1上帝ê人摩西ê祈禱。1) 主ah，你ta̍k世代做阮khiā起ê所在。Siōng-tè ê lâng Mô͘-se ê kî-tó.1) Chú ah, Lí ta̍k sè-tāi chòe goán khiā-khí ê só͘-chāi.

2Chiah-ê山iáu未生出，　　地kap世界你iáu未造成，　　Tùi永遠到永遠你是上帝。Chiah ê soaⁿ iáu-bē siⁿ-chhut, Tōe kap sè-kài Lí iáu-bē chō-chiâⁿ, Tùi éng-oán kàu éng-oán Lí sī Siōng-tè.

3你hō͘人歸土，講，　　Lín世間人，tio̍h oa̍t倒tńg。Lí hō͘ lâng kui thó͘, Kóng, Lín sè-kan lâng, tio̍h oa̍t-tò-tńg.

4因為在你看，一千年親像已經過去ê昨日；　　Koh親像暝間ê一更。In-ūi chāi Lí khòaⁿ, chi̍t-chheng nî chhin-chhiūⁿ í-keng kè--khì ê chā-ji̍t; Koh chhin-chhiūⁿ mî-kan ê chi̍t-kiⁿ.

5你親像用大水kā in流去；in親像睏一醒；　　早起時in親像發生ê草。Lí chhin-chhiūⁿ ēng tōa-chúi kā in lâu--khì; in chhin-chhiūⁿ khùn chi̍t-chhíⁿ; Chá-khí-sî in chhin-chhiūⁿ hoat-siⁿ ê chháu.

6早起時發生茂盛；　　Ê-hng時受割就枯焦。Chá-khí-sî hoat-siⁿ bō͘-sēng; Ê-hng-sî siū-koah chiū ko͘-tâ.

7因為阮tùi你ê受氣就消滅，　　Koh阮tùi你ê發性來驚惶。In-ūi goán tùi Lí ê siū-khì chiū siau-bia̍t, Koh goán tùi Lí ê hoat-sèng lâi kiaⁿ-hiâⁿ.

8你將阮ê罪惡排tī你ê面前，　　將阮隱密ê pháiⁿ排tī你ê面ê光明中。Lí chiong goán ê chōe-ok pâi tī Lí ê bīn-chêng, Chiong goán ún-ba̍t ê pháiⁿ pâi tī Lí ê bīn ê kng-bêng-tiong.

9阮ê日子lóng經過tī你ê大受氣；　　阮ê年歲過了，親像吐一個氣。Goán ê ji̍t-chí lóng keng-kè tī Lí ê tōa siū-khì; Goán ê nî-hè kè-liáu, chhin-chhiūⁿ thó͘ chi̍t ê khùi.

10阮一生ê年日是七十歲，　　若是勇壯thang到八十歲，　　總是其中所誇口ê，不過是勞苦憂愁；　　伊緊緊過，阮就飛去。Goán it-seng ê nî-ji̍t sī chhit-cha̍p hè, Nā sī ióng-chòng thang kàu poeh-cha̍p hè, Chóng-sī kî-tiong só͘ khoa-kháu--ê, put-kò sī lô-khó͘ iu-chhiû; I kín-kín kè, goán chiū pe--khì.

11Chī-chūi知你受氣ê權勢，　　亦照你應該受ê敬畏，知你ê受氣ah？Chī-chūi chai Lí siū-khì ê koân-sè, Ia̍h chiàu Lí eng-kai siū ê kèng-ùi, chai Lí ê siū-khì ah?

12求你教示阮，怎樣算家己ê日子；　　Hō͘阮得tio̍h智慧ê心。Kiû Lí kà-sī goán, cháiⁿ-iūⁿ sǹg ka-kī ê ji̍t-chí; Hō͘ goán tit-tio̍h tì-hūi ê sim.

13耶和華ah，beh到tī時nih？求你倒tńg；　　為tio̍h你ê奴僕來回心。Iâ-hô-hoa ah, beh kàu tī-sî nih? kiû Lí tò-tńg; Ūi-tio̍h Lí ê lô͘-po̍k lâi hôe-sim.

14求你早起時用你ê慈愛hō͘阮滿足；　　Hō͘阮一世人歡喜快樂。Kiû Lí chá-khí-sî ēng Lí ê chû-ài hō͘ goán móa-chiok; Hō͘ goán chi̍t-sì-lâng hoaⁿ-hí khoài-lo̍k.

15求你照你苦楚阮ê日，　　照阮tú-tio̍h患難ê年，hō͘阮歡喜。Kiû Lí chiàu Lí khó͘-chhó͘ goán ê ji̍t, Chiàu goán tú-tio̍h hoān-lān ê nî, hō͘ goán hoaⁿ-hí.

16願你ê所做對你ê奴僕顯現，　　你ê榮光對in ê kiáⁿ孫顯明。Goān Lí ê só͘-chòe tùi Lí ê lô͘-po̍k hián-hiān, Lí ê êng-kng tùi in ê kiáⁿ-sun hián-bêng.

17願主阮ê上帝ê美妙tiàm tī阮ê頂面；　　願你堅固阮ê手所做ê工，　　阮ê手所做ê工，願你堅固伊。Goān Chú goán ê Siōng-tè ê bí-biāu tiàm tī goán ê téng-bīn; Goān Lí kian-kò͘ goán ê chhiú só͘ chòe ê kang, Goán ê chhiú só͘ chòe ê kang, goān Lí kian-kò͘ i.

1Tiàm tī至koânê隱密ê所在ê，　　Hit-ê人beh khiā起tī全能ê ê蔭影。Tiàm tī Chì-koâiⁿ--ê ún-ba̍t ê só͘-chāi--ê, Hit ê lâng beh khiā-khí tī Choân-lêng--ê ê ìm-ńg.

2論到耶和華，我beh講，伊是我逃閃ê所在，　　是我ê山寨；是我ê上帝，我所óa靠ê。Lūn-kàu Iâ-hô-hoa, góa beh kóng, I sī góa tô-siám ê só͘-chāi, sī góa ê soaⁿ-chē; Sī góa ê Siōng-tè, góa só͘ óa-khò--ê.

3因為伊beh救你脫離tng鳥á ê羅網，　　Kap 毒害 ê瘟疫。In-ūi I beh kiù lí thoat-lī tng chiáu-á ê lô-bāng, Kap to̍k-hāi ê un-e̍k.

4伊beh用伊ê翼股âⁿ你，　　你beh bih tī伊ê翼下，　　伊ê誠實是大細ê藤牌。I beh ēng I ê si̍t-kó͘ âⁿ lí, Lí beh bih tī I ê si̍t-ē, I ê sêng-si̍t sī tōa-sòe ê tîn-pâi.

5你m̄免驚暝間ê驚惶，　　Á是日時teh飛ê箭。Lí m̄-bián kiaⁿ mî-kan ê kiaⁿ-hiâⁿ, Á-sī ji̍t--sî teh pe ê chìⁿ.

6亦免驚烏暗中流行ê瘟疫，　　Á是日中晝滅無人ê毒症。Ia̍h bián kiaⁿ o͘-àm-tiong liû-hêng ê un-e̍k, Á-sī ji̍t tiong-tàu bia̍t-bô lâng ê to̍k-chèng.

7有千人lek落去tī你ê身邊，　　有萬人lek落去tī你ê chiàⁿ-pêng，　　這亦bōe óa近你。Ū chheng lâng lek--lo̍h-khì tī lí ê sin-piⁿ, Ū bān lâng lek--lo̍h-khì tī lí ê chiàⁿ-pêng, Che ia̍h bōe óa-kūn lí.

8不過你會親目看見，　　亦看見pháiⁿ人受報應。Put-kò lí ōe chhin-ba̍k khòaⁿ-kìⁿ, Ia̍h khòaⁿ-kìⁿ pháiⁿ-lâng siū pò-èng.

9因為耶和華你是我逃閃ê所在；　　你bat用至koânê做你khiā起ê所在；In-ūi Iâ-hô-hoa Lí sī góa tô-siám ê só͘-chāi; Lí bat ēng Chì-koâiⁿ--ê chòe lí khiā-khí ê só͘-chāi;

10就災害bōe到tī你，　　瘟疫亦bōe óa近你ê布棚。Chiū chai-hāi bōe kàu tī lí, Un-e̍k ia̍h bōe óa-kūn lí ê pò͘-pîⁿ.

11因為伊beh為tio̍h你吩咐伊ê使者，　　Tī你一切ê路保護你。In-ūi I beh ūi-tio̍h lí hoan-hù I ê sù-chiá, Tī lí it-chhè ê lō͘ pó-hō͘ lí.

12In beh用手扶你，　　免得你ê腳tak-tio̍h石。In beh ēng chhiú hû lí, Bián-tit lí ê kha tak-tio̍h chio̍h.

13你beh踏獅kap毒蛇，　　Lap獅á-thûn kap大尾蛇。Lí beh ta̍h sai kap to̍k-chôa, Lap sai-á-thûn kap tōa-bé chôa.

14因為伊真疼我，我就beh救伊；　　因為伊bat我ê名，我就beh安置伊tī高ê所在。In-ūi i chin thiàⁿ Góa, Góa chiū beh kiù i; In-ūi i bat Góa ê miâ, Góa chiū beh an-tì i tī koâiⁿ ê só͘-chāi.

15伊求叫我，我就beh ìn伊；　　伊tī危急ê時，我beh kap伊tī-teh；　　我beh救伊，hō͘伊尊貴。I kiû-kiò Góa, Góa chiū beh ìn--i; I tī gûi-kip ê sî, Góa beh kap i tī-teh; Góa beh kiù i, hō͘ i chun-kùi.

16我beh用長歲壽hō͘伊滿足，　　Hō͘伊看見我ê救恩。Góa beh ēng tn̂g hè-siū hō͘ i móa-chiok, Hō͘ i khòaⁿ-kìⁿ Góa ê kiù-un.

1安歇日ê詩歌。1) 真好ah，感謝耶和華，　　唱歌o-ló你至koânê ê名；An-hioh-ji̍t ê si-koa.1) Chin-hó ah, kám-siā Iâ-hô-hoa, Chhiùⁿ-koa o-ló Lí Chì-koâiⁿ--ê ê miâ;

2早起時報揚你ê慈愛；　　Ê-hng時報揚你ê信實。Chá-khí-sî pò-iông Lí ê chû-ài; Ê-hng-sî pò-iông Lí ê sìn-si̍t.

3用十條絃ê樂器kap瑟；　　用琴彈莊嚴ê聲音。Ēng cha̍p-tiâu-hiân ê ga̍k-khì kap sek; Ēng khîm tôaⁿ chong-giâm ê siaⁿ-im.

4因為耶和華你用你ê所行hō͘我歡喜；　　我beh因為你ê手所做ê來快樂。In-ūi Iâ-hô-hoa Lí ēng Lí ê só͘-kiâⁿ hō͘ góa hoaⁿ-hí; Góa beh in-ūi Lí ê chhiú só͘ chòe--ê lâi khoài-lo̍k.

5耶和華，你ê所做怎樣hiah大；　　你ê心思極其深。Iâ-hô-hoa, Lí ê só͘-chòe cháiⁿ-iūⁿ hiah-tōa; Lí ê sim-su ke̍k-kî chhim.

6無知ê人bōe曉得，愚蠢ê人亦bōe明白chit-ê。Bû-ti ê lâng bōe hiáu-tit, Gû-chhún ê lâng ia̍h bōe bêng-pe̍k chit-ê.

7Pháiⁿ人發生親像草，　　一切做pháiⁿ ê人茂盛ê時，　　正是in beh滅無到永遠；Pháiⁿ-lâng hoat-siⁿ chhin-chhiūⁿ chháu, It-chhè chòe-pháiⁿ ê lâng bō͘-sēng ê sî, Chiàⁿ-sī in beh bia̍t-bô kàu éng-oán;

8總是耶和華你是至koân，直到永遠。Chóng-sī Iâ-hô-hoa Lí sī chì-koâiⁿ, ti̍t-kàu éng-oán.

9耶和華ah，你看，你ê對敵，　　你看，你ê對敵的確滅無；　　一切做pháiⁿ ê人亦beh四散。Iâ-hô-hoa ah, Lí khòaⁿ, Lí ê tùi-te̍k, Lí khòaⁿ, Lí ê tùi-te̍k tek-khak bia̍t-bô; It-chhè chòe-pháiⁿ ê lâng ia̍h beh sì-sòaⁿ.

10總是你hō͘我ê角kia̍h高，親像野牛ê角；　　我是受新ê油抹ê。Chóng-sī Lí hō͘ góa ê kak kia̍h-koâiⁿ, chhin-chhiūⁿ iá-gû ê kak; Góa sī siū sin ê iû boah--ê.

11我親目看見我ê對敵tú-tio̍h報應；　　我親耳聽見hiah-ê起來攻擊我ê pháiⁿ人受刑罰。Góa chhin-ba̍k khòaⁿ-kìⁿ góa ê tùi-te̍k tú-tio̍h pò-èng; Góa chhin-hī thiaⁿ-kìⁿ hiah ê khí-lâi kong-kek góa ê pháiⁿ-lâng siū hêng-hoa̍t.

12義人beh興旺親像棗樹；　　Beh長大親像黎巴嫩ê柏香樹。Gī-lâng beh heng-ōng chhin-chhiūⁿ chó-chhiū; Beh tióng-tōa chhin-chhiūⁿ Lī-pa-lùn ê pek-hiuⁿ-chhiū.

13見若知tī耶和華ê厝ê，　　Beh興旺tī咱ê上帝ê院內。Kìⁿ-nā chai tī Iâ-hô-hoa ê chhù--ê, Beh heng-ōng tī lán ê Siōng-tè ê īⁿ-lāi.

14In年老ê時猶原beh結果子；　　In ê汁滿滿，色青翠；In nî-lāu ê sî iû-goân beh kiat ké-chí; In ê chiap móa-móa, sek chhiⁿ-chhùi;

15Thang顯明耶和華是正直ê，　　伊是我ê石磐，伊lóng無不義。Thang hián-bêng Iâ-hô-hoa sī chèng-ti̍t--ê, I sī góa ê chio̍h-pôaⁿ, I lóng bô put-gī.