1我tiàm-tī基督講話真實無白賊，我ê良心tī聖神kap我saⁿ-kap做干證，Góa tiàm-tī Ki-tok kóng ōe chin-si̍t bô pe̍h-chha̍t, góa ê liông-sim tī Sèng Sîn kap góa saⁿ-kap chòe kan-chèng,

2我有大憂悶，痛心無soah。góa ū tōa iu-būn, thòng-sim bô soah.

3因為我為tio̍h我ê兄弟，我ê骨肉ê至親，就若本身受咒詛離開基督也甘願。In-ūi góa ūi-tio̍h góa ê hiaⁿ-tī, góa ê kut-jio̍k ê chì-chhin, chiū nā pún-sin siū chiù-chó͘ lī-khui Ki-tok iā kam-goān.

4in是以色列人，有做kiáⁿ ê名份，有榮光，有chiah-ê約，有律法ê傳授，有服事ê禮儀，kap chiah-ê應允，lóng屬tī in；In sī Í-sek-lia̍t lâng, ū chòe kiáⁿ ê bêng-hūn, ū êng-kng, ū chiah ê iok, ū lu̍t-hoat ê thoân-siū, ū ho̍k-sāi ê lé-gî, kap chiah ê èng-ún, lóng sio̍k tī in;

5列祖是in ê祖，照肉體來論，基督也對in出；伊是萬物ê頂面，是上帝，堪得o-ló到代代ê。À-bēng。lia̍t-chó͘ sī in ê chó͘, chiàu jio̍k-thé lâi lūn, Ki-tok iā tùi in chhut; I sī bān mi̍h ê téng-bīn, sī Siōng-tè, kham-tit o-ló kàu tāi-tāi ê. À-bēng.

6m̄是講上帝ê話廢棄；因為tùi以色列出ê，無一盡是以色列人。M̄ sī kóng Siōng-tè ê ōe hòe-khì; in-ūi tùi Í-sek-lia̍t chhut ê, bô it-chīn sī Í-sek-lia̍t lâng.

7也m̄是因為in做亞伯拉罕ê後裔，就一盡做kiáⁿ；獨獨，tī以撒ê beh稱做你ê後裔。Iā m̄ sī in-ūi in chòe A-pek-la̍h-hán ê hō͘-è, chiū it-chīn chòe kiáⁿ; to̍k-to̍k, Tī Í-sat ê beh chheng chòe lí ê hō͘-è.

8這就是講，m̄是肉體ê kiáⁿ就算做上帝ê kiáⁿ；獨獨應允ê kiáⁿ chiah算做後裔。Che chiū-sī kóng, m̄ sī jio̍k-thé ê kiáⁿ chiū sǹg chòe Siōng-tè ê kiáⁿ; to̍k-to̍k èng-ún ê kiáⁿ chiah sǹg chòe hō͘-è.

9因為應允ê話是講，照chit-ê期我beh到，撒拉beh有一個kiáⁿ。In-ūi èng-ún ê ōe sī kóng, Chiàu chit ê kî góa beh kàu, Sat-la̍h beh ū chi̍t ê kiáⁿ.

10M̄-nā án-ni，koh有利百加對咱ê祖以撒一人來懷孕，M̄ nā án-ni, koh ū Lī-pek-ka tùi lán ê chó͘ Í-sat chi̍t lâng lâi hoâi-īn,

11kiaN2iau2-未出世，好phaiN2iau2-未行，beh hō͘上帝揀選人所定tio̍h ê旨意能久長tī-teh，m̄是出tī所行，是出tī召伊ê，kiáⁿ iáu-bē chhut-sì, hó pháiⁿ iáu-bē kiâⁿ, beh hō͘ Siōng-tè kéng-soán lâng só͘ tiāⁿ-tio̍h ê chí-ì ōe kú-tn̂g tī-teh, m̄ sī chhut tī só͘ kiâⁿ, sī chhut tī tiàu i ê,

12就kā利百加講，大ê beh服事細ê。chiū kā Lī-pek-ka kóng, Tōa-ê beh ho̍k-sāi sòe-ê.

13親像所記載講，我疼雅各，怨恨以掃。Chhin-chhiūⁿ só͘ kì-chài kóng, Góa thiàⁿ Ngá-kok, oàn-hūn Í-sò.

14Án-ni咱beh怎樣講？上帝有不義mah？斷斷m̄是。Án-ni lán beh cháiⁿ-iūⁿ kóng? Siōng-tè ū put-gī mah? Toàn-toàn m̄ sī.

15因為伊kā摩西講，我beh憐憫我所憐憫ê，我beh體貼我所體貼ê。In-ūi I kā Mô͘-se kóng, Góa beh lîn-bín góa só͘ lîn-bín ê, góa beh thé-thiap góa só͘ thé-thiap ê.

16照án-ni看，不在tī意愛ê，也不在tī行ê，是在tī憐憫人ê上帝。Chiàu án-ni khòaⁿ, put-chāi tī ì-ài ê, iā put-chāi tī kiâⁿ ê, sī chāi-tī lîn-bín lâng ê Siōng-tè.

17因為聖經kā法老講，我hō͘你興起，tiâu-tî beh用你顯明我ê權能，也hō͘我ê名報揚tī普天下。In-ūi sèng-keng kā Hoat-ló kóng, Góa hō͘ lí heng-khí, tiâu-tî beh ēng lí hián-bêng góa ê koân-lêng, iā hō͘ góa ê miâ pò-iông tī phó͘ thiⁿ-ē.

18Án-ni伊隨意憐憫人，也隨意 hō͘人硬心。Án-ni I sûi-ì lîn-bín lâng, iā sûi-ì hō͘ lâng ngī-sim.

19你beh tùi我講，怎樣伊iáu teh嫌人？因為是誰逆伊ê旨意？Lí beh tùi góa kóng, Cháiⁿ-iūⁿ I iáu teh hiâm lâng? in-ūi chī-chūi ge̍k I ê chí-ì?

20你chit-ê人ah，你是誰反tńg辯駁上帝ah？受造 ê物kiám會tùi造伊ê講，你啥事創造我án-ni？Lí chit ê lâng ah, lí chī-chūi hoán-tńg piān-pok Siōng-tè ah? Siū-chō ê mi̍h kiám ōe tùi chō i ê kóng, Lí siáⁿ-sū chhòng-chō góa án-ni?

21土ê權kiám m̄是chhut-chāi燒磁ê人，平平tùi hit塊來做器具，一個貴氣一個下賤mah？Thô͘ ê koân kiám m̄ sī chhut-chāi sio-hûi ê lâng, pîⁿ-pîⁿ tùi hit tè lâi chòe khì-kū, chi̍t-ê kùi-khì chi̍t-ê hā-chiān mah?

22設使上帝ài顯明伊ê受氣，koh hō͘人bat伊ê權能，就大大寬容吞忍hiah-ê thang受氣ê器具，便便beh敗壞ê；Siat-sú Siōng-tè ài hián-bêng I ê siū-khì, koh hō͘ lâng bat I ê koân-lêng, chiū tōa-tōa khoan-iông thun-lún hiah ê thang siū-khì ê khì-kū, piān-piān beh pāi-hoāi ê;

23也hō͘人bat伊榮光ê富有到tī thang憐憫ê器具，伊所事先備辦beh得tio̍h榮光ê，iā hō͘ lâng bat I êng-kng ê pù-ū kàu tī thang lîn-bín ê khì-kū, I só͘ tāi-seng pī-pān beh tit-tio̍h êng-kng ê,

24就是咱chiah-ê hō͘伊所召ê，m̄-nā出tī猶太人，也出tī外邦人；chiū-sī lán chiah-ê hō͘ I só͘ tiàu ê, m̄ nā chhut tī Iû-thài lâng, iā chhut tī gōa-pang lâng;

25親像伊tī何西阿ê冊講， M̄是我ê百姓，我beh稱in做百姓； m̄是得tio̍h疼ê，我beh稱in做得tio̍h疼ê。chhin-chhiūⁿ I tī Hô-se-a ê chheh kóng, M̄ sī góa ê peh-sìⁿ, góa beh chheng in chòe peh-sìⁿ; M̄ sī tit-tio̍h thiàⁿ ê, góa beh chheng in chòe tit-tio̍h thiàⁿ ê.

26前tī啥所在kā in講， Lín m̄是我ê百姓， Tī hia in beh稱做真活上帝ê kiáⁿ。Chêng tī siáⁿ só͘-chāi kā in kóng, Lín m̄ sī góa ê peh-sìⁿ, Tī hia in beh chheng chòe chin-oa̍h Siōng-tè ê kiáⁿ.

27以賽亞論以色列就叫講，以色列chiah-ê kiáⁿ，雖然in ê數額親像海沙，beh得tio̍h救ê是hiah-ê所chhun ê nā-tiāⁿ。Í-sài-a lūn Í-sek-lia̍t chiū kiò kóng, Í-sek-lia̍t chiah ê kiáⁿ, sui-jiân in ê siàu-gia̍h chhin-chhiūⁿ hái-soa, beh tit-tio̍h kiù ê sī hiah ê só͘ chhun ê nā-tiāⁿ.

28因為主beh完全koh簡捷來成伊ê話tī地裡。In-ūi Chú beh oân-choân koh kán-chia̍t lâi chiâⁿ I ê ōe tī tōe-ni̍h.

29Koh親像以賽亞事先講， 若m̄是萬軍ê主kā咱留一個種teh， 就咱已經親像所多瑪kap Gô-mô͘-la̍h一樣。Koh chhin-chhiūⁿ Í-sài-a tāi-seng kóng, Nā m̄ sī Bān-kun ê Chú kā lán lâu chi̍t ê chéng teh, Chiū lán í-keng chhin-chhiūⁿ Só͘-to-má kap Gô-mô͘-la̍h chi̍t iūⁿ.

30Án-ni咱beh怎樣講？外邦人無追jip義，iáu-kú得tio̍h義，就是tùi信ê義。Án-ni lán beh cháiⁿ-iūⁿ kóng? Gōa-pang lâng bô tui-jip gī, iáu-kú tit-tio̍h gī, chiū-sī tùi sìn ê gī.

31但是以色列人追jip成義ê法，也無得tio̍h hit-ê法。Nā-sī Í-sek-lia̍t lâng tui-jip chiâⁿ gī ê hoat, iā bô tit-tio̍h hit ê hoat.

32這是怎樣？因為in無tùi信，是tùi所行。In tio̍h-tak tī hit-ê hō͘人tio̍h-tak ê石，Che sī cháiⁿ-iūⁿ? In-ūi in bô tùi sìn, sī tùi só͘ kiâⁿ. In tio̍h-tak tī hit ê hō͘ lâng tio̍h-tak ê chio̍h,

33照所記載講， 你看，我將hō͘人tio̍h-tak ê石，跋倒人ê石磐，hē tī郇城。 見若信伊ê人無致到見笑。chiàu só͘ kì-chài kóng, Lí khòaⁿ, góa chiong hō͘ lâng tio̍h-tak ê chio̍h, poa̍h-tó lâng ê chio̍h-pôaⁿ, hē tī Sûn-siâⁿ. Kìⁿ-nā sìn I ê lâng bô tì-kàu kiàn-siàu.

1兄弟ah，我ê心所意愛，所替in tùi上帝求ê，就是in ê得救。Hiaⁿ-tī ah, góa ê sim só͘ ì-ài, só͘ thòe in tùi Siōng-tè kiû ê, chiū-sī in ê tit kiù.

2因為我為tio̍h in做干證，in ǹg上帝有熱心，總是無照真ê知識。In-ūi góa ūi-tio̍h in chòe kan-chèng, in ǹg Siōng-tè ū jia̍t-sim, chóng-sī bô chiàu chin ê tì-sek.

3因為in m̄-bat上帝ê義，ài立家己ê義，就無降服上帝ê義。In-ūi in m̄ bat Siōng-tè ê gī, ài li̍p ka-kī ê gī, chiū bô hâng-ho̍k Siōng-tè ê gī.

4因為基督做律法ê結尾，致到義歸tī見若信ê人。In-ūi Ki-tok chòe lu̍t-hoat ê kiat-bé, tì-kàu gī kui tī kìⁿ-nā sìn ê lâng.

5因為摩西寫講，人行hit-ê tùi律法ê義ê，beh tùi伊來活。In-ūi Mô͘-se siá kóng, Lâng kiâⁿ hit ê tùi lu̍t-hoat ê gī ê, beh tùi i lâi oa̍h.

6但是tùi信ê義是親像án-ni講，你莫得心內講，Chī-chūi beh上天ah？(就是beh chhōa基督落來) ；Nā-sī tùi sìn ê gī sī chhin-chhiūⁿ án-ni kóng, Lí bo̍h-tit sim-lāi kóng, Chī-chūi beh chiūⁿ thiⁿ ah? (chiū-sī beh chhōa Ki-tok lo̍h-lâi);

7á是，Chī-chūi beh落深淵ah？(就是beh chhōa基督tùi死人中起來)á-sī, Chī-chūi beh lo̍h chhim-ian ah? (chiū-sī beh chhōa Ki-tok tùi sí-lâng tiong khí-lâi)

8伊到底講甚麼ah？是講，言語是近tī你，是tī你ê嘴，tī你ê心，就是阮所傳chit-ê信ê言語；I tàu-tí kóng sím-mi̍h ah? sī kóng, Giân-gú sī kūn tī lí, sī tī lí ê chhùi, tī lí ê sim, chiū-sī goán só͘ thoân chit ê sìn ê giân-gú;

9就是你若用嘴認耶穌做主，用心信上帝hō͘伊tùi死人中起來，就會得tio̍h救。chiū-sī lí nā ēng chhùi jīn Iâ-so͘ chòe Chú, ēng sim sìn Siōng-té hō͘ I tùi sí-lâng tiong khí-lâi, chiū ōe tit-tio̍h kiù.

10因為人用心信，致到得tio̍h義；用嘴認，致到得tio̍h救。In-ūi lâng ēng sim sìn, tì-kàu tit-tio̍h gī; ēng chhùi jīn, tì-kàu tit-tio̍h kiù.

11聖經講，見若信靠伊ê人不致見笑。Sèng-keng kóng, Kìⁿ-nā sìn-khò I ê lâng put-tì kiàn-siàu.

12因為猶太、希利尼lóng無分別；siāng一個主是眾人ê主，款待lóng總求伊ê人極其富裕。In-ūi Iû-thài Hi-lī-nî lóng bô hun-piat; siāng chi̍t ê Chú sī chèng lâng ê Chú, khoán-thāi lóng-chóng kiû I ê lâng ke̍k-kî hù-jū.

13因為見若求叫主ê名ê人beh得tio̍h救。In-ūi kìⁿ-nā kiû-kiò Chú ê miâ ê lâng beh tit-tio̍h kiù.

14總是in所iáu-未信ê，thái-thó會求叫伊？所未聽見ê，thái-thó會信伊？若無人傳，thái-thó會聽見？Chóng-sī in só͘ iáu-bē sìn ê, thái-thó ōe kiû-kiò I? só͘ bē thiaⁿ-kìⁿ ê, thái-thó ōe sìn I? nā bô lâng thoân, thái-thó ōe thiaⁿ-kìⁿ?

15若m̄是奉差，thái-thó能傳？照所記載講，傳chiah-ê好事ê福音ê，in ê腳步súi到怎樣！nā m̄ sī hōng-chhe, thái-thó ōe thoân? chiàu só͘ kì-chài kóng, Thoân chiah ê hó-sū ê hok-im ê, in ê kha-pō͘ súi kàu cháiⁿ-iūⁿ!

16總是in m̄是lóng順thàn福音。因為以賽亞講，主ah，阮所傳ê，有是誰信ah？Chóng-sī in m̄ sī lóng sūn-thàn hok-im. In-ūi Í-sài-a kóng, Chú ah, goán só͘ thoân ê, ū chī-chūi sìn ah?

17Án-ni信是出tī聽，聽是tùi基督ê言語。Án-ni sìn sī chhut tī thiaⁿ, thiaⁿ sī tùi Ki-tok ê giân-gú.

18獨獨我講，In kiám未bat聽見mah？有lah， In ê聲音傳到遍天下， In ê言語到地極。To̍k-to̍k góa kóng, In kiám bē bat thiaⁿ-kìⁿ mah? Ū lah, In ê siaⁿ-im thoân kàu piàn thiⁿ-ē, In ê giân-gú kàu tōe-ke̍k.

19但是我講，以色列人kiám未知mah？起頭摩西講， 我beh用m̄是做百姓ê，來激lín ê奮志， 用戇ê百姓來激lín ê受氣。Nā-sī góa kóng, Í-sek-lia̍t lâng kiám bē chai mah? Khí-thâu Mô͘-se kóng, Góa beh ēng m̄ sī chòe peh-sìⁿ ê, lâi kek lín ê hùn-chì, Ēng gōng ê peh-sìⁿ lâi kek lín ê siū-khì.

20以賽亞也好膽講， 未bat chhē我ê，我hō͘ in tú-tio̍h， 未bat請問我ê，我對in顯明。Í-sài-a iā hó-táⁿ kóng, Bē bat chhē góa ê, góa hō͘ in tú-tio̍h, Bē bat chhéng-mn̄g góa ê, góa tùi in hián-bêng.

21但是論到以色列伊就講，我thong日伸手，ǹg m̄順than3kap辯駁ê百姓。Nā-sī lūn-kàu Í-sek-lia̍t i chiū kóng, Góa thong ji̍t chhun chhiú, ǹg m̄ sūn-thàn kap piān-pok ê peh-sìⁿ.

1我就講，上帝kiám有棄sak伊ê百姓ah？斷斷m̄是。因為我也是以色列人，出tī亞伯拉罕ê後裔，便雅憫ê支派。Góa chiū kóng, Siōng-tè kiám ū khì-sak I ê peh-sìⁿ ah? Toàn-toàn m̄ sī. In-ūi góa iā sī Í-sek-lia̍t lâng, chhut tī A-pek-la̍h-hán ê hō͘-è, Piān-ngá-bín ê chi-phài.

2上帝未bat棄sak伊所事先知ê百姓。á是lín m̄知聖經tī以利亞hit-chām所記載ah？伊有怎樣對上帝告以色列人，Siōng-tè bē bat khì-sak I só͘ tāi-seng chai ê peh-sìⁿ. Á-sī lín m̄ chai sèng-keng tī Í-lī-a hit chām só͘ kì-chài ah? i ū cháiⁿ-iūⁿ tùi Siōng-tè kò Í-sek-lia̍t lâng,

3講，主ah，in有thâi死你ê先知，掘倒你chiah-ê祭壇；只有留我tī-teh，in也beh ti̍h我ê性命。kóng, Chú ah, in ū thâi-sí lí ê sian-ti, ku̍t-tó lí chiah ê chè-tôaⁿ; chí ū lâu góa tī-teh, in iā beh ti̍h góa ê sìⁿ-miā.

4總是上帝有應伊怎樣ah？是講，我為tio̍h家己有留 七千人，未bat跪拜巴力ê。Chóng-sī Siōng-tè ū ìn i cháiⁿ-iūⁿ ah? sī kóng, Góa ūi-tio̍h ka-kī ū lâu chhit-chheng lâng, bē bat kūi-pài Pa-le̍k ê.

5現今也án-ni iáu有所留teh，就是照恩典來揀選ê。Hiān-kim iā án-ni iáu ū só͘ lâu-teh, chiū-sī chiàu un-tián lâi kéng-soán ê.

6總是若照恩典，就無koh tùi所行；若無，就恩典m̄是恩典。Chóng-sī nā chiàu un-tián, chiū bô koh tùi só͘ kiâⁿ; nā bô, chiū un-tián m̄ sī un-tián.

7Án-ni就怎樣？以色列所求ê，伊竟然無得tio̍h；獨獨受揀ê有得tio̍h，其餘ê就變硬心；Án-ni chiū cháiⁿ-iūⁿ? Í-sek-lia̍t só͘ kiû ê, i kèng-jiân bô tit-tio̍h; to̍k-to̍k siū-kéng ê ū tit-tio̍h, kî-û ê chiū pìⁿ ngī-sim;

8照所記載，講，上帝hō͘ in昏迷ê心，bōe看見ê目睭，bōe聽見ê耳孔，到tī今á日。chiàu só͘ kì-chài, kóng, Siōng-tè hō͘ in hun-bê ê sim, bōe khòaⁿ-kìⁿ ê ba̍k-chiu, bōe thiaⁿ-kìⁿ ê hī-khang, kàu tī kin-á-ji̍t.

9大衛也講， hō͘ in ê筵桌成做活tauh，做羅網， 做塞礙，做報應tī in；Tāi-pi̍t iā kóng, Hō͘ in ê iân-toh chiâⁿ chòe oa̍h-tauh, chòe lô-bāng, Chòe that-gāi, chòe pò-èng tī in;

10hō͘ in ê目睭花，bōe會看見， In ê Ka-chiah常常ku-ku。Hō͘ in ê ba̍k-chiu hoe, bōe-ōe khòaⁿ-kìⁿ, In ê ka-chiah siông-siông ku-ku.

11Án-ni我就講，In已經tio̍h-tak，是致到in跋倒mah？斷斷m̄是。反tńg對in ê犯罪，拯救就到tī外邦，beh激起in ê奮志。Án-ni góa chiū kóng, In í-keng tio̍h-tak, sī tì-kàu in poa̍h-tó mah? Toàn-toàn m̄ sī. Hoán-tńg tùi in ê hoān-chōe, chín-kiù chiū kàu tī gōa-pang, beh kek-khí in ê hùn-chì.

12Taⁿ in ê犯罪若做世間ê富有，in ê衰退若做外邦ê富有，何況in ê充滿？Taⁿ in ê hoān-chōe nā chòe sè-kan ê pù-ū, in ê soe-thè nā chòe gōa-pang ê pù-ū, hô-hòng in ê chhiong-móa?

13我是tùi lín外邦人講，因為我是外邦人ê使徒，我榮光我ê職；Góa sī tùi lín gōa-pang lâng kóng. In-ūi góa sī gōa-pang lâng ê sù-tô͘, góa êng-kng góa ê chit;

14看ōe-thang激起我骨肉親ê奮志，來救in中間kúi-nā人。khòaⁿ ōe thang kek-khí góa kut-jio̍k chhin ê hùn-chì, lâi kiù in tiong-kan kúi-nā lâng.

15因為in ê受棄sak若做世間ê koh和，就in ê受接納，m̄是tùi死來活是甚麼ah？In-ūi in ê siū khì-sak nā chòe sè-kan ê koh hô, chiū in ê siū chiap-la̍p, m̄ sī tùi sí lâi oa̍h sī sím-mi̍h ah?

16起頭獻ê麵若是聖，就kui-sn̂g也是聖；根若是聖，就枝也是聖。Khí-thâu hiàn ê mī nā sī sèng, chiū kui-sn̂g iā sī sèng; kun nā sī sèng, chiū ki iā sī sèng.

17Chiah-ê枝若有ê at起來，也你本是山橄欖得tio̍h接tī in中間，saⁿ-kap份tī橄欖ê根kap肥汁；Chiah ê ki nā ū-ê at-khí-lâi, iā lí pún sī soaⁿ kaⁿ-ná tit-tio̍h chiap tī in tiong-kan, saⁿ-kap hūn tī kaⁿ-ná ê kun kap pûi-chiap;

18你就m̄-thang對枝來誇口；你若誇口，就m̄是根óa靠你，是你óa靠根。lí chiū m̄ thang tùi ki lâi khoa-kháu; lí nā khoa-kháu, chiū m̄ sī kun óa-khò lí, sī lí óa-khò kun.

19Án-ni你beh講，枝at起來beh hō͘我接落來。Án-ni lí beh kóng, Ki at-khí-lâi beh hō͘ góa chiap-lo̍h-lâi.

20Tio̍h；in tùi m̄信chiah at-起來，你tùi信chiah khiā-tiâu。Tio̍h; in tùi m̄ sìn chiah at-khí-lâi, lí tùi sìn chiah khiā-tiâu.

21心莫得自高，tio̍h驚惶。因為上帝若無保惜順性ê 枝，也beh無保惜你。Sim bo̍h-tit chū-ko, tio̍h kiaⁿ-hiâⁿ. In-ūi Siōng-tè nā bô pó-sioh sūn-sèng ê ki, iā beh bô pó-sioh lí.

22Tio̍h看上帝ê慈悲kap嚴謹；款待hiah-ê跋倒ê，是嚴謹；但是款待你是上帝ê慈悲，總是你tio̍h長長tiàm-tī伊ê慈悲；若無，也beh kā你割起來。Tio̍h khòaⁿ Siōng-tè ê chû-pi kap giâm-kín; khoán-thāi hiah ê poa̍h-tó ê, sī giâm-kín; nā-sī khoán-thāi lí sī Siōng-tè ê chû-pi, chóng-sī lí tio̍h tn̂g-tn̂g tiàm-tī I ê chû-pi; nā bô, iā beh kā lí koah-khí-lâi.

23Koh in若m̄是長長tiàm-tī m̄信，也beh得tio̍h接；因為上帝會koh接in。Koh in nā m̄ sī tn̂g-tn̂g tiàm-tī m̄ sìn, iā beh tit-tio̍h chiap; in-ūi Siōng-tè ōe koh chiap in.

24因為你若tùi hit-ê順性做山橄欖ê既然割起來，逆性來接tī好ê 橄欖，何況hiah-ê順性ê枝beh接tī本舊ê橄欖ah？In-ūi lí nā tùi hit ê sūn-sèng chòe soaⁿ kaⁿ-ná ê kì-jiân koah-khí-lâi, ge̍k-sèng lâi chiap tī hó ê kaⁿ-ná, hô-hòng hiah ê sūn-sèng ê ki beh chiap tī pún kū ê kaⁿ-ná ah?

25兄弟ah，我m̄-ài lín m̄知chit-ê奧妙，免得lín家己掠做智慧；就是以色列中有ê成做硬心，thèng候外邦滿滿進入；Hiaⁿ-tī ah, góa m̄ ài lín m̄ chai chit ê ò-biāu bián-tit lín ka-kī lia̍h-chòe tì-hūi; chiū-sī Í-sek-lia̍t tiong ū-ê chiâⁿ-chòe ngī-sim, thèng-hāu gōa-pang móa-móa chìn-ji̍p;

26án-ni thong以色列beh lóng得救，照所記載講， beh有救主tùi郇城出， 改除雅各ê不虔；án-ni thong Í-sek-lia̍t beh lóng tit kiù, chiàu só͘ kì-chài kóng, Beh ū Kiù-chú tùi Sûn-siâⁿ chhut, Kóe-tû Ngá-kok ê put-khiân;

27Koh我除去in ê罪ê時， 這就是我kap in所立ê約。Koh góa tû-khì in ê chōe ê sî, Che chiū-sī góa kap in só͘ li̍p ê iok.

28照福音，就in為tio̍h lín來做仇siû；照揀選，就in為tio̍h列祖來得tio̍h疼。Chiàu hok-im, chiū in ūi-tio̍h lín lâi chòe kiû-siû; chiàu kéng-soán, chiū in ūi-tio̍h lia̍t-chó͘ lâi tit-tio̍h thiàⁿ.

29因為上帝ê恩賜kap召人lóng無退悔。In-ūi Siōng-tè ê un-sù kap tiàu-lâng lóng bô thè-hòe.

30是親像lín 前無順服上帝，但是taⁿ對in ê無順服lín得tio̍h憐憫，Sī chhin-chhiūⁿ lín chêng bô sūn-ho̍k Siōng-tè, nā-sī taⁿ tùi in ê bô sūn-ho̍k lín tit-tio̍h lîn-bín,

31án-ni in taⁿ無順服，thang tùi lín ê得tio̍h憐憫，hō͘ in亦得tio̍h憐憫。án-ni in taⁿ bô sūn-ho̍k, thang tùi lín ê tit-tio̍h lîn-bín, hō͘ in ia̍h tit-tio̍h lîn-bín.

32因為上帝已經圍萬人tī無順服ê中間，tiâu-tî beh憐憫萬人。In-ūi Siōng-tè í-keng ûi bān lâng tī bô sūn-ho̍k ê tiong-kan, tiâu-tî beh lîn-bín bān lâng.

33深沉ah！上帝ê智慧kap見識ê富有 ah！伊ê判斷bōe測度得，伊ê路途追chhē bōe tio̍h。Chhim-tîm ah! Siōng-tè ê tì-hūi kap kiàn-sek ê pù-ū ah! I ê phòaⁿ-toàn bōe chhek-to̍k-tit, I ê lō͘-tô͘ tui-chhē bōe tio̍h.

34Chī-chūi知主ê心志？Chī-chūi kap伊參議？是誰事先hō͘伊，致到hō͘伊報答？Chī-chūi chai Chú ê sim-chì? Chī-chūi kap I chham-gī? chī-chūi tāi-seng hō͘ I, tì-kàu hō͘ I pò-tap?

35因為萬物lóng出tī伊，óa靠伊，歸tī伊。In-ūi bān mi̍h lóng chhut tī I, óa-khò I, kui tī I.

36願伊榮光到代代。À-bēng。Goān I êng-kng kàu tāi-tāi. À-bēng.