1我koh看見有新ê天，新ê地；因為前ê天前ê地已經過去；海也無koh有。Góa koh khòaⁿ-kìⁿ ū sin ê thiⁿ, sin ê tōe; in-ūi chêng ê thiⁿ chêng ê tōe í-keng kè-khì; hái iā bô koh ū.

2Koh看見聖城，就是新ê耶路撒冷，出tī天，tùi上帝降落，已經備辦便，親像新娘裝飾來thèng候伊ê丈夫。Koh khòaⁿ-kìⁿ sèng siâⁿ, chiū-sī sin ê Iâ-lō͘-sat-léng, chhut tī thiⁿ, tùi Siōng-tè kàng-lo̍h, í-keng pī-pān piān, chhin-chhiūⁿ sin-niû chng-thāⁿ lâi thèng-hāu i ê tiōng-hu.

3Koh聽見大聲tùi座位出，講，上帝ê會幕tī人ê中間，上帝beh kap in saⁿ-kap khiā起；in beh做伊ê百姓，上帝本身beh kap in tī-teh，來做in ê上帝。Koh thiaⁿ-kìⁿ tōa siaⁿ tùi chō-ūi chhut, kóng, Siōng-tè ê hōe-bō͘ tī lâng ê tiong-kan, Siōng-tè beh kap in saⁿ-kap khiā-khí; in beh chòe I ê peh-sìⁿ, Siōng-tè pún-sin beh kap in tī-teh, lâi chòe in ê Siōng-tè.

4Koh beh kā in ê目睭拭去lóng總ê目屎；無beh koh有死失；也無beh koh有哀傷，喉叫，痛疼；前ê tāi-chì已經過去。Koh beh kā in ê ba̍k-chiu chhit-khì lóng-chóng ê ba̍k-sái; bô beh koh ū sí-sit; iā bô beh koh ū ai-siong, âu-kiò, thàng-thiàⁿ; chêng ê tāi-chì í-keng kè-khì.

5坐tī座位ê講，我換新萬物。Koh講，你tio̍h寫伊，因為chiah-ê話是thang信，是真實。Chē tī chō-ūi ê kóng, Góa ōaⁿ-sin bān mi̍h. Koh kóng, Lí tio̍h siá i, in-ūi chiah ê ōe sī thang sìn, sī chin-si̍t.

6Koh kā我講，已經成lah；我就是A-lī-hoat kap O-bí-ka，是起頭ê Kap路尾ê。我beh tùi活命ê水泉白白hō͘嘴乾ê人lim。Koh kā góa kóng, Í-keng chiâⁿ lah; góa chiū-sī A-lī-hoat kap O-bí-ka, sī khí-thâu-ê kap lō͘-bé-ê. Góa beh tùi oa̍h-miā ê chúi-chôaⁿ pe̍h-pe̍h hō͘ chhùi-ta ê lâng lim.

7得勝ê人beh承接chiah-ê；我beh做伊ê上帝，伊beh做我ê kiáⁿ。Tek-sèng ê lâng beh sêng-chiap chiah-ê; góa beh chòe i ê Siōng-tè, i beh chòe góa ê kiáⁿ.

8但是hiah-ê小膽ê、m̄信ê、可惡ê、thâi人ê、淫亂ê、行邪術ê、拜偶像ê，kap lóng總白賊ê人，in ê份額是tī hit-ê用火kap琉磺teh燒ê湖；chit-ê就是第二pái ê死。Nā-sī hiah ê sió-táⁿ ê, m̄ sìn ê, khó-ò͘ⁿ ê, thâi lâng ê, îm-loān ê, kiâⁿ siâ-su̍t ê, pài ngó͘-siōng ê, kap lóng-chóng pe̍h-chha̍t ê lâng, in ê hūn-gia̍h sī tī hit ê ēng hé kap jiû-n̂g teh sio ê ô͘; chit-ê chiū-sī tē jī pái ê sí.

9Hit七個天使，就是有七塊碗 tóe滿路尾七項災禍ê，其中一個來kap我講話，講，來，我beh報你看新娘，就是羊羔ê bó͘。Hit chhit ê thiⁿ-sài, chiū-sī ū chhit tè óaⁿ tóe móa lō͘-bé chhit hāng chai-ē ê, kî-tiong chi̍t-ê lâi kap góa kóng ōe, kóng, Lâi, góa beh pò lí khòaⁿ sin-niû, chiū-sī Iûⁿ-ko ê bó͘.

10我就受神ê感動，hō͘伊chhōa去一座山，大koh高，將聖城耶路撒冷，出tī天裡，tùi上帝降落ê，報我看；Góa chiū siū Sîn ê kám-tōng, hō͘ i chhōa khì chi̍t chō soaⁿ, tōa koh koâiⁿ, chiong sèng siâⁿ Iâ-lō͘-sat-léng, chhut tī thiⁿ-ni̍h, tùi Siōng-tè kàng-lo̍h ê, pò góa khòaⁿ;

11有上帝ê榮光；伊ê光親像第一寶貝ê石，親像碧玉，光亮親像水晶。ū Siōng-tè ê êng-kng; i ê kng chhin-chhiūⁿ tē it pó-pòe ê chio̍h, chhin-chhiūⁿ phek-ge̍k, kng-liāng chhin-chhiūⁿ chúi-chiⁿ.

12有牆大koh高有十二個門，tī chiah-ê門有十二個天使，也有名寫tī門裡，就是以色列kiaⁿ孫十二個支派ê名。Ū chhiûⁿ tōa koh koâiⁿ ū cha̍p-jī ê mn̂g, tī chiah ê mn̂g ū cha̍p-jī ê thiⁿ-sài, iā ū miâ siá tī mn̂g-ni̍h, chiū-sī Í-sek-lia̍t kiáⁿ-sun cha̍p-jī ê chi-phài ê miâ.

13東勢有三個門，北勢有三個門，南勢有三個門，西勢有三個門。Tang-sì ū saⁿ ê mn̂g, pak-sì ū saⁿ ê mn̂g, lâm-sì ū saⁿ ê mn̂g, sai-sì ū saⁿ ê mn̂g.

14城牆有十二個地基，地基頂有羊羔十二使徒ê名，十二個。Siâⁿ-chhiûⁿ ū cha̍p-jī ê tōe-ki, tōe-ki téng ū Iûⁿ-ko cha̍p-jī sù-tô͘ ê miâ, cha̍p-jī ê.

15Kap我講ê天使有金ê蘆竹做篙尺，beh量hit-ê城，kap伊ê門伊ê牆。Kap góa kóng ê thiⁿ-sài ū kim ê lô͘-tek chòe ko-chhioh, beh niû hit ê siâⁿ, kap i ê mn̂g i ê chhiûⁿ.

16城是四方，長闊平平。用蘆竹量城，得tio̍h十二千你，長闊高lóng相同。Siâⁿ sī sù-hong, tn̂g khoah pîⁿ-pîⁿ. Ēng lô͘-tek niû siâⁿ, tit-tio̍h cha̍p-jī-chheng lí, tn̂g khoah koâiⁿ lóng saⁿ-tâng.

17天使量城牆，得tio̍h一百四十四尺，照人ê寸尺，就是天使ê寸尺。Thiⁿ-sài niû siâⁿ chhiûⁿ, tit-tio̍h chi̍t-pah sì-cha̍p-sì chhioh, chiàu lâng ê chhùn-chhioh, chiū-sī thiⁿ-sài ê chhùn-chhioh.

18牆用碧玉來起；城是好金ê，親像清亮ê玻璃。Chhiûⁿ ēng phek-ge̍k lâi khí; siâⁿ sī hó kim ê, chhin-chhiūⁿ chheng-liāng ê po-lê.

19城牆ê地基有an ta̍k等號ê寶石。頭一個地基是碧玉；第二個是藍玉；第三個是璁玉；第四個是青玉；Siâⁿ-chhiûⁿ ê tōe-ki ū an ta̍k téng-hō ê pó-chio̍h. Thâu chi̍t ê tōe-ki sī phek-ge̍k; tē jī ê sī lâm-ge̍k; tē saⁿ ê sī chhong-ge̍k; tē sì ê sī chhiⁿ-ge̍k;

20第五個是紅玉；第六個是瑪瑙；第七個是黃玉；第八個是綠玉；第九個是khín黃玉；第十個是翡翠玉；第十一個是紫色玉；第十二個是赤玉。tē gō͘ ê sī âng-ge̍k; tē la̍k ê sī bé-ló; tē chhit ê sī n̂g-ge̍k; tē poeh ê sī le̍k-ge̍k; tē káu ê sī khín-n̂g ge̍k; tē cha̍p ê sī húi-chhùi ge̍k; tē cha̍p-it ê sī chí-sek ge̍k; tē cha̍p-jī ê sī chhiah-ge̍k.

21十二個門是十二粒珍珠；chiah-ê門ta̍k-ê lóng是一粒珠做ê。城ê街路是好金ê，親像透底光ê玻璃。Cha̍p-jī ê mn̂g sī cha̍p-jī lia̍p chin-chu; chiah ê mn̂g ta̍k ê lóng sī chi̍t lia̍p chu chòe ê. Siâⁿ ê ke-lō͘ sī hó kim ê, chhin-chhiūⁿ thàu-tóe kng ê po-lê.

22我無看見城內有殿堂；因為主上帝，全能ê，kap羊羔做伊ê殿堂。Góa bô khòaⁿ-kìⁿ siâⁿ-lāi ū tiān-tn̂g; in-ūi Chú Siōng-tè, choân-lêng ê, kap Iûⁿ-ko chòe i ê tiān-tn̂g.

23城無欠用日á是月來照伊；因為上帝ê榮光照伊。羊羔做伊ê 燈。Siâⁿ bô khiàm-ēng ji̍t á-sī ge̍h lâi chiò i; in-ūi Siōng-tè ê êng-kng chiò i. Iûⁿ-ko chòe i ê teng.

24列邦ê人beh óa靠伊ê光來行；地上ê王beh將in ê榮光帶來歸tī伊。Lia̍t-pang ê lâng beh óa-khò i ê kng lâi kiâⁿ; tōe-chiūⁿ ê ông beh chiong in ê êng-kng tòa lâi kui tī i.

25城門日時lóng無關，(因為tī hia beh無暝時)Siâⁿ-mn̂g ji̍t-sî lóng bô koaiⁿ, (in-ūi tī hia beh bô mî-sî)

26人beh用列邦ê榮光kap尊貴帶來歸tī伊。Lâng beh ēng lia̍t-pang ê êng-kng kap chun-kùi tòa lâi kui tī i.

27凡若無清氣ê物，以及行可惡白賊ê人決斷bōe得入hia；只有記tī羊羔ê活命冊ê能得入。Hoān-nā bô chheng-khì ê mi̍h, í-ki̍p kiâⁿ khó-ò͘ⁿ pe̍h-chha̍t ê lâng koat-toàn bōe tit ji̍p hia; chí ū kì tī Iûⁿ-ko ê oa̍h-miā chheh ê ōe-tit ji̍p.

1天使koh報我看城內街路中有活命水ê河，清亮親像水晶，tùi上帝kap羊羔ê座位流出。Thiⁿ-sài koh pò góa khòaⁿ siâⁿ-lāi ke-lō͘ tiong ū oa̍h-miā chúi ê hô, chheng-liāng chhin-chhiūⁿ chúi-chiⁿ, tùi Siōng-tè kap Iûⁿ-ko ê chō-ūi lâu chhut.

2河ê雙pêng有活命ê樹，結十二樣ê果子，每月結伊ê果子：伊ê樹葉做醫治列邦ê路用。Hô ê siang-pêng ū oa̍h-miā ê chhiū, kiat cha̍p-jī iūⁿ ê ké-chí, múi ge̍h kiat i ê ké-chí: i ê chhiū-hio̍h chòe i-tī lia̍t-pang ê lō͘-ēng.

3Lóng無koh有咒詛；是上帝kap羊羔ê座位beh tòa tī hia；Lóng bô koh ū chiù-chó͘; sī Siōng-tè kap Iûⁿ-ko ê chō-ūi beh tòa tī hia;

4伊ê奴僕beh服事伊，也beh看見伊ê面；koh伊ê名tī in ê頭額。I ê lô͘-po̍k beh ho̍k-sāi I, iā beh khòaⁿ-kìⁿ I ê bīn; koh I ê miâ tī in ê thâu-hia̍h.

5無koh有暝時；也無欠用燈ê光kap日ê光，因為主上帝beh照光in；也in beh做王，到代代無盡。Bô koh ū mî-sî; iā bô khiàm-ēng teng ê kng kap ji̍t ê kng, in-ūi Chú Siōng-tè beh chiò-kng in; iā in beh chòe ông, kàu tāi-tāi bô chīn.

6Koh kā我講，Chiah-ê話是thang信，是真實。主，就是先知人ê神ê上帝，有差伊ê天使，將緊緊的確beh成ê事指示伊ê奴僕。Koh kā góa kóng, Chiah ê ōe sī thang sìn, sī chin-si̍t. Chú, chiū-sī sian-ti lâng ê sîn ê Siōng-tè, ū chhe I ê thiⁿ-sài chiong kín-kín tek-khak beh chiâⁿ ê sū chí-sī I ê lô͘-po̍k.

7我緊緊到；守chit本冊讖語ê話ê有福氣。Góa kín-kín kàu; siú chit pún chheh chhàm-gú ê ōe ê ū hok-khì.

8我約翰就是聽見koh看見hiah-ê事ê。已經聽見koh看見，就仆落tī天使ê腳前beh拜伊。hit-ê天使就是將chiah-ê事指示我ê。Góa Iok-hān chiū-sī thiaⁿ-kìⁿ koh khòaⁿ-kìⁿ hiah ê sū ê. Í-keng thiaⁿ-kìⁿ koh khòaⁿ-kìⁿ, chiū phak-lo̍h tī thiⁿ-sài ê kha-chêng beh pài i. hit ê thiⁿ-sài chiū-sī chiong chiah ê sū chí-sī góa ê.

9伊kā我講，千萬m̄-thang；我kap你以及你ê兄弟，就是chiah-ê先知，kap守chit本冊ê話ê，平平是做奴僕；你tio̍h拜上帝。I kā góa kóng, chhian-bān m̄ thang; góa kap lí í-ki̍p lí ê hiaⁿ-tī, chiū-sī chiah ê sian-ti, kap siú chit pún chheh ê ōe ê, pîⁿ-pîⁿ sī chòe lô͘-po̍k; lí tio̍h pài Siōng-tè.

10Koh kā我講，莫得封chit-ê冊所有讖語ê話，因為日期近lah。Koh kā góa kóng, Bo̍h-tit hong chit ê chheh só͘ ū chhàm-gú ê ōe, in-ūi ji̍t-kî kūn lah.

11不義ê，hō͘伊猶原不義；污穢ê，hō͘伊猶原污穢；義ê，hō͘伊猶原行義；聖ê，hō͘伊猶原做聖。Put-gī ê, hō͘ i iû-goân put-gī; ù-òe ê, hō͘ i iû-goân ù-òe; gī ê, hō͘ i iû-goân kiâⁿ gī; sèng ê, hō͘ i iû-goân chòe sèng.

12我緊緊到；報應在tī我，beh照ta̍k人ê所做來報伊。Góa kín-kín kàu; pò-èng chāi-tī góa, beh chiàu ta̍k lâng ê só͘ chòe lâi pò i.

13我是A-lī-hoat koh是O-bí-ka，是頭一個，是路尾ê，是起頭，是soah尾。Góa sī A-lī-hoat koh sī O-bí-ka, sī thâu-chi̍t ê, sī lō͘-bé ê, sī khí-thâu, sī soah-bé.

14洗清in ê三個人有福氣，beh hō͘ in有權tī活命ê樹，koh tùi chiah-ê門入城。Sóe-chheng in ê saⁿ ê lâng ū hok-khì, beh hō͘ in ū koân tī oa̍h-miā ê chhiū, koh tùi chiah ê mn̂g ji̍p siâⁿ.

15Tī外面就有hiah-ê狗、行邪術ê、行淫亂ê、thâi人ê、拜偶像ê，kap一切好白賊來行伊ê。Tī gōa-bīn chiū ū hiah ê káu, kiâⁿ siâ-su̍t ê, kiâⁿ îm-loān ê, thâi lâng ê, pài ngó͘-siōng ê, kap it-chhè hò͘ⁿ pe̍h-chha̍t lâi kiâⁿ i ê.

16我耶穌已經差我ê天使為tio̍h chiah-ê教會，對lín證明chiah-ê事。我是大衛ê根頭，koh是伊ê後裔，是光光ê啟明星。Góa Iâ-so͘ í-keng chhe góa ê thiⁿ-sài ūi-tio̍h chiah ê kàu-hōe, tùi lín chèng-bêng chiah ê sū. Góa sī Tāi-pi̍t ê kun-thâu, koh sī i ê hō͘-è, sī kng-kng ê khé-bêng-chhiⁿ.

17聖神kap新娘lóng講，來。聽見ê人tio̍h講，來。嘴乾ê人tio̍h來。意愛ê人thang白白得tio̍h活命ê水。Sèng Sîn kap sin-niû lóng kóng, Lâi. Thiaⁿ-kìⁿ ê lâng tio̍h kóng, Lâi. Chhùi-ta ê lâng tio̍h lâi. Ì-ài ê lâng thang pe̍h-pe̍h tit-tio̍h oa̍h-miā ê chúi.

18我tùi凡若聽chit本冊讖語ê話ê人做干證，設使有人加添伊，上帝beh將chit本冊所記ê災禍加添tī伊；Góa tùi hoān-nā thiaⁿ chit pún chheh chhàm-gú ê ōe ê lâng chòe kan-chèng, siat-sú ū lâng ke-thiⁿ i, Siōng-tè beh chiong chit pún chheh só͘ kì ê chai-ē ke-thiⁿ tī i;

19設使有人刪除chit本讖語ê冊ê話，上帝也beh tùi chit本冊所記活命ê樹kap聖城，刪除伊ê份額。siat-sú ū lâng san-tû chit pún chhàm-gú ê chheh ê ōe, Siōng-tè iā beh tùi chit pún chheh só͘ kì oa̍h-miā ê chhiū kap sèng-siâⁿ, san-tû i ê hūn-gia̍h.

20干證chiah-ê事ê講，Tio̍h，我緊緊到。À-bēng；主耶穌ah，你tio̍h來。Kan-chèng chiah ê sū ê kóng, Tio̍h, góa kín-kín kàu. À-bēng; Chú Iâ-so͘ ah, li tio̍h lâi.

21願主耶穌ê恩典kap眾聖徒saⁿ-kap tī-teh。À-bēng。Goān Chú Iâ-so͘ ê un-tián kap chèng sèng-tô͘ saⁿ-kap tī-teh. À-bēng.