1我聽見有大聲tùi殿裡出，kā七個天使講，Lín去，將hiah-ê tóe上帝大受氣ê七個碗，piàⁿ tī地裡。Góa thiaⁿ-kìⁿ ū tōa siaⁿ tùi tiān-ni̍h chhut, kā chhit ê thiⁿ-sài kóng, Lín khì, chiong hiah ê tóe Siōng-tè tōa siū-khì ê chhit ê óaⁿ, piàⁿ tī tōe-ni̍h.

2頭一個就去，將伊ê碗piàⁿ tī地裡；就有惡毒ê 瘡生tī hiah-ê有獸 ê記號ê，kap拜伊ê像ê。Thâu-chi̍t ê chiū khì, chiong i ê óaⁿ piàⁿ tī tōe-ni̍h; chiū ū ok-to̍k ê chhng siⁿ tī hiah ê ū siù ê kì-hō ê, kap pài i ê siōng ê.

3第二個將伊ê碗piàⁿ tī海裡；海就變做親像死人ê血，海中ê活物一盡死。Tē jī ê chiong i ê óaⁿ piàⁿ tī hái-ni̍h; hái chiū pìⁿ chòe chhin-chhiūⁿ sí-lâng ê huih, hái-tiong ê oa̍h mi̍h it-chīn sí.

4第三個將伊ê碗piàⁿ tī江河kap chiah-ê水泉；水就變做血。Tē saⁿ ê chiong i ê óaⁿ piàⁿ tī kang-hô kap chiah ê chúi chôaⁿ; chúi chiū pìⁿ chòe huih.

5我聽見掌chiah-ê水ê天使講，現在tī-teh，早tī-teh，聖ê ah，你是公義，因為你án-ni審判。Góa thiaⁿ-kìⁿ chiáng chiah ê chúi ê thiⁿ-sài kóng, Hiān-chāi tī-teh, chá tī-teh, sèng ê ah, lí sī kong-gī, in-ūi lí án-ni sím-phòaⁿ.

6因為in bat流聖徒kap先知ê血；taⁿ你用血hō͘ in lim，是in所應該ê。In-ūi in bat lâu sèng-tô͘ kap sian-ti ê huih; taⁿ lí ēng huih hō͘ in lim, sī in só͘ eng-kai ê.

7我koh聽見祭壇teh講，主上帝，全能ê ah，是ah；你ê審判是真實koh公義。Góa koh thiaⁿ-kìⁿ chè-tôaⁿ teh kóng, Chú Siōng-tè, choân-lêng ê ah, sī ah; lí ê sím-phòaⁿ sī chin-si̍t koh kong-gī.

8第四個將伊ê碗piàⁿ tī日頭；就hō͘日頭會用火pek人。Tē sì ê chiong i ê óaⁿ piàⁿ tī ji̍t-thâu; chiū hō͘ ji̍t-thâu ōe ēng hé pek lâng.

9人受大ê炎熱所pek，就謗瀆hit-ê有權teh掌理chiah-ê災禍ê上帝ê名，koh無反悔來歸榮光伊。Lâng siū tōa ê iām-jia̍t só͘ pek, chiū pòng-to̍k hit ê ū koân teh chiáng-lí chiah ê chai-ē ê Siōng-tè ê miâ, koh bô hoán-hóe lâi kui êng-kng I.

10第五個將伊ê碗piàⁿ tī獸 ê座位；獸 ê國隨時烏暗。Tē gō͘ ê chiong i ê óaⁿ piàⁿ tī siù ê chō-ūi; siù ê kok sûi-sî o͘-àm.

11人因為艱苦就kā in ê舌；koh因為in ê艱苦kap in ê瘡毒，就謗瀆天裡ê上帝，也無反悔in ê所行。Lâng in-ūi kan-khó͘ chiū kā in ê chi̍h; koh in-ūi in ê kan-khó͘ kap in ê chhng-to̍k, chiū pòng-to̍k thiⁿ-ni̍h ê Siōng-tè, iā bô hoán-hóe in ê só͘ kiâⁿ.

12第六個將伊ê碗piàⁿ tī Pek-lat大河；伊ê水liâm-piⁿ乾去，beh為tio̍h東方ê列王來備辦路。Tē la̍k ê chiong i ê óaⁿ piàⁿ tī Pek-lat tōa hô; i ê chúi liâm-piⁿ ta-khì, beh ūi-tio̍h tang-hng ê lia̍t-ông lâi pī-pān lō͘.

13我koh看見有三個污穢ê神，親像田蛙á tùi龍ê嘴，kap獸 ê嘴，kap假先知ê嘴出來。Góa koh khòaⁿ-kìⁿ ū saⁿ ê ù-òe ê sîn, chhin-chhiūⁿ chhân-kap-á tùi lêng ê chhùi, kap siù ê chhùi, kap ké sian-ti ê chhùi chhut-lâi.

14In就是chiah-ê幾個神，能行神蹟ê，出來就近普天下ê王，招集in tī全能上帝ê大日期ê交戰。In chiū-sī chiah ê kúi ê sîn, ōe kiâⁿ sîn-jiah ê, chhut-lâi chiū-kūn phó͘-thiⁿ-ē ê ông, chio-chi̍p in tī choân-lêng Siōng-tè ê tōa ji̍t-kî ê kau-chiàn.

15(你看，我來親像賊；警醒來顧守伊ê相，免得thǹg-theh來行，hō͘人看見伊ê見笑ê，就有福氣。)(Lí khòaⁿ, góa lâi chhin-chhiūⁿ chha̍t; kéng-séng lâi kò͘-siú i ê saⁿ, bián-tit thǹg-theh lâi kiâⁿ, hō͘ lâng khòaⁿ-kìⁿ i ê kiàn-siàu ê, chiū ū hok-khì.)

16Hit三個就招集列王tī一個所在，希伯來ê音叫做A-má-ge̍k-tùn。Hit saⁿ ê chiū chio-chi̍p lia̍t-ông tī chi̍t ê só͘-chāi, Hi-pek-lâi ê im kiò chòe A-má-ge̍k-tùn.

17第七個將伊ê碗piàⁿ tī空氣；就有大聲tùi殿內tùi座位出，講，成lah。Tē chhit ê chiong i ê óaⁿ piàⁿ tī khong-khì; chiū ū tōa siaⁿ tùi tiān-lāi tùi chō-ūi chhut, kóng, Chiâⁿ lah.

18就有sih-nà，有聲，有雷 tân，地亦大振動，tùi地上有人到taⁿ，未有地動親像án-ni ê大。Chiū ū sih-nà, ū siaⁿ, ū lûi tân, tōe ia̍h tōa tín-tāng, tùi tōe-chiūⁿ ū lâng kàu taⁿ, bē ū tōe-tāng chhin-chhiūⁿ án-ni ê tōa.

19大城就裂做三個，列邦chiah-ê城亦倒壞；上帝亦記得大城巴比倫，就將杯tóe伊極大受氣ê酒hō͘伊。Tōa siâⁿ chiū li̍h chòe saⁿ ê, lia̍t-pang chiah ê siâⁿ ia̍h tó-hoāi; Siōng-tè ia̍h kì-tit tōa siâⁿ Pa-pí-lûn, chiū chiong poe tóe I ke̍k tōa siū-khì ê chiú hō͘ i.

20Ta̍k-ê海嶼lóng逃走，chiah-ê山lóng無去。Ta̍k ê hái-sū lóng tô-cháu, chiah ê soaⁿ lóng bô-khì.

21Koh有大雹tùi天降落tī人，ta̍k粒重kúi-nā十斤；人因為雹ê災禍，就謗瀆上帝，因為hit-ê災禍真大。Koh ū tōa phauh tùi thiⁿ kàng-lo̍h tī lâng, ta̍k lia̍p tāng kúi-nā cha̍p kun; lâng in-ūi phauh ê chai-ē, chiū pòng-to̍k Siōng-tè, in-ūi hit ê chai-ē chin tōa.

1Hiah-ê the̍h七塊碗ê七個天使，其中一個來kap我講話，講，來，我beh將hit-ê坐tī chōe-chōe條水ê大淫婦所beh受ê審判hō͘你看；Hiah ê the̍h chhit tè óaⁿ ê chhit ê thiⁿ-sài, kî-tiong chi̍t-ê lâi kap góa kóng ōe, kóng, Lâi, góa beh chiong hit ê chē tī chōe-chōe tiâu chúi ê tōa îm-hū só͘ beh siū ê sím-phòaⁿ hō͘ lí khòaⁿ;

2地上chiah-ê王bat kap伊行淫；khiā起地上ê人，已經tùi伊淫亂ê酒來醉。tōe-chiūⁿ chiah ê ông bat kap i kiâⁿ-îm; khiā-khí tōe-chiūⁿ ê lâng, í-keng tùi i îm-loān ê chiú lâi chùi.

3我受神ê感動，hō͘天使chhōa我去曠野；我就看見有婦人人騎朱紅色ê獸；hit隻獸遍身有謗瀆ê名，有七個頭，十支角。Góa siū Sîn ê kám-tōng, hō͘ thiⁿ-sài chhōa góa khì khòng-iá; góa chiū khòaⁿ-kìⁿ ū hū-jîn-lâng khiâ chu-âng sek ê siù; hit chiah siù piàn-sin ū pòng-to̍k ê miâ, ū chhit ê thâu, cha̍p ki kak.

4婦人人穿紫色kap朱紅色ê衫，用金、寶石、珍珠來裝飾；手裡有金ê杯，tóe chiah-ê可惡ê物，以及伊淫亂ê污穢滿滿。Hū-jîn-lâng chhēng chí-sek kap chu-âng sek ê saⁿ, ēng kim, pó-chio̍h, chin-chu lâi chng-thāⁿ; chhiú-ni̍h ū kim ê poe, tóe chiah ê khó-ò͘ⁿ ê mi̍h, í-ki̍p i îm-loān ê ù-òe móa-móa.

5有名寫tī伊頭額，講，奧妙，大ê巴比倫，就是地上chiah-ê淫婦kap chiah-ê可惡ê物ê老母。Ū miâ siá tī i thâu-hia̍h, kóng, Ò-biāu, tōa ê Pa-pí-lûn, chiū-sī tōe-chiūⁿ chiah ê îm-hū kap chiah ê khó-ò͘ⁿ ê mi̍h ê lāu-bú.

6Koh看見一個婦人人lim聖徒ê血，以及干證耶穌ê ê血到醉；我看見，就大奇怪。Koh khòaⁿ-kìⁿ chi̍t ê hū-jîn-lâng lim sèng-tô͘ ê huih, í-ki̍p kan-chèng Iâ-so͘ ê ê huih kàu chùi; góa khòaⁿ-kìⁿ, chiū tōa kî-koài.

7天使kā我講，你啥事奇怪？我beh將婦人人kap伊所騎七個頭殼十支角ê獸 ê奧妙，kā你講。Thiⁿ-sài kā góa kóng, Lí siáⁿ-sū kî-koài? góa beh chiong hū-jîn-lâng kap i só͘ khiâ chhit ê thâu-khak cha̍p ki kak ê siù ê ò-biāu, kā lí kóng.

8你所看見ê獸，早有，taⁿ無，後來beh tùi深淵起來，就歸tī沉淪；khiā起tī地上ê人，in ê名tùi創造世間ê時無記tī活命ê冊ê，看見hit隻獸，早有，taⁿ無，亦beh koh tī-teh，就beh奇怪。Lí só͘ khòaⁿ-kìⁿ ê siù, chá ū, taⁿ bô, āu-lâi beh tùi chhim-ian khí-lâi, chiū kui tī tîm-lûn; khiā-khí tī tōe-chiūⁿ ê lâng, in ê miâ tùi chhòng-chō sè-kan ê sî bô kì tī oa̍h-miā ê chheh ê, khòaⁿ-kìⁿ hit chiah siù, chá ū, taⁿ bô, ia̍h beh koh tī-teh, chiū beh kî-koài.

9有智慧ê心在tī chit-ê。七個頭殼是七座山，就是婦人人所坐tī hit頂面ê。Ū tì-hūi ê sim chāi-tī chit-ê. Chhit ê thâu-khak sī chhit chō soaⁿ, chiū-sī hū-jîn-lâng só͘ chē tī hit téng-bīn ê.

10koh是七個王；五ê已經倒，一個現在tī-teh，一個猶未到；伊若到，就的確暫時tī-teh。Koh sī chhit ê ông; gō͘-ê í-keng tó, chi̍t-ê hiān-chāi tī-teh, chi̍t-ê iáu-bē kàu; i nā kàu, chiū tek-khak chiām-sî tī-teh.

11Hit-ê早有，現在無ê獸就是第八個，也是hit七個在內，也歸tī沉淪。Hit ê chá ū, hiān-chāi bô ê siù chiū-sī tē poeh ê, iā sī hit chhit ê chāi-lāi, iā kui tī tîm-lûn.

12你所看見十支角就是十個王，未bat得tio̍h國ê，獨獨beh kap獸saⁿ-kap得tio̍h權親像王半時久。Lí só͘ khòaⁿ-kìⁿ cha̍p ki kak chiū-sī cha̍p ê ông, bē bat tit-tio̍h kok ê, to̍k-to̍k beh kap siù saⁿ-kap tit-tio̍h koân chhin-chhiūⁿ ông pòaⁿ sî kú.

13In lóng同意思將家己ê才能kap權柄hō͘獸。In lóng tâng ì-sù chiong ka-kī ê châi-lêng kap koân-pèng hō͘ siù.

14In beh kap羊羔交戰，羊羔beh khah贏in，因為伊是萬主ê主，萬王ê王；kap伊tī-teh ê也beh khah贏，因為in是受召，受揀，忠信ê人。In beh kap Iûⁿ-ko kau-chiàn, Iûⁿ-ko beh khah-iâⁿ in, in-ūi I sī bān chú ê Chú, bān ông ê Ông; kap I tī-teh ê iā beh khah-iâⁿ, in-ūi in sī siū tiàu, siū kéng, tiong-sìn ê lâng.

15天使koh kā我講，你所看見lóng總ê水，淫婦所坐ê，就是chiah-ê百姓，chiah-ê眾人，chiah-ê邦國，chiah-ê腔口。Thiⁿ-sài koh kā góa kóng, Lí só͘ khòaⁿ-kìⁿ lóng-chóng ê chúi, îm-hū só͘ chē ê, chiū-sī chiah ê peh-sìⁿ, chiah ê chèng lâng, chiah ê pang-kok, chiah ê khiuⁿ-kháu.

16Koh你所看見ê hit十支角，kap hit隻獸，beh怨恨chit-ê淫婦，也beh hō͘伊冷靜thǹg-theh，koh beh食伊ê肉，用火一盡燒伊。Koh lí só͘ khòaⁿ-kìⁿ ê hit cha̍p ki kak, kap hit chiah siù, beh oàn-hūn chit ê îm-hū, iā beh hō͘ i léng-chēng thǹg-theh, koh beh chia̍h i ê bah, ēng hé it-chīn sio i.

17因為上帝bat hō͘ in有chit號心來成伊ê旨意，koh同心將in ê國hō͘獸，thèng候上帝ê話應驗。In -ūi Siōng-tè bat hō͘ in ū chit hō sim lâi chiâⁿ I ê chí-ì, koh tâng-sim chiong in ê kok hō͘ siù, thèng-hāu Siōng-tè ê ōe èng-giām.

18你所看見ê婦人人就是hit-ê teh管理地上列王ê大城。Lí só͘ khòaⁿ-kìⁿ ê hū-jîn-lâng chiū-sī hit ê teh koán-lí tōe-chiūⁿ lia̍t-ông ê tōa siâⁿ.

1Chiah-ê tāi-chì了後，我看見別個天使tùi天落來，有大權柄；地上tùi伊ê榮光來光。Chiah ê tāi-chì liáu-āu góa khòaⁿ-kìⁿ pa̍t ê thiⁿ-sài tùi thiⁿ lo̍h-lâi, ū tōa koân-pèng; tōe-chiūⁿ tùi i ê êng-kng lâi kng.

2伊大聲叫講，大ê巴比倫倒壞lah，倒壞lah；taⁿ成做鬼khiā起ê所在，kap lóng總污穢ê神ê監牢，以及lóng總無清氣可惡ê鳥ê鳥籠。I tōa siaⁿ kiò kóng, Tōa ê Pa-pí-lûn tó-hoāi lah, tó-hoāi lah; taⁿ chiâⁿ-chòe kúi khiā-khí ê só͘-chāi, kap lóng-chóng ù-òe ê sîn ê kaⁿ-lô, í-ki̍p lóng-chóng bô chheng-khì khó-ò͘ⁿ ê chiáu ê chiáu-láng.

3因為萬邦tùi伊淫亂惹tio̍h受氣ê酒來倒壞，地上chiah-ê王bat kap伊行姦淫，地上chiah-ê seng-lí人已經tùi伊ê奢華到極，致到好額。In-ūi bān pang tùi i îm-loān jiá-tio̍h siū-khì ê chiú lâi tó-hoāi, tōe-chiūⁿ chiah ê ông bat kap i kiâⁿ kan-îm, tōe-chiūⁿ chiah ê seng-lí lâng í-keng tùi i ê chhia-hôa kàu ke̍k, tì-kàu hó-gia̍h.

4我koh聽見tùi天有別個聲講，我ê百姓ah，tio̍h tùi hia出來，免得有份伊ê罪，也免得受伊ê災禍。Góa koh thiaⁿ-kìⁿ tùi thiⁿ ū pa̍t ê siaⁿ kóng, Góa ê peh-sìⁿ ah, tio̍h tùi hia chhut-lâi, bián-tit ū hūn i ê chōe, iā bián-tit siū i ê chai-ē.

5因為伊ê罪抵天；伊ta̍k號ê不義上帝記得。In-ūi i ê chōe tú thiⁿ; i ta̍k hō ê put-gī Siōng-tè kì-tit.

6Tio̍h照伊款待人ê來款待伊；照伊ê所行加倍報應伊；tī伊所調和ê杯，taⁿ也加倍調和來hō͘伊。Tio̍h chiàu i khoán-thāi lâng ê lâi khoán-thāi i; chiàu i ê só͘ kiâⁿ ka-pē pò-èng i; tī i só͘ tiau-hô ê poe, taⁿ iā ka-pē tiau-hô lâi hō͘ i.

7伊bat怎樣榮光家己來奢華，taⁿ hō͘伊艱苦悲哀也照án-ni。因為伊心內講，我是坐teh做王，並m̄是寡婦，決斷bōe tú-tio̍h悲哀。I bat cháiⁿ-iūⁿ êng-kng ka-kī lâi chhia-hôa, taⁿ hō͘ i kan-khó͘ pi-ai iā chiàu án-ni. In-ūi i sim-lāi kóng, Góa sī chē-teh chòe ông, pēng m̄ sī kóaⁿ-hū, koat-toàn bōe tú-tio̍h pi-ai.

8所以一日ê中間伊ê災禍lóng beh到，就是死無、悲哀、飢荒，伊也beh hō͘火燒lio去，因為審判伊ê主上帝就是大氣力ê。Só͘-í chi̍t ji̍t ê tiong-kan i ê chai-ē lóng beh kàu, chiū-sī sí-bô, pi-ai, ki-hng, i iā beh hō͘ hé sio-lio-khì, in-ūi sím-phòaⁿ i ê Chú Siōng-tè chiū-sī tōa khùi-la̍t ê.

9地上chiah-ê王平素kap伊行姦淫來奢華ê，看見燒伊ê煙，就為tio̍h伊悲傷啼哭，Tōe-chiūⁿ chiah ê ông pêng-sò͘ kap i kiâⁿ kan-îm lâi chhia-hôa ê, khòaⁿ-kìⁿ sio i ê ian, chiū ūi-tio̍h i pi-siong thî-khàu,

10因為驚伊ê艱苦就遠遠khiā-teh講，慘ah，慘ah，大城巴比倫，堅固ê城ah，因為一時間你ê審判到lah。in-ūi kiaⁿ i ê kan-khó͘ chiū hn̄g-hn̄g khiā-teh kóng, Chhám ah, chhám ah, tōa siâⁿ Pa-pí-lûn, kian-kò͘ ê siâⁿ ah, in-ūi it-sî-kan lí ê sím-phòaⁿ kàu lah.

11地上chiah-ê seng-lí人也為tio̍h伊悲傷哀慘，因為無人koh 買in ê貨，Tōe-chiūⁿ chiah ê seng-lí lâng iā ūi-tio̍h i pi-siong ai-chhám, in-ūi bô lâng koh bóe in ê hè,

12就是金、銀、寶石、珍珠、幼葛(koah)、紫色、絲綢、朱紅，chiah-ê貨；kap ta̍k號ê香柴，ta̍k號象牙ê器具，ta̍k號貴氣ê柴、銅、鐵、白石ê器具，chiū-sī kim, gûn, pó-chio̍h, chin-chu, iù-koah, chí-sek, si-tiû, chu-âng, chiah ê hè; kap ta̍k hō ê hiuⁿ-chhâ, ta̍k hō chhiūⁿ-gê ê khì-kū, ta̍k hō kùi-khì ê chhâ, tâng, thih, pe̍h-chio̍h ê khì-kū,

13也有肉桂、豆寇、香料、香油、乳香、酒、油、幼麵、麥、牛、羊、馬、車、奴僕，以及人ê靈魂。iā ū jio̍k-kùi, tō͘-khò͘, hiuⁿ-liāu, hiuⁿ-iû, jú-hiuⁿ, chiú, iû, iù-mī, be̍h, gû, iûⁿ, bé, chhia, lô͘-po̍k, í-ki̍p lâng ê lêng-hûn.

14你ê心所意愛ê果子已經離開你，你ê好食kap好看ê物lóng無去，決斷無koh看見。Lí ê sim só͘ ì-ài ê ké-chí í-keng lī-khui lí, lí ê hó-chia̍h kap hó-khòaⁿ ê mi̍h lóng bô-khì, koat-toàn bô koh khòaⁿ-kìⁿ.

15做chiah-ê物ê seng-lí人，tùi伊得tio̍h好額ê，因為驚伊ê艱苦beh遠遠khiā，Chòe chiah ê mi̍h ê seng-lí lâng, tùi i tit-tio̍h hó-gia̍h ê, in-ūi kiaⁿ i ê kan-khó͘ beh hn̄g-hn̄g khiā,

16悲傷哀慘，講，慘ah，慘ah，chit-ê大城，平素穿幼葛、紫色、朱紅色ê衫，用金、寶石、珍珠裝飾ê，pi-siong ai-chhám, kóng, Chhám ah, chhám ah, chit ê tōa siâⁿ, pêng-sò͘ chhēng iù-koah, chí-sek, chu-âng-sek ê saⁿ, ēng kim, pó-chio̍h, chin-chu chng-thāⁿ ê,

17因為一時間到 hiah大ê好額變做荒廢。Ta̍k-ê舵(tāi)工，kap搭船去ta̍k所在ê，kap水手，連tī海裡thàn食ê，lóng遠遠teh khiā，in-ūi it-sî-kan kàu hiah tōa ê hó-gia̍h pìⁿ chòe hong-hòe. Ta̍k ê tāi-kong, kap tah chûn khì ta̍k só͘-chāi ê, kap chúi-siú, liân tī hái-ni̍h thàn chia̍h ê, lóng hn̄g-hn̄g teh khiā,

18看見燒伊ê煙，就喉叫，講，Tá-lo̍h一個城親像chit-ê大城ah？khòaⁿ-kìⁿ sio i ê ian, chiū âu-kiò, kóng, Tá-lo̍h chi̍t ê siâⁿ chhin-chhiūⁿ chit ê tōa siâⁿ ah?

19Koh用塵埃sám頭殼，悲傷哀慘喉叫，講，慘ah，慘ah，chit-ê大城，凡有船tī海裡ê lóng tùi伊ê豐盛來致到好額，因為一時間成做荒廢。Koh ēng tîn-ai sám thâu-khak, pi-siong ai-chhám âu-kiò, kóng, Chhám ah, chhám ah, chit ê tōa siâⁿ, hoān ū chûn tī hái-ni̍h ê lóng tùi i ê hong-sēng lâi tì-kàu hó-gia̍h, in-ūi it-sî-kan chiâⁿ-chòe hong-hòe.

20天ah，chiah-ê聖徒kap先知ah，lín thang因為伊來歡喜；因為上帝將lín所受ê審判來審判伊。Thiⁿ ah, chiah ê sèng-tô͘ kap sian-ti ah, lín thang in-ūi i lâi hoaⁿ-hí; in-ūi Siōng-tè chiong lín só͘ siū ê sím-phòaⁿ lâi sím-phòaⁿ i.

21有一個大氣力ê天使giâ石親像大ê石磨，hiat伊tī海裡，講，巴比倫大城也beh親像án-ni大沉受hiat落，決斷bōe koh看見。Ū chi̍t ê tōa khùi-la̍t ê thiⁿ-sài giâ chio̍h chhin-chhiūⁿ tōa ê chio̍h-bō, hiat i tī hái-ni̍h, kóng, Pa-pí-lûn tōa siâⁿ iā beh chhin-chhiūⁿ án-ni tōa-tîm siū hiat-lo̍h, koat-toàn bōe koh khòaⁿ-kìⁿ.

22彈琴、作樂、pûn簫，pûn號頭ê聲音決斷無koh聽見tī你ê中間；ta̍k樣工藝ê師傅決斷無koh看見tī你ê中間，挨磨ê聲決斷無koh聽見tī你ê中間；Tôaⁿ khîm, chok-ga̍k, pûn siau, pûn hō-thâu ê siaⁿ-im koat-toàn bô koh thiaⁿ-kìⁿ tī lí ê tiong-kan; ta̍k iūⁿ kang-gē ê sai-hū koat-toàn bô koh khòaⁿ-kìⁿ tī lí ê tiong-kan, oe bō ê siaⁿ koat-toàn bô koh thiaⁿ-kìⁿ tī lí ê tiong-kan;

23燈ê光決斷無koh照tī你ê中間；新kiáⁿ婿kap新娘ê聲決斷無koh聽見tī你ê中間。因為你ê seng-lí人平素做地上ê尊貴ê；萬國也對你ê邪術來受迷惑。teng ê kng koat-toàn bô koh chiò tī lí ê tiong-kan; sin-kiáⁿ-sài kap sin-niû ê siaⁿ koat-toàn bô koh thiaⁿ-kìⁿ tī lí ê tiong-kan. In-ūi lí ê seng-lí lâng pêng-sò͘ chòe tōe-chiūⁿ ê chun-kùi ê; bān kok iā tùi lí ê siâ-su̍t lâi siū bê-he̍k.

24Koh先知kap聖徒kap地上一切受thâi ê人ê血lóng tī chit-ê城chhē-tio̍h。Koh sian-ti kap sèng-tô͘ kap tōe-chiūⁿ it-chhè siū thâi ê lâng ê huih lóng tī chit ê siâⁿ chhē-tio̍h.