1耶穌基督ê奴僕，雅各ê兄弟，猶大，phoe寄hō͘受召ê，tī父上帝得tio̍h疼，為tio̍h耶穌基督來保守ê；Iâ-so͘ Ki-tok ê lô͘-po̍k, Ngá-kok ê hiaⁿ-tī, Iû-tāi, phoe kià hō͘ siū tiàu ê, tī Pē Siōng-tè tit-tio̍h thiàⁿ, ūi-tio̍h Iâ-so͘ Ki-tok lâi pó-siú ê;

2願憐憫、平安、疼痛，加添chōe-chōe hō͘ lín。Goān lîn-bín, pêng-an, thiàⁿ-thàng, ke-thiⁿ chōe-chōe hō͘ lín.

3所疼ê兄弟ah，我本真致意beh寫phoe hō͘ lín，議論咱saⁿ-kap有份ê拯救，當hit時就不得不tio̍h寫phoe苦勸lín，為tio̍h做一下交代tī聖徒ê道理，來出力交戰。Só͘ thiàⁿ ê hiaⁿ-tī ah, góa pún chin tì-ì beh siá phoe hō͘ lín, gī-lūn lán saⁿ-kap ū hūn ê chín-kiù, tng hit sî chiū put-tek-put tio̍h siá phoe khó͘-khǹg lín, ūi-tio̍h chòe chi̍t-ē kau-tāi tī sèng-tô͘ ê tō-lí, lâi chhut-la̍t kau-chiàn.

4因為有kúi-nā人暗靜入來，就是早事先定tio̍h beh受chit-ê審判ê；in是不虔ê人，將咱ê上帝ê恩反tńg做放縱ê因由，也m̄認獨一ê主宰，咱ê主耶穌基督。In-ūi ū kúi-nā lâng àm-chīⁿ ji̍p-lâi, chiū-sī chá tāi-seng tiāⁿ-tio̍h beh siū chit ê sím-phòaⁿ ê; in sī put-khiân ê lâng, chiong lán ê Siōng-tè ê un hoán-tńg chòe hòng-chhiòng ê in-iû, iā m̄ jīn to̍k-it ê Chú-cháiⁿ, lán ê Chú Iâ-so͘ Ki-tok.

5Lín是已經bat萬事ê人，taⁿ我ài hō͘ lín會記得，就是主已經救百姓出埃及地，後來滅無hiah-ê m̄信ê。Lín sī í-keng bat bān sū ê lâng, taⁿ góa ài hō͘ lín ōe kì-tit, chiū-sī Chú í-keng kiù peh-sìⁿ chhut Ai-ki̍p tōe, āu-lâi bia̍t-bô hiah ê m̄ sìn ê.

6Koh有天使無守in-ê本質，離開家己khiā起ê所在，主用永遠ê鎖鏈，禁守in tī烏暗ê下面，到tī大日期ê審判。Koh ū thiⁿ-sài bô siú in ê pún-chit, lī-khui ka-kī khiā-khí ê só͘-chāi, Chú ēng éng-oán ê só-liān, kìm-siú in tī o͘-àm ê ē-bīn, kàu tī tōa ji̍t-kî ê sím-phòaⁿ.

7親像所多瑪、Gô͘-mô͘-la̍h，以及四圍ê城，也同in-ê款來行淫亂，thàn逆性ê色慾，就受永遠ê火ê刑罰，hē-teh做鑑戒。Chhin-chhiūⁿ Só͘-to-má, Gô͘-mô͘-la̍h, í-ki̍p sì-ûi ê siâⁿ, iā tâng in ê khoán lâi kiâⁿ îm-loān, thàn ge̍k-sèng ê sek-io̍k, chiū siū éng-oán ê hé ê hêng-hoa̍t. hē-teh chòe kàm-kài.

8但是chiah-ê人也親像án-ni，tī in ê眠夢phah lâ-sâm肉體，也藐視辦政事ê，褻瀆尊貴ê。Nā-sī chiah ê lâng iā chhin-chhiūⁿ án-ni, tī in ê bîn-bāng phah lâ-sâm jio̍k-thé, iā biáu-sī pān chèng-sū ê, siat-to̍k chun-kùi ê.

9至大ê天使，Bí-ka-le̍k，kap魔鬼相爭ê時，為tio̍h摩西ê身屍辯論，尚且m̄敢用謗瀆ê話責罪伊，只有講，願主責備你。Chì-tōa ê thiⁿ-sài, Bí-ka-le̍k, kap Mô͘-kúi saⁿ-chiⁿ ê sî, ūi-tio̍h Mô͘-se ê sin-si piān-lūn, siōng-chhiáⁿ m̄ káⁿ ēng pòng-to̍k ê ōe chek-chōe i, chí-ū kóng, Goān Chú chek-pī lí.

10獨獨chiah-ê人褻瀆見若in所m̄知ê；koh in本性所會曉得ê，親像無靈性ê活物，tī chiah-ê家己敗壞。To̍k-to̍k chiah ê lâng siat-to̍k kìⁿ-nā in só͘ m̄ chai ê; koh in pún-sèng só͘ ōe hiáu-tit ê, chhin-chhiūⁿ bô lêng-sèng ê oa̍h mi̍h, tī chiah-ê ka-kī pāi-hoāi.

11In有災禍ah!因為in有行該隱ê路，為tio̍h財利走chông tī Pa-lân ê錯誤，受滅無tī Ko-lat ê違逆。In ū chai-ē ah! in-ūi in ū kiâⁿ Kai-ún ê lō͘, ūi-tio̍h châi-lī cháu-chông tī Pa-lân ê chhò-gō͘, siū bia̍t-bô tī Ko-lat ê ûi-ke̍h.

12In tī lín ê Hô-ài-se̍k是做暗ê石礁，kap lín siâng桌，in養飼家己lóng無驚畏；in是無雨ê雲，hō͘風吹過去；是秋天無果子ê樹，死了koh死，根頭lóng拔起來；In tī lín ê hô-ài-se̍k sī chòe àm ê chio̍h-ta, kap lín siâng toh, in iúⁿ-chhī ka-kī lóng bô kiaⁿ-ùi; in sī bô hō͘ ê hûn, hō͘ hong chhe kè-khì; sī chhiu-thiⁿ bô ké-chí ê chhiū, sí-liáu koh sí, kun-thâu lóng pu̍ih-khí-lâi;

13是海ê狂湧，吐出家己thang見笑ê沫(phe̍h)；是離開in ê所在ê星，有烏烏暗暗留teh thèng候in到tī永遠。sī hái ê kông éng, thò͘-chhut ka-kī thang kiàn-siàu ê phe̍h; sī lī-khui in ê só͘-chāi ê chhiⁿ, ū o͘-o͘ àm-àm lâu teh thèng-hāu in kàu tī éng-oán.

14亞當第七代ê孫以諾讖語chiah-ê人，講，看ah！主kap伊慢慢ê聖ê來，A-tong tē chhit tāi ê sun Í-lo̍k chhàm-gú chiah ê lâng, kóng, Khòaⁿ ah! Chú kap I bān-bān ê sèng ê lâi,

15來審判眾人，來責罪一切無敬虔ê人，為tio̍h in用無敬虔所行一切無敬虔ê事，kap見若無敬虔ê罪人所講橫惡攻擊伊ê話。lâi sím-phòaⁿ chèng lâng, lâi chek-chōe it-chhè bô kèng-khiân ê lâng, ūi-tio̍h in ēng bô kèng-khiân só͘ kiâⁿ it-chhè bô kèng-khiân ê sū, kap kìⁿ-nā bô kèng-khiân ê chōe-jîn só͘ kóng hoâiⁿ-ok kong-kek I ê ōe.

16Chiah-ê人nga̍uh-nga̍uh念、怨慼，照in ê私慾來行，in ê嘴講誇口ê話，為tio̍h財利來諂媚人。Chiah ê lâng nga̍uh-nga̍uh liām, oàn-chhoeh, chiàu in ê su-io̍k lâi kiâⁿ, in ê chhùi kóng khoa-kháu ê ōe, ūi-tio̍h châi-lī lâi thiám-mī lâng.

17所疼ê兄弟ah，taⁿ lín tio̍h記得咱ê主耶穌基督ê使徒所事先講ê話；Só͘ thiàⁿ ê hiaⁿ-tī ah, taⁿ lín tio̍h kì-tit lán ê Chú Iâ-so͘ Ki-tok ê sù-tô͘ só͘ tāi-seng kóng ê ōe;

18有kā lín講，路尾ê時beh有戲謔ê人照in家己無敬虔ê私慾來行。ū kā lín kóng, Lō͘-bé ê sî beh ū hì-hiok ê lâng chiàu in ka-kī bô kèng-khiân ê su-io̍k lâi kiâⁿ.

19In hiah-ê是分黨ê，thàn血氣，無有神。In hiah-ê sī hun-tóng ê, thàn hiat-khì, bô ū Sîn.

20但是所疼ê兄弟ah，tio̍h tī lín至聖ê信家己起造，tī聖神來祈禱，Nā-sī só͘ thiàⁿ ê hiaⁿ-tī ah, tio̍h tī lín chì-sèng ê sìn ka-kī khí-chō, tī Sèng Sîn lâi kî-tó,

21tio̍h tī上帝ê疼家己保守，ǹg望咱ê主耶穌基督ê憐憫到永活。tio̍h tī Siōng-tè ê thiàⁿ ka-kī pó-siú, ǹg-bāng lán ê Chú Iâ-so͘ Ki-tok ê lîn-bín kàu éng-oa̍h.

22有僥疑ê，lín tio̍h憐憫伊；Ū giâu-gî ê, lín tio̍h lîn-bín i;

23有ê，lín tio̍h搶in出火來救in；有ê，lín tio̍h驚惶來憐憫伊；連hit-ê hō͘肉體phah lâ-sâm ê衣服，也tio̍h厭惡伊。ū-ê, lín tio̍h chhiúⁿ in chhut hé lâi kiù in; ū-ê, lín tio̍h kiaⁿ-hiâⁿ lâi lîn-bín i; liân hit ê hō͘ jio̍k-thé phah lâ-sâm ê i-ho̍k, iā tio̍h iàm-ò͘ⁿ i.

24Taⁿ會照顧lín無tio̍h-tak，也hō͘ lín khiā tī伊榮光ê面前，無瑕疵，有快樂ê，Taⁿ ōe chiàu-kò͘ lín bô tio̍h-tak, iā hō͘ lín khiā tī I êng-kng ê bīn-chêng, bô hâ-chhû, ū khoài-lo̍k ê,

25就是獨一ê上帝咱ê救主，願榮光、威嚴、權能、氣力，對咱ê主耶穌基督，lóng歸伊，tùi萬古以前，kap現今，直到萬世。À-bēng。chiū-sī to̍k-it ê Siōng-tè lán ê Kiù-chú, goān êng-kng, ui-giâm, koân-lêng, khùi-la̍t, tùi lán ê Chú Iâ-so͘ Ki-tok, lóng kui I, tùi bān kó͘ í-chêng, kap hiān-kim, ti̍t kàu bān sè. À-bēng.

1耶穌基督ê啟示，就是上帝所hō͘伊來指示伊chiah-ê奴僕ê，就是beh緊緊成ê事；伊就託伊ê天使去指點伊ê奴僕約翰。Iâ-so͘ Ki-tok ê khé-sī, chiū-sī Siōng-tè só͘ hō͘ I lâi chí-sī I chiah ê lô͘-po̍k ê, chiū-sī beh kín-kín chiâⁿ ê sū; I chiū thok I ê thiⁿ-sài khì chí-tiám I ê lô͘-po̍k Iok-hān.

2約翰就是將上帝ê道，kap耶穌基督ê干證，見若伊所有看見ê來做干證。Iok-hān chiū-sī chiong Siōng-tè ê Tō, kap Iâ-so͘ Ki-tok ê kan-chèng, kìⁿ-nā i só͘ ū khòaⁿ-kìⁿ ê lâi chòe kan-chèng.

3凡若讀kap聽hiah-ê讖語，來守其中所記載ê，有福氣；因為日期近lah。Hoān-nā tha̍k kap thiaⁿ hiah ê chhàm-gú, lâi siú kî-tiong só͘ kì-chài ê, ū hok-khì; in-ūi ji̍t-kî kūn lah.

4約翰寄phoe hō͘亞西亞七個教會；願lín得tio̍h恩典平安，tùi hit-ê現在tī-teh，早tī-teh，將來亦tī-teh ê，以及tùi伊座位前七個神；Iok-hān kià phoe hō͘ A-se-a chhit ê kàu-hōe; Goān lín tit-tio̍h un-tián pêng-an, tùi hit ê hiān-chāi tī-teh, chá tī-teh, chiong-lâi ia̍h tī-teh ê, í-ki̍p tùi I chō-ūi chêng chhit ê Sîn;

5koh tùi耶穌基督，就是忠信ê干證，死人中頭一個活ê，地上chiah-ê王ê主宰。koh tùi Iâ-so͘ Ki-tok, chiū-sī tiong-sìn ê kan-chèng, sí-lâng tiong thâu chi̍t ê oa̍h ê, tōe-chiūⁿ chiah ê ông ê Chú-cháiⁿ.

6伊疼咱，用伊ê血tháu放咱脫離咱ê罪；hō͘咱做國，做伊ê父上帝ê祭司；願榮光權能歸tī伊，到代代。À-bēng。I thiàⁿ lán, ēng I ê huih tháu-pàng lán thoat-lī lán ê chōe; hō͘ lán chòe kok, chòe I ê Pē Siōng-tè ê chè-si; goān êng-kng koân-lêng kui tī I, kàu tāi-tāi. À-bēng.

7伊坐雲來，眾目睭beh看見伊；連鑿伊ê人亦beh看見伊；地上ê族，lóng beh為tio̍h伊來啼哭。實在是án-ni。À-bēng。I chē hûn lâi, chèng ba̍k-chiu beh khòaⁿ-kìⁿ I; liân chha̍k I ê lâng ia̍h beh khòaⁿ-kìⁿ I; tōe-chiūⁿ ê cho̍k, lóng beh ūi-tio̍h I lâi thî-khàu. Si̍t-chāi sī án-ni. À-bēng.

8主上帝講，我是A-lī-hoat，koh是O-bí-ka，現在tī-teh，早tī-teh，將來tī-teh ê，是全能ê。Chú Siōng-tè kóng, Góa sī A-lī-hoat, koh sī O-bí-ka, hiān-chāi tī-teh, chá tī-teh, chiong-lâi tī-teh ê, sī choân-lêng ê.

9我約翰就是lín ê兄弟，saⁿ-kap有份tī耶穌ê患難，kap伊ê國，kap伊ê吞忍ê；為tio̍h上帝ê道，kap耶穌ê干證，bat tiàm-tī一個海嶼，名叫Poa̍t-mô͘。Góa Iok-hān chiū-sī lín ê hiaⁿ-tī, saⁿ-kap ū hūn tī Iâ-so͘ ê hoān-lān, kap I ê kok, kap I ê thun-lún ê; ūi-tio̍h Siōng-tè ê tō, kap Iâ-so͘ ê kan-chèng, bat tiàm tī chi̍t ê hái-sū, miâ kiò Poa̍t-mô͘.

10Tī主ê日，我hō͘神感動，聽見tī我ê後面有大聲親像號頭，講，Tī Chú ê ji̍t, góa hō͘ Sîn kám-tōng, thiaⁿ-kìⁿ tī góa ê āu-bīn ū tōa siaⁿ chhin-chhiūⁿ hō-thâu, kóng,

11你所看見ê tio̍h寫tī冊裡，寄hō͘ hit七個教會；就是以弗所、Sū-múi-ná、Pia̍t-ka-mô͘、Chhui-ngá-chhui-lat、Sat-te̍k、Hui-lia̍p-thiat-hui、Ló-tí-ka。Lí só͘ khòaⁿ-kìⁿ ê tio̍h siá tī chheh-ni̍h, kià hō͘ hit chhit ê kàu-hōe; chiū-sī Í-hut-só͘, Sū-múi-ná, Pia̍t-ka-mô͘, Chhui-ngá-chhui-lat, Sat-te̍k, Hui-lia̍p-thiat-hui, Ló-tí-ka.

12我就oa̍t-tńg身，ài看kap我講話ê聲；已經oa̍t-tńg，就看見七支ê金燈台；Góa chiū oa̍t-tńg-sin, ài khòaⁿ kap góa kóng ōe ê siaⁿ; í-keng oa̍t-tńg, chiū khòaⁿ-kìⁿ chhit ki ê kim teng-tâi;

13燈台中有親像人子ê，身軀穿長衫，胸坎hâ金帶。teng-tâi tiong ū chhin-chhiūⁿ Jîn-chú ê, seng-khu chhēng tn̂g saⁿ, heng-khám hâ kim tòa.

14伊ê頭殼kap頭毛lóng白親像白ê綿，親像雪；伊ê目睭親像火燄。I ê thâu-khak kap thâu-mn̂g lóng pe̍h chhin-chhiūⁿ pe̍h ê mî, chhin-chhiūⁿ seh; I ê ba̍k-chiu chhin-chhiūⁿ hé-iām.

15伊ê腳親像光亮ê銅，親像過火爐鍛鍊ê；聲親像chōe-chōe條水ê聲。I ê kha chhin-chhiūⁿ kng-liāng ê tâng, chhin-chhiūⁿ kè hé-lô͘ thoàn-liān ê; siaⁿ chhin-chhiūⁿ chōe-chōe tiâu chúi ê siaⁿ.

16Tī伊ê chiàⁿ手有七粒星；tùi伊ê嘴吐出雙面利ê劍；伊ê面貌親像炎日射出光。Tī I ê chiàⁿ chhiú ū chhit lia̍p chhiⁿ; tùi I ê chhùi thò͘-chhut siang-bīn lāi ê kiàm; I ê bīn-māu chhin-chhiūⁿ iām ji̍t siā-chhut kng.

17我看見伊就仆tī伊ê腳前親像死；伊用chiàⁿ手hōaⁿ我，講，莫得驚；我是起頭ê，kap soah尾ê，亦是活ê；Góa khòaⁿ-kìⁿ I chiū phak tī I ê kha-chêng chhin-chhiūⁿ sí; I ēng chiàⁿ chhiú hōaⁿ góa, kóng, Bo̍h-tit kiaⁿ; góa sī khí-thâu ê, kap soah-bé ê, ia̍h sī oa̍h ê;

18我bat死，taⁿ你看，我是活到代代；koh有死無kap陰府ê鎖匙。góa bat sí, taⁿ lí khòaⁿ, góa sī oa̍h kàu tāi-tāi; koh ū sí-bô kap im-hú ê só-sî.

19所以你tio̍h將所看見ê，以及現今所有ê，kap後來beh成ê事，寫伊；Só͘-í lí tio̍h chiong só͘ khòaⁿ-kìⁿ ê, í-ki̍p hiān-kim só͘ ū ê, kap āu-lâi beh chiâⁿ ê sū, siá i;

20你所看見我chiàⁿ手頂七粒星ê奧妙，kap七支ê金燈台；七粒星，就是七個教會ê使者；七支燈台，就是七個教會。lí só͘ khòaⁿ-kìⁿ góa chiàⁿ chhiú téng chhit lia̍p chhiⁿ ê ò-biāu, kap chhit ki ê kim teng-tâi; chhit lia̍p chhiⁿ, chiū-sī chhit ê kàu-hōe ê sù-chiá; chhit ki teng-tâi, chiū-sī chhit ê kàu-hōe.

1你tio̍h寫phoe hō͘ tī以弗所ê教會ê使者，講； Chiàⁿ手tháⁿ七粒星，行tī七支金燈台中ê，伊ê話講：Lí tio̍h siá phoe hō͘ tī Í-hut-só͘ ê kàu-hōe ê sù-chiá, kóng; Chiàⁿ chhiú tháⁿ chhit lia̍p chhiⁿ, kiâⁿ tī chhit ki kim teng-tâi tiong ê, I ê ōe kóng:

2我知你ê所行，kap你ê tio̍h磨、吞忍；hiah-ê做pháiⁿ ê人，你亦bōe容允伊；hiah-ê家己講是使徒，其實m̄是ê，你bat試驗in，知in是白賊；Góa chai lí ê só͘ kiâⁿ, kap lí ê tio̍h-bôa, thun-lún; hiah ê chòe pháiⁿ ê lâng, lí ia̍h bōe iông-ún i; hiah ê ka-kī kóng sī sù-tô͘, kî-si̍t m̄ sī ê, lí bat chhì-giām in, chai in sī pe̍h-chha̍t;

3你亦有吞忍，bat為tio̍h我ê名忍受無厭倦。lí ia̍h ū thun-lún, bat ūi-tio̍h góa ê miâ jím-siū bô ià-siān.

4但是我有所責備你ê，就是你已經離開起頭ê疼。Nā-sī góa ū só͘ chek-pī lí ê, chiū-sī lí í-keng lī-khui khí-thâu ê thiàⁿ.

5所以tio̍h記得你tùi tá-lo̍h跋落來；tio̍h反悔，來行你起頭ê所行；若無án-ni，你若m̄反悔，我beh到你hia，徙你ê燈台離開伊ê位。Só͘-í tio̍h kì-tit lí tùi tá-lo̍h poa̍h-lo̍h lâi; tio̍h hoán-hóe, lâi kiâⁿ lí khí-thâu ê só͘ kiâⁿ; nā bô án-ni, lí nā m̄ hoán-hóe, góa beh kàu lí hia, sóa lí ê teng-tâi lī-khui i ê ūi.

6但是你iáu有一項可取，就是我所怨恨Nî-ko-lia̍p黨ê所行，你亦怨恨伊。Nā-sī lí iáu ū chi̍t hāng khó-chhú, chiū-sī góa só͘ oàn-hūn Nî-ko-lia̍p tóng ê só͘ kiâⁿ, lí ia̍h oàn-hūn i.

7有耳孔ê tio̍h聽聖神kā chiah-ê教會所講ê。得勝ê人我beh將上帝樂園中活命樹ê果子hō͘伊食。Ū hī-khang ê tio̍h thiaⁿ Sèng Sîn kā chiah ê kàu-hōe só͘ kóng ê. Tek-sèng ê lâng góa beh chiong Siōng-tè Lo̍k-hn̂g tiong oa̍h-miā chhiū ê ké-chí hō͘ i chia̍h.

8你tio̍h寫phoe hō͘ ti7Su7-múi-ná ê教會ê使者，講； 做起頭kap路尾ê，bat死來koh活ê，伊ê話講：Lí tio̍h siá phoe hō͘ tī Sū-múi-ná ê kàu-hōe ê sù-chiá, kóng; Chòe khí-thâu kap lō͘-bé ê, bat sí lâi koh-oa̍h ê, I ê ōe kóng:

9我知你ê患難kap sòng-hiong，實在你是好額；hiah-ê家己講是猶太人，其實m̄是ê，就是做撒旦ê會，in ê謗瀆我亦知。Góa chai lí ê hoān-lān kap sòng-hiong, si̍t-chāi lí sī hó-gia̍h; hiah ê ka-kī kóng sī Iû-thài lâng, kî-si̍t m̄ sī ê, chiū-sī chòe Sat-tàn ê hōe, in ê pòng-to̍k góa ia̍h chai.

10莫得驚你所beh受ê艱苦；你看，魔鬼beh將lín中間kúi-nā人hiat落監，hō͘ lín tú-tio̍h試，lín beh受患難十日；你tio̍h盡忠到死，我就beh用活命ê冕旒賞賜你。Bo̍h-tit kiaⁿ lí só͘ beh siū ê kan-khó͘; lí khòaⁿ, Mô͘-kúi beh chiong lín tiong-kan kúi-nā lâng hiat-lo̍h kaⁿ, hō͘ lín tú-tio̍h chhì, lín beh siū hoān-lān cha̍p ji̍t; lí tio̍h chīn-tiong kàu sí, góa chiū beh ēng oa̍h-miā ê bián-liû siúⁿ-sù lí.

11有耳孔ê tio̍h聽聖神kā chiah-ê教會所講ê。得勝ê人決斷無受tio̍h第二pái死ê害。Ū hī-khang ê tio̍h thiaⁿ Sèng Sîn kā chiah ê kàu-hōe só͘ kóng ê. Tek-sèng ê lâng koat-toàn bô siū-tio̍h tē jī pái sí ê hāi.

12你tio̍h寫phoe hō͘ tī Pia̍t-ka-mô͘ ê教會ê使者，講；Lí tio̍h siá phoe hō͘ tī Pia̍t-ka-mô͘ ê kàu-hōe ê sù-chiá, kóng;

13Hit-ê有雙面利ê劍ê，伊ê話講：我知你所tòa ê位，就是撒旦座位ê所在；你持守我ê名，亦未bat m̄認你ê信我，tī An-thê-phàⁿ ê日，伊就是做我ê干證，盡忠tī我ê，受thâi tī lín中間，就是tī撒旦所tòa ê位。Hit ê ū siang-bīn lāi ê kiàm ê, I ê ōe kóng: Góa chai lí só͘ tòa ê ūi, chiū-sī Sat-tàn chō-ūi ê só͘-chāi; lí chhî-siú góa ê miâ, ia̍h bē bat m̄ jīn lí ê sìn góa, tī An-thê-phàⁿ ê ji̍t, i chiū-sī chòe góa ê kan-chèng, chīn-tiong tī góa ê, siū thâi tī lín tiong-kan, chiū-sī tī Sat-tàn só͘ tòa ê ūi.

14但是我有kúi-nā項beh責備你，因為tī你hia有人持守Pa-lân ê教；早Pa-lân bat教示Pa-le̍k，將塞礙ê物hiat tī以色列kiaⁿ孫ê面前；hō͘ in食祭偶像ê物，續行姦淫；Nā-sī góa ū kúi-nā hāng beh chek-pī lí, in-ūi tī lí hia ū lâng chhî-siú Pa-lân ê kàu; chá Pa-lân bat kà-sī Pa-le̍k, chiong that-gāi ê mi̍h hiat tī Í-sek-lia̍t kiáⁿ-sun ê bīn-chêng; hō͘ in chia̍h chè ngó͘-siōng ê mi̍h, sòa kiâⁿ kan-îm;

15親像án-ni，你亦猶原有人持守Nî-ko-lia̍p黨 ê教。chhin-chhiūⁿ án-ni, lí ia̍h iû-goân ū lâng chhî-siú Nî-ko-lia̍p tóng ê kàu.

16所以tio̍h反悔；若無án-ni，就我緊緊到你hia，beh用我ê嘴ê劍kap in交戰。Só͘-í tio̍h hoán-hóe; nā bô án-ni, chiū góa kín-kín kàu lí hia, beh ēng góa ê chhùi ê kiàm kap in kau-chiàn.

17有耳孔ê tio̍h聽聖神kā chiah-ê教會所講ê。得勝ê人，我beh用所khǹg密ê má-ná hō͘伊，koh用白ê石hō͘伊，石頂刻新ê名，受ê人以外，無人bat伊。Ū hī-khang ê tio̍h thiaⁿ Sèng Sîn kā chiah ê kàu-hōe só͘ kóng ê. Tek-sèng ê lâng, góa beh ēng só͘ khǹg-ba̍t ê má-ná hō͘ i, koh ēng pe̍h ê chio̍h hō͘ i, chio̍h-téng khek sin ê miâ, siū ê lâng í-gōa, bô lâng bat i.

18你tio̍h寫phoe hō͘ tī Chhui-ngá-chhui-lat ê教會ê使者，講； 上帝ê Kiáⁿ目睭親像火燄，腳親像光亮ê銅ê，伊ê話講：Lí tio̍h siá phoe hō͘ tī Chhui-ngá-chhui-lat ê kàu-hōe ê sù-chiá, kóng; Siōng-tè ê Kiáⁿ ba̍k-chiu chhin-chhiūⁿ hé-iām, kha chhin-chhiūⁿ kng-liāng ê tâng ê, I ê ōe kóng:

19我知你ê所行，你ê疼，kap信，kap服事，kap吞忍；koh你路尾ê所行，比起頭ê khah-chōe。Góa chai lí ê só͘ kiâⁿ, lí ê thiàⁿ, kap sìn, kap ho̍k-sāi, kap thun-lún; koh lí lō͘-bé ê só͘ kiâⁿ, pí khí-thâu ê khah chōe.

20但是我有所責備你ê，就是你容允hit-ê婦人人Iâ-sé-piat，家己稱做先知ê；伊教示koh迷惑我chiah-ê奴僕行姦淫，kap食祭偶像ê物。Nā-sī góa ū só͘ chek-pī lí ê, chiū-sī lí iông-ún hit ê hū-jîn-lâng Iâ-sé-piat, ka-kī chheng chòe sian-ti ê; i kà-sī koh bê-he̍k góa chiah ê lô͘-po̍k kiâⁿ kan-îm, kap chia̍h chè ngó͘-siōng ê mi̍h.

21我hō͘伊有時chūn thang反悔，但是伊無beh反悔，離開伊ê淫行。Góa hō͘ i ū sî-chūn thang hoán-hóe, nā-sī i bô beh hoán-hóe, lī-khui i ê îm-hēng.

22我beh hiat伊tī眠床；hiah-ê kap伊行淫ê，若無反悔離開伊ê所做，我亦beh hiat in tī大患難。Góa beh hiat i tī bîn-chhn̂g; hiah ê kap i kiâⁿ îm ê, nā bô hoán-hóe lī-khui i ê só͘ chòe, góa ia̍h beh hiat in tī tōa hoān-lān.

23我beh用死滅伊ê kiáⁿ兒；就chiah-ê教會lóng beh知我是鑑察人ê心腸ê，亦beh照lín ta̍k人ê所行來報應lín。Góa beh ēng sí bia̍t i ê kiáⁿ-jî; chiū chiah ê kàu-hōe lóng beh chai góa sī kàm-chhat lâng ê sim-tn̂g ê, ia̍h beh chiàu lín ta̍k lâng ê só͘ kiâⁿ lâi pò-èng lín.

24但是lín tī Chhui-ngá-chhui-lat其餘ê人，凡若無承受chit號教示，亦m̄-bat in所講撒旦深奧ê事，我kā lín講，我無用別號ê擔hō͘ lín擔；Nā-sī lín tī Chhui-ngá-chhui-lat kî-û ê lâng, hoān-nā bô sêng-siū chit hō kà-sī, ia̍h m̄ bat in só͘ kóng Sat-tàn chhim-ò ê sū, góa kā lín kóng, Góa bô ēng pa̍t hō ê tàⁿ hō͘ lín taⁿ;

25獨獨lín所有ê，tio̍h持守伊到我來。to̍k-to̍k lín só͘ ū ê, tio̍h chhî-siú i kàu góa lâi.

26得勝ê人，kap守我ê行做到路尾ê，我beh hō͘伊有權，治理列邦；Tek-sèng ê lâng, kap siú góa ê kiâⁿ-chòe kàu lō͘-bé ê, góa beh hō͘ i ū koân, tī-lí lia̍t-pang;

27伊beh用鐵柺管轄in，ná chún磁ê器具受phah碎，親像我tùi我ê父承受權柄一樣。i beh ēng thih-koáiⁿ koán-hat in, ná chún hûi ê khì-kū siū phah-chhùi, chhin-chhiūⁿ góa tùi góa ê Pē sêng-siū koân-pèng chi̍t iūⁿ.

28我也beh用啟明星hō͘伊。Góa iā beh ēng khé-bêng chhiⁿ hō͘ i.

29有耳孔ê tio̍h聽聖神kā chiah-ê教會所講ê。Ū hī-khang ê tio̍h thiaⁿ Sèng Sîn kā chiah ê kàu-hōe só͘ kóng ê.