1Ta̍k人tio̍h降服tī做序大有權柄ê；因為見有權柄無m̄是tùi上帝出；所有ê權柄lóng是上帝所定tio̍h。Ta̍k lâng tio̍h hâng-ho̍k tī chòe sī-tōa ū koân-pèng ê; in-ūi kìⁿ ū koân-pèng bô m̄ sī tùi Siōng-tè chhut; só͘ ū ê koân-pèng lóng sī Siōng-tè só͘ tiāⁿ-tio̍h.

2所以抗拒權柄ê是逆上帝ê命令；逆ê人家己取罪。Só͘-í khòng-kū koân-pèng ê sī ge̍k Siōng-tè ê bēng-lēng; ge̍k ê lâng ka-kī chhú chōe.

3因為有司m̄是hō͘好品行ê驚，是hō͘ pháiⁿ人驚。你ài免驚hit-ê權柄mah？tio̍h行好，就得tio̍h伊ê o-ló；In-ūi iú-si m̄ sī hō͘ hó phín-hēng ê kiaⁿ, sī hō͘ pháiⁿ lâng kiaⁿ. Lí ài bián kiaⁿ hit ê koân-pèng mah? tio̍h kiâⁿ hó, chiū tit-tio̍h i ê o-ló;

4因為伊是上帝差用，beh利益你。但是你行pháiⁿ，就tio̍h驚；因為伊m̄是空空掛劍；伊是上帝ê差用，是伸冤ê，beh hō͘ pháiⁿ人tú-tio̍h刑罰。in-ūi i sī Siōng-tè chhe-ēng, beh lī-ek lí. Nā-sī lí kiâⁿ pháiⁿ, chiū tio̍h kiaⁿ; in-ūi i m̄ sī khang-khang kòa kiàm; i sī Siōng-tè ê chhe-ēng, sī sin-oan ê, beh hō͘ pháiⁿ lâng tú-tio̍h hêng-hoa̍t.

5所以的確tio̍h順服，m̄-nā為tio̍h受氣，也是為tio̍h良心。Só͘-í tek-khak tio̍h sūn-ho̍k, m̄ nā ūi-tio̍h siū-khì, iā sī ūi-tio̍h liông-sim.

6因為án-ni lín也納稅；因為in是上帝ê執事，常常專務chit-ê事。In-ūi án-ni lín iā la̍p sè; in-ūi in sī Siōng-tè ê chip-sū, siông-siông choan-bū chit ê sū.

7所應該hō͘眾人ê，tio̍h hō͘ in；應該納伊，tio̍h納伊；應該抽hō͘伊，tio̍h抽hō͘伊；應該驚畏伊，tio̍h驚畏伊；應該尊敬伊，tio̍h尊敬伊。Só͘ eng-kai hō͘ chèng lâng ê, tio̍h hō͘ in; eng-kai la̍p i, tio̍h la̍p i; eng-kai thiu hō͘ i, tio̍h thiu hō͘ i; eng-kai kiaⁿ-ùi i, tio̍h kiaⁿ-ùi i; eng-kai chun-kèng i, tio̍h chun-kèng i.

8莫得欠人甚麼，只有相疼iáu是欠人；因為疼人ê有盡律法。Bo̍h-tit khiàm lâng sím-mi̍h, chí ū saⁿ-thiàⁿ iáu sī khiàm lâng; in-ūi thiàⁿ lâng ê ū chīn lu̍t-hoat.

9因為所講，M̄-thang行淫，m̄-thang thâi人，m̄-thang偷the̍h，m̄-thang貪心，á是別條誡，lóng包含tī chit句，Tio̍h疼厝邊親像家己。In-ūi só͘ kóng, M̄ thang kiâⁿ-îm, M̄ thang thâi lâng, M̄ thang thau-the̍h, M̄ thang tham-sim, á-sī pa̍t tiâu kài, lóng pau-hâm tī chit kù, Tio̍h thiàⁿ chhù-piⁿ chhin-chhiūⁿ ka-kī.

10仁愛無害tio̍h厝邊；所以仁愛是盡律法。Jîn-ài bô hāi-tio̍h chhù-piⁿ; só͘-í jîn-ài sī chīn lu̍t-hoat.

11Án-ni-siⁿ知chit-ê時候就是lín已經tio̍h睏醒ê時；因為咱得tio̍h救，比起頭信ê時khah近。Án-ni-siⁿ chai chit ê sî-hāu chiū-sī lín í-keng tio̍h khùn-chhíⁿ ê sî; in-ūi lán tit-tio̍h kiù, pí khí-thâu sìn ê sî khah kūn.

12暝beh過，日時近lah；所以咱tio̍h thǹg去烏暗ê所行，來穿光明ê戰甲。Mî beh kè, ji̍t-sî kūn lah; só͘-í lán tio̍h thǹg-khì o͘-àm ê só͘ kiâⁿ, lâi chhēng kng-bêng ê chiàn-kah.

13所行tio̍h端正，親像tī日時；莫得放縱酒醉，莫得好色邪淫，莫得相爭怨妒。Só͘ kiâⁿ tio̍h toan-chiàⁿ, chhin-chhiūⁿ tī ji̍t-sî; bo̍h-tit hòng-chhiòng chiú-chùi, bo̍h-tit hò͘ⁿ-sek siâ-îm, bo̍h-tit saⁿ-chiⁿ oàn-tò͘.

14Tio̍h穿主耶穌基督，莫得為tio̍h肉體圖謀，致到thàn私慾。Tio̍h chhēng Chú Iâ-so͘ Ki-tok, bo̍h-tit ūi-tio̍h jio̍k-thé tô͘-bô͘, tì-kàu thàn su-io̍k.

1信軟chiáⁿ ê人，lín tio̍h接納伊；m̄是beh辯論所僥疑ê。Sìn nńg-chiáⁿ ê lâng, lín tio̍h chiap-la̍p i; m̄ sī beh piān-lūn só͘ giâu-gî ê.

2有人信百項物lóng thang食；獨獨信軟chiáⁿ ê是食菜蔬。Ū lâng sìn pah hāng mi̍h lóng thang chia̍h; to̍k-to̍k sìn nńg-chiáⁿ ê sī chia̍h chhài-soe.

3食ê莫得看輕無食ê；無食ê bôh得擬議食ê；因為上帝已經接納伊。Chia̍h-ê bo̍h-tit khòaⁿ-khin bô chia̍h-ê; bô chia̍h-ê bôh-tit gí-gī chia̍h-ê; in-ūi Siōng-tè í-keng chiap-la̍p i.

4你是是誰 teh擬議別人ê奴僕ah？伊khiā在á是跋倒，自然有伊ê主人tī-teh。但是伊beh khiā在，因為主會hō͘伊khiā在。Lí sī chī-chūi teh gí-gī pa̍t lâng ê lô͘-po̍k ah? i khiā-chāi á-sī poa̍h-tó, chū-jiân ū i ê chú-lâng tī-teh. Nā-sī i beh khiā-chāi, in-ūi Chú ōe hō͘ i khiā-chāi.

5有人擬斷chit日贏hit日；有人擬斷日日lóng相同；ta̍k人心內tio̍h認起真。Ū lâng gí-toàn chit ji̍t iâⁿ hit ji̍t; ū lāng gí-toàn ji̍t-ji̍t lóng saⁿ-tâng; ta̍k lâng sim-lāi tio̍h jīn khi chin.

6守日ê是為tio̍h主來守；食ê為tio̍h主來食，因為伊感謝上帝；無食ê也為tio̍h主來無食，也感謝上帝。Siú ji̍t ê sī ūi-tio̍h Chú lâi siú; chia̍h-ê ūi-tio̍h Chú lâi chia̍h, in-ūi i kám-siā Siōng-tè ; bô chia̍h-ê iā ūi-tio̍h Chú lâi bô chia̍h, iā kám-siā Siōng-tè.

7因為咱無人為tio̍h家己來活，也無人為tio̍h家己來死。In-ūi lán bô lâng ūi-tio̍h ka-kī lâi oa̍h, iā bô lâng ūi-tio̍h ka-kī lâi sí.

8因為咱若活，是為tio̍h主來活；死，也是為tio̍h主來死；所以咱，或是活或是死，lóng屬tī主。In-ūi lán nā oa̍h, sī ūi-tio̍h Chú lâi oa̍h; sí, iā sī ūi-tio̍h Chú lâi sí; só͘-í lán, he̍k-sī oa̍h he̍k-sī sí, lóng sio̍k tī Chú.

9因為基督所以死來koh活，是beh做活ê死ê ê主。In-ūi Ki-tok só͘-í sí lâi koh-oa̍h, sī beh chòe oa̍h-ê sí-ê ê Chú.

10Taⁿ你啥事擬議你ê兄弟？也你啥事看輕你ê兄弟？因為咱眾人lóng beh khiā tī上帝公座前。Taⁿ lí siáⁿ-sū gí-gī lí ê hiaⁿ-tī? iā lí siáⁿ-sū khòaⁿ-khin lí ê hiaⁿ-tī? In-ūi lán chèng lâng lóng beh khiā tī Siōng-tè kong-chō chêng.

11因為有記載講， 主講，我既然是活ê，萬腳頭u beh跪我， 萬嘴舌beh o-ló上帝。In-ūi ū kì-chài kóng, Chú kóng, Góa kì-jiân sī oa̍h ê, bān kha-thâu-u beh kūi góa, Bān chhùi-chi̍h beh o-ló Siōng-tè.

12Án-ni咱ta̍k人beh排列家己ê事tī上帝ê面前。Án-ni lán ta̍k lâng beh pâi-lia̍t ka-kī ê sū tī Siōng-tè ê bīn-chêng.

13所以咱莫得koh相擬議；lín寧可tio̍h定tio̍h意思，莫得用hō͘人跋倒á是塞礙ê物hē tī兄弟ê面前。Só͘-í lán bo̍h-tit koh saⁿ gí-gī; lín lêng-khó͘ tio̍h tiāⁿ-tio̍h ì-sù bo̍h-tit ēng hō͘ lâng poa̍h-tó á-sī that-gāi ê mi̍h hē tī hiaⁿ-tī ê bīn-chêng.

14我知，也tī主耶穌深信，物本無一項是粗俗；獨獨人若掠甚麼做粗俗，就hit項物tī hit人是做粗俗。Góa chai, iā tī Chú Iâ-so͘ chhim-sìn, mi̍h pún bô chi̍t hāng sī chho͘-sio̍k; to̍k-to̍k lâng nā lia̍h sím-mi̍h chòe chho͘-sio̍k, chiū hit hāng mi̍h tī hit lâng sī chòe chho͘-sio̍k.

15總是若為tio̍h食物ê事hō͘你ê兄弟憂悶，就你m̄是照仁愛來行。基督替伊死ê，你m̄-thang用你ê所食來敗壞伊。Chóng-sī nā ūi-tio̍h chia̍h-mi̍h ê sū hō͘ lí ê hiaⁿ-tī iu-būn, chiū lí m̄ sī chiàu jîn-ài lâi kiâⁿ. Ki-tok thòe i sí ê, lí m̄ thang ēng lí ê só͘ chia̍h lâi pāi-hoāi i.

16莫得致到你ê好hō͘人譭謗。Bo̍h-tit tì-kàu lí ê hó hō͘ lâng húi-pòng.

17因為上帝ê國不在lim食；是義，kap平安，kap tī聖神ê歡喜。In-ūi Siōng-tè ê kok put-chāi lim-chia̍h; sī gī, kap pêng-an, kap tī Sèng Sîn ê hoaⁿ-hí.

18用án-ni來服事基督ê，hō͘上帝所歡喜，hō͘人所o-ló。Ēng án-ni lâi ho̍k-sāi Ki-tok ê, hō͘ Siōng-tè só͘ hoaⁿ-hí, hō͘ lâng só͘ o-ló.

19所以見若致到和平，大家相建立ê事，咱tio̍h專務。Só͘-í kìⁿ-nā tì-kàu hô-pêng, tāi-ke saⁿ kiàn-li̍p ê sū, lán tio̍h choan-bū.

20莫得因為食ê緣故毀壞上帝ê工，ta̍k項物卻是清氣；但是tùi食致到跋倒ê，就是pháiⁿ。Bo̍h-tit in-ūi chia̍h ê iân-kò͘ húi-hoāi Siōng-tè ê kang. Ta̍k hāng mi̍h khiok sī chheng-khì; nā-sī tùi chia̍h tì-kàu poa̍h-tó ê, chiū-sī pháiⁿ.

21無食肉，無lim酒，無做甚麼hō͘兄弟跋倒，chiah是好。Bô chia̍h bah, bô lim chiú, bô chòe sím-mi̍h hō͘ hiaⁿ-tī poa̍h-tó, chiah sī hó.

22你所有ê信tio̍h家己存tī上帝ê面前。人無家己擬議tī伊所認做tio̍h ê，就有福氣。Lí só͘ ū ê sìn tio̍h ka-kī chûn tī Siōng-tè ê bīn-chêng. Lâng bô ka-kī gí-gī tī i só͘ jīn chòe tio̍h ê, chiū ū hok-khì.

23獨獨人若僥疑也來食，就受定罪，因為m̄是出tī信；見若m̄是tùi信出ê就是罪。To̍k-to̍k lâng nā giâu-gî iā lâi chia̍h, chiū siū tēng-chōe, in-ūi m̄ sī chhut tī sìn; kìⁿ-nā m̄ sī tùi sìn chhut-ê chiū-sī chōe.

1咱chiah-ê能ê人應該tio̍h擔帶bōe ê人ê軟弱，m̄-thang求家己ê歡喜。Lán chiah ê ōe ê lâng eng-kai tio̍h tam-tài bōe ê lâng ê loán-jio̍k, m̄ thang kiû ka-kī ê hoaⁿ-hí.

2咱ta̍k人tio̍h hō͘厝邊歡喜，hō͘ in得tio̍h好來建立。Lán ta̍k lâng tio̍h hō͘ chhù-piⁿ hoaⁿ-hí, hō͘ in tit-tio̍h hó lâi kiàn-li̍p.

3因為基督也無求家己ê歡喜，就是照所記載講，人詈罵你ê詈罵有到tī我。In-ūi Ki-tok iā bô kiû ka-kī ê hoaⁿ-hí, chiū-sī chiàu só͘ kì-chài kóng, Lâng lóe-mē lí ê lóe-mē ū kàu tī góa.

4因為早所記載ê，lóng是beh教示咱，chiah來記；hō͘咱tùi吞忍，tùi聖經ê安慰，來得tio̍h ǹg望。In-ūi chá só͘ kì-chài ê, lóng sī beh kà-sī lán, chiah lâi kì; hō͘ lán tùi thun-lún, tùi sèng-keng ê an-ùi, lâi tit-tio̍h ǹg-bāng.

5願賞賜吞忍安慰ê上帝hō͘ lín大家同心志照基督耶穌，Goān siúⁿ-sù thun-lún an-ùi ê Siōng-tè hō͘ lín tāi-ke tâng sim-chì chiàu Ki-tok Iâ-so͘,

6hō͘ lín一樣心一樣嘴榮光上帝，就是咱ê主耶穌基督ê父。hō͘ lín chi̍t iūⁿ sim chi̍t iūⁿ chhùi êng-kng Siōng-tè, chiū-sī lán ê Chú Iâ-so͘ Ki-tok ê Pē.

7所以tio̍h相接納，親像基督也有接納lín，致到榮光歸tī上帝。Só͘-í tio̍h saⁿ chiap-la̍p, chhin-chhiūⁿ Ki-tok iā ū chiap-la̍p lín, tì-kàu êng-kng kui tī Siōng-tè.

8因為我講，基督為tio̍h上帝ê真實bat做奉割禮ê人ê差用，beh堅固所應允列祖ê；In-ūi góa kóng, Ki-tok ūi-tio̍h Siōng-tè ê chin-si̍t bat chòe hōng kat-lé ê lâng ê chhe-ēng, beh kian-kò͘ só͘ èng-ún lia̍t-chó͘ ê;

9也hō͘外邦人為tio̍h憐憫歸榮光上帝，照所記載，講， 因為án-ni我tī外邦中beh稱呼你， 唱歌o-ló你ê名。iā hō͘ gōa-pang lâng ūi-tio̍h lîn-bín kui êng-kng Siōng-tè, chiàu só͘ kì-chài, kóng, In-ūi án-ni góa tī gōa-pang tiong beh chheng-ho͘ lí, Chhiùⁿ koa o-ló lí ê miâ.

10Koh講， Lín外邦人，tio̍h kap伊ê百姓同歡喜。Koh kóng, Lín gōa-pang lâng, tio̍h kap I ê peh-sìⁿ tâng hoaⁿ-hí.

11又koh講， Lín眾外邦tio̍h稱讚主， Lín萬百姓tio̍h o-ló伊。Iū-koh kóng, Lín chèng gōa-pang tio̍h chheng-chàn Chú, Lín bān peh-sìⁿ tio̍h o-ló I.

12又koh以賽亞講， beh有耶西ê根頭， Kap興起來治理外邦ê， 外邦beh óa靠伊來有ǹg望。Iū-koh Í-sài-a kóng, Beh ū Iâ-se ê kun-thâu, Kap heng-khí lâi tī-lí gōa-pang ê, Gōa-pang beh óa-khò I lâi ū ǹg-bāng.

13願賞賜ǹg望ê上帝hō͘ lín tùi信來充滿ta̍k樣ê歡喜平安；hō͘ lín tī聖神ê權能得tio̍h滿滿ê ǹg望。Goān siúⁿ-sù ǹg-bāng ê Siōng-tè hō͘ lín tùi sìn lâi chhiong-móa ta̍k iūⁿ ê hoaⁿ-hí pêng-an; hō͘ lín tī Sèng Sîn ê koân-lêng tit-tio̍h móa-móa ê ǹg-bāng.

14我ê兄弟ah，我家己也深信lín滿滿善良，充足ta̍k樣ê知識，也會大家相勸勉。Góa ê hiaⁿ-tī ah, góa ka-kī iā chhim sìn lín móa-móa siān-liông, chhiong-chiok ta̍k iūⁿ ê tì-sek, iā ōe tāi-ke saⁿ khoàn-bián.

15總是我寫phoe hō͘ lín，有淡薄khah好膽，beh hō͘ lín koh會記得；這是tùi上帝所hō͘我ê恩典，Chóng-sī góa siá phoe hō͘ lín, ū tām-po̍h khah hó-táⁿ, beh hō͘ lín koh ōe kì-tit; che sī tùi Siōng-tè só͘ hō͘ góa ê un-tián,

16hō͘我tī外邦做基督耶穌ê執事，用上帝ê福音來服事，beh hō͘所獻ê外邦人，tī聖神成聖ê得tio̍h接納。hō͘ góa tī gōa-pang chòe Ki-tok Iâ-so͘ ê chip-sū, ēng Siōng-tè ê hok-im lâi ho̍k-sāi, beh hō͘ só͘ hiàn ê gōa-pang lâng, tī Sèng Sîn chiâⁿ-sèng ê tit-tio̍h chiap-la̍p.

17所以論上帝ê事，我tī基督耶穌有thang誇口。Só͘-í lūn Siōng-tè ê sū, góa tī Ki-tok Iâ-so͘ ū thang khoa-kháu.

18因為除基督用我所行ê以外，我m̄敢講甚麼；只有講伊用我ê言語kap行做，In-ūi tû Ki-tok ēng góa só͘ kiâⁿ ê í-gōa, góa m̄ káⁿ kóng sím-mi̍h; chí ū kóng I ēng góa ê giân-gú kap kiâⁿ-chòe,

19tī神蹟kap奇事ê權能，kap tī聖神ê權能，hō͘外邦順服；án-ni我tùi耶路撒冷se̍h到Í-lī-lí-kó͘，遍傳基督ê福音。tī sîn-jiah kap kî-sū ê koân-lêng, kap tī Sèng Sîn ê koân-lêng, hō͘ gōa-pang sūn-ho̍k; án-ni góa tùi Iâ-lō͘-sat-léng se̍h kàu Í-lī-lí-kó͘, piàn thoân Ki-tok ê hok-im.

20Koh我立志傳福音無tī基督已經受稱呼ê所在，驚了起tī別人ê地基頂；Koh góa li̍p-chì thoân hok-im bô tī Ki-tok í-keng siū chheng-ho͘ ê só͘-chāi, kiaⁿ-liáu khí tī pa̍t lâng ê tōe-ki téng;

21就是照所記載講， 未得tio̍h伊ê消息ê beh看見， 未聽見ê beh曉悟。chiū-sī chiàu só͘ kì-chài kóng, Bē tit-tio̍h I ê siau-sit ê beh khòaⁿ-kìⁿ, Bē thiaⁿ-kìⁿ ê beh hiáu-ngō͘.

22因為án-ni我chōe-chōe pái tú-tio̍h阻擋，bōe得thang就近lín；In-ūi án-ni góa chōe-chōe pái tú-tio̍h chó͘-tòng, bōe tit thang chiū-kūn lín;

23但是現今tī chiah-ê地方無koh有所在thang去，已經chōe-chōe年有欣慕beh就近lín；nā-sī hiān-kim tī chiah ê tōe-hng bô koh ū só͘-chāi thang khì, í-keng chōe-chōe nî ū him-bō͘ beh chiū-kūn lín;

24thèng候我去Sū-pan-ngá ê時，(因為我ǹg望經過ê時見tio̍h lín，事先kap lín交陪略略á滿意，後來得tio̍h lín送行去hia) ；thèng-hāu góa khì Sū-pan-ngá ê sî, (in-ūi góa ǹg-bāng keng-kè ê sî kìⁿ-tio̍h lín, tāi-seng kap lín kau-pôe lio̍h-lio̍h-á móa-ì, āu-lâi tit-tio̍h lín sòng-hêng khì hia);

25總是現在我去耶路撒冷供給聖徒。chóng-sī hiān-chāi góa khì Iâ-lō͘-sat-léng kiong-kip sèng-tô͘.

26因為馬其頓A-kai-a人歡喜saⁿ-kap tôe-iân幫贊耶路撒冷聖徒中ê sòng-hiong人。In-ūi Má-kî-tùn A-kai-a lâng hoaⁿ-hí saⁿ-kap tôe-iân pang-chān Iâ-lō͘-sat-léng sèng-tô͘ tiong ê sòng-hiong lâng.

27In真正是歡喜；卻也是欠in ê債。因為外邦人既然saⁿ-kap有份tī in神靈ê事，自然tio̍h用肉體ê物服事in。In chin-chiàⁿ sī hoaⁿ-hí; khiok iā sī khiàm in ê chè. In-ūi gōa-pang lâng kì-jiân saⁿ-kap ū hūn tī in sîn-lêng ê sū, chū-jiân tio̍h ēng jio̍k-thé ê mi̍h ho̍k-sāi in.

28thèng候我做完chit-ê事，將chit-ê iân項交付in明白，我beh tùi lín hia去Sū-pan-ngá。Thèng-hāu góa chòe oân chit ê sū, chiong chit ê iân-hāng kau-hù in bêng-pe̍k, góa beh tùi lín hia khì Sū-pan-ngá.

29我也知就近lín ê時，beh有基督豐盛ê祝福順續去。Góa iā chai chiū-kūn lín ê sî, beh ū Ki-tok hong-sēng ê chiok-hok sūn-sòa khì.

30兄弟ah，我對咱ê主耶穌基督，也tùi聖神ê疼，勸lín kap我同盡力，替我祈求上帝，Hiaⁿ-tī ah, góa tùi lán ê Chú Iâ-so͘ Ki-tok, iā tùi Sèng Sîn ê thiàⁿ, khǹg lín kap góa tâng chīn-la̍t, thòe góa kî-kiû Siōng-tè,

31救我脫離猶太地hiah-ê m̄順服ê人，也hō͘我為tio̍h耶路撒冷所做供給ê事得tio̍h聖徒接納；kiù góa thoat-lī Iû-thài tōe hiah ê m̄ sūn-ho̍k ê lâng, iā hō͘ góa ūi-tio̍h Iâ-lō͘-sat-léng só͘ chòe kiong-kip ê sū tit-tio̍h sèng-tô͘ chiap-la̍p;

32hō͘我tùi上帝ê旨意到lín hia有歡喜，也kap lín saⁿ-kap得tio̍h安歇。hō͘ góa tùi Siōng-tè ê chí-ì kàu lín hia ū hoaⁿ-hí, iā kap lín saⁿ-kap tit-tio̍h an-hioh.

33願賞賜平安ê上帝kap lín眾人tī-teh：À-bēng。Goān siúⁿ-sù pêng-an ê Siōng-tè kap lín chèng lâng tī-teh: À-bēng.