1A-sat ê詩，照Iâ-tō͘-tùn ê做法；交hō͘樂官。1) 我beh對上帝出聲求叫；　　我對上帝出聲，伊beh àⁿ耳孔聽我。A-sat ê si, chiàu Iâ-tō͘-tùn ê chòe-hoat; kau hō͘ Ga̍k-koaⁿ.1) Góa beh tùi Siōng-tè chhut-siaⁿ kiû-kiò; Góa tùi Siōng-tè chhut-siaⁿ, I beh àⁿ hī-khang thiaⁿ góa.

2Tī我患難ê日我chhē主；　　我tī暝時kia̍h起手無停，　　我ê心m̄肯受安慰。Tī góa hoān-lān ê ji̍t góa chhē Chú; Góa tī mî--sî kia̍h-khí chhiú bô thêng, Góa ê sim m̄-khéng siū an-ùi.

3我siàu念上帝，就擘腹；　　我靜靜想，心神暈去。[Sè-la̍h]Góa siàu-liām Siōng-tè, chiū peh-pak; Góa chēng-chēng siūⁿ, sim-sîn hūn--khì. [Sè-la̍h

4你hō͘我ê目睭無一時khoeh；　　我煩惱到lóng bōe講話。Lí hō͘ góa ê ba̍k-chiu bô chi̍t-sî khoeh; Góa hoân-ló kàu lóng bōe kóng-ōe.

5我追念古早ê日，就是極早ê年。Góa tui-liām kó͘-chá ê ji̍t, Chiū-sī ke̍k-chá ê nî.

6我想起我暝間ê詩歌，　　我摸心家己問，　　我ê心神亦詳細省察。Góa siūⁿ-khí góa mî-kan ê si-koa, Góa bong-sim ka-kī mn̄g, Góa ê sim-sîn ia̍h siông-sè séng-chhat.

7主kiám beh永遠放sak mah？　　無koh施恩mah？Chú kiám beh éng-oán pàng-sak mah? Bô koh si-un mah?

8伊ê慈愛kiám永遠窮盡mah？　　伊ê應允kiám代代廢無mah？I ê chû-ài kiám éng-oán kiông-chīn mah? I ê èng-ún kiám tāi-tāi hòe-bô mah?

9上帝kiám bōe記得施恩mah？　　Kiám因為受氣塞密伊ê慈悲mah？[Sè-la̍h]Siōng-tè kiám bōe-kì-tit si-un mah? Kiám in-ūi siū-khì that-ba̍t I ê chû-pi mah? [Sè-la̍h

10我講，這就是我ê軟弱；　　至koânê伸出chiàⁿ手ê年，我beh siàu念。Góa kóng, Che chiū-sī góa ê loán-jio̍k; Chì-koâiⁿ--ê chhun-chhut chiàⁿ-chhiú ê nî, góa beh siàu-liām.

11我beh講起耶和華ê所行，　　Siàu念伊早時ê神跡。Góa beh kóng-khí Iâ-hô-hoa ê só͘-kiâⁿ, Siàu-liām I chá-sî ê sîn-jiah.

12我beh忖度你ê所行，　　靜靜想你ê所做。Góa beh chhún-to̍k Lí ê só͘-kiâⁿ, Chēng-chēng siūⁿ Lí ê só͘-chòe.

13上帝ah，你ê路是聖ê；　　有甚麼神明大親像上帝？Siōng-tè ah, Lí ê lō͘ sī sèng--ê; Ū sím-mi̍h sîn-bêng tōa chhin-chhiūⁿ Siōng-tè?

14你是行奇事ê上帝；　　你bat tī 萬百姓ê中間，顯明你ê權能。Lí sī kiâⁿ kî-sū ê Siōng-tè; Lí bat tī bān peh-sìⁿ ê tiong-kan, hián-bêng Lí ê koân-lêng.

15你bat用你ê手贖回你ê百姓，　　就是雅各kap約瑟ê kiáⁿ孫。[Sè-la̍h]Lí bat ēng Lí ê chhiú sio̍k-hôe Lí ê peh-sìⁿ, Chiū-sī Ngá-kok kap Iok-sek ê kiáⁿ-sun. [Sè-la̍h

16上帝ah，chiah-ê水見tio̍h你，　　Chiah-ê水見tio̍h你，lóng驚惶，　　深淵亦ngia̍uh-ngia̍uh-chhoah。Siōng-tè ah, chiah ê chúi kìⁿ-tio̍h Lí, Chiah ê chúi kìⁿ-tio̍h Lí, lóng kiaⁿ-hiâⁿ, Chhim-ian ia̍h ngia̍uh-ngia̍uh-chhoah.

17密雲piàⁿ出水，　　穹蒼出聲，　　你ê箭四界射。Ba̍t-hûn piàⁿ-chhut chúi, Kiong-chhong chhut-siaⁿ, Lí ê chìⁿ sì-kòe siā.

18Tī捲螺風內有你雷ê聲；　　Sih-nà ê光sih到thong世間；　　地ngia̍uh-ngia̍uh-chhoah，koh振動。Tī kńg-lê-hong-lāi ū Lí lûi ê siaⁿ; Sih-nà ê kng sih kàu thong sè-kan; Tōe ngia̍uh-ngia̍uh-chhoah, koh tín-tāng.

19你ê道路tī海中，　　你ê路徑tī大水中，　　你ê腳跡無人能知。Lí ê tō-lō͘ tī hái-tiong, Lí ê lō͘-kèng tī tōa-chúi-tiong, Lí ê kha-jiah bô lâng ōe chai.

20早你用摩西亞倫ê手，　　Chhōa你ê百姓親像羊群。Chá Lí ēng Mô͘-se A-lûn ê chhiú, Chhōa Lí ê peh-sìⁿ chhin-chhiūⁿ iûⁿ-kûn.

1A-sat教示ê詩。1) 我ê百姓ah，lín tio̍h聽我ê教示，　　Àⁿ耳孔聽我ê嘴ê話。A-sat kà-sī ê si.1) Góa ê peh-sìⁿ ah, lín tio̍h thiaⁿ góa ê kà-sī, Àⁿ hī-khang thiaⁿ góa ê chhùi ê ōe.

2我beh開嘴設譬喻，　　我beh講出古早隱密ê話，Góa beh khui-chhùi siat phì-jū, Góa beh kóng-chhut kó͘-chá ún-ba̍t ê ōe,

3就是阮所聽見，所知ê；　　亦是阮ê祖公傳hō͘阮ê。Chiū-sī goán só͘ thiaⁿ-kìⁿ, só͘ chai ê; Ia̍h sī goán ê chó͘-kong thoân hō͘ goán--ê.

4阮無beh將chiah-ê事對in ê kiáⁿ孫隱瞞；　　Beh將耶和華ê名聲kap伊ê權能，以及伊所行奇妙ê事，　　傳hō͘後世代。Goán bô beh chiong chiah ê sū tùi in ê kiáⁿ-sun ún-môa; Beh chiong Iâ-hô-hoa ê miâ-siaⁿ kap I ê koân-lêng, í-ki̍p I só͘ kiâⁿ kî-biāu ê sū, Thoân hō͘ āu sè-tāi.

5因為伊tī雅各立干證ê話，tī以色列設律法；　　是伊命令咱ê祖公ê，thang傳hō͘ in ê kiáⁿ孫。In-ūi I tī Ngá-kok li̍p kan-chèng ê ōe, tī Í-sek-lia̍t siat lu̍t-hoat; Sī I bēng-lēng lán ê chó͘-kong ê, thang thoân hō͘ in ê kiáⁿ-sun.

6Hō͘後代，就是得beh出世ê kiáⁿ孫知；　　In亦beh起來傳hō͘ in ê kiáⁿ孫；Hō͘ āu-tāi, chiū-sī tit-beh chhut-sì ê kiáⁿ-sun chai; In ia̍h beh khí-lâi thoân hō͘ in ê kiáⁿ-sun;

7Hō͘ in ê ǹg望在tī上帝，　　無bōe記得全能ê ê所做，　　是beh遵守伊ê誡命。Hō͘ in ê ǹg-bāng chāi-tī Siōng-tè, Bô bōe-kì-tit Choân-lêng--ê ê só͘ chòe, Sī beh chun-siú I ê kài-bēng.

8免得親像in ê祖公，　　是硬心悖逆ê世代，　　是存心無四正ê世代，　　In ǹg上帝ê心無堅固。Bián-tit chhin-chhiūⁿ in ê chó͘-kong, Sī ngī-sim pōe-ge̍k ê sè-tāi, Sī chûn-sim bô sì-chiàⁿ ê sè-tāi, In ǹg Siōng-tè ê sim bô kian-kò͘.

9Í-hoat-liân ê kiáⁿ孫kia̍h ke-si kap弓箭，　　臨陣ê日，oa̍t-tńg身退後。Í-hoat-liân ê kiáⁿ-sun kia̍h ke-si kap keng-chìⁿ, Lîm-tīn ê ji̍t, oa̍t-tńg-sin thè-āu.

10In無遵守上帝ê約，　　M̄肯照伊ê律法來行。In bô chun-siú Siōng-tè ê iok, M̄-khéng chiàu I ê lu̍t-hoat lâi kiâⁿ.

11Koh bōe記得伊所行ê，　　Kap伊所hō͘ in看奇妙ê事。Koh bōe-kì-tit I só͘-kiâⁿ-ê, Kap I só͘ hō͘ in khòaⁿ kî-biāu ê sū.

12伊tī埃及地，Só-an ê田，　　Tī in祖公ê目睭前，行奇異ê事。I tī Ai-ki̍p tōe, Só-an ê chhân, Tī in chó͘-kong ê ba̍k-chiu chêng, kiâⁿ kî-īⁿ ê sū.

13伊分開海，hō͘ in過去；　　Koh hō͘水khiā起來，親像土堆。I pun-khui hái, hō͘ in kè--khì; Koh hō͘ chúi khiā--khí-lâi, chhin-chhiūⁿ thô͘-tui.

14伊日時用雲chhōa-in，　　Thong暝用火ê光chhōa-in。I ji̍t--sî ēng hûn chhōa--in, Thong-mî ēng hé ê kng chhōa--in.

15伊tī曠野hō͘石磐裂開，　　Hō͘ in chōe-chōe水thang lim，親像tùi深淵出。I tī khòng-iá hō͘ chio̍h-pôaⁿ li̍h-khui, Hō͘ in chōe-chōe chúi thang lim, chhin-chhiūⁿ tùi chhim-ian chhut.

16伊hō͘水tùi石磐chhèng出，　　Hō͘水親像江河流落。I hō͘ chúi tùi chio̍h-pôaⁿ chhèng-chhut, Hō͘ chúi chhin-chhiūⁿ kang-hô lâu-lo̍h.

17In猶原ta̍uh-ta̍uh得罪伊；　　Tī乾燥ê地悖逆至koânê。In iû-goân ta̍uh-ta̍uh tek-chōe I; Tī ta-sò ê tōe pōe-ge̍k Chì-koâiⁿ--ê.

18In心內試上帝，　　照in家己所ài-ê求食物。In sim-lāi chhì Siōng-tè, Chiàu in ka-kī só͘-ài--ê kiû chia̍h-mi̍h.

19In lām-sám議論上帝，講，　　全能ê主tī曠野kiám會辦桌mah？In lām-sám gī-lūn Siōng-tè, kóng, Choân-lêng ê Chú tī khòng-iá kiám ōe pān-toh mah?

20伊bat phah石磐hō͘水chhèng出，　　江河滿出來；　　伊也會賞賜米糧mah？　　伊也會kā伊ê百姓備辦肉mah？I bat phah chio̍h-pôaⁿ hō͘ chúi chhèng-chhut, Kang-hô móa--chhut-lâi; I iā ōe siúⁿ-sù bí-niû mah? I iā ōe kā I ê peh-sìⁿ pī-pān bah mah?

21所以耶和華聽見就受氣，　　就有焰火燒雅各ê家，　　受氣發起tī以色列族。Só͘-í Iâ-hô-hoa thiaⁿ-kìⁿ chiū siū-khì, Chiū ū iām-hé sio Ngá-kok ê ke, Siū-khì hoat-khí tī Í-sek-lia̍t cho̍k.

22因為in m̄信服上帝，　　M̄ óa靠伊ê救恩。In-ūi in m̄ sìn-ho̍k Siōng-tè, M̄ óa-khò I ê kiù-un.

23總是伊就命令tī頂面ê穹蒼，　　Koh開天ê門；Chóng-sī I chiū bēng-lēng tī téng-bīn ê kiong-chhong, Koh khui thiⁿ ê mn̂g;

24伊降落má-ná親像落雨，hō͘ in食；　　將天ê米糧賞賜in。I kàng-lo̍h má-ná chhin-chhiūⁿ lo̍h hō͘, hō͘ in chia̍h; Chiong thiⁿ ê bí-niû siúⁿ-sù in.

25人食大權能ê ê食物；　　伊賞賜米糧hō͘ in飽足。Lâng chia̍h tōa-koân-lêng--ê ê chia̍h-mi̍h; I siúⁿ-sù bí-niû hō͘ in pá-chiok.

26伊hō͘東風起tī天裡；　　用伊ê權能chhōa南風來。I hō͘ tang-hong khí tī thiⁿ--nih; Ēng I ê koân-lêng chhōa lâm-hong lâi.

27伊降落肉tī in中間，chōe親像土粉，　　Koh飛鳥chōe親像海沙。I kàng-lo̍h bah tī in tiong-kan, chōe chhin-chhiūⁿ thô͘-hún, Koh pe-chiáu chōe chhin-chhiūⁿ hái-soa.

28落tī in ê營中，　　Tī in khiā起ê所在ê四圍。Lo̍h tī in ê iâⁿ-tiong, Tī in khiā-khí ê só͘-chāi ê sì-ûi.

29In就食到飽飽；　　伊照in所ài-ê雨in。In chiū chia̍h kàu pá-pá; I chiàu in só͘-ài-ê hō͘ in.

30In ê所ài，iáu未飽厭，　　In ê食物iáu tī in ê嘴內ê時，In ê só͘-ài, iáu-bē pá-ià, In ê chia̍h-mi̍h iáu tī in ê chhùi-lāi ê sî,

31上帝就對in發起受氣，　　Thâi死in中間ê好漢人，　　打倒以色列ê少年人。Siōng-tè chiū tùi in hoat-khí siū-khì, Thâi-sí in tiong-kan ê hó-hàn lâng, Táⁿ-tó Í-sek-lia̍t ê siàu-liân lâng.

32雖然án-ni，in猶原koh犯罪；　　無因為伊奇怪ê所做來信伊。Sui-jiân án-ni, in iû-goân koh hoān-chōe; Bô in-ūi I kî-koài ê só͘-chòe lâi sìn I.

33所以伊hō͘ in空空過日；　　Hō͘ in歷年驚惶。Só͘-í I hō͘ in khang-khang kè-ji̍t; Hō͘ in le̍k-nî kiaⁿ-hiâⁿ.

34伊thâi in ê時，in chiah來求伊；　　就oa̍t倒tńg切切求上帝。I thâi in ê sî, in chiah lâi kiû I; Chiū oa̍t-tò-tńg chhiat-chhiat kiû Siōng-tè.

35In亦追念上帝是in ê石磐，　　至koânê全能ê是贖回in-ê。In ia̍h tui-liām Siōng-tè sī in ê chio̍h-pôaⁿ, Chì-koâiⁿ ê Choân-lêng-ê sī sio̍k-hôe in--ê.

36總是in用嘴諂媚伊，　　用舌對伊講白賊。Chóng-sī in ēng chhùi thiám-mī I, Ēng chi̍h tùi I kóng pe̍h-chha̍t.

37因為in無堅心意向伊，　　無盡忠守伊ê約。In-ūi in bô kian-sim ì-hiòng I, Bô chīn-tiong siú I ê iok.

38總是伊有憐憫，赦免in ê罪惡，無滅無in；　　Koh ta̍uh-ta̍uh消伊ê受氣，　　無一盡發出伊ê受氣。Chóng-sī I ū lîn-bín, sià-bián in ê chōe-ok, bô bia̍t-bô in; Koh ta̍uh-ta̍uh siau I ê siū-khì, Bô it-chīn hoat-chhut I ê siū-khì.

39伊想tio̍h in不過是血氣，　　是chhe過去無倒tńg ê風。I siūⁿ-tio̍h in put-kò sī hiat-khì, Sī chhe-kè--khì bô tò-tńg ê hong.

40In tī曠野悖逆伊，　　Tī拋荒ê所在，hō͘伊憂悶，到hiah chōe pái ah！In tī khòng-iá pōe-ge̍k I, Tī pha-hng ê só͘-chāi, hō͘ I iu-būn, kàu hiah chōe pái ah!

41In再三試上帝，　　抵觸(tú-tak)以色列ê聖ê。In chài-saⁿ chhì Siōng-tè, Tú-tak Í-sek-lia̍t ê Sèng--ê.

42In bōe記得伊ê權能，　　Kap贖回in脫離對敵ê日；In bōe-kì-tit I ê koân-lêng, Kap sio̍k-hôe in thoat-lī tùi-te̍k ê ji̍t;

43伊怎樣tī埃及顯出伊ê神跡；　　Tī Só-an chhân，顯出奇事；I cháiⁿ-iūⁿ tī Ai-ki̍p hián-chhut I ê sîn-jiah; Tī Só-an chhân, hián-chhut kî-sū;

44將in ê江河變做血，　　In ê káng亦是án-ni，致到lóng bōe lim-得。Chiong in ê kang-hô pìⁿ-chòe huih, In ê káng ia̍h sī án-ni, tì-kàu lóng bōe lim--tit.

45伊hō͘胡蠅kui陣到in中間來沾in；　　Koh hō͘田蛙á來害 in。I hō͘ hô͘-sîn kui-tīn kàu in tiong-kan lâi cham in; Koh hō͘ chhân-kap-á lâi hāi in.

46將in ê土產，交hō͘蟲thōa；　　將in勞苦來得tio̍h-ê交hō͘草蜢。Chiong in ê thó͘-sán, kau hō͘ thâng-thōa; Chiong in lô-khó͘ lâi tit-tio̍h-ê kau hō͘ chháu-meh.

47伊落雹，毀壞in ê葡萄樹，　　落霜，毀壞in ê桑材樹。I lo̍h-pha̍uh, húi-hoāi in ê phû-tô-chhiū, Lo̍h-sng, húi-hoāi in ê sng-châi-chhiū.

48Koh將in ê cheng-siⁿ交hō͘雹，　　將in kui群ê cheng-siⁿ交hō͘ sih-nà。Koh chiong in ê cheng-siⁿ kau hō͘ pha̍uh, Chiong in kui-kûn ê cheng-siⁿ kau hō͘ sih-nà.

49伊發出伊ê大受氣，　　以及受氣，痛恨，苦難，　　Kui陣降災厄ê使者lóng到tī in。I hoat-chhut I ê tōa siū-khì, Í-ki̍p siū-khì, thòng-hūn, khó͘-lān, Kui-tīn kàng chai-ē ê sù-chiá lóng kàu tī in.

50伊為tio̍h家己ê受氣pho͘-pîⁿ伊ê路；　　Hō͘ in ê性命bōe免得死；　　將in ê活命交hō͘瘟疫。I ūi-tio̍h ka-kī ê siū-khì pho͘-pîⁿ I ê lō͘; Hō͘ in ê sìⁿ-miā bōe bián-tit sí; Chiong in ê oa̍h-miā kau hō͘ un-e̍k.

51Tī埃及phah死一切ê大kiáⁿ，　　Tī Hâm ê布棚中phah死in ê頭chiūⁿ-kiáⁿ。Tī Ai-ki̍p phah-sí it-chhè ê tōa-kiáⁿ, Tī Hâm ê pò͘-pîⁿ-tiong phah-sí in ê thâu-chiūⁿ-kiáⁿ.

52總是伊chhōa出家己ê百姓，親像羊；　　Tī曠野chhōa in親像羊群。Chóng-sī I chhōa-chhut ka-kī ê peh-sìⁿ, chhin-chhiūⁿ iûⁿ; Tī khòng-iá chhōa in chhin-chhiūⁿ iûⁿ-kûn.

53伊chhōa in安穩，hō͘ in無驚惶；　　海就淹死in ê對敵。I chhōa in an-ún, hō͘ in bô kiaⁿ-hiâⁿ; Hái chiū im-sí in ê tùi-te̍k.

54伊koh chhōa in到聖地ê交界；　　到伊chiàⁿ手所得tio̍h chit-ê山。I koh chhōa in kàu sèng-tōe ê kau-kài; Kàu I chiàⁿ-chhiú só͘ tit-tio̍h chit ê soaⁿ.

55伊tī in ê面前趕出列邦人；　　用索á將外邦人ê地量hō͘ in做業；　　Hō͘以色列ê支派khiā起in ê布棚。I tī in ê bīn-chêng kóaⁿ-chhut lia̍t-pang-lâng; Ēng soh-á chiong gōa-pang-lâng ê tōe niû hō͘ in chòe-gia̍p; Hō͘ Í-sek-lia̍t ê chi-phài khiā-khí in ê pò͘-pîⁿ.

56In猶原chhì至koânê上帝，來悖逆伊；　　無守伊干證ê話。In iû-goân chhì chì-koâiⁿ ê Siōng-tè, lâi pōe-ge̍k I; Bô siú I kan-chèng ê ōe.

57失信悖逆，無各樣in ê祖公；　　變款親像弓péng-lìn-tńg。Sit-sìn pōe-ge̍k, bô koh-iūⁿ in ê chó͘-kong; Piàn-khoán chhin-chhiūⁿ keng péng-lìn-tńg.

58因為in用in山頭ê壇，惹tio̍h伊ê受氣；　　用in雕刻ê偶像，hō͘伊痛恨。In-ūi in ēng in soaⁿ-thâu ê tôaⁿ, jiá-tio̍h I ê siū-khì; Ēng in tiau-khek ê ngó͘-siōng, hō͘ I thòng-hūn.

59上帝聽見就受氣，　　大厭惡以色列。Siōng-tè thiaⁿ-kìⁿ chiū siū-khì, Tōa iàm-ò͘ⁿ Í-sek-lia̍t.

60甚至棄sak Sī-lô ê會幕，　　就是伊tī人ê中間所搭ê布棚。Sīm-chì khì-sak Sī-lô ê hōe-bō͘, Chiū-sī I tī lâng ê tiong-kan só͘ tah ê pò͘-pîⁿ.

61Koh將伊ê氣力，交hō͘人搶去；　　伊ê榮光交tī對敵ê手。Koh chiong I ê khùi-la̍t, kau hō͘ lâng chhiúⁿ--khì; Chiong I ê êng-kng kau tī tùi-te̍k ê chhiú.

62亦將伊ê百姓交hō͘刀劍，　　來受氣伊ê家業。Ia̍h chiong I ê peh-sìⁿ kau hō͘ to-kiàm, Lâi siū-khì I ê ke-gia̍p.

63In ê少年人hō͘火燒滅，　　In ê在室女無得tio̍h人ê賀喜。In ê siàu-liân lâng hō͘ hé sio-bia̍t, In ê chāi-sek-lú bô tit-tio̍h lâng ê hō-hí.

64祭司倒tī刀下，　　守寡人亦無啼哭。Chè-si tó tī to-ē, Chiú-kóaⁿ-lâng ia̍h bô thî-khàu.

65Hit時主親像睏ê人精神；　　親像勇猛ê人，lim酒teh hoah。Hit-sî Chú chhin-chhiūⁿ khùn ê lâng cheng-sîn; Chhin-chhiūⁿ ióng-béng ê lâng, lim-chiú teh hoah.

66伊phah退伊ê對敵；　　Hō͘ in永永受凌辱。I phah-thè I ê tùi-te̍k; Hō͘ in éng-éng siū lêng-jio̍k.

67Koh伊棄sak約瑟ê布棚，　　無揀選Í-hoat-lian5e5支派；Koh I khì-sak Iok-sek ê pò͘-pîⁿ, Bô kéng-soán Í-hoat-liân ê chi-phài;

68總是揀猶大ê支派，　　伊所意愛ê錫安山。Chóng-sī kéng Iû-tāi ê chi-phài, I só͘ ì-ài ê Sek-an soaⁿ.

69Koh起造伊ê聖所，高親像天，　　Koh親像伊建立永永tī-teh ê地。Koh khí-chō I ê Sèng-só͘, koâiⁿ chhin-chhiūⁿ thiⁿ, Koh chhin-chhiūⁿ I kiàn-li̍p éng-éng tī-teh ê tōe.

70Koh揀伊ê奴僕大衛，　　Chhōa伊tùi羊寮來。Koh kéng I ê lô͘-po̍k Tāi-pi̍t, Chhōa i tùi iûⁿ-tiâu lâi.

71Hō͘伊無koh tè hiah-ê羊bú，　　Beh hō͘伊養飼伊ê百姓雅各，kap伊ê家業以色列，Hō͘ i bô koh tè hiah ê iûⁿ-bú, Beh hō͘ i iúⁿ-chhī I ê peh-sìⁿ Ngá-kok, kap I ê ke-gia̍p Í-sek-lia̍t,

72伊就照伊心內ê正直養飼in；　　Koh用伊巧妙ê手引chhōa in。I chiū chiàu i sim-lāi ê chèng-ti̍t iúⁿ-chhī in; Koh ēng i khiáu-biāu ê chhiú ín-chhōa in.

1A-sat ê詩。1) 上帝ah，外邦人進入你ê產業，　　Phah lâ-sâm你ê聖殿，　　Hō͘耶路撒冷變-成土堆。A-sat ê si.1) Siōng-tè ah, gōa-pang-lâng chìn-ji̍p Lí ê sán-gia̍p, Phah lâ-sâm Lí ê sèng-tiān, Hō͘ Iâ-lō͘-sat-léng pìⁿ-chiâⁿ thô͘-tui.

2In將你ê奴僕ê身屍，交hō͘空中ê飛鳥，做食物；　　將你聖ê百姓ê肉，交hō͘地上ê野獸。In chiong Lí ê lô͘-po̍k ê sin-si, kau hō͘ khong-tiong ê pe-chiáu, chòe chia̍h-mi̍h; Chiong Lí sèng ê peh-sìⁿ ê bah, kau hō͘ tōe-chiūⁿ ê iá-siù.

3Tī耶路撒冷周圍，流in ê血親像水；　　亦無人埋葬伊。Tī Iâ-lō͘-sat-léng chiu-ûi, lâu in ê huih chhin-chhiūⁿ chúi; Ia̍h bô lâng bâi-chòng i.

4阮hō͘阮隔壁kok所凌辱，　　Hō͘阮四圍ê人冷笑譏刺。Goán hō͘ goán keh-piah kok só͘ lêng-jio̍k, Hō͘ goán sì-ûi ê lâng léng-chhiò ki-chhì.

5耶和華ah，你ê受氣beh jōa久，到永遠mah？　　你ê受氣beh親像火to̍h mah？Iâ-hô-hoa ah, Lí ê siū-khì beh jōa-kú, kàu éng-oán mah? Lí ê siū-khì beh chhin-chhiūⁿ hé to̍h mah?

6願你將你ê受氣piàⁿ落tī hiah-ê m̄-bat你ê外邦，　　以及hiah-ê無求叫你ê名ê列國。Goān Lí chiong Lí ê siū-khì piàⁿ-lo̍h tī hiah ê m̄-bat Lí ê gōa-pang, Í-ki̍p hiah-ê bô kiû-kiò Lí ê miâ ê lia̍t-kok.

7因為in吞食雅各，　　Hō͘伊khiā起ê所在拋荒。In-ūi in thun-chia̍h Ngá-kok, Hō͘ i khiā-khí ê só͘-chāi pha-hng.

8求你m̄-thang記得阮ê祖公ê罪，來tùi阮討；　　願你ê慈悲緊緊臨到阮；　　因為阮落到極卑微ê地位。Kiû Lí m̄-thang kì-tit goán ê chó͘-kong ê chōe, lâi tùi goán thó; Goān Lí ê chû-pi kín-kín lîm-kàu goán; In-ūi goán lo̍h kàu ke̍k pi-bî ê tōe-ūi.

9救阮ê上帝ah，求你因為你ê名ê榮光幫贊阮；　　因為你ê名ê緣故救阮，赦免阮ê罪。Kiù goán ê Siōng-tè ah, kiû Lí in-ūi Lí ê miâ ê êng-kng pang-chān goán; In-ūi Lí ê miâ ê iân-kò͘ kiù goán, sià-bián goán ê chōe.

10啥事致到外邦人講，In ê上帝tī toh落？　　願你申你ê奴僕流血ê冤，　　Hō͘外邦人知，hō͘阮親目看見。Siáⁿ-sū tì-kàu gōa-pang lâng kóng, In ê Siōng-tè tī toh-lo̍h? Goān Lí sin Lí ê lô͘-po̍k lâu-huih ê oan, hō͘ gōa-pang lâng chai, Hō͘ goán chhin-ba̍k khòaⁿ-kìⁿ.

11願囚犯ê吐氣透到你ê面前；　　願你，照你ê大權能，保存hiah-ê擬定tio̍h死ê人。Goān siû-hoān ê thó͘-khùi thàu-kàu Lí ê bīn-chêng; Goān Lí, chiàu Lí ê tōa koân-lêng, pó-chûn hiah ê gí-tiāⁿ tio̍h-sí ê lâng.

12主ah，願你將阮隔壁國所凌辱你ê凌辱，　　加添七倍，歸tī in ê身上。Chú ah, goān Lí chiong goán keh-piah kok só͘ lêng-jio̍k Lí ê lêng-jio̍k, Ke-thiⁿ chhit-pē, kui tī in ê sin-chiūⁿ.

13Án-ni阮做你ê百姓，你ê草場ê羊ê，　　Beh感謝你到永遠；　　Beh o-ló你ê名到萬世代。Án-ni goán chòe Lí ê peh-sìⁿ, Lí ê chháu-tiûⁿ ê iûⁿ-ê, Beh kám-siā Lí kàu éng-oán; Beh o-ló Lí ê miâ kàu bān sè-tāi.