1耶和華伸冤ê上帝ah，　　伸冤ê上帝ah，求你顯出光。Iâ-hô-hoa sin-oan ê Siōng-tè ah, Sin-oan ê Siōng-tè ah, kiû Lí hián-chhut kng.

2審判世界ê主ah，求你起來；　　Hō͘驕傲ê人受應該受ê報應。Sím-phòaⁿ sè-kài ê Chú ah, kiû Lí khí--lâi; Hō͘ kiau-ngō͘ ê lâng siū eng-kai siū ê pò-èng.

3耶和華ah，pháiⁿ人beh jōa久ah？　　Pháiⁿ人得勝大悅，beh jōa久ah？Iâ-hô-hoa ah, Pháiⁿ-lâng beh jōa-kú ah? Pháiⁿ-lâng tek-sèng tāi-ia̍t, beh jōa-kú ah?

4In隨便講，講出驕傲ê話；　　一切行pháiⁿ ê人lóng家己phín-phóng。In sûi-piān kóng, kóng-chhut kiau-ngō͘ ê ōe; It-chhè kiâⁿ-pháiⁿ ê lâng lóng ka-kī phín-phóng.

5耶和華ah，in壓制你ê百姓；　　苦楚你ê產業。Iâ-hô-hoa ah, in ap-chè Lí ê peh-sìⁿ; Khó͘-chhó͘ Lí ê sán-gia̍p.

6In thâi死守寡人kap出外人；　　Koh害死孤兒。In thâi-sí chiú-kóaⁿ-lâng kap chhut-gōa lâng; Koh hāi-sí ko͘-jî.

7In講，耶和華的確無teh看；　　雅各ê上帝的確無致意。In kóng, Iâ-hô-hoa tek-khak bô teh khòaⁿ; Ngá-kok ê Siōng-tè tek-khak bô tì-ì.

8Lín百姓中cheng-siⁿ hit款ê人tio̍h想；　　愚戇ê人到tī時chiah有智慧ah？Lín peh-sìⁿ-tiong cheng-siⁿ hit-khoán ê lâng tio̍h siūⁿ; Gû-gōng ê lâng kàu tī-sî chiah ū tì-hūi ah?

9安置耳孔ê，總無伊無聽見？　　創造目睭ê，總無伊bōe看見mah？An-tì hī-khang--ê, chóng bô I bô thiaⁿ-kìⁿ? Chhòng-chō ba̍k-chiu--ê, chóng bô I bōe khòaⁿ-kìⁿ mah?

10教督列邦ê，就是hō͘人得tio̍h知識ê，　　總無伊bōe曉辨理人mah？Kàu-tok lia̍t-pang ê, chiū-sī hō͘ lâng tit-tio̍h tì-sek--ê, Chóng bô I bōe hiáu pān-lí lâng mah?

11耶和華知人ê心思，　　知in是空空。Iâ-hô-hoa chai lâng ê sim-su, Chai in sī khang-khang.

12耶和華ah，你所教督koh用你ê律法所教示ê，　　Hit-ê人有福氣。Iâ-hô-hoa ah, Lí só͘ kàu-tok koh ēng Lí ê lu̍t-hoat só͘ kà-sī--ê, Hit ê lâng ū hok-khì.

13Beh hō͘伊tī患難ê日，得tio̍h平安，　　到tī為tio̍h pháiⁿ人開陷坑ê時。Beh hō͘ i tī hoān-lān ê ji̍t, tit-tio̍h pêng-an, Kàu tī ūi-tio̍h pháiⁿ-lâng khui hām-khiⁿ ê sî.

14因為耶和華的確無棄sak伊ê百姓；　　亦無放離伊ê產業。In-ūi Iâ-hô-hoa tek-khak bô khì-sak I ê peh-sìⁿ; Ia̍h bô pàng-lī I ê sán-gia̍p.

15因為審判beh照公義，　　心正直ê人beh lóng tè伊。In-ūi sím-phòaⁿ beh chiàu kong-gī, Sim chèng-ti̍t ê lâng beh lóng tè I.

16Chī-chūi beh為我起來攻擊pháiⁿ人？　　Chī-chūi beh為我khiā起來攻擊行罪惡ê人？Chī-chūi beh ūi góa khí--lâi kong-kek pháiⁿ-lâng? Chī-chūi beh ūi góa khiā--khí-lâi kong-kek kiâⁿ chōe-ok ê lâng?

17若m̄是耶和華幫贊我，　　就我ê神魂快快tiàm tī冷靜ê中間。Nā m̄-sī Iâ-hô-hoa pang-chān góa, chiū góa ê sîn-hûn khoài-khoài tiàm tī léng-chēng ê tiong-kan.

18我講，我ê腳tio̍h-tak；　　耶和華ah，hit時你ê慈愛扶持我。Góa kóng, Góa ê kha tio̍h-tak; Iâ-hô-hoa ah, hit-sî Lí ê chû-ài hû-chhî góa.

19我ê心chōe-chōe憂悶掛慮，　　你ê安慰就hō͘我ê心神快樂。Góa ê sim chōe-chōe iu-būn khòa-lū, Lí ê an-ùi chiū hō͘ góa ê sim-sîn khoài-lo̍k.

20奸惡ê座位，假藉律例，計謀殘害，　　Kiám會kap你交通mah？Kan-ok ê chō-ūi, ká-chià lu̍t-lē, kè-bô͘ chân-hāi, Kiám ōe kap Lí kau-thong mah?

21In大家聚集，攻擊義人ê性命；　　將無罪ê人定死罪。In tāi-ke chū-chi̍p, kong-kek gī-lâng ê sìⁿ-miā; Chiong bô-chōe ê lâng tēng sí-chōe.

22總是耶和華平時做我ê高台；　　我ê上帝做我逃閃ê石磐。Chóng-sī Iâ-hô-hoa pêng-sî chòe góa ê koâiⁿ-tâi; Góa ê Siōng-tè chòe góa tô-siám ê chio̍h-pôaⁿ.

23伊hō͘ in ê罪惡歸tī in ê身上；　　In tī行pháiⁿ ê時，伊beh剿滅in；　　耶和華咱ê上帝beh剿滅in。I hō͘ in ê chōe-ok kui tī in ê sin-chiūⁿ; In tī kiâⁿ-pháiⁿ ê sî, I beh châu-bia̍t in; Iâ-hô-hoa lán ê Siōng-tè beh châu-bia̍t in.

1來ah，咱tio̍h ǹg耶和華唱歌；　　Ǹg救咱ê石磐出歡喜ê聲。Lâi ah, lán tio̍h ǹg Iâ-hô-hoa chhiùⁿ-koa; Ǹg kiù lán ê chio̍h-pôaⁿ chhut hoaⁿ-hí ê siaⁿ.

2咱tio̍h到伊ê面前感謝伊，　　用詩歌ǹg伊出歡喜ê聲。Lán tio̍h kàu I ê bīn-chêng kám-siā I, Ēng si-koa ǹg I chhut hoaⁿ-hí ê siaⁿ.

3因為耶和華是大ê上帝，　　是大ê王，贏過lóng總ê上帝；In-ūi Iâ-hô-hoa sī tōa ê Siōng-tè, Sī tōa ê ông, iâⁿ-kè lóng-chóng ê siōng-tè;

4地深ê所在tī伊ê手中；　　山高ê山尖亦屬tī伊。Tōe chhim ê só͘-chāi tī I ê chhiú-tiong; Soaⁿ koâiⁿ ê soaⁿ-chiam ia̍h sio̍k tī I.

5洋海屬tī伊，是伊創造ê；　　乾地亦是伊ê手造成ê。Iûⁿ-hái sio̍k tī I, sī I chhòng-chō--ê; Ta-tōe ia̍h sī I ê chhiú chō-chiâⁿ-ê.

6來ah，咱tio̍h鞠躬敬拜；　　跪落tī創造咱ê耶和華ê面前；Lâi ah, lán tio̍h kiok-kiong kèng-pài; Kūi-lo̍h tī chhòng-chō lán ê Iâ-hô-hoa ê bīn-chêng;

7因為伊是咱ê上帝，　　咱是伊養飼ê百姓，是伊手下ê羊。　　今á日，lín若聽伊ê聲，In-ūi I sī lán ê Siōng-tè, Lán sī I iúⁿ-chhī ê peh-sìⁿ, sī I chhiú-ē ê iûⁿ. Kin-á-ji̍t, lín nā thiaⁿ I ê siaⁿ,

8就m̄-thang硬lín ê心，親像tī Bí-lī-pa，　　親像當日tī曠野ê Má-sat；Chiū m̄-thang ngī lín ê sim, chhin-chhiūⁿ tī Bí-lī-pa, Chhin-chhiūⁿ tong-ji̍t tī khòng-iá ê Má-sat;

9Hit時lín ê祖公試我，　　驗我，koh看見我ê所做。Hit-sî lín ê chó͘-kong chhì Góa, Giām Góa, koh khòaⁿ-kìⁿ Góa ê só͘-chòe.

10四十年久，我厭恨hit世代ê人，　　講，Chiah-ê是心迷亂ê百姓，　　M̄-bat我ê路；Sì-cha̍p nî kú, Góa iàm-hūn hit sè-tāi ê lâng, Kóng Chiah-ê sī sim bê-loān ê peh-sìⁿ, M̄-bat Góa ê lō͘;

11所以我tī受氣ê中間，chiù-chōa講，　　In斷斷bōe得thang入我ê安歇。Só͘-í Góa tī siū-khì ê tiong-kan, chiù-chōa kóng, In toàn-toàn bōe-tit-thang ji̍p Góa ê an-hioh.

1Lín tio̍h ǹg耶和華唱新ê歌，　　全地lóng tio̍h ǹg耶和華唱歌。Lín tio̍h ǹg Iâ-hô-hoa chhiùⁿ sin ê koa, Choân-tōe lóng tio̍h ǹg Iâ-hô-hoa chhiùⁿ-koa.

2Tio̍h ǹg耶和華唱歌，祝謝伊ê名；　　日日傳報伊ê救恩。Tio̍h ǹg Iâ-hô-hoa chhiùⁿ-koa, chiok-siā I ê miâ; Ji̍t-ji̍t thoân-pò I ê kiù-un.

3Tī列邦ê中間講起伊ê榮光；　　Tī 萬百姓ê中間講起伊奇妙ê所做。Tī lia̍t-pang ê tiong-kan kóng-khí I ê êng-kng; Tī bān peh-sìⁿ ê tiong-kan kóng-khí I kî-biāu ê só͘-chòe.

4因為耶和華最大，應該受極大ê o-ló；　　伊tī眾神明ê頂面應該受敬畏。In-ūi Iâ-hô-hoa chòe tōa, eng-kai siū ke̍k-tōa ê o-ló; I tī chèng sîn-bêng ê téng-bīn eng-kai siū kèng-ùi.

5因為列邦ê上帝 lóng是虛假；　　獨獨耶和華創造chiah-ê天。In-ūi lia̍t-pang ê siōng-tè lóng sī hu-ké; To̍k-to̍k Iâ-hô-hoa chhòng-chō chiah ê thiⁿ.

6Tī伊ê面前有尊貴kap威嚴；　　Tī伊ê聖所有權能kap榮光。Tī I ê bīn-chêng ū chun-kùi kap ui-giâm; Tī I ê sèng-só͘ ū koân-lêng kap êng-kng.

7百姓中ê ta̍k族ah，lín tio̍h將權能榮光，　　歸hō͘耶和華；歸hō͘耶和華。Peh-sìⁿ-tiong ê ta̍k-cho̍k ah, lín tio̍h chiong koân-lêng êng-kng, Kui hō͘ Iâ-hô-hoa; kui hō͘ Iâ-hô-hoa.

8用伊ê名所應該得tio̍h ê榮光，　　歸hō͘耶和華；帶禮物來入伊ê院。Ēng I ê miâ só͘ eng-kai tit-tio̍h ê êng-kng, kui hō͘ Iâ-hô-hoa; Tòa lé-mi̍h lâi ji̍p I ê īⁿ.

9Tio̍h用聖潔ê裝飾敬拜耶和華；　　全地tī伊ê面前ngia̍uh-ngia̍uh-chhoah。Tio̍h ēng sèng-kiat ê chng-thāⁿ kèng-pài Iâ-hô-hoa; Choân-tōe tī I ê bīn-chêng ngia̍uh-ngia̍uh-chhoah.

10Tī列邦中tio̍h講，耶和華做王，　　世界堅固，bōe搖動；　　伊beh照公平審判萬百姓。Tī lia̍t-pang-tiong tio̍h kóng, Iâ-hô-hoa chòe ông, Sè-kài kian-kò͘, bōe iô-tāng; I beh chiàu kong-pêng sím-phòaⁿ bān peh-sìⁿ.

11願天歡喜，地快樂；　　願海kap其中所充滿ê lóng出大聲；Goān thiⁿ hoaⁿ-hí, tōe khoài-lo̍k; Goān hái kap kî-tiong só͘ chhiong-móa--ê lóng chhut tōa-siaⁿ;

12願田園kap其中所有ê lóng快樂；　　Hit時樹林內ê樹木lóng beh tī耶和華ê面前出歡喜ê聲；Goān chhân-hn̂g kap kî-tiong só͘-ū--ê lóng khoài-lo̍k; Hit-sî chhiū-nâ-lāi ê chhiū-ba̍k lóng beh tī Iâ-hô-hoa ê bīn-chêng chhut hoaⁿ-hí ê siaⁿ;

13因為伊來lah，伊來beh審判全地；　　伊beh照公義審判世界，　　照伊ê信實審判萬百姓。In-ūi I lâi lah, I lâi beh sím-phòaⁿ choân-tōe; I beh chiàu kong-gī sím-phòaⁿ sè-kài, Chiàu I ê sìn-si̍t sím-phòaⁿ bān peh-sìⁿ.