1我看見坐tī座位ê，chiàⁿ手the̍h一卷，內外lóng有文字，用七個印封密。Góa khòaⁿ-kìⁿ chē tī chō-ūi ê, chiàⁿ chhiú the̍h chi̍t kńg, lāi-gōa lóng ū bûn-jī, ēng chhit ê ìn hong-ba̍t.

2Koh看見有權能ê天使，大聲宣傳講，Chī-chūi能堪得開hit卷，來拆開伊ê印。Koh khòaⁿ-kìⁿ ū koân-lêng ê thiⁿ-sài, tōa siaⁿ soan-thoân kóng, Chī-chūi ōe kham-tit khui hit kńg, lâi thiah-khui i ê ìn.

3Tī天裡，kap地裡，kap地ê下面，無一個能開hit卷，á是看伊。Tī thiⁿ-ni̍h, kap tōe-ni̍h, kap tōe ê ē-bīn, bô chi̍t-ê ōe khui hit kńg, á-sī khòaⁿ i.

4既然chhē無一個能堪得開hit卷，á是看伊ê，我就大啼哭。Kì-jiân chhē bô chi̍t-ê ōe kham-tit khui hit kńg, á-sī khòaⁿ i ê, góa chiū tōa thî-khàu.

5Hiah-ê長老ê一個kā我講，莫得啼哭；你看，猶大支派ê獅，大衛ê根頭，已經得勝，thang來開chit卷，kap hiah-ê七個印。Hiah ê tiúⁿ-ló ê chi̍t-ê kā góa kóng, Bo̍h-tit thî-khàu; lí khòaⁿ, Iû-tāi chi-phài ê sai, Tāi-pi̍t ê kun-thâu, í-keng tek-sèng, thang lâi khui chit kńg, kap hiah ê chhit ê ìn.

6我就看見tī座位kap四位ê活物ê中間，kap tī hiah-ê長老ê中間，有羊羔khiā-teh，親像bat受thâi，有七支角，七蕊目睭，就是上帝ê七個神，奉差到普天下ê。Góa chiū khòaⁿ-kìⁿ tī chō-ūi kap sì ūi ê oa̍h mi̍h ê tiong-kan, kap tī hiah ê tiúⁿ-ló ê tiong-kan, ū Iûⁿ-ko khiā-teh, chhin-chhiūⁿ bat siū thâi, ū chhit ki kak, chhit lúi ba̍k-chiu, chiū-sī Siōng-tè ê chhit ê Sîn, hōng-chhe kàu phó͘ thiⁿ-ē ê.

7伊就進前，tùi hit-ê坐tī座位ê ê chiàⁿ手the̍h hit卷。I chiū chìn-chêng, tùi hit ê chē tī chō-ūi ê ê chiàⁿ chhiú the̍h hit kńg.

8伊the̍h hit卷ê時，就四個活物kap二十四個長老，lóng仆tī羊羔ê面前；ta̍k-ê有琴kap金爐，tóe香滿滿，香就是聖徒ê祈禱。I the̍h hit kńg ê sî, chiū sì ê oa̍h mi̍h kap jī-cha̍p-sì ê tiúⁿ-ló, lóng phak tī Iûⁿ-ko ê bīn-chêng; ta̍k-ê ū khîm kap kim lô͘, tóe hiuⁿ móa-móa, hiuⁿ chiū-sī sèng-tô͘ ê kî-tó.

9也吟新ê詩講，你堪得the̍h hit卷，來開伊ê印；因為你受thâi，bat用你ê血tùi ta̍k族，ta̍k腔口，ta̍k號百姓，ta̍k國，買人來歸上帝；Iā gîm sin ê si kóng, Lí kham-tit the̍h hit kńg, lâi khui i ê ìn; in-ūi lí siū thâi, bat ēng lí ê huih tùi ta̍k cho̍k, ta̍k khiuⁿ-kháu, ta̍k hō peh-sìⁿ, ta̍k kok, bóe lâng lâi kui Siōng-tè;

10hō͘ in做國，做祭司，來服事上帝；in亦beh做王tī地上。hō͘ in chòe kok, chòe chè-si, lâi ho̍k-sāi Siōng-tè; in ia̍h beh chòe ông tī tōe-chiūⁿ.

11我koh看，就聽見座位，kap活物，kap長老ê周圍chōe-chōe天使ê聲；in ê額數千千萬萬；Góa koh khòaⁿ, chiū thiaⁿ-kìⁿ chō-ūi, kap oa̍h mi̍h, kap tiúⁿ-ló ê chiu-ûi chōe-chōe thiⁿ-sài ê siaⁿ; in ê gia̍h-siàu chheng-chheng bān-bān;

12大聲講，受thâi ê羊羔，合宜得tio̍h權能、富有、智慧、氣力、尊貴、榮光、o-ló。tōa siaⁿ kóng, Siū thâi ê Iûⁿ-ko, ha̍p-gî tit-tio̍h koân-lêng, pù-ū, tì-hūi, khùi-la̍t, chun-kùi, êng-kng, o-ló.

13Koh聽見tī天tī地，kap地ê下面，kap海面，一切受造ê物，kap其中凡所有ê，lóng講，O-ló、尊貴、榮光、權勢，lóng歸hō͘坐tī座位ê，kap羊羔，到代代無盡。Koh thiaⁿ-kìⁿ tī thiⁿ tī tōe, kap tōe ê ē-bīn, kap hái-bīn, it-chhè siū chō ê mi̍h, kap kî-tiong hoān só͘ ū ê, lóng kóng, O-ló, chun-kùi, êng-kng, koân-sè, lóng kui hō͘ chē tī chō-ūi ê, kap Iûⁿ-ko, kàu tāi-tāi bô chīn.

14四個活物講，À-bēng；hiah-ê長老就仆teh拜。Sì ê oa̍h mi̍h kóng, À-bēng; hiah ê tiúⁿ-ló chiū phak-teh pài.

1羊羔開七個印ê一個，hit時我teh看，就聽見四個活物ê一個，伊ê聲親像雷，講，來ah。Iûⁿ-ko khui chhit ê ìn ê chi̍t ê, hit sî góa teh khòaⁿ, chiū thiaⁿ-kìⁿ sì ê oa̍h mi̍h ê chi̍t-ê, i ê siaⁿ chhin-chhiūⁿ lûi, kóng, Lâi ah.

2我就看，有白馬，騎伊ê有kia̍h弓，亦有冕旒hō͘伊；伊就出去得勝，koh beh得勝。Góa chiū khòaⁿ, ū pe̍h bé, khiâ i ê ū kia̍h keng, ia̍h ū bián-liû hō͘ i; i chiū chhut-khì tek-sèng, koh beh tek-sèng.

3開第二個印ê時，我聽見第二個活物講，來ah。Khui tē jī ê ìn ê sî, góa thiaⁿ-kìⁿ tē jī ê oa̍h mi̍h kóng, Lâi ah.

4Koh有一隻馬出來，是赤ê，有權柄hō͘ hit-ê騎馬ê，tùi地上搶奪和平，hō͘人相thâi；koh有將大支刀hō͘伊。Koh ū chi̍t chiah bé chhut lâi, sī chhiah ê, ū koân-pèng hō͘ hit ê khiâ bé ê, tùi tōe-chiūⁿ chhiúⁿ-toa̍t hô-pêng, hō͘ lâng saⁿ-thâi; koh ū chiong tōa ki to hō͘ i.

5開第三個印ê時，我聽見第三個活物講，來ah。我就看，有烏馬，騎伊ê，手kia̍h秤。Khui tē saⁿ ê ìn ê sî, góa thiaⁿ-kìⁿ tē saⁿ ê oa̍h mi̍h kóng, Lâi ah. Góa chiū khòaⁿ, ū o͘ bé, khiâ i ê, chhiú kia̍h chhìn.

6我聽見四個活物ê中間親像有聲講，麥一升(chin)一個銀á，大麥三升也一個銀á；油kap酒m̄-thang phah pháiⁿ。Góa thiaⁿ-kìⁿ sì ê oa̍h mi̍h ê tiong-kan chhin-chhiūⁿ ū siaⁿ kóng, Be̍h chi̍t chin chi̍t ê gûn-á, tōa-be̍h saⁿ chin iā chi̍t ê gûn-á; iû kap chiú m̄ thang phah pháiⁿ.

7開第四個印ê時，我聽見第四個活物ê聲講，來ah。Khui tē sì ê ìn ê sî, góa thiaⁿ-kìⁿ tē sì ê oa̍h mi̍h ê siaⁿ kóng, Lâi ah.

8我就看，有火灰色ê馬；騎伊ê，伊ê名叫做死；陰府tè伊ê後面同行；有權柄hō͘ in，thang治理地上ê四份一；用刀劍、飢荒、瘟疫、kap地上ê野獸來滅伊。Góa chiū khòaⁿ, ū hé-hu-sek ê bé; khiâ i ê, i ê miâ kiò chòe Sí; Im-hú tè i ê āu-bīn tâng kiâⁿ; ū koân-pèng hō͘ in, thang tī-lí tōe-chiūⁿ ê sì hūn chi̍t; ēng to-kiàm, ki-hng, un-e̍k, kap tōe-chiūⁿ ê iá-siù lâi bia̍t i.

9開第五個印ê時，我看見祭壇ê，有為tio̍h上帝ê道理，kap為tio̍h in所執守ê干證，來受thâi ê人ê靈魂；Khui tē gō͘ ê ìn ê sî, góa khòaⁿ-kìⁿ chè-tôaⁿ ê, ū ūi-tio̍h Siōng-tè ê tō-lí, kap ūi-tio̍h in só͘ chip-siú ê kan-chèng, lâi siū thâi ê lâng ê lêng-hûn;

10大聲喉叫講，聖，koh真ê主宰ah，你無審判tiàm-tī地上ê人，來伸阮流血ê冤，beh到甚麼時ah？tōa siaⁿ âu-kiò kóng, Sèng, koh chin ê Chú-cháiⁿ ah, lí bô sím-phòaⁿ tiàm tī tōe-chiūⁿ ê lâng, lâi sin goán lâu huih ê oan, beh kàu sím-mi̍h sî ah?

11就有白衫hō͘ in ta̍k人，koh kā in講，tio̍h請歇淡薄久，thèng候同做奴僕ê kap兄弟，就是beh親像in受thâi ê，數額一盡滿。Chiū ū pe̍h saⁿ hō͘ in ta̍k lâng, koh kā in kóng, tio̍h chhiáⁿ hioh tām-po̍h kú, thèng-hāu tâng chòe lô͘-po̍k ê kap hiaⁿ-tī, chiū-sī beh chhin-chhiūⁿ in siū thâi ê, siàu-gia̍h it-chīn móa.

12我看伊開第六個印ê時，地大振動，日變烏親像麻烏布，月kui-ê親像血；Góa khòaⁿ I khui tē 6 ê ìn ê sî, tōe tōa tín-tāng, ji̍t pìⁿ o͘ chhin-chhiūⁿ mô͘-o͘-pò͘, ge̍h kui-ê chhin-chhiūⁿ huih;

13天星墮落地，親像無花果樹hō͘大風所搖，lak未熟ê果子一樣。thiⁿ chhiⁿ tūi-lo̍h tōe, chhin-chhiūⁿ bû-hoa-kó chhiū hō͘ tōa hong só͘ iô, lak bē se̍k ê ké-chí chi̍t iūⁿ.

14天就tú-tio̍h遷徙，親像chhat捲起來；山kap海嶼lóng走choa̍h。Thiⁿ chiū tú-tio̍h chhian-sóa, chhin-chhiūⁿ chhat kńg-khí-lâi; soaⁿ kap hái-sū lóng cháu-choa̍h.

15地上chiah-ê王、大夫、千總、富人、猛人，以及lóng總做奴僕ê，自由ê，家己bih tī山洞山巖。Tōe-chiūⁿ chiah ê ông, tāi-hu, chhian-chóng, pù lâng, béng lâng, í-ki̍p lóng-chóng chòe lô͘-po̍k ê, chū-iû ê, ka-kī bih tī soaⁿ-tōng soaⁿ-giâm.

16Tùi山kap巖講，Teh tī阮ê頂面，遮蓋阮，thang閃避hit-ê坐tī座位ê ê面，kap羊羔ê受氣。Tùi soaⁿ kap giâm kóng, Teh tī goán ê téng-bīn, jia-khàm goán, thang siám-pī hit ê chē tī chō-ūi ê ê bīn, kap Iûⁿ-ko ê siū-khì.

17因為in受氣ê大日已經到lah，是誰 khiā能tiâu ah？In-ūi in siū-khì ê tōa ji̍t í-keng kàu lah, chī-chūi khiā ōe tiâu ah?

1Chiah-ê tāi-chì了後，我看見四個天使khiā tī地ê四角頭，執掌地ê四面風，hō͘伊無吹tī地，tī海，kap一概ê樹。Chiah ê tāi-chì liáu-āu góa khòaⁿ-kìⁿ sì ê thiⁿ-sài khiā tī tōe ê sì kak-thâu, chip-chiáng tōe ê sì-bīn hong, hō͘ i bô chhe tī tōe, tī hái, kap it-khài ê chhiū.

2Koh看見別個天使tùi日出ê所在上來，the̍h真活上帝ê印；tùi hiah-ê得tio̍h權，來相害地kap海，四個天使大聲叫，講，Koh khòaⁿ-kìⁿ pa̍t ê thiⁿ-sài tùi ji̍t-chhut ê só͘-chāi chiūⁿ-lâi, the̍h chin-oa̍h Siōng-tè ê ìn; tùi hiah ê tit-tio̍h koân, lâi siong-hāi tōe kap hái, sì ê thiⁿ-sài tōa siaⁿ kiò, kóng,

3地kap海kap樹，lín莫得相害，thèng候阮蓋印tī咱ê上帝ê奴僕ê頭額。Tōe kap hái kap chhiū lín bo̍h-tit siong-hāi, thèng-hāu goán khàm-ìn tī lán ê Siōng-tè ê lô͘-po̍k ê thâu-hia̍h.

4我就聽見受蓋印ê ê數額；以色列ê kiaⁿ孫眾支派ê中間受蓋印ê，共有十四萬四千。Góa chiū thiaⁿ-kìⁿ siū khàm-ìn ê ê siàu-gia̍h; Í-sek-lia̍t ê kiáⁿ-sun chèng chi-phài ê tiong-kan siū khàm-ìn ê, kiōng ū cha̍p-sì-bān sì-chheng.

5屬猶大ê支派受蓋印ê，一萬兩千： 屬Liû-piān ê支派，一萬兩千： 屬Ka-tek ê支派，一萬兩千：Sio̍k Iû-tāi ê chi-phài siū khàm-ìn ê, chi̍t-bān nn̄g-chheng: Sio̍k Liû-piān ê chi-phài, chi̍t-bān nn̄g-chheng: Sio̍k Ka-tek ê chi-phài, chi̍t-bān nn̄g-chheng:

6屬A-siat ê支派，一萬兩千： 屬La̍p-tāi-lī ê支派，一萬兩千： 屬Má-ná-se ê支派，一萬兩千：Sio̍k A-siat ê chi-phài, chi̍t-bān nn̄g-chheng: Sio̍k La̍p-tāi-lī ê chi-phài, chi̍t-bān nn̄g-chheng: Sio̍k Má-ná-se ê chi-phài, chi̍t-bān nn̄g-chheng:

7屬西門ê支派，一萬兩千： 屬利未ê支派，一萬兩千： 屬Í-sat-ka ê支派，一萬兩千：Sio̍k Se-biān ê chi-phài, chi̍t-bān nn̄g-chheng: Sio̍k Lī-bī ê chi-phài, chi̍t-bān nn̄g-chheng: Sio̍k Í-sat-ka ê chi-phài, chi̍t-bān nn̄g-chheng:

8屬Se-pò͘-lûn ê支派，一萬兩千： 屬約瑟ê支派，一萬兩千： 屬便雅憫ê支派，一萬兩千。Sio̍k Se-pò͘-lûn ê chi-phài, chi̍t-bān nn̄g-chheng: Sio̍k Iok-sek ê chi-phài, chi̍t-bān nn̄g-chheng: Sio̍k Piān-ngá-bín ê chi-phài, chi̍t-bān nn̄g-chheng.

9Chiah-ê tāi-chì了後，我看見有kui大陣ê人，無人會算伊ê數額，出tī ta̍k國，ta̍k族，ta̍k號百姓，ta̍k樣腔口ê，khiā tī座位ê面前，穿白衫，手kia̍h棕樹枝；Chiah ê tāi-chì liáu-āu, góa khòaⁿ-kìⁿ ū kui tōa tīn ê lâng, bô lâng ōe sǹg i ê siàu-gia̍h, chhut tī ta̍k kok, ta̍k cho̍k, ta̍k hō peh-sìⁿ, ta̍k iūⁿ khiuⁿ-kháu ê, khiā tī chō-ūi ê bīn-chêng, chhēng pe̍h saⁿ, chhiú kia̍h chang-chhiū ki;

10大聲叫講，願拯救歸tī咱ê上帝，就是坐座位ê，kap tī羊羔。tōa siaⁿ kiò kóng, Goān chín-kiù kui tī lán ê Siōng-tè, chiū-sī chē chō-ūi ê, kap tī Iûⁿ-ko.

11眾天使khiā tī座位kap長老kap四個活物ê周圍，面仆tī座位前，敬拜上帝，講，À-bēng：Chèng thiⁿ-sài khiā tī chō-ūi kap tiúⁿ-ló kap sì ê oa̍h-mi̍h ê chiu-ûi, bīn phak tī chō-ūi chêng, kèng-pài Siōng-tè, kóng, À-bēng:

12願o-ló、榮光、智慧、感謝、尊貴、權能、氣力歸tī咱ê上帝，到代代無盡。À-bēng。Goān o-ló, êng-kng, tì-hūi, kám-siā, chun-kùi, koân-lêng, khùi-la̍t kui tī lán ê Siōng-tè, kàu tāi-tāi bô chīn. À-bēng.

13長老ê中間有一個應我講，Chiah-ê穿白衫ê是是誰？tùi tá-lo̍h來ah？Tiúⁿ-ló ê tiong-kan ū chi̍t ê ìn góa kóng, Chiah ê chhēng pe̍h saⁿ ê sī chī-chūi? tùi tá-lo̍h lâi ah?

14我kā伊講，我ê主ah，你知。伊kā我講，Chiah-ê是tùi hit-ê大ê患難出來ê，bat tī羊羔ê血洗in ê衫到白白。Góa kā i kóng, Góa ê Chú ah, lí chai. I kā góa kóng, Chiah-ê sī tùi hit ê tōa ê hoān-lān chhut-lâi ê, bat tī Iûⁿ-ko ê huih sóe in ê saⁿ kàu pe̍h-pe̍h.

15所以in tī上帝ê座位前，koh tī伊ê殿暝日服事伊；坐tī座位ê beh khiā起tī in ê中間，來致蔭in。Só͘-í in tī Siōng-tè ê chō-ūi chêng, koh tī I ê tiān mî-ji̍t ho̍k-sāi I; chē tī chō-ūi ê beh khiā-khí tī in ê tiong-kan, lâi tì-ìm in.

16In無koh iau，也無koh嘴乾；日kap一切ê熱bōe pek-tio̍h in。In bô koh iau, iā bô koh chhùi-ta; ji̍t kap it-chhè ê jia̍t bōe pek-tio̍h in.

17因為座位中ê羊羔beh做in ê牧者，chhōa in到活ê水泉；koh上帝beh tùi in ê目睭拭去in lóng總ê目屎。In-ūi chō-ūi tiong ê Iûⁿ-ko beh chòe in ê bo̍k-chiá, chhōa in kàu oa̍h ê chúi-chôaⁿ; koh Siōng-tè beh tùi in ê ba̍k-chiu chhit-khì in lóng-chóng ê ba̍k-sái.