1所羅門ê詩。1) 上帝ah，求你將你ê判斷賞賜王，　　將你ê公義賞賜王ê kiáⁿ。Só͘-lô-bûn ê si.1) Siōng-tè ah, kiû Lí chiong Lí ê phòaⁿ-toàn siúⁿ-sù ông, Chiong Lí ê kong-gī siúⁿ-sù ông ê kiáⁿ.

2伊beh照公義審判你ê百姓，　　照公平判斷你hiah-ê困苦ê人。I beh chiàu kong-gī sím-phòaⁿ Lí ê peh-sìⁿ, Chiàu kong-pêng phòaⁿ-toàn Lí hiah ê khùn-khó͘ ê lâng.

3大山 beh因為公義，hō͘百姓平安，　　山á也beh án-ni。Tōa-soaⁿ beh in-ūi kong-gī, hō͘ peh-sìⁿ pêng-an, Soaⁿ-á iā beh án-ni.

4伊beh kā百姓中困苦ê人判斷，　　伊beh救sòng-hiong ê人，　　伊beh teh碎暴虐ê人。I beh kā peh-sìⁿ-tiong khùn-khó͘ ê lâng phòaⁿ-toàn, I beh kiù sòng-hiong ê lâng, I beh teh-chhùi pō-gio̍k ê lâng.

5人beh敬畏你日久月長，　　直到萬世代。Lâng beh kèng-ùi Lí ji̍t-kú ge̍h-tn̂g, Ti̍t-kàu bān sè-tāi.

6伊beh降臨親像雨落tī已經割ê草，　　親像及時ê雨潤澤土地。I beh kàng-lîm chhin-chhiūⁿ hō͘ lo̍h tī í-keng koah ê chháu, Chhin-chhiūⁿ ki̍p-sî ê hō͘ lūn-te̍k thó͘-tōe.

7Tī伊ê日子義人beh興旺；　　大大平安kap月平久。Tī I ê ji̍t-chí gī-lâng beh heng-ōng; Tōa-tōa pêng-an kap ge̍h pîⁿ kú.

8伊beh掌權tùi chit-ê海到hit-ê海，　　Tùi大河到地極。I beh chiáng-koân tùi chit ê hái kàu hit ê hái, Tùi Tōa-hô kàu tōe-ke̍k.

9Khiā起tī曠野ê beh跪拜tī伊ê面前；　　伊ê對敵beh舐(chī)土粉。Khiā-khí tī khòng-iá-ê beh kūi-pài tī i ê bīn-chêng; I ê tùi-te̍k beh chī thô͘-hún.

10Tha-si kap海嶼ê列王beh進貢；　　Sī-pa kap Se-pa ê王beh獻禮物。Tha-si kap hái-sū ê lia̍t-ông beh chìn-kòng; Sī-pa kap Se-pa ê ông beh hiàn lé-mi̍h.

11列王lóng beh仆落拜伊，　　萬國lóng beh服事伊。Lia̍t-ông lóng beh phak-lo̍h pài i, Bān-kok lóng beh ho̍k-sāi i.

12因為sòng-hiong人求叫ê時，伊beh救伊；　　困苦無依óa ê人伊也beh救。In-ūi sòng-hiong lâng kiû-kiò ê sî, i beh kiù i; Khùn-khó͘ bô i-óa ê lâng i iā beh kiù.

13伊beh憐憫清淡sòng-hiong ê人，　　伊beh拯救sòng-hiong人ê性命。I beh lîn-bín chheng-tām sòng-hiong ê lâng, I beh chín-kiù sòng-hiong lâng ê sìⁿ-miā.

14伊beh救贖in ê性命脫離壓迫kap暴虐；　　伊beh看in ê血做寶貝。I beh kiù-sio̍k in ê sìⁿ-miā thoat-lī ap-pek kap pō-gio̍k; I beh khòaⁿ in ê huih chòe pó-pòe.

15伊beh活teh；beh將Sī-pa ê金hō͘伊，　　Beh常常為伊祈禱，thong日o-ló伊。I beh oa̍h--teh; beh chiong Sī-pa ê kim hō͘ i, Beh siông-siông ūi i kî-tó, Thong-ji̍t o-ló i.

16Tī地裡，tī山頂，五穀的確茂盛，　　所結ê五穀beh搖動，親像黎巴嫩ê樹；　　城內ê人beh興旺，親像地上ê草。Tī tōe--nih, tī soaⁿ-téng, gō͘-kak tek-khak bō͘-sēng, Só͘ kiat ê gō͘-kak beh iô-tāng, chhin-chhiūⁿ Lī-pa-lùn ê chhiū; Siâⁿ-lāi ê lâng beh heng-ōng, chhin-chhiūⁿ tōe-chiūⁿ ê chháu.

17伊ê名beh流到永遠；　　伊ê名beh流傳親像日ê久；　　人beh因為伊來得tio̍h福氣；　　萬國beh稱呼伊有福氣。I ê miâ beh lâu kàu éng-oán; I ê miâ beh liû-thoân chhin-chhiūⁿ ji̍t ê kú; Lâng beh in-ūi i lâi tit-tio̍h hok-khì; Bān-kok beh chheng-ho͘ i ū hok-khì.

18耶和華上帝，就是以色列ê上帝，　　只有伊行奇異ê事，應該o-ló伊。Iâ-hô-hoa Siōng-tè, chiū-sī Í-sek-lia̍t ê Siōng-tè, Chí-ū I kiâⁿ kî-īⁿ ê sū, eng-kai o-ló I.

19願伊榮光ê名永遠受o-ló；　　願伊ê榮光充滿全地。　　A-bēng，koh A-bēng。Goān I êng-kng ê miâ éng-oán siū o-ló; Goān I ê êng-kng chhiong-móa choân-tōe. A-bēng, koh A-bēng.

20耶西ê kiáⁿ大衛ê祈禱明白。Iâ-se ê kiáⁿ Tāi-pi̍t ê kî-tó bêng-pe̍k.

1A-sat ê詩。1) 上帝實在好款待以色列，　　好款待hiah-ê心清氣ê人。A-sat ê si.1) Siōng-tè si̍t-chāi hó khoán-thāi Í-sek-lia̍t, Hó khoán-thāi hiah ê sim chheng-khì ê lâng.

2總是論到我，我ê腳險險踏thu̍t，　　我ê腳險險chhū落去。Chóng-sī lūn-kàu góa, góa ê kha hiám-hiám ta̍h-thu̍t, Góa ê kha hiám-hiám chhū--lo̍h-khì.

3因為我看見pháiⁿ人kap驕傲ê人興旺，　　Hit時我就不平。In-ūi góa khòaⁿ-kìⁿ pháiⁿ-lâng kap kiau-ngō͘ ê lâng heng-ōng, Hit-sî góa chiū put-pêng.

4因為in死ê時無痛疼，　　In ê氣力也勇健。In-ūi in sí ê sî bô thàng-thiàⁿ, In ê khùi-la̍t iā ióng-kiāⁿ.

5In無親像別人勞苦，　　也無親像別人受災厄。In bô chhin-chhiūⁿ pa̍t-lâng lô-khó͘, Iā bô chhin-chhiūⁿ pa̍t-lâng siū chai-ē.

6所以用驕傲做鍊á掛tī in ê頷頸，　　用暴虐做衣裳遮(jia)in ê身軀。Só͘-í ēng kiau-ngō͘ chòe liān-á kòa tī in ê ām-kún, Ēng pō-gio̍k chòe i-chiûⁿ jia in ê seng-khu.

7In因為身體肥，目睭就phòng出；　　In所得tio̍h-ê，贏過心所ài-ê。In in-ūi sin-thé pûi, ba̍k-chiu chiū phòng-chhut; In só͘ tit-tio̍h-ê, iâⁿ-kè sim só͘ ài--ê.

8In譏刺人，照pháiⁿ意思講制壓人ê話；　　In講大話。In ki-chhì lâng, chiàu pháiⁿ ì-sù kóng chè-ap lâng ê ōe; In kóng tōa-ōe.

9In ê嘴褻瀆天，　　In ê舌ho͘-hat全地。In ê chhùi siat-to̍k thiⁿ, In ê chi̍h ho͘-hat choân-tōe.

10所以伊ê百姓歸óa tī-chia，滿杯ê水in lim到了。Só͘-í i ê peh-sìⁿ kui-óa tī-chia, Móa-poe ê chúi in lim kàu liáu.

11In講，上帝thái-thó會知？　　至koânê kiám會曉得mah？In kóng, Siōng-tè thái-thó ōe chai? Chì-koâiⁿ--ê kiám ōe hiáu-tit mah?

12看，chiah-ê就是pháiⁿ人；　　In常常安逸，財寶ná加添。Khòaⁿ, chiah-ê chiū-sī pháiⁿ-lâng; In siông-siông an-ia̍t, châi-pó ná ke-thiⁿ.

13我清氣我ê心實在空空；　　我無罪來洗手也是空空。Góa chheng-khì góa ê sim si̍t-chāi khang-khang; Góa bô chōe lâi sóe chhiú iā sī khang-khang.

14因為我thong日tú-tio̍h災厄，　　Ta̍k早起受責備。In-ūi góa thong-ji̍t tú-tio̍h chai-ē, Ta̍k chá-khí siū chek-pī.

15我若講，我beh án-ni講，　　這是用奸詐款待你ê kiáⁿ類。Góa nā kóng, Góa beh án-ni kóng, Che sī ēng kan-chà khoán-thāi Lí ê kiáⁿ-lūi.

16我teh想ài明白chit-ê你，　　看了實在為難；Góa teh siūⁿ ài bêng-pe̍k chit ê lí, Khòaⁿ-liáu si̍t-chāi ûi-lân;

17到我入上帝聖ê所在，　　詳細想in ê結局。Kàu góa ji̍p Siōng-tè sèng ê só͘-chāi, Siông-sè siūⁿ in ê kiat-kio̍k.

18你實在將in hē tī滑滑ê地，　　Hō͘ in跋tī沉淪ê中間。Lí si̍t-chāi chiong in hē tī ku̍t-ku̍t ê tōe, Hō͘ in poa̍h tī tîm-lûn ê tiong-kan.

19In目nih久成做hiah-nih悽凊；　　In hō͘驚惶滅到了。In ba̍k-nih-kú chiâⁿ-chòe hiah-nih chhiⁿ-chhìn; In hō͘ kiaⁿ-hiâⁿ bia̍t kàu liáu.

20人睏精神怎樣看伊ê bāng，　　主ah，你精神也beh án-ni看輕in ê影像。Lâng khùn cheng-sîn cháiⁿ-iūⁿ khòaⁿ i ê bāng, Chú ah, Lí cheng-sîn iā beh án-ni khòaⁿ-khin in ê iáⁿ-siōng.

21因為我ê心真酸，　　我ê臟腑刺鑿。In-ūi góa ê sim chin sng, Góa ê chōng-hú chhì-chha̍k.

22我chit款ê愚戇，無知；　　Tī你ê面前親像cheng-siⁿ一般。Góa chit-khoán ê gû-gōng, bû-ti; Tī Lí ê bīn-chêng chhin-chhiūⁿ cheng-siⁿ chi̍t-poaⁿ.

23總是我常常kap你tī-teh，　　你牽我ê chiàⁿ手。Chóng-sī góa siông-siông kap Lí tī-teh, Lí khan góa ê chiàⁿ-chhiú.

24你beh用你ê教示引chhōa我，　　後來beh接納我入tī榮光。Lí beh ēng Lí ê kà-sī ín-chhōa góa, Āu-lâi beh chiap-la̍p góa ji̍p tī êng-kng.

25你以外tī天裡我有是誰？　　你以外tī地裡我無所欣慕。Lí í-gōa tī thiⁿ--nih góa ū chī-chūi? Lí í-gōa tī tōe--nih góa bô só͘ him-bō͘.

26我ê肉體，我ê心腸，消無，　　總是上帝是我心肝ê氣力，也是我ê基業直到永遠。Góa ê jio̍k-thé, góa ê sim-tn̂g, siau-bô, Chóng-sī Siōng-tè sī góa sim-koaⁿ ê khùi-la̍t, iā sī góa ê ki-gia̍p ti̍t-kàu éng-oán.

27離開你遠遠-ê的確死無；　　凡若放sak你行姦淫ê，你lóng滅無in。Lī-khui Lí hn̄g-hn̄g-ê tek-khak sí-bô; Hoān-nā pàng-sak Lí kiâⁿ kan-îm-ê, Lí lóng bia̍t-bô in.

28總是我就近上帝是做我ê利益；　　我用主耶和華做我閃避ê所在，　　Thang hō͘我講起你一切ê所做。Chóng-sī góa chiū-kūn Siōng-tè sī chòe góa ê lī-ek; Góa ēng Chú Iâ-hô-hoa chòe góa siám-pī ê só͘-chāi, Thang hō͘ góa kóng-khí Lí it-chhè ê só͘-chòe.

1A-sat教示ê詩。1) 上帝ah，你啥事永遠放sak阮？　　你啥事受氣你草場ê羊，親像出火煙？A-sat kà-sī ê si.1) Siōng-tè ah, Lí siáⁿ-sū éng-oán pàng-sak goán? Lí siáⁿ-sū siū-khì Lí chháu-tiûⁿ ê iûⁿ, chhin-chhiūⁿ chhut hé-ian?

2求你記念你早時所得tio̍h ê會眾，　　就是你所贖回做你ê業ê支派ê；　　也tio̍h記念你平時所khiā起ê錫安山。Kiû Lí kì-liām Lí chá-sî só͘ tit-tio̍h ê hōe-chiòng, Chiū-sī Lí só͘ sio̍k-hôe chòe Lí ê gia̍p ê chi-phài ê; Iā tio̍h kì-liām Lí pêng-sî só͘ khiā-khí ê Sek-an soaⁿ.

3求你行到hiah-ê久久拋荒ê地，　　看對敵tī聖所一切所毀壞ê。Kiû Lí kiâⁿ kàu hiah ê kú-kú pha-hng ê tōe, Khòaⁿ tùi-te̍k tī sèng-só͘ it-chhè só͘ húi-hoāi ê.

4你ê對敵tī你ê會內hōa-hōa哮；　　In khiā in ê期做記號。Lí ê tùi-te̍k tī Lí ê hōe-lāi hōa-hōa-háu; In khiā in ê kî chòe kì-hō.

5In親像人kia̍h起斧頭，　　來chhò樹林ê樹。In chhin-chhiūⁿ lâng kia̍h-khí pó͘-thâu, Lâi chhò chhiū-nâ ê chhiū.

6聖所ê內面一切雕刻-ê，　　In現在用斧頭kap槌一盡phah-pháiⁿ。Sèng-só͘ ê lāi-bīn it-chhè tiau-khek-ê, In hiān-chāi ēng pó͘-thâu kap thûi it-chīn phah-pháiⁿ.

7In放火燒你ê聖所，　　Phah lâ-sâm你ê名所khiā起ê所在，成做平地。In pàng-hé sio Lí ê sèng-só͘, Phah lâ-sâm Lí ê miâ só͘ khiā-khí ê só͘-chāi, chiâⁿ-chòe pîⁿ-tōe.

8In心內講，咱tio̍h一盡毀壞in；　　In tī遍地將上帝ê會堂lóng燒lio去。In sim-lāi kóng, Lán tio̍h it-chīn húi-hoāi in; In tī piàn-tōe chiong Siōng-tè ê hōe-tn̂g lóng sio-lio--khì.

9阮無看見阮ê兆頭，　　無koh有先知；　　阮中間也無人知beh到甚麼時。Goán bô khòaⁿ-kìⁿ goán ê tiāu-thâu, Bô koh ū sian-ti; Goán tiong-kan iā bô lâng chai beh kàu sím-mi̍h sî.

10上帝ah，對敵譏刺beh到甚麼時？　　仇讎褻瀆你ê名beh到永遠mah？Siōng-tè ah, tùi-te̍k ki-chhì beh kàu sím-mi̍h sî? Kiû-siû siat-to̍k Lí ê miâ beh kàu éng-oán mah?

11你為何kiu你ê手，就是你ê chiàⁿ手？　　求你tùi你ê胸前伸出來，毀滅in。Lí ūi-hô kiu Lí ê chhiú, chiū-sī Lí ê chiàⁿ-chhiú? Kiû Lí tùi Lí ê heng-chêng chhun-chhut--lâi, húi-bia̍t in.

12總是上帝tùi早以來做我ê王，　　Tī地裡行拯救。Chóng-sī Siōng-tè tùi chá í-lâi chòe góa ê ông, Tī tōe--nih kiâⁿ chín-kiù.

13你bat用你ê權能將海分開；　　Phah破水中大動物ê頭殼。Lí bat ēng Lí ê koân-lêng chiong hái pun-khui; Phah-phòa chúi-tiong tōa tōng-bu̍t ê thâu-khak.

14你bat kòng碎鱷魚ê頭殼，　　將伊hō͘曠野ê野獸做食物。Lí bat kòng-chhùi go̍k-hî ê thâu-khak, Chiong i hō͘ khòng-iá ê iá-siù chòe chia̍h-mi̍h.

15你bat分開水源kap河；　　你bat hō͘長流ê江河乾去。Lí bat pun-khui chúi-goân kap hô; Lí bat hō͘ tn̂g-lâu ê kang-hô ta--khì.

16日時屬你，暝時也屬你；　　光 kap日頭是你所備辦-ê。Ji̍t--sî sio̍k Lí, mî--sî iā sio̍k Lí; Kng kap ji̍t-thâu sī Lí só͘ pī-pān--ê.

17地上一切ê界限是你所設立；　　夏天kap冬天是你所定tio̍h。Tōe-chiūⁿ it-chhè ê kài-hān sī Lí só͘ siat-li̍p; Hē-thiⁿ kap tang-thiⁿ sī Lí só͘ tiāⁿ-tio̍h.

18耶和華ah，求你記得，對敵有譭謗，　　戇ê百姓褻瀆你ê名。Iâ-hô-hoa ah, kiû Lí kì-tit, tùi-te̍k ū húi-pòng, Gōng ê peh-sìⁿ siat-to̍k Lí ê miâ.

19你ê ka-chui ê性命，m̄-thang交hō͘野獸；　　你sòng-hiong人ê活命m̄-thang永遠bōe記得。Lí ê ka-chui ê sìⁿ-miā, m̄-thang kau hō͘ iá-siù; Lí sòng-hiong lâng ê oa̍h-miā m̄-thang éng-oán bōe kì-tit.

20求你siàu念所立ê約；　　因為地上烏暗ê所在滿滿是強暴ê巢穴。Kiû Lí siàu-liām só͘ li̍p ê iok; In-ūi tōe-chiūⁿ o͘-àm ê só͘-chāi móa-móa sī kiông-pō ê châu-hia̍t

21受壓制ê人，m̄-thang hō͘ in見笑tò去；　　困苦sòng-hiong ê人tio̍h hō͘ in o-ló你ê名。Siū ap-chè ê lâng, m̄-thang hō͘ in kiàn-siàu tò--khì; Khùn-khó͘ sòng-hiong ê lâng tio̍h hō͘ in o-ló Lí ê miâ.

22上帝ah，求你起來為家己分訴；　　Tio̍h記得戇人thong日怎樣teh譭謗你。Siōng-tè ah, kiû Lí khí-lâi ūi ka-kī hun-sò͘; Tio̍h kì--tit gōng-lâng thong-ji̍t cháiⁿ-iūⁿ teh húi-pòng Lí.

23M̄-thang bōe記得你ê對敵ê聲；　　Hiah-ê起來攻擊你ê人，in ê hán-hōa常常上到頂面。M̄-thang bōe-kì--tit Lí ê tùi-te̍k ê siaⁿ; Hiah ê khí-lâi kong-kek Lí ê lâng, in ê hán-hōa siông-siông chiūⁿ kàu téng-bīn.