1Khó-la̍h ê後裔ê詩；交hō͘樂官；用Ka-te̍k ê樂器。1) 萬軍ê耶和華ah，　　你khiā起ê所在，怎樣hiah thang意愛。Khó-la̍h ê hō͘-è ê si; kau hō͘ Ga̍k-koaⁿ; ēng Ka-te̍k ê ga̍k-khì.1) Bān-kun ê Iâ-hô-hoa ah, Lí khiā-khí ê só͘-chāi, cháiⁿ-iūⁿ hiah thang ì-ài.

2我ê心神戀慕耶和華ê殿院到暈去；　　我ê心腸，我ê肉體，ǹg活ê上帝求叫。Góa ê sim-sîn loân-bō͘ Iâ-hô-hoa ê tiān-īⁿ kàu hūn--khì; Góa ê sim-tn̂g, góa ê jio̍k-thé, ǹg oa̍h ê Siōng-tè kiû-kiò.

3萬軍ê耶和華，我ê王，我ê上帝ah，　　雀鳥á為tio̍h家己chhē-tio̍h一個厝，　　燕á為tio̍h家己chhē-tio̍h pū-kiáⁿ ê siū；　　就是tī你hiah-ê祭壇hia。Bān-kun ê Iâ-hô-hoa, góa ê Ông, góa ê Siōng-tè ah, Chhek-chiáu-á ūi-tio̍h ka-kī chhē-tio̍h chi̍t ê chhù, Ìⁿ-á ūi-tio̍h ka-kī chhē-tio̍h pū-kiáⁿ ê siū; Chiū-sī tī Lí hiah ê chè-tôaⁿ hia.

4Khiā起tī你ê厝ê，hit號人有福氣；　　In beh直直o-ló你。[Sè-la̍h]Khiā-khí tī Lí ê chhù ê, hit hō lâng ū hok-khì; In beh ti̍t-ti̍t o-ló Lí. [Sè-la̍h

5伊ê力在tī你，　　In ê心意ǹg錫安ê大路ê，hit號人有福氣。I ê la̍t chāi-tī Lí, In ê sim ì-hiòng Sek-an ê tōa-lō͘--ê, hit-hō lâng ū hok-khì.

6In經過Lâu-目屎ê山谷，hō͘伊變做水泉ê所在；　　Koh有秋天ê雨ê福氣kā伊蓋滿。In keng-kè Lâu-ba̍k-sái ê soaⁿ-kok, hō͘ i pìⁿ-chòe chúi-chôaⁿ ê só͘-chāi; Koh ū chhiu-thiⁿ ê hō͘ ê hok-khì kā i khàm-móa.

7In ná行，氣力ná加添，　　Ta̍k人到錫安朝見上帝。In ná-kiâⁿ, khùi-la̍t ná ke-thiⁿ, Ta̍k-lâng kàu Sek-an tiâu-kìⁿ Siōng-tè.

8萬軍ê上帝耶和華ah，求你聽我ê祈禱；　　雅各ê上帝ah，求你àⁿ耳孔來聽。[Sè-la̍h]Bān-kun ê Siōng-tè Iâ-hô-hoa ah, kiû Lí thiaⁿ góa ê kî-tó; Ngá-kok ê Siōng-tè ah, kiû Lí àⁿ hī-khang lâi thiaⁿ. [Sè-la̍h

9做阮ê藤牌ê上帝ah，你tio̍h看；　　看你受抹油ê ê面。Chòe goán ê tîn-pâi ê Siōng-tè ah, Lí tio̍h khòaⁿ; Khòaⁿ Lí siū boah-iû--ê ê bīn.

10Tī你ê殿院 tòa一日，khah好一千日；　　寧可tī我ê上帝ê厝顧門，　　Khah好tiàm tī pháiⁿ人ê布棚，Tī Lí ê tiān-īⁿ tòa chi̍t-ji̍t, khah-hó chi̍t-chheng ji̍t; Lêng-khó͘ tī góa ê Siōng-tè ê chhù kò͘-mn̂g, Khah-hó tiàm tī pháiⁿ-lâng ê pò͘-pîⁿ,

11因為耶和華上帝是日頭，是藤牌；　　耶和華賞賜恩惠kap榮光；　　伊bē-bat留一項好物，無hō͘ hiah-ê行正直ê人。In-ūi Iâ-hô-hoa Siōng-tè sī ji̍t-thâu, sī tîn-pâi; Iâ-hô-hoa siúⁿ-sù un-hūi kap êng-kng; I bē-bat lâu chi̍t-hāng hó-mi̍h, Bô hō͘ hiah ê kiâⁿ chèng-ti̍t ê lâng.

12萬軍ê耶和華ah，　　Óa靠你ê人有福氣。Bān-kun ê Iâ-hô-hoa ah, Óa-khò Lí ê lâng ū hok-khì.

1Khó-la̍h ê後裔ê詩；交hō͘樂官。1) 耶和華ah，你已經施恩tī你ê地，　　雅各受掠ê人，你救伊tò來。Khó-la̍h ê hō͘-è ê si; kau hō͘ Ga̍k-koaⁿ.1) Iâ-hô-hoa ah, Lí í-keng si-un tī Lí ê tōe, Ngá-kok siū-lia̍h ê lâng, Lí kiù i tò-lâi.

2你赦免你ê百姓ê罪惡，　　你遮蓋in一切ê罪過。[Sè-la̍h]Lí sià-bián Lí ê peh-sìⁿ ê chōe-ok, Lí jia-khàm in it-chhè ê chōe-kòa. [Sè-la̍h

3你收回你一切ê受氣，　　Soah你猛烈ê受氣。Lí siu-hôe Lí it-chhè ê siū-khì, Soah Lí béng-lia̍t ê siū-khì.

4救阮ê上帝ah，求你hō͘阮倒tńg，　　Soah你ǹg阮ê受氣。Kiù goán ê Siōng-tè ah, kiû Lí hō͘ goán tò-tńg, Soah Lí ǹg goán ê siū-khì.

5你beh受氣阮到永遠mah？　　你beh將你ê受氣流到萬代mah？Lí beh siū-khì goán kàu éng-oán mah? Lí beh chiong Lí ê siū-khì lâu kàu bān-tāi mah?

6你kiám m̄ koh將阮救活，　　Hō͘你ê百姓因為你來歡喜mah？Lí kiám m̄ koh chiong goán kiù oa̍h, Hō͘ Lí ê peh-sìⁿ in-ūi Lí lâi hoaⁿ-hí mah?

7耶和華ah，求你hō͘阮看見你ê慈愛；　　Koh將你ê救恩賞賜阮。Iâ-hô-hoa ah, kiû Lí hō͘ goán khòaⁿ-kìⁿ Lí ê chû-ài; Koh chiong Lí ê kiù-un siúⁿ-sù goán.

8我願聽全能ê耶和華所beh講ê；　　因為祂beh對祂ê百姓，kap祂聖ê百姓，講平安；　　總是in m̄-thang koh去lām-sám行。Góa goān thiaⁿ Choân-lêng ê Iâ-hô-hoa só͘ beh kóng--ê; In-ūi I beh tùi I ê peh-sìⁿ, kap I sèng ê peh-sìⁿ, kóng pêng-an; Chóng-sī in m̄-thang koh khì lām-sám kiâⁿ.

9伊ê救恩實在近tī驚畏伊ê人；　　Hō͘榮光tiàm tī咱ê境內。I ê kiù-un si̍t-chāi kūn tī kiaⁿ-ùi I ê lâng; Hō͘ êng-kng tiàm tī lán ê kéng-lāi.

10慈愛kap真實相tú-tio̍h；　　公義kap平安相chim嘴。Chû-ài kap chin-si̍t saⁿ tú-tio̍h; Kong-gī kap pêng-an saⁿ chim-chhùi.

11真實tùi地裡發生，　　公義tùi天看落來。Chin-si̍t tùi tōe--nih hoat-siⁿ, Kong-gī tùi thiⁿ khòaⁿ--lo̍h-lâi.

12耶和華beh賞賜好物，　　咱ê土地beh出伊ê土產。Iâ-hô-hoa beh siúⁿ-sù hó-mi̍h, Lán ê thó͘-tōe beh chhut i ê thó͘-sán.

13公義beh行tī伊ê頭前，　　Hō͘伊ê腳跡成做lō͘。Kong-gī beh kiâⁿ tī I ê thâu-chêng, Hō͘ I ê kha-jiah chiâⁿ-chòe lō͘.

1大衛ê祈禱。1) 耶和華ah，求你àⁿ耳孔聽我；　　因為我是困苦sòng-hiong ê。Tāi-pi̍t ê kî-tó.1) Iâ-hô-hoa ah, kiû Lí àⁿ hī-khang thiaⁿ góa; In-ūi góa sī khùn-khó͘ sòng-hiong ê.

2求你保存我ê性命，因為我是虔誠ê人。　　我ê上帝ah，你ê奴僕óa靠你；求你拯救伊。Kiû Lí pó-chûn góa ê sìⁿ-miā, in-ūi góa sī khiân-sêng ê lâng. Góa ê Siōng-tè ah, Lí ê lô͘-po̍k óa-khò Lí; kiû Lí chín-kiù i.

3主ah，求你憐憫我；　　因為我thong日求叫你。Chú ah, kiû Lí lîn-bín góa; In-ūi góa thong-ji̍t kiû-kiò Lí.

4主ah，求你hō͘你ê奴僕心歡喜；　　因為我用我ê心仰望你。Chú ah, kiû Lí hō͘ Lí ê lô͘-po̍k sim hoaⁿ-hí; In-ūi góa ēng góa ê sim gióng-bōng Lí.

5主ah，因為你是好，歡喜赦免人；　　有豐盛ê慈愛，賞賜凡若求叫你ê人。Chú ah, in-ūi Lí sī hó, hoaⁿ-hí sià-bián lâng; Ū hong-sēng ê chû-ài, siúⁿ-sù hoān-nā kiû-kiò Lí ê lâng.

6耶和華ah，求你àⁿ耳孔聽我ê祈禱；　　Àⁿ落聽我懇求ê聲。Iâ-hô-hoa ah, kiû Lí àⁿ hī-khang thiaⁿ góa ê kî-tó; Àⁿ-lo̍h thiaⁿ góa khún-kiû ê siaⁿ.

7Tī我患難ê日，beh求叫你；　　你beh 應我。Tī góa hoān-lān ê ji̍t, beh kiû-kiò Lí; Lí beh ìn góa.

8主ah，chiah-ê上帝 ê中間，無一個能比得你；　　你ê所做亦無thang比並。Chú ah, chiah ê siōng-tè ê tiong-kan, bô chi̍t-ê ōe pí-tit Lí; Lí ê só͘ chòe ia̍h bô thang pí-phēng.

9主ah，你所造ê萬邦lóng beh來仆拜tī你ê面前；　　In亦beh榮光你ê名。Chú ah, Lí só͘ chō ê bān-pang lóng beh lâi phak-pài tī Lí ê bīn-chêng; In ia̍h beh êng-kng Lí ê miâ.

10因為你做大，koh行奇妙ê事；　　只有你是上帝。In-ūi Lí chòe tōa, koh kiâⁿ kî-biāu ê sū; Chí-ū Lí sī Siōng-tè.

11耶和華ah，求你將你ê道路指示我；我beh照你ê真理來行；　　Hō͘我專一ê心敬畏你ê名。Iâ-hô-hoa ah, kiû Lí chiong Lí ê tō-lō͘ chí-sī góa; góa beh chiàu Lí ê chin-lí lâi kiâⁿ; Hō͘ góa choan-it ê sim kèng-ùi Lí ê miâ.

12主，我ê上帝ah，我beh全心o-ló你；　　我beh榮光你ê名到永遠。Chú, góa ê Siōng-tè ah, góa beh choân-sim o-ló Lí; Góa beh êng-kng Lí ê miâ kàu éng-oán.

13因為你對我發出大ê慈愛，　　你救我ê性命免落極深ê陰間。In-ūi Lí tùi góa hoat-chhut tōa ê chû-ài, Lí kiù góa ê sìⁿ-miā bián lo̍h ke̍k-chhim ê im-kan.

14上帝ah，驕傲ê人起來攻擊我；　　Koh有強暴ê黨siàu想我ê性命；　　In無敬奉你tī in ê面前。Siōng-tè ah, kiau-ngō͘ ê lâng khí-lâi kong-kek góa; Koh ū kiông-pō ê tóng siàu-siūⁿ góa ê sìⁿ-miā; In bô kèng-hōng Lí tī in ê bīn-chêng.

15主ah，你是仁慈恩典ê上帝；　　無快快受氣，koh有豐盛ê慈愛kap誠實。Chú ah, Lí sī jîn-chû un-tián ê Siōng-tè; Bô khoài-khoài siū-khì, koh ū hong-sēng ê chû-ài kap sêng-si̍t.

16求你oa̍t過來看我，可憐我；　　將你ê氣力賞賜你ê奴僕，　　救你ê女婢ê kiáⁿ。Kiû Lí oa̍t--kè-lâi khòaⁿ góa, khó-lîn góa; Chiong Lí ê khùi-la̍t siúⁿ-sù Lí ê lô͘-po̍k, Kiù Lí ê lú-pī ê kiáⁿ.

17求你顯出恩典我ê憑據，　　Hō͘怨恨我ê人看見來見笑；　　因為耶和華你幫贊我，安慰我。Kiû Lí hián-chhut un-tián góa ê pîn-kù, Hō͘ oàn-hūn góa ê lâng khòaⁿ-kìⁿ lâi kiàn-siàu; In-ūi Iâ-hô-hoa Lí pang-chān góa, an-ùi góa.