1A-sat ê詩；交hō͘樂官；用Ka-te̍k ê調。1) 上帝是阮ê氣力，lín tio̍h大聲o-ló伊；　　Tio̍h出歡喜ê聲，o-ló雅各ê上帝。A-sat ê si; kau hō͘ Ga̍k-koaⁿ; ēng Ka-te̍k ê tiāu.1) Siōng-tè sī goán ê khùi-la̍t, lín tio̍h tōa-siaⁿ o-ló I; Tio̍h chhut hoaⁿ-hí ê siaⁿ, o-ló Ngá-kok ê Siōng-tè.

2Tio̍h唱詩歌，搖lin-long鼓；　　彈好聽ê琴kap瑟。Tio̍h chhiùⁿ si-koa, iô lin-long-kó͘; Tôaⁿ hó-thiaⁿ ê khîm kap sek.

3Tio̍h tī初一十五，　　阮節期ê日，pûn哨角。Tio̍h tī chhoe-it cha̍p-gō͘, Goán choeh-kî ê ji̍t, pûn sàu-kak.

4因為這是kā以色列定tio̍h ê律例，　　雅各ê上帝ê禮儀。In-ūi che sī kā Í-sek-lia̍t tiāⁿ-tio̍h ê lu̍t-lē, Ngá-kok ê Siōng-tè ê lé-gî.

5伊去攻擊埃及地ê時，　　Tī約瑟ê中間，立chit-ê做干證；　　Tī-hia我聽見所bōe曉得ê話。I khì kong-kek Ai-ki̍p tōe ê sî, Tī Iok-sek ê tiong-kan, li̍p chit-ê chòe kan-chèng; Tī-hia góa thiaⁿ-kìⁿ só͘ bōe hiáu-tit ê ōe.

6上帝講，我hō͘伊ê肩頭脫離重擔，　　Hō͘伊ê手放落筐á。Siōng-tè kóng, Góa hō͘ i ê keng-thâu thoat-lī tāng-tàⁿ, Hō͘ i ê chhiú pàng-lo̍h kheng-á.

7你tī患難中求叫，我bat救你；　　我tī雷隱密ê所在應你；　　我tī Bí-lī-pa ê水邊試你。[Sè-la̍h]Lí tī hoān-lān-tiong kiû-kiò, Góa bat kiù lí; Góa tī lûi ún-ba̍t ê só͘-chāi ìn lí; Góa tī Bí-lī-pa ê chúi-piⁿ chhì lí. [Sè-la̍h

8我ê百姓ah，你tio̍h聽；我beh對你做干證；　　以色列ah，願你聽thàn我。Góa ê peh-sìⁿ ah, lí tio̍h thiaⁿ; Góa beh tùi lí chòe kan-chèng; Í-sek-lia̍t ah, goān lí thiaⁿ-thàn Góa.

9Tī你ê中間m̄-thang有別ê上帝，　　外邦ê上帝，你亦m̄-thang跪拜。Tī lí ê tiong-kan m̄-thang ū pa̍t ê siōng-tè, Gōa-pang ê siōng-tè, lí ia̍h m̄-thang kūi-pài.

10我是耶和華，你ê上帝，　　Bat chhōa你tùi埃及地上來；　　Tio̍h大開你ê嘴，我就充滿伊。Góa sī Iâ-hô-hoa, lí ê Siōng-tè, Bat chhōa lí tùi Ai-ki̍p tōe chiūⁿ--lâi; Tio̍h tōa khui lí ê chhùi, Góa chiū chhiong-móa--i.

11總是我ê百姓m̄聽我ê聲；　　以色列全然m̄ chhiù-chhái我。Chóng-sī Góa ê peh-sìⁿ m̄-thiaⁿ Góa ê siaⁿ; Í-sek-lia̍t choân-jiân m̄ chhiù-chhái Góa.

12我就chhut-chai7in，照in ê心ê固執；　　Hō͘ in照in家己ê計謀去行。Góa chiū chhut-chāi in, chiàu in ê sim ê kò͘-chip; Hō͘ in chiàu in ka-kī ê kè-bô͘ khì kiâⁿ.

13願我ê百姓肯聽我；　　以色列肯行我ê路。Goān Góa ê peh-sìⁿ khéng thiaⁿ Góa; Í-sek-lia̍t khéng kiâⁿ Góa ê lō͘.

14我就緊緊制壓in ê仇讎；　　Oa̍t-tńg我ê手，攻擊in ê對敵。Góa chiū kín-kín chè-ap in ê kiû-siû; Oa̍t-tńg Góa ê chhiú, kong-kek in ê tùi-te̍k.

15怨恨耶和華ê人，beh來投降伊，　　總是in ê時代beh久長tī-teh。Oàn-hūn Iâ-hô-hoa ê lâng, beh lâi tâu-hâng I, Chóng-sī in ê sî-tāi beh kú-tn̂g tī-teh.

16伊亦beh用好ê麥hō͘ in食；　　我用tùi石磐出ê蜜，hō͘ in食飽。I ia̍h beh ēng hó ê be̍h hō͘ in chia̍h; Góa ēng tùi chio̍h-pôaⁿ chhut ê bi̍t, hō͘ in chia̍h pá.

1A-sat ê詩。1) 上帝khiā tī上帝ê會中，　　Tī chiah-ê上帝 ê中間teh審判。A-sat ê si.1) Siōng-tè khiā tī Siōng-tè ê hōe-tiong, Tī chiah ê siōng-tè ê tiong-kan teh sím-phòaⁿ.

2Lín審判無照公義，　　Sûn pháiⁿ人ê情面，beh到tī時ah？[Sè-la̍h]Lín sím-phòaⁿ bô chiàu kong-gī, Sûn pháiⁿ-lâng ê chêng-biān, beh kàu tī-sî ah? [Sè-la̍h

3Lín tio̍h kā sòng-hiong人kap無父ê kiáⁿ伸冤；　　Tio̍h kā困苦kap欠缺ê人行公義。Lín tio̍h kā sòng-hiong-lâng kap bô-pē ê kiáⁿ sin-oan; Tio̍h kā khùn-khó͘ kap khiàm-kheh ê lâng kiâⁿ kong-gī.

4Tio̍h拯救sòng-hiong kap欠缺ê人，　　Hō͘ in脫離pháiⁿ人ê手。Tio̍h chín-kiù sòng-hiong kap khiàm-kheh ê lâng, Hō͘ in thoat-lī pháiⁿ-lâng ê chhiú.

5In m̄知，亦無明理；　　In tī烏暗中行來行去；　　地ê根基lóng搖動。In m̄-chai, ia̍h bô bêng-lí; In tī o͘-àm-tiong kiâⁿ-lâi kiâⁿ-khì; Tōe ê kun-ki lóng iô-tāng.

6我bat講，Lín是siōng-tè。　　Lín lóng是至koânê ê kiáⁿ；Góa bat kóng, Lín sī siōng-tè. Lín lóng sī Chì-koâiⁿ--ê ê kiáⁿ;

7總是lín會死，kap世間人一樣；　　Beh倒落去，親像貴族ê一個。Chóng-sī lín ōe sí, kap sè-kan lâng chi̍t-iūⁿ; Beh tó--lo̍h-khì, chhin-chhiūⁿ kùi-cho̍k ê chi̍t-ê.

8上帝ah，求你起來，審判世界；　　因為你beh得tio̍h萬國做基業。Siōng-tè ah, kiû Lí khí--lâi, sím-phòaⁿ sè-kài; In-ūi Lí beh tit-tio̍h bān-kok chòe ki-gia̍p.

1A-sat ê詩歌。1) 上帝ah，求你m̄-thang靜靜；　　上帝ah，求你m̄-thang無開嘴，亦m̄-thang無做聲；A-sat ê si-koa.1) Siōng-tè ah, kiû Lí m̄-thang chēng-chēng; Siōng-tè ah, kiû Lí m̄-thang bô khui-chhùi, ia̍h m̄-thang bô chòe-siaⁿ;

2因為你ê對敵hōa-hōa嚷；　　怨恨你ê人kia̍h起頭。In-ūi Lí ê tùi-te̍k hōa-hōa-jióng; Oàn-hūn Lí ê lâng kia̍h-khí thâu.

3In用奸詐ê計謀beh害你ê百姓；　　In相kap議論，beh害你所khǹg密ê人。In ēng kan-chà ê kè-bô͘ beh hāi Lí ê peh-sìⁿ; In saⁿ-kap gī-lūn, beh hāi Lí só͘ khǹg-ba̍t ê lâng.

4In講，來ah，咱來滅無in，hō͘ in bōe成kok，　　Hō͘以色列ê名無koh hō͘人記念。In kóng, Lâi ah, lán lâi bia̍t-bô in, hō͘ in bōe chiâⁿ kok, Hō͘ Í-sek-lia̍t ê miâ bô koh hō͘ lâng kì-liām.

5In同心相kap參詳，　　相kap結約beh抵敵你；In tâng-sim saⁿ-kap chham-siông, Saⁿ-kap kiat-iok beh tí-te̍k Lí;

6就是khiā起布棚ê Í-tong kap以實瑪利人，　　Mô͘-ap kap Hā-Kah人，Chiū-sī khiā-khí pò͘-pîⁿ ê Í-tong kap Í-si̍t-má-lī lâng, Mô͘-ap kap Hā-Kah lâng,

7Ka-pa-le̍k、A-bûn，kap A-má-le̍k；　　腓利士，以及Chhui-lô khiā起ê百姓；Ka-pa-le̍k, A-bûn, kap A-má-le̍k; Hui-lī-sū, í-ki̍p Chhui-lô khiā-khí ê peh-sìⁿ;

8亞述亦kap in連合，　　In做羅得ê kiáⁿ孫ê幫手。[Sè-la̍h]A-su̍t ia̍h kap in liân-ha̍p, In chòe Lô-tek ê kiáⁿ-sun ê pang-chhiú. [Sè-la̍h

9求你款待in，親像早款待米甸；　　親像tī Ki-sūn河，款待Se-se-lah kap Iâ-pin一樣。Kiû Lí khoán-thāi in, chhin-chhiūⁿ chá khoán-thāi Bí-tiân; Chhin-chhiūⁿ tī Ki-sūn hô, khoán-thāi Se-se-lah kap Iâ-pin chi̍t-iūⁿ.

10In tī Ún-tô-jíⁿ滅無，　　成做地上ê糞土。In tī Ún-tô-jíⁿ bia̍t-bô, Chiâⁿ-chòe tōe-chiūⁿ ê pùn-thô͘.

11求你hō͘ in ê領袖親像O͘-li̍p kap Se-i-pek；　　Hō͘ in ê軍長lóng親像Se-pa kap Sat-bûn-ná。Kiû Lí hō͘ in ê léng-siù chhin-chhiūⁿ O͘-li̍p kap Se-i-pek; Hō͘ in ê kun-tiúⁿ lóng chhin-chhiūⁿ Se-pa kap Sat-bûn-ná.

12In講，咱tio̍h將上帝khiā起ê所在，　　佔來做家己ê。In kóng, Lán tio̍h chiong Siōng-tè khiā-khí ê só͘-chāi, Chiàm lâi chòe ka-kī ê.

13我ê上帝ah，求你hō͘ in親像捲螺風ê塵埃，　　親像風前ê稻屑；Góa ê Siōng-tè ah, kiû Lí hō͘ in chhin-chhiūⁿ kńg-lê-hong ê tîn-ai, Chhin-chhiūⁿ hong-chêng ê tiū-sap;

14親像火燒樹林，　　親像火燄sio山頭。Chhin-chhiūⁿ hé sio chhiū-nâ, Chhin-chhiūⁿ hé-iām sio soaⁿ-thâu.

15求你亦親像án-ni用你ê狂風追趕in，　　用你ê大風hō͘ in驚惶。Kiû Lí ia̍h chhin-chhiūⁿ án-ni ēng Lí ê kông-hong tui-kóaⁿ in, Ēng Lí ê tōa-hong hō͘ in kiaⁿ-hiâⁿ.

16耶和華ah，求你hō͘ in滿面見笑，　　Thang來祈求你ê名。Iâ-hô-hoa ah, kiû Lí hō͘ in móa-bīn kiàn-siàu, Thang lâi kî-kiû Lí ê miâ.

17Hō͘ in永遠見笑，驚惶；　　Hō͘ in漏氣滅無。Hō͘ in éng-oán kiàn-siàu, kiaⁿ-hiâⁿ; Hō͘ in làu-khùi bia̍t-bô.

18Hō͘ in知只有你，名做耶和華ê，　　是全-地上至koânê。Hō͘ in chai chí-ū Lí, miâ chòe Iâ-hô-hoa ê, Sī choân-tōe-chiūⁿ chì-koâiⁿ ê.