1第五個天使pûn，我就看見一粒星已經tùi天墜落地；有將無底深坑ê鎖匙hō͘伊。Tē gō͘ ê thiⁿ-sài pûn, góa chiū khòaⁿ-kìⁿ chi̍t lia̍p chhiⁿ í-keng tùi thiⁿ tūi-lo̍h tōe; ū chiong bô tóe chhim-khiⁿ ê só-sî hō͘ i.

2到伊開無底ê深坑，就煙tùi深坑chhèng起來親像大火爐ê煙；日kap空氣lóng因為深坑ê煙就暗。Kàu i khui bô tóe ê chhim-khiⁿ, chiū ian tùi chhim-khiⁿ chhèng-khí-lâi chhin-chhiūⁿ tōa hé-lô͘ ê ian; ji̍t kap khong-khì lóng in-ūi chhim-khiⁿ ê ian chiū àm.

3有草蜢tùi hit-ê煙出來tī地裡；有權hō͘ in，親像地裡ê蠍á蟲有權一樣。Ū chháu-meh tùi hit ê ian chhut-lâi tī tōe-ni̍h; ū koân hō͘ in, chhin-chhiūⁿ tōe-ni̍h ê giat-á-thâng ū koân chi̍t iūⁿ.

4Koh有kā in講，m̄-thang相害地ê草，kap一切星ê物，kap ta̍k樣ê樹木，獨獨相害hiah-ê tī頭額無有上帝ê印ê人。Koh ū kā in kóng, m̄ thang siong-hāi tōe ê chháu, kap it-chhè chhiⁿ ê mi̍h, kap ta̍k iūⁿ ê chhiū-ba̍k, to̍k-to̍k siong-hāi hiah ê tī thâu-hia̍h bô ū Siōng-tè ê ìn ê lâng.

5Koh命令in m̄-thang害死in，只有hō͘ in痛疼五月日久；in ê痛疼親像蠍á蟲螫(chhioh)人ê痛疼一樣。Koh bēng-lēng in m̄ thang hāi-sí in, chí ū hō͘ in thàng-thiàⁿ gō͘ ge̍h ji̍t kú; in ê thàng-thiàⁿ chhin-chhiūⁿ giat-á-thâng chhioh lâng ê thàng-thiàⁿ chi̍t iūⁿ.

6Tī hiah-ê日人beh求死，也bōe得tio̍h；ài beh死，也死閃避伊。Tī hiah ê ji̍t lâng beh kiû sí, iā bōe tit-tio̍h; ài beh sí, iā sí siám-pī i.

7草蜢ê款式親像備辦出戰ê馬；頭殼頂彷彿有冕旒親像金；in ê面親像人ê面。Chháu-meh ê khoán-sit chhin-chhiūⁿ pī-pān chhut-chiàn ê bé; thâu-khak téng hóng-hut ū bián-liû chhin-chhiūⁿ kim; in ê bīn chhin-chhiūⁿ lâng ê bīn.

8有頭毛親像婦人人ê頭毛；in ê牙親像獅ê牙。Ū thâu-mn̂g chhin-chhiūⁿ hū-jîn-lâng ê thâu-mn̂g; in ê gê chhin-chhiūⁿ sai ê gê.

9Koh有護心鏡親像鐵ê護心鏡；in ê翼ê聲親像chōe-chōe 車馬走去交戰ê聲。Koh ū hō͘-sim-kiàⁿ chhin-chhiūⁿ thih ê hō͘-sim-kiàⁿ; in ê si̍t ê siaⁿ chhin-chhiūⁿ chōe-chōe chhia-bé cháu khì kau-chiàn ê siaⁿ.

10In有尾親像蠍á蟲也有刺；in ê權會相害人五月日，是tī in ê尾。In ū bé chhin-chhiūⁿ giat-á-thâng iā ū chhì; in ê koân ōe siong-hāi lâng gō͘ ge̍h-ji̍t, sī tī in ê bé.

11做in ê王ê就是深坑ê差使；希伯來ê音，名叫A-pa-tùn；希利尼ê音，名叫A-pho-lûn。Chòe in ê ông ê chiū-sī chhim-khiⁿ ê chhe-sài; Hi-pek-lâi ê im, miâ kiò A-pa-tùn; Hi-lī-nî ê im, miâ kiò A-pho-lûn.

12頭一個災禍已經過身；hiah-ê tāi-chì以後，iáu有兩項災禍beh到。Thâu chi̍t ê chai-ē í-keng kè-sin; hiah ê tāi-chì í-āu, iáu ū nn̄g hāng chai-ē beh kàu.

13第六個ê天使pûn，我就聽見有一個聲tùi上帝面前ê金壇chiah-ê角出來，Tē la̍k ê thiⁿ-sài pûn, góa chiū thiaⁿ-kìⁿ ū chi̍t ê siaⁿ tùi Siōng-tè bīn-chêng ê kim-tôaⁿ chiah ê kak chhut-lâi,

14kā hit-ê kia̍h號頭ê第六個天使講，縛tī Pek-lat大河hit四個天使，你tio̍h tháu放in。kā hit ê kia̍h hō-thâu ê tē la̍k ê thiⁿ-sài kóng, Pa̍k tī Pek-lat tōa hô hit sì ê thiⁿ-sài, lí tio̍h tháu-pàng in.

15Hit四個天使受tháu放，就是所備辦到 hit-ê時、日、月、年，beh害死人三份ê一份ê。Hit sì ê thiⁿ-sài siū tháu-pàng, chiū-sī só͘ pī-pān kàu hit ê sî, ji̍t, ge̍h, nî, beh hāi-sí lâng saⁿ hūn ê chi̍t hūn ê.

16馬兵ê數額有兩萬萬；in ê數額我聽見lah。Bé-peng ê siàu-gia̍h ū nn̄g-bān-bān; in ê siàu-gia̍h góa thiaⁿ-kìⁿ lah.

17我tī異象中看見馬kap騎馬ê親像án-ni；in有護心鏡親像火，親像紫色ê玉，親像琉磺；馬頭是親像獅ê頭；tùi in ê嘴出火kap煙kap琉磺。Góa tī īⁿ-siōng tiong khòaⁿ-kìⁿ bé kap khiâ bé ê chhin-chhiūⁿ án-ni; in ū hō͘-sim-kiàⁿ chhin-chhiūⁿ hé, chhin-chhiūⁿ chí-sek ê ge̍k, chhin-chhiūⁿ jiû-n̂g; bé thâu sī chhin-chhiūⁿ sai ê thâu; tùi in ê chhùi chhut hé kap ian kap jiû-n̂g.

18Tùi in ê嘴所出來ê火kap煙kap琉磺，chit三項ê災禍，人三份ê一份tú-tio̍h害死。Tùi in ê chhùi só͘ chhut-lâi ê hé kap ian kap jiû-n̂g, chit saⁿ hāng ê chai-ē, lâng saⁿ hūn ê chi̍t hūn tú-tio̍h hāi-sí.

19Hiah-ê馬ê權在tī in ê嘴，koh在tī in ê尾；因為in ê尾是親像蛇，koh有頭；用hiah-ê相害人。Hiah ê bé ê koân chāi-tī in ê chhùi, koh chāi-tī in ê bé; in-ūi in ê bé sī chhin-chhiūⁿ chôa, koh ū thâu; ēng hiah-ê siong-hāi lâng.

20其餘ê人，無tùi chiah-ê災禍死ê，iáu-kú無反悔，來改in ê手所做，猶原拜chiah-ê鬼，kap bōe-ōe看，bōe-ōe聽，bōe-ōe行，金、銀、銅、石、柴ê偶像；Kî-û ê lâng, bô tùi chiah ê chai-ē sí ê, iáu-kú bô hoán-hóe, lâi kóe in ê chhiú só͘ chòe, iû-goân pài chiah ê kúi, kap bōe ōe khòaⁿ, bōe ōe thiaⁿ, bōe ōe kiâⁿ, kim, gûn, tâng, chio̍h, chhâ ê ngó͘-siōng;

21koh無反悔來改in ê thâi人、邪術、淫亂、偷the̍h。koh bô hoán-hóe lâi kóe in ê thâi-lâng, siâ-su̍t, îm-loān, thau-the̍h.

1我koh看見別個大氣力ê天使tùi天降落，穿雲做衫，頭殼頂有虹，伊ê面親像日頭，腳親像火柱。Góa koh khòaⁿ-kìⁿ pa̍t ê tōa khùi-la̍t ê thiⁿ-sài tùi thiⁿ kàng-lo̍h, chhēng hûn chòe saⁿ, thâu-khak téng ū khēng, i ê bīn chhin-chhiūⁿ ji̍t-thâu, kha chhin-chhiūⁿ hé-thiāu.

2手中有細細卷ê冊，已經掀開ê，伊chiàⁿ腳踏tī海裡，tò腳踏tī地裡，Chhiú tiong ū sòe-sòe kńg ê chheh, í-keng hian-khui ê, i chiàⁿ kha ta̍h tī hái-ni̍h, tò kha ta̍h tī tōe-ni̍h,

3大聲喉叫，親像獅teh哮，伊喉叫ê時，hit七個雷就出in ê聲。tōa siaⁿ âu-kiò, chhin-chhiūⁿ sai teh háu, i âu-kiò ê sî hit chhit ê lûi chiū chhut in ê siaⁿ.

4七個雷已經出聲，我beh寫伊；獨獨聽見tùi天有聲講，七個雷所講ê，你tio̍h封密，莫得寫伊。Chhit ê lûi í-keng chhut siaⁿ, góa beh siá i; to̍k-to̍k thiaⁿ-kìⁿ tùi thiⁿ ū siaⁿ kóng, Chhit ê lûi só͘ kóng ê, lí tio̍h hong-ba̍t, bo̍h-tit siá i.

5我所看見khiā tī海kap地裡ê天使，kia̍h起伊ê chiàⁿ手ǹg天，Góa só͘ khòaⁿ-kìⁿ khiā tī hái kap tōe-ni̍h ê thiⁿ-sài, kia̍h-khí i ê chiàⁿ chhiú ǹg thiⁿ,

6kí創造天kap天裡ê物，地kap地裡ê物，海kap海裡ê物，活到代代無窮盡ê，來chiù-chōa講，以後無koh有時日；kí chhòng-chō thiⁿ kap thiⁿ-ni̍h ê mi̍h, tōe kap tōe-ni̍h ê mi̍h, hái kap hái-ni̍h ê mi̍h, oa̍h kàu tāi-tāi bô kiông-chīn ê, lâi chiù-chōa kóng, í-āu bô koh ū sî-ji̍t;

7獨獨tī第七個天使出聲ê日，當伊beh pûn號頭ê時，上帝ê奧妙就成，照伊所傳hō͘伊ê奴僕，hiah-ê先知ê福音。to̍k-to̍k tī tē chhit ê thiⁿ-sài chhut siaⁿ ê ji̍t, tng i beh pûn hō-thâu ê sî, Siōng-tè ê ò-biāu chiū chiâⁿ, chiàu I só͘ thoân hō͘ I ê lô͘-po̍k, hiah ê sian-ti ê hok-im.

8我前所聽見tùi天ê聲，taNkoh聽見伊tùi我講話，講，Hit-ê khiā tī海kap地裡ê天使，手中所the̍h掀開ê冊，你tio̍h去the̍h伊。Góa chêng só͘ thiaⁿ-kìⁿ tùi thiⁿ ê siaⁿ, taⁿ koh thiaⁿ-kìⁿ i tùi góa kóng ōe, kóng, Hit ê khiā tī hái kap tōe-ni̍h ê thiⁿ-sài, chhiú-tiong só͘ the̍h hian-khui ê chheh, lí tio̍h khì the̍h i.

9我隨時去就近hit-ê天使，kā伊講，tio̍h用hit卷細細ê冊hō͘我。伊就kā我講，你the̍h去食伊；伊beh hō͘你ê腹肚苦，tī你ê嘴內beh甜親像蜜。Góa sûi-sî khì chiū-kūn hit ê thiⁿ-sài, kā i kóng tio̍h ēng hit kńg sòe-sòe ê chheh hō͘ góa. I chiū kā góa kóng, Lí the̍h-khì chia̍h i; i beh hō͘ lí ê pak-tó͘ khó͘, tī lí ê chhùi-lāi beh tiⁿ chhin-chhiūⁿ bi̍t.

10我就tùi hit-ê天使ê手the̍h細卷冊來食伊；tī我嘴內果然甜親像蜜；已經吞落去，我ê腹肚就苦。Góa chiū tùi hit ê thiⁿ-sài ê chhiú the̍h sòe kńg chheh lâi chia̍h i; tī góa chhùi-lāi kó-jiân tiⁿ chhin-chhiūⁿ bi̍t; í-keng thun-lo̍h-khì, góa ê pak-tó͘ chiū khó͘.

11In kā我講，你tio̍h koh讖語來論起chōe-chōe百姓，chōe-chōe邦國，chōe-chōe腔口，chōe-chōe君王ê事。In kā góa kóng, Lí tio̍h koh chhàm-gú lâi lūn-khí chōe-chōe peh-sìⁿ, chōe-chōe pang kok, chōe-chōe khiuⁿ-kháu, chōe-chōe kun-ông ê sū.

1有hō͘我一支蘆竹親像柺á，講，你起來，量上帝ê殿，kap祭壇，以及tī hia敬拜ê人。Ū hō͘ góa chi̍t ki lô͘-tek chhin-chhiūⁿ koáiⁿ-á, kóng, Lí khí-lâi, niû Siōng-tè ê tiān, kap chè-tôaⁿ, í-ki̍p tī hia kèng-pài ê lâng.

2殿外ê院放下teh，莫得量伊；因為已經hō͘外邦人；in beh thún踏聖城，四十二月日。Tiān-gōa ê īⁿ pàng-hē teh, bo̍h-tit niû i; in-ūi í-keng hō͘ gōa-pang lâng; in beh thún-ta̍h sèng-siâⁿ, sì-cha̍p-jī ge̍h-ji̍t.

3我beh賞賜我兩個干證ê，in beh穿麻布傳道理，共一千兩百六十日。Góa beh siúⁿ-sù góa nn̄g ê kan-chèng ê, in beh chhēng môa-pò͘ thoân tō-lí, kiōng chi̍t-chheng nn̄g-pah la̍k-cha̍p ji̍t.

4這就是hit-ê兩叢橄欖樹，kap兩個燈台，就是khiā tī全地ê主ê面前ê。Che chiū-sī hit ê nn̄g châng kaⁿ-ná chhiū, kap nn̄g ê teng-tâi, chiū-sī khiā tī choân tōe ê Chú ê bīn-chêng ê.

5若有人ài害in，就有火tùi in ê嘴出來，滅in ê對敵；若有人ài beh害in，的確親像án-ni受害死。Nā ū lâng ài hāi in, chiū ū hé tùi in ê chhùi chhut-lâi, bia̍t in ê tùi-te̍k; nā ū lâng ài beh hāi in, tek-khak chhin-chhiūⁿ án-ni siū hāi-sí.

6Chit兩人有權能關密天，tī in傳道理ê日，hō͘伊無落雨；亦有權治理chiah-ê水，hō͘伊變做血；koh照in所ài，不管時thang用ta̍k樣ê災禍攻擊地。Chit nn̄g lâng ū koân ōe koaiⁿ-ba̍t thiⁿ, tī in thoân tō-lí ê ji̍t, hō͘ i bô lo̍h hō͘; ia̍h ū koân tī-lí chiah ê chúi, hō͘ i pìⁿ chòe huih; koh chiàu in só͘ ài, put-koán sî thang ēng ta̍k iūⁿ ê chai-ē kong-kek tōe.

7到in干證明白ê時，tùi深淵上來ê獸beh kap in交戰，koh beh khah贏來thâi in。。Kàu in kan-chèng bêng-pe̍k ê sî, tùi chhim-ian chiūⁿ-lâi ê siù beh kap in kau-chiàn, koh beh khah-iâⁿ lâi thâi in..

8In ê身屍倒tī大城ê街路；chit-ê城譬喻稱做所多瑪kap埃及，就是in ê主釘十字架ê所在。In ê sin-si tó tī tōa siâⁿ ê ke-lō͘; chit ê siâⁿ phì-jū chheng chòe Só͘-to-má kap Ai-ki̍p, chiū-sī in ê Chú tèng si̍p-jī-kè ê só͘-chāi.

9Koh tùi chiah-ê百姓，chiah-ê宗族，chiah-ê腔口，chiah-ê邦國ê中間有人三日半久看in ê身屍，koh m̄准埋葬in ê身屍tī墓裡。Koh tùi chiah ê peh-sìⁿ, chiah ê chong-cho̍k, chiah ê khiuⁿ-kháu, chiah ê pang-kok ê tiong-kan ū lâng saⁿ ji̍t pòaⁿ kú khòaⁿ in ê sin-si, koh m̄ chún bâi-chòng in ê sin-si tī bōng-ni̍h.

10khiā起地面上ê人就為tio̍h in歡喜快樂，用物相送；因為chit兩個先知bat困苦khiā起地面上ê人。Khiā-khí tōe-bīn-chiūⁿ ê lâng chiū ūi-tio̍h in hoaⁿ-hí khoài-lo̍k, ēng mi̍h saⁿ-sàng; in-ūi chit nn̄g ê sian-ti bat khùn-khó͘ khiā-khí tōe-bīn-chiūⁿ ê lâng.

11過hit三日半，有活ê去，tùi上帝出ê，來入tī in；in就peh起來khiā；看見in ê人大驚。Kè hit saⁿ ji̍t pòaⁿ, ū oa̍h ê khì, tùi Siōng-tè chhut ê, lâi ji̍p tī in; in chiū peh-khí-lâi khiā; khòaⁿ-kìⁿ in ê lâng tōa kiaⁿ.

12In就聽見tùi天有大聲，kā in講，上來chia；in就坐雲上天，in ê對敵亦看見in。In chiū thiaⁿ-kìⁿ tùi thiⁿ ū tōa siaⁿ, kā in kóng, Chiūⁿ lâi chia; in chiū chē hûn chiūⁿ thiⁿ, in ê tùi-te̍k ia̍h khòaⁿ-kìⁿ in.

13當hit時，地有大振動，城倒十份ê一份；因為地動來死ê人，有七千名；其餘ê lóng驚惶，來歸榮光hō͘天裡ê上帝。Tng hit sî, tōe ū tōa tín-tāng, siâⁿ tó cha̍p hūn ê chi̍t hūn; in-ūi tōe-tāng lâi sí ê lâng, ū chhit-chheng miâ; kî-û ê lóng kiaⁿ-hiâⁿ, lâi kui êng-kng hō͘ thiⁿ-ni̍h ê Siōng-tè.

14第二個災禍已經過去；第三個災禍緊緊到。Tē jī ê chai-ē í-keng kè-khì; tē saⁿ ê chai-ē kín-kín kàu.

15第七個天使pûn號頭，就tī天裡有chiah-ê大ê聲，teh講，世間ê國成做咱ê主kap伊ê基督ê國；伊beh做王到代代無盡。Tē chhit ê thiⁿ-sài pûn hō-thâu, chiū tī thiⁿ-ni̍h ū chiah ê tōa ê siaⁿ, teh kóng, Sè-kan ê kok chiâⁿ-chòe lán ê Chú kap I ê Ki-tok ê kok; I beh chòe ông kàu tāi-tāi bô chīn.

16Tī上帝ê面前，坐tī in座位ê二十四個長老，面仆落來拜上帝，Tī Siōng-tè ê bīn-chêng, chē tī in chō-ūi ê jī-cha̍p-sì ê tiúⁿ-ló, bīn phak-lo̍h-lâi pài Siōng-tè,

17講，主上帝ah，是全能ê，現在tī-teh，早tī-teh ê；阮感謝你，因為你已經掌你ê大權來做王。kóng, Chú Siōng-tè ah, sī choân-lêng ê, hiān-chāi tī-teh, chá tī-teh ê; goán kám-siā lí, in-ūi lí í-keng chiáng lí ê tōa koân lâi chòe ông.

18外邦發出受氣，你ê受氣亦臨到；死ê人受審判，koh你ê奴僕chiah-ê先知，kap chiah-ê聖ê，kap敬畏你ê名ê，無論大細，你用報賞hō͘ in；koh敗壞地ê，你亦敗壞in；hit-ê時到lah。Gōa-pang hoat-chhut siū-khì, lí ê siū-khì ia̍h lîm-kàu; sí ê lâng siū sím-phòaⁿ, koh lí ê lô͘-po̍k chiah ê sian-ti, kap chiah ê sèng ê, kap kèng-ùi lí ê miâ ê, bô lūn tōa sòe, lí ēng pò-siúⁿ hō͘ in; koh pāi-hoāi tōe ê, lí ia̍h pāi-hoāi in; hit ê sî kàu lah.

19上帝ê殿，tī天裡ê，就開；tī伊ê殿內伊ê約櫃看現現；就有sih-nà，kap聲，kap雷tân，地動，以及大雹。Siōng-tè ê tiān, tī thiⁿ-ni̍h ê, chiū khui; tī I ê tiān-lāi I ê iok-kūi khòaⁿ hiān-hiān; chiū ū sih-nà, kap siaⁿ, kap lûi tân, tōe-tāng, í-ki̍p tōa phauh.