1咱chiah-ê能ê人應該tio̍h擔帶bōe ê人ê軟弱，m̄-thang求家己ê歡喜。Lán chiah ê ōe ê lâng eng-kai tio̍h tam-tài bōe ê lâng ê loán-jio̍k, m̄ thang kiû ka-kī ê hoaⁿ-hí.

2咱ta̍k人tio̍h hō͘厝邊歡喜，hō͘ in得tio̍h好來建立。Lán ta̍k lâng tio̍h hō͘ chhù-piⁿ hoaⁿ-hí, hō͘ in tit-tio̍h hó lâi kiàn-li̍p.

3因為基督也無求家己ê歡喜，就是照所記載講，人詈罵你ê詈罵有到tī我。In-ūi Ki-tok iā bô kiû ka-kī ê hoaⁿ-hí, chiū-sī chiàu só͘ kì-chài kóng, Lâng lóe-mē lí ê lóe-mē ū kàu tī góa.

4因為早所記載ê，lóng是beh教示咱，chiah來記；hō͘咱tùi吞忍，tùi聖經ê安慰，來得tio̍h ǹg望。In-ūi chá só͘ kì-chài ê, lóng sī beh kà-sī lán, chiah lâi kì; hō͘ lán tùi thun-lún, tùi sèng-keng ê an-ùi, lâi tit-tio̍h ǹg-bāng.

5願賞賜吞忍安慰ê上帝hō͘ lín大家同心志照基督耶穌，Goān siúⁿ-sù thun-lún an-ùi ê Siōng-tè hō͘ lín tāi-ke tâng sim-chì chiàu Ki-tok Iâ-so͘,

6hō͘ lín一樣心一樣嘴榮光上帝，就是咱ê主耶穌基督ê父。hō͘ lín chi̍t iūⁿ sim chi̍t iūⁿ chhùi êng-kng Siōng-tè, chiū-sī lán ê Chú Iâ-so͘ Ki-tok ê Pē.

7所以tio̍h相接納，親像基督也有接納lín，致到榮光歸tī上帝。Só͘-í tio̍h saⁿ chiap-la̍p, chhin-chhiūⁿ Ki-tok iā ū chiap-la̍p lín, tì-kàu êng-kng kui tī Siōng-tè.

8因為我講，基督為tio̍h上帝ê真實bat做奉割禮ê人ê差用，beh堅固所應允列祖ê；In-ūi góa kóng, Ki-tok ūi-tio̍h Siōng-tè ê chin-si̍t bat chòe hōng kat-lé ê lâng ê chhe-ēng, beh kian-kò͘ só͘ èng-ún lia̍t-chó͘ ê;

9也hō͘外邦人為tio̍h憐憫歸榮光上帝，照所記載，講， 因為án-ni我tī外邦中beh稱呼你， 唱歌o-ló你ê名。iā hō͘ gōa-pang lâng ūi-tio̍h lîn-bín kui êng-kng Siōng-tè, chiàu só͘ kì-chài, kóng, In-ūi án-ni góa tī gōa-pang tiong beh chheng-ho͘ lí, Chhiùⁿ koa o-ló lí ê miâ.

10Koh講， Lín外邦人，tio̍h kap伊ê百姓同歡喜。Koh kóng, Lín gōa-pang lâng, tio̍h kap I ê peh-sìⁿ tâng hoaⁿ-hí.

11又koh講， Lín眾外邦tio̍h稱讚主， Lín萬百姓tio̍h o-ló伊。Iū-koh kóng, Lín chèng gōa-pang tio̍h chheng-chàn Chú, Lín bān peh-sìⁿ tio̍h o-ló I.

12又koh以賽亞講， beh有耶西ê根頭， Kap興起來治理外邦ê， 外邦beh óa靠伊來有ǹg望。Iū-koh Í-sài-a kóng, Beh ū Iâ-se ê kun-thâu, Kap heng-khí lâi tī-lí gōa-pang ê, Gōa-pang beh óa-khò I lâi ū ǹg-bāng.

13願賞賜ǹg望ê上帝hō͘ lín tùi信來充滿ta̍k樣ê歡喜平安；hō͘ lín tī聖神ê權能得tio̍h滿滿ê ǹg望。Goān siúⁿ-sù ǹg-bāng ê Siōng-tè hō͘ lín tùi sìn lâi chhiong-móa ta̍k iūⁿ ê hoaⁿ-hí pêng-an; hō͘ lín tī Sèng Sîn ê koân-lêng tit-tio̍h móa-móa ê ǹg-bāng.

14我ê兄弟ah，我家己也深信lín滿滿善良，充足ta̍k樣ê知識，也會大家相勸勉。Góa ê hiaⁿ-tī ah, góa ka-kī iā chhim sìn lín móa-móa siān-liông, chhiong-chiok ta̍k iūⁿ ê tì-sek, iā ōe tāi-ke saⁿ khoàn-bián.

15總是我寫phoe hō͘ lín，有淡薄khah好膽，beh hō͘ lín koh會記得；這是tùi上帝所hō͘我ê恩典，Chóng-sī góa siá phoe hō͘ lín, ū tām-po̍h khah hó-táⁿ, beh hō͘ lín koh ōe kì-tit; che sī tùi Siōng-tè só͘ hō͘ góa ê un-tián,

16hō͘我tī外邦做基督耶穌ê執事，用上帝ê福音來服事，beh hō͘所獻ê外邦人，tī聖神成聖ê得tio̍h接納。hō͘ góa tī gōa-pang chòe Ki-tok Iâ-so͘ ê chip-sū, ēng Siōng-tè ê hok-im lâi ho̍k-sāi, beh hō͘ só͘ hiàn ê gōa-pang lâng, tī Sèng Sîn chiâⁿ-sèng ê tit-tio̍h chiap-la̍p.

17所以論上帝ê事，我tī基督耶穌有thang誇口。Só͘-í lūn Siōng-tè ê sū, góa tī Ki-tok Iâ-so͘ ū thang khoa-kháu.

18因為除基督用我所行ê以外，我m̄敢講甚麼；只有講伊用我ê言語kap行做，In-ūi tû Ki-tok ēng góa só͘ kiâⁿ ê í-gōa, góa m̄ káⁿ kóng sím-mi̍h; chí ū kóng I ēng góa ê giân-gú kap kiâⁿ-chòe,

19tī神蹟kap奇事ê權能，kap tī聖神ê權能，hō͘外邦順服；án-ni我tùi耶路撒冷se̍h到Í-lī-lí-kó͘，遍傳基督ê福音。tī sîn-jiah kap kî-sū ê koân-lêng, kap tī Sèng Sîn ê koân-lêng, hō͘ gōa-pang sūn-ho̍k; án-ni góa tùi Iâ-lō͘-sat-léng se̍h kàu Í-lī-lí-kó͘, piàn thoân Ki-tok ê hok-im.

20Koh我立志傳福音無tī基督已經受稱呼ê所在，驚了起tī別人ê地基頂；Koh góa li̍p-chì thoân hok-im bô tī Ki-tok í-keng siū chheng-ho͘ ê só͘-chāi, kiaⁿ-liáu khí tī pa̍t lâng ê tōe-ki téng;

21就是照所記載講， 未得tio̍h伊ê消息ê beh看見， 未聽見ê beh曉悟。chiū-sī chiàu só͘ kì-chài kóng, Bē tit-tio̍h I ê siau-sit ê beh khòaⁿ-kìⁿ, Bē thiaⁿ-kìⁿ ê beh hiáu-ngō͘.

22因為án-ni我chōe-chōe pái tú-tio̍h阻擋，bōe得thang就近lín；In-ūi án-ni góa chōe-chōe pái tú-tio̍h chó͘-tòng, bōe tit thang chiū-kūn lín;

23但是現今tī chiah-ê地方無koh有所在thang去，已經chōe-chōe年有欣慕beh就近lín；nā-sī hiān-kim tī chiah ê tōe-hng bô koh ū só͘-chāi thang khì, í-keng chōe-chōe nî ū him-bō͘ beh chiū-kūn lín;

24thèng候我去Sū-pan-ngá ê時，(因為我ǹg望經過ê時見tio̍h lín，事先kap lín交陪略略á滿意，後來得tio̍h lín送行去hia) ；thèng-hāu góa khì Sū-pan-ngá ê sî, (in-ūi góa ǹg-bāng keng-kè ê sî kìⁿ-tio̍h lín, tāi-seng kap lín kau-pôe lio̍h-lio̍h-á móa-ì, āu-lâi tit-tio̍h lín sòng-hêng khì hia);

25總是現在我去耶路撒冷供給聖徒。chóng-sī hiān-chāi góa khì Iâ-lō͘-sat-léng kiong-kip sèng-tô͘.

26因為馬其頓A-kai-a人歡喜saⁿ-kap tôe-iân幫贊耶路撒冷聖徒中ê sòng-hiong人。In-ūi Má-kî-tùn A-kai-a lâng hoaⁿ-hí saⁿ-kap tôe-iân pang-chān Iâ-lō͘-sat-léng sèng-tô͘ tiong ê sòng-hiong lâng.

27In真正是歡喜；卻也是欠in ê債。因為外邦人既然saⁿ-kap有份tī in神靈ê事，自然tio̍h用肉體ê物服事in。In chin-chiàⁿ sī hoaⁿ-hí; khiok iā sī khiàm in ê chè. In-ūi gōa-pang lâng kì-jiân saⁿ-kap ū hūn tī in sîn-lêng ê sū, chū-jiân tio̍h ēng jio̍k-thé ê mi̍h ho̍k-sāi in.

28thèng候我做完chit-ê事，將chit-ê iân項交付in明白，我beh tùi lín hia去Sū-pan-ngá。Thèng-hāu góa chòe oân chit ê sū, chiong chit ê iân-hāng kau-hù in bêng-pe̍k, góa beh tùi lín hia khì Sū-pan-ngá.

29我也知就近lín ê時，beh有基督豐盛ê祝福順續去。Góa iā chai chiū-kūn lín ê sî, beh ū Ki-tok hong-sēng ê chiok-hok sūn-sòa khì.

30兄弟ah，我對咱ê主耶穌基督，也tùi聖神ê疼，勸lín kap我同盡力，替我祈求上帝，Hiaⁿ-tī ah, góa tùi lán ê Chú Iâ-so͘ Ki-tok, iā tùi Sèng Sîn ê thiàⁿ, khǹg lín kap góa tâng chīn-la̍t, thòe góa kî-kiû Siōng-tè,

31救我脫離猶太地hiah-ê m̄順服ê人，也hō͘我為tio̍h耶路撒冷所做供給ê事得tio̍h聖徒接納；kiù góa thoat-lī Iû-thài tōe hiah ê m̄ sūn-ho̍k ê lâng, iā hō͘ góa ūi-tio̍h Iâ-lō͘-sat-léng só͘ chòe kiong-kip ê sū tit-tio̍h sèng-tô͘ chiap-la̍p;

32hō͘我tùi上帝ê旨意到lín hia有歡喜，也kap lín saⁿ-kap得tio̍h安歇。hō͘ góa tùi Siōng-tè ê chí-ì kàu lín hia ū hoaⁿ-hí, iā kap lín saⁿ-kap tit-tio̍h an-hioh.

33願賞賜平安ê上帝kap lín眾人tī-teh：À-bēng。Goān siúⁿ-sù pêng-an ê Siōng-tè kap lín chèng lâng tī-teh: À-bēng.

1我對lín舉薦咱ê姊妹Hui-pí，就是Kian-kek-lí教會ê差用；Góa tùi lín kú-chiàn lán ê chí-bē Hui-pí, chiū-sī Kian-kek-lí kàu-hōe ê chhe-ēng;

2hō͘ lín為tio̍h主接待伊照聖徒所合宜，伊有欠用lín幫贊ê，就幫贊伊；因為伊bat扶助chōe-chōe人，也bat扶助我。hō͘ lín ūi-tio̍h Chú chiap-thāi i chiàu sèng-tô͘ só͘ ha̍p-gî, i ū khiàm-ēng lín pang-chān ê, chiū pang-chān i; in-ūi i bat hû-chō͘ chōe-chōe lâng, iā bat hû-chō͘ góa.

3請安百基拉、亞居拉，tī基督耶穌kap我同tio̍h磨ê，Chhéng-an Pek-ki-lah, A-ku-lah, tī Ki-tok Iâ-so͘ kap góa tâng tio̍h-bôa ê,

4也為tio̍h我ê性命bat phe死；m̄-nā我感謝in，就外邦ê眾教會也是án-ni。iā ūi-tio̍h góa ê sìⁿ-miā bat phe-sí; m̄ nā góa kám-siā in, chiū gōa-pang ê chèng kàu-hōe iā sī án-ni.

5Koh請安聚集tī伊ê家ê教會。請安我所疼ê Í-pài-nî-thó͘，伊是亞西亞頭一個屬基督ê。Koh chhéng-an chū-chi̍p tī i ê ke ê kàu-hōe. Chhéng-an góa só͘ thiàⁿ ê Í-pài-nî-thó͘, i sī A-se-a thâu chi̍t ê sio̍k Ki-tok ê.

6請安馬利亞，伊bat為tio̍h lín chōe-chōe tio̍h磨。Chhéng-an Má-lī-a, i bat ūi-tio̍h lín chōe-chōe tio̍h-bôa.

7請安我ê親戚An-to-nî-kó͘，Iû-nî-a；in bat kap我同關監，有名聲tī使徒中，koh事先我tiàm tī基督。Chhéng-an góa ê chhin-chhek An-to-nî-kó͘, Iû-nî-a; in bat kap góa tâng koaiⁿ-kaⁿ, ū miâ-siaⁿ tī sù-tô͘ tiong, koh tāi-seng góa tiàm tī Ki-tok.

8請安Àm-pek-lī，tiàm-tī主hō͘我所疼ê。Chhéng-an Àm-pek-lī, tiàm-tī Chú hō͘ góa só͘ thiàⁿ ê.

9請安tī基督kap我同tio̍h磨ê Ní-pa-lô͘，以及我所疼ê Sū-tāi-kó͘。請安A-pí-lī，tī基督有經驗ê。Chhéng-an tī Ki-tok kap góa tâng tio̍h-bôa ê Ní-pa-lô͘, í-ki̍p góa só͘ thiàⁿ ê Sū-tāi-kó͘. Chhéng-an A-pí-lī, tī Ki-tok ū keng-giām ê.

10請安A-lí-to-pò͘家內ê人。Chhéng-an A-lí-to-pò͘ ke-lāi ê lâng.

11請安我ê親戚Hi-lô-thian。請安Ná-kî-sò͘家內tiàm-tī主ê人。Chhéng-an góa ê chhin-chhek Hi-lô-thian. Chhéng-an Ná-kî-sò͘ ke-lāi tiàm-tī Chú ê lâng.

12請安tī主teh tio̍h磨ê Thó͘-hui-ná、Thó͘-hù-sat。請安所疼ê Pí-sek，bat tī主chōe-chōe tio̍h磨ê。Chhéng-an tī Chú teh tio̍h-bôa ê Thó͘-hui-ná, Thó͘-hù-sat. Chhéng-an só͘ thiàⁿ ê Pí-sek, bat tī Chú chōe-chōe tio̍h-bôa ê.

13請安tī主得tio̍h揀選ê Ló͘-hu，kap伊ê老母，也是我ê老母。Chhéng-an tī Chú tit-tio̍h kéng-soán ê Ló͘-hu, kap i ê lāu-bú, iā sī góa ê lāu-bú.

14請安A-sùn-kî-thó͘、Hut-le̍k-kan、Hek-bí、Pat-lô-pa、Hek-má，以及kap in tī-teh ê兄弟。Chhéng-an A-sùn-kî-thó͘, Hut-le̍k-kan, Hek-bí, Pat-lô-pa, Hek-má, í-ki̍p kap in tī-teh ê hiaⁿ-tī.

15請安Hui-lô-lô-kó͘ kap Iû-lī-a，Nî-lī-a kap伊ê姊妹，kap O-lîm-pa，以及kap in tī-teh ê眾聖徒。Chhéng-an Hui-lô-lô-kó͘ kap Iû-lī-a, Nî-lī-a kap i ê chí-bē, kap O-lîm-pa, í-ki̍p kap in tī-teh ê chèng sèng-tô͘.

16Lín tio̍h用聖ê相chim大家相請安。基督ê眾教會請安lín。Lín tio̍h ēng sèng ê saⁿ-chim tāi-ke saⁿ chhéng-an. Ki-tok ê chèng kàu-hōe chhéng-an lín.

17兄弟ah，我勸lín tio̍h省察hiah-ê分黨塞礙ê，就是背lín所學習ê教示ê；koh tio̍h閃避in。Hiaⁿ-tī ah, góa khǹg lín tio̍h séng-chhat hiah ê hun-tóng that-gāi ê, chiū-sī pōe lín só͘ ha̍k-si̍p ê kà-sī ê; koh tio̍h siám-pī in.

18因為chit號人無服事咱ê主基督，是服事家己ê腹肚；用in e奇巧諂媚ê話迷惑正直ê人ê心。In-ūi chit hō lâng bô ho̍k-sāi lán ê Chú Ki-tok, sī ho̍k-sāi ka-kī ê pak-tó͘; ēng in ê kî-khá thiám-mī ê ōe bê-he̍k chèng-ti̍t ê lâng ê sim.

19因為lín ê順服已經遍傳tī眾人。所以我為tio̍h lín歡喜；獨獨論到好事，我ài lín有知識，論到pháiⁿ事，就ài lín清白。In-ūi lín ê sūn-ho̍k í-keng piàn thoân tī chèng lâng. Só͘-í góa ūi-tio̍h lín hoaⁿ-hí; to̍k-to̍k lūn-kàu hó sū, góa ài lín ū tì-sek, lūn-kàu pháiⁿ sū, chiū ài lín chheng-pe̍k.

20賞賜平安ê上帝beh緊緊踏碎撒旦tī lín ê腳下。願咱ê主耶穌基督ê恩kap lín tī-teh。Siúⁿ-sù pêng-an ê Siōng-tè beh kín-kín ta̍h-chhùi Sat-tàn tī lín ê kha-ē. Goān lán ê Chú Iâ-so͘ Ki-tok ê un kap lín tī-teh.

21Kap我同tio̍h磨ê提摩太，以及我ê親戚Lō͘-kiû、Iâ-sun、Só͘-se-pá-tek請安lín。Kap góa tâng tio̍h-bôa ê Thê-mô͘-thài, í-ki̍p góa ê chhin-chhek Lō͘-kiû, Iâ-sun, Só͘-se-pá-tek chhéng-an lín.

22我Tek-tiu，就是寫chittiuNphoee5，tī主請安lín。Góa Tek-tiu, chiū-sī siá chit tiuⁿ phoe ê, tī Chú chhéng-an lín.

23我kap全教會éng歇伊tâue Ka-iû請安lín。Góa kap choân kàu-hōe éng hioh i tau ê Ka-iû chhéng-an lín.

24城內koán庫房e5I2-lah-toukap兄弟Koat-thó͘請安lín。Siâⁿ-lāi koán khò͘-pâng ê Í-lah-to͘ kap hiaⁿ-tī Koat-thó͘ chhéng-an lín.

25上帝會堅固lín照我ê福音，kap所宣傳耶穌基督ê事，也照永世代所隱密奧妙ê闡明，Siōng-tè ōe kian-kò͘ lín chiàu góa ê hok-im, kap só͘ soan-thoân Iâ-so͘ Ki-tok ê sū, iā chiàu éng sè-tāi só͘ ún-ba̍t ò-biāu ê chhián-bêng,

26chit-ê奧妙chit-tia̍p有著現，也tùi先知ê冊，照永遠上帝ê命令來指示萬邦，hō͘ in tùi信來順thàn；chit ê ò-biāu chit tia̍p ū tù-hiān, iā tùi sian-ti ê chheh, chiàu éng-oán Siōng-tè ê bēng-lēng lâi chí-sī bān pang, hō͘ in tùi sìn lâi sūn-thàn;

27願榮光tùi耶穌基督歸tī獨一有智慧ê上帝，代代無soah。À-bēng。goān êng-kng tùi Iâ-so͘ Ki-tok kui tī to̍k-it ū tì-hūi ê Siōng-tè, tāi-tāi bô soah. À-bēng.

1Tùi上帝ê旨意受召做耶穌基督ê使徒保羅，kap兄弟Só͘-thê-nî，Tùi Siōng-tè ê chí-ì siū tiàu chòe Iâ-so͘ Ki-tok ê sù-tô͘ Pó-lô, kap hiaⁿ-tī Só͘-thê-nî,

2phoe寄hō͘上帝ê教會tī哥林多ê，就是tiàm-tī基督耶穌成聖、受召做聖徒，以及見若ta̍k所在求叫咱ê主耶穌基督ê名ê，主是in ê，也是咱ê；phoe kià hō͘ Siōng-tè ê kàu-hōe tī Ko-lîm-to ê, chiū-sī tiàm-tī Ki-tok Iâ-so͘ chiâⁿ-sèng, siū tiàu chòe sèng-tô͘, í-ki̍p kìⁿ-nā ta̍k só͘-chāi kiû-kiò lán ê Chú Iâ-so͘ Ki-tok ê miâ ê, Chú sī in ê, iā sī lán ê;

3願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

4我常常替lín感謝我ê上帝，是為tio̍h上帝ê恩典tī耶穌基督bat賞賜lín ê，Góa siông-siông thòe lín kám-siā góa ê Siōng-tè, sī ūi-tio̍h Siōng-tè ê un-tián tī Iâ-so͘ Ki-tok bat siúⁿ-sù lín ê,

5因為lín tiàm-tī伊ta̍k項tāi-chì富足，口才知識無m̄齊備，in-ūi lín tiàm-tī I ta̍k hāng tāi-chì hù-chiok, kháu-châi tì-sek bô m̄ chiâu-pī,

6親像基督ê干證得tio̍h堅固tī lín ê中間；chhin-chhiūⁿ Ki-tok ê kan-chèng tit-tio̍h kian-kò͘ tī lín ê tiong-kan;

7致到lín tī chiah-ê恩賜無一項無夠額，來thèng候咱ê主耶穌基督ê顯現；tì-kàu lín tī chiah ê un-sù bô chi̍t hāng bô kàu-gia̍h, lâi thèng-hāu lán ê Chú Iâ-so͘ Ki-tok ê hián-hiān;

8伊也beh堅固lín到路尾，tī咱ê主耶穌基督ê日無thang嫌。I iā beh kian-kò͘ lín kàu lō͘-bé, tī lán ê Chú Iâ-so͘ Ki-tok ê ji̍t bô thang hiâm.

9上帝是信實，lín tùi伊受召來kap伊ê Kiáⁿ咱ê主耶穌基督結聯。Siōng-tè sī sìn-si̍t, lín tùi I siū tiàu lâi kap I ê Kiáⁿ lán ê Chú Iâ-so͘ Ki-tok kiat-liân.

10兄弟ah，taⁿ我對咱ê主耶穌基督ê名勸lín議論lóng tio̍h相同，lín中間莫得有分黨，就是tio̍h一心一意大家相契合。Hiaⁿ-tī ah, taⁿ góa tùi lán ê Chú Iâ-so͘ Ki-tok ê miâ khǹg lín gī-lūn lóng tio̍h saⁿ-tâng, lín tiong-kan bo̍h-tit ū hun-tóng, chiū-sī tio̍h chi̍t sim chi̍t ì tāi-ke saⁿ khè-ha̍p.

11我ê兄弟ah，是Kek-lâi氏家內ê人bat kā我講，lín中間有相爭。Góa ê hiaⁿ-tī ah, sī Kek-lâi--sī ke-lāi ê lâng bat kā góa kóng, lín tiong-kan ū saⁿ-chiⁿ.

12我ê意思是lín ta̍k人有teh講，我屬保羅，我屬亞波羅，我屬磯法，我屬基督。Góa ê ì-sù sī lín ta̍k lâng ū teh kóng, Góa sio̍k Pó-lô, Góa sio̍k A-pho-lô, Góa sio̍k Ki-hoat, Góa sio̍k Ki-tok.

13基督kiám有分開mah？保羅kiám替lín釘十字架mah？á是lín bat受洗禮歸tī保羅ê名mah？Ki-tok kiám ū pun-khui mah? Pó-lô kiám thòe lín tèng si̍p-jī-kè mah? Á-sī lín bat siū sóe-lé kui tī Pó-lô ê miâ mah?

14感謝上帝，tī Kek-你-sū-pò͘、Ka-iû以外，我未bat kā lín一人行洗禮，Kám-siā Siōng-tè, tī Kek-lí-sū-pò͘, Ka-iû í-gōa, góa bē bat kā lín chi̍t lâng kiâⁿ sóe-lé,

15免得人講lín受洗禮歸tī我ê名。bián-tit lâng kóng lín siū sóe-lé kui tī góa ê miâ.

16我也kā Sū-th ê-hoán-à一家ê人行洗禮，其餘有kā別人行洗禮á無，我卻bōe記得。Góa iā kā Sū-thê-hoán-à chi̍t ke ê lâng kiâⁿ sóe-lé, kî-û ū kā pa̍t lâng kiâⁿ sóe-lé á bô góa khiok bōe kì-tit.

17因為基督差我m̄是beh行洗禮，是beh傳福音；不在言語ê智慧，驚了基督ê十字架歸tī空空。In-ūi Ki-tok chhe góa m̄ sī beh kiâⁿ sóe-lé sī beh thoân hok-im; put-chāi giân-gú ê tì-hūi, kiaⁿ-liáu Ki-tok ê si̍p-jī-kè kui tī khang-khang.

18因為十字架ê道理，沉淪ê人看做戇，咱得救ê人看做上帝ê權能。In-ūi si̍p-jī-kè ê tō-lí, tîm-lûn ê lâng khòaⁿ chòe gōng, lán tit kiù ê lâng khòaⁿ chòe Siōng-tè ê koân-lêng.

19因為有記載講， 我beh滅無智慧ê人ê智慧， 也beh棄sak聰明ê人ê聰明。In-ūi ū kì-chài kóng, Góa beh bia̍t-bô tì-hūi ê lâng ê tì-hūi, Iā beh khì-sak chhang-miâ ê lâng ê chhang-miâ.

20智慧ê人tī tá-lo̍h？經學士tī tá-lo̍h？chit世間好辯論ê人tī tá-lo̍h？上帝kiám m̄是hō͘世間ê智慧變成戇？Tì-hūi ê lâng tī tá-lo̍h? Keng-ha̍k-sū tī tá-lo̍h? chit sè-kan hò͘ⁿ piān-lūn ê lâng tī tá-lo̍h? Siōng-tè kiám m̄ sī hō͘ sè-kan ê tì-hūi piàn-chiâⁿ gōng?

21因為世間既然tùi in ê智慧m̄-bat上帝，上帝就歡喜tùi所宣傳ê戇來救chiah-ê信ê人；這lóng是上帝ê智慧。In-ūi sè-kan kì-jiân tùi in ê tì-hūi m̄ bat Siōng-tè, Siōng-tè chiū hoaⁿ-hí tùi só͘ soan-thoân ê gōng lâi kiù chiah ê sìn ê lâng; che lóng sī Siōng-tè ê tì-hūi.

22因為猶太人求神蹟，希利尼人chhē智慧。In-ūi Iû-thài lâng kiû sîn-jiah, Hi-lī-nî lâng chhē tì-hūi.

23但是阮傳釘十字架ê基督，tùi tī猶太人是塞礙，tùi tī外邦人是愚戇；Nā-sī goán thoân tèng si̍p-jī-kè ê Ki-tok, tùi tī Iû-thài lâng sī that-gāi, tùi tī gōa-pang lâng sī gû-gōng;

24但是tùi tī受召ê，無論猶太、希利尼，基督做上帝ê權能，上帝ê智慧。nā-sī tùi tī siū tiàu ê, bô lūn Iû-thài Hi-lī-nî, Ki-tok chòe Siōng-tè ê koân-lêng, Siōng-tè ê tì-hūi.

25因為上帝ê愚戇比人khah智慧，上帝ê軟弱比人khah勇壯。In-ūi Siōng-tè ê gû-gōng pí lâng khah tì-hūi, Siōng-tè ê loán-jio̍k pí lâng khah ióng-chòng.

26兄弟ah，試看lín ê受召，照肉體有智慧ê無jōa-chōe，有權力ê無jōa-chōe，有尊貴ê也無jōa-chōe；Hiaⁿ-tī ah, chhì-khòaⁿ lín ê siū-tiàu, chiàu jio̍k-thé ū tì-hūi ê bô jōa chōe, ū koân-le̍k ê bô jōa chōe, ū chun-kùi ê iā bô jōa chōe;

27但是上帝揀世間ê戇ê，來hō͘智慧ê人見笑；上帝也揀世間ê軟弱ê，來hō͘勇壯ê見笑；nā-sī Siōng-tè kéng sè-kan ê gōng ê, lâi hō͘ tì-hūi ê lâng kiàn-siàu; Siōng-tè iā kéng sè-kan ê loán-jio̍k ê lâi hō͘ ióng-chòng ê kiàn-siàu;

28上帝也揀世間卑賤ê，人看m̄上目ê，以及hiah-ê無ê，來廢無hiah-ê有ê；Siōng-tè iā kéng sè-kan pi-chiān ê, lâng khòaⁿ m̄ chiūⁿ ba̍k ê, í-ki̍p hiah ê bô ê, lâi hòe-bô hiah ê ū-ê;

29hō͘見若有肉體ê tī上帝ê面前無thang誇口。hō͘ kìⁿ-nā ū jio̍k-thé ê tī Siōng-tè ê bīn-chêng bô thang khoa-kháu.

30但是lín tùi上帝得tio̍h tiàm-tī基督耶穌；伊tùi上帝替咱成做智慧，koh做義、成聖，以及贖回；Nā-sī lín tùi Siōng-tè tit-tio̍h tiàm-tī Ki-tok Iâ-so͘; I tùi Siōng-tè thòe lán chiâⁿ-chòe tì-hūi, koh chòe gī, chiâⁿ-sèng, í-ki̍p sio̍k-hôe;

31致到照所記載講，誇口ê人tio̍h用主來誇口。tì-kàu chiàu só͘ kì-chài kóng, Khoa-kháu ê lâng tio̍h ēng Chú lâi khoa-kháu.