1A-sat ê詩。1) 上帝ah，外邦人進入你ê產業，　　Phah lâ-sâm你ê聖殿，　　Hō͘耶路撒冷變-成土堆。A-sat ê si.1) Siōng-tè ah, gōa-pang-lâng chìn-ji̍p Lí ê sán-gia̍p, Phah lâ-sâm Lí ê sèng-tiān, Hō͘ Iâ-lō͘-sat-léng pìⁿ-chiâⁿ thô͘-tui.

2In將你ê奴僕ê身屍，交hō͘空中ê飛鳥，做食物；　　將你聖ê百姓ê肉，交hō͘地上ê野獸。In chiong Lí ê lô͘-po̍k ê sin-si, kau hō͘ khong-tiong ê pe-chiáu, chòe chia̍h-mi̍h; Chiong Lí sèng ê peh-sìⁿ ê bah, kau hō͘ tōe-chiūⁿ ê iá-siù.

3Tī耶路撒冷周圍，流in ê血親像水；　　亦無人埋葬伊。Tī Iâ-lō͘-sat-léng chiu-ûi, lâu in ê huih chhin-chhiūⁿ chúi; Ia̍h bô lâng bâi-chòng i.

4阮hō͘阮隔壁kok所凌辱，　　Hō͘阮四圍ê人冷笑譏刺。Goán hō͘ goán keh-piah kok só͘ lêng-jio̍k, Hō͘ goán sì-ûi ê lâng léng-chhiò ki-chhì.

5耶和華ah，你ê受氣beh jōa久，到永遠mah？　　你ê受氣beh親像火to̍h mah？Iâ-hô-hoa ah, Lí ê siū-khì beh jōa-kú, kàu éng-oán mah? Lí ê siū-khì beh chhin-chhiūⁿ hé to̍h mah?

6願你將你ê受氣piàⁿ落tī hiah-ê m̄-bat你ê外邦，　　以及hiah-ê無求叫你ê名ê列國。Goān Lí chiong Lí ê siū-khì piàⁿ-lo̍h tī hiah ê m̄-bat Lí ê gōa-pang, Í-ki̍p hiah-ê bô kiû-kiò Lí ê miâ ê lia̍t-kok.

7因為in吞食雅各，　　Hō͘伊khiā起ê所在拋荒。In-ūi in thun-chia̍h Ngá-kok, Hō͘ i khiā-khí ê só͘-chāi pha-hng.

8求你m̄-thang記得阮ê祖公ê罪，來tùi阮討；　　願你ê慈悲緊緊臨到阮；　　因為阮落到極卑微ê地位。Kiû Lí m̄-thang kì-tit goán ê chó͘-kong ê chōe, lâi tùi goán thó; Goān Lí ê chû-pi kín-kín lîm-kàu goán; In-ūi goán lo̍h kàu ke̍k pi-bî ê tōe-ūi.

9救阮ê上帝ah，求你因為你ê名ê榮光幫贊阮；　　因為你ê名ê緣故救阮，赦免阮ê罪。Kiù goán ê Siōng-tè ah, kiû Lí in-ūi Lí ê miâ ê êng-kng pang-chān goán; In-ūi Lí ê miâ ê iân-kò͘ kiù goán, sià-bián goán ê chōe.

10啥事致到外邦人講，In ê上帝tī toh落？　　願你申你ê奴僕流血ê冤，　　Hō͘外邦人知，hō͘阮親目看見。Siáⁿ-sū tì-kàu gōa-pang lâng kóng, In ê Siōng-tè tī toh-lo̍h? Goān Lí sin Lí ê lô͘-po̍k lâu-huih ê oan, hō͘ gōa-pang lâng chai, Hō͘ goán chhin-ba̍k khòaⁿ-kìⁿ.

11願囚犯ê吐氣透到你ê面前；　　願你，照你ê大權能，保存hiah-ê擬定tio̍h死ê人。Goān siû-hoān ê thó͘-khùi thàu-kàu Lí ê bīn-chêng; Goān Lí, chiàu Lí ê tōa koân-lêng, pó-chûn hiah ê gí-tiāⁿ tio̍h-sí ê lâng.

12主ah，願你將阮隔壁國所凌辱你ê凌辱，　　加添七倍，歸tī in ê身上。Chú ah, goān Lí chiong goán keh-piah kok só͘ lêng-jio̍k Lí ê lêng-jio̍k, Ke-thiⁿ chhit-pē, kui tī in ê sin-chiūⁿ.

13Án-ni阮做你ê百姓，你ê草場ê羊ê，　　Beh感謝你到永遠；　　Beh o-ló你ê名到萬世代。Án-ni goán chòe Lí ê peh-sìⁿ, Lí ê chháu-tiûⁿ ê iûⁿ-ê, Beh kám-siā Lí kàu éng-oán; Beh o-ló Lí ê miâ kàu bān sè-tāi.

1A-sat ê詩；交hō͘樂官；調用「做干證ê百合花」。1) 以色列ê牧者ah，chhōa約瑟親像羊群ê，求你àⁿ耳孔聽；　　坐tī ki-lō͘兵ê頂面ê，求你發出你ê光。A-sat ê si; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Í-sek-lia̍t ê bo̍k-chiá ah, chhōa Iok-sek chhin-chhiūⁿ iûⁿ-kûn--ê, kiû Lí àⁿ hī-khang thiaⁿ; Chē tī ki-lō͘-peng ê téng-bīn--ê, kiû Lí hoat-chhut Lí ê kng.

2Tī Í-hoat-liân、便雅憫、Má-ná-se ê面前，展出你ê權能，　　來救阮。Tī Í-hoat-liân, Piān-ngá-bín, Má-ná-se ê bīn-chêng, tián-chhut Lí ê koân-lêng, Lâi kiù goán.

3上帝ah，hō͘阮倒tńg；　　Hō͘你ê面發出光，阮就得tio̍h救。Siōng-tè ah, hō͘ goán tò-tńg; Hō͘ Lí ê bīn hoat-chhut kng, goán chiū tit-tio̍h kiù.

4萬軍ê上帝耶和華ah，　　你ǹg你ê百姓ê祈禱發出受氣，beh jōa久ah？Bān-kun ê Siōng-tè Iâ-hô-hoa ah, Lí ǹg Lí ê peh-sìⁿ ê kî-tó hoat-chhut siū-khì, beh jōa-kú ah?

5你用目屎做食物，hō͘ in食；　　Koh量chōe-chōe目屎hō͘ in lim。Lí ēng ba̍k-sái chòe chia̍h-mi̍h, hō͘ in chia̍h; Koh niû chōe-chōe ba̍k-sái hō͘ in lim.

6你hō͘隔壁國因為阮來相爭，　　阮ê對敵相kap teh笑。Lí hō͘ keh-piah-kok in-ūi goán lâi saⁿ-chiⁿ, Goán ê tùi-te̍k saⁿ-kap teh chhiò.

7萬軍ê上帝ah，hō͘阮倒tńg，　　Hō͘你ê面發出光，阮就得tio̍h救。Bān-kun ê Siōng-tè ah, hō͘ goán tò-tńg, Hō͘ Lí ê bīn hoat-chhut kng, goán chiū tit-tio̍h kiù.

8你tùi埃及徙一叢葡萄樹，　　趕出列邦，來栽伊，Lí tùi Ai-ki̍p sóa chi̍t-châng phû-tô-chhiū, Kóaⁿ-chhut lia̍t-pang, lâi chai--i,

9你tī伊ê頭前piàⁿ空土地；　　伊ê根釘深，就生湠滿地。Lí tī i ê thâu-chêng piàⁿ-khang thó͘-tōe; I ê kun tèng chhim, chiū siⁿ-thòaⁿ móa-tōe.

10伊ê影遮密chiah-ê山，　　伊ê枝親像真好ê柏香樹。I ê iáⁿ jia-ba̍t chiah ê soaⁿ, I ê ki chhin-chhiūⁿ chin-hó ê peh-hiuⁿ-chhiū.

11發出伊ê枝，伸到大海，　　伊ê藤thòaⁿ到大河。Hoat-chhut i ê ki, chhun kàu tōa-hái, I ê tîn thòaⁿ kàu Tōa-hô.

12你啥事拆毀伊ê籬笆，　　Chhut-chāi一切過路ê人挽伊？Lí siáⁿ-sū thiah-húi i ê lî-pa, Chhut-chāi it-chhè kè-lō͘ ê lâng bán--i?

13樹林內出來ê山豬 蹧躂伊，　　曠野ê走獸食伊。Chhiū-nâ-lāi chhut-lâi ê soaⁿ-ti chau-that--i, Khòng-iá ê cháu-siù chia̍h--i.

14萬軍ê上帝ah，求你倒tńg；　　Tùi天àⁿ落看，照顧chit叢葡萄樹，Bān-kun ê Siōng-tè ah, kiû Lí tò-tńg; Tùi thiⁿ àⁿ-lo̍h khòaⁿ, chiàu-kò͘ chit châng phû-tô-chhiū,

15保護你chiàⁿ手所栽ê，　　Kap你為家己所堅固ê枝。Pó-hō͘ Lí chiàⁿ-chhiú só͘ chai--ê, Kap Lí ūi ka-kī só͘ kian-kò͘ ê ki.

16伊已經受火燒，受刀剉；　　為tio̍h你ê面ê受氣，in就滅無。I í-keng siū hé sio, siū to chhò; Ūi-tio̍h Lí ê bīn ê siū-khì, in chiū bia̍t-bô.

17願你ê手岸tī你chiàⁿ-pêng ê人，　　就是你為家己所堅固ê人子。Goān Lí ê chhiú hōaⁿ tī Lí chiàⁿ-pêng ê lâng, Chiū-sī Lí ūi ka-kī só͘ kian-kò͘ ê jîn-chú.

18Án-ni，阮就無倒退離開你；　　求你hō͘阮得tio̍h活，阮就beh求叫你ê名。Án-ni, goán chiū bô tò-thè lī-khui Lí; Kiû Lí hō͘ goán tit-tio̍h oa̍h, goán chiū beh kiû-kiò Lí ê miâ.

19萬軍ê上帝耶和華ah，hō͘阮倒tńg；　　Hō͘你ê面發出光，阮就得tio̍h救。Bān-kun ê Siōng-tè Iâ-hô-hoa ah, hō͘ goán tò-tńg; Hō͘ Lí ê bīn hoat-chhut kng, goán chiū tit-tio̍h kiù.

1A-sat ê詩；交hō͘樂官；用Ka-te̍k ê調。1) 上帝是阮ê氣力，lín tio̍h大聲o-ló伊；　　Tio̍h出歡喜ê聲，o-ló雅各ê上帝。A-sat ê si; kau hō͘ Ga̍k-koaⁿ; ēng Ka-te̍k ê tiāu.1) Siōng-tè sī goán ê khùi-la̍t, lín tio̍h tōa-siaⁿ o-ló I; Tio̍h chhut hoaⁿ-hí ê siaⁿ, o-ló Ngá-kok ê Siōng-tè.

2Tio̍h唱詩歌，搖lin-long鼓；　　彈好聽ê琴kap瑟。Tio̍h chhiùⁿ si-koa, iô lin-long-kó͘; Tôaⁿ hó-thiaⁿ ê khîm kap sek.

3Tio̍h tī初一十五，　　阮節期ê日，pûn哨角。Tio̍h tī chhoe-it cha̍p-gō͘, Goán choeh-kî ê ji̍t, pûn sàu-kak.

4因為這是kā以色列定tio̍h ê律例，　　雅各ê上帝ê禮儀。In-ūi che sī kā Í-sek-lia̍t tiāⁿ-tio̍h ê lu̍t-lē, Ngá-kok ê Siōng-tè ê lé-gî.

5伊去攻擊埃及地ê時，　　Tī約瑟ê中間，立chit-ê做干證；　　Tī-hia我聽見所bōe曉得ê話。I khì kong-kek Ai-ki̍p tōe ê sî, Tī Iok-sek ê tiong-kan, li̍p chit-ê chòe kan-chèng; Tī-hia góa thiaⁿ-kìⁿ só͘ bōe hiáu-tit ê ōe.

6上帝講，我hō͘伊ê肩頭脫離重擔，　　Hō͘伊ê手放落筐á。Siōng-tè kóng, Góa hō͘ i ê keng-thâu thoat-lī tāng-tàⁿ, Hō͘ i ê chhiú pàng-lo̍h kheng-á.

7你tī患難中求叫，我bat救你；　　我tī雷隱密ê所在應你；　　我tī Bí-lī-pa ê水邊試你。[Sè-la̍h]Lí tī hoān-lān-tiong kiû-kiò, Góa bat kiù lí; Góa tī lûi ún-ba̍t ê só͘-chāi ìn lí; Góa tī Bí-lī-pa ê chúi-piⁿ chhì lí. [Sè-la̍h

8我ê百姓ah，你tio̍h聽；我beh對你做干證；　　以色列ah，願你聽thàn我。Góa ê peh-sìⁿ ah, lí tio̍h thiaⁿ; Góa beh tùi lí chòe kan-chèng; Í-sek-lia̍t ah, goān lí thiaⁿ-thàn Góa.

9Tī你ê中間m̄-thang有別ê上帝，　　外邦ê上帝，你亦m̄-thang跪拜。Tī lí ê tiong-kan m̄-thang ū pa̍t ê siōng-tè, Gōa-pang ê siōng-tè, lí ia̍h m̄-thang kūi-pài.

10我是耶和華，你ê上帝，　　Bat chhōa你tùi埃及地上來；　　Tio̍h大開你ê嘴，我就充滿伊。Góa sī Iâ-hô-hoa, lí ê Siōng-tè, Bat chhōa lí tùi Ai-ki̍p tōe chiūⁿ--lâi; Tio̍h tōa khui lí ê chhùi, Góa chiū chhiong-móa--i.

11總是我ê百姓m̄聽我ê聲；　　以色列全然m̄ chhiù-chhái我。Chóng-sī Góa ê peh-sìⁿ m̄-thiaⁿ Góa ê siaⁿ; Í-sek-lia̍t choân-jiân m̄ chhiù-chhái Góa.

12我就chhut-chai7in，照in ê心ê固執；　　Hō͘ in照in家己ê計謀去行。Góa chiū chhut-chāi in, chiàu in ê sim ê kò͘-chip; Hō͘ in chiàu in ka-kī ê kè-bô͘ khì kiâⁿ.

13願我ê百姓肯聽我；　　以色列肯行我ê路。Goān Góa ê peh-sìⁿ khéng thiaⁿ Góa; Í-sek-lia̍t khéng kiâⁿ Góa ê lō͘.

14我就緊緊制壓in ê仇讎；　　Oa̍t-tńg我ê手，攻擊in ê對敵。Góa chiū kín-kín chè-ap in ê kiû-siû; Oa̍t-tńg Góa ê chhiú, kong-kek in ê tùi-te̍k.

15怨恨耶和華ê人，beh來投降伊，　　總是in ê時代beh久長tī-teh。Oàn-hūn Iâ-hô-hoa ê lâng, beh lâi tâu-hâng I, Chóng-sī in ê sî-tāi beh kú-tn̂g tī-teh.

16伊亦beh用好ê麥hō͘ in食；　　我用tùi石磐出ê蜜，hō͘ in食飽。I ia̍h beh ēng hó ê be̍h hō͘ in chia̍h; Góa ēng tùi chio̍h-pôaⁿ chhut ê bi̍t, hō͘ in chia̍h pá.