1所以見若擬斷人ê人ah，你無thang推託；因為你所擬斷別人ê，tú-tú是擬定家己；因為你teh擬斷人，家己也án-ni行。Só͘-í kìⁿ-nā gí-toàn lâng ê lâng ah, lí bô thang the-thok; in-ūi lí só͘ gí-toàn pa̍t lâng ê, tú-tú sī gí-tiāⁿ ka-kī; in-ūi lí teh gí-toàn lâng, ka-kī iā án-ni kiâⁿ.

2但是咱知上帝是照真理來擬斷行án-ni ê人。Nā-sī lán chai Siōng-tè sī chiàu chin-lí lâi gí-toàn kiâⁿ án-ni ê lâng.

3你chit號人ah，人行án-ni你擬斷伊，也你家己去行；你phah算能逃閃上帝ê擬斷mah？Lí chit hō lâng ah, lâng kiâⁿ án-ni lí gí-toàn i, iā lí ka-kī khì kiâⁿ; lí phah-sǹg ōe tô-siám Siōng-tè ê gí-toàn mah?

4á是看輕伊極大ê仁慈、寬容、吞忍，m̄知kioh上帝ê仁慈是beh chhōa你反悔？Á-sī khòaⁿ-khin I ke̍k-tōa ê jîn-chû, khoan-iông, thun-lún, m̄ chai-kioh Siōng-tè ê jîn-chû sī beh chhōa lí hoán-hóe?

5竟然照你ê硬心kap m̄反悔ê心，為家己積聚受氣tī受氣ê日，就是上帝義ê審判顯明ê日；kèng-jiân chiàu lí ê ngī sim kap m̄ hoán-hóe ê sim, ūi ka-kī chek-chū siū-khì tī siū-khì ê ji̍t, chiū-sī Siōng-tè gī ê sím-phòaⁿ hián-bêng ê ji̍t;

6伊beh照ta̍k人ê所行來報應伊；I beh chiàu ta̍k lâng ê só͘ kiâⁿ lâi pò-èng i;

7見若mî-nōa行好，求榮光、尊貴kap bōe敗壞ê，將永活報伊；kìⁿ-nā mî-nōa kiâⁿ hó, kiû êng-kng, chun-kùi kap bōe pāi-hoāi ê, chiong éng-oa̍h pò i;

8見若結黨，無thàn真理來thàn不義ê，就有怨恨kap受氣，kìⁿ-nā kiat-tóng, bô thàn chin-lí lâi thàn put-gī ê, chiū ū oàn-hūn kap siū-khì,

9患難kap困苦，到tī lóng總行pháiⁿ ê人，事先猶太，後來希利尼；hoān-lān kap khùn-khó͘, kàu tī lóng-chóng kiâⁿ pháiⁿ ê lâng, tāi-seng Iû-thài, āu-lâi Hi-lī-nî;

10也榮光、尊貴、平安到tī lóng總行好ê人，事先猶太，後來希利尼。iā êng-kng, chun-kùi, pêng-an kàu tī lóng-chóng kiâⁿ hó ê lâng, tāi-seng Iû-thài, āu-lâi Hi-lī-nî.

11因為上帝無照外貌取人。In-ūi Siōng-tè bô chiàu gōa-māu chhú lâng.

12因為見若無律法來犯罪ê，也beh無律法來沉淪；見若tī律法來犯罪ê，beh tùi律法受審判。In-ūi kìⁿ-nā bô lu̍t-hoat lâi hoān-chōe ê, iā beh bô lu̍t-hoat lâi tîm-lûn; kìⁿ-nā tī lu̍t-hoat lâi hoān-chōe ê, beh tùi lu̍t-hoat siū sím-phòaⁿ.

13因為tī上帝ê面前，m̄是聽律法ê做義，就是行律法ê beh稱做義。In-ūi tī Siōng-tè ê bīn-chêng, m̄ sī thiaⁿ lu̍t-hoat ê chòe gī, chiū-sī kiâⁿ lu̍t-hoat ê beh chheng-chòe-gī.

14因為無律法ê外邦人，tùi本性來行律法ê時，in雖然無律法，是家己做家己ê律法；In-ūi bô lu̍t-hoat ê gōa-pang lâng, tùi pún sèng lâi kiâⁿ lu̍t-hoat ê sî, in sui-jiân bô lu̍t-hoat, sī ka-kī chòe ka-kī ê lu̍t-hoat;

15是顯明律法ê功用刻tī in ê心，in ê良心saⁿ-kap做干證，in ê念頭有時相責備，有時相寬恕；sī hián-bêng lu̍t-hoat ê kong-iōng khek tī in ê sim, in ê liông-sim saⁿ-kap chòe kan-chèng, in ê liām-thâu ū-sî saⁿ chek-pī ū-sî saⁿ khoan-sù;

16tī上帝用耶穌基督審判人隱密ê事hit日，照我ê福音所講。tī Siōng-tè ēng Iâ-so͘ Ki-tok sím-phòaⁿ lâng ún-ba̍t ê sū hit ji̍t, chiàu góa ê hok-im só͘ kóng.

17你若稱做猶太人，óa靠律法，掠上帝來做誇口，Lí nā chheng chòe Iû-thài lâng, óa-khò lu̍t-hoat, lia̍h Siōng-tè lâi chòe khoa-kháu,

18已經tùi律法來學習，知伊ê旨意，koh驗出hiah-ê至好ê，í-keng tùi lu̍t-hoat lâi ha̍k-si̍p, chai I ê chí-ì, koh giām-chhut hiah ê chì hó ê,

19koh深信家己是做chhiⁿ-mî人ê chhōa路ê，tiàm-tī烏暗ê ê光，koh chhim sìn ka-kī sī chòe chhiⁿ-mî lâng ê chhōa-lō͘ ê, tiàm-tī o͘-àm ê ê kng,

20戇人ê先生，gín-ná ê教習，tī律法內有知識kap真理ê模樣；gōng lâng ê sian-siⁿ, gín-ná ê kàu-si̍p, tī lu̍t-hoat lāi ū tì-sek kap chin-lí ê bô͘-iūⁿ;

21你教示別人，也無教示家己ah？你宣傳講m̄-thang偷the̍h，也家己偷the̍h ah？lí kà-sī pa̍t lâng, iā bô kà-sī ka-kī ah? lí soan-thoân kóng m̄ thang thau-the̍h, iā ka-kī thau-the̍h ah?

22你講m̄-thang行淫，也家己姦淫ah？你厭惡偶像，也家己搶宮廟ah？Lí kóng m̄ thang kiâⁿ-îm, iā ka-kī kan-îm ah? lí iàm-ò͘ⁿ ngó͘-siōng, iā ka-kī chhiúⁿ keng-biō ah?

23你掠律法做誇口，就tùi犯tio̍h律法凌辱上帝ah？lí lia̍h lu̍t-hoat chòe khoa-kháu, chiū tùi hoān-tio̍h lu̍t-hoat lêng-jio̍k Siōng-tè ah?

24因為上帝ê名為tio̍h lín受謗瀆tī外邦中，照所記載ê。In-ūi Siōng-tè ê miâ ūi-tio̍h lín siū pòng-to̍k tī gōa-pang tiong, chiàu só͘ kì-chài ê.

25你若行律法，割禮就有利益；你若犯tio̍h律法，就你ê割禮變做無割禮。Lí nā kiâⁿ lu̍t-hoat, kat-lé chiū ū lī-ek; lí nā hoān-tio̍h lu̍t-hoat, chiū lí ê kat-lé pìⁿ chòe bô kat-lé.

26所以無受割禮ê若守律法ê規例，伊ê無割禮kiám無beh算做割禮mah？Só͘-í bô siū kat-lé ê nā siú lu̍t-hoat ê kui-lē, i ê bô kat-lé kiám bô beh sǹg-chòe kat-lé mah?

27Koh生成無割禮來盡律法ê，kiám無beh擬斷你tùi文字kap割禮來犯法mah？Koh seng-sêng bô kat-lé lâi chīn lu̍t-hoat ê, kiám bô beh gí-toàn lí tùi bûn-jī kap kat-lé lâi hoān hoat mah?

28因為外皮做猶太人ê m̄是猶太人；tī肉體外皮ê割禮m̄是割禮。In-ūi gōa-phê chòe Iû-thài lâng ê m̄ sī Iû-thài lâng; tī jio̍k-thé gōa-phê ê kat-lé m̄ sī kat-lé.

29獨獨內面做猶太人ê chiah是猶太人，也心內ê割禮chiah是割禮，在tī神，不在tī文字；伊ê得tio̍h o-ló m̄是tùi人，就是tùi上帝。To̍k-to̍k lāi-bīn chòe Iû-thài lâng ê chiah sī Iû-thài lâng, iā sim-lāi ê kat-lé chiah sī kat-lé, chāi-tī sîn, put-chāi tī bûn-jī; i ê tit-tio̍h o-ló m̄ sī tùi lâng, chiū-sī tùi Siōng-tè.

1Án-ni就猶太人有甚麼見長？割禮有甚麼利益ah？Án-ni chiū Iû-thài lâng ū sím-mi̍h kiàn-tiông? kat-lé ū sím-mi̍h lī-ek ah?

2無論看tá-lo̍h一面，lóng大大有利益；第一是上帝ê詔有交託in。Bô lūn khòaⁿ tá-lo̍h chi̍t bīn, lóng tōa-tōa ū lī-ek; tē it sī Siōng-tè ê chiàu ū kau-thok in.

3設使有ê無信，就怎樣？in ê無信beh廢無上帝ê信實mah？Siat-sú ū-ê bô sìn, chiū cháiⁿ-iūⁿ? in ê bô sìn beh hòe-bô Siōng-tè ê sìn-si̍t mah?

4斷斷m̄是；tio̍h認上帝做真實，人lóng做白賊；照所記載講：「hō͘你tī你所講ê稱做義，tī受審判ê時，得tio̍h khah贏。」Toàn-toàn m̄ sī; tio̍h jīn Siōng-tè chòe chin-si̍t, lâng lóng chòe pe̍h-chha̍t; chiàu só͘ kì-chài kóng, "Hō͘ lí tī lí só͘ kóng ê chheng-chòe-gī, Tī siū sím-phòaⁿ ê sî, tit-tio̍h khah-iâⁿ."

5我taⁿ thàn人ê款來講：咱ê不義若顯明上帝ê義，咱beh怎樣講？上帝降落受氣，伊也不義mah？Góa taⁿ thàn lâng ê khoán lâi kóng: Lán ê put-gī nā hián-bêng Siōng-tè ê gī, lán beh cháiⁿ-iūⁿ kóng? Siōng-tè kàng-lo̍h siū-khì, I iā put-gī mah?

6斷斷m̄是；若án-ni，上帝thái-thó會審判世間ah？Toàn-toàn m̄ sī; nā án-ni, Siōng-tè thái-thó ōe sím-phòaⁿ sè-kan ah?

7若我ê白賊益發顯明上帝ê真實，hō͘伊ná榮光，就我怎樣猶原受審判，親像罪人ah？Nā góa ê pe̍h-chha̍t it-hoat hián-bêng Siōng-tè ê chin-si̍t, hō͘ I ná êng-kng, chiū góa cháiⁿ-iūⁿ iû-goân siū sím-phòaⁿ, chhin-chhiūⁿ chōe-jîn ah?

8也啥事無講，咱來去做pháiⁿ，hō͘好事能成？這是親像阮所受ê譭謗，也親像人講阮有án-ni teh講：hit號人受定罪是公道。Iā siáⁿ-sū bô kóng, Lán lâi khì chòe pháiⁿ, hō͘ hó sū ōe chiâⁿ? che sī chhin-chhiūⁿ goán só͘ siū ê húi-pòng, iā chhin-chhiūⁿ lâng kóng goán ū án-ni teh kóng: hit hō lâng siū tēng-chōe sī kong-tō.

9這是怎樣？咱有khah輸mah？Lóng無。因為阮已經證明猶太、希利尼lóng有罪；Che sī cháiⁿ-iūⁿ? Lán ū khah-su mah? Lóng bô. In-ūi goán í-keng chèng-bêng Iû-thài Hi-lī-nî lóng ū chōe;

10照所記載講， Lóng無義人，連一個也無；chiàu só͘ kì-chài kóng, Lóng bô gī lâng, liân chi̍t-ê iā bô;

11無人曉悟，無人chhē上帝；Bô lâng hiáu-ngō͘, bô lâng chhē Siōng-tè;

12lóng總歪chhoa̍h，相同變做無利益； 無有行好ê，連半個也無；Lóng-chóng oai-chhoa̍h, saⁿ-tâng pìⁿ chòe bô lī-ek; Bô ū kiâⁿ hó ê, liân pòaⁿ-ê iā bô;

13In ê嚨喉是破墓； In用舌講奸詐； In ê嘴唇下有蛇ê毒；In ê nâ-âu sī phòa bōng; In ēng chi̍h kóng kan-chà; In ê chhùi-tûn ē ū chôa ê to̍k;

14In ê嘴滿滿咒詛也真苦；In ê chhùi móa-móa chiù-chó͘ iā chin khó͘;

15In ê腳緊緊走ài hō͘人流血，In ê kha kín-kín cháu ài hō͘ lâng lâu huih,

16Tī in ê路有殘害kap苦難；Tī in ê lō͘ ū chân-hāi kap khó͘-lān;

17平安ê路in m̄-bat，Pêng-an ê lō͘ in m̄ bat,

18In ê目睭前無有驚畏上帝。In ê ba̍k-chiu chêng bô ū kiaⁿ-ùi Siōng-tè.

19Taⁿ咱知，見若律法所講ê是對律法下ê人來講，beh塞密眾人ê嘴，hō͘ thong世間tī上帝ê面前受擬罪；Taⁿ lán chai kìⁿ-nā lu̍t-hoat só͘ kóng ê sī tùi lu̍t-hoat ē ê lâng lâi kóng, beh that-ba̍t chèng lâng ê chhùi, hō͘ thong sè-kan tī Siōng-tè ê bīn-chêng siū gí-chōe;

20因為tùi thàn律法無人會得稱做義tī上帝ê面前；因為tùi律法是hō͘人知有罪。in-ūi tùi thàn lu̍t-hoat bô lâng ōe tit chheng-chòe-gī tī Siōng-tè ê bīn-chêng; in-ūi tùi lu̍t-hoat sī hō͘ lâng chai ū chōe.

21Taⁿ tī律法以外有上帝ê義已經顯明，律法kap先知kā伊做干證；Taⁿ tī lu̍t-hoat í-gōa ū Siōng-tè ê gī í-keng hián-bêng, lu̍t-hoat kap sian-ti kā i chòe kan-chèng;

22就是上帝ê義，tùi信耶穌基督到tī lóng總信ê人；因為lóng無cheng-chha；chiū-sī Siōng-tè ê gī, tùi sìn Iâ-so͘ Ki-tok kàu tī lóng-chóng sìn ê lâng; in-ūi lóng bô cheng-chha;

23因為眾人已經犯罪，上帝ê榮光得無tio̍h；in-ūi chèng lâng í-keng hoān-chōe, Siōng-tè ê êng-kng tit bô tio̍h;

24taⁿ為tio̍h伊ê恩典白白得tio̍h稱做義，對tī基督耶穌ê贖回；taⁿ ūi-tio̍h I ê un-tián pe̍h-pe̍h tit-tio̍h chheng-chòe-gī, tùi-tī Ki-tok Iâ-so͘ ê sio̍k-hôe;

25就是上帝所顯然設立做挽回ê祭ê，tùi信，在tī伊ê血，beh顯明伊家己ê義，因為上帝有寬容，無歸咎前代ê罪；chiū-sī Siōng-tè só͘ hián-jiân siat-li̍p chòe bán-hôe ê chè ê, tùi sìn, chāi-tī I ê huih, beh hián-bêng I ka-kī ê gī, in-ūi Siōng-tè ū khoan-iông, bô kui-kiū chêng tāi ê chōe;

26tī現今ê時代ài顯明伊ê義，hō͘伊本身做義，koh稱hit-ê信耶穌ê人做義。tī hiān-kim ê sî-tāi ài hián-bêng I ê gī, hō͘ I pún-sin chòe gī, koh chheng hit ê sìn Iâ-so͘ ê lâng chòe gī.

27Án-ni-siⁿ tī tá-lo̍h thang誇口？全然無lah。Tùi甚麼法hō͘伊無？tùi行ê法mah？m̄是，是tùi信ê法。Án-ni-siⁿ tī tá-lo̍h thang khoa-kháu? Choân-jiân bô lah. Tùi sím-mi̍h hoat hō͘ i bô? tùi kiâⁿ ê hoat mah? M̄ sī, sī tùi sìn ê hoat.

28所以阮議定人稱做義是tùi信，m̄是tùi thàn律法。Só͘-í goán gī-tiāⁿ lâng chheng-chòe-gī sī tùi sìn, m̄ sī tùi thàn lu̍t-hoat.

29á是上帝獨獨是猶太人ê上帝mah？Kiám也m̄是外邦人ê上帝mah？是，也是外邦人ê；Á-sī Siōng-tè to̍k-to̍k sī Iû-thài lâng ê Siōng-tè mah? Kiám iā m̄ sī gōa-pang lâng ê Siōng-tè mah? Sī, iā sī gōa-pang lâng ê;

30因為上帝是一個，伊beh用信稱受割禮ê人做義，也beh tùi chit-ê信稱無受割禮ê人做義。in-ūi Siōng-tè sī chi̍t-ê, I beh ēng sìn chheng siū kat-lé ê lâng chòe gī, iā beh tùi chit ê sìn chheng bô siū kat-lé ê lâng chòe gī.

31Án-ni就咱tùi信廢無律法mah？斷斷m̄是；反tńg是hō͘律法khiā在。Án-ni chiū lán tùi sìn hòe-bô lu̍t-hoat mah? Toàn-toàn m̄ sī; hoán-tńg sī hō͘ lu̍t-hoat khiā-chāi.

1Án-ni咱beh講，咱肉體ê祖亞伯拉罕有得tio̍h甚麼？Án-ni lán beh kóng lán jio̍k-thé ê chó͘ A-pek-la̍h-hán ū tit-tio̍h sím-mi̍h?

2因為亞伯拉罕若tùi所行得tio̍h稱做義，就thang誇口；總是tùi上帝本是無。In-ūi A-pek-la̍h-hán nā tùi só͘ kiâⁿ tit-tio̍h chheng-chòe-gī, chiū thang khoa-kháu; chóng-sī tùi Siōng-tè pún sī bô.

3因為聖經講甚麼？亞伯拉罕信上帝，就kā伊算做義。In-ūi sèng-keng kóng sím-mi̍h? A-pek-la̍h-hán sìn Siōng-tè, chiū kā i sǹg chòe gī.

4Taⁿ見若做工ê，伊ê工錢無算是恩典，算是應該ê。Taⁿ kìⁿ-nā chòe kang ê, i ê kang-chîⁿ bô sǹg sī un-tián, sǹg sī eng-kai ê.

5若是無做工ê，獨獨信hit-ê稱不虔ê人做義ê，伊ê信就kā伊算做義。Nā-sī bô chòe kang ê, to̍k-to̍k sìn hit ê chheng put-khiân ê lâng chòe gī ê, i ê sìn chiū kā i sǹg chòe gī.

6親像大衛也講起人lóng無所行，來得tio̍h上帝算伊做義ê，有福氣，是講，Chhin-chhiūⁿ Tāi-pi̍t iā kóng-khí lâng lóng bô só͘ kiâⁿ, lâi tit-tio̍h Siōng-tè sǹg i chòe gī ê, ū hok-khì, sī kóng,

7In ê不法得tio̍h赦免， In ê罪惡得tio̍ih遮蓋，hit號人有福氣；In ê put-hoat tit-tio̍h sià-bián, In ê chōe-ok tit-tio̍ih jia-khàm, hit hō lâng ū hok-khì;

8主無beh用罪算伊ê賬ê，hit-ê人有福氣。Chú bô beh ēng chōe sǹg i ê siàu ê, hit ê lâng ū hok-khì.

9Taⁿ chit-ê福氣是到tī受割禮ê，á是也到tī無受割禮ê ah？因為咱teh講，亞伯拉罕ê信是kā伊算做義。Taⁿ chit ê hok-khì sī kàu tī siū kat-lé ê, á-sī iā kàu tī bô siū kat-lé ê ah? in-ūi lán teh kóng, A-pek-la̍h-hán ê sìn sī kā i sǹg chòe gī.

10Án-ni是怎樣算？是tī割禮ê時，á是tī無割禮ê時？m̄是tī割禮ê時，是tī無割禮ê時；Án-ni sī cháiⁿ-iūⁿ sǹg? Sī tī kat-lé ê sî, á-sī tī bô kat-lé ê sî? M̄ sī tī kat-lé ê sî, sī tī bô kat-lé ê sî;

11伊也得tio̍h割禮ê記號，就是tī無受割禮ê時tùi信所有ê義ê印信；hō͘伊thang做lóng總無受割禮來信ê人ê父，hō͘義thang算做in ê；i iā tit-tio̍h kat-lé ê kì-hō, chiū-sī tī bô siū kat-lé ê sî tùi sìn só͘ ū ê gī ê ìn-sìn; hō͘ i thang chòe lóng-chóng bô siū kat-lé lâi sìn ê lâng ê pē, hō͘ gī thang sǹg chòe in ê;

12也hō͘伊做受割禮ê人ê父，就是hiah-ê m̄-nā受割禮，koh有thàn咱ê父亞伯拉罕未受割禮ê時來信ê腳步ê。iā hō͘ i chòe siū kat-lé ê lâng ê pē, chiū-sī hiah ê m̄ nā siū kat-lé, koh ū thàn lán ê pē A-pek-la̍h-hán bē siū kat-lé ê sî lâi sìn ê kha-pō͘ ê.

13因為所應允亞伯拉罕kap伊ê後裔做後嗣承接世間ê，m̄是tùi律法，是tùi信ê義。In-ūi só͘ èng-ún A-pek-la̍h-hán kap i ê hō͘-è chòe hō͘-sû sêng-chiap sè-kan ê, m̄ sī tùi lu̍t-hoat, sī tùi sìn ê gī.

14因為若屬律法ê做後嗣，信就歸tī空空，應允也廢無。In-ūi nā sio̍k lu̍t-hoat ê chòe hō͘-sû, sìn chiū kui tī khang-khang, èng-ún iā hòe-bô.

15因為律法是致到受氣；若無律法，就無犯tio̍h。In-ūi lu̍t-hoat sī tì-kàu siū-khì; nā bô lu̍t-hoat, chiū bô hoān-tio̍h.

16所以是tùi信，thang照恩典，beh hō͘應允堅固tī眾後裔，m̄-nā tī hit-ê屬律法ê，也tī屬亞伯拉罕ê信ê，Só͘-í sī tùi sìn, thang chiàu un-tián, beh hō͘ èng-ún kian-kò͘ tī chèng hō͘-è, m̄ nā tī hit ê sio̍k lu̍t-hoat ê, iā tī sio̍k A-pek-la̍h-hán ê sìn ê,

17伊tī伊所信ê上帝ê面前做咱眾人ê父，就是hit-ê hō͘死人koh活，叫hiah-ê無ê ná親像有ê ê上帝；照所記載講，我設立你做chōe-chōe邦國ê父。i tī i só͘ sìn ê Siōng-tè ê bīn-chêng chòe lán chèng lâng ê pē, chiū-sī hit ê hō͘ sí lâng koh-oa̍h, kiò hiah ê bô-ê ná chhin-chhiūⁿ ū-ê ê Siōng-tè; chiàu só͘ kì-chài kóng, Góa siat-li̍p lí chòe chōe-chōe pang-kok ê pē.

18伊tī無thang ǹg望ê中間，tùi ǹg望來信，hō͘伊thang成做chōe-chōe邦國ê父，照所bat講ê，你ê後裔beh親像án-ni。I tī bô thang ǹg-bāng ê tiong-kan, tùi ǹg-bāng lâi sìn, hō͘ i thang chiâⁿ-chòe chōe-chōe pang-kok ê pē, chiàu só͘ bat kóng ê, Lí ê hō͘-è beh chhin-chhiūⁿ án-ni.

19伊想tio̍h家己ê身軀親像已經死，(hit時chiâⁿ百歲)，koh撒拉ê胎孕已經絕，伊ê信無軟chiáⁿ；I siūⁿ-tio̍h ka-kī ê seng-khu chhin-chhiūⁿ í-keng sí, (hit sî chiâⁿ pah hè), koh Sat-la̍h ê thai-īn í-keng choa̍t, i ê sìn bô nńg-chiáⁿ;

20伊看上帝ê應允，也無tùi m̄信來僥疑；i khòaⁿ Siōng-tè ê èng-ún, iā bô tùi m̄ sìn lâi giâu-gî;

21信就ná勇健，來歸榮光上帝；sìn chiū ná ióng-kiāⁿ, lâi kui êng-kng Siōng-tè;

22koh深信上帝能成伊所應允ê；所以kā伊算做義。koh chhim sìn Siōng-tè ōe chiâⁿ I só͘ èng-ún ê; só͘-í kā i sǹg chòe gī.

23Taⁿ所講，kā伊算，chit句m̄是kan-ta為tio̍h伊來寫，也是為tio̍h咱；Taⁿ só͘ kóng, kā i sǹg, chit kù m̄ sī kan-ta ūi-tio̍h i lâi siá, iā sī ūi-tio̍h lán;

24咱若信靠hit-ê hō͘咱ê主耶穌tùi死人中koh活ê上帝，也beh kā咱算做義。lán nā sìn-khò hit ê hō͘ lán ê Chú Iâ-so͘ tùi sí-lâng tiong koh-oa̍h ê Siōng-tè, iā beh kā lán sǹg chòe gī.

25耶穌bat為tio̍h咱ê罪受解送，koh為tio̍h咱ê稱做義來得tio̍h koh活。Iâ-so͘ bat ūi-tio̍h lán ê chōe siū ké-sàng, koh ūi-tio̍h lán ê chheng-chòe-gī lâi tit-tio̍h koh-oa̍h.