1Koh有大兆頭出現tī天裡，一個婦人人身軀穿日頭，伊ê腳下有月，頭殼戴十二粒星ê冕旒；Koh ū tōa tiāu-thâu chhut-hiān tī thiⁿ-ni̍h, chi̍t ê hū-jîn-lâng sin-khu chhēng ji̍t-thâu, i ê kha-ē ū ge̍h, thâu-khak tì cha̍p-jī lia̍p chhiⁿ ê bián-liû;

2亦有懷孕；因為beh生kiáⁿ ê艱苦、痛疼，就喉叫。ia̍h ū hoâi-īn; in-ūi beh siⁿ kiáⁿ ê kan-khó͘, thàng-thiàⁿ, chiū âu-kiò.

3Koh有別個兆頭出現tī天裡；有大尾赤色ê龍，七個頭，十支角，頭殼戴七頂王帽。Koh ū pa̍t ê tiāu-thâu chhut-hiān tī thiⁿ-ni̍h; ū tōa bé chhiah-sek ê lêng, chhit ê thâu, cha̍p ki kak, thâu-khak tì chhit téng ông-bō.

4伊ê尾拖天頂ê星三份ê一份，墜落地。龍khiā tī beh生kiáⁿ ê婦人人ê面前，thèng候伊生了，就beh吞伊ê kiáⁿ。I ê bé thoa thiⁿ-téng ê chhiⁿ saⁿ hūn ê chi̍t hūn, tūi lo̍h tōe. Lêng khiā tī beh siⁿ kiáⁿ ê hū-jîn-lâng ê bīn-chêng, thèng-hāu i siⁿ-liáu, chiū beh thun i ê kiáⁿ.

5婦人人生ta-po͘-kiáⁿ，就是beh用鐵柺治理萬邦ê。伊ê kiáⁿ受帶到tī上帝以及伊ê座位。Hū-jîn-lâng siⁿ ta-po͘-kiáⁿ, chiū-sī beh ēng thih-koáiⁿ tī-lí bān pang ê. I ê kiáⁿ siū tòa kàu tī Siōng-tè í-ki̍p I ê chō-ūi.

6婦人人就走去曠野，tī hia有上帝所備辦ê所在，hō͘伊tī hia得tio̍h養飼一千兩百六十日。Hū-jîn-lâng chiū cháu-khì khòng-iá, tī hia ū Siōng-tè só͘ pī-pān ê só͘-chāi, hō͘ i tī hia tit-tio̍h iúⁿ-chhī chi̍t-chheng nn̄g-pah la̍k-cha̍p ji̍t.

7Tī天裡就有交戰，Bí-ka-lek8chhoa7伊ê差使去kap龍交戰；龍亦chhōa伊ê差使去交戰，Tī thiⁿ-ni̍h chiū ū kau-chiàn, Bí-ka-le̍k chhōa i ê chhe-sài khì kap lêng kau-chiàn; lêng ia̍h chhōa i ê chhe-sài khì kau-chiàn,

8bōe-ōe贏，tī天裡in就無koh有所在。bōe ōe iâⁿ, tī thiⁿ-ni̍h in chiū bô koh ū só͘-chāi.

9Hit尾大龍就受hiat落，就是老蛇，稱做魔鬼，亦稱做撒旦，迷惑普天下ê，伊受hiat落tī地裡，伊ê差使亦kap伊受hiat落。Hit bé tōa lêng chiū siū hiat-lo̍h, chiū-sī lāu chôa, chheng chòe Mô͘-kúi, ia̍h chheng chòe Sat-tàn, bê-he̍k phó͘ thiⁿ-ē ê, i siū hiat-lo̍h tī tōe-ni̍h, i ê chhe-sài ia̍h kap i siū hiat-lo̍h.

10我就聽見tī天裡有大聲，講，咱ê上帝ê拯救kap權能kap國，以及伊ê基督ê權，taⁿ lóng到lah；因為抗告咱ê兄弟ê，就是暝日tī咱ê上帝ê面前抗告in ê，taⁿ已經受hiat落lah。Góa chiū thiaⁿ-kìⁿ tī thiⁿ-ni̍h ū tōa siaⁿ, kóng, Lán ê Siōng-tè ê chín-kiù kap koân-lêng kap kok, í-ki̍p I ê Ki-tok ê koân, taⁿ lóng kàu lah; in-ūi khòng-kò lán ê hiaⁿ-tī ê, chiū-sī mî-ji̍t tī lán ê Siōng-tè ê bīn-chêng khòng-kò in ê, taⁿ í-keng siū hiat-lo̍h lah.

11In因為羊羔ê血，kap in所干證ê道理，來khah贏伊；雖然到死，亦無疼惜in ê性命。In in-ūi Iûⁿ-ko ê huih, kap in só͘ kan-chèng ê tō-lí, lâi khah-iâⁿ i; sui-jiân kàu sí, ia̍h bô thiàⁿ-sioh in ê sìⁿ-miā.

12所以chiah-ê天kap khiā起tī hit中間ê，lín tio̍h歡喜；但是地kap海有災禍，因為魔鬼已經落到lín hia，有大受氣，因為知伊ê時無jōa久。Só͘-í chiah ê thiⁿ kap khiā-khí tī hit tiong-kan ê, lín tio̍h hoaⁿ-hí; nā-sī tōe kap hái ū chai-ē, in-ūi Mô͘-kúi í-keng lo̍h kàu lín hia, ū tōa siū-khì, in-ūi chai i ê sî bô jōa kú.

13龍看見本身受hiat tī地裡，就khún-tio̍k hit-ê生ta-po͘-kiáⁿ ê婦人人。Lêng khòaⁿ-kìⁿ pún-sin siū hiat tī tōe-ni̍h, chiū khún-tio̍k hit ê siⁿ ta-po͘-kiáⁿ ê hū-jîn-lâng.

14就有大鷹ê兩支翼hō͘婦人人，hō͘伊飛去曠野，到伊ê所在，離開蛇ê面前；tī hia得tio̍h養飼，一期候，koh兩期候，koh半期候。Chiū ū tōa eng ê nn̄g ki si̍t hō͘ hū-jîn-lâng, hō͘ i pe khì khòng-iá, kàu i ê só͘-chāi, lī-khui chôa ê bīn-chêng; tī hia tit-tio̍h iúⁿ-chhī, chi̍t kî-hāu, koh nn̄g kî-hāu, koh pòaⁿ kî-hāu.

15蛇tī婦人人ê後面，tùi伊ê嘴吐出水親像河，beh kā伊流去。Chôa tī hū-jîn-lâng ê āu-bīn, tùi i ê chhùi thò͘-chhut chúi chhin-chhiūⁿ hô, beh kā i lâu-khì.

16地幫贊婦人人；就開嘴吞龍所吐出ê河水。Tōe pang-chān hū-jîn-lâng; chiū khui chhùi thun lêng só͘ thò͘-chhut ê hô-chúi.

17龍受氣婦人人，就去kap婦人人其餘ê後裔交戰，就是守上帝ê誡，有耶穌ê干證ê；Lêng siū-khì hū-jîn-lâng, chiū khì kap hū-jîn-lâng kî-û ê hō͘-è kau-chiàn, chiū-sī siú Siōng-tè ê kài, ū Iâ-so͘ ê kan-chèng ê;

18hit時龍就khiā tī海邊ê沙頂。hit sî lêng chiū khiā tī hái-piⁿ ê soa-téng.

1我koh看見一隻獸，tùi海裡起來，有十支角，七個頭，hiah-ê 角戴十頂王帽；頭殼頂有謗瀆ê名。Góa koh khòaⁿ-kìⁿ chi̍t chiah siù, tùi hái-ni̍h khí-lâi, ū cha̍p ki kak, chhit ê thâu, hiah ê kak tì cha̍p téng ông-bō; thâu-khak téng ū pòng-to̍k ê miâ.

2我所看見ê獸親像豹，伊ê腳親像熊 ê腳，嘴親像獅ê嘴。龍用伊ê才能，伊ê座位，kap大權hō͘伊。Góa só͘ khòaⁿ-kìⁿ ê siù chhin-chhiūⁿ pà, i ê kha chhin-chhiūⁿ hîm ê kha, chhùi chhin-chhiūⁿ sai ê chhùi. Lêng ēng i ê châi-lêng, i ê chō-ūi, kap tōa koân hō͘ i.

3我亦看見hiah-ê頭殼ê一個，親像受thâi到死，伊致到死ê傷得tio̍h醫好；thong世界奇怪來tè hit隻獸；Góa ia̍h khòaⁿ-kìⁿ hiah ê thâu-khak ê chi̍t-ê, chhin-chhiūⁿ siū thâi kàu sí, i tì-kàu sí ê siong tit-tio̍h i-hó; thong sè-kài kî-koài lâi tè hit chiah siù;

4koh拜龍，因為伊bat用權hō͘獸；亦拜獸，講，Chī-chūi親像獸ah？koh 是誰能kap伊交戰ah？koh pài lêng, in-ūi i bat ēng koân hō͘ siù; ia̍h pài siù, kóng, Chī-chūi chhin-chhiūⁿ siù ah? koh chī-chūi ōe kap i kau-chiàn ah?

5Koh有一個嘴hō͘伊，teh講大事kap謗瀆ê話；koh有hō͘伊權來行tāi-chì四十二月日。Koh ū chi̍t ê chhùi hō͘ i, teh kóng tōa sū kap pòng-to̍k ê ōe; koh ū hō͘ i koân lâi kiâⁿ tāi-chì sì-cha̍p-jī ge̍h-ji̍t.

6伊就開嘴，講出謗瀆上帝ê話，來謗瀆伊ê名，kap伊ê會幕，kap hiah-ê tiàm-tī天裡ê。I chiū khui chhùi, kóng-chhut pòng-to̍k Siōng-tè ê ōe, lâi pòng-to̍k I ê miâ, kap I ê hōe-bō͘, kap hiah ê tiàm tī thiⁿ-ni̍h ê.

7Koh有hō͘伊權，thang kap聖徒交戰，來khah贏in；koh有hō͘伊權來治理ta̍k種族，ta̍k號百姓，ta̍k號腔口，ta̍k邦國。Koh ū hō͘ i koân, thang kap sèng-tô͘ kau-chiàn, lâi khah-iâⁿ in; koh ū hō͘ i koân lâi tī-lí ta̍k chióng-cho̍k, ta̍k hō peh-sìⁿ, ta̍k hō khiuⁿ-kháu, ta̍k pang-kok.

8khiā起地面上ê人，in ê名無記tī活命冊ê，lóng beh拜獸；chit-ê冊就是tùi創造世間ê時受thâi ê羊羔ê。Khiā-khí tōe-bīn-chiūⁿ ê lâng, in ê miâ bô kì tī oa̍h-miā chheh ê, lóng beh pài siù; chit ê chheh chiū-sī tùi chhòng-chō sè-kan ê sî siū thâi ê Iûⁿ-ko ê.

9凡若有耳孔ê tio̍h聽。Hoān-nā ū hī-khang ê tio̍h thiaⁿ.

10若有掠人ê，亦beh hō͘人掠；用刀thâi人ê，亦beh受刀thâi；聖徒ê吞忍kap信在tī chit-ê。Nā ū lia̍h lâng ê, ia̍h beh hō͘ lâng lia̍h; ēng to thâi lâng ê, ia̍h beh siū to thâi; sèng-tô͘ ê thun-lún kap sìn chāi-tī chit-ê.

11我koh看見別隻獸 tùi地裡起來，有兩支角親像羊羔，伊ê講話親像龍。Góa koh khòaⁿ-kìⁿ pa̍t chiah siù tùi tōe-ni̍h khí-lâi, ū nn̄g ki kak chhin-chhiūⁿ iûⁿ-ko, i ê kóng ōe chhin-chhiūⁿ lêng.

12Koh將頭一隻獸ê權，lóng行tī伊ê面前。Koh hō͘地kap khiā起地上ê人拜頭一隻獸；就是hit隻tú-tio̍h致到死ê傷，koh得tio̍h醫好ê。Koh chiong thâu-chi̍t chiah siù ê koân, lóng kiâⁿ tī i ê bīn-chêng. Koh hō͘ tōe kap khiā-khí tōe-chiūⁿ ê lâng pài thâu-chi̍t chiah siù; chiū-sī hit chiah tú-tio̍h tì-kàu sí ê siong, koh tit-tio̍h i-hó ê.

13Koh行大神蹟，甚至tī人ê面前hō͘火降落地。Koh kiâⁿ tōa sîn-jiah, sīm-chì tī lâng ê bīn-chêng hō͘ hé kàng-lo̍h tōe.

14Koh tùi伊所得tio̍h行tī獸 ê面前chiah-ê神蹟，來迷惑khiā起地上ê人；kā khiā起地上ê人講，tio̍h kā hit隻tú-tio̍h刀傷猶原活teh ê獸做像。Koh tùi i só͘ tit-tio̍h kiâⁿ tī siù ê bīn-chêng chiah ê sîn-jiah, lâi bê-he̍k khiā-khí tōe-chiūⁿ ê lâng; kā khiā-khí tōe-chiūⁿ ê lâng kóng, tio̍h kā hit chiah tú-tio̍h to siong iû-goân oa̍h-teh ê siù chòe siōng.

15Koh有權hō͘伊thang用活氣入tī獸 ê像；hō͘獸 ê像能講話，亦hō͘見若無拜獸 ê像ê tú-tio̍h thâi。Koh ū koân hō͘ i thang ēng oa̍h-khì ji̍p tī siù ê siōng; hō͘ siù ê siōng ōe kóng ōe, ia̍h hō͘ kìⁿ-nā bô pài siù ê siōng ê tú-tio̍h thâi.

16伊亦hō͘眾人；無論大細，好額sòng-hiong，自由ê，做奴僕ê，lóng受蓋印ê記號，或是tī chiàⁿ手，á是tī頭額。I ia̍h hō͘ chèng lâng; bô lūn tōa sòe, hó-gia̍h sòng-hiong, chū-iû ê, chòe lô͘-po̍k ê, lóng siū khàm-ìn ê kì-hō, he̍k-sī tī chiàⁿ chhiú, á-sī tī thâu-hia̍h.

17人若無hit-ê蓋印ê記號，就是獸 ê名，á是伊ê名數額，就bōe得tio̍h買賣。Lâng nā bô hit ê khàm-ìn ê kì-hō, chiū-sī siù ê miâ, á-sī i ê miâ siàu-gia̍h, chiū bōe tit-tio̍h bóe-bōe.

18知識在tī這；有聰明ê，tio̍h算獸 ê數額；因為是人ê數額；伊ê數額就是六百六十六。Tì-sek chāi-tī che; ū chhang-miâ ê, tio̍h sǹg siù ê siàu-gia̍h; in-ūi sī lâng ê siàu-gia̍h; i ê siàu-gia̍h chiū-sī la̍k-pah la̍k-cha̍p-la̍k.

1我koh看，看見羊羔khiā tī郇山，kap伊tī-teh ê，有十四萬四千人；lóng有羊羔ê名，kap伊ê父ê名，寫tī in ê頭額。Góa koh khòaⁿ, khòaⁿ-kìⁿ Iûⁿ-ko khiā tī Sûn-soaⁿ, kap I tī-teh ê, ū cha̍p-sì-bān sì-chheng lâng; lóng ū Iûⁿ-ko ê miâ, kap I ê Pē ê miâ, siá tī in ê thâu-hia̍h.

2我聽見tùi天有聲，親像chōe-chōe條水ê聲，亦親像雷大tân ê聲；koh我所聽ê聲，有親像彈琴ê teh彈in ê琴：Góa thiaⁿ-kìⁿ tùi thiⁿ ū siaⁿ, chhin-chhiūⁿ chōe-chōe tiâu chúi ê siaⁿ, ia̍h chhin-chhiūⁿ lûi tōa tân ê siaⁿ; koh góa só͘ thiaⁿ ê siaⁿ, ū chhin-chhiūⁿ tôaⁿ khîm ê teh tôaⁿ in ê khîm:

3in tī座位前，亦tī四個活物kap長老ê面前，所吟ê親像新ê詩；hit-ê詩無人能學習，獨獨tùi地上受買出ê十四萬四千人能nā-tiāⁿ。in tī chō-ūi chêng, ia̍h tī sì ê oa̍h mi̍h kap tiúⁿ-ló ê bīn-chêng, só͘ gîm ê chhin-chhiūⁿ sin ê si; hit ê si bô lâng ōe ha̍k-si̍p, to̍k-to̍k tùi tōe-chiūⁿ siū bóe chhut ê cha̍p-sì-bān sì-chheng lâng ōe nā-tiāⁿ.

4Chiah-ê人是m̄-bat bak-tio̍h女色ê，是貞潔ê人；chiah-ê人是tè羊羔，無論tá-lo̍h去；chiah-ê人是tùi人ê中間受買出，做起頭熟ê果子，獻hō͘上帝kap羊羔ê。Chiah ê lâng sī m̄ bat bak-tio̍h lú-sek ê, sī cheng-kiat ê lâng; chiah ê lâng sī tè Iûⁿ-ko, bô lūn tá-lo̍h khì; chiah ê lâng sī tùi lâng ê tiong-kan siū bóe chhut, chòe khí-thâu se̍k ê ké-chí, hiàn hō͘ Siōng-tè kap Iûⁿ-ko ê.

5In ê嘴無白賊，in是無瑕疵ê。In ê chhùi bô pe̍h-chha̍t, in sī bô hâ-chhû ê.

6我koh看見別個天使，飛tī天中；有永遠ê福音thang傳hō͘ tiàm-tī地裡ê人；亦hō͘ ta̍k邦國，ta̍k種族，ta̍k號腔口，ta̍k樣百姓；Góa koh khòaⁿ-kìⁿ pa̍t ê thiⁿ-sài, pe tī thiⁿ-tiong; ū éng-oán ê hok-im thang thoân hō͘ tiàm tī tōe-ni̍h ê lâng; ia̍h hō͘ ta̍k pang-kok, ta̍k chióng-cho̍k, ta̍k hō khiuⁿ-kháu, ta̍k iūⁿ peh-sìⁿ;

7伊大聲講，Tio̍h敬畏上帝，將榮光歸hō͘伊，因為伊審判ê時到lah；亦tio̍h拜hit-ê創造天、地、海，以及chiah-ê水泉ê。i tōa siaⁿ kóng, Tio̍h kèng-ùi Siōng-tè, chiong êng-kng kui hō͘ I, in-ūi I sím-phòaⁿ ê sî kàu lah; ia̍h tio̍h pài hit ê chhòng-chō thiⁿ, tōe, hái, í-ki̍p chiah ê chúi-chôaⁿ ê.

8Koh有別個天使，是第二個，tè tī後面講，倒壞ah，倒壞ah，大ê巴比倫，就是hō͘萬邦lim伊淫亂惹tio̍h受氣ê酒ê。Koh ū pa̍t ê thiⁿ-sài, sī tē jī ê, tè tī āu-bīn kóng, Tó-hoāi ah, tó-hoāi ah, tōa ê Pa-pí-lûn, chiū-sī hō͘ bān pang lim i îm-loān jiá-tio̍h siū-khì ê chiú ê.

9Koh有別個天使，第三個，tè in，大聲講，若有拜獸kap伊ê像，以及受蓋印ê記號tī頭額á是tī伊ê手裡ê，Koh ū pa̍t ê thiⁿ-sài, tē saⁿ ê, tè in, tōa siaⁿ kóng, Nā ū pài siù kap i ê siōng, í-ki̍p siū khàm-ìn ê kì-hō tī thâu-hia̍h á-sī tī i ê chhiú-ni̍h ê,

10伊也beh lim上帝大受氣ê酒，就是無透ê，thîn tī伊受氣ê酒杯；koh beh tī聖天使ê面前kap羊羔ê面前受tio̍h火kap琉磺ê苦楚。i iā beh lim Siōng-tè tōa siū-khì ê chiú, chiū-sī bô thàu ê, thîn tī I siū-khì ê chiú-poe; koh beh tī sèng thiⁿ-sài ê bīn-chêng kap Iûⁿ-ko ê bīn-chêng siū-tio̍h hé kap jiû-n̂g ê khó͘-chhó͘.

11In受苦楚ê 煙chhèng上高，代代無soah。Koh拜獸kap伊ê像，以及受伊ê名蓋印ê記號ê，日暝無thang得tio̍h安歇。In siū khó͘-chhó͘ ê ian chhèng chiūⁿ koâiⁿ, tāi-tāi bô soah. Koh pài siù kap i ê siōng, í-ki̍p siū i ê miâ khàm-ìn ê kì-hō ê, ji̍t-mî bô thang tit-tio̍h an-hioh.

12聖徒ê吞忍是在tī chit-ê；這就是守上帝ê誡kap守耶穌ê信ê。Sèng-tô͘ ê thun-lún sī chāi-tī chit-ê; che chiū-sī siú Siōng-tè ê kài kap siú Iâ-so͘ ê sìn ê.

13我聽見tùi天有聲講，你tio̍h寫伊，Taⁿ以後tī主來死ê死人有福氣；聖神講，是lah，hō͘ in soah in ê tio̍h磨來安歇，in所做ê工也tè in。Góa thiaⁿ-kìⁿ tùi thiⁿ ū siaⁿ kóng, Lí tio̍h siá i, Taⁿ í-āu tī Chú lâi sí ê sí-lâng ū hok-khì; Sèng Sîn kóng, Sī lah, hō͘ in soah in ê tio̍h-bôa lâi an-hioh, in só͘ chòe ê kang iā tè in.

14我koh看，看見有白ê雲，有親像人子ê坐tī雲ê頂面，頭殼戴金ê冕旒，手kia̍h利ê 鍥(koeh)á。Góa koh khòaⁿ, khòaⁿ-kìⁿ ū pe̍h ê hûn, ū chhin-chhiūⁿ Jîn-chú ê chē tī hûn ê téng-bīn, thâu-khak tì kim ê bián-liû, chhiú kia̍h lāi ê koeh-á.

15Koh有別個天使tùi殿裡出來，tùi hit-ê坐tī雲ê頂面ê大聲叫講，Tio̍h伸出你ê鍥á來割；因為收割ê時已經到；是地上ê五穀已經熟lah。Koh ū pa̍t ê thiⁿ-sài tùi tiān-ni̍h chhut-lâi, tùi hit ê chē tī hûn ê téng-bīn ê tōa siaⁿ kiò kóng, Tio̍h chhun-chhut lí ê koeh-á lâi koah; in-ūi siu-koah ê sî í-keng kàu; sī tōe-chiūⁿ ê ngó͘-kok í-keng se̍k lah.

16坐tī雲裡ê就hiat伊ê鍥á tī地裡；地上ê五穀就收割。Chē tī hûn-ni̍h ê chiū hiat I ê koeh-á tī tōe-ni̍h; tōe-chiūⁿ ê ngó͘-kok chiū siu-koah.

17Koh有別個天使tùi天裡ê殿出來，伊也kia̍h利ê鍥á。Koh ū pa̍t ê thiⁿ-sài tùi thiⁿ-ni̍h ê tiān chhut-lâi, i iā kia̍h lāi ê koeh-á.

18Koh有別個天使tùi祭壇出來，就是有權thang治理火ê，大聲tùi kia̍h利鍥á ê叫講，伸出你利ê鍥á，收地上kui球ê葡萄，因為葡萄到水lah。Koh ū pa̍t ê thiⁿ-sài tùi chè-tôaⁿ chhut-lâi, chiū-sī ū koân thang tī-lí hé ê, tōa siaⁿ tùi kia̍h lāi koeh-á ê kiò kóng, Chhun-chhut lí lāi ê koeh-á, siu tōe-chiūⁿ kui kiû ê phû-tô, in-ūi phû-tô kàu-chúi lah.

19天使就hiat伊ê Koeh-á tī地裡，來siu地上ê葡萄，hiat落上帝大受氣ê酒窟。Thiⁿ-sài chiū hiat i ê koeh-á tī tōe-ni̍h, lâi siu tōe-chiūⁿ ê phû-tô, hiat-lo̍h Siōng-tè tōa siū-khì ê chiú-khut.

20Hit-ê酒窟tī城外受踏，就有血tùi酒窟出，高到tú-tio̍h馬咬韁，遠約略六百里。Hit ê chiú-khut tī siâⁿ-gōa siū ta̍h, chiū ū huih tùi chiú-khut chhut, koâiⁿ kàu tú-tio̍h bé-kā-kiuⁿ, hn̄g iok-lio̍k la̍k-pah lí.