1你tio̍h寫phoe hō͘ tī Sat-te̍k ê教會ê使者，講；有上帝ê七個神，kap七粒星ê，伊ê話講：我知你ê所做，你名是活，實是死。Lí tio̍h siá phoe hō͘ tī Sat-te̍k ê kàu-hōe ê sù-chiá, kóng; Ū Siōng-tè ê chhit ê Sîn, kap chhit lia̍p chhiⁿ ê, I ê ōe kóng: Góa chai lí ê só͘ chòe, lí miâ sī oa̍h, si̍t sī sí.

2你tio̍h警醒，堅固hiah-ê其餘teh-beh死ê事；因為我看見你ê行做，tī我上帝ê面前無一項完全。Lí tio̍h kéng-séng, kian-kò͘ hiah ê kî-û teh-beh sí ê sū; in-ūi góa khòaⁿ-kìⁿ lí ê kiâⁿ-chòe, tī góa Siōng-tè ê bīn-chêng bô chi̍t hāng oân-choân.

3所以你tio̍h記得，你有怎樣受，怎樣聽；koh tio̍h執守，亦tio̍h反悔。設使m̄警醒，我beh親像賊來，你m̄知我甚麼時beh來到tī你。Só͘-í lí tio̍h kì-tit, lí ū cháiⁿ-iūⁿ siū, cháiⁿ-iūⁿ thiaⁿ; koh tio̍h chip-siú, ia̍h tio̍h hoán-hóe. Siat-sú m̄ kéng-séng, góa beh chhin-chhiūⁿ chha̍t lâi, lí m̄ chai góa sím-mi̍h sî beh lâi kàu tī lí.

4總是tī Sat-te̍k你iáu有kúi-nā名，未bat phah lâ-sâm in ê衫，in beh穿白衫，kap我四界行；因為in是能堪得ê。Chóng-sī tī Sat-te̍k lí iáu ū kúi-nā miâ, bē bat phah lâ-sâm in ê saⁿ, in beh chhēng pe̍h saⁿ, kap góa sì-kè kiâⁿ; in-ūi in sī ōe kham-tit ê.

5得勝ê人亦beh án-ni穿白衫；伊ê名tī活命ê冊，我決斷無擦起來，是beh認伊ê名tī我ê父ê面前，以及伊hiah-ê天使ê面前。Tek-sèng ê lâng ia̍h beh án-ni chhēng pe̍h saⁿ; i ê miâ tī oa̍h-miā ê chheh, góa koat-toàn bô chhat-khí-lâi, sī beh jīn i ê miâ tī góa ê Pē ê bīn-chêng, í-ki̍p I hiah ê thiⁿ-sài ê bīn-chêng.

6有耳孔ê tio̍h聽聖神kā chiah-ê教會所講ê。Ū hī-khang ê tio̍h thiaⁿ Sèng Sîn kā chiah ê kàu-hōe só͘ kóng ê.

7你tio̍h寫phoe hō͘ tī Hui-lia̍p-thiat-hui ê教會ê使者，講； 是聖，是真，有大衛ê鎖匙，開就無人能關，關就無人能開ê，伊ê話講：Lí tio̍h siá phoe hō͘ tī Hui-lia̍p-thiat-hui ê kàu-hōe ê sù-chiá, kóng; Sī sèng, sī chin, ū Tāi-pi̍t ê só-sî, khui chiū bô lâng ōe koaiⁿ, koaiⁿ chiū bô lâng ōe khui ê, I ê ōe kóng:

8我知你ê所做，(你看，我tī你ê面前已經有kā你開門，是無人能關ê) ，因為你有淡薄氣力，已經守我ê道理，未bat m̄認我ê名。Góa chai lí ê só͘ chòe, (lí khòaⁿ, góa tī lí ê bīn-chêng í-keng ū kā lí khui mn̂g, sī bô lâng ōe koaiⁿ ê), in-ūi lí ū tām-po̍h khùi-la̍t, í-keng siú góa ê tō-lí, bē bat m̄ jīn góa ê miâ.

9撒旦ê會，家己講是猶太人，其實m̄是，是講白賊ê；我beh賞賜你hō͘ in來仆tī你ê腳前，koh hō͘ in知我已經疼你。Sat-tàn ê hōe, ka-kī kóng sī Iû-thài lâng, kî-si̍t m̄ sī, sī kóng pe̍h-chha̍t ê; góa beh siúⁿ-sù lí hō͘ in lâi phak tī lí ê kha-chêng, koh hō͘ in chai góa í-keng thiàⁿ lí.

10因為你已經守我吞忍ê道理，我亦beh守你脫離hit-ê試煉ê時，chit-ê時beh到tī天下，來試煉lóng總khiā起tī地上ê人。In-ūi lí í-keng siú góa thun-lún ê tō-lí, góa ia̍h beh siú lí thoat-lī hit ê chhì-liān ê sî, chit ê sî beh kàu tī thiⁿ-ē, lâi chhì-liān lóng-chóng khiā-khí tī tōe-chiūⁿ ê lâng.

11我緊緊到；你所有ê tio̍h持守伊，免得有人搶你ê冕旒。Góa kín-kín kàu; lí só͘ ū ê tio̍h chhî-siú i, bián-tit ū lâng chhiúⁿ lí ê bián-liû.

12得勝ê人，我beh hō͘伊做柱tī我上帝ê殿內，決斷無koh出去外面；我亦beh將我上帝ê名，以及我上帝ê城，新ê耶路撒冷，tùi天tùi我ê上帝降落ê ê名，koh用我新ê名，lóng寫tī伊ê頂面。Tek-sèng ê lâng, góa beh hō͘ i chòe thiāu tī góa Siōng-tè ê tiān-lāi, koat-toàn bô koh chhut-khì gōa-bīn; góa ia̍h beh chiong góa Siōng-tè ê miâ, í-ki̍p góa Siōng-tè ê siâⁿ, sin ê Iâ-lō͘-sat-léng, tùi thiⁿ tùi góa ê Siōng-tè kàng-lo̍h ê ê miâ, koh ēng góa sin ê miâ, lóng siá tī i ê téng-bīn.

13有耳孔ê tio̍h聽聖神kā chiah-ê教會所講ê。Ū hī-khang ê, tio̍h thiaⁿ Sèng Sîn kā chiah ê kàu-hōe só͘ kóng ê.

14你tio̍h寫phoe hō͘ tī Ló-tí-ka ê教會ê使者，講； 做À-bēng，做忠信真實ê干證，做上帝造化ê源頭ê，伊ê話講：Lí tio̍h siá phoe hō͘ tī Ló-tí-ka ê kàu-hōe ê sù-chiá, kóng; Chòe À-bēng, chòe tiong-sìn chin-si̍t ê kan-chèng, chòe Siōng-tè chō-hòa ê goân-thâu ê, I ê ōe kóng:

15我知你ê所做，你是無冷無熱；我願你或是冷或是熱。Góa chai lí ê só͘ chòe, lí sī bô léng bô jia̍t; góa goān lí he̍k-sī léng he̍k-sī jia̍t.

16你既然是lâ-lûn燒，m̄成熱m̄成冷，我beh吐你出我ê嘴。Lí kì-jiân sī lâ-lûn-sio, m̄ chiâⁿ jia̍t m̄ chiâⁿ léng, góa beh thò͘ lí chhut góa ê chhùi.

17因為你家己講，我是好額，已經發財，lóng無欠缺；也m̄知你是困苦、可憐、sòng-hiong、chhiⁿ-mî、thǹg-theh；In-ūi lí ka-kī kóng, Góa sī hó-gia̍h, í-keng hoat-châi, lóng bô khiàm-kheh; iā m̄ chai lí sī khùn-khó͘, khó-lîn, sòng-hiong, chhiⁿ-mî, thǹg-theh;

18我替你想，tio̍h tùi我買過火鍛鍊ê金，thang得tio̍h好額；koh買白衫thang穿，hō͘你無露現thǹg-theh ê見笑；koh買藥膏，來抹你ê目睭，hō͘你能看見。góa thòe lí siūⁿ, tio̍h tùi góa bóe kè hé thoàn-liān ê kim, thang tit-tio̍h hó-gia̍h; koh bóe pe̍h saⁿ thang chhēng, hō͘ lí bô lō͘-hiān thǹg-theh ê kiàn-siàu; koh bóe io̍h-ko, lâi boah lí ê ba̍k-chiu, hō͘ lí ōe khòaⁿ-kìⁿ.

19見若我所疼ê人，我責備來警戒伊；所以tio̍h奮志來反悔。Kìⁿ-nā góa só͘ thiàⁿ ê lâng, góa chek-pī lâi kéng-kài i; só͘-í tio̍h hùn-chì lâi hoán-hóe.

20我khiā tī門外phah門，聽見我ê聲來開ê人，我beh入去就近伊，來kap伊食，伊亦kap我食。Góa khiā tī mn̂g-gōa phah mn̂g, thiaⁿ-kìⁿ góa ê siaⁿ lâi khui ê lâng, góa beh ji̍p-khì chiū-kūn i, lâi kap i chia̍h, i ia̍h kap góa chia̍h.

21得勝ê人，我beh hō͘伊kap我同坐tī我ê座位，親像我得勝來kap我ê父同坐tī伊ê座位一樣。Tek-sèng ê lâng, góa beh hō͘ i kap góa tâng chē tī góa ê chō-ūi, chhin-chhiūⁿ góa tek-sèng lâi kap góa ê Pē tâng chē tī I ê chō-ūi chi̍t iūⁿ.

22有耳孔ê，tio̍h聽聖神kā chiah-ê教會所講ê。Ū hī-khang ê, tio̍h thiaⁿ Sèng Sîn kā chiah ê kàu-hōe só͘ kóng ê.

1Chiah-ê tāi-chì以後我看見，tī天裡有門開，koh有我起頭所聽見ê聲，親像號頭kap我講話ê，講，你上來chia，我beh將後來所的確成ê事指示你。Chiah ê tāi-chì í-āu góa khòaⁿ-kìⁿ, tī thiⁿ-ni̍h ū mn̂g khui, koh ū góa khí-thâu só͘ thiaⁿ-kìⁿ ê siaⁿ, chhin-chhiūⁿ hō-thâu kap góa kóng ōe ê, kóng, Lí chiūⁿ lâi chia, góa beh chiong āu-lâi só͘ tek-khak chiâⁿ ê sū chí-sī lí.

2我隨時受神ê感動，忽然看見有座位設tī天裡，座位頂有teh坐ê；Góa sûi-sî siū Sîn ê kám-tōng, hut-jiân khòaⁿ-kìⁿ ū chō-ūi siat tī thiⁿ-ni̍h, chō-ūi téng ū teh chē ê;

3hit-ê teh坐ê，伊ê容貌親像碧玉，kap瑪瑙；伊ê座位周圍有虹，看了親像chhong-hêng玉。hit ê teh chē ê, I ê iông-māu chhin-chhiūⁿ phek-ge̍k, kap bé-ló; I ê chō-ūi chiu-ûi ū khēng, khòaⁿ-liáu chhin-chhiūⁿ chhong-hêng ge̍k.

4座位ê周圍，有二十四個座位，坐tī hit頂面ê，有二十四個長老，穿白衫，頭殼戴金ê冕旒。Chō-ūi ê chiu-ûi, ū jī-cha̍p-sì ê chō-ūi, chē tī hit téng-bīn ê, ū jī-cha̍p-sì ê tiúⁿ-ló, chhēng pe̍h saⁿ, thâu-khak tì kim ê bián-liû.

5Tùi hit-ê中央ê座位有發出sih-nà，kap聲，kap雷。亦有七支燈火，點tī座位前，就是上帝ê七個神。Tùi hit ê tiong-ng ê chō-ūi ū hoat-chhut sih-nà, kap siaⁿ, kap lûi. Ia̍h ū chhit ki teng-hé, tiám tī chō-ūi chêng, chiū-sī Siōng-tè ê chhit ê Sîn.

6座位前有親像玻璃ê海，彷彿親像水晶；座位中kap座位ê周圍，有四個活物，前後有目睭滿滿。Chō-ūi chêng ū chhin-chhiūⁿ po-lê ê hái, hóng-hut chhin-chhiūⁿ chúi-chiⁿ; chō-ūi tiong kap chō-ūi ê chiu-ûi, ū sì ê oa̍h mi̍h, chêng āu ū ba̍k-chiu móa-móa.

7頭一個活物親像獅，第二ê活物親像牛á，第三ê活物有面親像人，第四個活物親像teh飛ê鷹。Thâu chi̍t ê oa̍h mi̍h chhin-chhiūⁿ sai, tē jī ê oa̍h mi̍h chhin-chhiūⁿ gû-á, tē saⁿ ê oa̍h mi̍h ū bīn chhin-chhiūⁿ lâng, tē sì ê oa̍h mi̍h chhin-chhiūⁿ teh pe ê eng.

8四個活物國有六個翼，周圍kap內面遍身有目睭；暝日lóng無歇睏，teh講，聖哉，聖哉，聖哉，主上帝，全能ê，早tī-teh，現在tī-teh，將來亦tī-teh ê。Sì ê oa̍h mi̍h kok ū la̍k ê si̍t, chiu-ûi kap lāi-bīn piàn-sin ū ba̍k-chiu; mî-ji̍t lóng bô hioh-khùn, teh kóng, Sèng-chài, Sèng-chài, Sèng-chài, Chú Siōng-tè, Choân-lêng ê, chá tī-teh, hiān-chāi tī-teh, chiong-lâi ia̍h tī-teh ê.

9Ta̍k pái活物將榮光、尊貴、感謝，歸hō͘坐tī座位，活到代代無盡ê，Ta̍k pái oa̍h mi̍h chiong êng-kng, chun-kùi, kám-siā, kui hō͘ chē tī chō-ūi, oa̍h kàu tāi-tāi bô chīn ê,

10二十四個長老就仆tī hit-ê坐tī座位ê ê面前，敬拜hit-ê活到代代無盡ê；koh將in ê冕旒hiat tī座位前，講，jī-cha̍p-sì ê tiúⁿ-ló chiū phak tī hit ê chē tī chō-ūi ê ê bīn-chêng, kèng-pài hit ê oa̍h kàu tāi-tāi bô chīn ê; koh chiong in ê bián-liû hiat tī chō-ūi chêng, kóng,

11阮ê主，阮ê上帝，你堪得受榮光、尊貴、權能；因為你bat創造萬物；萬物tī-teh，萬物受創造，lóng是對你ê旨意。Goán ê Chú, goán ê Siōng-tè, lí kham-tit siū êng-kng, chun-kùi, koân-lêng; in-ūi lí bat chhòng-chō bān mi̍h; bān mi̍h tī-teh, bān mi̍h siū chhòng-chō, lóng sī tùi lí ê chí-ì.

1我看見坐tī座位ê，chiàⁿ手the̍h一卷，內外lóng有文字，用七個印封密。Góa khòaⁿ-kìⁿ chē tī chō-ūi ê, chiàⁿ chhiú the̍h chi̍t kńg, lāi-gōa lóng ū bûn-jī, ēng chhit ê ìn hong-ba̍t.

2Koh看見有權能ê天使，大聲宣傳講，Chī-chūi能堪得開hit卷，來拆開伊ê印。Koh khòaⁿ-kìⁿ ū koân-lêng ê thiⁿ-sài, tōa siaⁿ soan-thoân kóng, Chī-chūi ōe kham-tit khui hit kńg, lâi thiah-khui i ê ìn.

3Tī天裡，kap地裡，kap地ê下面，無一個能開hit卷，á是看伊。Tī thiⁿ-ni̍h, kap tōe-ni̍h, kap tōe ê ē-bīn, bô chi̍t-ê ōe khui hit kńg, á-sī khòaⁿ i.

4既然chhē無一個能堪得開hit卷，á是看伊ê，我就大啼哭。Kì-jiân chhē bô chi̍t-ê ōe kham-tit khui hit kńg, á-sī khòaⁿ i ê, góa chiū tōa thî-khàu.

5Hiah-ê長老ê一個kā我講，莫得啼哭；你看，猶大支派ê獅，大衛ê根頭，已經得勝，thang來開chit卷，kap hiah-ê七個印。Hiah ê tiúⁿ-ló ê chi̍t-ê kā góa kóng, Bo̍h-tit thî-khàu; lí khòaⁿ, Iû-tāi chi-phài ê sai, Tāi-pi̍t ê kun-thâu, í-keng tek-sèng, thang lâi khui chit kńg, kap hiah ê chhit ê ìn.

6我就看見tī座位kap四位ê活物ê中間，kap tī hiah-ê長老ê中間，有羊羔khiā-teh，親像bat受thâi，有七支角，七蕊目睭，就是上帝ê七個神，奉差到普天下ê。Góa chiū khòaⁿ-kìⁿ tī chō-ūi kap sì ūi ê oa̍h mi̍h ê tiong-kan, kap tī hiah ê tiúⁿ-ló ê tiong-kan, ū Iûⁿ-ko khiā-teh, chhin-chhiūⁿ bat siū thâi, ū chhit ki kak, chhit lúi ba̍k-chiu, chiū-sī Siōng-tè ê chhit ê Sîn, hōng-chhe kàu phó͘ thiⁿ-ē ê.

7伊就進前，tùi hit-ê坐tī座位ê ê chiàⁿ手the̍h hit卷。I chiū chìn-chêng, tùi hit ê chē tī chō-ūi ê ê chiàⁿ chhiú the̍h hit kńg.

8伊the̍h hit卷ê時，就四個活物kap二十四個長老，lóng仆tī羊羔ê面前；ta̍k-ê有琴kap金爐，tóe香滿滿，香就是聖徒ê祈禱。I the̍h hit kńg ê sî, chiū sì ê oa̍h mi̍h kap jī-cha̍p-sì ê tiúⁿ-ló, lóng phak tī Iûⁿ-ko ê bīn-chêng; ta̍k-ê ū khîm kap kim lô͘, tóe hiuⁿ móa-móa, hiuⁿ chiū-sī sèng-tô͘ ê kî-tó.

9也吟新ê詩講，你堪得the̍h hit卷，來開伊ê印；因為你受thâi，bat用你ê血tùi ta̍k族，ta̍k腔口，ta̍k號百姓，ta̍k國，買人來歸上帝；Iā gîm sin ê si kóng, Lí kham-tit the̍h hit kńg, lâi khui i ê ìn; in-ūi lí siū thâi, bat ēng lí ê huih tùi ta̍k cho̍k, ta̍k khiuⁿ-kháu, ta̍k hō peh-sìⁿ, ta̍k kok, bóe lâng lâi kui Siōng-tè;

10hō͘ in做國，做祭司，來服事上帝；in亦beh做王tī地上。hō͘ in chòe kok, chòe chè-si, lâi ho̍k-sāi Siōng-tè; in ia̍h beh chòe ông tī tōe-chiūⁿ.

11我koh看，就聽見座位，kap活物，kap長老ê周圍chōe-chōe天使ê聲；in ê額數千千萬萬；Góa koh khòaⁿ, chiū thiaⁿ-kìⁿ chō-ūi, kap oa̍h mi̍h, kap tiúⁿ-ló ê chiu-ûi chōe-chōe thiⁿ-sài ê siaⁿ; in ê gia̍h-siàu chheng-chheng bān-bān;

12大聲講，受thâi ê羊羔，合宜得tio̍h權能、富有、智慧、氣力、尊貴、榮光、o-ló。tōa siaⁿ kóng, Siū thâi ê Iûⁿ-ko, ha̍p-gî tit-tio̍h koân-lêng, pù-ū, tì-hūi, khùi-la̍t, chun-kùi, êng-kng, o-ló.

13Koh聽見tī天tī地，kap地ê下面，kap海面，一切受造ê物，kap其中凡所有ê，lóng講，O-ló、尊貴、榮光、權勢，lóng歸hō͘坐tī座位ê，kap羊羔，到代代無盡。Koh thiaⁿ-kìⁿ tī thiⁿ tī tōe, kap tōe ê ē-bīn, kap hái-bīn, it-chhè siū chō ê mi̍h, kap kî-tiong hoān só͘ ū ê, lóng kóng, O-ló, chun-kùi, êng-kng, koân-sè, lóng kui hō͘ chē tī chō-ūi ê, kap Iûⁿ-ko, kàu tāi-tāi bô chīn.

14四個活物講，À-bēng；hiah-ê長老就仆teh拜。Sì ê oa̍h mi̍h kóng, À-bēng; hiah ê tiúⁿ-ló chiū phak-teh pài.