1Chiah-ê tāi-chì了後，我聽見tī天裡有親像kui大陣人ê大聲講，A-lī-lū-iâ；拯救、榮光、權能lóng是咱ê上帝ê；Chiah ê tāi-chì liáu-āu, góa thiaⁿ-kìⁿ tī thiⁿ-ni̍h ū chhin-chhiūⁿ kui tōa tīn lâng ê tōa siaⁿ kóng, A-lī-lū-iâ; chín-kiù, êng-kng, koân-lêng lóng sī lán ê Siōng-tè ê;

2是伊ê審判真實koh公義；因為伊bat審判hit-ê大淫婦，就是用伊ê淫亂敗壞地上ê；koh tùi伊討流伊ê奴僕ê血ê罪，來伸in ê冤。sī I ê sím-phòaⁿ chin-si̍t koh kong-gī; in-ūi I bat sím-phòaⁿ hit ê tōa îm-hū, chiū-sī ēng i ê îm-loān pāi-hoāi tōe-chiūⁿ ê; koh tùi i thó lâu I ê lô͘-po̍k ê huih ê chōe, lâi sin in ê oan.

3In koh再講，A-lī-lū-iâ。燒伊ê煙chhèng上高，到代代無盡。In koh-chài kóng, A-lī-lū-iâ. Sio i ê ian chhèng chiūⁿ koâiⁿ, kàu tāi-tāi bô chīn.

4Hit二十四個長老kap四個活物，仆落敬拜坐tī座位ê上帝講，À-bēng，A-lī-lū-iâ。Hit jī-cha̍p-sì ê tiúⁿ-ló kap sì ê oa̍h mi̍h phak-lo̍h kèng-pài chē tī chō-ūi ê Siōng-tè kóng, À-bēng, A-lī-lū-iâ.

5有聲tùi座位出來講，凡若lín做咱ê上帝ê奴僕，來敬畏伊ê，無論大細lóng tio̍h o-ló伊。Ū siaⁿ tùi chō-ūi chhut-lâi kóng, Hoān-nā lín chòe lán ê Siōng-tè ê lô͘-po̍k, lâi kèng-ùi I ê, bô lūn tōa sòe lóng tio̍h o-ló I.

6我聽見有親像kui大陣人ê聲，親像chōe-chōe條水ê聲，親像雷大tân ê聲，講，A-lī-lū-iâ；因為主，咱ê上帝全能ê，做王lah。Góa thiaⁿ-kìⁿ ū chhin-chhiūⁿ kui tōa tīn lâng ê siaⁿ, chhin-chhiūⁿ chōe-chōe tiâu chúi ê siaⁿ, chhin-chhiūⁿ lûi tōa tân ê siaⁿ, kóng, A-lī-lū-iâ; in-ūi Chú, lán ê Siōng-tè choân-lêng ê, chòe ông lah.

7咱tio̍h歡歡喜喜，將榮光歸hō͘伊；因為羊羔婚姻ê期已經到，伊ê新娘已經家己備辦好lah。Lán tio̍h hoaⁿ-hoaⁿ hí-hí, chiong êng-kng kui hō͘ I; in-ūi Iûⁿ-ko hun-in ê kî í-keng kàu, I ê sin-niû í-keng ka-kī pī-pān hó lah.

8就有hō͘伊穿光明清氣ê 幼葛布；因為幼葛布是聖徒所行ê義。Chiū ū hō͘ i chhēng kng-bêng chheng-khì ê iù-koah pò͘; in-ūi iù-koah pò͘ sī sèng-tô͘ só͘ kiâⁿ ê gī.

9Koh kā我講，你tio̍h寫伊，見若受召來赴羊羔ê婚筵ê，有福氣。Koh kā我講，chiah-ê是上帝真實ê話。Koh kā góa kóng, Lí tio̍h siá i, Kìⁿ-nā siū tiàu lâi hù Iûⁿ-ko ê hun-iân ê, ū hok-khì. Koh kā góa kóng, chiah-ê sī Siōng-tè chin-si̍t ê ōe.

10我就仆tī伊ê腳前beh拜伊。伊kā我講，千萬m̄-thang；我kap你以及你ê兄弟有耶穌ê干證ê，平平是做奴僕；你tio̍h拜上帝；因為耶穌ê干證就是先知ê神。Góa chiū phak tī i ê kha-chêng beh pài i. I kā góa kóng, Chhian-bān m̄ thang; góa kap lí í-ki̍p lí ê hiaⁿ-tī ū Iâ-so͘ ê kan-chèng ê, pîⁿ-pîⁿ sī chòe lô͘-po̍k; lí tio̍h pài Siōng-tè; in-ūi Iâ-so͘ ê kan-chèng chiū-sī sian-ti ê sîn.

11我koh看見天開，就看見有一隻白馬，騎伊ê稱做忠信真實；伊ê審判kap交戰無m̄公義。Góa koh khòaⁿ-kìⁿ thiⁿ khui, chiū khòaⁿ-kìⁿ ū chi̍t chiah pe̍h bé, khiâ i ê chheng chòe Tiong-sìn Chin-si̍t; I ê sím-phòaⁿ kap kau-chiàn bô m̄ kong-gī.

12伊ê目睭是火燄；頭殼頂戴 chōe-chōe王帽；koh有名寫teh，除去伊本身以外無人會bat。I ê ba̍k-chiu sī hé-iām; thâu-khak téng tì chōe-chōe ông-bō; koh ū miâ siá-teh, tû-khì I pún-sin í-gōa bô lâng ōe bat.

13伊穿hiù血ê衫；伊ê名稱做上帝ê道。I chhēng hiù huih ê saⁿ; I ê miâ chheng chòe Siōng-tè ê Tō.

14Tī天裡ê軍兵騎白馬來tè伊，lóng穿幼葛，白koh清氣。Tī thiⁿ-ni̍h ê kun-peng khiâ pe̍h bé lâi tè I, lóng chhēng iù-koah, pe̍h koh chheng-khì.

15Koh有利劍tùi伊ê嘴出，thang用伊來phah列邦；伊也beh用鐵柺治理in；伊也beh踏全能ê上帝大受氣ê酒窟。Koh ū lāi kiàm tùi I ê chhùi chhut, thang ēng i lâi phah lia̍t-pang; I iā beh ēng thih-koáiⁿ tī-lí in; I iā beh ta̍h choân-lêng ê Siōng-tè tōa siū-khì ê chiú-khut.

16Tī伊ê衫kap腳腿有寫一個名講，萬王ê王，萬主ê主。Tī I ê saⁿ kap kha-thúi ū siá chi̍t ê miâ kóng, Bān ông ê Ông, bān chú ê Chú.

17我koh看見一個天使khiā tī日頭ê中央，大聲喉叫，kā天中lóng總ê飛鳥講，Góa koh khòaⁿ-kìⁿ chi̍t ê thiⁿ-sài khiā tī ji̍t-thâu ê tiong-ng, tōa siaⁿ âu-kiò, kā thiⁿ-tiong lóng-chóng ê pe-chiáu kóng,

18來聚集赴上帝ê大筵席，thang來食chiah-ê王ê肉，千總ê肉，勇士ê肉，馬kap騎馬ê人ê肉，凡若自由ê，做奴僕ê，序細序大ê肉。Lâi chū-chi̍p hù Siōng-tè ê tōa iân-sia̍h, thang lâi chia̍h chiah ê ông ê bah, chhian-chóng ê bah, ióng-sū ê bah, bé kap khiâ bé ê lâng ê bah, hoān-nā chū-iû ê, chòe lô͘-po̍k ê, sī-sòe sī-tōa ê bah.

19我koh看見獸kap地上chiah-ê王kap in ê軍兵lóng聚集，beh kap騎馬ê以及伊ê軍兵交戰。Góa koh khòaⁿ-kìⁿ siù kap tōe-chiūⁿ chiah ê ông kap in ê kun-peng lóng chū-chi̍p, beh kap khiâ bé ê í-ki̍p I ê kun-peng kau-chiàn.

20獸就受掠，hit-ê假ê先知也kap伊同受掠，就是前bat tī獸 ê面前行神蹟，來迷惑hiah-ê受tio̍h獸ê記號，以及拜獸ê像ê，chit兩個活活hiat tī琉磺teh燒ê火湖。Siù chiū siū lia̍h, hit ê ké ê sian-ti iā kap i tâng siū lia̍h, chiū-sī chêng bat tī siù ê bīn-chêng kiâⁿ sîn-jiah, lâi bê-he̍k hiah ê siū-tio̍h siù ê kì-hō, í-ki̍p pài siù ê siōng ê, chit nn̄g ê oa̍h-oa̍h hiat tī jiû-n̂g teh sio ê hé-ô͘.

21其餘ê hō͘ hit-ê騎馬ê嘴內所出ê劍thâi死in。眾鳥lóng食in ê肉到飽。Kî-û-ê hō͘ hit ê khiâ-bé ê chhùi-lāi só͘ chhut ê kiàm thâi-sí in. Chèng chiáu lóng chia̍h in ê bah kàu pá.

1我koh看見天使tùi天落來，手裡有深淵ê鎖匙，kap大條鐵鍊。Góa koh khòaⁿ-kìⁿ thiⁿ-sài tùi thiⁿ lo̍h-lâi, chhiú-ni̍h ū chhim-ian ê só-sî, kap tōa tiâu thih-liān.

2就掠hit尾龍，就是老蛇，也是魔鬼kap撒旦，縛伊一千年久。Chiū lia̍h hit bé lêng, chiū-sī lāu chôa, iā sī Mô͘-kúi kap Sat-tàn, pa̍k i chi̍t-chheng nî kú.

3hiat伊落深淵，關密，用印封tī hit頂面，hō͘伊無thang koh迷惑列邦，thèng候一千年滿；以後的確暫時tháu放。hiat i lo̍h chhim-ian, koaiⁿ-ba̍t, ēng ìn hong tī hit téng-bīn, hō͘ i bô thang koh bê-he̍k lia̍t-pang, thèng-hāu chi̍t-chheng nî móa; í-āu tek-khak chiām-sî tháu-pàng.

4我koh看見hiah-ê座位，也有坐tī hit頂面ê，有得tio̍h審判ê權hō͘ in：koh看見hiah-ê為tio̍h做耶穌ê干證kap為tio̍h上帝ê道來受thâi頭ê人ê靈魂，以及m̄-bat拜獸kap獸 ê像，也無受伊ê記號tī頭額á是tī手裡ê，chiah-ê lóng得tio̍h活，來kap基督做王一千年。Góa koh khòaⁿ-kìⁿ hiah ê chō-ūi, iā ū chē tī hit téng-bīn ê, ū tit-tio̍h sím-phòaⁿ ê koân hō͘ in: koh khòaⁿ-kìⁿ hiah ê ūi-tio̍h chòe Iâ-so͘ ê kan-chèng kap ūi-tio̍h Siōng-tè ê tō lâi siū thâi-thâu ê lâng ê lêng-hûn, í-ki̍p m̄ bat pài siù kap siù ê siōng, iā bô siū i ê kì-hō tī thâu-hia̍h á-sī tī chhiú-ni̍h ê, chiah-ê lóng tit-tio̍h oa̍h, lâi kap Ki-tok chòe ông chi̍t chheng nî.

5其餘ê死人無活，thèng候hit-ê一千年滿。這是頭一pái ê koh活。Kî-û ê sí-lâng bô oa̍h, thèng-hāu hit ê chi̍t chheng nî móa. Che sī thâu chi̍t pái ê koh-oa̍h.

6有份tī chit-ê頭一pái ê koh活ê有福氣ah，是聖ah；第二pái ê死管in bōe tio̍h：in beh做上帝kap基督ê祭司，也beh kap伊做王一千年。Ū hūn tī chit ê thâu chi̍t pái ê koh-oa̍h ê ū hok-khì ah, sī sèng ah; tē jī pái ê sí koán in bōe tio̍h: in beh chòe Siōng-tè kap Ki-tok ê chè-si, iā beh kap I chòe ông chi̍t chheng nî.

7Hit-ê一千年滿，撒旦beh受tháu放出伊ê監，Hit ê chi̍t chheng nî móa, Sat-tàn beh siū tháu-pàng chhut i ê kaⁿ,

8就出來迷惑地上四方ê列邦，就是Kok kap Má-kok，聚集in來交戰；in ê數額親像海沙。chiū chhut-lâi bê-he̍k tōe-chiūⁿ sì-hng ê lia̍t-pang, chiū-sī Kok kap Má-kok, chū-chi̍p in lâi kau-chiàn; in ê siàu-gia̍h chhin-chhiūⁿ hái soa.

9In就起來遍滿全地，續圍困聖徒ê營，kap得tio̍h疼ê城；就有火tùi天降落，來滅in。In chiū khí-lâi piàn-móa choân tōe, sòa ûi-khùn sèng-tô͘ ê iâⁿ, kap tit-tio̍h thiàⁿ ê siâⁿ; chiū ū hé tùi thiⁿ kàng-lo̍h, lâi bia̍t in.

10迷惑in ê魔鬼受hiat落火kap琉磺ê湖，tī hia也有獸kap假ê先知；in beh暝日受苦楚，代代無盡。Bê-he̍k in ê Mô͘-kúi siū hiat-lo̍h hé kap jiû-n̂g ê ô͘, tī hia iā ū siù kap ké ê sian-ti ; in beh mî-ji̍t siū khó͘-chhó͘, tāi-tāi bô chīn.

11我koh看見一個白色大ê座位kap坐hit頂面ê，地kap天tùi伊ê面前逃走無koh有in ê位處。Góa koh khòaⁿ-kìⁿ chi̍t ê pe̍h-sek tōa ê chō-ūi kap chē hit téng-bīn ê, tōe kap thiⁿ tùi I ê bīn-chêng tô-cháu bô koh ū in ê ūi-chhù.

12我也看見死人大kap細lóng khiā tī座位前；chiah-ê冊就掀開；koh有別本冊掀開，就是活命冊；死人就照in ê所行，憑chiah-ê冊所記載來受審判。Góa iā khòaⁿ-kìⁿ sí-lâng tōa kap sòe lóng khiā tī chō-ūi chêng; chiah ê chheh chiū hian-khui; koh ū pa̍t pún chheh hian-khui, chiū-sī oa̍h-miā chheh; sí-lâng chiū chiàu in ê só͘ kiâⁿ, pîn chiah ê chheh só͘ kì-chài lâi siū sím-phòaⁿ.

13海就交出伊中間ê死人；死kap陰府也交in中間ê死人。Ta̍k人就照in ê所行受審判。Hái chiū kau-chhut i tiong-kan ê sí-lâng; sí kap im-hú iā kau in tiong-kan ê sí-lâng. Ta̍k lâng chiū chiàu in ê só͘ kiâⁿ siū sím-phòaⁿ.

14死kap陰府也hiat落火湖。Chit-ê就是第二pái ê死，就是火湖。Sí kap im-hú iā hiat-lo̍h hé-ô͘. Chit-ê chiū-sī tē jī pái ê sí, chiū-sī hé-ô͘.

15若有人無記名tī活命冊ê，也hiat落火湖。Nā ū lâng bô kì miâ tī oa̍h-miā chheh ê, iā hiat-lo̍h hé-ô͘.

1我koh看見有新ê天，新ê地；因為前ê天前ê地已經過去；海也無koh有。Góa koh khòaⁿ-kìⁿ ū sin ê thiⁿ, sin ê tōe; in-ūi chêng ê thiⁿ chêng ê tōe í-keng kè-khì; hái iā bô koh ū.

2Koh看見聖城，就是新ê耶路撒冷，出tī天，tùi上帝降落，已經備辦便，親像新娘裝飾來thèng候伊ê丈夫。Koh khòaⁿ-kìⁿ sèng siâⁿ, chiū-sī sin ê Iâ-lō͘-sat-léng, chhut tī thiⁿ, tùi Siōng-tè kàng-lo̍h, í-keng pī-pān piān, chhin-chhiūⁿ sin-niû chng-thāⁿ lâi thèng-hāu i ê tiōng-hu.

3Koh聽見大聲tùi座位出，講，上帝ê會幕tī人ê中間，上帝beh kap in saⁿ-kap khiā起；in beh做伊ê百姓，上帝本身beh kap in tī-teh，來做in ê上帝。Koh thiaⁿ-kìⁿ tōa siaⁿ tùi chō-ūi chhut, kóng, Siōng-tè ê hōe-bō͘ tī lâng ê tiong-kan, Siōng-tè beh kap in saⁿ-kap khiā-khí; in beh chòe I ê peh-sìⁿ, Siōng-tè pún-sin beh kap in tī-teh, lâi chòe in ê Siōng-tè.

4Koh beh kā in ê目睭拭去lóng總ê目屎；無beh koh有死失；也無beh koh有哀傷，喉叫，痛疼；前ê tāi-chì已經過去。Koh beh kā in ê ba̍k-chiu chhit-khì lóng-chóng ê ba̍k-sái; bô beh koh ū sí-sit; iā bô beh koh ū ai-siong, âu-kiò, thàng-thiàⁿ; chêng ê tāi-chì í-keng kè-khì.

5坐tī座位ê講，我換新萬物。Koh講，你tio̍h寫伊，因為chiah-ê話是thang信，是真實。Chē tī chō-ūi ê kóng, Góa ōaⁿ-sin bān mi̍h. Koh kóng, Lí tio̍h siá i, in-ūi chiah ê ōe sī thang sìn, sī chin-si̍t.

6Koh kā我講，已經成lah；我就是A-lī-hoat kap O-bí-ka，是起頭ê Kap路尾ê。我beh tùi活命ê水泉白白hō͘嘴乾ê人lim。Koh kā góa kóng, Í-keng chiâⁿ lah; góa chiū-sī A-lī-hoat kap O-bí-ka, sī khí-thâu-ê kap lō͘-bé-ê. Góa beh tùi oa̍h-miā ê chúi-chôaⁿ pe̍h-pe̍h hō͘ chhùi-ta ê lâng lim.

7得勝ê人beh承接chiah-ê；我beh做伊ê上帝，伊beh做我ê kiáⁿ。Tek-sèng ê lâng beh sêng-chiap chiah-ê; góa beh chòe i ê Siōng-tè, i beh chòe góa ê kiáⁿ.

8但是hiah-ê小膽ê、m̄信ê、可惡ê、thâi人ê、淫亂ê、行邪術ê、拜偶像ê，kap lóng總白賊ê人，in ê份額是tī hit-ê用火kap琉磺teh燒ê湖；chit-ê就是第二pái ê死。Nā-sī hiah ê sió-táⁿ ê, m̄ sìn ê, khó-ò͘ⁿ ê, thâi lâng ê, îm-loān ê, kiâⁿ siâ-su̍t ê, pài ngó͘-siōng ê, kap lóng-chóng pe̍h-chha̍t ê lâng, in ê hūn-gia̍h sī tī hit ê ēng hé kap jiû-n̂g teh sio ê ô͘; chit-ê chiū-sī tē jī pái ê sí.

9Hit七個天使，就是有七塊碗 tóe滿路尾七項災禍ê，其中一個來kap我講話，講，來，我beh報你看新娘，就是羊羔ê bó͘。Hit chhit ê thiⁿ-sài, chiū-sī ū chhit tè óaⁿ tóe móa lō͘-bé chhit hāng chai-ē ê, kî-tiong chi̍t-ê lâi kap góa kóng ōe, kóng, Lâi, góa beh pò lí khòaⁿ sin-niû, chiū-sī Iûⁿ-ko ê bó͘.

10我就受神ê感動，hō͘伊chhōa去一座山，大koh高，將聖城耶路撒冷，出tī天裡，tùi上帝降落ê，報我看；Góa chiū siū Sîn ê kám-tōng, hō͘ i chhōa khì chi̍t chō soaⁿ, tōa koh koâiⁿ, chiong sèng siâⁿ Iâ-lō͘-sat-léng, chhut tī thiⁿ-ni̍h, tùi Siōng-tè kàng-lo̍h ê, pò góa khòaⁿ;

11有上帝ê榮光；伊ê光親像第一寶貝ê石，親像碧玉，光亮親像水晶。ū Siōng-tè ê êng-kng; i ê kng chhin-chhiūⁿ tē it pó-pòe ê chio̍h, chhin-chhiūⁿ phek-ge̍k, kng-liāng chhin-chhiūⁿ chúi-chiⁿ.

12有牆大koh高有十二個門，tī chiah-ê門有十二個天使，也有名寫tī門裡，就是以色列kiaⁿ孫十二個支派ê名。Ū chhiûⁿ tōa koh koâiⁿ ū cha̍p-jī ê mn̂g, tī chiah ê mn̂g ū cha̍p-jī ê thiⁿ-sài, iā ū miâ siá tī mn̂g-ni̍h, chiū-sī Í-sek-lia̍t kiáⁿ-sun cha̍p-jī ê chi-phài ê miâ.

13東勢有三個門，北勢有三個門，南勢有三個門，西勢有三個門。Tang-sì ū saⁿ ê mn̂g, pak-sì ū saⁿ ê mn̂g, lâm-sì ū saⁿ ê mn̂g, sai-sì ū saⁿ ê mn̂g.

14城牆有十二個地基，地基頂有羊羔十二使徒ê名，十二個。Siâⁿ-chhiûⁿ ū cha̍p-jī ê tōe-ki, tōe-ki téng ū Iûⁿ-ko cha̍p-jī sù-tô͘ ê miâ, cha̍p-jī ê.

15Kap我講ê天使有金ê蘆竹做篙尺，beh量hit-ê城，kap伊ê門伊ê牆。Kap góa kóng ê thiⁿ-sài ū kim ê lô͘-tek chòe ko-chhioh, beh niû hit ê siâⁿ, kap i ê mn̂g i ê chhiûⁿ.

16城是四方，長闊平平。用蘆竹量城，得tio̍h十二千你，長闊高lóng相同。Siâⁿ sī sù-hong, tn̂g khoah pîⁿ-pîⁿ. Ēng lô͘-tek niû siâⁿ, tit-tio̍h cha̍p-jī-chheng lí, tn̂g khoah koâiⁿ lóng saⁿ-tâng.

17天使量城牆，得tio̍h一百四十四尺，照人ê寸尺，就是天使ê寸尺。Thiⁿ-sài niû siâⁿ chhiûⁿ, tit-tio̍h chi̍t-pah sì-cha̍p-sì chhioh, chiàu lâng ê chhùn-chhioh, chiū-sī thiⁿ-sài ê chhùn-chhioh.

18牆用碧玉來起；城是好金ê，親像清亮ê玻璃。Chhiûⁿ ēng phek-ge̍k lâi khí; siâⁿ sī hó kim ê, chhin-chhiūⁿ chheng-liāng ê po-lê.

19城牆ê地基有an ta̍k等號ê寶石。頭一個地基是碧玉；第二個是藍玉；第三個是璁玉；第四個是青玉；Siâⁿ-chhiûⁿ ê tōe-ki ū an ta̍k téng-hō ê pó-chio̍h. Thâu chi̍t ê tōe-ki sī phek-ge̍k; tē jī ê sī lâm-ge̍k; tē saⁿ ê sī chhong-ge̍k; tē sì ê sī chhiⁿ-ge̍k;

20第五個是紅玉；第六個是瑪瑙；第七個是黃玉；第八個是綠玉；第九個是khín黃玉；第十個是翡翠玉；第十一個是紫色玉；第十二個是赤玉。tē gō͘ ê sī âng-ge̍k; tē la̍k ê sī bé-ló; tē chhit ê sī n̂g-ge̍k; tē poeh ê sī le̍k-ge̍k; tē káu ê sī khín-n̂g ge̍k; tē cha̍p ê sī húi-chhùi ge̍k; tē cha̍p-it ê sī chí-sek ge̍k; tē cha̍p-jī ê sī chhiah-ge̍k.

21十二個門是十二粒珍珠；chiah-ê門ta̍k-ê lóng是一粒珠做ê。城ê街路是好金ê，親像透底光ê玻璃。Cha̍p-jī ê mn̂g sī cha̍p-jī lia̍p chin-chu; chiah ê mn̂g ta̍k ê lóng sī chi̍t lia̍p chu chòe ê. Siâⁿ ê ke-lō͘ sī hó kim ê, chhin-chhiūⁿ thàu-tóe kng ê po-lê.

22我無看見城內有殿堂；因為主上帝，全能ê，kap羊羔做伊ê殿堂。Góa bô khòaⁿ-kìⁿ siâⁿ-lāi ū tiān-tn̂g; in-ūi Chú Siōng-tè, choân-lêng ê, kap Iûⁿ-ko chòe i ê tiān-tn̂g.

23城無欠用日á是月來照伊；因為上帝ê榮光照伊。羊羔做伊ê 燈。Siâⁿ bô khiàm-ēng ji̍t á-sī ge̍h lâi chiò i; in-ūi Siōng-tè ê êng-kng chiò i. Iûⁿ-ko chòe i ê teng.

24列邦ê人beh óa靠伊ê光來行；地上ê王beh將in ê榮光帶來歸tī伊。Lia̍t-pang ê lâng beh óa-khò i ê kng lâi kiâⁿ; tōe-chiūⁿ ê ông beh chiong in ê êng-kng tòa lâi kui tī i.

25城門日時lóng無關，(因為tī hia beh無暝時)Siâⁿ-mn̂g ji̍t-sî lóng bô koaiⁿ, (in-ūi tī hia beh bô mî-sî)

26人beh用列邦ê榮光kap尊貴帶來歸tī伊。Lâng beh ēng lia̍t-pang ê êng-kng kap chun-kùi tòa lâi kui tī i.

27凡若無清氣ê物，以及行可惡白賊ê人決斷bōe得入hia；只有記tī羊羔ê活命冊ê能得入。Hoān-nā bô chheng-khì ê mi̍h, í-ki̍p kiâⁿ khó-ò͘ⁿ pe̍h-chha̍t ê lâng koat-toàn bōe tit ji̍p hia; chí ū kì tī Iûⁿ-ko ê oa̍h-miā chheh ê ōe-tit ji̍p.