáⁿ-lūi.

16我teh想ài明白chit-ê你，　　看了實在為難；Góa teh siūⁿ ài bêng-pe̍k chit ê lí, Khòaⁿ-liáu si̍t-chāi ûi-lân;

17到我入上帝聖ê所在，　　詳細想in ê結局。Kàu góa ji̍p Siōng-tè sèng ê só͘-chāi, Siông-sè siūⁿ in ê kiat-kio̍k.

18你實在將in hē tī滑滑ê地，　　Hō͘ in跋tī沉淪ê中間。Lí si̍t-chāi chiong in hē tī ku̍t-ku̍t ê tōe, Hō͘ in poa̍h tī tîm-lûn ê tiong-kan.

19In目nih久成做hiah-nih悽凊；　　In hō͘驚惶滅到了。In ba̍k-nih-kú chiâⁿ-chòe hiah-nih chhiⁿ-chhìn; In hō͘ kiaⁿ-hiâⁿ bia̍t kàu liáu.

20人睏精神怎樣看伊ê bāng，　　主ah，你精神也beh án-ni看輕in ê影像。Lâng khùn cheng-sîn cháiⁿ-iūⁿ khòaⁿ i ê bāng, Chú ah, Lí cheng-sîn iā beh án-ni khòaⁿ-khin in ê iáⁿ-siōng.

21因為我ê心真酸，　　我ê臟腑刺鑿。In-ūi góa ê sim chin sng, Góa ê chōng-hú chhì-chha̍k.

22我chit款ê愚戇，無知；　　Tī你ê面前親像cheng-siⁿ一般。Góa chit-khoán ê gû-gōng, bû-ti; Tī Lí ê bīn-chêng chhin-chhiūⁿ cheng-siⁿ chi̍t-poaⁿ.

23總是我常常kap你tī-teh，　　你牽我ê chiàⁿ手。Chóng-sī góa siông-siông kap Lí tī-teh, Lí khan góa ê chiàⁿ-chhiú.

24你beh用你ê教示引chhōa我，　　後來beh接納我入tī榮光。Lí beh ēng Lí ê kà-sī ín-chhōa góa, Āu-lâi beh chiap-la̍p góa ji̍p tī êng-kng.

25你以外tī天裡我有是誰？　　你以外tī地裡我無所欣慕。Lí í-gōa tī thiⁿ--nih góa ū chī-chūi? Lí í-gōa tī tōe--nih góa bô só͘ him-bō͘.

26我ê肉體，我ê心腸，消無，　　總是上帝是我心肝ê氣力，也是我ê基業直到永遠。Góa ê jio̍k-thé, góa ê sim-tn̂g, siau-bô, Chóng-sī Siōng-tè sī góa sim-koaⁿ ê khùi-la̍t, iā sī góa ê ki-gia̍p ti̍t-kàu éng-oán.

27離開你遠遠-ê的確死無；　　凡若放sak你行姦淫ê，你lóng滅無in。Lī-khui Lí hn̄g-hn̄g-ê tek-khak sí-bô; Hoān-nā pàng-sak Lí kiâⁿ kan-îm-ê, Lí lóng bia̍t-bô in.

28總是我就近上帝是做我ê利益；　　我用主耶和華做我閃避ê所在，　　Thang hō͘我講起你一切ê所做。Chóng-sī góa chiū-kūn Siōng-tè sī chòe góa ê lī-ek; Góa ēng Chú Iâ-hô-hoa chòe góa siám-pī ê só͘-chāi, Thang hō͘ góa kóng-khí Lí it-chhè ê só͘-chòe.