1大衛ê祈禱。1) 耶和華ah，求你àⁿ耳孔聽我；　　因為我是困苦sòng-hiong ê。Tāi-pi̍t ê kî-tó.1) Iâ-hô-hoa ah, kiû Lí àⁿ hī-khang thiaⁿ góa; In-ūi góa sī khùn-khó͘ sòng-hiong ê.

2求你保存我ê性命，因為我是虔誠ê人。　　我ê上帝ah，你ê奴僕óa靠你；求你拯救伊。Kiû Lí pó-chûn góa ê sìⁿ-miā, in-ūi góa sī khiân-sêng ê lâng. Góa ê Siōng-tè ah, Lí ê lô͘-po̍k óa-khò Lí; kiû Lí chín-kiù i.

3主ah，求你憐憫我；　　因為我thong日求叫你。Chú ah, kiû Lí lîn-bín góa; In-ūi góa thong-ji̍t kiû-kiò Lí.

4主ah，求你hō͘你ê奴僕心歡喜；　　因為我用我ê心仰望你。Chú ah, kiû Lí hō͘ Lí ê lô͘-po̍k sim hoaⁿ-hí; In-ūi góa ēng góa ê sim gióng-bōng Lí.

5主ah，因為你是好，歡喜赦免人；　　有豐盛ê慈愛，賞賜凡若求叫你ê人。Chú ah, in-ūi Lí sī hó, hoaⁿ-hí sià-bián lâng; Ū hong-sēng ê chû-ài, siúⁿ-sù hoān-nā kiû-kiò Lí ê lâng.

6耶和華ah，求你àⁿ耳孔聽我ê祈禱；　　Àⁿ落聽我懇求ê聲。Iâ-hô-hoa ah, kiû Lí àⁿ hī-khang thiaⁿ góa ê kî-tó; Àⁿ-lo̍h thiaⁿ góa khún-kiû ê siaⁿ.

7Tī我患難ê日，beh求叫你；　　你beh 應我。Tī góa hoān-lān ê ji̍t, beh kiû-kiò Lí; Lí beh ìn góa.

8主ah，chiah-ê上帝 ê中間，無一個能比得你；　　你ê所做亦無thang比並。Chú ah, chiah ê siōng-tè ê tiong-kan, bô chi̍t-ê ōe pí-tit Lí; Lí ê só͘ chòe ia̍h bô thang pí-phēng.

9主ah，你所造ê萬邦lóng beh來仆拜tī你ê面前；　　In亦beh榮光你ê名。Chú ah, Lí só͘ chō ê bān-pang lóng beh lâi phak-pài tī Lí ê bīn-chêng; In ia̍h beh êng-kng Lí ê miâ.

10因為你做大，koh行奇妙ê事；　　只有你是上帝。In-ūi Lí chòe tōa, koh kiâⁿ kî-biāu ê sū; Chí-ū Lí sī Siōng-tè.

11耶和華ah，求你將你ê道路指示我；我beh照你ê真理來行；　　Hō͘我專一ê心敬畏你ê名。Iâ-hô-hoa ah, kiû Lí chiong Lí ê tō-lō͘ chí-sī góa; góa beh chiàu Lí ê chin-lí lâi kiâⁿ; Hō͘ góa choan-it ê sim kèng-ùi Lí ê miâ.

12主，我ê上帝ah，我beh全心o-ló你；　　我beh榮光你ê名到永遠。Chú, góa ê Siōng-tè ah, góa beh choân-sim o-ló Lí; Góa beh êng-kng Lí ê miâ kàu éng-oán.

13因為你對我發出大ê慈愛，　　你救我ê性命免落極深ê陰間。In-ūi Lí tùi góa hoat-chhut tōa ê chû-ài, Lí kiù góa ê sìⁿ-miā bián lo̍h ke̍k-chhim ê im-kan.

14上帝ah，驕傲ê人起來攻擊我；　　Koh有強暴ê黨siàu想我ê性命；　　In無敬奉你tī in ê面前。Siōng-tè ah, kiau-ngō͘ ê lâng khí-lâi kong-kek góa; Koh ū kiông-pō ê tóng siàu-siūⁿ góa ê sìⁿ-miā; In bô kèng-hōng Lí tī in ê bīn-chêng.

15主ah，你是仁慈恩典ê上帝；　　無快快受氣，koh有豐盛ê慈愛kap誠實。Chú ah, Lí sī jîn-chû un-tián ê Siōng-tè; Bô khoài-khoài siū-khì, koh ū hong-sēng ê chû-ài kap sêng-si̍t.

16求你oa̍t過來看我，可憐我；　　將你ê氣力賞賜你ê奴僕，　　救你ê女婢ê kiáⁿ。Kiû Lí oa̍t--kè-lâi khòaⁿ góa, khó-lîn góa; Chiong Lí ê khùi-la̍t siúⁿ-sù Lí ê lô͘-po̍k, Kiù Lí ê lú-pī ê kiáⁿ.

17求你顯出恩典我ê憑據，　　Hō͘怨恨我ê人看見來見笑；　　因為耶和華你幫贊我，安慰我。Kiû Lí hián-chhut un-tián góa ê pîn-kù, Hō͘ oàn-hūn góa ê lâng khòaⁿ-kìⁿ lâi kiàn-siàu; In-ūi Iâ-hô-hoa Lí pang-chān góa, an-ùi góa.

1Khó-la̍h ê後裔ê詩歌。1) 伊ê地基在tī聖山。Khó-la̍h ê hō͘-è ê si-koa.1) I ê tōe-ki chāi-tī sèng-soaⁿ.

2耶和華疼錫安ê門，　　贏過雅各lóng總khiā起ê所在。Iâ-hô-hoa thiàⁿ Sek-an ê mn̂g, Iâⁿ-kè Ngá-kok lóng-chóng khiā-khí ê só͘-chāi.

3上帝ê城ah，　　有榮光ê事，是指你來講ê。 [Sè-la̍h]Siōng-tè ê siâⁿ ah, Ū êng-kng ê sū, sī chí lí lâi kóng--ê. [Sè-la̍h

4我beh算La̍h-hap-pek kap巴比倫tī bat我ê ê內面；　　看ah，腓利士、Chhui-lô、Kó͘-si̍t，　　Chit-ê出世tī-hia。Góa beh sǹg La̍h-hap-pek kap Pa-pí-lûn tī bat Góa--ê ê lāi-bīn; Khòaⁿ ah, Hui-lī-sū, Chhui-lô, Kó͘-si̍t, Chit-ê chhut-sì tī-hia.

5論到錫安beh講，Chit-ê，hit-ê，出世tī hit中間；　　Koh至koânê beh親身堅固伊。Lūn-kàu Sek-an beh kóng, Chit-ê, hit-ê, chhut-sì tī hit tiong-kan; Koh Chì-koâiⁿ-ê beh chhin-sin kian-kò͘--i.

6當耶和華記萬百姓數額ê時，　　伊beh算chit-ê出世tī-hia。[Sè-la̍h]Tng Iâ-hô-hoa kì bān peh-sìⁿ siàu-gia̍h ê sî, I beh sǹg chit-ê chhut-sì tī-hia. [Sè-la̍h

7唱歌ê，跳舞ê，lóng beh講，　　我ê水源lóng在tī你。Chhiùⁿ-koa-ê, thiàu-bú-ê, lóng beh kóng, Góa ê chúi-goân lóng chāi-tī Lí.

1Khó-la̍h後裔ê詩歌，就是以斯拉人Hi-bān教示ê詩；交hō͘樂官；調用Mô͘-ha̍p-la̍h Lī-àm-ngô͘。1) 耶和華，救我ê上帝ah，　　我日暝tī你ê面前求叫。Khó-la̍h hō͘-è ê si-koa, chiū-sī Í-sū-la̍h lâng Hi-bān kà-sī ê si; kau hō͘ Ga̍k-koaⁿ; tiāu, ēng Mô͘-ha̍p-la̍h Lī-àm-ngô͘.1) Iâ-hô-hoa, kiù góa ê Siōng-tè ah, Góa ji̍t-mî tī Lí ê bīn-chêng kiû-kiò.

2願我ê祈禱到你ê面前；　　求你àⁿ耳孔聽我ê祈求。Goān góa ê kî-tó kàu Lí ê bīn-chêng; Kiû Lí àⁿ hī-khang thiaⁿ góa ê kî-kiû.

3因為我ê心滿滿患難，　　我ê性命近tī陰間。In-ūi góa ê sim móa-móa hoān-lān, Góa ê sìⁿ-miā kūn tī im-kan.

4我算kap落穴ê人同列；　　也親像無得tio̍h幫贊ê人。Góa sǹg kap lo̍h-hia̍t ê lâng tâng-lia̍t; Iā chhin-chhiūⁿ bô tit-tio̍h pang-chān ê lâng.

5我受hiat-ka̍k tī死人中，　　親像受thâi ê人倒tī墓內；　　In是你無koh記得ê，　　Tùi你ê手隔斷。Góa siū hiat-ka̍k tī sí-lâng-tiong, Chhin-chhiūⁿ siū-thâi ê lâng tó tī bōng-lāi; In sī Lí bô koh kì-tit-ê, Tùi Lí ê chhiú keh-tn̄g.

6你hē我tī極深ê穴；　　Tī烏暗ê地方，tī深淵。Lí hē góa tī ke̍k-chhim ê hia̍t; Tī o͘-àm ê tōe-hng, tī chhim-ian.

7你ê受氣重重teh我；　　你用你一切ê海湧苦楚窘迫我。[Sè-la̍h]Lí ê siū-khì tāng-tāng teh góa; Lí ēng Lí it-chhè ê hái-éng khó͘-chhó͘ khún-pek góa. [Sè-la̍h

8Kap我相識ê人你hō͘ in離開我遠遠，　　Hō͘ in厭惡我；　　我受關禁，bōe得出來。Kap góa sio-bat ê lâng Lí hō͘ in lī-khui góa hn̄g-hn̄g, Hō͘ in iàm-ò͘ⁿ góa; Góa siū koaiⁿ-kìm, bōe-tit chhut-lâi.

9我ê目睭因為困苦phah-pháiⁿ；　　耶和華ah，我日日求叫你，　　我ǹg你kia̍h-手。Góa ê ba̍k-chiu in-ūi khùn-khó͘ phah-pháiⁿ; Iâ-hô-hoa ah, góa ji̍t-ji̍t kiû-kiò Lí, Góa ǹg Lí kia̍h-chhiú.

10你kiám beh行奇事hō͘死人看mah？　　總無陰魂iáu會起來o-ló你ah？[Sè-la̍h]Lí kiám beh kiâⁿ kî-sū hō͘ sí-lâng khòaⁿ mah? Chóng-bô im-hûn iáu ōe khí-lâi o-ló Lí ah? [Sè-la̍h

11Kiám會tī墓內講起你ê慈愛mah？　　Kiám會tī滅無ê中間講起你ê信實mah？Kiám ōe tī bōng-lāi kóng-khí Lí ê chû-ài mah? Kiám ōe tī bia̍t-bô ê tiong-kan kóng-khí Lí ê sìn-si̍t mah?

12Tī烏暗ê所在，kiám會知你ê奇事mah？　　Tī bōe記得tāi-chì ê地方，kiám會知你ê公義mah？Tī o͘-àm ê só͘-chāi, kiám ōe chai Lí ê kî-sū mah? Tī bōe-kì-tit tāi-chì ê tōe-hng, kiám ōe chai Lí ê kong-gī mah?

13耶和華ah，我有祈求你；　　Tī早起時我ê祈禱beh透到你ê面前。Iâ-hô-hoa ah, góa ū kî-kiû Lí; Tī chá-khí-sî góa ê kî-tó beh thàu kàu Lí ê bīn-chêng.

14耶和華ah，你啥事棄sak我？　　啥事掩你ê面，m̄看我？Iâ-hô-hoa ah, Lí siáⁿ-sū khì-sak góa? Siáⁿ-sū ng Lí ê bīn, m̄ khòaⁿ góa?

15我tùi少年受苦，險險死；　　我受tio̍h你ê驚惶，致到心紛亂。Góa tùi siàu-liân siū-khó͘, hiám-hiám sí; Góa siū-tio̍h Lí ê kiaⁿ-hiâⁿ, tì-kàu sim hun-loān.

16你ê大受氣淹密我；　　你用驚惶除滅我。Lí ê tōa siū-khì im-ba̍t góa; Lí ēng kiaⁿ-hiâⁿ tû-bia̍t góa.

17Chiah-ê thong日親像水圍我；　　一齊來圍困我。Chiah-ê thong-ji̍t chhin-chhiūⁿ chúi ûi góa; Chi̍t-chôe lâi ûi-khùn góa.

18你將我ê良朋蜜友隔開遠遠；　　Hō͘我所相識ê人入tī烏暗ê所在。Lí chiong góa ê liông-pêng bi̍t-iú keh-khui hn̄g-hn̄g; Hō͘ góa só͘ saⁿ-bat ê lâng ji̍p tī o͘-àm ê só͘-chāi.