1耶穌基督ê奴僕保羅，受召做使徒，分別伊來傳上帝ê福音，Iâ-so͘ Ki-tok ê lô͘-po̍k Pó-lô, siū tiàu chòe sù-tô͘, hun-piat i lâi thoân Siōng-tè ê hok-im,

2就是上帝從前託伊chiah-ê先知tī聖經所應允ê，chiū-sī Siōng-tè chiông-chiân thok I chiah ê sian-ti tī sèng-keng só͘ èng-ún ê,

3論伊ê Kiáⁿ，照肉體是tùi大衛ê後裔生ê，lūn I ê Kiáⁿ, chiàu jio̍k-thé sī tùi Tāi-pi̍t ê hō͘-è siⁿ ê,

4照聖德ê神就tùi死人ê koh活，用權能顯明伊是上帝ê Kiáⁿ，chiàu sèng-tek ê Sîn chiū tùi sí-lâng ê koh-oa̍h, ēng koân-lêng hián-bêng I sī Siōng-tè ê Kiáⁿ,

5就是咱ê主耶穌基督：阮對伊受恩kap使徒ê職，beh為tio̍h伊ê名hō͘人tī萬邦中信來順thàn；chiū-sī lán ê Chú Iâ-so͘ Ki-tok: goán tùi I siū un kap sù-tô͘ ê chit, beh ūi-tio̍h I ê miâ hō͘ lâng tī bān pang tiong sìn lâi sūn-thàn;

6從中也有lín chiah-ê受召屬耶穌基督ê：chiông-tiong iā ū lín chiah-ê siū tiàu sio̍k Iâ-so͘ Ki-tok ê:

7phoe寄hō͘見若tòa tī羅馬，上帝所疼，受召做聖徒ê；願lín對咱ê父上帝kap主耶穌基督得tio̍h恩典平安。phoe kià hō͘ kìⁿ-nā tòa tī Lô-má, Siōng-tè só͘ thiàⁿ, siū tiàu chòe sèng-tô͘ ê; goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

8頭一項，因為lín ê信報揚tī thong世間，所以我對耶穌基督為tio̍h lín眾人感謝我ê上帝。Thâu chi̍t hāng, in-ūi lín ê sìn pò-iông tī thong sè-kan, só͘-í góa tùi Iâ-so͘ Ki-tok ūi-tio̍h lín chèng lâng kám-siā góa ê Siōng-tè.

9因為我tī伊ê Kiáⁿ ê福音，用我ê神所服事ê上帝做我ê干證，我怎樣siàu念lín無soah，In-ūi góa tī I ê Kiáⁿ ê hok-im ēng góa ê sîn só͘ ho̍k-sāi ê Siōng-tè chòe góa ê kan-chèng, góa cháiⁿ-iūⁿ siàu-liām lín bô soah,

10祈禱ê中間常常求，看chit-tia̍p有thang照上帝ê旨意得tio̍h平坦ê路就近lín。kî-tó ê tiong-kan siông-siông kiû, khòaⁿ chit tia̍p ū thang chiàu Siōng-tè ê chí-ì tit-tio̍h pîⁿ-tháⁿ ê lō͘ chiū-kūn lín.

11因為我欣慕見tio̍h lín，thang將神靈ê恩賜分hō͘ lín，hō͘ lín堅固；In-ūi góa him-bō͘ kìⁿ-tio̍h lín, thang chiong sîn-lêng ê un-sù pun hō͘ lín, hō͘ lín kian-kò͘;

12就是我tī lín中間，lín對我ê信，我tùi lín ê信，大家得tio̍h安慰。chiū-sī góa tī lín tiong-kan, lín tùi góa ê sìn, góa tùi lín ê sìn, tāi-ke tit-tio̍h an-ùi.

13兄弟ah，我m̄-ài lín m̄知我chōe-chōe pái立志beh就近lín，ài tī lín中間得tio̍h果子親像tī其餘ê外邦；總是到taⁿ iáu有阻擋。Hiaⁿ-tī ah, góa m̄ ài lín m̄ chai góa chōe-chōe pái li̍p-chì beh chiū-kūn lín, ài tī lín tiong-kan tit-tio̍h ké-chí chhin-chhiūⁿ tī kî-û ê gōa-pang; chóng-sī kàu taⁿ iáu ū chó͘-tòng.

14無論希利尼人á是番人，聰明ê á是愚戇ê，我lóng欠in ê債。Bô lūn Hi-lī-nî lâng á-sī hoan-lâng, chhang-miâ ê á-sī gû-gōng ê, góa lóng khiàm in ê chè.

15所以在tī我lóng便便，beh用福音續傳hō͘ lín tòa tī羅馬ê人。Só͘-í chāi-tī góa lóng piān-piān, beh ēng hok-im sòa thoân hō͘ lín tòa tī Lô-má ê lâng.

16因為我無掠福音做見笑，因為是上帝ê權能beh救lóng總信ê人，事先猶太，後來希利尼。In-ūi góa bô lia̍h hok-im chòe kiàn-siàu, in-ūi sī Siōng-tè ê koân-lêng beh kiù lóng-chóng sìn ê lâng, tāi-seng Iû-thài, āu-lâi Hi-lī-nî.

17因為tī福音ê內面有顯明上帝ê義，tùi信到tī信；照聖經所記載講，義ê人beh tùi信來活。In-ūi tī hok-im ê lāi-bīn ū hián-bêng Siōng-tè ê gī, tùi sìn kàu tī sìn; chiàu sèng-keng só͘ kì-chài kóng, Gī ê lâng beh tùi sìn lâi oa̍h.

18因為上帝ê受氣對天顯明，到tī人lóng總ê不虔不義，就是用不義壓制真理ê人ê；In-ūi Siōng-tè ê siū-khì tùi thiⁿ hián-bêng, kàu tī lâng lóng-chóng ê put-khiân put-gī, chiū-sī ēng put-gī ap-chè chin-lí ê lâng ê;

19因為論到上帝，人所thang bat伊ê，有顯明tī in ê心內；因為上帝bat顯明指示in；in-ūi lūn-kàu Siōng-tè, lâng só͘ thang bat I ê, ū hián-bêng tī in ê sim-lāi; in-ūi Siōng-tè bat hián-bêng chí-sī in;

20因為tùi創造世間以來，上帝永遠ê權能kap聖質，凡所bōe看見伊ê，tùi受創造ê物，想了就明明看見；hō͘ in無路thang推託。in-ūi tùi chhòng-chō sè-kan í-lâi, Siōng-tè éng-oán ê koân-lêng kap sèng-chit, hoān só͘ bōe khòaⁿ-kìⁿ I ê, tùi siū chhòng-chō ê mi̍h, siūⁿ-liáu chiū bêng-bêng khòaⁿ-kìⁿ; hō͘ in bô lō͘ thang the-thok.

21因為in既然bat上帝，但是無榮光伊做上帝，亦無感謝伊；就是in ê思想變做空空，in ê bōe曉悟ê心變做烏暗；In-ūi in kì-jiân bat Siōng-tè, nā-sī bô êng-kng I chòe Siōng-tè, ia̍h bô kám-siā I; chiū-sī in ê su-siūⁿ pìⁿ-chòe khang-khang, in ê bōe hiáu-ngō͘ ê sim pìⁿ chòe o͘-àm;

22家己稱做知識，反tńg做戇，ka-kī chheng chòe tì-sek, hoán-tńg chòe gōng,

23將bōe敗壞ê上帝ê榮光來換會敗壞ê人kap禽獸、蟲thōa chiah-ê像ê款式。chiong bōe pāi-hoāi ê Siōng-tè ê êng-kng lâi ōaⁿ ōe pāi-hoāi ê lâng kap khîm-siù thâng-thōa chiah ê siōng ê khoán-sit.

24所以照in心內ê私慾，上帝交付in tī無清氣，hō͘ in ê身軀相凌辱；Só͘-í chiàu in sim-lāi ê su-io̍k, Siōng-tè kau-hù in tī bô chheng-khì, hō͘ in ê seng-khu saⁿ lêng-jio̍k;

25in用上帝ê真換做假，敬拜服事受造ê物，khah過頭tī造物ê主；伊是堪得o-ló到代代ê。À-bēng。in ēng Siōng-tè ê chin ōaⁿ chòe ké, kèng-pài ho̍k-sāi siū chō ê mi̍h, khah kè-thâu tī chō mi̍h ê Chú; I sī kham-tit o-ló kàu tāi-tāi ê. À-bēng.

26因為án-ni，上帝交付in tī見笑ê情；in ê婦人人用順性ê路用變做逆性ê路用；In-ūi án-ni, Siōng-tè kau-hù in tī kiàn-siàu ê chêng; in ê hū-jîn-lâng ēng sūn-sèng ê lō͘-ēng pìⁿ chòe ge̍k-sèng ê lō͘-ēng;

27ta-po͘人也án-ni放sak婦人人順性ê路用，相意愛，慾火動心，ta-po͘ kap ta-po͘行無正經ê事；tī in本身受in ê差謬所應該tú-tio̍h ê報應。ta-po͘-lâng iā án-ni pàng-sak hū-jîn-lâng sūn-sèng ê lō͘-ēng, saⁿ ì-ài, io̍k-hé tōng-sim, ta-po͘ kap ta-po͘ kiâⁿ bô chèng-keng ê sū; tī in pún-sin siū in ê chha-biū só͘ eng-kai tú-tio̍h ê pò-èng.

28In既然m̄肯存上帝tī in ê心思，上帝交付in tī不重用ê心，行m̄合宜ê事，In kì-jiân m̄ khéng chûn Siōng-tè tī in ê sim-su, Siōng-tè kau-hù in tī put-tiòng-iōng ê sim, kiâⁿ m̄ ha̍p-gî ê sū,

29充滿lóng總ê不義、pháiⁿ tāi、貪心、惡毒、滿滿怨妒、行兇、相爭、奸詐、臭心行，chhiong-móa lóng-chóng ê put-gī, pháiⁿ tāi, tham-sim, ok-to̍k, móa-móa oàn-tò͘, hêng-hiong, saⁿ-chiⁿ, kan-chà, chhàu-sim-hēng,

30做講ka-chiah-後話ê、譭謗ê、怨恨上帝ê、侮慢ê、驕傲ê、phín-phóng ê、造作pháiⁿ tāi ê、忤逆父母ê、chòe kóng ka-chiah-āu ōe ê, húi-pòng ê, oàn-hūn Siōng-tè ê, bú-bān ê, kiau-ngō͘ ê, phín-phóng ê, chō-chok pháiⁿ tāi ê, ngó͘-ge̍k pē-bú ê,

31無明理ê、無守約ê、無親人情ê、無憐憫ê。bô bêng-lí ê, bô siú iok ê, bô chhin-lâng-chêng ê, bô lîn-bín ê.

32In既然知上帝ê擬斷行chiah-ê tāi-chì ê人應該死，就m̄-nā家己行，koh別人行，in也kap in歡喜。In kì-jiân chai Siōng-tè ê gí-toàn kiâⁿ chiah ê tāi-chì ê lâng eng-kai sí, chiū m̄ nā ka-kī kiâⁿ, koh pa̍t lâng kiâⁿ, in iā kap in hoaⁿ-hí.

1所以見若擬斷人ê人ah，你無thang推託；因為你所擬斷別人ê，tú-tú是擬定家己；因為你teh擬斷人，家己也án-ni行。Só͘-í kìⁿ-nā gí-toàn lâng ê lâng ah, lí bô thang the-thok; in-ūi lí só͘ gí-toàn pa̍t lâng ê, tú-tú sī gí-tiāⁿ ka-kī; in-ūi lí teh gí-toàn lâng, ka-kī iā án-ni kiâⁿ.

2但是咱知上帝是照真理來擬斷行án-ni ê人。Nā-sī lán chai Siōng-tè sī chiàu chin-lí lâi gí-toàn kiâⁿ án-ni ê lâng.

3你chit號人ah，人行án-ni你擬斷伊，也你家己去行；你phah算能逃閃上帝ê擬斷mah？Lí chit hō lâng ah, lâng kiâⁿ án-ni lí gí-toàn i, iā lí ka-kī khì kiâⁿ; lí phah-sǹg ōe tô-siám Siōng-tè ê gí-toàn mah?

4á是看輕伊極大ê仁慈、寬容、吞忍，m̄知kioh上帝ê仁慈是beh chhōa你反悔？Á-sī khòaⁿ-khin I ke̍k-tōa ê jîn-chû, khoan-iông, thun-lún, m̄ chai-kioh Siōng-tè ê jîn-chû sī beh chhōa lí hoán-hóe?

5竟然照你ê硬心kap m̄反悔ê心，為家己積聚受氣tī受氣ê日，就是上帝義ê審判顯明ê日；kèng-jiân chiàu lí ê ngī sim kap m̄ hoán-hóe ê sim, ūi ka-kī chek-chū siū-khì tī siū-khì ê ji̍t, chiū-sī Siōng-tè gī ê sím-phòaⁿ hián-bêng ê ji̍t;

6伊beh照ta̍k人ê所行來報應伊；I beh chiàu ta̍k lâng ê só͘ kiâⁿ lâi pò-èng i;

7見若mî-nōa行好，求榮光、尊貴kap bōe敗壞ê，將永活報伊；kìⁿ-nā mî-nōa kiâⁿ hó, kiû êng-kng, chun-kùi kap bōe pāi-hoāi ê, chiong éng-oa̍h pò i;

8見若結黨，無thàn真理來thàn不義ê，就有怨恨kap受氣，kìⁿ-nā kiat-tóng, bô thàn chin-lí lâi thàn put-gī ê, chiū ū oàn-hūn kap siū-khì,

9患難kap困苦，到tī lóng總行pháiⁿ ê人，事先猶太，後來希利尼；hoān-lān kap khùn-khó͘, kàu tī lóng-chóng kiâⁿ pháiⁿ ê lâng, tāi-seng Iû-thài, āu-lâi Hi-lī-nî;

10也榮光、尊貴、平安到tī lóng總行好ê人，事先猶太，後來希利尼。iā êng-kng, chun-kùi, pêng-an kàu tī lóng-chóng kiâⁿ hó ê lâng, tāi-seng Iû-thài, āu-lâi Hi-lī-nî.

11因為上帝無照外貌取人。In-ūi Siōng-tè bô chiàu gōa-māu chhú lâng.

12因為見若無律法來犯罪ê，也beh無律法來沉淪；見若tī律法來犯罪ê，beh tùi律法受審判。In-ūi kìⁿ-nā bô lu̍t-hoat lâi hoān-chōe ê, iā beh bô lu̍t-hoat lâi tîm-lûn; kìⁿ-nā tī lu̍t-hoat lâi hoān-chōe ê, beh tùi lu̍t-hoat siū sím-phòaⁿ.

13因為tī上帝ê面前，m̄是聽律法ê做義，就是行律法ê beh稱做義。In-ūi tī Siōng-tè ê bīn-chêng, m̄ sī thiaⁿ lu̍t-hoat ê chòe gī, chiū-sī kiâⁿ lu̍t-hoat ê beh chheng-chòe-gī.

14因為無律法ê外邦人，tùi本性來行律法ê時，in雖然無律法，是家己做家己ê律法；In-ūi bô lu̍t-hoat ê gōa-pang lâng, tùi pún sèng lâi kiâⁿ lu̍t-hoat ê sî, in sui-jiân bô lu̍t-hoat, sī ka-kī chòe ka-kī ê lu̍t-hoat;

15是顯明律法ê功用刻tī in ê心，in ê良心saⁿ-kap做干證，in ê念頭有時相責備，有時相寬恕；sī hián-bêng lu̍t-hoat ê kong-iōng khek tī in ê sim, in ê liông-sim saⁿ-kap chòe kan-chèng, in ê liām-thâu ū-sî saⁿ chek-pī ū-sî saⁿ khoan-sù;

16tī上帝用耶穌基督審判人隱密ê事hit日，照我ê福音所講。tī Siōng-tè ēng Iâ-so͘ Ki-tok sím-phòaⁿ lâng ún-ba̍t ê sū hit ji̍t, chiàu góa ê hok-im só͘ kóng.

17你若稱做猶太人，óa靠律法，掠上帝來做誇口，Lí nā chheng chòe Iû-thài lâng, óa-khò lu̍t-hoat, lia̍h Siōng-tè lâi chòe khoa-kháu,

18已經tùi律法來學習，知伊ê旨意，koh驗出hiah-ê至好ê，í-keng tùi lu̍t-hoat lâi ha̍k-si̍p, chai I ê chí-ì, koh giām-chhut hiah ê chì hó ê,

19koh深信家己是做chhiⁿ-mî人ê chhōa路ê，tiàm-tī烏暗ê ê光，koh chhim sìn ka-kī sī chòe chhiⁿ-mî lâng ê chhōa-lō͘ ê, tiàm-tī o͘-àm ê ê kng,

20戇人ê先生，gín-ná ê教習，tī律法內有知識kap真理ê模樣；gōng lâng ê sian-siⁿ, gín-ná ê kàu-si̍p, tī lu̍t-hoat lāi ū tì-sek kap chin-lí ê bô͘-iūⁿ;

21你教示別人，也無教示家己ah？你宣傳講m̄-thang偷the̍h，也家己偷the̍h ah？lí kà-sī pa̍t lâng, iā bô kà-sī ka-kī ah? lí soan-thoân kóng m̄ thang thau-the̍h, iā ka-kī thau-the̍h ah?

22你講m̄-thang行淫，也家己姦淫ah？你厭惡偶像，也家己搶宮廟ah？Lí kóng m̄ thang kiâⁿ-îm, iā ka-kī kan-îm ah? lí iàm-ò͘ⁿ ngó͘-siōng, iā ka-kī chhiúⁿ keng-biō ah?

23你掠律法做誇口，就tùi犯tio̍h律法凌辱上帝ah？lí lia̍h lu̍t-hoat chòe khoa-kháu, chiū tùi hoān-tio̍h lu̍t-hoat lêng-jio̍k Siōng-tè ah?

24因為上帝ê名為tio̍h lín受謗瀆tī外邦中，照所記載ê。In-ūi Siōng-tè ê miâ ūi-tio̍h lín siū pòng-to̍k tī gōa-pang tiong, chiàu só͘ kì-chài ê.

25你若行律法，割禮就有利益；你若犯tio̍h律法，就你ê割禮變做無割禮。Lí nā kiâⁿ lu̍t-hoat, kat-lé chiū ū lī-ek; lí nā hoān-tio̍h lu̍t-hoat, chiū lí ê kat-lé pìⁿ chòe bô kat-lé.

26所以無受割禮ê若守律法ê規例，伊ê無割禮kiám無beh算做割禮mah？Só͘-í bô siū kat-lé ê nā siú lu̍t-hoat ê kui-lē, i ê bô kat-lé kiám bô beh sǹg-chòe kat-lé mah?

27Koh生成無割禮來盡律法ê，kiám無beh擬斷你tùi文字kap割禮來犯法mah？Koh seng-sêng bô kat-lé lâi chīn lu̍t-hoat ê, kiám bô beh gí-toàn lí tùi bûn-jī kap kat-lé lâi hoān hoat mah?

28因為外皮做猶太人ê m̄是猶太人；tī肉體外皮ê割禮m̄是割禮。In-ūi gōa-phê chòe Iû-thài lâng ê m̄ sī Iû-thài lâng; tī jio̍k-thé gōa-phê ê kat-lé m̄ sī kat-lé.

29獨獨內面做猶太人ê chiah是猶太人，也心內ê割禮chiah是割禮，在tī神，不在tī文字；伊ê得tio̍h o-ló m̄是tùi人，就是tùi上帝。To̍k-to̍k lāi-bīn chòe Iû-thài lâng ê chiah sī Iû-thài lâng, iā sim-lāi ê kat-lé chiah sī kat-lé, chāi-tī sîn, put-chāi tī bûn-jī; i ê tit-tio̍h o-ló m̄ sī tùi lâng, chiū-sī tùi Siōng-tè.

1Án-ni就猶太人有甚麼見長？割禮有甚麼利益ah？Án-ni chiū Iû-thài lâng ū sím-mi̍h kiàn-tiông? kat-lé ū sím-mi̍h lī-ek ah?

2無論看tá-lo̍h一面，lóng大大有利益；第一是上帝ê詔有交託in。Bô lūn khòaⁿ tá-lo̍h chi̍t bīn, lóng tōa-tōa ū lī-ek; tē it sī Siōng-tè ê chiàu ū kau-thok in.

3設使有ê無信，就怎樣？in ê無信beh廢無上帝ê信實mah？Siat-sú ū-ê bô sìn, chiū cháiⁿ-iūⁿ? in ê bô sìn beh hòe-bô Siōng-tè ê sìn-si̍t mah?

4斷斷m̄是；tio̍h認上帝做真實，人lóng做白賊；照所記載講：「hō͘你tī你所講ê稱做義，tī受審判ê時，得tio̍h khah贏。」Toàn-toàn m̄ sī; tio̍h jīn Siōng-tè chòe chin-si̍t, lâng lóng chòe pe̍h-chha̍t; chiàu só͘ kì-chài kóng, "Hō͘ lí tī lí só͘ kóng ê chheng-chòe-gī, Tī siū sím-phòaⁿ ê sî, tit-tio̍h khah-iâⁿ."

5我taⁿ thàn人ê款來講：咱ê不義若顯明上帝ê義，咱beh怎樣講？上帝降落受氣，伊也不義mah？Góa taⁿ thàn lâng ê khoán lâi kóng: Lán ê put-gī nā hián-bêng Siōng-tè ê gī, lán beh cháiⁿ-iūⁿ kóng? Siōng-tè kàng-lo̍h siū-khì, I iā put-gī mah?

6斷斷m̄是；若án-ni，上帝thái-thó會審判世間ah？Toàn-toàn m̄ sī; nā án-ni, Siōng-tè thái-thó ōe sím-phòaⁿ sè-kan ah?

7若我ê白賊益發顯明上帝ê真實，hō͘伊ná榮光，就我怎樣猶原受審判，親像罪人ah？Nā góa ê pe̍h-chha̍t it-hoat hián-bêng Siōng-tè ê chin-si̍t, hō͘ I ná êng-kng, chiū góa cháiⁿ-iūⁿ iû-goân siū sím-phòaⁿ, chhin-chhiūⁿ chōe-jîn ah?

8也啥事無講，咱來去做pháiⁿ，hō͘好事能成？這是親像阮所受ê譭謗，也親像人講阮有án-ni teh講：hit號人受定罪是公道。Iā siáⁿ-sū bô kóng, Lán lâi khì chòe pháiⁿ, hō͘ hó sū ōe chiâⁿ? che sī chhin-chhiūⁿ goán só͘ siū ê húi-pòng, iā chhin-chhiūⁿ lâng kóng goán ū án-ni teh kóng: hit hō lâng siū tēng-chōe sī kong-tō.

9這是怎樣？咱有khah輸mah？Lóng無。因為阮已經證明猶太、希利尼lóng有罪；Che sī cháiⁿ-iūⁿ? Lán ū khah-su mah? Lóng bô. In-ūi goán í-keng chèng-bêng Iû-thài Hi-lī-nî lóng ū chōe;

10照所記載講， Lóng無義人，連一個也無；chiàu só͘ kì-chài kóng, Lóng bô gī lâng, liân chi̍t-ê iā bô;

11無人曉悟，無人chhē上帝；Bô lâng hiáu-ngō͘, bô lâng chhē Siōng-tè;

12lóng總歪chhoa̍h，相同變做無利益； 無有行好ê，連半個也無；Lóng-chóng oai-chhoa̍h, saⁿ-tâng pìⁿ chòe bô lī-ek; Bô ū kiâⁿ hó ê, liân pòaⁿ-ê iā bô;

13In ê嚨喉是破墓； In用舌講奸詐； In ê嘴唇下有蛇ê毒；In ê nâ-âu sī phòa bōng; In ēng chi̍h kóng kan-chà; In ê chhùi-tûn ē ū chôa ê to̍k;

14In ê嘴滿滿咒詛也真苦；In ê chhùi móa-móa chiù-chó͘ iā chin khó͘;

15In ê腳緊緊走ài hō͘人流血，In ê kha kín-kín cháu ài hō͘ lâng lâu huih,

16Tī in ê路有殘害kap苦難；Tī in ê lō͘ ū chân-hāi kap khó͘-lān;

17平安ê路in m̄-bat，Pêng-an ê lō͘ in m̄ bat,

18In ê目睭前無有驚畏上帝。In ê ba̍k-chiu chêng bô ū kiaⁿ-ùi Siōng-tè.

19Taⁿ咱知，見若律法所講ê是對律法下ê人來講，beh塞密眾人ê嘴，hō͘ thong世間tī上帝ê面前受擬罪；Taⁿ lán chai kìⁿ-nā lu̍t-hoat só͘ kóng ê sī tùi lu̍t-hoat ē ê lâng lâi kóng, beh that-ba̍t chèng lâng ê chhùi, hō͘ thong sè-kan tī Siōng-tè ê bīn-chêng siū gí-chōe;

20因為tùi thàn律法無人會得稱做義tī上帝ê面前；因為tùi律法是hō͘人知有罪。in-ūi tùi thàn lu̍t-hoat bô lâng ōe tit chheng-chòe-gī tī Siōng-tè ê bīn-chêng; in-ūi tùi lu̍t-hoat sī hō͘ lâng chai ū chōe.

21Taⁿ tī律法以外有上帝ê義已經顯明，律法kap先知kā伊做干證；Taⁿ tī lu̍t-hoat í-gōa ū Siōng-tè ê gī í-keng hián-bêng, lu̍t-hoat kap sian-ti kā i chòe kan-chèng;

22就是上帝ê義，tùi信耶穌基督到tī lóng總信ê人；因為lóng無cheng-chha；chiū-sī Siōng-tè ê gī, tùi sìn Iâ-so͘ Ki-tok kàu tī lóng-chóng sìn ê lâng; in-ūi lóng bô cheng-chha;

23因為眾人已經犯罪，上帝ê榮光得無tio̍h；in-ūi chèng lâng í-keng hoān-chōe, Siōng-tè ê êng-kng tit bô tio̍h;

24taⁿ為tio̍h伊ê恩典白白得tio̍h稱做義，對tī基督耶穌ê贖回；taⁿ ūi-tio̍h I ê un-tián pe̍h-pe̍h tit-tio̍h chheng-chòe-gī, tùi-tī Ki-tok Iâ-so͘ ê sio̍k-hôe;

25就是上帝所顯然設立做挽回ê祭ê，tùi信，在tī伊ê血，beh顯明伊家己ê義，因為上帝有寬容，無歸咎前代ê罪；chiū-sī Siōng-tè só͘ hián-jiân siat-li̍p chòe bán-hôe ê chè ê, tùi sìn, chāi-tī I ê huih, beh hián-bêng I ka-kī ê gī, in-ūi Siōng-tè ū khoan-iông, bô kui-kiū chêng tāi ê chōe;

26tī現今ê時代ài顯明伊ê義，hō͘伊本身做義，koh稱hit-ê信耶穌ê人做義。tī hiān-kim ê sî-tāi ài hián-bêng I ê gī, hō͘ I pún-sin chòe gī, koh chheng hit ê sìn Iâ-so͘ ê lâng chòe gī.

27Án-ni-siⁿ tī tá-lo̍h thang誇口？全然無lah。Tùi甚麼法hō͘伊無？tùi行ê法mah？m̄是，是tùi信ê法。Án-ni-siⁿ tī tá-lo̍h thang khoa-kháu? Choân-jiân bô lah. Tùi sím-mi̍h hoat hō͘ i bô? tùi kiâⁿ ê hoat mah? M̄ sī, sī tùi sìn ê hoat.

28所以阮議定人稱做義是tùi信，m̄是tùi thàn律法。Só͘-í goán gī-tiāⁿ lâng chheng-chòe-gī sī tùi sìn, m̄ sī tùi thàn lu̍t-hoat.

29á是上帝獨獨是猶太人ê上帝mah？Kiám也m̄是外邦人ê上帝mah？是，也是外邦人ê；Á-sī Siōng-tè to̍k-to̍k sī Iû-thài lâng ê Siōng-tè mah? Kiám iā m̄ sī gōa-pang lâng ê Siōng-tè mah? Sī, iā sī gōa-pang lâng ê;

30因為上帝是一個，伊beh用信稱受割禮ê人做義，也beh tùi chit-ê信稱無受割禮ê人做義。in-ūi Siōng-tè sī chi̍t-ê, I beh ēng sìn chheng siū kat-lé ê lâng chòe gī, iā beh tùi chit ê sìn chheng bô siū kat-lé ê lâng chòe gī.

31Án-ni就咱tùi信廢無律法mah？斷斷m̄是；反tńg是hō͘律法khiā在。Án-ni chiū lán tùi sìn hòe-bô lu̍t-hoat mah? Toàn-toàn m̄ sī; hoán-tńg sī hō͘ lu̍t-hoat khiā-chāi.