1Án-ni就猶太人有甚麼見長？割禮有甚麼利益ah？Án-ni chiū Iû-thài lâng ū sím-mi̍h kiàn-tiông? kat-lé ū sím-mi̍h lī-ek ah?

2無論看tá-lo̍h一面，lóng大大有利益；第一是上帝ê詔有交託in。Bô lūn khòaⁿ tá-lo̍h chi̍t bīn, lóng tōa-tōa ū lī-ek; tē it sī Siōng-tè ê chiàu ū kau-thok in.

3設使有ê無信，就怎樣？in ê無信beh廢無上帝ê信實mah？Siat-sú ū-ê bô sìn, chiū cháiⁿ-iūⁿ? in ê bô sìn beh hòe-bô Siōng-tè ê sìn-si̍t mah?

4斷斷m̄是；tio̍h認上帝做真實，人lóng做白賊；照所記載講：「hō͘你tī你所講ê稱做義，tī受審判ê時，得tio̍h khah贏。」Toàn-toàn m̄ sī; tio̍h jīn Siōng-tè chòe chin-si̍t, lâng lóng chòe pe̍h-chha̍t; chiàu só͘ kì-chài kóng, "Hō͘ lí tī lí só͘ kóng ê chheng-chòe-gī, Tī siū sím-phòaⁿ ê sî, tit-tio̍h khah-iâⁿ."

5我taⁿ thàn人ê款來講：咱ê不義若顯明上帝ê義，咱beh怎樣講？上帝降落受氣，伊也不義mah？Góa taⁿ thàn lâng ê khoán lâi kóng: Lán ê put-gī nā hián-bêng Siōng-tè ê gī, lán beh cháiⁿ-iūⁿ kóng? Siōng-tè kàng-lo̍h siū-khì, I iā put-gī mah?

6斷斷m̄是；若án-ni，上帝thái-thó會審判世間ah？Toàn-toàn m̄ sī; nā án-ni, Siōng-tè thái-thó ōe sím-phòaⁿ sè-kan ah?

7若我ê白賊益發顯明上帝ê真實，hō͘伊ná榮光，就我怎樣猶原受審判，親像罪人ah？Nā góa ê pe̍h-chha̍t it-hoat hián-bêng Siōng-tè ê chin-si̍t, hō͘ I ná êng-kng, chiū góa cháiⁿ-iūⁿ iû-goân siū sím-phòaⁿ, chhin-chhiūⁿ chōe-jîn ah?

8也啥事無講，咱來去做pháiⁿ，hō͘好事能成？這是親像阮所受ê譭謗，也親像人講阮有án-ni teh講：hit號人受定罪是公道。Iā siáⁿ-sū bô kóng, Lán lâi khì chòe pháiⁿ, hō͘ hó sū ōe chiâⁿ? che sī chhin-chhiūⁿ goán só͘ siū ê húi-pòng, iā chhin-chhiūⁿ lâng kóng goán ū án-ni teh kóng: hit hō lâng siū tēng-chōe sī kong-tō.

9這是怎樣？咱有khah輸mah？Lóng無。因為阮已經證明猶太、希利尼lóng有罪；Che sī cháiⁿ-iūⁿ? Lán ū khah-su mah? Lóng bô. In-ūi goán í-keng chèng-bêng Iû-thài Hi-lī-nî lóng ū chōe;

10照所記載講， Lóng無義人，連一個也無；chiàu só͘ kì-chài kóng, Lóng bô gī lâng, liân chi̍t-ê iā bô;

11無人曉悟，無人chhē上帝；Bô lâng hiáu-ngō͘, bô lâng chhē Siōng-tè;

12lóng總歪chhoa̍h，相同變做無利益； 無有行好ê，連半個也無；Lóng-chóng oai-chhoa̍h, saⁿ-tâng pìⁿ chòe bô lī-ek; Bô ū kiâⁿ hó ê, liân pòaⁿ-ê iā bô;

13In ê嚨喉是破墓； In用舌講奸詐； In ê嘴唇下有蛇ê毒；In ê nâ-âu sī phòa bōng; In ēng chi̍h kóng kan-chà; In ê chhùi-tûn ē ū chôa ê to̍k;

14In ê嘴滿滿咒詛也真苦；In ê chhùi móa-móa chiù-chó͘ iā chin khó͘;

15In ê腳緊緊走ài hō͘人流血，In ê kha kín-kín cháu ài hō͘ lâng lâu huih,

16Tī in ê路有殘害kap苦難；Tī in ê lō͘ ū chân-hāi kap khó͘-lān;

17平安ê路in m̄-bat，Pêng-an ê lō͘ in m̄ bat,

18In ê目睭前無有驚畏上帝。In ê ba̍k-chiu chêng bô ū kiaⁿ-ùi Siōng-tè.

19Taⁿ咱知，見若律法所講ê是對律法下ê人來講，beh塞密眾人ê嘴，hō͘ thong世間tī上帝ê面前受擬罪；Taⁿ lán chai kìⁿ-nā lu̍t-hoat só͘ kóng ê sī tùi lu̍t-hoat ē ê lâng lâi kóng, beh that-ba̍t chèng lâng ê chhùi, hō͘ thong sè-kan tī Siōng-tè ê bīn-chêng siū gí-chōe;

20因為tùi thàn律法無人會得稱做義tī上帝ê面前；因為tùi律法是hō͘人知有罪。in-ūi tùi thàn lu̍t-hoat bô lâng ōe tit chheng-chòe-gī tī Siōng-tè ê bīn-chêng; in-ūi tùi lu̍t-hoat sī hō͘ lâng chai ū chōe.

21Taⁿ tī律法以外有上帝ê義已經顯明，律法kap先知kā伊做干證；Taⁿ tī lu̍t-hoat í-gōa ū Siōng-tè ê gī í-keng hián-bêng, lu̍t-hoat kap sian-ti kā i chòe kan-chèng;

22就是上帝ê義，tùi信耶穌基督到tī lóng總信ê人；因為lóng無cheng-chha；chiū-sī Siōng-tè ê gī, tùi sìn Iâ-so͘ Ki-tok kàu tī lóng-chóng sìn ê lâng; in-ūi lóng bô cheng-chha;

23因為眾人已經犯罪，上帝ê榮光得無tio̍h；in-ūi chèng lâng í-keng hoān-chōe, Siōng-tè ê êng-kng tit bô tio̍h;

24taⁿ為tio̍h伊ê恩典白白得tio̍h稱做義，對tī基督耶穌ê贖回；taⁿ ūi-tio̍h I ê un-tián pe̍h-pe̍h tit-tio̍h chheng-chòe-gī, tùi-tī Ki-tok Iâ-so͘ ê sio̍k-hôe;

25就是上帝所顯然設立做挽回ê祭ê，tùi信，在tī伊ê血，beh顯明伊家己ê義，因為上帝有寬容，無歸咎前代ê罪；chiū-sī Siōng-tè só͘ hián-jiân siat-li̍p chòe bán-hôe ê chè ê, tùi sìn, chāi-tī I ê huih, beh hián-bêng I ka-kī ê gī, in-ūi Siōng-tè ū khoan-iông, bô kui-kiū chêng tāi ê chōe;

26tī現今ê時代ài顯明伊ê義，hō͘伊本身做義，koh稱hit-ê信耶穌ê人做義。tī hiān-kim ê sî-tāi ài hián-bêng I ê gī, hō͘ I pún-sin chòe gī, koh chheng hit ê sìn Iâ-so͘ ê lâng chòe gī.

27Án-ni-siⁿ tī tá-lo̍h thang誇口？全然無lah。Tùi甚麼法hō͘伊無？tùi行ê法mah？m̄是，是tùi信ê法。Án-ni-siⁿ tī tá-lo̍h thang khoa-kháu? Choân-jiân bô lah. Tùi sím-mi̍h hoat hō͘ i bô? tùi kiâⁿ ê hoat mah? M̄ sī, sī tùi sìn ê hoat.

28所以阮議定人稱做義是tùi信，m̄是tùi thàn律法。Só͘-í goán gī-tiāⁿ lâng chheng-chòe-gī sī tùi sìn, m̄ sī tùi thàn lu̍t-hoat.

29á是上帝獨獨是猶太人ê上帝mah？Kiám也m̄是外邦人ê上帝mah？是，也是外邦人ê；Á-sī Siōng-tè to̍k-to̍k sī Iû-thài lâng ê Siōng-tè mah? Kiám iā m̄ sī gōa-pang lâng ê Siōng-tè mah? Sī, iā sī gōa-pang lâng ê;

30因為上帝是一個，伊beh用信稱受割禮ê人做義，也beh tùi chit-ê信稱無受割禮ê人做義。in-ūi Siōng-tè sī chi̍t-ê, I beh ēng sìn chheng siū kat-lé ê lâng chòe gī, iā beh tùi chit ê sìn chheng bô siū kat-lé ê lâng chòe gī.

31Án-ni就咱tùi信廢無律法mah？斷斷m̄是；反tńg是hō͘律法khiā在。Án-ni chiū lán tùi sìn hòe-bô lu̍t-hoat mah? Toàn-toàn m̄ sī; hoán-tńg sī hō͘ lu̍t-hoat khiā-chāi.

1Án-ni咱beh講，咱肉體ê祖亞伯拉罕有得tio̍h甚麼？Án-ni lán beh kóng lán jio̍k-thé ê chó͘ A-pek-la̍h-hán ū tit-tio̍h sím-mi̍h?

2因為亞伯拉罕若tùi所行得tio̍h稱做義，就thang誇口；總是tùi上帝本是無。In-ūi A-pek-la̍h-hán nā tùi só͘ kiâⁿ tit-tio̍h chheng-chòe-gī, chiū thang khoa-kháu; chóng-sī tùi Siōng-tè pún sī bô.

3因為聖經講甚麼？亞伯拉罕信上帝，就kā伊算做義。In-ūi sèng-keng kóng sím-mi̍h? A-pek-la̍h-hán sìn Siōng-tè, chiū kā i sǹg chòe gī.

4Taⁿ見若做工ê，伊ê工錢無算是恩典，算是應該ê。Taⁿ kìⁿ-nā chòe kang ê, i ê kang-chîⁿ bô sǹg sī un-tián, sǹg sī eng-kai ê.

5若是無做工ê，獨獨信hit-ê稱不虔ê人做義ê，伊ê信就kā伊算做義。Nā-sī bô chòe kang ê, to̍k-to̍k sìn hit ê chheng put-khiân ê lâng chòe gī ê, i ê sìn chiū kā i sǹg chòe gī.

6親像大衛也講起人lóng無所行，來得tio̍h上帝算伊做義ê，有福氣，是講，Chhin-chhiūⁿ Tāi-pi̍t iā kóng-khí lâng lóng bô só͘ kiâⁿ, lâi tit-tio̍h Siōng-tè sǹg i chòe gī ê, ū hok-khì, sī kóng,

7In ê不法得tio̍h赦免， In ê罪惡得tio̍ih遮蓋，hit號人有福氣；In ê put-hoat tit-tio̍h sià-bián, In ê chōe-ok tit-tio̍ih jia-khàm, hit hō lâng ū hok-khì;

8主無beh用罪算伊ê賬ê，hit-ê人有福氣。Chú bô beh ēng chōe sǹg i ê siàu ê, hit ê lâng ū hok-khì.

9Taⁿ chit-ê福氣是到tī受割禮ê，á是也到tī無受割禮ê ah？因為咱teh講，亞伯拉罕ê信是kā伊算做義。Taⁿ chit ê hok-khì sī kàu tī siū kat-lé ê, á-sī iā kàu tī bô siū kat-lé ê ah? in-ūi lán teh kóng, A-pek-la̍h-hán ê sìn sī kā i sǹg chòe gī.

10Án-ni是怎樣算？是tī割禮ê時，á是tī無割禮ê時？m̄是tī割禮ê時，是tī無割禮ê時；Án-ni sī cháiⁿ-iūⁿ sǹg? Sī tī kat-lé ê sî, á-sī tī bô kat-lé ê sî? M̄ sī tī kat-lé ê sî, sī tī bô kat-lé ê sî;

11伊也得tio̍h割禮ê記號，就是tī無受割禮ê時tùi信所有ê義ê印信；hō͘伊thang做lóng總無受割禮來信ê人ê父，hō͘義thang算做in ê；i iā tit-tio̍h kat-lé ê kì-hō, chiū-sī tī bô siū kat-lé ê sî tùi sìn só͘ ū ê gī ê ìn-sìn; hō͘ i thang chòe lóng-chóng bô siū kat-lé lâi sìn ê lâng ê pē, hō͘ gī thang sǹg chòe in ê;

12也hō͘伊做受割禮ê人ê父，就是hiah-ê m̄-nā受割禮，koh有thàn咱ê父亞伯拉罕未受割禮ê時來信ê腳步ê。iā hō͘ i chòe siū kat-lé ê lâng ê pē, chiū-sī hiah ê m̄ nā siū kat-lé, koh ū thàn lán ê pē A-pek-la̍h-hán bē siū kat-lé ê sî lâi sìn ê kha-pō͘ ê.

13因為所應允亞伯拉罕kap伊ê後裔做後嗣承接世間ê，m̄是tùi律法，是tùi信ê義。In-ūi só͘ èng-ún A-pek-la̍h-hán kap i ê hō͘-è chòe hō͘-sû sêng-chiap sè-kan ê, m̄ sī tùi lu̍t-hoat, sī tùi sìn ê gī.

14因為若屬律法ê做後嗣，信就歸tī空空，應允也廢無。In-ūi nā sio̍k lu̍t-hoat ê chòe hō͘-sû, sìn chiū kui tī khang-khang, èng-ún iā hòe-bô.

15因為律法是致到受氣；若無律法，就無犯tio̍h。In-ūi lu̍t-hoat sī tì-kàu siū-khì; nā bô lu̍t-hoat, chiū bô hoān-tio̍h.

16所以是tùi信，thang照恩典，beh hō͘應允堅固tī眾後裔，m̄-nā tī hit-ê屬律法ê，也tī屬亞伯拉罕ê信ê，Só͘-í sī tùi sìn, thang chiàu un-tián, beh hō͘ èng-ún kian-kò͘ tī chèng hō͘-è, m̄ nā tī hit ê sio̍k lu̍t-hoat ê, iā tī sio̍k A-pek-la̍h-hán ê sìn ê,

17伊tī伊所信ê上帝ê面前做咱眾人ê父，就是hit-ê hō͘死人koh活，叫hiah-ê無ê ná親像有ê ê上帝；照所記載講，我設立你做chōe-chōe邦國ê父。i tī i só͘ sìn ê Siōng-tè ê bīn-chêng chòe lán chèng lâng ê pē, chiū-sī hit ê hō͘ sí lâng koh-oa̍h, kiò hiah ê bô-ê ná chhin-chhiūⁿ ū-ê ê Siōng-tè; chiàu só͘ kì-chài kóng, Góa siat-li̍p lí chòe chōe-chōe pang-kok ê pē.

18伊tī無thang ǹg望ê中間，tùi ǹg望來信，hō͘伊thang成做chōe-chōe邦國ê父，照所bat講ê，你ê後裔beh親像án-ni。I tī bô thang ǹg-bāng ê tiong-kan, tùi ǹg-bāng lâi sìn, hō͘ i thang chiâⁿ-chòe chōe-chōe pang-kok ê pē, chiàu só͘ bat kóng ê, Lí ê hō͘-è beh chhin-chhiūⁿ án-ni.

19伊想tio̍h家己ê身軀親像已經死，(hit時chiâⁿ百歲)，koh撒拉ê胎孕已經絕，伊ê信無軟chiáⁿ；I siūⁿ-tio̍h ka-kī ê seng-khu chhin-chhiūⁿ í-keng sí, (hit sî chiâⁿ pah hè), koh Sat-la̍h ê thai-īn í-keng choa̍t, i ê sìn bô nńg-chiáⁿ;

20伊看上帝ê應允，也無tùi m̄信來僥疑；i khòaⁿ Siōng-tè ê èng-ún, iā bô tùi m̄ sìn lâi giâu-gî;

21信就ná勇健，來歸榮光上帝；sìn chiū ná ióng-kiāⁿ, lâi kui êng-kng Siōng-tè;

22koh深信上帝能成伊所應允ê；所以kā伊算做義。koh chhim sìn Siōng-tè ōe chiâⁿ I só͘ èng-ún ê; só͘-í kā i sǹg chòe gī.

23Taⁿ所講，kā伊算，chit句m̄是kan-ta為tio̍h伊來寫，也是為tio̍h咱；Taⁿ só͘ kóng, kā i sǹg, chit kù m̄ sī kan-ta ūi-tio̍h i lâi siá, iā sī ūi-tio̍h lán;

24咱若信靠hit-ê hō͘咱ê主耶穌tùi死人中koh活ê上帝，也beh kā咱算做義。lán nā sìn-khò hit ê hō͘ lán ê Chú Iâ-so͘ tùi sí-lâng tiong koh-oa̍h ê Siōng-tè, iā beh kā lán sǹg chòe gī.

25耶穌bat為tio̍h咱ê罪受解送，koh為tio̍h咱ê稱做義來得tio̍h koh活。Iâ-so͘ bat ūi-tio̍h lán ê chōe siū ké-sàng, koh ūi-tio̍h lán ê chheng-chòe-gī lâi tit-tio̍h koh-oa̍h.

1所以咱已經tùi信稱做義，就對咱ê主耶穌基督有kap上帝和；Só͘-í lán í-keng tùi sìn chheng-chòe-gī, chiū tùi lán ê Chú Iâ-so͘ Ki-tok ū kap Siōng-tè hô;

2也óa靠伊，tùi信來入tī現今所tòa ê恩典，koh ǹg望上帝ê榮光來歡歡喜喜。iā óa-khò I, tùi sìn lâi ji̍p tī hiān-kim só͘ tòa ê un-tián, koh ǹg-bāng Siōng-tè ê êng-kng lâi hoaⁿ-hoaⁿ hí-hí.

3M̄-nā án-ni，就tī患難也歡歡喜喜，因為知患難生出吞忍；吞忍生出老練；M̄ nā án-ni, chiū tī hoān-lān iā hoaⁿ-hoaⁿ hí-hí, in-ūi chai hoān-lān siⁿ-chhut thun-lún; thun-lún siⁿ-chhut láu-liān;

4老練生出ǹg望；也ǹg望無致到見笑；láu-liān siⁿ-chhut ǹg-bāng; iā ǹg-bāng bô tì-kàu kiàn-siàu;

5因為上帝ê疼tùi所賞賜咱ê聖神來灌ak咱ê心。in-ūi Siōng-tè ê thiàⁿ tùi só͘ siúⁿ-sù lán ê Sèng Sîn lâi koàn-ak lán ê sim.

6因為咱iáu-kú軟弱ê時，基督到期替有罪ê人死。In-ūi lán iáu-kú loán-jio̍k ê sî, Ki-tok kàu-kî thòe ū chōe ê lâng sí.

7因為替義人死ê，oh得有；替好人死ê，kiám-chhái有人敢。In-ūi thòe gī-lâng sí ê, oh-tit ū; thòe hó-lâng sí ê, kiám-chhái ū lâng káⁿ.

8但是上帝顯明伊本身疼咱ê疼痛，因為咱iáu-kú做罪人ê時，基督替咱死；Nā-sī Siōng-tè hián-bêng I pún-sin thiàⁿ lán ê thiàⁿ-thàng, in-ūi lán iáu-kú chòe chōe-jîn ê sî, Ki-tok thòe lán sí;

9何況咱已經tī伊ê血得tio̍h稱做義beh tùi伊得tio̍h救，免得hit-ê受氣ah。hô-hòng lán í-keng tī I ê huih tit-tio̍h chheng-chòe-gī beh tùi I tit-tio̍h kiù, bián-tit hit ê siū-khì ah.

10若咱iáu-kú做對敵ê時，tùi伊ê Kiáⁿ ê死得tio̍h kap上帝koh和，何況已經koh和，beh tī伊ê活得tio̍h救ah。Nā lán iáu-kú chòe tùi-te̍k ê sî, tùi I ê Kiáⁿ ê sí tit-tio̍h kap Siōng-tè koh hô, hô-hòng í-keng koh hô, beh tī I ê oa̍h tit-tio̍h kiù ah.

11M̄-nā án-ni，咱現今已經對咱ê主耶穌基督得tio̍h koh和，就對伊也掠上帝做thang誇口。M̄ nā án-ni, lán hiān-kim í-keng tùi lán ê Chú Iâ-so͘ Ki-tok tit-tio̍h koh hô, chiū tùi I iā lia̍h Siōng-tè chòe thang khoa-kháu.

12所以親像罪tùi一人入世間，死也tùi罪入，án-ni死遍遍到tī眾人，因為眾人bat犯罪；Só͘-í chhin-chhiūⁿ chōe tùi chi̍t lâng ji̍p sè-kan, sí iā tùi chōe ji̍p, án-ni sí piàn-piàn kàu tī chèng lâng, in-ūi chèng lâng bat hoān-chōe;

13因為律法未到ê時，罪已經tī世間；獨獨無律法tī-teh，罪就無算賬；in-ūi lu̍t-hoat bē kàu ê sî, chōe í-keng tī sè-kan; to̍k-to̍k bô lu̍t-hoat tī-teh, chōe chiū bô sǹg-siàu;

14總是tùi亞當到摩西，連hiah-ê無犯罪親像亞當患tio̍h禁令ê款ê，死也lóng管轄in；亞當是tè後到ê ê相對。chóng-sī tùi A-tong kàu Mô͘-se, liân hiah ê bô hoān-chōe chhin-chhiūⁿ A-tong hoān-tio̍h kìm-lēng ê khoán ê, sí iā lóng koán-hat in; A-tong sī tè-āu kàu ê ê saⁿ-tùi.

15但是罪過不比恩賜。因為若tùi一人ê罪過眾人死，何況上帝ê恩典，kap tī耶穌基督一人恩典中ê賞賜，充滿tī眾人ah。Nā-sī chōe-kòa put-pí un-sù. In-ūi nā tùi chi̍t lâng ê chōe-kòa chèng lâng sí, hô-hòng Siōng-tè ê un-tián, kap tī Iâ-so͘ Ki-tok chi̍t lâng un-tián tiong ê siúⁿ-sù, chhiong-móa tī chèng lâng ah.

16Koh tùi一人ê犯罪，也不比恩賜；因為審判是tùi一人，致到定罪，但是恩賜是tùi chōe-chōe罪過，致到斷做義。Koh tùi chi̍t lâng ê hoān-chōe, iā put-pí un-sù; in-ūi sím-phòaⁿ sī tùi chi̍t lâng, tì-kàu tēng chōe, nā-sī un-sù sī tùi chōe-chōe chōe-kòa, tì-kàu toàn chòe gī.

17因為若為tio̍h一人ê罪過，死就tùi一人做王，何況hiah-ê受恩典kap義ê賞賜ê充滿ê，beh tùi耶穌基督一個，tī活ê中間，做王ah。In-ūi nā ūi-tio̍h chi̍t lâng ê chōe-kòa, sí chiū tùi chi̍t lâng chòe ông, hô-hòng hiah ê siū un-tián kap gī ê siúⁿ-sù ê chhiong-móa ê, beh tùi Iâ-so͘ Ki-tok chi̍t-ê, tī oa̍h ê tiong-kan, chòe ông ah.

18Án-ni親像tùi一pái ê罪過有致到眾人受定罪，就tùi一pái義ê所行也致到眾人受擬斷得tio̍h活。Án-ni chhin-chhiūⁿ tùi chi̍t pái ê chōe-kòa ū tì-kàu chèng lâng siū tēng chōe, chiū tùi chi̍t pái gī ê só͘ kiâⁿ iā tì-kàu chèng lâng siū gí-toàn tit-tio̍h oa̍h.

19因為親像tùi一人ê違逆hō͘眾人做有罪ê，就tùi一人ê順thàn hō͘眾人做有義 ê，也是án-ni。In-ūi chhin-chhiūⁿ tùi chi̍t lâng ê ûi-ke̍h hō͘ chèng lâng chòe ū chōe ê, chiū tùi chi̍t lâng ê sūn-thàn hō͘ chèng lâng chòe ū gī ê, iā sī án-ni.

20Koh加chham律法落去，beh hō͘罪過加添chōe-chōe。總是罪過chōe-chōe，就恩典tī hia益發充滿；Koh ke-chham lu̍t-hoat lo̍h-khì, beh hō͘ chōe-kòa ke-thiⁿ chōe-chōe. Chóng-sī chōe-kòa chōe-chōe, chiū un-tián tī hia it-hoat chhiong-móa;

21就是親像罪bat做王tī死ê中間，也beh hō͘恩典親像án-ni tùi義來做王致到永活，是對咱ê主耶穌基督。chiū-sī chhin-chhiūⁿ chōe bat chòe ông tī sí ê tiong-kan, iā beh hō͘ un-tián chhin-chhiūⁿ án-ni tùi gī lâi chòe ông tì-kàu éng-oa̍h, sī tùi lán ê Chú Iâ-so͘ Ki-tok.