1大衛指便雅憫人Kó͘-si̍t ê話，ǹg耶和華唱歌；調用Si-kai-un。1) 耶和華我ê上帝ah，我óa靠你；　　求你救我脫離一切追趕我ê人，救我出來。Tāi-pi̍t chí Piān-ngá-bín lâng Kó͘-si̍t ê ōe, ǹg Iâ-hô-hoa chhiùⁿ-koa; tiāu, ēng Si-kai-un.1) Iâ-hô-hoa góa ê Siōng-tè ah, góa óa-khò Lí; Kiû Lí kiù góa thoat-lī it-chhè tui-kóaⁿ góa ê lâng, kiù góa chhut-lâi.

2驚了伊親像獅，拆裂我；　　拆到碎碎，無拯救我ê。Kiaⁿ-liáu i chhin-chhiūⁿ sai, thiah-li̍h góa; Thiah kàu chhùi-chhùi, bô chín-kiù góa--ê.

3耶和華我ê上帝ah，我若行chit-ê；　　若有罪惡tī我ê手；Iâ-hô-hoa góa ê Siōng-tè ah, góa nā kiâⁿ chit-ê; Nā ū chōe-ok tī góa ê chhiú;

4我若用pháiⁿ報hit-ê kap我和好ê人；　　(其實連hit-ê無緣故kap我做對敵ê人，我亦有救伊；)Góa nā ēng pháiⁿ pò hit ê kap góa hô-hó ê lâng; (Kî-si̍t liân hit ê bô iân-kò͘ kap góa chòe tùi-te̍k ê lâng, góa ia̍h ū kiù i;)

5就chhut-chāi對敵追jip我，到jip-tio̍h；　　將我ê性命踏tī土腳，將我ê榮光hē tī土粉。[Sè-la̍h]Chiū chhut-chāi tùi-te̍k tui-jip góa, kàu jip-tio̍h; Chiong góa ê sìⁿ-miā ta̍h tī thô͘-kha, Chiong góa ê êng-kng hē tī thô͘-hún. [Sè-la̍h

6耶和華ah，求你tī你ê受氣中起來，　　Peh起來khiā，抵擋我ê對敵ê大受氣，　　求你為tio̍h我來醒，照你所定tio̍h來審判。Iâ-hô-hoa ah, kiû Lí tī Lí ê siū-khì-tiong khí--lâi, Peh--khí-lâi khiā, tí-tng góa ê tùi-te̍k ê tōa siū-khì, Kiû Lí ūi-tio̍h góa lâi chhíⁿ, chiàu Lí só͘ tiāⁿ-tio̍h lâi sím-phòaⁿ.

7願列邦ê會圍你；　　願你倒tńg tī高位tī in ê頂面。Goān lia̍t-pang ê hōe ûi Lí; Goān Lí tò-tńg tī koâiⁿ-ūi tī in ê téng-bīn.

8耶和華審判眾百姓；　　耶和華ah，求你判斷我，照我ê義kap我心內ê正直。Iâ-hô-hoa sím-phòaⁿ chèng peh-sìⁿ; Iâ-hô-hoa ah, kiû Lí phòaⁿ-toàn góa, chiàu góa ê gī kap góa sim-lāi ê chèng-ti̍t.

9願pháiⁿ人ê pháiⁿ到chia soah，義人你hō͘伊khiā在；　　因為公義ê上帝鑑察人ê心腸。Goān pháiⁿ-lâng ê pháiⁿ kàu chia soah, gī-lâng Lí hō͘ i khiā-chāi; In-ūi kong-gī ê Siōng-tè kàm-chhat lâng ê sim-tn̂g.

10我ê藤牌在tī上帝，　　伊拯救心內正直ê人。Góa ê tîn-pâi chāi-tī Siōng-tè, I chín-kiù sim-lāi chèng-ti̍t ê lâng.

11上帝是公義ê審判司；　　亦是日日發出受氣ê上帝。Siōng-tè sī kong-gī ê sím-phòaⁿ-si; Ia̍h sī ji̍t-ji̍t hoat-chhut siū-khì ê Siōng-tè.

12人若m̄反悔，伊beh磨伊ê刀；　　伊有張伊ê弓，備辦便便。Lâng nā m̄ hoán-hóe, I beh bôa I ê to; I ū tiuⁿ I ê keng, pī-pān piān-piān.

13伊備辦會hō͘人死ê ke-si，　　伊所射ê箭是火箭。I pī-pān ōe hō͘ lâng sí ê ke-si, I só͘ siā ê chìⁿ sī hé chìⁿ.

14你看，pháiⁿ人圖謀奸惡，　　懷孕毒害，生出虛假。Lí khòaⁿ, pháiⁿ lâng tô͘-bô͘ kan-ok, Hoâi-īn to̍k-hāi, siⁿ-chhut hu-ké.

15伊開窟，掘hō͘伊深；　　竟然跋落tī伊所開ê陷坑。I khui khut, ku̍t hō͘ i chhim; Kéng-jiân poa̍h-lo̍h tī i só͘ khui ê hām-khiⁿ.

16伊ê毒害beh 倒tńg到伊ê頭殼；　　伊ê強暴beh落tī伊ê頭殼頂。I ê to̍k-hāi beh tò-tńg kàu i ê thâu-khak; I ê kiông-pō beh lo̍h tī i ê thâu-khak-téng.

17我beh照耶和華ê公義感謝伊；　　Koh o-ló至koân耶和華ê名。Góa beh chiàu Iâ-hô-hoa ê kong-gī kám-siā I; Koh o-ló chì-koâiⁿ Iâ-hô-hoa ê miâ.

1大衛ê詩，交hō͘樂官，用Ka-te̍k ê樂器；1) 耶和華阮ê主ah，　　你ê名tī全地到chiah高大！　　你將你ê榮光排設tī天裡。Tāi-pi̍t ê si, kau hō͘ Ga̍k-koaⁿ, ēng Ka-te̍k ê ga̍k-khì;1) Iâ-hô-hoa goán ê Chú ah, Lí ê miâ tī choân-tōe kàu chiah koâiⁿ-tōa! Lí chiong Lí ê êng-kng pâi-siat tī thiⁿ--nih.

2你因為你ê對敵ê緣故，tùi嬰á kap食奶ê ê嘴，建立能力；　　Beh hō͘對敵kap報冤ê靜靜。Lí in-ūi Lí ê tùi-te̍k ê iân-kò͘, tùi eⁿ-á kap chia̍h-leng--ê ê chhùi, kiàn-li̍p lêng-le̍k; Beh hō͘ tùi-te̍k kap pò-oan--ê chēng-chēng.

3我看你ê天，你ê手所造ê，　　Kap你所排列ê月kap星；Góa khòaⁿ Lí ê thiⁿ, Lí ê chhiú só͘ chō--ê, Kap Lí só͘ pâi-lia̍t ê ge̍h kap chhiⁿ;

4世間人是甚麼，你siàu念伊？　　人ê kiáⁿ是甚麼，你眷顧伊？Sè-kan lâng sī sím-mi̍h, Lí siàu-liām i? Lâng ê kiáⁿ sī sím-mi̍h, Lí koàn-kò͘--i?

5你hō͘伊比天使釐á khah輸，　　Koh賞賜伊榮光尊貴做冕旒。Lí hō͘ i pí thiⁿ-sài lî-á khah-su, Koh siúⁿ-sù i êng-kng chun-kùi chòe bián-liû.

6你設立伊管理你ê手所造ê，　　Hē萬物tī伊ê腳下；Lí siat-li̍p i koán-lí Lí ê chhiú só͘ chō--ê, Hē bān-mi̍h tī i ê kha-ē;

7就是一切ê羊kap牛，　　山野ê走獸；Chiū-sī it-chhè ê iûⁿ kap gû, Soaⁿ-iá ê cháu-siù;

8天中ê鳥，海內ê魚，　　Kap見若經過海裡ê路ê，lóng hē tī伊ê腳下。Thiⁿ-tiong ê chiáu, hái-lāi ê hî, Kap kìⁿ-nā keng-kè hái--nih ê lō͘ ê, lóng hē tī i ê kha-ē.

9耶和華，阮ê主ah，　　你ê名tī全地到hiah高大！Iâ-hô-hoa, goán ê Chú ah, Lí ê miâ tī choân-tōe kàu hiah koâiⁿ-tōa!

1大衛ê詩，交hō͘樂官，調用Bō͘-la̍h-piān。1) 我beh全心感謝耶和華；　　我beh報揚你一切奇妙ê所做。Tāi-pi̍t ê si, kau hō͘ Ga̍k-koaⁿ, tiāu, ēng Bō͘-la̍h-piān.1) Góa beh choân-sim kám-siā Iâ-hô-hoa; Góa beh pò-iông Lí it-chhè kî-biāu ê só͘-chòe.

2我beh在tī你歡喜快樂；　　至koânê ah，我beh o-ló你ê名。Góa beh chāi-tī Lí hoaⁿ-hí khoài-lo̍k; Chì-koâiⁿ--ê ah, góa beh o-ló Lí ê miâ.

3我ê對敵oa̍t-tńg身退去ê時，　　就tī你ê面前跋倒滅無。Góa ê tùi-te̍k oa̍t-tńg-sin thè--khì ê sî, Chiū tī Lí ê bīn-chêng poa̍h-tó bia̍t-bô.

4你已經替我伸冤，替我辯明；　　你坐tī寶座，照公義審判。Lí í-keng thòe góa sin-oan, thòe góa piān-bêng; Lí chē tī pó-chō, chiàu kong-gī sím-phòaⁿ.

5你有責備列邦，你有滅無pháiⁿ人，　　你有擦滅in ê名到永遠。Lí ū chek-pī lia̍t-pang, Lí ū bia̍t-bô pháiⁿ-lâng, Lí ū chhat-bia̍t in ê miâ kàu éng-oán.

6對敵到結局，受荒廢到永遠；　　你毀壞in ê城；連in ê記念亦無去。Tùi-te̍k kàu kiat-kio̍k, siū hong-hòe kàu éng-oán; Lí húi-hoāi in ê siâⁿ; Liân in ê kì-liām ia̍h bô--khì.

7獨獨耶和華坐位到永遠；　　伊已經ūi審判，安置伊ê寶座。To̍k-to̍k Iâ-hô-hoa chē-ūi kàu éng-oán; I í-keng ūi sím-phòaⁿ, an-tì I ê pó-chō.

8伊beh照公義審判世界，　　照正直判斷眾百姓。I beh chiàu kong-gī sím-phòaⁿ sè-kài, Chiàu chèng-ti̍t phòaⁿ-toàn chèng peh-sìⁿ.

9耶和華koh beh做受壓迫ê人ê高台，　　Tī患難ê時ê高台。Iâ-hô-hoa koh beh chòe siū ap-pek ê lâng ê koâiⁿ-tâi, Tī hoān-lān ê sî ê koâiⁿ-tâi.

10Bat你ê名ê人beh óa靠你；　　因為，耶和華，你bē-bat棄sak chhē你ê人。Bat Lí ê miâ ê lâng beh óa-khò Lí; In-ūi, Iâ-hô-hoa, Lí bē-bat khì-sak chhē Lí ê lâng.

11Tio̍h o-ló khiā起錫安ê耶和華，　　將伊所行ê報揚tī眾百姓ê中間。Tio̍h o-ló khiā-khí Sek-an ê Iâ-hô-hoa, Chiong I só͘ kiâⁿ--ê pò-iông tī chèng peh-sìⁿ ê tiong-kan.

12因為hit-ê查辦命案ê記得in；　　無bōe記得困苦人ê哀求。In-ūi hit ê cha-pān bēng-àn--ê kì-tit in; Bô bōe kì-tit khùn-khó͘ lâng ê ai-kiû.

13耶和華ah，求你憐憫我；　　你是tùi死門救我起來ê，　　Tio̍h鑑察hiah-ê怨恨我ê人所hō͘我tú-tio̍h ê苦難。Iâ-hô-hoa ah, kiû Lí lîn-bín góa; Lí sī tùi sí-mn̂g kiù góa khí--lâi--ê, Tio̍h kàm-chhat hiah ê oàn-hūn góa ê lâng só͘ hō͘ góa tú-tio̍h ê khó͘-lān.

14Thang hō͘我講起你一切ê好名聲；　　我beh tī錫安城ê門，　　為tio̍h你ê救恩來歡喜。Thang hō͘ góa kóng-khí Lí it-chhè ê hó miâ-siaⁿ; Góa beh tī Sek-an siâⁿ ê mn̂g, Ūi-tio̍h Lí ê kiù-un lâi hoaⁿ-hí.

15列邦陷落tī in所開ê陷坑；　　In ê腳纏tī in暗靜設ê羅網。Lia̍t-pang hām-lo̍h tī in só͘ khui ê hām-khiⁿ; In ê kha tîⁿ tī in àm-chīⁿ siat ê lô-bāng.

16耶和華已經顯明家己，伊已經行審判；　　Pháiⁿ人hō͘家己ê手所做ê纏tio̍h。[Hi-kai-un, Sè-la̍h]Iâ-hô-hoa í-keng hián-bêng ka-kī, I í-keng kiâⁿ sím-phòaⁿ; Pháiⁿ lâng hō͘ ka-kī ê chhiú só͘ chòe--ê tîⁿ--tio̍h. [Hi-kai-un. Sè-la̍h

17Pháiⁿ人beh歸tī陰府，　　Bōe記得上帝ê列邦亦beh án-ni。Pháiⁿ-lâng beh kui tī im-hú, Bōe kì--tit Siōng-tè ê lia̍t-pang ia̍h beh án-ni.

18因為sòng-hiong人的確無永遠hō͘上帝bōe記得，　　困苦ê人ê ǹg望，的確bōe永永無去。In-ūi sòng-hiong-lâng tek-khak bô éng-oán hō͘ Siōng-tè bōe kì-tit, Khùn-khó͘ ê lâng ê ǹg-bāng, tek-khak bōe éng-éng bô--khì.

19耶和華ah，求你起來，m̄-thang容允人khah贏；　　願列邦tī你ê面前受審判。Iâ-hô-hoa ah, kiû Lí khí--lâi, m̄-thang iông-ún lâng khah-iâⁿ; Goān lia̍t-pang tī Lí ê bīn-chêng siū sím-phòaⁿ.

20耶和華ah，求你hō͘ in驚惶；　　願列邦知家己不過是人nā-tiāⁿ。[Sè-la̍h]Iâ-hô-hoa ah, kiû Lí hō͘ in kiaⁿ-hiâⁿ; Goān lia̍t-pang chai ka-kī put-kò sī lâng nā-tiāⁿ. [Sè-la̍h