1Chiah-ê tāi-chì了後，我看見四個天使khiā tī地ê四角頭，執掌地ê四面風，hō͘伊無吹tī地，tī海，kap一概ê樹。Chiah ê tāi-chì liáu-āu góa khòaⁿ-kìⁿ sì ê thiⁿ-sài khiā tī tōe ê sì kak-thâu, chip-chiáng tōe ê sì-bīn hong, hō͘ i bô chhe tī tōe, tī hái, kap it-khài ê chhiū.

2Koh看見別個天使tùi日出ê所在上來，the̍h真活上帝ê印；tùi hiah-ê得tio̍h權，來相害地kap海，四個天使大聲叫，講，Koh khòaⁿ-kìⁿ pa̍t ê thiⁿ-sài tùi ji̍t-chhut ê só͘-chāi chiūⁿ-lâi, the̍h chin-oa̍h Siōng-tè ê ìn; tùi hiah ê tit-tio̍h koân, lâi siong-hāi tōe kap hái, sì ê thiⁿ-sài tōa siaⁿ kiò, kóng,

3地kap海kap樹，lín莫得相害，thèng候阮蓋印tī咱ê上帝ê奴僕ê頭額。Tōe kap hái kap chhiū lín bo̍h-tit siong-hāi, thèng-hāu goán khàm-ìn tī lán ê Siōng-tè ê lô͘-po̍k ê thâu-hia̍h.

4我就聽見受蓋印ê ê數額；以色列ê kiaⁿ孫眾支派ê中間受蓋印ê，共有十四萬四千。Góa chiū thiaⁿ-kìⁿ siū khàm-ìn ê ê siàu-gia̍h; Í-sek-lia̍t ê kiáⁿ-sun chèng chi-phài ê tiong-kan siū khàm-ìn ê, kiōng ū cha̍p-sì-bān sì-chheng.

5屬猶大ê支派受蓋印ê，一萬兩千： 屬Liû-piān ê支派，一萬兩千： 屬Ka-tek ê支派，一萬兩千：Sio̍k Iû-tāi ê chi-phài siū khàm-ìn ê, chi̍t-bān nn̄g-chheng: Sio̍k Liû-piān ê chi-phài, chi̍t-bān nn̄g-chheng: Sio̍k Ka-tek ê chi-phài, chi̍t-bān nn̄g-chheng:

6屬A-siat ê支派，一萬兩千： 屬La̍p-tāi-lī ê支派，一萬兩千： 屬Má-ná-se ê支派，一萬兩千：Sio̍k A-siat ê chi-phài, chi̍t-bān nn̄g-chheng: Sio̍k La̍p-tāi-lī ê chi-phài, chi̍t-bān nn̄g-chheng: Sio̍k Má-ná-se ê chi-phài, chi̍t-bān nn̄g-chheng:

7屬西門ê支派，一萬兩千： 屬利未ê支派，一萬兩千： 屬Í-sat-ka ê支派，一萬兩千：Sio̍k Se-biān ê chi-phài, chi̍t-bān nn̄g-chheng: Sio̍k Lī-bī ê chi-phài, chi̍t-bān nn̄g-chheng: Sio̍k Í-sat-ka ê chi-phài, chi̍t-bān nn̄g-chheng:

8屬Se-pò͘-lûn ê支派，一萬兩千： 屬約瑟ê支派，一萬兩千： 屬便雅憫ê支派，一萬兩千。Sio̍k Se-pò͘-lûn ê chi-phài, chi̍t-bān nn̄g-chheng: Sio̍k Iok-sek ê chi-phài, chi̍t-bān nn̄g-chheng: Sio̍k Piān-ngá-bín ê chi-phài, chi̍t-bān nn̄g-chheng.

9Chiah-ê tāi-chì了後，我看見有kui大陣ê人，無人會算伊ê數額，出tī ta̍k國，ta̍k族，ta̍k號百姓，ta̍k樣腔口ê，khiā tī座位ê面前，穿白衫，手kia̍h棕樹枝；Chiah ê tāi-chì liáu-āu, góa khòaⁿ-kìⁿ ū kui tōa tīn ê lâng, bô lâng ōe sǹg i ê siàu-gia̍h, chhut tī ta̍k kok, ta̍k cho̍k, ta̍k hō peh-sìⁿ, ta̍k iūⁿ khiuⁿ-kháu ê, khiā tī chō-ūi ê bīn-chêng, chhēng pe̍h saⁿ, chhiú kia̍h chang-chhiū ki;

10大聲叫講，願拯救歸tī咱ê上帝，就是坐座位ê，kap tī羊羔。tōa siaⁿ kiò kóng, Goān chín-kiù kui tī lán ê Siōng-tè, chiū-sī chē chō-ūi ê, kap tī Iûⁿ-ko.

11眾天使khiā tī座位kap長老kap四個活物ê周圍，面仆tī座位前，敬拜上帝，講，À-bēng：Chèng thiⁿ-sài khiā tī chō-ūi kap tiúⁿ-ló kap sì ê oa̍h-mi̍h ê chiu-ûi, bīn phak tī chō-ūi chêng, kèng-pài Siōng-tè, kóng, À-bēng:

12願o-ló、榮光、智慧、感謝、尊貴、權能、氣力歸tī咱ê上帝，到代代無盡。À-bēng。Goān o-ló, êng-kng, tì-hūi, kám-siā, chun-kùi, koân-lêng, khùi-la̍t kui tī lán ê Siōng-tè, kàu tāi-tāi bô chīn. À-bēng.

13長老ê中間有一個應我講，Chiah-ê穿白衫ê是是誰？tùi tá-lo̍h來ah？Tiúⁿ-ló ê tiong-kan ū chi̍t ê ìn góa kóng, Chiah ê chhēng pe̍h saⁿ ê sī chī-chūi? tùi tá-lo̍h lâi ah?

14我kā伊講，我ê主ah，你知。伊kā我講，Chiah-ê是tùi hit-ê大ê患難出來ê，bat tī羊羔ê血洗in ê衫到白白。Góa kā i kóng, Góa ê Chú ah, lí chai. I kā góa kóng, Chiah-ê sī tùi hit ê tōa ê hoān-lān chhut-lâi ê, bat tī Iûⁿ-ko ê huih sóe in ê saⁿ kàu pe̍h-pe̍h.

15所以in tī上帝ê座位前，koh tī伊ê殿暝日服事伊；坐tī座位ê beh khiā起tī in ê中間，來致蔭in。Só͘-í in tī Siōng-tè ê chō-ūi chêng, koh tī I ê tiān mî-ji̍t ho̍k-sāi I; chē tī chō-ūi ê beh khiā-khí tī in ê tiong-kan, lâi tì-ìm in.

16In無koh iau，也無koh嘴乾；日kap一切ê熱bōe pek-tio̍h in。In bô koh iau, iā bô koh chhùi-ta; ji̍t kap it-chhè ê jia̍t bōe pek-tio̍h in.

17因為座位中ê羊羔beh做in ê牧者，chhōa in到活ê水泉；koh上帝beh tùi in ê目睭拭去in lóng總ê目屎。In-ūi chō-ūi tiong ê Iûⁿ-ko beh chòe in ê bo̍k-chiá, chhōa in kàu oa̍h ê chúi-chôaⁿ; koh Siōng-tè beh tùi in ê ba̍k-chiu chhit-khì in lóng-chóng ê ba̍k-sái.

1開第七ê印ê時，天裡靜靜，約略半點鐘久。Khui tē chhit ê ìn ê sî, thiⁿ-ni̍h chēng-chēng, iok-lio̍k pòaⁿ-tiám cheng kú.

2我看見hiah-ê khiā tī上帝ê面前七個天使；koh有七支號頭hō͘ in。Góa khòaⁿ-kìⁿ hiah ê khiā tī Siōng-tè ê bīn-chêng chhit ê thiⁿ-sài; koh ū chhit ki hō-thâu hō͘ in.

3也有一個天使來khiā tī祭壇邊，the̍h金香爐；Iā ū chi̍t ê thiⁿ-sài lâi khiā tī chè-tôaⁿ piⁿ, the̍h kim hiuⁿ-lô͘;

4有chōe-chōe香hō͘伊，thang chham tī眾聖徒ê祈禱，tī座位前ê金壇頂。香煙kap聖徒ê祈禱tùi天使ê手chhèng到上帝ê面前。ū chōe-chōe hiuⁿ hō͘ i, thang chham tī chèng sèng-tô͘ ê kî-tó, tī chō-ūi chêng ê kim-tôaⁿ-téng. Hiuⁿ-ian kap sèng-tô͘ ê kî-tó tùi thiⁿ-sài ê chhiú chhèng kàu Siōng-tè ê bīn-chêng.

5天使the̍h hit-ê香爐，將壇裡ê火tóe到滿，hiat tī地裡；就有雷tân，kap chiah-ê聲，kap sih-nà，kap地動。Thiⁿ-sài the̍h hit ê hiuⁿ-lô͘, chiong tôaⁿ-ni̍h ê hé tóe kàu móa, hiat tī tōe-ni̍h; chiū ū lûi tân, kap chiah ê siaⁿ, kap sih-nà, kap tōe-tāng.

6Kia̍h七支號頭ê七個天使，就備辦beh pûn。Kia̍h chhit ki hō-thâu ê chhit ê thiⁿ-sài, chiū pī-pān beh pûn.

7頭一個天使pûn，就有雹kap火用血相chham hiat tī地裡；地三份ê一份燒lio去，樹木三份ê一份燒lio去，一切ê星草也燒lio去。Thâu-chi̍t ê thiⁿ-sài pûn, chiū ū pha̍uh kap hé ēng huih saⁿ-chham hiat tī tōe-ni̍h; tōe saⁿ hūn ê chi̍t hūn sio-lio-khì, chhiū-ba̍k saⁿ hūn ê chi̍t hūn sio-lio-khì, it-chhè ê chhiⁿ chháu iā sio-lio-khì.

8第二個天使pûn，就有親像火teh燒ê大山hiat落海；海三份ê一份就變做血；Tē jī ê thiⁿ-sài pûn, chiū ū chhin-chhiūⁿ hé teh sio ê tōa soaⁿ hiat-lo̍h hái; hái saⁿ hūn ê chi̍t hūn chiū pìⁿ-chòe huih;

9海內所有ê活物三份死一份；船隻也三份破一份。hái-lāi só͘ ū ê oa̍h-mi̍h saⁿ hūn sí chi̍t hūn; chûn-chiah iā saⁿ-hūn phòa chi̍t hūn.

10第三個天使pûn，有大粒星teh to̍h親像火把，tùi天墜落來；就墜tī江河三份ê一份，以及tī chiah-ê水泉；Tē saⁿ ê thiⁿ-sài pûn, ū tōa lia̍p chhiⁿ teh to̍h chhin-chhiūⁿ hé-pé, tùi thiⁿ tūi-lo̍h-lâi; chiū tūi tī kang-hô saⁿ hūn ê chi̍t hūn, í-ki̍p tī chiah ê chúi-chôaⁿ;

11星ê名叫做In-tîn；水三份ê一份變做in-tîn；人chōe-chōe因為chiah-ê水來死，因為伊是苦。chhiⁿ ê miâ kiò chòe In-tîn; chúi saⁿ hūn ê chi̍t hūn pìⁿ-chòe in-tîn; lâng chōe-chōe in-ūi chiah ê chúi lâi sí, in-ūi i sī khó͘.

12第四個天使pûn，日ê三份一，月ê三份一，星ê三份一，受攻擊，致到in三份ê一份變做暗；日時三份ê一份無光；暝時也是án-ni。Tē sì ê thiⁿ-sài pûn, ji̍t ê saⁿ hūn chi̍t, ge̍h ê saⁿ hūn chi̍t, chhiⁿ ê saⁿ hūn chi̍t, siū kong-kek, tì-kàu in saⁿ hūn ê chi̍t hūn pìⁿ-chòe àm; ji̍t-sî saⁿ hūn ê chi̍t hūn bô kng; mî-sî iā sī án-ni.

13我koh看，就聽見一隻鷹飛tī天中，大聲講，因為其餘號頭ê聲，就是三個天使所beh pûn ê，khiā起地上ê人有災禍，有災禍，有災禍。Góa koh khòaⁿ, chiū thiaⁿ-kìⁿ chi̍t chiah eng pe tī thiⁿ-tiong, tōa siaⁿ kóng, In-ūi kî-û hō-thâu ê siaⁿ, chiū-sī saⁿ ê thiⁿ-sài só͘ beh pûn ê, khiā-khí tōe-chiūⁿ ê lâng ū chai-ē, ū chai-ē, ū chai-ē.

1第五個天使pûn，我就看見一粒星已經tùi天墜落地；有將無底深坑ê鎖匙hō͘伊。Tē gō͘ ê thiⁿ-sài pûn, góa chiū khòaⁿ-kìⁿ chi̍t lia̍p chhiⁿ í-keng tùi thiⁿ tūi-lo̍h tōe; ū chiong bô tóe chhim-khiⁿ ê só-sî hō͘ i.

2到伊開無底ê深坑，就煙tùi深坑chhèng起來親像大火爐ê煙；日kap空氣lóng因為深坑ê煙就暗。Kàu i khui bô tóe ê chhim-khiⁿ, chiū ian tùi chhim-khiⁿ chhèng-khí-lâi chhin-chhiūⁿ tōa hé-lô͘ ê ian; ji̍t kap khong-khì lóng in-ūi chhim-khiⁿ ê ian chiū àm.

3有草蜢tùi hit-ê煙出來tī地裡；有權hō͘ in，親像地裡ê蠍á蟲有權一樣。Ū chháu-meh tùi hit ê ian chhut-lâi tī tōe-ni̍h; ū koân hō͘ in, chhin-chhiūⁿ tōe-ni̍h ê giat-á-thâng ū koân chi̍t iūⁿ.

4Koh有kā in講，m̄-thang相害地ê草，kap一切星ê物，kap ta̍k樣ê樹木，獨獨相害hiah-ê tī頭額無有上帝ê印ê人。Koh ū kā in kóng, m̄ thang siong-hāi tōe ê chháu, kap it-chhè chhiⁿ ê mi̍h, kap ta̍k iūⁿ ê chhiū-ba̍k, to̍k-to̍k siong-hāi hiah ê tī thâu-hia̍h bô ū Siōng-tè ê ìn ê lâng.

5Koh命令in m̄-thang害死in，只有hō͘ in痛疼五月日久；in ê痛疼親像蠍á蟲螫(chhioh)人ê痛疼一樣。Koh bēng-lēng in m̄ thang hāi-sí in, chí ū hō͘ in thàng-thiàⁿ gō͘ ge̍h ji̍t kú; in ê thàng-thiàⁿ chhin-chhiūⁿ giat-á-thâng chhioh lâng ê thàng-thiàⁿ chi̍t iūⁿ.

6Tī hiah-ê日人beh求死，也bōe得tio̍h；ài beh死，也死閃避伊。Tī hiah ê ji̍t lâng beh kiû sí, iā bōe tit-tio̍h; ài beh sí, iā sí siám-pī i.

7草蜢ê款式親像備辦出戰ê馬；頭殼頂彷彿有冕旒親像金；in ê面親像人ê面。Chháu-meh ê khoán-sit chhin-chhiūⁿ pī-pān chhut-chiàn ê bé; thâu-khak téng hóng-hut ū bián-liû chhin-chhiūⁿ kim; in ê bīn chhin-chhiūⁿ lâng ê bīn.

8有頭毛親像婦人人ê頭毛；in ê牙親像獅ê牙。Ū thâu-mn̂g chhin-chhiūⁿ hū-jîn-lâng ê thâu-mn̂g; in ê gê chhin-chhiūⁿ sai ê gê.

9Koh有護心鏡親像鐵ê護心鏡；in ê翼ê聲親像chōe-chōe 車馬走去交戰ê聲。Koh ū hō͘-sim-kiàⁿ chhin-chhiūⁿ thih ê hō͘-sim-kiàⁿ; in ê si̍t ê siaⁿ chhin-chhiūⁿ chōe-chōe chhia-bé cháu khì kau-chiàn ê siaⁿ.

10In有尾親像蠍á蟲也有刺；in ê權會相害人五月日，是tī in ê尾。In ū bé chhin-chhiūⁿ giat-á-thâng iā ū chhì; in ê koân ōe siong-hāi lâng gō͘ ge̍h-ji̍t, sī tī in ê bé.

11做in ê王ê就是深坑ê差使；希伯來ê音，名叫A-pa-tùn；希利尼ê音，名叫A-pho-lûn。Chòe in ê ông ê chiū-sī chhim-khiⁿ ê chhe-sài; Hi-pek-lâi ê im, miâ kiò A-pa-tùn; Hi-lī-nî ê im, miâ kiò A-pho-lûn.

12頭一個災禍已經過身；hiah-ê tāi-chì以後，iáu有兩項災禍beh到。Thâu chi̍t ê chai-ē í-keng kè-sin; hiah ê tāi-chì í-āu, iáu ū nn̄g hāng chai-ē beh kàu.

13第六個ê天使pûn，我就聽見有一個聲tùi上帝面前ê金壇chiah-ê角出來，Tē la̍k ê thiⁿ-sài pûn, góa chiū thiaⁿ-kìⁿ ū chi̍t ê siaⁿ tùi Siōng-tè bīn-chêng ê kim-tôaⁿ chiah ê kak chhut-lâi,

14kā hit-ê kia̍h號頭ê第六個天使講，縛tī Pek-lat大河hit四個天使，你tio̍h tháu放in。kā hit ê kia̍h hō-thâu ê tē la̍k ê thiⁿ-sài kóng, Pa̍k tī Pek-lat tōa hô hit sì ê thiⁿ-sài, lí tio̍h tháu-pàng in.

15Hit四個天使受tháu放，就是所備辦到 hit-ê時、日、月、年，beh害死人三份ê一份ê。Hit sì ê thiⁿ-sài siū tháu-pàng, chiū-sī só͘ pī-pān kàu hit ê sî, ji̍t, ge̍h, nî, beh hāi-sí lâng saⁿ hūn ê chi̍t hūn ê.

16馬兵ê數額有兩萬萬；in ê數額我聽見lah。Bé-peng ê siàu-gia̍h ū nn̄g-bān-bān; in ê siàu-gia̍h góa thiaⁿ-kìⁿ lah.

17我tī異象中看見馬kap騎馬ê親像án-ni；in有護心鏡親像火，親像紫色ê玉，親像琉磺；馬頭是親像獅ê頭；tùi in ê嘴出火kap煙kap琉磺。Góa tī īⁿ-siōng tiong khòaⁿ-kìⁿ bé kap khiâ bé ê chhin-chhiūⁿ án-ni; in ū hō͘-sim-kiàⁿ chhin-chhiūⁿ hé, chhin-chhiūⁿ chí-sek ê ge̍k, chhin-chhiūⁿ jiû-n̂g; bé thâu sī chhin-chhiūⁿ sai ê thâu; tùi in ê chhùi chhut hé kap ian kap jiû-n̂g.

18Tùi in ê嘴所出來ê火kap煙kap琉磺，chit三項ê災禍，人三份ê一份tú-tio̍h害死。Tùi in ê chhùi só͘ chhut-lâi ê hé kap ian kap jiû-n̂g, chit saⁿ hāng ê chai-ē, lâng saⁿ hūn ê chi̍t hūn tú-tio̍h hāi-sí.

19Hiah-ê馬ê權在tī in ê嘴，koh在tī in ê尾；因為in ê尾是親像蛇，koh有頭；用hiah-ê相害人。Hiah ê bé ê koân chāi-tī in ê chhùi, koh chāi-tī in ê bé; in-ūi in ê bé sī chhin-chhiūⁿ chôa, koh ū thâu; ēng hiah-ê siong-hāi lâng.

20其餘ê人，無tùi chiah-ê災禍死ê，iáu-kú無反悔，來改in ê手所做，猶原拜chiah-ê鬼，kap bōe-ōe看，bōe-ōe聽，bōe-ōe行，金、銀、銅、石、柴ê偶像；Kî-û ê lâng, bô tùi chiah ê chai-ē sí ê, iáu-kú bô hoán-hóe, lâi kóe in ê chhiú só͘ chòe, iû-goân pài chiah ê kúi, kap bōe ōe khòaⁿ, bōe ōe thiaⁿ, bōe ōe kiâⁿ, kim, gûn, tâng, chio̍h, chhâ ê ngó͘-siōng;

21koh無反悔來改in ê thâi人、邪術、淫亂、偷the̍h。koh bô hoán-hóe lâi kóe in ê thâi-lâng, siâ-su̍t, îm-loān, thau-the̍h.