1Í-su-la̍h人，Í-thàm，教示ê詩。1) 我beh唱歌o-ló耶和華ê慈愛到tī永遠。　　Beh用我ê嘴傳你ê信實到代代。Í-su-la̍h lâng, Í-thàm, kà-sī ê si.1) Góa beh chhiùⁿ-koa o-ló Iâ-hô-hoa ê chû-ài kàu tī éng-oán. Beh ēng góa ê chhùi thoân Lí ê sìn-si̍t kàu tāi-tāi.

2因為我bat講，慈愛beh受建立到永遠；　　你beh將你ê信實堅固tī天裡。In-ūi góa bat kóng, Chû-ài beh siū kiàn-li̍p kàu éng-oán; Lí beh chiong Lí ê sìn-si̍t kian-kò͘ tī thiⁿ--nih.

3我kap我所揀ê人立約，　　對我ê奴僕大衛chiù-chōa。Góa kap Góa só͘ kéng ê lâng li̍p-iok, Tùi Góa ê lô͘-po̍k Tāi-pi̍t chiù-chōa.

4我beh hō͘你ê後裔堅固到永遠，　　Koh hō͘你ê寶座建立到代代。 [Sè-la̍h]Góa beh hō͘ lí ê hō͘-è kian-kò͘ kàu éng-oán, Koh hō͘ lí ê pó-chō kiàn-li̍p kàu tāi-tāi. [Sè-la̍h

5耶和華ah，chiah-ê天 beh o-ló你ê奇事；　　Tī聖ê ê會中，beh o-ló你ê信實。Iâ-hô-hoa ah, chiah ê thiⁿ beh o-ló Lí ê kî-sū; Tī sèng--ê ê hōe-tiong, beh o-ló Lí ê sìn-si̍t.

6Tī空中是誰能比得耶和華？　　大權能ê ê眾kiáⁿ中，是誰能親像耶和華？Tī khong-tiong chī-chūi ōe pí-tit Iâ-hô-hoa? Tōa koân-lêng--ê ê chèng-kiáⁿ-tiong, chī-chūi ōe chhin-chhiūⁿ Iâ-hô-hoa?

7伊tī聖ê ê議會中，是大大有威嚴ê上帝；　　比一切tī伊四圍ê，koh-khah thang驚畏。I tī sèng--ê ê gī-hōe tiong, sī tōa-tōa ū ui-giâm ê Siōng-tè; Pí it-chhè tī I sì-ûi ê, koh-khah thang kiaⁿ-ùi.

8萬軍ê上帝耶和華ah，　　Toh落一個大權能ê，親像你耶和華？　　你ê信實tī你ê四圍。Bān-kun ê Siōng-tè Iâ-hô-hoa ah, Toh-lo̍h chi̍t-ê tōa koân-lêng--ê, chhin-chhiūⁿ Lí Iâ-hô-hoa? Lí ê sìn-si̍t tī Lí ê sì-ûi.

9海水漲高，你管轄伊；　　海湧giâ起來，你hō͘伊平。Hái-chúi tiòng-koâiⁿ, Lí koán-hat--i; Hái-éng giâ--khí-lâi, Lí hō͘ i pîⁿ.

10你phah碎La̍h-hap-pek，親像已經thâi死ê人；　　你用有氣力ê手phah散你ê對敵。Lí phah chhùi La̍h-hap-pek, chhin-chhiūⁿ í-keng thâi-sí ê lâng; Lí ēng ū khùi-la̍t ê chhiú phah-sòaⁿ Lí ê tùi-te̍k.

11天屬你，地亦屬你；　　世界kap其中所充滿ê，lóng是你所建立。Thiⁿ sio̍k Lí, tōe ia̍h sio̍k Lí; Sè-kài kap kî-tiong só͘ chhiong-móa--ê, lóng sī Lí só͘ kiàn-li̍p.

12南北是你所創造；　　Tha-po̍k kap Hek-bûn，因為你ê名來歡喜。Lâm-pak sī Lí só͘ chhòng-chō; Tha-po̍k kap Hek-bûn, in-ūi Lí ê miâ lâi hoaⁿ-hí.

13你有大權能ê手，　　你ê手有力，你ê chiàⁿ手kia̍h高高。Lí ū tōa koân-lêng ê chhiú, Lí ê chhiú ū la̍t, Lí ê chiàⁿ-chhiú kia̍h koâiⁿ-koâiⁿ.

14公平kap義理是你ê寶座ê地基；　　慈愛kap誠實行tī你ê面前。Kong-pêng kap gī-lí sī Lí ê pó-chō ê tōe-ki; Chû-ài kap sêng-si̍t kiâⁿ tī Lí ê bīn-chêng.

15能bat歡喜ê聲-ê，hit-ê百姓有福氣；　　耶和華ah，in tī你ê面所發出ê光teh行。Ōe bat hoaⁿ-hí ê siaⁿ--ê, hit ê peh-sìⁿ ū hok-khì; Iâ-hô-hoa ah, in tī Lí ê bīn só͘ hoat-chhut ê kng teh kiâⁿ.

16In日日因為你ê名來歡喜；　　因為你ê公義得tio̍h升高。In ji̍t-ji̍t in-ūi Lí ê miâ lâi hoaⁿ-hí; In-ūi Lí ê kong-gī tit-tio̍h seng-koâiⁿ.

17因為你是in氣力ê榮光；　　Koh因為你歡喜阮，阮ê角beh得tio̍h kia̍h高。In-ūi Lí sī in khùi-la̍t ê êng-kng; Koh in-ūi Lí hoaⁿ-hí goán, goán ê kak beh tit-tio̍h kia̍h-koâiⁿ.

18阮ê藤牌屬tī耶和華；　　阮ê王屬tī以色列ê聖ê。Goán ê tîn-pâi sio̍k tī Iâ-hô-hoa; Goán ê ông sio̍k tī Í-sek-lia̍t ê Sèng--ê.

19當時你tī異象中吩咐你聖ê百姓，講，　　我用幫贊ê力，hē tī hit-ê有權能ê ê身上；　　Tùi百姓中揀ê，我高升伊。Tng-sî Lí tī īⁿ-siōng-tiong hoan-hù Lí sèng ê peh-sìⁿ, kóng, Góa ēng pang-chān ê la̍t, hē tī hit ê ū koân-lêng--ê ê sin-chiūⁿ; Tùi peh-sìⁿ-tiong kéng--ê, Góa ko-seng--i.

20我chhē-tio̍h我ê奴僕大衛；　　用我ê聖油抹伊。Góa chhē-tio̍h Góa ê lô͘-po̍k Tāi-pi̍t; Ēng Góa ê sèng-iû boah--i.

21我ê手beh常常kap伊tī-teh，　　我ê手骨亦beh堅固伊。Góa ê chhiú beh siông-siông kap i tī-teh, Góa ê chhiú-kut ia̍h beh kian-kò͘--i.

22對敵bōe能勒索伊；　　兇惡ê人bōe能苦楚伊。Tùi-te̍k bōe-ōe le̍k-sek i; Hiong-ok ê lâng bōe-ōe khó͘-chhó͘--i.

23我beh tī伊ê面前phah碎伊ê對敵；　　攻擊hit-ê怨恨伊ê人。Góa beh tī i ê bīn-chêng phah-chhùi i ê tùi-te̍k; Kong-kek hit ê oàn-hūn i ê lâng.

24總是我ê信實，kap我ê慈愛，beh kap伊tī-teh；　　因為我ê名，伊ê角beh得tio̍h kia̍h高。Chóng-sī Góa ê sìn-si̍t, kap Góa ê chû-ài, beh kap i tī-teh; In-ūi Góa ê miâ, i ê kak beh tit-tio̍h kia̍h-koâiⁿ.

25我beh hō͘伊ê手伸到海；　　Chiàⁿ手伸到chiah-ê河。Góa beh hō͘ i ê chhiú chhun kàu hái; Chiàⁿ-chhiú chhun kàu chiah ê hô.

26伊beh稱呼我講，你是我ê父，　　是我ê上帝，是救我ê石磐。I beh chheng-ho͘ Góa kóng, Lí sī góa ê pē, Sī góa ê Siōng-tè, sī kiù góa ê chio̍h-pôaⁿ.

27我亦beh設立伊最大kiáⁿ，　　做世上第一高ê君王。Góa ia̍h beh siat-li̍p i chòe tōa-kiáⁿ, Chòe sè-chiūⁿ tē-it koâiⁿ ê kun-ông.

28我beh為tio̍h伊保存我ê慈愛到永遠；　　我kap伊所立ê約，的確無變換。Góa beh ūi-tio̍h i pó-chûn Góa ê chû-ài kàu éng-oán; Góa kap i só͘ li̍p ê iok, tek-khak bô piàn-ōaⁿ.

29我亦beh保存伊ê後裔到代代；　　Hō͘伊ê寶座親像天ê久。Góa ia̍h beh pó-chûn i ê hō͘-è kàu tāi-tāi; Hō͘ i ê pó-chō chhin-chhiūⁿ thiⁿ ê kú.

30設使伊ê kiáⁿ孫放sak我ê律法；　　無行我ê法度；Siat-sú i ê kiáⁿ-sun pàng-sak Góa ê lu̍t-hoat; Bô kiâⁿ Góa ê hoat-tō͘;

31悖謬我ê律例，　　無守我ê誡命；Pōe-biū Góa ê lu̍t-lē, Bô siú Góa ê kài-bēng;

32我就beh用柺á責罰in ê過失；　　用鞭責罰in ê罪惡。Góa chiū beh ēng koáiⁿ-á chek-hoa̍t in ê kè-sit; Ēng piⁿ chek-hoa̍t in ê chōe-ok.

33總是我的確無將我ê慈愛一盡對伊收回；　　亦的確無hō͘我ê信實廢無。Chóng-sī Góa tek-khak bô chiong góa ê chû-ài it-chīn tùi i siu-hôe; Ia̍h tek-khak bô hō͘ Góa ê sìn-si̍t hòe-bô.

34我的確無失我ê約，　　亦無改換我ê嘴所講ê。Góa tek-khak bô sit Góa ê iok, Ia̍h bô kóe-ōaⁿ Góa ê chhùi só͘ kóng--ê.

35我一pái kí家己ê聖潔來chiù-chōa，　　我決斷無tùi大衛講白賊；Góa chi̍t-pái kí ka-kī ê sèng-kiat lâi chiù-chōa, Góa koat-toàn bô tùi Tāi-pi̍t kóng pe̍h-chha̍t;

36伊ê後裔beh傳到永遠；　　伊ê寶座tī我ê面前，親像日ê久長；I ê hō͘-è beh thoân kàu éng-oán; I ê pó-chō tī Góa ê bīn-chêng, chhin-chhiūⁿ ji̍t ê kú-tn̂g;

37亦親像月ê永遠建立；　　Koh親像天頂確實ê干證。[Sè-la̍h]Ia̍h chhin-chhiūⁿ ge̍h ê éng-oán kiàn-li̍p; Koh chhin-chhiūⁿ thiⁿ-téng khak-si̍t ê kan-chèng. [Sè-la̍h

38總是你有受氣你ê受抹油ê，　　厭(iàm)賤棄sak伊。Chóng-sī Lí ū siū-khì Lí ê siū-boah-iû--ê, Iàm-chiān khì-sak i.

39你已經厭惡kap你ê奴僕所立ê約，　　將伊ê冕旒蹧躂 tī地裡。Lí í-keng iàm-ò͘ⁿ kap Lí ê lô͘-po̍k só͘ li̍p ê iok, Chiong i ê bián-liû chau-that tī tōe--nih.

40你已經拆伊一切ê籬笆；　　Hō͘伊ê衛所變做拋荒ê所在。Lí í-keng thiah i it-chhè ê lî-pa; Hō͘ i ê ōe-só͘ pìⁿ chòe pha-hng ê só͘-chāi.

41過路人lóng搶the̍h伊；　　伊成做隔壁kok所凌辱ê。Kè-lō͘ lâng lóng chhiúⁿ-the̍h i; I chiâⁿ-chòe keh-piah kok só͘ lêng-jio̍k--ê.

42你hō͘伊ê對敵ê chiàⁿ手kia̍h高；　　Hō͘伊ê仇讎lóng歡喜。Lí hō͘ i ê tùi-te̍k ê chiàⁿ-chhiú kia̍h-koâiⁿ; Hō͘ i ê kiû-siû lóng hoaⁿ-hí.

43你hō͘伊ê刀劍倒鋩(tó-mî)，　　Hō͘伊tī交戰ê時khiā-bōe-tiâu。Lí hō͘ i ê to-kiàm tó-mî, Hō͘ i tī kau-chiàn ê sî khiā-bōe-tiâu.

44你hō͘伊ê榮顯無去，　　將伊ê寶座chhia倒tī地裡。Lí hō͘ i ê êng-hián bô--khì, Chiong i ê pó-chō chhia-tó tī tōe--nih.

45你減少伊青年ê日子；　　Koh hō͘伊滿滿見笑。 [Sè-la̍h]Lí kiám-chió i chheng-liân ê ji̍t-chí; Koh hō͘ i móa-móa kiàn-siàu. [Sè-la̍h

46耶和華ah，你beh jōa久家己khǹg密，到永遠mah？　　你ê受氣親像火to̍h，beh jōa久ah？Iâ-hô-hoa ah, Lí beh jōa-kú ka-kī khǹg-ba̍t, kàu éng-oán mah? Lí ê siū-khì chhin-chhiūⁿ hé to̍h, beh jōa-kú ah?

47求你記得我ê時間，怎樣hiah短少；　　你創造一切ê世間人，hō͘ in到hiah空虛ah！Kiû Lí kì-tit góa ê sî-kan, cháiⁿ-iūⁿ hiah té-chió; Lí chhòng-chō it-chhè ê sè-kan lâng, hō͘ in kàu hiah khang-hu ah!

48甚麼人能長長活，無見tio̍h死，　　能救伊ê靈魂脫離陰間ê權柄ah？[Sè-la̍h]Sím-mi̍h lâng ōe tn̂g-tn̂g oa̍h, bô kìⁿ-tio̍h sí, Ōe kiù i ê lêng-hûn thoat-lī im-kan ê koân-pèng ah? [Sè-la̍h

49主ah，你前憑你ê信實，對大衛chiù-chōa-ê，　　Hiah-ê慈愛taⁿ tī toh落？Chú ah, Lí chêng pîn Lí ê sìn-si̍t, tùi Tāi-pi̍t chiù-chōa--ê, Hiah ê chû-ài taⁿ tī toh-lo̍h?

50主ah，求你記念你ê奴僕所受ê凌辱，　　記念我怎樣將一切強盛ê百姓ê凌辱存tī我ê心內；Chú ah, kiû Lí kì-liām Lí ê lô͘-po̍k só͘ siū ê lêng-jio̍k, Kì-liām góa cháiⁿ-iūⁿ chiong it-chhè kiông-sēng ê peh-sìⁿ ê lêng-jio̍k chûn tī góa ê sim-lāi;

51耶和華ah，你ê對敵用chit-ê凌辱，　　就是凌辱你受抹油ê ê蹤跡。Iâ-hô-hoa ah, Lí ê tùi-te̍k ēng chit ê lêng-jio̍k, Chiū-sī lêng-jio̍k Lí siū boah-iû--ê ê chong-chek.

52Tio̍h o-ló耶和華到永遠。　　A-bēng，koh A-bēng。Tio̍h o-ló Iâ-hô-hoa kàu éng-oán. A-bēng, koh A-bēng.

1上帝ê人摩西ê祈禱。1) 主ah，你ta̍k世代做阮khiā起ê所在。Siōng-tè ê lâng Mô͘-se ê kî-tó.1) Chú ah, Lí ta̍k sè-tāi chòe goán khiā-khí ê só͘-chāi.

2Chiah-ê山iáu未生出，　　地kap世界你iáu未造成，　　Tùi永遠到永遠你是上帝。Chiah ê soaⁿ iáu-bē siⁿ-chhut, Tōe kap sè-kài Lí iáu-bē chō-chiâⁿ, Tùi éng-oán kàu éng-oán Lí sī Siōng-tè.

3你hō͘人歸土，講，　　Lín世間人，tio̍h oa̍t倒tńg。Lí hō͘ lâng kui thó͘, Kóng, Lín sè-kan lâng, tio̍h oa̍t-tò-tńg.

4因為在你看，一千年親像已經過去ê昨日；　　Koh親像暝間ê一更。In-ūi chāi Lí khòaⁿ, chi̍t-chheng nî chhin-chhiūⁿ í-keng kè--khì ê chā-ji̍t; Koh chhin-chhiūⁿ mî-kan ê chi̍t-kiⁿ.

5你親像用大水kā in流去；in親像睏一醒；　　早起時in親像發生ê草。Lí chhin-chhiūⁿ ēng tōa-chúi kā in lâu--khì; in chhin-chhiūⁿ khùn chi̍t-chhíⁿ; Chá-khí-sî in chhin-chhiūⁿ hoat-siⁿ ê chháu.

6早起時發生茂盛；　　Ê-hng時受割就枯焦。Chá-khí-sî hoat-siⁿ bō͘-sēng; Ê-hng-sî siū-koah chiū ko͘-tâ.

7因為阮tùi你ê受氣就消滅，　　Koh阮tùi你ê發性來驚惶。In-ūi goán tùi Lí ê siū-khì chiū siau-bia̍t, Koh goán tùi Lí ê hoat-sèng lâi kiaⁿ-hiâⁿ.

8你將阮ê罪惡排tī你ê面前，　　將阮隱密ê pháiⁿ排tī你ê面ê光明中。Lí chiong goán ê chōe-ok pâi tī Lí ê bīn-chêng, Chiong goán ún-ba̍t ê pháiⁿ pâi tī Lí ê bīn ê kng-bêng-tiong.

9阮ê日子lóng經過tī你ê大受氣；　　阮ê年歲過了，親像吐一個氣。Goán ê ji̍t-chí lóng keng-kè tī Lí ê tōa siū-khì; Goán ê nî-hè kè-liáu, chhin-chhiūⁿ thó͘ chi̍t ê khùi.

10阮一生ê年日是七十歲，　　若是勇壯thang到八十歲，　　總是其中所誇口ê，不過是勞苦憂愁；　　伊緊緊過，阮就飛去。Goán it-seng ê nî-ji̍t sī chhit-cha̍p hè, Nā sī ióng-chòng thang kàu poeh-cha̍p hè, Chóng-sī kî-tiong só͘ khoa-kháu--ê, put-kò sī lô-khó͘ iu-chhiû; I kín-kín kè, goán chiū pe--khì.

11Chī-chūi知你受氣ê權勢，　　亦照你應該受ê敬畏，知你ê受氣ah？Chī-chūi chai Lí siū-khì ê koân-sè, Ia̍h chiàu Lí eng-kai siū ê kèng-ùi, chai Lí ê siū-khì ah?

12求你教示阮，怎樣算家己ê日子；　　Hō͘阮得tio̍h智慧ê心。Kiû Lí kà-sī goán, cháiⁿ-iūⁿ sǹg ka-kī ê ji̍t-chí; Hō͘ goán tit-tio̍h tì-hūi ê sim.

13耶和華ah，beh到tī時nih？求你倒tńg；　　為tio̍h你ê奴僕來回心。Iâ-hô-hoa ah, beh kàu tī-sî nih? kiû Lí tò-tńg; Ūi-tio̍h Lí ê lô͘-po̍k lâi hôe-sim.

14求你早起時用你ê慈愛hō͘阮滿足；　　Hō͘阮一世人歡喜快樂。Kiû Lí chá-khí-sî ēng Lí ê chû-ài hō͘ goán móa-chiok; Hō͘ goán chi̍t-sì-lâng hoaⁿ-hí khoài-lo̍k.

15求你照你苦楚阮ê日，　　照阮tú-tio̍h患難ê年，hō͘阮歡喜。Kiû Lí chiàu Lí khó͘-chhó͘ goán ê ji̍t, Chiàu goán tú-tio̍h hoān-lān ê nî, hō͘ goán hoaⁿ-hí.

16願你ê所做對你ê奴僕顯現，　　你ê榮光對in ê kiáⁿ孫顯明。Goān Lí ê só͘-chòe tùi Lí ê lô͘-po̍k hián-hiān, Lí ê êng-kng tùi in ê kiáⁿ-sun hián-bêng.

17願主阮ê上帝ê美妙tiàm tī阮ê頂面；　　願你堅固阮ê手所做ê工，　　阮ê手所做ê工，願你堅固伊。Goān Chú goán ê Siōng-tè ê bí-biāu tiàm tī goán ê téng-bīn; Goān Lí kian-kò͘ goán ê chhiú só͘ chòe ê kang, Goán ê chhiú só͘ chòe ê kang, goān Lí kian-kò͘ i.

1Tiàm tī至koânê隱密ê所在ê，　　Hit-ê人beh khiā起tī全能ê ê蔭影。Tiàm tī Chì-koâiⁿ--ê ún-ba̍t ê só͘-chāi--ê, Hit ê lâng beh khiā-khí tī Choân-lêng--ê ê ìm-ńg.

2論到耶和華，我beh講，伊是我逃閃ê所在，　　是我ê山寨；是我ê上帝，我所óa靠ê。Lūn-kàu Iâ-hô-hoa, góa beh kóng, I sī góa tô-siám ê só͘-chāi, sī góa ê soaⁿ-chē; Sī góa ê Siōng-tè, góa só͘ óa-khò--ê.

3因為伊beh救你脫離tng鳥á ê羅網，　　Kap 毒害 ê瘟疫。In-ūi I beh kiù lí thoat-lī tng chiáu-á ê lô-bāng, Kap to̍k-hāi ê un-e̍k.

4伊beh用伊ê翼股âⁿ你，　　你beh bih tī伊ê翼下，　　伊ê誠實是大細ê藤牌。I beh ēng I ê si̍t-kó͘ âⁿ lí, Lí beh bih tī I ê si̍t-ē, I ê sêng-si̍t sī tōa-sòe ê tîn-pâi.

5你m̄免驚暝間ê驚惶，　　Á是日時teh飛ê箭。Lí m̄-bián kiaⁿ mî-kan ê kiaⁿ-hiâⁿ, Á-sī ji̍t--sî teh pe ê chìⁿ.

6亦免驚烏暗中流行ê瘟疫，　　Á是日中晝滅無人ê毒症。Ia̍h bián kiaⁿ o͘-àm-tiong liû-hêng ê un-e̍k, Á-sī ji̍t tiong-tàu bia̍t-bô lâng ê to̍k-chèng.

7有千人lek落去tī你ê身邊，　　有萬人lek落去tī你ê chiàⁿ-pêng，　　這亦bōe óa近你。Ū chheng lâng lek--lo̍h-khì tī lí ê sin-piⁿ, Ū bān lâng lek--lo̍h-khì tī lí ê chiàⁿ-pêng, Che ia̍h bōe óa-kūn lí.

8不過你會親目看見，　　亦看見pháiⁿ人受報應。Put-kò lí ōe chhin-ba̍k khòaⁿ-kìⁿ, Ia̍h khòaⁿ-kìⁿ pháiⁿ-lâng siū pò-èng.

9因為耶和華你是我逃閃ê所在；　　你bat用至koânê做你khiā起ê所在；In-ūi Iâ-hô-hoa Lí sī góa tô-siám ê só͘-chāi; Lí bat ēng Chì-koâiⁿ--ê chòe lí khiā-khí ê só͘-chāi;

10就災害bōe到tī你，　　瘟疫亦bōe óa近你ê布棚。Chiū chai-hāi bōe kàu tī lí, Un-e̍k ia̍h bōe óa-kūn lí ê pò͘-pîⁿ.

11因為伊beh為tio̍h你吩咐伊ê使者，　　Tī你一切ê路保護你。In-ūi I beh ūi-tio̍h lí hoan-hù I ê sù-chiá, Tī lí it-chhè ê lō͘ pó-hō͘ lí.

12In beh用手扶你，　　免得你ê腳tak-tio̍h石。In beh ēng chhiú hû lí, Bián-tit lí ê kha tak-tio̍h chio̍h.

13你beh踏獅kap毒蛇，　　Lap獅á-thûn kap大尾蛇。Lí beh ta̍h sai kap to̍k-chôa, Lap sai-á-thûn kap tōa-bé chôa.

14因為伊真疼我，我就beh救伊；　　因為伊bat我ê名，我就beh安置伊tī高ê所在。In-ūi i chin thiàⁿ Góa, Góa chiū beh kiù i; In-ūi i bat Góa ê miâ, Góa chiū beh an-tì i tī koâiⁿ ê só͘-chāi.

15伊求叫我，我就beh ìn伊；　　伊tī危急ê時，我beh kap伊tī-teh；　　我beh救伊，hō͘伊尊貴。I kiû-kiò Góa, Góa chiū beh ìn--i; I tī gûi-kip ê sî, Góa beh kap i tī-teh; Góa beh kiù i, hō͘ i chun-kùi.

16我beh用長歲壽hō͘伊滿足，　　Hō͘伊看見我ê救恩。Góa beh ēng tn̂g hè-siū hō͘ i móa-chiok, Hō͘ i khòaⁿ-kìⁿ Góa ê kiù-un.