1Lín tio̍h ǹg耶和華唱新ê歌，　　全地lóng tio̍h ǹg耶和華唱歌。Lín tio̍h ǹg Iâ-hô-hoa chhiùⁿ sin ê koa, Choân-tōe lóng tio̍h ǹg Iâ-hô-hoa chhiùⁿ-koa.

2Tio̍h ǹg耶和華唱歌，祝謝伊ê名；　　日日傳報伊ê救恩。Tio̍h ǹg Iâ-hô-hoa chhiùⁿ-koa, chiok-siā I ê miâ; Ji̍t-ji̍t thoân-pò I ê kiù-un.

3Tī列邦ê中間講起伊ê榮光；　　Tī 萬百姓ê中間講起伊奇妙ê所做。Tī lia̍t-pang ê tiong-kan kóng-khí I ê êng-kng; Tī bān peh-sìⁿ ê tiong-kan kóng-khí I kî-biāu ê só͘-chòe.

4因為耶和華最大，應該受極大ê o-ló；　　伊tī眾神明ê頂面應該受敬畏。In-ūi Iâ-hô-hoa chòe tōa, eng-kai siū ke̍k-tōa ê o-ló; I tī chèng sîn-bêng ê téng-bīn eng-kai siū kèng-ùi.

5因為列邦ê上帝 lóng是虛假；　　獨獨耶和華創造chiah-ê天。In-ūi lia̍t-pang ê siōng-tè lóng sī hu-ké; To̍k-to̍k Iâ-hô-hoa chhòng-chō chiah ê thiⁿ.

6Tī伊ê面前有尊貴kap威嚴；　　Tī伊ê聖所有權能kap榮光。Tī I ê bīn-chêng ū chun-kùi kap ui-giâm; Tī I ê sèng-só͘ ū koân-lêng kap êng-kng.

7百姓中ê ta̍k族ah，lín tio̍h將權能榮光，　　歸hō͘耶和華；歸hō͘耶和華。Peh-sìⁿ-tiong ê ta̍k-cho̍k ah, lín tio̍h chiong koân-lêng êng-kng, Kui hō͘ Iâ-hô-hoa; kui hō͘ Iâ-hô-hoa.

8用伊ê名所應該得tio̍h ê榮光，　　歸hō͘耶和華；帶禮物來入伊ê院。Ēng I ê miâ só͘ eng-kai tit-tio̍h ê êng-kng, kui hō͘ Iâ-hô-hoa; Tòa lé-mi̍h lâi ji̍p I ê īⁿ.

9Tio̍h用聖潔ê裝飾敬拜耶和華；　　全地tī伊ê面前ngia̍uh-ngia̍uh-chhoah。Tio̍h ēng sèng-kiat ê chng-thāⁿ kèng-pài Iâ-hô-hoa; Choân-tōe tī I ê bīn-chêng ngia̍uh-ngia̍uh-chhoah.

10Tī列邦中tio̍h講，耶和華做王，　　世界堅固，bōe搖動；　　伊beh照公平審判萬百姓。Tī lia̍t-pang-tiong tio̍h kóng, Iâ-hô-hoa chòe ông, Sè-kài kian-kò͘, bōe iô-tāng; I beh chiàu kong-pêng sím-phòaⁿ bān peh-sìⁿ.

11願天歡喜，地快樂；　　願海kap其中所充滿ê lóng出大聲；Goān thiⁿ hoaⁿ-hí, tōe khoài-lo̍k; Goān hái kap kî-tiong só͘ chhiong-móa--ê lóng chhut tōa-siaⁿ;

12願田園kap其中所有ê lóng快樂；　　Hit時樹林內ê樹木lóng beh tī耶和華ê面前出歡喜ê聲；Goān chhân-hn̂g kap kî-tiong só͘-ū--ê lóng khoài-lo̍k; Hit-sî chhiū-nâ-lāi ê chhiū-ba̍k lóng beh tī Iâ-hô-hoa ê bīn-chêng chhut hoaⁿ-hí ê siaⁿ;

13因為伊來lah，伊來beh審判全地；　　伊beh照公義審判世界，　　照伊ê信實審判萬百姓。In-ūi I lâi lah, I lâi beh sím-phòaⁿ choân-tōe; I beh chiàu kong-gī sím-phòaⁿ sè-kài, Chiàu I ê sìn-si̍t sím-phòaⁿ bān peh-sìⁿ.

1耶和華做王；地tio̍h快樂；　　眾海嶼tio̍h歡喜。Iâ-hô-hoa chòe ông; tōe tio̍h khoài-lo̍k; Chèng hái-sū tio̍h hoaⁿ-hí.

2密雲kap烏暗tī伊ê四圍；　　義理kap公平是伊寶座ê地基。Ba̍t-hûn kap o͘-àm tī I ê sì-ûi; Gī-lí kap kong-pêng sī I pó-chō ê tōe-ki.

3火行tī伊ê面前，　　燒伊四圍ê對敵。Hé kiâⁿ tī I ê bīn-chêng, Sio I sì-ûi ê tùi-te̍k.

4伊ê sih-nà照光世界；　　地看見，就振動。I ê sih-nà chiò-kng sè-kài; Tōe khòaⁿ-kìⁿ, chiū tín-tāng.

5Tī耶和華ê面前，就是全地ê主ê面前，　　Chiah-ê山消熔親像蠟。Tī Iâ-hô-hoa ê bīn-chêng, chiū-sī choân-tōe ê Chú ê bīn-chêng, Chiah ê soaⁿ siau-iûⁿ chhin-chhiūⁿ la̍h.

6Chiah-ê天顯明伊ê義，　　列邦看見伊ê榮光。Chiah ê thiⁿ hián-bêng I ê gī, Lia̍t-pang khòaⁿ-kìⁿ I ê êng-kng.

7凡若服事(sài)雕刻ê偶像，　　用虛假ê神自誇ê，lóng tio̍h受見笑；　　Lín chiah-ê神ah，lóng tio̍h敬拜伊；Hoān-nā ho̍k-sāi tiau-khek ê ngó͘-siōng, Ēng hu-ké ê sîn chū-khoa--ê, lóng tio̍h siū kiàn-siàu; Lín chiah ê sîn ah, lóng tio̍h kèng-pài I;

8耶和華ah，因為你ê判斷，　　錫安聽見就歡喜，　　猶大ê城亦lóng快樂。Iâ-hô-hoa ah, in-ūi Lí ê phòaⁿ-toàn, Sek-an thiaⁿ-kìⁿ chiū hoaⁿ-hí, Iû-tāi ê siâⁿ ia̍h lóng khoài-lo̍k.

9因為耶和華你是至koânpoaN5過全地；　　你是chì-chun，pôaⁿ過眾神明。In-ūi Iâ-hô-hoa Lí sī chì-koâiⁿ pôaⁿ-kè choân-tōe; Lí sī chì-chun, pôaⁿ-kè chèng sîn-bêng.

10疼耶和華ê人，lín lóng tio̍h怨恨pháiⁿ；　　伊保護伊聖ê百姓ê性命；　　伊拯救in脫離pháiⁿ人ê手。Thiàⁿ Iâ-hô-hoa ê lâng, lín lóng tio̍h oàn-hūn pháiⁿ; I pó-hō͘ I sèng ê peh-sìⁿ ê sìⁿ-miā; I chín-kiù in thoat-lī pháiⁿ-lâng ê chhiú.

11光明是為tio̍h義人來備辦，　　歡喜是為tio̍h心正直ê人來備辦。Kng-bêng sī ūi-tio̍h gī-lâng lâi pī-pān, Hoaⁿ-hí sī ūi-tio̍h sim chèng-ti̍t ê lâng lâi pī-pān.

12義人ah，lín tio̍h因為耶和華來歡喜；　　記念伊ê聖名來o-ló。Gī-lâng ah, lín tio̍h in-ūi Iâ-hô-hoa lâi hoaⁿ-hí; Kì-liām I ê sèng-miâ lâi o-ló.

1一篇詩。1) Lín tio̍h ǹg耶和華唱新ê歌；　　因為伊bat行奇妙ê事；　　伊ê chiàⁿ手，kap伊聖ê手骨，已經為家己行拯救。Chi̍t phiⁿ si.1) Lín tio̍h ǹg Iâ-hô-hoa chhiùⁿ sin ê koa; In-ūi I bat kiâⁿ kî-biāu ê sū; I ê chiàⁿ-chhiú, kap I sèng ê chhiú-kut, í-keng ūi ka-kī kiâⁿ chín-kiù.

2耶和華hō͘人知伊ê拯救；　　Tī列邦人ê目睭前顯明伊ê公義。Iâ-hô-hoa hō͘ lâng chai I ê chín-kiù; Tī lia̍t-pang-lâng ê ba̍k-chiu-chêng hián-bêng I ê kong-gī.

3伊記念伊tùi以色列家所發出ê慈愛kap信實；　　地ê四角lóng看見咱ê上帝ê拯救。I kì-liām I tùi Í-sek-lia̍t ke só͘ hoat-chhut ê chû-ài kap sìn-si̍t; Tōe ê sì-kak lóng khòaⁿ-kìⁿ lán ê Siōng-tè ê chín-kiù.

4全地lóng tio̍h ǹg耶和華出歡喜ê聲；　　Tio̍h出大聲歡喜唱歌o-ló伊。Choân-tōe lóng tio̍h ǹg Iâ-hô-hoa chhut hoaⁿ-hí ê siaⁿ; Tio̍h chhut tōa-siaⁿ hoaⁿ-hí chhiùⁿ-koa o-ló I.

5Tio̍h彈琴唱歌o-ló耶和華；　　Tio̍h彈琴和詩歌ê聲o-ló伊。Tio̍h tôaⁿ-khîm chhiùⁿ-koa o-ló Iâ-hô-hoa; Tio̍h tôaⁿ-khîm hô si-koa ê siaⁿ o-ló I.

6用號頭kap哨角ê聲，　　Tī君王耶和華ê面前出歡喜ê聲。Ēng hō-thâu kap sàu-kak ê siaⁿ, Tī Kun-ông Iâ-hô-hoa ê bīn-chêng chhut hoaⁿ-hí ê siaⁿ.

7願海，kap其中所充滿ê，lóng tio̍h出大聲；　　世界，kap tiàm tī hit中間ê，亦tio̍h出聲；Goān hái, kap kî-tiong só͘ chhiong-móa--ê, lóng tio̍h chhut tōa-siaⁿ; Sè-kài, kap tiàm tī hit tiong-kan--ê, ia̍h tio̍h chhut-siaⁿ;

8願大水phah手掌，　　願chiah-ê山tī耶和華ê面前出歡喜ê聲。Goān tōa-chúi phah chhiú-chiúⁿ, Goān chiah ê soaⁿ tī Iâ-hô-hoa ê bīn-chêng chhut hoaⁿ-hí ê siaⁿ.

9因為伊來beh審判全地；　　伊beh照公義審判世界，　　照伊ê正直審判列邦。In-ūi I lâi beh sím-phòaⁿ choân-tōe; I beh chiàu kong-gī sím-phòaⁿ sè-kài, Chiàu I ê chèng-ti̍t sím-phòaⁿ lia̍t-pang.